Nsemmisa a Efi Akenkanfo Hɔ

◼ So ɛsɛ sɛ Kristoni barima nya mfe dodow bi ansa na wɔapaw no asafo mu ɔsomfo wɔ asafo no mu?

Dabi, Bible no mfa mfe dodow bi nsi hɔ.

Wɔ tete Israel no, Onyankopɔn de mfe dodow bi sii hɔ wɔ nsɛm bi mu. Na ɛsɛ sɛ mmarima a wɔbɛyɛ asraafo nya mfe 20; wɔmfa mmarimaa kɛkɛ nkɔ ɔko sɛnea esisi wɔ mmeaemmeae nnɛ no. Na wɔde mfe bi asi hɔ ama Lewifo nso. Na ɛsɛ sɛ Kehatfo a na wɔsom wɔ ahyiae ntamadan no mu no nya mfe fi 30 kosi 50. Dɛn ntia? Wɔkaa anohyeto yi ho asɛm wɔ ‘adwumaden anaa nnesoasoa adwuma ahyiae ntamadan no mu’ ho. (Numeri 4:3, 47) Na ɛte sɛ nea Lewifo betumi afi ase ayɛ nnwuma a ɛnyɛ den bere a wɔanya mfe 25 no, nanso na ɛsɛ sɛ wonya mfe 30 ansa na wɔanya nnwuma a ɛyɛ den ne asɛyɛde akɛse a hokwan ahorow ka ho a ɛfa ahyiae ntamadan no tutu, ne soa ne ne hyehyɛ ho no mu kyɛfa. (Numeri 8:24-26) Na adwumaden a ɛte saa ho renhia akyiri yi wɔ asɔrefi hɔ, enti na Lewifo betumi afi ase asom bere a wɔanya mfe 20 no.​—1 Beresosɛm 23:24.

Nanso bere a Yehowa gyaee di a na ɔde honam fam Israel di dwuma na ofii ase de honhom mu Israel dii dwuma no, so ɔde mfe dodow bi sii hɔ maa asafo mu asomfo (asɔfo nkumaa) a wɔwɔ Kristofo asafo no mu no?

Ebia obi begyina mfehaha pii a atwam no kyerɛwtohɔ so asusuw saa. Wɔ Roman Katolek Asɔre no mu no, ɔsɔfokumaa yɛ “obi a wɔahyɛ no ɔsomfo, dibea a sɛ ofi so a onya ɔsɔfo, wɔ Asɔre no mpanyimfo kuw a wofi soro ahyehyɛ no mu.” Bingham Antiquities of the Christian Church ka sɛ: “Ebia worempaw asɔfo mpanyin ne presbyterfo [mpanyimfo] mma saa dibea no gye sɛ wɔanya mfe aduasa ansa; nanso wɔma kwan ma wɔpaw asɔfo nkumaa ma wɔn dibea no bere a wɔanya mfe aduonu anum no na ɛnyɛ bere a wonnyaa saa mfe no. Eyi na ɔman ne kyerɛwsɛm mu mmara no de asi hɔ . . . Wɔ Asɔre no abakɔsɛm nyinaa mu no, yɛntaa nhu obi a wɔhyɛɛ no ɔsomfo ansa na ɔrenya mfe aduonu anum.”

Ɛnde, dɛn ne ahwehwɛde a ɛwɔ Bible no mu? Nea wɔde ama nkutoo no ne nea wɔaka ho asɛm wɔ 1 Timoteo 3:8-10,12, 13 no: “Asafo mu asomfo nso, ɛsɛ sɛ wɔn anim yɛ duru, wɔnyɛ ano nta, wɔnyɛ asadweam, wɔnyɛ adifudepɛfo; wɔde gyidi ahintasɛm no sie ahonim a emu tew mu. Na wɔnsɔ eyinom nhwɛ kan, na sɛ asɛm bi nni wɔn ho ansa a, wɔama wɔasom. Asafo mu asomfo nyɛ ɔyerenom mmiako mmiako kununom, nni wɔn mma ne wɔn ankasa afi so yiye. Na wɔn a wɔsom yiye no nya nnyinaso pa ne nnam bebree, gyidi a ɛwɔ Kristo Yesu mu mu.”

Yebetumi ahu wɔ ha sɛ wɔmfaa mfe dodow bi nsii hɔ mma paw a wɔbɛpaw obi sɛ asafo mu ɔsomfo no. Enti sɛ mpanyimfo no hyia sɛ wokosusuw nneɛma a ɛma mmarima a wɔwɔ asafo no mu fata no ho a, wobetumi ama atra wɔn adwene mu sɛ Bible nnyinaso biara nni hɔ a ɛhwehwɛ sɛ ɛsɛ sɛ Kristoni barima nya mfe 20, 25, anaa 30 ansa na wɔatumi akamfo no akyerɛ ma wasom. Bible no ka wɔn a wokura dibea ho asɛm sɛ “wɔn a wɔsom,” enti ɛbɛyɛ den sɛ yɛbɛhwɛ kwan sɛ wɔanya fi mfe du kosi dunnum. Bible no ka sɛ ebia asafo mu asomfo a wɔte saa no aware na wɔn ankasa wɔ mma.

Afei nso, ɛsɛ sɛ mmarima a wɔkamfo wɔn kyerɛ sɛ asafo mu asomfo no yɛ wɔn a ‘wɔasɔ wɔn ahwɛ sɛ wɔfata’ a wɔde adanse a ɛkyerɛ sɛ wobetumi adi asɛyɛde ho dwuma ma. Ɛno nkyerɛ sɛ ɛsɛ sɛ wɔde mfe dodow bi sɔ wɔn hwɛ. Mmom no, ɛbɛyɛ sɛ na wɔada Kristofo ahokokwaw adi wɔ bere a ɛfata mu (anyɛ yiye koraa no wɔabɔ no asu afe), wɔyɛ nnipa a wɔwɔ ɔpɛ na wobetumi adi nneɛma a wɔde ahyɛ wɔn nsa no ho dwuma. Sɛ aberante bi a ‘n’anim yɛ duru’ da su horow yi adi, na ɔyɛ ɔhobrɛasefo na odu ahwehwɛde afoforo no ho a, mpanyimfo no betumi akamfo no akyerɛ, sɛ onyaa mfe 20 mpo a. Ebia mmarima afoforo benyin asen saa bere a wɔda no adi pefee sɛ wodu ‘som a wɔsom yiye na wonya nnyinaso pa ma wɔn ho’ ho ahwehwɛde no ho no.