Bible No Adwene

Ɛyɛ Onyankopɔn Anigye sɛ Yebehu Amane?

ƆBARIMA bi a ɔsõ mmeamudua kɛse bi a emu yɛ duru na ɔrebrɛ ntumi ntutu ne nan yiye wɔ nnipadɔm no mu, na mogya resosɔw fi nsɔe abotiri bi a ɛhyɛ no mu. Bere a odu baabi a “wɔrekokum” no no, wɔde no fam mmeamudua no ho; wɔde nnadewa akɛse bobɔ ne nsam. Ɔde ɛyaw kyinkyim ne ho bere a nnadewa no wura ne honam mu no. Bere a wɔma mmeamudua no so si hɔ no, ɛyaw no mu yɛ den mmoroso. Sɛnea Panorama a ɛyɛ Philippines nsɛmma nhoma bi kyerɛ no, Dapɛn Kronkron afahyɛ biara, wɔyɛ saa ayayade amanne yi wɔ Philippines.

Nea yɛaka ho asɛm seesei ara no yɛ Yesu amanehunu ahorow ho ɔyɛkyerɛ a wɔyɛ no nnɛ bere yi mu. Nanso ɛnyɛ sɛ saa barima yi reyɛ ɔyɛkyerɛ bi kɛkɛ. Nnadewa no, mogya no, ɛyaw no—ne nyinaa yɛ asɛm paa.

Wɔ mmeae foforo no, wotumi hu Roma Katolekfo a wɔwɔ ahofama sɛ wɔde abaa rehwe wɔn ho, esiane sɛ wɔpɛ sɛ wohu amane a Kristo hui no bi nti. Dɛn ntia? Nea enti a ebinom yɛ eyi ne sɛ wogye di sɛ wɔn amanehunu ahorow no bɛma wɔayɛ anwonwade, te sɛ wɔn adɔfo a wɔyare a wɔbɛsa wɔn yare. Afoforo nso yɛ saa de pata bɔne a wosuro sɛ sɛ wɔanhwie wɔn ankasa mogya angu a wonnya ho bɔne fafiri. Nhoma a ɛne The Filipinos kyerɛkyerɛ mu sɛ: “Ɛyaw boa tew adwene ne ɔkra no ho. . . . Ɛsɛ sɛ ɔbɔnefo no fi ɛyaw no mu a ne ho atew wɔ bɔne ho na ne nnosoa afi ne so.”

Nanso, ɛnyɛ Katolekfo a wɔwɔ Philippines nkutoo na wɔn ankasa yɛ wɔn ho ayayade. Nnipa a wofi ɔsom ne aman ahorow mu gye di sɛ ayayade a obi ankasa yɛ ne ho no ma onya gyinabea pa wɔ Onyankopɔn anim.

Sɛ nhwɛso no, bere a Buddha no, Siddhārtha Gautama, rehwehwɛ nokware no, ogyaw ne yere ne ne babarima hɔ guan kɔɔ anhweatam no so kɔtraa hɔ sɛ kokorani mfe asia. Ogyinaa hɔ wɔ ɔkwan a enye na ɛyɛ yaw so, na akyiri yi ɔkyerɛe sɛ ɔtraa ase bere tenten a ɛmo aba biako pɛ na na odi no da biara, na ɔfɔnee araa ma ɔkae sɛ: “Me yafunu bɛfam m’akyi dompe ho.” Nanso ayayade a ɔyɛɛ ne ho no biara antumi amma wannu pɛyɛ a ɔhwehwɛe no ho.

Saa ara na Hindu nkokorafo a wofi India no yɛɛ wɔn ho ayayade ahorow a ɛtɔ da bi a na ɛtra so—na wɔda ogya mu, wɔhwɛ owia kosi sɛ wɔn ani befura, wogyina wɔn nan biako so anaa wogyina hɔ wɔ akwan foforo a ntease nnim so kyɛ. Ná wosusuw sɛ su pa a nkokorafo binom da no adi no dɔɔso araa ma ebetumi abɔ kurow bi ho ban na atamfo antow anhyɛ so.

Saa ara na Bible no ka Baal asomfo a “wɔde nkrante ne mpeaw bobɔɔ wɔn ho akam, sɛ wɔn amanne te no, kosii sɛ mogya guu wɔn so” de bɔɔ mmɔden sɛ wɔbɛma wɔn nyame no atie wɔn, nanso ankosi hwee ho asɛm.—1 Ahene 18:28.

“Mommrɛ Mo Kra Ase”

Ɛwom sɛ ɛyɛ nokware sɛ Yehowa hyɛɛ ne man a wapaw wɔn no sɛ: “mommrɛ mo kra ase” de, nanso wɔte eyi ase mpɛn pii sɛ ɛkyerɛ mmuadadi. (Leviticus 16:31) Ná wɔde mmuadadi a ɛte saa no da awerɛhow ne ahonu adi wɔ bɔne ho anaasɛ na wɔyɛ saa bere a wɔwɔ ahohia tebea mu. Enti, na mmuadadi nyɛ asotwe a obi ankasa de ba ne ho so, na mmom, ɛkyerɛ brɛ a ɔbrɛ ne ho ase wɔ Onyankopɔn anim.—Esra 8:21.

Nanso, Yudafo binom dii mfomso susuwii sɛ ahoyeraw a efi ɔkra a wɔbrɛ no ase mu kɛkɛ no som bo, na na ɛhyɛ Onyankopɔn sɛ ɔno nso mfa biribi ntua wɔn ka. Bere a biribi a ɛte saa biara amma no, wɔmaa wɔn ani traa wɔn ani ntɔn bisaa Onyankopɔn akatua a na wosusuw sɛ ɛsɛ wɔn no: “Ɛdɛn nti na yedi mmuada na wunhu, yɛbrɛ yɛn kra ase na wunnim yi?”—Yesaia 58:3.

Nanso na wɔadi mfomso. Ná nyamesom mu mmuadadi nhwehwɛ sɛ wɔkwati anigyede, na wɔma nipadua no di kɔm te sɛ nea nipadua mu yaw anaa ahoyeraw kɛkɛ som bo. Ná nkate a emu yɛ den betumi ama wɔnte kɔm nka. Sɛ ɔhaw a emu yɛ den hyɛ adwene no so a, ebia nipadua no kɔn rennɔ aduan. Eyi da nkate a emu yɛ den a nea odi mmuada no wɔ adi kyerɛ Onyankopɔn.

Onyankopɔn Ani Gye Ayayade a Obi De Yɛ Ne Ho no Ho?

Ɔbɔadeɛ a ɔwɔ dɔ no nya anigye bi fi hu a ohu sɛ nkurɔfo reyɛ wɔn ho ayayade no mu? Ɛyɛ nokware sɛ ɛtɔ da bi a, wobetumi ahyɛ Kristofo ma wɔayɛ “Kristo amanehunu no fafafo,” nanso eyi nkyerɛ sɛ wɔkɔpɛ asɛm ma wɔn ho anaa wɔhwehwɛ sɛ wobenya abodin sɛ mogya adansefo.—1 Petro 4:13.

Akyinnye biara nni ho sɛ na Yesu nyɛ obi a ɔde anigyede kame ne ho koraa. Nyamesom akannifo no nwiinwii esiane sɛ na n’akyidifo no nni mmuada nti, na wɔkasa tiaa no mpo sɛ ɔyɛ “odidifo ne ɔsanomfo.” (Mateo 9:14; 11:19) Yesu anyɛ ade antra so wɔ biribiara mu, na wanhwehwɛ nea ɛkɔ akyiri dodo amfi n’ankasa anaa afoforo hɔ.—Marko 6:31; Yohane 4:6.

Yenhu wɔ Kyerɛwnsɛm no mu baabiara sɛ ɛsɛ sɛ wɔkwati anigyede, te sɛ nea asetra mu ahiade anaa anigyede mpo a yɛde bɛkame yɛn ho no bɛma yɛanya Onyankopɔn anim dom. Hyɛ ɔsomafo Paulo nsɛm a ɛfa ayayade a ɛtete saa ho yi nsow: “Ɛkɔyɛ sɛ ɛwɔ anyansasɛm, wɔn ankasa pɛ so som ne ahobrɛase ne atirimɔden a wɔbɔ wɔn nipadua mu de, nanso enni bo, na mmom ɔmee nko na ɛma ɔhonam mee.”—Kolosefo 2:23.

Bere a na Martin Luther yɛ ɔkokorani no, ɔyɛɛ ne ho ayayade. Nanso akyiri yi, ɔsɔre tiaa nneyɛe a ɛtete saa kae sɛ na ɛkamfo adwene a ɛne sɛ akwan abien na ɛkɔ Onyankopɔn hɔ, nea ɛkorɔn ne nea ɛba fam, bere a Kyerɛwnsɛm no kyerɛe sɛ ɔkwan biako pɛ na ɛkɔ nkwagye mu—denam Yesu Kristo ne n’Agya Yehowa mu gyidi a wɔkyerɛ so. (Yohane 17:3) Nanso na ebinom bu amanne ahorow a ɛyɛ yaw sɛ ɛyɛ ɔkwan a obi fa so gye ne ho nkwa.

Nhoma Church History in Plain Language ka anigyede a wɔkwati ho asɛm sɛ: “Saa nneyɛe no nyinaa a wogyinaa akyi no yɛ onipa ho adwene a ɛnteɛ. Sɛnea nkokorafo kyerɛ no, wɔakyekyere ɔkra no afam nipadua no ho te sɛ deduani a wɔakyekyere no abɔ amu ho. Ɛno nyɛ nnipa nkwa ho adwene a egyina Bible so.” Yiw, adwene a ɛne sɛ ayayade a obi yɛ ne ho no betumi asɔ Onyankopɔn ani no ankasa nni Kyerɛwnsɛm no mu. Efi Nyansapɛ nnaadaasɛm a ɛne sɛ ɔhonam ho biribiara yɛ bɔne, na ɛsɛ sɛ wɔyɛ no ayayade sɛnea ebetumi ayɛ yiye biara na ama obi atumi anya nkwa no mu.

Esiane sɛ Yehowa pɛ sɛ yɛn ani gye nti, anigye Nyankopɔn a ɔte saa a yɛsom no no nhwehwɛ sɛ yɛkwati anigyede. (Ɔsɛnkafo 7:16) Enti, baabiara nni Kyerɛwnsɛm no mu a wɔka kyerɛ yɛn sɛ ayayade a obi yɛ ne ho saa no yɛ ɔkwan a wɔfa so nya nkwa. Nea ɛne no bɔ abira no, Onyankopɔn Asɛm ma emu da hɔ sɛ, Kristo mogya no ne emu gyidi a yebenya no na ɛtew yɛn ho wɔ yɛn bɔne nyinaa ho.—Romafo 5:1; 1 Yohane 1:7.