Ahwɛfo a Wɔhwɛ Nguankuw No So

BERE a Yesu reyɛ ne som adwuma wɔ asase so no, ɔdaa no adi sɛ ɔne “oguanhwɛfo pa” no. (Yoh. 10:11) Bere a ohuu sɛnea na nnipakuw no atu di n’akyi no, “wɔyɛɛ no mmɔbɔ, efisɛ na wɔayɛ sɛ nguan a wonni hwɛfo a wɔapirapira wɔn agyaw wɔn agu hɔ.” (Mat. 9:36) Petro ne asomafo a wɔaka no hui sɛ Yesu yɛ obi a odwen nnipa ho. Ná Yesu yɛ soronko koraa wɔ Israel nguanhwɛfo atorofo no ho. Wɔn de, wobuu wɔn ani guu nguankuw no so koraa ma enti nguan no bɔ hwetee, na wodii kɔm honhom mu! (Hes. 34:7, 8) Asomafo no suaa biribi fii sɛnea Yesu kyerɛkyerɛe na ɔhwɛɛ nguan no so no mu. Yesu de ne nkwa mpo too hɔ maa ne nguan, na ɛmaa asomafo no huu sɛnea wɔbɛboa wɔn nuanom ma wɔasan aba Yehowa, wɔn “kra hwɛfo ne wɛmfo” no nkyɛn.—1 Pet. 2:25.

² Bere bi na Yesu ne Petro rekasa. Yesu ma ohui sɛ ne nguan a ɔbɛma wɔn aduan na wahwɛ wɔn so no ho hia no paa. (Yoh. 21:15-17) Ɛda adi sɛ wei kaa Petro paa ma enti akyiri yi ɔno nso tuu tete Kristofo asafo no mu mpanyimfo no fo sɛ: “Monyɛn Onyankopɔn nguankuw a wɔhyɛ mo nsa no, ɛnyɛ ɔhyɛ so, na mmom mumfi mo pɛ mu; ɛnyɛ adifudepɛ nso nti, na mmom anigye so; ɛnyɛ sɛ wɔn a wodi Onyankopɔn agyapade so bakoma, na mmom monyɛ nhwɛso mma nguankuw no.” (1 Pet. 5:1-3) Petro asɛm yi fa ahwɛfo a wɔwɔ asafo no mu nnɛ nso ho. Esiane sɛ mpanyimfo no suasua Yesu nti, woyi wɔn yam som Yehowa de yɛ nhwɛso ma nguankuw no, na wodi nneɛma anim wɔ asafo no mu.—Heb. 13:7.

³ Ɛsɛ sɛ yɛda Yehowa ase sɛ ɔnam ne honhom so apaw ahwɛfo ama yɛn wɔ asafo no mu. Yenya adwuma a wɔyɛ no so mfaso pii. Ebi ne sɛ, ahwɛfo no hyɛ obiara a ɔwɔ asafo no mu nkuran, na wɔma wɔn ani kũ obiara ho. Nnawɔtwe biara wɔhwɛ asafo nhyiam ahorow so, na ɛma yɛn nyinaa nya honhom fam aduan di. (Rom. 12:8) Wɔbɔ mmɔden biara sɛ wɔbɛbɔ yɛn ho ban afi nnipabɔnefo ne biribiara a ebepira yɛn ho. Wei ma yenya akomatɔyam. (Yes. 32:2; Tito 1:9-11) Wodi asɛnka adwuma no anim, na ɛhyɛ yɛn nkuran ma yɛn nso yɛka asɛmpa no kyerɛ afoforo bosome biara. (Heb. 13:15-17) Yehowa nam ‘nnipa a ɔde wɔn ama sɛ akyɛde’ yi so hyɛ asafo no den.—Efe. 4:8, 11, 12.

⁴ Ɛsɛ sɛ mmarima a wɔbɛpaw wɔn sɛ ahwɛfo no du ahwehwɛde ahorow a ɛwɔ Onyankopɔn Asɛm mu no ho, na wɔatumi ahwɛ asafo no so yiye. Sɛ wodu ahwehwɛde no ho nkutoo a, ɛnna yebetumi aka sɛ wɔnam honhom kronkron so na apaw wɔn. (Aso. 20:28) Nokwasɛm ne sɛ, ahwɛfo adwuma no yɛ asɛyɛde a anibere wom, enti nea Kyerɛwnsɛm no hwehwɛ fi Kristofo ahwɛfo hɔ no nna fam. Nanso ɛnyɛ biribi a ɛboro so dodo. Enti Kristofo mmarima a wɔdɔ Yehowa na wɔpɛ sɛ ɔde wɔn di dwuma no betumi apere adu ho. Ɛsɛ sɛ ɛda adi ma obiara hu sɛ ahwɛfo no yɛ nnipa a wɔde Bible mu afotu bɔ wɔn bra.

⁵ Ɔsomafo Paulo krataa a edi kan a ɔkyerɛw Timoteo ne nea ɔde kɔmaa Tito no mu no, ɔkaa Kyerɛwnsɛm mu nneɛma atitiriw a wɔhwehwɛ fi ahwɛfo hɔ no ho asɛm. Wohwɛ 1 Timoteo 3:1-7 a, ɛhɔ kenkan sɛ: “Sɛ obi pɛ sɛ ɔbɛyɛ ahwɛfo adwuma a, na wapɛ adwuma pa. Enti ɛsɛ sɛ ɔhwɛfo yɛ obi a asɛm nni ne ho, ɔyɛ okunu a ne yere yɛ biako, ɔkari pɛ wɔ ne nneyɛe mu, n’adwenem da hɔ, ɔyɛ n’ade pɛpɛɛpɛ, ɔpɛ ahɔhoyɛ, otumi kyerɛkyerɛ, ɔnyɛ ɔkɔwensani tutupɛfo, ɔnyɛ pupopupo, na mmom ɔte asɛm ase, ɔmpɛ ntɔkwaw, ɔnyɛ sikanibere, odi n’ankasa fie so yiye, ne mma brɛ wɔn ho ase ma no wɔ nidi nyinaa mu; (na sɛ obi nnim sɛnea obedi n’ankasa fie so a, ɔbɛyɛ dɛn atumi ahwɛ Onyankopɔn asafo so?) ɔnyɛ abɛɛfo, efisɛ anhwɛ a na wahoman ahwe atemmu a wɔde ama Ɔbonsam no mu. Bio nso, ɛsɛ sɛ wɔn a wonni asafo no mu di ne ho adanse pa, na wanhwe ahohora ne Ɔbonsam afiri mu.”

⁶ Paulo kyerɛw Tito nso sɛ: “Eyi nti na migyaw wo Kreta, na woasiesie nea atɔ kyima na woapaw mpanyimfo wɔ kurow biara mu sɛnea mehyɛɛ wo no; ɔbarima a asɛm biara nni ne ho, ɔyɛ okunu a ne yere yɛ biako na ɔwɔ mma gyidifo a wonni wɔn ho asɛm sɛ wodi ahohwisɛm anaa wɔyɛ asobrakye. Na ɛsɛ sɛ ɔhwɛfo yɛ obi a asɛm biara nni ne ho sɛ Onyankopɔn fiehwɛfo, onni ne koko so asɛm, ne bo mfuw ntɛmntɛm, ɔnyɛ ɔkɔwensani tutupɛfo, ɔnyɛ pupopupo, ɔnyɛ odifudepɛfo opoobɔfo, na mmom ɔpɛ ahɔhoyɛ, ɔpɛ papayɛ, n’adwenem da hɔ, ɔteɛ, ɔyɛ ɔnokwafo, otumi di ne ho so, na ɔkwan a ɔfa so kyerɛkyerɛ gyina nokwasɛm no so pintinn, na ama watumi de nkyerɛkyerɛ pa no atu fo na wayi wɔn a wɔkasa tia no atɛn.”—Tito 1:5-9.

⁷ Sɛ wohwɛ Bible mu nsɛm a wogyina so paw obi sɛ ɔhwɛfo no a, mfiase no ebia wobɛka sɛ ɛyɛ den dodo, nanso sɛ woyɛ Kristoni barima a, ɛnsɛ sɛ wusuro sɛ wobɛpere adu ho. Sɛ asafo mu mpanyimfo da Kristofo su pa adi a, wɔhyɛ wɔn a wɔwɔ asafo no mu nkuran ma wɔyɛ saa ara. Paulo kyerɛwee sɛ ‘wɔde nnipa mae sɛ akyɛde,’ sɛnea ɛbɛyɛ a ‘wɔde bɛteɛteɛ akronkronfo no ama ɔsom adwuma no, na wɔde asi Kristo nipadua no, akosi sɛ yɛn nyinaa bɛyɛ biako wɔ gyidi ne Onyankopɔn Ba no ho nokware nimdeɛ mu, ayɛ ɔbarima a wanyin awie adi mũ sɛnea Kristo a ɔne susude a ɛyɛ pɛ no te.’—Efe. 4:8, 12, 13.

⁸ Ahwɛfo yi nyɛ mmarimaa anaa abɛɛfo. Mmom wɔyɛ Kristofo a wɔwɔ osuahu, wɔwɔ Bible mu nimdeɛ ne ntease a emu dɔ, na woyi wɔn yam dɔ wɔn a wɔwɔ asafo no mu. Wɔwɔ akokoduru ma enti sɛ obi yɛ bɔne a, wonsuro sɛ wɔbɛka ho asɛm. Wɔyɛ saa a, ɛbɔ nguankuw no ho ban na nnipabɔnefo bi anni wɔn awu. (Yes. 32:2) Wɔn a wɔwɔ asafo no mu nyinaa bu wɔn sɛ mmarima a Onyankopɔn honhom kyerɛ wɔn kwan na wɔn ani kũ Onyankopɔn nguankuw no ho.

⁹ Nnipa a wɔfata sɛ ahwɛfo no yɛ mmarima a wonim nyansa. Sɛ onii no aware a, ɛsɛ sɛ ɔyɛ obi a ɔde Kristofo gyinapɛn a ɛfa aware ho no yɛ adwuma. Wei kyerɛ sɛ, ɛsɛ sɛ ɔyɛ okunu a ne yere yɛ baako na odi n’ankasa fie so yiye. Sɛ ɔhwɛfo no wɔ mma gyidifo na obiara nni wɔn ho asɛm sɛ wodi ahohwisɛm anaa wɔyɛ asobrakye a, ebetumi ama wɔn a wɔwɔ asafo no mu anya ne mu ahotoso. Wobetumi abɛn no akogye afotu ne nyansahyɛ a wɔde bɛbɔ wɔn bra sɛ Kristofo. Ɛsɛ sɛ ɔhwɛfo yɛ obi a asɛm biara nni ne ho na wɔn a wonni asafo no mu nso di ne ho adanse pa. Ɛnsɛ sɛ obi nya biribi gyina so ka n’abrabɔ ho asɛmmɔne ma ɛsɛe asafo no din. Obi a ɔyɛɛ bɔne a emu yɛ duru a wɔkaa n’anim nkyɛe no, ɛnsɛ sɛ wɔpaw no sɛ ɔhwɛfo. Ɔhwɛfo a ɔyɛ nhwɛso pa no, wɔn a wɔwɔ asafo no mu no tumi suasua no, na wonya ne mu ahotoso sɛ ɔbɛboa wɔn ma wɔadi yiye wɔ Onyankopɔn som mu.—1 Kor. 11:1; 16:15, 16.

¹⁰ Mmarima a wɔfata yi tumi boa Kristofo asafo no. Wɔte sɛ tete Israel mpanyimfo no. Bible ka wɔn ho asɛm sɛ na wɔyɛ “anyansafo a wɔn ani da hɔ na wɔwɔ suahu.” (Deut. 1:13) Kristofo ahwɛfo yi yɛ nnipa a wɔtɔ sin, enti wotumi di mfomso. Nanso wɔn a wɔwɔ asafo no mu ne nnipa a wɔne wɔn te nyinaa nim sɛ wɔyɛ nnipa a wɔteɛ na wosuro Onyankopɔn. Wɔde bere tenten akyerɛ sɛ wɔde Onyankopɔn mmara na ɛbɔ wɔn bra. Wɔn ho a enni asɛm nti, wotumi de ahotoso kasa wɔ asafo no mu.—Rom. 3:23.

¹¹ Mmarima a wɔfata ma enti wɔpaw wɔn sɛ ahwɛfo no kari pɛ wɔ wɔn nneyɛe mu. Wɔne afoforo redi nso a, wɔda ntease adi. Wɔnyɛ katee, mmom sɛnea wɔbɔ wɔn bra no ma wuhu sɛ wɔn ani da hɔ, na wɔwɔ ahosodi. Wɔredidi oo, wɔrenom oo, wɔredi agorɔ anaa wɔregye wɔn ani mpo a, wɔnyɛ mma ɛntra so. Ɛba nsanom nso a, wɔma wɔn ani da hɔ na obi anka sɛ wɔabow nsa anaa wɔyɛ asadweam. Sɛ obi nom nsa na ɔbow a, ɛyɛ den sɛ obedi ne ho so, efisɛ ontumi nnwen nneɛma ho yiye na kampɛsɛ waboa wɔn a wɔwɔ asafo no mu ma wɔasom Yehowa.

¹² Sɛ obi betumi ahwɛ asafo no so a, ɛsɛ sɛ ɔyɛ obi a otumi toto nneɛma yiye. Sɛ wohwɛ n’ahosiesie, sɛnea ɔyɛ n’ade daa, ne sɛnea osiesie ne fie a, wuhu sɛ ɔfata. Onipa a ɔte saa toto ne nneɛma yiye na ɔnyɛ mmɔtohɔ. Ɔmfa Bible akwankyerɛ nni agorɔ.

¹³ Sɛ obi yɛ ɔhwɛfo a, ɛsɛ sɛ ɔte asɛm ase. Ɛsɛ sɛ otumi ne mpanyimfo a aka no bom yɛ adwuma. Ɛnsɛ sɛ obu ne ho sen ne mfɛfo, na saa ara nso na ɛnsɛ sɛ ɔhwehwɛ pii fi afoforo hɔ. Esiane sɛ ɔhwɛfo te asɛm ase nti, ɛnsɛ sɛ ɔyɛ kankabi a bere nyinaa osusuw sɛ nea ɔbɛka no ye sen mpanyimfo a aka no de. Ebetumi aba sɛ afoforo wɔ su bi a onni bi anaa wɔbɔ nneɛma bi mu mmɔden sen no. Sɛ yɛka sɛ asafo mu panyin bi te asɛm ase a, nea ɛkyerɛ ne sɛ ɔde ne nsusuwii gyina Kyerɛwnsɛm so pintinn, na ɔbɔ mmɔden sɛ obesuasua Yesu Kristo. (Filip. 2:2-8) Ɛnsɛ sɛ asafo mu panyin yɛ obi a ɔpɛ ntɔkwaw anaa ɔyɛ basabasa, mmom odi afoforo ni na obu wɔn sɛ wɔsen no. Asafo mu panyin de, ɛnsɛ sɛ odi ne koko so asɛm na ɔhwɛ kwan sɛ bere nyinaa afoforo begye ne nsusuwii atom. Ɛnsɛ sɛ ne bo fuw ntɛmntɛm, na mmom ɛsɛ sɛ ɔne afoforo tena asomdwoe mu.

¹⁴ Bio nso, sɛ obi bɛfata sɛ ɔhwɛfo wɔ asafo no mu a, ɛsɛ sɛ n’adwenem da hɔ. Wei kyerɛ sɛ ɔyɛ obi a ɔtɔ ne bo ase susuw nneɛma ho, na ɔmpere ne ho mmu atɛn. Ɔte Yehowa nnyinasosɛm ahorow ase yiye, na onim sɛnea wɔde yɛ dwuma nso. Obi a n’adwenem da hɔ de, ogye afotu ne akwankyerɛ tom, na ɔnyɛ nyaatwom.

¹⁵ Paulo ka kyerɛɛ Tito sɛ ɛsɛ sɛ ɔhwɛfo yɛ obi a ɔpɛ papayɛ. Ɛsɛ sɛ ɔyɛ ade a ɛteɛ na odi nokware. Sɛ ɔne afoforo redi a, wuhu saa su yi wɔ ne ho. Na wuhu nso sɛ n’ani gye nea ɛteɛ na ɛyɛ papa ho. Ɔntoto ne som ase koraa, na ɔde Yehowa trenee nnyinasosɛm yɛ adwuma bere nyinaa. Ɔhwɛfo yɛ obi a otumi kora kokoam nsɛm so. Afei nso ɔpɛ ahɔhoyɛ paa. Onya afoforo ho adagyew na ɔde n’ahonyade boa wɔn.—Aso. 20:33-35.

¹⁶ Sɛ ɔhwɛfo betumi ayɛ n’adwuma yiye a, ɛsɛ sɛ ɔyɛ obi a onim nkyerɛkyerɛ. Paulo asɛm a ɔde kɔmaa Tito no ma yehu sɛ ɔhwɛfo de, ɛsɛ sɛ “ɔkwan a ɔfa so kyerɛkyerɛ gyina nokwasɛm no so pintinn, na ama watumi de nkyerɛkyerɛ pa no atu fo na wayi wɔn a wɔkasa tia no atɛn.” (Tito 1:9) Sɛ ɔhwɛfo rekyerɛkyerɛ a, ɛsɛ sɛ otumi ne afoforo susuw nsɛm ho, otumi de nea ɔreka no ho adanse ma, otumi boa akyinnyegyefo, na ɔkyerɛkyerɛ Kyerɛwnsɛm mu ma emu da hɔ ma ɛhyɛ afoforo gyidi den. Ɛsɛ sɛ asafo mu panyin tumi kyerɛkyerɛ yiye wɔ mmere pa ne mmere bɔne nyinaa mu. (2 Tim. 4:2) Ɔhwɛfo wɔ abotare, enti sɛ obi yɛ bɔne a, otumi de odwo yi no ntɛn, na wɔn a wɔn adwenem yɛ wɔn naa no nso, ɔboa wɔn ma wɔn gyidi yɛ den na wɔyɛ nnwuma pa. Sɛ ɔhwɛfo tumi gyina nnipadɔm anim kyerɛkyerɛ anaa otumi tu ankorankoro fo a, ɛda adi sɛ onim nkyerɛkyerɛ.

¹⁷ Ɛho hia paa sɛ asafo mu mpanyimfo yɛ nsi wɔ asɛnka adwuma no mu. Yesu antoto asɛnka adwuma no ase koraa, enti ɛsɛ sɛ wosuasua no. Nea ɛbɛyɛ na Yesu asuafo atu mpɔn wɔ asɛnka adwuma no mu no, ɔmaa n’ani kuu wɔn ho paa. (Mar. 1:38; Luka 8:1) Mpanyimfo nni adagyew koraa, nanso sɛ wɔyere wɔn ho wɔ asɛnka adwuma no mu a, ɛma wɔn a wɔwɔ asafo no mu nyinaa nso de nsi yɛ bi. Na sɛ asafo mu mpanyimfo ne wɔn mmusua ne anuanom bom yɛ asɛnka adwuma no a, “obiara benya nkuranhyɛ afi ne yɔnko hɔ.”—Rom. 1:11, 12.

¹⁸ Sɛ wohwɛ wei nyinaa a, wobɛka sɛ nea wɔhwehwɛ fi ahwɛfo hɔ no dɔɔso dodo. Ɛwom, ɔhwɛfo biara nni hɔ a obetumi adu nea Bible hwehwɛ no nyinaa ho pɛpɛɛpɛ de, nanso ɛnsɛ sɛ ɛba sɛ mpanyimfo a wɔapaw wɔn wɔ asafo no mu no bi tɔ sin araa ma enti afoforo nka ne ho asɛm pa. Ɛwɔ nea ɔpanyin biara tumi yɛ ne su ahorow a ɔbɔ mu mmɔden. Enti mpanyimfo no mu bi wɔ hɔ a, wɔbɔ mmɔden wɔ su bi mu sen afoforo. Ne saa nti, sɛ yɛka mpanyimfo kuw no nyinaa bom a, yebenya su pa ahorow a ehia na ama mpanyimfo no atumi ahwɛ Onyankopɔn asafo no so yiye.

¹⁹ Sɛ mpanyimfo kuw no rekamfo mmarima akyerɛ ma wɔasom sɛ ahwɛfo a, ɛnsɛ sɛ wɔma wɔn werɛ fi ɔsomafo Paulo asɛm yi: ‘Meka kyerɛ mo mu biara sɛ ommmu ne ho nntra nea ɛsɛ; na mmom onnwen nnya anidahɔ adwene, sɛnea Onyankopɔn asusuw gyidi akyekyɛ ama obiara no.’ (Rom. 12:3) Ɛnsɛ sɛ ɔpanyin biara bu ne ho sɛ ɔsen obi. Sɛ moresusuw nea ɛma obi fata ho a, ɛnsɛ sɛ obiara yɛ ne ho “ɔtreneeni dodo.” (Ɔsɛnk. 7:16) Sɛ mpanyimfo kuw no resusuw Kyerɛwnsɛm mu ahwehwɛde a ɛma obi fata sɛ ɔhwɛfo no ho a, ɛsɛ sɛ wɔhwɛ sɛ onua a wɔresusuw ne ho no du saa gyinapɛn no ho sɛnea ɛsɛ. Sɛ mpanyimfo no ma ɛtena wɔn adwenem sɛ anuanom a wɔresusuw wɔn no ho yɛ nnipa a wɔtɔ sin na wɔanyɛ animhwɛ anaa nyaatwom a, ɛbɛma wɔatumi akamfo mmarima a wɔfata de akyerɛ sɛ wɔwɔ obu ma Yehowa trenee gyinapɛn ahorow no, na ɛbɛboa asafo no. Mpanyimfo no bɔ mpae ansa na wɔasusuw obiara a wɔbɛkamfo no akyerɛ no ho na wodi Onyankopɔn honhom kronkron akwankyerɛ akyi. Wei nso yɛ mpanyimfo no asɛyɛde a anibere wom paa. Enti sɛ wɔrekamfo obi akyerɛ a, ɛsɛ sɛ wɔma ɔsomafo Paulo afotu yi tena wɔn adwenem. Ɔkaa sɛ: “Mpere wo ho mfa wo nsa ngu obi so da.”—1 Tim. 5:21, 22.

²⁰ Mmarima a wɔfata wɔ Yehowa som mu no ma ɛda adi sɛ honhom kronkron na ɛkyerɛ wɔn kwan, na wɔda honhom no aba adi wɔ wɔn asetena mu. Paulo bobɔɔ honhom no aba no afã nkron no din. Ɔkaa sɛ honhom no aba no ne “ɔdɔ, anigye, asomdwoe, abodwokyɛre, ayamye, papayɛ, gyidi, odwo, ahosodi.” (Gal. 5:22, 23) Ahwɛfo a wɔwɔ su ahorow yi ma anuanom ho dwo wɔn, na wɔboa ma wɔn a wɔwɔ asafo no mu de baakoyɛ som Onyankopɔn. Sɛnea wɔbɔ wɔn bra ne nnwuma pa a wɔyɛ no ma obiara hu pefee sɛ honhom kronkron na apaw wɔn.—Aso. 20:28.

²¹ Ehia paa sɛ asafo mu mpanyimfo yɛ adwuma bom na ama baakoyɛ atena asafo no mu. Ɛwom, ɛsono sɛnea wɔn mu biara te, na ebetumi nso aba sɛ ɛnyɛ asɛm biara na wɔn adwene behyia wɔ ho. Nanso sɛ wɔresusuw asɛm bi ho na wɔyɛ aso tie nea obiara wɔ ka a, ɛbɛma baakoyɛ atena mpanyimfo kuw no mu. Sɛ mpanyimfo kuw no si gyinae bi na entia Bible mu nnyinasosɛm biara a, ɛsɛ sɛ wɔn mu biara gye tom na ɔboa ma ɛyɛ adwuma. Sɛ asafo mu panyin tumi gyae nsɛm mu a, na ɔrekyerɛ sɛ “nyansa a efi soro” na ɛkyerɛ no kwan; “nyansa a efi soro” no, ‘ɛpɛ asomdwoe, na ɛwɔ ntease.’ (Yak. 3:17, 18) Ɛnsɛ sɛ asafo mu panyin biara susuw sɛ ɔsen ne yɔnko, na ɛnsɛ sɛ ɔhwɛfo biara bɔ mmɔden sɛ ɔbɛkɛntɛn afoforo so. Sɛ asafo mu mpanyimfo yɛ baako a, ɛma asafo no nya nkɔso, na ɛma wɔne Yehowa nso yɛ baako.—1 Kor., ti 12; Kol. 2:19.

²² Sɛ woyɛ Kristoni barima a wo ho akokwaw a, ɛsɛ sɛ wode si w’ani so sɛ wobɛyɛ ɔhwɛfo. (1 Tim. 3:1) Nanso, asafo mu panyin a obi bɛyɛ no nna fam, egye adwumaden ne ahofama. Nea wei kyerɛ ne sɛ wubenya bere ama wo nuanom na woaboa wɔn wɔ Onyankopɔn som mu. Sɛ wopɛ sɛ woyɛ ahwɛfo adwuma a, ɛsɛ sɛ wobɔ mmɔden du ahwehwɛde a ɛwɔ Bible mu no ho.

²³ Onua bi a ɔde nokwaredi asom mfe pii betumi ayare anaa mpanyinyɛ bɛma wagogow. Ebia ɛno nti ɔrentumi nyɛ adwuma a ɛhyɛ ne nsa sɛ ɔhwɛfo no. Sɛ saa mpo a, bere tenten a ɔda so ara som sɛ asafo mu panyin no, ɛsɛ sɛ wɔkɔ so bu no na wodi no ni. Ɛho renhia sɛ honam fam mmerɛwyɛ nti, ɔde hokwan a ɔwɔ sɛ ɔpanyin no to hɔ. Ɔda so ara yɛ asafo mu panyin, enti ɛfata sɛ wɔkɔ so di no ni sɛnea wɔde nidi mmɔho ma mpanyimfo a wɔyɛ adwumaden de hwɛ nguankuw no.

²⁴ Nanso sɛ onua bi te nka sɛ esiane nsakrae a aba n’asetena mu nti, ɛbɛyɛ papa sɛ ɔde hokwan a ɔwɔ sɛ ɔpanyin no to hɔ a, obetumi ayɛ saa. (1 Pet. 5:2) Ɛsɛ sɛ wɔn a wɔwɔ asafo no mu kɔ so de obu ma no. Ɛwom sɛ ɔrenyɛ dwumadi ahorow bi a wɔde ma mpanyimfo bio de, nanso obetumi ayɛ pii de aboa asafo no.

²⁵ Mpanyimfo no yɛ nnwuma pii wɔ asafo no mu. Yɛwɔ mpanyimfo ntam nkitahodifo, ɔkyerɛwfo, ɔsom adwuma sohwɛfo, Ɔwɛn-Aban Adesua sohwɛfo, ne Abrabɔ ne Asɛnka Adesua sohwɛfo. Mpanyimfo pii som sɛ kuw so ahwɛfo. Wɔntaa nsesa mpanyimfo no dwumadi ahorow yi. Nanso, sɛ ɛba sɛ onua bi a dwumadi yi bi hyɛ ne nsa tu kɔ asafo foforo mu anaa yare nti ontumi nni n’asɛyɛde ho dwuma, anaa esiane sɛ wamfa Kyerɛwnsɛm mu ahwehwɛde anyɛ adwuma nti ɔmfata bio a, wɔpaw ɔpanyin foforo ma odi n’asɛyɛde no ho dwuma. Sɛ mpanyimfo a ɛwɔ asafo bi mu nnɔɔso a, ebehia sɛ ɔpanyin bi di asɛyɛde mmienu anaa nea ɛboro saa ho dwuma kosi sɛ anuanom foforo bɛfata sɛ mpanyimfo.

²⁶ Mpanyimfo kuw no hyia a, mpanyimfo ntam nkitahodifo no na ɔtena pon ti. Ne saa nti, ofi ahobrɛase mu ne mpanyimfo a wɔaka no bom yɛ adwuma de hwɛ Onyankopɔn nguankuw no. (Rom. 12:10; 1 Pet. 5:2, 3) Ɛsɛ sɛ ɔyɛ obi a otumi toto nneɛma yiye na n’adwuma nso, ɔmfa nni agorɔ.—Rom. 12:8.

²⁷ Ɔkyerɛwfo no na asafo no kyerɛwtohɔ ahorow hyɛ ne nsa. Sɛ asɛm bi sɔre na ehia sɛ asafo mu mpanyimfo a wɔaka no te a, ɔbɔ wɔn amanneɛ. Sɛ ɛho hia a, mpanyimfo kuw no betumi ama ɔpanyin foforo anaa asafo mu somfo a ɔfata aboa no.

²⁸ Ɔsom adwuma sohwɛfo no na ɔhwɛ asɛnka ho nhyehyɛe ne nsɛm foforo a ɛfa ɔsom adwuma ho no so. Bosome biara, oyi nnawɔtwe awiei baako de kɔsra asɛnka kuw baako. Sɛ akuw no nnɔɔso wɔ asafo no mu a, obetumi asra kuw biara mprenu afe biara. Sɛ ɔkɔsra kuw no a, ɔno na ɔbɛhwɛ asɛnka nhyiam so, na ɔne kuw no bɛyɛ adwuma wɔ asɛnka mu na waboa adawurubɔfo ma wɔayɛ sankɔhwɛ ne Bible adesua.

²⁹ Ɔsom hokwan pii wɔ asafo no mu. Emu baako ne sɛ obi bɛyɛ kuw sohwɛfo. Nnwuma a ɔyɛ no bi ne sɛ (1) ɔma n’ani kũ ankorankoro a wɔwɔ asɛnka kuw no mu ho yiye, na ɔboa wɔn ma wɔsom Yehowa; (2) ɔboa obiara a ɔwɔ kuw no mu ma n’ani gye asɛnka adwuma no ho na ɔhwɛ ma wɔkɔ asɛnka daa; na (3) ɔboa asafo mu asomfo a wɔwɔ kuw no mu no, na ɔtete wɔn sɛnea ɛbɛyɛ a wɔbɛfata ma wɔde asɛyɛde ahyehyɛ wɔn nsa wɔ asafo no mu. Mpanyimfo kuw no na wɔkyerɛ anuanom a wɔfata paa a ɛsɛ sɛ wɔpaw wɔn ma wɔyɛ nnwuma yi nyinaa.

³⁰ Sɛnea adwuma no te nti, sɛ ɛbɛyɛ yiye a, asafo mu mpanyimfo na ɛsɛ sɛ wɔhwɛ asɛnka akuw so. Sɛ asafo mu panyin nni hɔ a, wobetumi ama asafo mu somfo a ɔfata ahwɛ kuw no so kosi sɛ wobenya ɔpanyin bi de ahyɛ ne nsa. Asafo mu somfo a ɔhwɛ kuw so no, wɔfrɛ no kuw somfo efisɛ ɔnyɛ ɔhwɛfo wɔ asafo no mu. Mmom, mpanyimfo kuw no akwankyerɛ ase na ɔyɛ adwuma.

³¹ Ade baako a ɛnsɛ sɛ kuw sohwɛfo toto no ase ne sɛ obedi asɛnka adwuma no anim. Sɛ ɔkɔ asɛnka daa, na ɔde nsi ne anigye yɛ adwuma no a, ɛbɛhyɛ kuw no mufo nyinaa nkuran. Sɛ adawurubɔfo bom yɛ adwuma a, ɛboa wɔn na ɛma wɔn ani gye. Enti ɛsɛ sɛ kuw sohwɛfo no hwɛ bere a ɛbɛyɛ ama kuw no mufo dodow no ara na ɔyɛ nhyehyɛe ma wɔbom kɔ asɛnka. (Luka 10:1-16) Bere nyinaa, ɛsɛ sɛ kuw sohwɛfo no hwɛ ma anuanom nya asasesin a wɔbɛyɛ mu adwuma. Ɔno na ɛyɛ a, ɔhwɛ asɛnka nhyiam so na ɔkyekyɛ adawurubɔfo ma wɔkɔ asɛnka. Sɛ ɛba sɛ ɔrentumi nkɔ asɛnka nhyiam a, ɛsɛ sɛ ɔyɛ nhyehyɛe ma asafo mu panyin anaa ɔsomfo bi hwɛ so sɛnea ɛbɛyɛ a anuanom benya akwankyerɛ pa. Sɛ ɔpanyin anaa ɔsomfo nso nni hɔ a, obetumi ama ɔdawurubɔfo a ne ho akokwaw ayɛ saa adwuma yi.

³² Sɛ ɔsom adwuma sohwɛfo rekɔsra asɛnka kuw bi a, ɛsɛ sɛ kuw sohwɛfo no di kan yɛ ho nhyehyɛe, ɔka ho asɛm kyerɛ kuw no mufo, na ɔboa wɔn ma wosiesie wɔn ho ma nsrahwɛ no. Sɛ kuw sohwɛfo no kɔ so bɔ kuw no mufo nyinaa nkae a, ɛbɛma wɔafi wɔn pɛ mu aboa ma biribiara akɔ so kama.

³³ Asɛnka kuw biara mufo nnɔɔso. Wɔhyɛ da yɛ no saa na ama kuw sohwɛfo no atumi ahu wɔn a wɔwɔ kuw no mu nyinaa yiye. Ofi ɔdɔ mu hwɛ wɔn so na ɔma n’ani kũ wɔn mu biara ho. Ɔbɔ mmɔden boa wɔn na ɔhyɛ wɔn nkuran ma wɔde wɔn ho hyɛ asɛnka adwuma ne asafo nhyiam ahorow mu. Afei nso ɔbɔ mmɔden sɛ ɔbɛboa kuw no muni biara ma wayɛ den wɔ Onyankopɔn som mu. Sɛ kuw no muni bi yare anaa nneɛma haw no a, ɔkɔsra no hyɛ no den. Nyansahyɛ ne afotusɛm a ɔde bɛma kuw no mufo nkakrankakra no betumi ama ebinom ayere wɔn ho wɔ asafo no mu na ama wɔn nuanom anya wɔn so mfaso kɛse. Ɛsɛ sɛ yɛhwɛ kwan sɛ kuw sohwɛfo no bɛboa ne kuw mufo na wama n’ani akũ wɔn ho kɛse. Nanso, esiane sɛ ɔyɛ asafo mu panyin ne ɔhwɛfo nti, ɛsɛ sɛ odwen wɔn a wɔwɔ asafo no mu nyinaa ho na ɔboa obiara a ohia mmoa.—Aso. 20:17, 28.

³⁴ Asɛnka kuw sohwɛfo no adwuma baako nso ne sɛ ɔbɛhwɛ agyigye ne kuw mufo no asɛnka akontaabu na ɔde ama ɔkyerɛwfo no. Sɛ adawurubɔfo de wɔn asɛnka akontaabu ba ntɛm a, ɛboa kuw sohwɛfo no paa. Sɛ bosome biara so a, wobetumi de akontaabu no ama kuw sohwɛfo no tẽẽ anaa wobetumi de ato asɛnka akontaabu adaka a ɛwɔ Ahenni Asa so no mu.

³⁵ Nnwuma bi wɔ hɔ a, Asafo Ɔsom Boayikuw no na ɛhwɛ yɛ. Mpanyimfo ntam nkitahodifo, ɔkyerɛwfo, ne ɔsom adwuma sohwɛfo no na wɔbom yɛ asafo ɔsom boayikuw no. Nnwuma a ɔsom boayikuw no yɛ no bi ne sɛ, wɔn na wɔpene so ma wɔyɛ ayeforo anaa ayi wɔ Ahenni Asa so, na wɔn na wɔhwɛ kyekyɛ adawurubɔfo kɔ asɛnka akuw mu. Sɛ obi hyehyɛ daa akwampae anaa akwampaefo aboafo adwuma ho akwammisa krataa a, wɔn na wɔpene so. Na saa ara na sɛ obi hyehyɛ akwammisa krataa foforo a ɛfa ɔsom adwuma no ho a, wɔn ara na wɔpene so. Mpanyimfo kuw no akwankyerɛ ase na ɔsom boayikuw no yɛ wɔn nnwuma nyinaa.

³⁶ Betel na ɛkyerɛ nnwuma pɔtee a ɛsɛ sɛ ɔsom boayikuw no yɛ. Saa ara nso na Betel na ɛkyerɛ nnwuma pɔtee a Ɔwɛn-Aban Adesua sohwɛfo, Abrabɔ Ne Asɛnka Adesua sohwɛfo, ne anuanom foforo a wɔwɔ mpanyimfo kuw no mu yɛ.

³⁷ Bere ne bere mu, mpanyimfo kuw a wɔwɔ asafo biara mu hyiam susuw nsɛm a ɛbɛboa ama asafo no anya nkɔso ho. Nhyiam a mpanyimfo no ne ɔmansin sohwɛfo no yɛ bere a wabɛsra wɔn asafo no da nkyɛn a, ɔmansin sohwɛfo no nsrahwɛ biara akyi abosome mmiɛnsa no, mpanyimfo no yɛ nhyiam. Nanso sɛ ɛho behia sɛ mpanyimfo no hyiam bere foforo biara susuw asɛm bi ho a, wobetumi ayɛ saa.

³⁸ Ahwɛfo no nyɛ pɛ; nanso Kyerɛwnsɛm no tu wɔn a wɔwɔ asafo no mu nyinaa fo sɛ wɔmmrɛ wɔn ho ase mma wɔn efisɛ ɛyɛ Yehowa nhyehyɛe. Ahwɛfo no bebu wɔn nneyɛe ho akontaa akyerɛ no. Wogyina Yehowa ne ne teokrase nniso no ananmu. Hebrifo 13:17 ka sɛ: “Monyɛ osetie mma wɔn a wodi mo anim no na mommrɛ mo ho ase mma wɔn, efisɛ wɔn na wɔhwɛ mo kra so sɛ nnipa a wobebu ho akontaa; ɛno bɛma wɔde anigye ayɛ eyi, na ɛnyɛ ahomegu, anyɛ saa a ɛrensi mo yiye.” Honhom kronkron na Yehowa de paw obi sɛ ɔhwɛfo, enti sɛ obi anna honhom no aba adi anaa onnu Kyerɛwnsɛm mu ahwehwɛde no ho a, honhom kronkron koro no ara na Yehowa nam so de begye hokwan no afi ne nsam.

³⁹ Adwumaden ne nhwɛso pa a asafo mu ahwɛfo yɛ no, ɛsɛ sɛ yɛkyerɛ ho anisɔ paa. Bere a Paulo kyerɛw krataa kɔmaa asafo a na ɛwɔ Tesalonika no, otuu wɔn fo sɛ: “Anuanom, yɛsrɛ mo sɛ momfa obu mma wɔn a wɔyɛ adwumaden wɔ mo mu na wodi mo anim wɔ Awurade mu na wotu mo fo no; na momfa nidi soronko mma wɔn ɔdɔ mu esiane adwuma a wɔreyɛ no nti.” (1 Tes. 5:12, 13) Adwumaden a asafo mu ahwɛfo yɛ no ma ɛyɛ mmerɛw ma yɛn sɛ yɛbɛsom Onyankopɔn, na ɛma yɛn ani gye paa. Afei nso, krataa a edi kan a Paulo kyerɛw kɔmaa Timoteo no mu no, ɔkyerɛɛ suban a ɛsɛ sɛ wɔn a wɔwɔ asafo no mu da no adi kyerɛ ahwɛfo no. Ɔkaa sɛ: “Wɔmfa nidi mmɔho mma mpanyimfo a wodi nneɛma anim yiye no, ne titiriw no wɔn a wɔbɔ wɔn ho mmɔden wɔ ɔkasa ne ɔkyerɛkyerɛ mu no.”—1 Tim. 5:17.

⁴⁰ Ɛtɔ da a, wɔpaw asafo mu mpanyimfo bi ma wɔsom sɛ Ayarefo Nsrahwɛ Akuw mufo. Ebinom nso som sɛ Ayaresabea Ntam Nkitahodi Boayikuw no mufo. Mpanyimfo yi kɔsrasra ayaresabea ahorow ne adɔkotafo, na wɔne wɔn di nkitaho hwɛ akwan ahorow a wɔbɛfa so asa Yehowa Adansefo yare a wɔmfa mogya nka ho. Asafo mu mpanyimfo binom boa ma wosisi Ahenni Asa ne Nhyiam Asa ahorow, na wɔboa ma wosiesie Asa ahorow no nso. Afoforo nso som sɛ Nhyiam Boayikuw no mufo. Wei nyinaa boa ma Ahenni nneɛma nya nkɔso. Nnipa a wɔwɔ ahyehyɛde no mu nyinaa ani sɔ adwumaden a anuanom mmarima yi fi wɔn pɛ mu yɛ no. Nokwasɛm ne sɛ, ‘yɛbɛkɔ so abu nnipa a wɔte saa no sɛ wɔsom bo.’—Filip. 2:29.

⁴¹ Akwankyerɛ Kuw no na ɛhwɛ ma wɔpaw asafo mu mpanyimfo a wɔfata ma wɔsom sɛ amansin so ahwɛfo. Betel yɛ nhyehyɛe ma amansin so ahwɛfo yi kɔsrasra asafo ahorow. Afe biara wɔsrasra asafo ahorow a ɛwɔ wɔn mansin mu no mprenu. Sɛ akwampaefo bi nso resom wɔ mmeae a atew ne ho a, wɔyɛ nhyehyɛe kɔsra wɔn. Wɔyɛ mmeae a wɔbɛkɔ no ho nhyehyɛe na wodi kan bɔ asafo ahorow no amanneɛ na ama anuanom anya nsrahwɛ no so mfaso kɛse.

⁴² Mpanyimfo ntam nkitahodifo no na odi anim yɛ nhyehyɛe sɛnea ɛbɛyɛ a nsrahwɛ no bɛhyɛ anuanom nyinaa den. (Rom. 1:11, 12) Sɛ ne nsa nya ka nkra sɛ ɔmansin sohwɛfo rebɛsra asafo no, na ohu nneɛma a ɔmansin sohwɛfo no ne ne yere (sɛ waware a) behia a, ɔnam anuanom so yɛ nhyehyɛe ma wɔn nsa ka, na ɔyɛ dabere ne nneɛma foforo nso ho nhyehyɛe. Ɔma obiara hu nhyehyɛe no, na ɔbɔ ɔmansin sohwɛfo no nso amanneɛ.

⁴³ Ɔmansin sohwɛfo no ne mpanyimfo ntam nkitahodifo no bedi nkitaho afa bere a wɔde bɛyɛ asɛnka nhyiam ne nhyiam ahorow a aka no ho. Wɔbɛyɛ eyi ho nhyehyɛe ma ɛne ɔmansin sohwɛfo no nyansahyɛ ahorow ne akwankyerɛ a efi Betel no ahyia. Ɛho hia sɛ wodi kan ma obiara hu bere a wɔde bɛyɛ asafo nhyiam, akwampaefo nhyiam, ne asafo mu mpanyimfo ne asomfo nhyiam. Afei wɔma anuanom hu bere ne mmeae a wobehyiam ayɛ asɛnka nhyiam nso.

⁴⁴ Sɛ ɔmansin sohwɛfo kɔ asafo bi mu a, Benada awia ɔhwehwɛ Asafo No Adawurubɔfo Kyerɛwtohɔ mu. Afei ɔhwehwɛ nnipa dodow a wɔba asafo nhyiam ho kyerɛwtohɔ mu, asasesin ho kyerɛwtohɔ mu, ne sikasɛm ho kyerɛwtohɔ nso mu. Wei bɛma wahu mmoa a asafo no behia ne sɛnea obetumi aboa wɔn a wɔyɛ kyerɛwtohɔ ahorow no. Ɛsɛ sɛ mpanyimfo ntam nkitahodifo no hwɛ ma ɔmansin sohwɛfo no nsa ka nkrataa yi nyinaa ntɛm.

⁴⁵ Sɛ ɔmansin sohwɛfo kɔsra asafo bi a, ɔbɔ mmɔden sɛ ɔne obiara bɛbɔ wɔ asafo nhyiam ase ne asɛnka mu, bere a ɔne anuanom ahyia redidi, ne mmere foforo nso. Afei nso, ɔne asafo mu mpanyimfo ne asomfo hyiam susuw Kyerɛwnsɛm mu afotu a ɛfata ho. Ɔma wɔn nyansahyɛ ahorow, ne nkuranhyɛ a ɛbɛboa ma wɔahwɛ nguankuw a ɛhyɛ wɔn nsa no. (Mmeb. 27:23; Aso. 20:26-32; 1 Tim. 4:11-16) Afei ɔne akwampaefo hyia na ɔhyɛ wɔn nkuran, na sɛ wɔrehyia nsɛnnennen bi a ɛfa asɛnka adwuma no ho a, ɔne wɔn susuw ho de mmoa a ɛfata ma wɔn.

⁴⁶ Sɛ nsɛm foforo wɔ hɔ a ehia sɛ wodi ho dwuma saa nnawɔtwe no mu a, ɔmansin sohwɛfo no bɛyɛ nea obetumi biara de aboa mpanyimfo no. Sɛ wɔrentumi nni asɛm no ho dwuma nwie wɔ nnawɔtwe no ara mu a, ɔbɛboa mpanyimfo no anaasɛ nnipa a asɛm no fa wɔn ho no ama wɔayɛ nhwehwɛmu ahu akwankyerɛ a Kyerɛwnsɛm no de ma wɔ asɛm no ho. Sɛ biribi wɔ hɔ a ehia sɛ Betel yɛ wɔ asɛm no ho a, ɔne mpanyimfo no bɛkyerɛw ɛho nsɛm nyinaa de akɔ Betel.

⁴⁷ Sɛ ɔmansin sohwɛfo kɔsra asafo bi a, ɔkɔ asafo nhyiam ahorow a wɔyɛ no daa no bi. Betel betumi de akwankyerɛ aba ma wɔayɛ wei mu nsakrae. Ɔmansin sohwɛfo no bɛma ɔkasa ahorow de ahyɛ asafo no nkuran, akanyan wɔn, na wakyerɛkyerɛ wɔn de ahyɛ wɔn den. Ɔbɔ mmɔden sɛ ɔbɛhyɛ ɔdɔ a asafo no wɔ ma Yehowa, Yesu Kristo, ne ahyehyɛde no mu den.

⁴⁸ Ɔmansin sohwɛfo kɔsra asafo bi a, ne botae baako ne sɛ ɔbɛhyɛ anuanom nkuran ma wɔde nsi ayɛ asɛnka adwuma no na ɔde nyansahyɛ ahorow a ɛbɛboa wɔn nso ama wɔn. Wɔn a wɔwɔ asafo no mu no, wɔn mu pii betumi ayɛ nsakrae wɔ wɔn nhyehyɛe mu na wɔatumi anya asɛnka adwuma no mu kyɛfa kɛse saa nnawɔtwe no mu. Ebia saa bosome no mu no, ebinom de wɔn ho bɛhyɛ akwampaefo aboafo adwuma no mu. Sɛ obi pɛ sɛ ɔne ɔmansin sohwɛfo anaa ne yere kɔ asɛnka a, obetumi ne wɔn ayɛ ho nhyehyɛe. Sɛ wɔn a wɔwɔ asafo no mu ne ɔmansin sohwɛfo anaa ne yere kɔyɛ Bible adesua ne sankɔhwɛ a, wobenya so mfaso bebree. Mmɔden biara a mobɛbɔ de mo ho ahyɛ asɛnka mu bere a ɔmansin sohwɛfo abɛsra mo no som bo paa.—Mmeb. 27:17.

⁴⁹ Afe biara wɔyɛ ɔmansin nhyiam ahorow mmienu ma ɔmansin biara. Nhyiam mmienu yi ho biribiara hyɛ ɔmansin sohwɛfo no nsa. Ɔno na ɔpaw nhyiam sohwɛfo ne ne boafo. Wɔn adwuma ne sɛ wɔne ɔmansin sohwɛfo no bɛbom ayɛ adwuma ahwɛ nhyiam no so. Wei ma ɔmansin sohwɛfo no nya bere de n’adwene si ɔkasa ahorow a wɔbɛma wɔ nhyiam no ase no so. Afei ɔmansin sohwɛfo no paw anuanom a wɔfata ma wɔhwɛ nhyiam dwumadibea ahorow no so. Bio nso, bere ne bere mu no, ɔyɛ nhyehyɛe ma wɔhwehwɛ ɔmansin no sikasɛm mu. Afe biara, ɔmansin nhyiam baako de, Betel betu nanmusini bi ama wakɔma ɔkasa ahorow wɔ ase. Baabi wɔ hɔ a, esiane sɛ ɔkwan no ware anaa baabi a wɔyɛ nhyiam no sua nti, wɔkyekyɛ ɔmansin no bi mu ma wɔyɛ wɔn nhyiam.

⁵⁰ Bosome biara, ɔmansin sohwɛfo no de n’asɛnka ho akontaabu mena Betel tẽẽ. Sɛ ɔbɔ ka wɔ nneɛma bi a ehia te sɛ akwantu, aduan, ne dabere ho na sɛ asafo a ɔresom wɔn no ntumi ntua a, obetumi de abrɛ Betel ma wɔatua ama no. Ahwɛfo akwantufo wɔ awerɛhyem sɛ, sɛnea Yesu hyɛɛ bɔ no, sɛ wɔde Yehowa Ahenni di kan a, wɔn nsa bɛka honam fam nneɛma a wohia. (Luka 12:31) Ɛyɛ hokwan kɛse na asafo ahorow no anya sɛ wɔbɛda ahɔhoyɛ adi akyerɛ mpanyimfo a wɔatu wɔn ho ama resom wɔn yi, enti saa hokwan no, ɛnsɛ sɛ wɔtoto no ase koraa.—3 Yoh. 5-8.

⁵¹ Wiase nyinaa, baabiara a Yehowa Adansefo Betel wɔ no, anuanom mmiɛnsa anaa nea ɛboro saa a wɔn ho akokwaw wɔ Yehowa som mu som sɛ Baa Boayikuw. Asɛnka adwuma a wɔyɛ wɔ ɔman no mu anaa aman a ɛhyɛ saa Betel no ase no, wɔn na wɔhwɛ so. Wɔn mu baako som sɛ Baa Boayikuw no ntam nkitahodifo.

⁵² Anuanom a wɔwɔ Baa Boayikuw no mu no na wɔhwɛ di nsɛm a ɛfa asafo ahorow a ɛwɔ wɔn asasesin mu no nyinaa ho dwuma. Boayikuw no na ɛhwɛ Ahenni ho asɛmpaka adwuma a wɔyɛ wɔ asasesin a ɛhyɛ wɔn ase no nyinaa so. Wɔhwɛ ma wɔhyehyɛ asafo ahorow ne amansin na ama wɔadi anuanom ahiade ho dwuma. Afei nso, Baa Boayikuw no ma wɔn ani kũ asɛmpatrɛwfo, akwampaefo atitiriw, daa akwampaefo, ne akwampaefo aboafo dwumadi ho. Sɛ wɔreyɛ ɔmansin ne ɔmantam nhyiam a, anuanom yi hwɛ ma wɔde dwumadi hyehyɛ afoforo nsa na ‘biribiara akɔ so fɛfɛɛfɛ a nhyehyɛe da ho.’—1 Kor. 14:40.

⁵³ Ɔman bi wɔ hɔ a, Baa Boayikuw a ɛwɔ ɔman foforo so na ɛhwɛ wɔn dwumadi so. Ɔman a ɛte saa mu no, asafo ti no paw Ɔman Boayikuw wɔ hɔ. Ɔman Boayikuw no boa ma wɔhwɛ adwuma no so yiye wɔ ɔman no mu. Adwuma a wɔyɛ wɔ Betel Fie ne dwumadibea ahorow no, wɔn na wɔhwɛ so. Wɔhwɛ de adwuma no ho amanneɛbɔ mena asafo ti no, na wɔhwɛ ɔsom adwuma no afã ahorow a ɛkɔ so wɔ ɔman no mu so. Ɔman Boayikuw no ne Baa Boayikuw no yɛ adwuma bom ma Ahenni nneɛma nya nkɔso.

⁵⁴ Akwankyerɛ Kuw no na ɛpaw wɔn a wɔsom sɛ Baa Boayikuw ne Ɔman Boayikuw no mufo nyinaa.

⁵⁵ Ɛwom ara a, Akwankyerɛ Kuw no ma anuanom a wɔfata kɔsra baa dwumadibea ahorow a ɛwɔ wiase nyinaa no. Onua a wɔsoma no ma ɔkɔsra baa dwumadibea ahorow no, wɔfrɛ no asafo ti nanmusifo. N’adwuma titiriw ne sɛ ɔbɛhyɛ Betel abusua no nkuran, na sɛ Baa Boayikuw no wɔ nsɛnnennen anaa nsɛmmisa bi a ɛfa asɛnka ne asuafoyɛ adwuma no ho a, ɔboa wɔn. Onua yi ne amansin so ahwɛfo binom hyiam, na bere ne bere mu no, ɔne asɛmpatrɛwfo nso hyiam. Sɛ ɔne saa anuanom yi hyiam a, ɔne wɔn susuw nsɛnnennen a wɔrehyia ho, na esiane sɛ Ahenni asɛnka ne asuafoyɛ adwuma no ne adwuma titiriw a wɔde ahyɛ wɔn nsa nti, ɔde ho nkuranhyɛsɛm a ɛfata ma wɔn.

⁵⁶ Ade baako a ehia asafo ti no nanmusifo no paa ne sɛnea anuanom reyɛ Ahenni asɛnka adwuma no. Asafo ahorow no dwumadi nso ho nsɛm hia no. Sɛ bere wom a, anuanom a wɔkyerɛ kasa ase wɔ mmeae a atew ne ho no, otumi kɔsra wɔn. Sɛ asafo ti no nanmusifo no kɔsra baa dwumadibea bi a, ɔde ne ho hyɛ Ahenni asɛnka adwuma no mu sɛnea obetumi.

⁵⁷ Yenya adwumaden a Kristofo mmarima a wɔn ho akokwaw fi ɔdɔ mu yɛ ma yɛn no so mfaso pii. Sɛ yɛkɔ so brɛ yɛn ho ase ma mpanyimfo a wɔapaw wɔn sɛ wɔnhwɛ nguankuw no so no a, ɛma yɛne Kristo Yesu a ɔyɛ asafo no Ti no yɛ baako. (1 Kor. 16:15-18; Efe. 1:22, 23) Wei ma Onyankopɔn honhom yɛ adwuma wɔ asafo ahorow a ɛwɔ wiase nyinaa no so. Afei nso, ɛma ɛda adi sɛ adwuma a yɛreyɛ wɔ wiase nyinaa no, Onyankopɔn Asɛm na ɛrekyerɛ yɛn kwan.—Dw. 119:105.