Dɛn Nti Na Ɛsɛ Sɛ Wohyɛ Ahobrɛase?

NA AMERIKANI ɔkyerɛwfo Edgar Allan Poe akenkan n’ayɛsɛm foforo no akyerɛ ne nnamfo bi awie. Wɔka de dii agoru sɛ ɔde nea asɛm no fa no ho no din adi dwuma wom dodo. Poe yɛɛ n’ade dɛn wɔ ho? N’adamfo biako kae sɛ: “Na n’ahantan honhom no rennyina baguam nkaanim a ɛte sɛɛ ano, ma enti ansa na ne nnamfo betumi asiw no kwan no, na ɔde abufuw atow krataa no mu biara akyene ogya bi a ɛredɛw mu.” Ayɛsɛm a na “aseresɛm wom yiye, a n’awerɛhosɛm a ɔtaa kyerɛw no . . . nnim koraa” no yerae. Anka ahobrɛase remma ɛnsɛe.

Ɛwom sɛ ahantan ma nnipa yɛ nneɛma a nyansa nnim de, nanso abu so wɔ wiase no mu. Nanso ɛsɛ sɛ Yehowa nkoa yɛ soronko. Ɛsɛ sɛ wɔhyɛ ahobrɛase atade a wɔayɛ no yiye no.

Dɛn ne Ahobrɛase?

Ɔsomafo Paulo kaa Kristofo atade fɛfɛ a ɛne ahobrɛase no ho asɛm bere a ɔkyerɛw ne mfɛfo gyidifo a na wɔwɔ tete kurow Kolose mu no. Ɔhyɛe sɛ: “Enti sɛ moyɛ nnipa a Onyankopɔn apaw mo, ahotefo ne adɔfo yi, monhyɛ ayamhyehye, ayamye, ahobrɛase adwene, odwo, abodwokyɛre.”​—Kolosefo 3:12.

Yiw, ahobrɛase yɛ “ahobrɛase adwene.” Ɛyɛ ‘adwene a ɛbrɛ ne ho ase; ɛnyɛ ahantan; odwo.’ Ɔhobrɛasefo “dwo wɔ honhom mu; ɔnyɛ ahantan.” ‘Obu ade yiye.’ (The World Book Dictionary, Po I, kratafa 1030) Ahobrɛase nkyerɛ ehu anaa mmerɛwyɛ. Nokwarem no, ahantan da mmerɛwyɛ adi, na ahobrɛase a wɔda no adi taa gye akokoduru ne ahoɔden.

Wɔ Kyerɛwnsɛm no mu no, nea Hebri asɛmfua a wɔakyerɛ ase sɛ “brɛ wo ho ase” no kyerɛ ankasa ne sɛ “tiatia wo ho so wɔ fam.” Enti, Mmebusɛm kyerɛwfo nyansafo no de afotu mae sɛ: “Me ba . . . sɛ wɔnam w’anom asɛm so akyere wo a, . . . yi wo ho, efisɛ woatɔ wo yɔnko nsam; kɔ kɔkotow, [tiatia wo ho so wɔ fam] na srɛ wo yɔnko no.” (Mmebusɛm 6:1-3) Ɛkyerɛ sɛ tow ahantan kyene, gye wo mfomso tom, na siesie nsɛm.

Ɛsɛ sɛ Ɛyɛ Nokware

Ɛnyɛ wɔn a wɔyɛ wɔn ho sɛ wɔwɔ ahobrɛase no nyinaa na wɔwɔ nokware ahobrɛase. Ebia ebinom a ɛte sɛ nea wɔbrɛ wɔn ho ase no yɛ ahantan ankasa, na wɔbɛyɛ nea wobetumi nyinaa de anya nea wɔpɛ. Afei afoforo nso wɔ hɔ a wɔde atoro ahobrɛase di dwuma na wɔasɔ afoforo ani. Sɛ nhwɛso no, Paulo hyiaa ebinom a wɔdaa ‘atoro ahobrɛase’ adi, na ɔkyerɛe sɛ obiara a ɔyɛ saa no “honam adwene ma ɔhoran kwa” ankasa. Onipa a ɔte sɛɛ no nyaa adwene a ɛnteɛ sɛ Onyankopɔn anim dom a obenya no gyina nea ebia odi, ɔnom, anaa nneɛma bi a oso mu anaa nyamesom nna a odi anaa onni no so. Ɛwom, ebia ɔyɛe sɛ nea ɔpɛ Onyankopɔn som na ɔbrɛ ne ho ase, nanso mfaso nni n’atoro ahobrɛase no so. (Kolosefo 2:18, 23) Nokwarem no, ɛmaa onyaa adwene sɛ wɔde nkwa nkonimbo no ma wɔn a wɔpow honam fam nneɛma. Ɛde anifere kwan so honam fam ade dodowpɛ bi nso bae, efisɛ anigyede a ɔpow no twee adwene sii honam fam nneɛma a ɔkyerɛe sɛ okyi no so.

Nea ɛne eyi bɔ abira no, nokware ahobrɛase siw obi kwan sɛ ɔde ntadehyɛ, ahosiesie, ne n’asetra kwan bɛkyerɛ sɛ ɔyɛ otitiriw. (1 Yohane 2:15-17) Obi a ɔhyɛ ahobrɛase atade ntwe adwene mma ne ho ne nea otumi yɛ no so sɛnea ɛmfata. Mmom no, ahobrɛase boa no ma ɔne afoforo di wɔ ɔkwan a ɛkyerɛ sɛ odwen wɔn ho so, na ohu ne ho sɛnea Onyankopɔn hu no. Na ohu no dɛn?

Yehowa Adwene

Bere a na odiyifo Samuel rebɛsra ɔhene foforo ama Israel man no, osusuwii sɛ Yisai babarima Eliab na Yehowa apaw no. Nanso Onyankopɔn ka kyerɛɛ Samuel sɛ: “Nhwɛ ne ho tebea ne ne nipadua tentenyɛ, na mempɛ no; na menhwɛ nea onipa hwɛ, na onipa hwɛ nea etua aniwa, na [Yehowa] de, ɔhwɛ komam.” Ɔpow Yisai mmabarima baason. Nea Onyankopɔn paw no ne Dawid a ɔdaa ne ho adi sɛ ɔbarima nokwafo ne ɔhobrɛasefo.​—1 Samuel 13:14; 16:4-13.

Ahobrɛase atade no bɔ yɛn ho ban na yɛanyɛ ahantan, ahomaso​—na Onyankopɔn ani ansɔ yɛn. “Osiw ahantanfo kwan, na ɔdom ahobrɛasefo.” (Yakobo 4:6) Ɔda adwene a okura no adi wɔ odwontofo no nsɛm yi mu: “[Yehowa] wɔ ɔsorosoro, na ɔhwɛ ahobrɛasefo, na ahantanfo de, ohu wɔn wɔ akyirikyiri.” (Dwom 138:6; 1 Petro 5:5, 6) Nea Onyankopɔn hwehwɛ sɛ ne nkoa yɛ no da adi wɔ asɛm yi a wobisa wɔ Mika 6:8 no mu: “Na dɛn na Yehowa hwehwɛ afi wo hɔ sen sɛ woyɛ adetrenee, na wodɔ ayamye na wode ahobrɛase ne wo Nyankopɔn nantew?” (New World Translation)

Onyankopɔn ne Kristo Daa no Adi

Ɛnyɛ nwonwa sɛ Yehowa hwɛ kwan sɛ yebeyi ahobrɛase adi akyerɛ. Ɛyɛ n’ankasa su horow no biako. Bere a Onyankopɔn gyee Dawid fii n’atamfo nsam no, ɔtoo dwom sɛ: “[Yehowa] womaa me wo nkwagye kyɛm, . . . na [w’ahobrɛase] ma meyɛɛ kɛse.” (Dwom 18:35; 2 Samuel 22:1, 36) Ɛwom sɛ Yehowa wɔ ɔsorosoro de, nanso “ɔbrɛ ne ho ase hwɛ fam, ɔsoro ne asase so? Ɔma ɔbrɛfo so fi mfutuma mu, na ɔma ohiani so fi sumina so, sɛ ɔde no bɛtra mmapɔmma nkyɛn.” (Dwom 113:5-8) Onyankopɔn da ahobrɛase adi denam mmɔborohunu a oyi adi kyerɛ adesamma abɔnefo no so. Sɛnea ɔne abɔnefo di, ne ne Ba no a ɔde no mae sɛ yɛn bɔne ho afɔrebɔde no da n’ahobrɛase, ɔdɔ ne su afoforo adi.​—Romafo 5:8; 8:20, 21.

Yesu Kristo a na ‘odwo na ɔbrɛ ne ho ase koma mu’ no yɛɛ onipa ahobrɛase ho nhwɛso a ɛsen biara. (Mateo 11:29) Ɔka kyerɛɛ n’asuafo sɛ: “Na obiara a ɔbɛma ne ho so no, wɔbɛbrɛ no ase; na obiara a ɔbɛbrɛ ne ho ase no, wɔbɛma no so.” (Mateo 23:12) Ɛno nyɛ nsɛm a wɔagugu mu dodo. Anwummere ansa na Yesu rewu no, ɔhohoroo n’asomafo no nan ase, adwuma a na nkoa na wɔyɛ. (Yohane 13:2-5, 12-17) Yesu de ahobrɛase som Onyankopɔn ansa na ɔreba asase so, na wada ahobrɛase adi fi bere a wonyan no fii awufo mu maa no dibea a ɛkorɔn wɔ soro no. Enti Paulo tuu ne mfɛfo gyidifo fo sɛ ‘wommu wɔn yɔnkonom nkyɛn wɔn ho,’ na wonnya Yesu Kristo ahobrɛase su no bi.​—Filipifo 2:3, 5-11.

Esiane sɛ Onyankopɔn ne Kristo da ahobrɛase adi nti, ɛsɛ sɛ wɔn a wɔpɛ sɛ wonya ɔsoro mpeneso no da su yi adi. Sɛ yɛayɛ ahantan wɔ mmere horow bi mu a, ɛbɛyɛ nea nyansa wom sɛ yɛbɛbrɛ yɛn ho ase na yɛabɔ mpae asrɛ Onyankopɔn fafiri. (Fa toto 2 Beresosɛm 32:24-26 ho.) Na sɛ anka yebenya ahomaso adwene afa yɛn ankasa ho mmom no, ehia sɛ yɛde Paulo afotu yi di dwuma: “Munnnwinnwen nneɛma akɛse ho, na mmom momma ahobrɛasede mfa mo ho!” (Romafo 12:16) Ɛnde, ɔkwan bɛn so na ahobrɛase betumi aba yɛne afoforo ho mfaso?

Ahobrɛase so Mfaso

Ahobrɛase so mfaso biako ne sɛ ɛmma yɛnhoahoa yɛn ho. Enti ɛmma yɛnhyɛ afoforo abufuw, na yɛn ani nwu bere a wɔn ani nnye nea yɛatumi ayɛ ho no. Ɛsɛ sɛ yɛhoahoa yɛn ho wɔ Yehowa mu, ɛnyɛ yɛn ho mu.​—1 Korintofo 1:31.

Ahobrɛase boa yɛn ma yegye ɔsoro akwankyerɛ. Yehowa somaa ɔbɔfo ma ɔde anisoadehu brɛɛ Daniel efisɛ saa odiyifo no brɛɛ ne ho ase wɔ Onyankopɔn anim bere a ɔrehwehwɛ akwankyerɛ ne ntease no. (Daniel 10:12) Bere na Esra rebedi Yehowa nkurɔfo anim afi Babilon a wokura sika kɔkɔɔ ne dwetɛ pii a wɔde besiesie Yerusalem asɔrefi no ma ayɛ fɛ no, ɔkae sɛ wonni mmuada sɛnea ɛbɛyɛ na wɔatumi abrɛ wɔn ho ase wɔ Onyankopɔn anim. Dɛn na efii mu bae? Yehowa bɔɔ wɔn ho ban fii atamfo ntua ho wɔ akwantu a na ɛyɛ hu no mu. (Esra 8:1-14, 21-32) Te sɛ Daniel ne Esra no, momma yɛnna ahobrɛase adi na yɛnhwehwɛ Yehowa akwankyerɛ mmom sen sɛ yɛde yɛn ankasa nyansa ne ahoɔden bɛyɛ adwuma a Onyankopɔn de ama yɛn no.

Sɛ yɛhyɛ ahobrɛase atade no a, yɛbɛkyerɛ obu ama afoforo. Sɛ nhwɛso no, mmofra a wɔwɔ ahobrɛase no bu wɔn awofo na wɔyɛ osetie ma wɔn. Kristofo ahobrɛasefo bu wɔn mfɛfo gyidifo a ɛsono aman ne mmusua a wofi mu, ne wɔn nsɛm tebea, efisɛ ahobrɛase mma yɛnhwɛ nnipa anim.​—Asomafo no Nnwuma 10:34, 35; 17:26.

Ahobrɛase ma ɔdɔ ne asomdwoe kɔ so. Ɔhobrɛasefo ne ne mfɛfo gyidifo nko na ɔde abɔ mmɔden ama wɔahu nea ɔkyerɛ sɛ ɛyɛ hokwan ahorow a ɔwɔ. Paulo yɛɛ nneɛma a ɛma denhyɛ a ɛrenhaw onua bi ahonim nkutoo. (Romafo 14:19-21; 1 Korintofo 8:9-13; 10:23-33) Ahobrɛase boa yɛn nso ma yɛma ɔdɔ ne asomdwoe kɔ so denam afoforo a wɔyɛ bɔne tia yɛn a yɛde firi wɔn no so. (Mateo 6:12-15; 18:21, 22) Ɛka yɛn ma yɛkɔ obi a yɛafom no no nkyɛn, yegye yɛn mfomso tom, yebisa ne fafiri, na yɛyɛ nea yebetumi de siesie mfomso biara a ebia yɛayɛ no. (Mateo 5:23, 24; Luka 19:8) Sɛ obi a yɛafom no ba yɛn nkyɛn a, ahobrɛase ka yɛn ma yɛde ɔdɔ honhom siesie nsɛm wɔ asomdwoe mu.​—Mateo 18:15; Luka 17:3.

Nkwagye gyina ahobrɛase a wɔda no adi so. Sɛ nhwɛso no, wɔkaa Onyankopɔn ho asɛm sɛ: “Wubegye ahobrɛasefo; nanso w’ani sa ahantanfo na woabrɛ wɔn ase.” (2 Samuel 22:28, NW) Sɛ Ɔhene Yesu Kristo ‘tew mu kɔ wɔ nokware, ahobrɛase, ne trenee mu a,’ obegye wɔn a wɔbrɛ wɔn ho ase wɔ ɔno ne n’Agya anim no. (Dwom 45:4) Wɔn a wɔda ahobrɛase adi no betumi anya awerɛkyekye wɔ nsɛm yi mu: “Monhwehwɛ [Yehowa], asase sofo a mobrɛ mo ho ase na moyɛ n’atemmude nyinaa! Monhwehwɛ trenee, monhwehwɛ ahobrɛase; ebia wɔbɛkora mo so, [Yehowa] abufuw da no.”​—Sefania 2:3.

Ahobrɛase ne Onyankopɔn Ahyehyɛde

Ahobrɛase ma Onyankopɔn nkurɔfo kyerɛ n’ahyehyɛde ho anisɔ, na wɔtra mu sɛ mudi mu kurafo. (Fa toto Yohane 6:66-69 ho.) Sɛ wɔamfa ɔsom mu hokwan a na yɛhwɛ kwan sɛ yebenya no amma yɛn a, ahobrɛase boa yɛn ma yɛne wɔn a wodi asɛyɛde ho dwuma wɔ asafo no mu no yɛ biako. Ahobrɛase mu a yefi ne wɔn yɛ biako no yɛ nhwɛso pa.

Ɔkwan foforo so no, ahobrɛase mma yɛmfa ɔsom mu hokwan ahorow a yɛwɔ wɔ Yehowa nkurɔfo mu no nhoahoa yɛn ho. Ɛmma yɛnhwehwɛ nkamfo wɔ adwuma a yɛanya hokwan yɛ wɔ Onyankopɔn ahyehyɛde mu no ho. Bio nso, sɛ yɛresom sɛ mpanyimfo a, ahobrɛase boa yɛn ma yɛyɛ Onyankopɔn nguankuw no brɛbrɛ.​—Asomafo no Nnwuma 20:28, 29; 1 Petro 3:8.

Ahobrɛase ne Nteɛso

Ahobrɛase atade boa yɛn ma yegye nteɛso tom. Ahobrɛasefo nte sɛ Yuda Hene Usia a ne koma maa ne ho so ma enti ogyee asɔfo nnwuma yɛe no. ‘Ɔfom Yehowa, na ɔhyɛn asɔredan mu sɛ ɔrekɔhyew aduhuam wɔ aduhuamhyew muka so.’ Bere a Usia bo fuwii asɔfo no sɛ wɔteɛɛ no so nti no, wɔde kwata bɔɔ no. Ahobrɛase a wannya ho asotwe bɛn ara ni! (2 Beresosɛm 26:16-21; Mmebusɛm 16:18) Ɛnsɛ sɛ woyɛ sɛ Usia da, na mma ahantan nsiw wo kwan sɛ wubegye Onyankopɔn nteɛso a wɔnam N’Asɛm ne n’ahyehyɛde so de ma no atom.

Paulo ka kyerɛɛ Hebrifo Kristofo a wɔasra wɔn no faa eyi ho sɛ: “Mo werɛ afi afotu a ɛkasa kyerɛ mo sɛ mma no sɛ: Me ba, mmu [Yehowa] asotwe ade ketewa, nanso oyi wo ntɛn a, mma wo bo nntu. Na nea [Yehowa] dɔ no no na ɔtwe n’aso, na ɔhwe ɔba biara a ogye no. . . . Na asotwe biara asotwe, mprempren de, ɛnyɛ yɛn sɛ anigyede, na mmom awerɛhowde, nanso akyiri no, ɛsow asomdwoe aba a ɛyɛ trenee ma wɔn a wɔnam so asɔ wɔn ahwɛ no.” (Hebrifo 12:5-11) Kae nso sɛ, “na nteɛso nkaanim yɛ nkwa kwan.”​—Mmebusɛm 6:23.

Kɔ so Hyɛ Ahobrɛase

Hwɛ sɛnea ɛho hia sɛ Kristofo hyɛ ahobrɛase atade bere nyinaa! Ɛka yɛn ma yɛkɔ so gyina sɛ Ahenni adawurubɔfo, na yɛde ahobrɛase di adanse wɔ afie afie dɛ hwehwɛ wɔn a “wɔpɛ sɛ wonya daa nkwa.” (Asomafo no Nnwuma 13:48; 20:20) Nokwarem no, ahobrɛase boa yɛn ma yetie Onyankopɔn wɔ biribiara mu, ɛwom sɛ asɔretiafo ahantanfo kyi yɛn trenee kwan no de.​—Dwom 34:21.

Esiane sɛ ahobrɛase ka yɛn ma ‘yɛde yɛn koma nyinaa to Yehowa so’ nti, ɔteɛ yɛn akwan. (Mmebusɛm 3:5, 6) Nokwarem no, sɛ yɛhyɛ su pa yi nkutoo a, na yebetumi ne Onyankopɔn anantew nokwarem na yɛanya n’anim dom ne ne nhyira. Sɛnea osuani Yakobo kyerɛwee no: “Mommrɛ mo ho ase [Yehowa] anim, na ɔbɛma mo so.” (Yakobo 4:10) Enti momma yɛnhyɛ ahobrɛase, atade fɛfɛ a Yehowa Nyankopɔn na ɔyɛe no.