Wobɛyɛ Dɛn Atumi Anya Sika Ho Adwene a Ɛkari Pɛ?

Sikanibere ne agyapade ho anigye nyɛ ade foforo; na saa ara na ɛnyɛ ade a ɛho asɛm nni Bible mu na ama ayɛ sɛ ade a gyama nnansa yi ara na ɛreba so. Ɛwɔ hɔ fi teteete. Wɔ Mmara no mu no, Onyankopɔn ka kyerɛɛ Israelfo no sɛ: “Mma w’ani mmmere wo yɔnko fi. . . . anaa biribiara a ɛyɛ wo yɔnko dea.”—Exodus 20:17.

NÁ SIKA ne agyapade ho anibere abu so wɔ Yesu bere so. Susuw nkɔmmɔ bi a Yesu ne aberante bi a ɔyɛ “ɔdefo kɛse” bɔe yi ho hwɛ. ‘Yesu see no sɛ: Ɛda so ka wo ade biako, kɔtɔn nea wowɔ nyinaa, na kyɛ ma ahiafo, na wubenya ademude ɔsoro; na bra bedi m’akyi! Na ɔtee eyi no, ɛyɛɛ no awerɛhow sɛ; efisɛ ɔyɛ ɔdefo kɛse.’—Luka 18:18-23.

Sika Ho Adwene a Ɛfata

Nanso, ɛbɛyɛ mfomso sɛ yɛbɛka sɛ Bible kasa tia sika anaa nneɛma atitiriw a wɔde sika yɛ no bi. Bible da no adi sɛ sika bɔ obi ho ban fi ohia ne emu haw ahorow ho, na ɛma nnipa tumi nya wɔn asetram ahiade ahorow. Ɔhene Salomo kyerɛwee sɛ: “Nyansa onwini ase tra te sɛ sika onwini ase tra.” Ɛne sɛ: “Ɔserew nti na wosiesie aduan, na nsã ma ateasefo ani gye, na sika na ɛyɛ ne nyinaa.”—Ɔsɛnkafo 7:12; 10:19.

Onyankopɔn ani gye sika a wɔde di dwuma ɔkwampa so ho. Sɛ nhwɛso no, Yesu kae sɛ: “Momfa ahonyade a ɛnteɛ no bi nyɛ nnamfo.” (Luka 16:9) Nea ɛka eyi ho ne ntoboa a yebeyi de aboa Onyankopɔn nokware som nkɔso, efisɛ akyinnye biara nni ho sɛ yɛpɛ sɛ Onyankopɔn yɛ yɛn Adamfo. Bere a Salomo ankasa redi n’agya Dawid nhwɛso akyi no, ɔde sika kɛse ne nneɛma a ɛsom bo boaa Yehowa asɔrefie no si. Kristoni ahyɛde foforo nso ne sɛ ɔde honam fam nneɛma bɛboa wɔn a ahia wɔn. Ɔsomafo Paulo kae sɛ: “Momma ahotefo hia nhia mo bi.” Ɔde kaa ho sɛ: “Mommɔ ahɔhoyɛ ho mmɔden!” (Romafo 12:13) Mpɛn pii no, eyi hwehwɛ sɛ wɔde sika di dwuma. Na sikanibere nso ɛ?

“Sikapɛ Bɔne”

Paulo kaa ‘sikanibere’—anaa “sikapɛ bɔne” ankasa—ho asɛm kɔɔ akyiri, bere a na ɔrekyerɛw ne yɔnko Kristoni kumaa Timoteo no. Yebetumi ahu Paulo afotu no wɔ 1 Timoteo 6:6-19. Ɔkaa “sikapɛ [sikanibere, NW]” ho asɛm bere a na ɔresusuw honam fam nneɛma ho akɔ akyiri no. Ɛyɛ papa sɛ yesusuw Paulo nsɛm a efi honhom mu no ho yiye, esiane sɛnea ɔmanfo ka sika ho nsɛm pii nnɛ no nti. Akyinnye biara nni ho sɛ mfaso wɔ nhwehwɛmu a ɛte saa so efisɛ ɛma yehu sɛnea ‘yebeso nokware nkwa no mu.’

Paulo bɔ kɔkɔ sɛ: “Bɔne nyinaa ntini ne sikapɛ [sikanibere, NW] a ebinom dii akyiri yeraa gyidi kwan na wɔde yaw pii wowɔɔ wɔn ho.” (1 Timoteo 6:10) Kyerɛwsɛm yi nkyerɛ sɛ sika ankasa yɛ bɔne—na saa ara na kyerɛwsɛm foforo biara nka saa. Saa ara na ɔsomafo no nka sɛ sika na ɛde “bɔne nyinaa” ba anaasɛ sika na ɛde ɔhaw biara ba. Mmom no, nea etumi de ‘bɔne ahorow nyinaa’ ba ne sikanibere—sɛ ɛnyɛ ɛno nkutoo mpo a.

Hwɛ Yiye Wɔ Anibere Ho

Nokwasɛm a ɛyɛ sɛ Kyerɛwnsɛm no nkasa ntia sika ankasa no nkyerɛ sɛ ɛnsɛ sɛ yɛfa Paulo kɔkɔbɔ no aniberesɛm. Kristofo a wofi ase ma wɔn ani bere sika no betumi ahyia ɔhaw ahorow nyinaa bi, a nea enye koraa ne man a wɔbɛman afi gyidi no ho no. Nea Paulo ka kyerɛɛ Kristofo a wɔwɔ Kolose no hyɛɛ nokwasɛm yi mu den: “Enti, munkum mo akwaa a ɛwɔ asase so no: . . . akɔnnɔ bɔne ne anibere a ɛyɛ abosonsom.” (Kolosefo 3:5) Ɔkwan bɛn so na anibere anaa ‘sikanibere’ betumi ayɛ abosonsom? So eyi kyerɛ sɛ ɛyɛ bɔne sɛ wobɛpɛ sɛ wunya ofie kɛse, kar foforo, ne adwuma a sika wom? Dabi, saa nneɛma yi mu biara ankasa nyɛ bɔne. Asɛm no ne sɛ: Dɛn na ɛwɔ onii no komam a ɛma ɔpɛ sɛ onya saa nneɛma yi bi, na so ɛho hia ankasa?

Yebetumi de nsonsonoe a ɛda ɔpɛ a ɛfata ne anibere ntam no atoto nsraban mu gya a wɔde noa aduan ne ogyaframa a ɛhyew kwae ho. Ɔpɛ pa ne ɔpɛ a ɛfata betumi ayɛ nea mfaso wɔ so. Ɛkanyan yɛn ma yɛyɛ adwuma ma yenya so mfaso. Mmebusɛm 16:26 ka sɛ: “Odwumayɛfo kɔm yɛ adwuma ma no, efisɛ n’ano pĩa no.” Nanso, anibere yɛ hu na ɛsɛe ade. Ɛyɛ ɔpɛ a wontumi nni so.

Yɛn ho so a yebedi ne ade titiriw. So sika a yɛboaboa ano no anaa honam fam nneɛma a yɛpɛ no bedi yɛn ahiade ho dwuma, anaasɛ yɛn na yɛbɛsom sika no? Ɛno nti na Paulo ka sɛ ‘oniberefo yɛ ɔbosonsonni no.’ (Efesofo 5:5) Nea yɛn ani a ɛbere biribi kyerɛ ankasa ne sɛ yɛbɛma adi yɛn so—a nea ɛkyerɛ ne sɛ, yɛde bɛyɛ yɛn wura, yɛn nyame, biribi a yɛsom. Nea ɛne no bɔ abira no, Onyankopɔn kyerɛ sɛ: “Nnya anyame foforo nka me ho.”—Exodus 20:3.

Anibere a yɛbɛyɛ kyerɛ nso sɛ yenni ahotoso sɛ Onyankopɔn bedi ne bɔhyɛ a ɛne sɛ ɔbɛma yɛanya yɛn ahiade no so. (Mateo 6:33) Ɛnde, anibere kyerɛ twe a yɛtwe yɛn ho fi Onyankopɔn ho. Wɔ saa kwan yi so nso no ɛyɛ “abosonsom.” Ɛnyɛ nwonwa sɛ Paulo bɔ ho kɔkɔ pefee no!

Yesu nso de anibere ho kɔkɔbɔ mae pefee. Ɔhyɛɛ yɛn sɛ yɛnhwɛ yiye sɛ yɛmma yɛn kɔn nnɔ biribi a yenni: “Monhwɛ na monhwɛ mo ho yiye pɛpɛe [anibere, NW] ho! Na ɛnyɛ onipa ade a wanya na aboro so no mu na ne nkwa wɔ.” (Luka 12:15) Sɛnea asɛm yi ne Yesu mfatoho a edi hɔ kyerɛ no, anibere gyina gyidi a nyansa nnim a ɛne sɛ ade a ɛho hia wɔ asetram ne nneɛma a obi wɔ no so. Ebetumi ayɛ sika, gyinabea, tumi, anaa nneɛma a ɛtete saa. Yɛn ani betumi abere biribiara a yebetumi anya. Adwene no ne sɛ sɛ yɛn nsa ka saa ade no a ɛbɛma yɛanya abotɔyam. Nanso, sɛnea Bible ne nnipa suahu kyerɛ no, Onyankopɔn nkutoo na obetumi ama—na ɔbɛma—yɛn nsa aka yɛn ahiade ankasa, sɛnea Yesu ne n’akyidifo no susuw ho no.—Luka 12:22-31.

Ɛnnɛ nnipa a adetɔ agye wɔn adwene no bɔ mmɔden yiye wɔ kanyan a wɔkanyan anibere no mu. Wɔnam anifere kwan a emu yɛ den so ma nnipa pii begye di sɛ nneɛma a wɔwɔ no nnɔɔso. Wohia nneɛma a ɛdɔɔso, ɛsoso, na ɛyɛ papa. Bere a yɛnhwɛ kwan sɛ yebetumi asesa wiase a yɛte mu no, ɔkwan bɛn so na yɛn ankasa betumi ako atia saa suban yi?

Nea Yɛwɔ a Yɛbɛpene so ne Anibere

Paulo ma yɛn ade a yebetumi de asi anibere ananmu, a ɛne nea yɛwɔ a yɛbɛpene so. Ɔka sɛ: “Na sɛ yɛwɔ nnuan ne nea yɛde kata yɛn ho a, momma ɛno ara nnɔɔ yɛn so.” (1 Timoteo 6:8) Nea yehia ankasa nyinaa a waka ho asɛm—“nnuan ne nea yɛde kata yɛn ho”—no betumi ayɛ sɛ mmofrasɛm bi anaa asɛm a nyansa nnim. Nnipa pii hwɛ television so dwumadi ahorow a ɛma wohu nnipa a wɔagye din a wɔte afie a ahomeka wom mu de gyigye wɔn ani. Eyi nyɛ ɔkwan a wobɛfa so anya asetra a abotɔyam wom.

Nokwarem no, wɔnhwɛ kwan sɛ Onyankopɔn asomfo bɛfrɛfrɛ ohia ama wɔn ho. (Mmebusɛm 30:8, 9) Nanso, Paulo kae yɛn dekode a wɔfrɛ no ohia ankasa: bere a obi nni aduan, ntama, ne dabere wɔ baabi a ɔte, nneɛma a ɛfata a ɛbɛma watumi atra ase no. Ɔkwan foforo so no, sɛ yɛwɔ saa nneɛma yi bi a, ɛnde na yɛwɔ nea yebegyina so anya abotɔyam.

So nneɛma a ɛma abotɔyam ankasa na na Paulo reka ho asɛm wɔ saa kwan no so no? So asetram ahiade kɛkɛ te sɛ—aduan, ntama, ne dabere—betumi ama yɛanya abotɔyam ankasa? Na ɛsɛ sɛ Paulo hu. Ɔno ankasa nyaa Yudafo mu otitiriw ne Roma ɔmammayɛ mu ahonya ne hokwan ahorow mu osuahu. (Asomafo no Nnwuma 22:28; 23:6; Filipifo 3:5) Paulo huu amane pii nso wɔ n’asɛmpatrɛw adwuma no mu. (2 Korintofo 11:23-28) Ne nyinaa mu no, osuaa biribi a ɛboaa no ma ɔkɔɔ so nyaa abotɔyam. Na ɛyɛ dɛn?

‘Me Ho Akokwaw’

Paulo kyerɛkyerɛɛ mu wɔ ne nkrataa no biako mu sɛ: “Minim ahobrɛase, na minim taamudi nso. Makokwaw ade biara ne ade nyinaa mu, ɔmee ne ɔkɔm ne taamu ne hiadi.” (Filipifo 4:12) Paulo fi ahotoso a emu yɛ den mu kasae, na na ɔwɔ anidaso nso! Ɛnyɛ den sɛ wubesusuw sɛ na n’asetra yɛ mmerɛw bere a ɔkyerɛw saa nsɛm yi no, nanso ɛnte saa. Na ɔda afiase wɔ Roma!—Filipifo 1:12-14.

Sɛ yesusuw saa abodwosɛm yi ho a, ɔfã yi ma yenya nnyinasosɛm a emu yɛ den sɛ ɛnyɛ adedodow nko na ɛma abotɔyam na mmom tebea horow nso. Ahonya anaa ahokyere ntraso betumi asɔ yɛn ahwɛ wɔ nea ɛyɛ yɛn ahiade atitiriw ho. Paulo kaa honhom fam ahonyade a ɛma otumi nyaa abotɔyam a na honam fam tebea horow mfa ho ho asɛm: “Mitumi ade nyinaa yɛ, nea ɔhyɛ me den no mu.” (Filipifo 4:13) Sɛ́ anka Paulo de ne ho bɛto n’agyapade so, sɛ́ ɛdɔɔso anaa esua, anaasɛ ɔde ne ho bɛto ne tebea horow so, sɛ́ eye anaa enye no, ɔde ne ho too Onyankopɔn so sɛ onni n’ahiade ho dwuma mma no. Nea efii mu bae ne abotɔyam.

Ná Paulo nhwɛso no hia Timoteo titiriw. Ɔsomafo no hyɛɛ aberante no nkuran sɛ onni asetra kwan a ɛbɛma ɔde onyamesom pa ne abusuabɔ a emu yɛ den a ɔne Onyankopɔn benya adi ahonyade kan akyi. Paulo kae sɛ: “Na wo, Onyankopɔn nipa, de, guan eyinom, na di trenee, onyamesom pa, gyidi, ɔdɔ, boasetɔ, odwo akyi.” (1 Timoteo 6:11) Ɛwom sɛ ɔkaa saa nsɛm no kyerɛɛ Timoteo de, nanso ɛfa obiara a ɔpɛ sɛ odi Onyankopɔn ni na onya asetra a anigye wom ankasa ho.

Ná ɛsɛ sɛ Timoteo ma n’ani da hɔ wɔ anibere ho sɛnea ɛsɛ sɛ Kristoni foforo biara yɛ no. Ɛda adi sɛ na gyidifo a wɔyɛ adefo wɔ Efeso asafo no mu, baabi a na Paulo wɔ bere a ɔkyerɛw Timoteo krataa no. (1 Timoteo 1:3) Paulo de Kristo ho asɛmpa no kɔɔ aguadibea a na wodi yiye yi, na na ɔreyɛ nnipa pii asuafo. Akyinnye biara nni ho sɛ na eyinom mu pii yɛ adefo, sɛnea ebinom yɛ adefo wɔ Kristofo asafo no mu nnɛ no.

Afei, ne titiriw no, esiane nkyerɛkyerɛ a ɛwɔ 1 Timoteo 6:6-10 no nti, asɛm no ne sɛ: Dɛn na ɛsɛ sɛ nnipa a wɔwɔ sika pii na wɔpɛ sɛ wɔhyɛ Onyankopɔn anuonyam no yɛ? Paulo se ɛsɛ sɛ wofi ase hwehwɛ wɔn su mu. Sika tumi ma obi te nka sɛ ɔwɔ abotɔyam. Paulo kae sɛ: “Ahonyafo a wɔwɔ wi yi ase, kasa kyerɛ wɔn sɛ wonnnwen akokurokosɛm, nso wɔmmfa wɔn ani nnto ahonyade a enni hɔ daa so, na wɔmfa wɔn ani nto Nyankopɔn a ɔma yɛn ade nyinaa ma ɛdɔɔso sɛ yenni no so.” (1 Timoteo 6:17) Ɛsɛ sɛ ahonyafo hwɛ ade tra wɔn sika; ɛsɛ sɛ wɔde wɔn ho to Onyankopɔn, ahonyade nyinaa wura no so.

Nanso, suban yɛ asɛm no fã ara kwa. Awiei koraa no, ɛho behia sɛ Kristofo a wɔyɛ adefo no de wɔn ahode no di dwuma yiye. Paulo tu fo sɛ: “Wɔnyɛ yiye, nnya wɔn ho nnwuma pa fam; sɛ wɔnkyɛ ade fɛw so na wɔn nsa nteɛ.”—1 Timoteo 6:18.

“Nokware Nkwa No”

Adwene a ɛwɔ Paulo afotu no mu ne sɛ ɛsɛ sɛ yɛkae baabi a honam fam nneɛma som bo kodu no. Onyankopɔn Asɛm ka sɛ: “Ɔdefo ahonyade ne ne kurow a ɛyɛ den, na ɛte sɛ ɔfasu a ɛkorɔn n’adwene mu.” (Mmebusɛm 18:11) Yiw, ahobammɔ a sika tumi de ma no wɔ adwenem nkutoo na ɛyɛ nnaadaa ankasa. Ɛyɛ mfomso sɛ yɛde yɛn asetra begyina ɛno so a yennya Onyankopɔn anim dom.

Sɛnea honam fam ahonyade nni nnyinaso no ma ɛyɛ nea enye koraa sɛ yɛde yɛn anidaso begyina so. Ɛsɛ sɛ yɛde nokware anidaso gyina biribi a ɛyɛ den, ntease wom, na ɛwɔ hɔ daa so. Kristofo anidaso gyina yɛn Bɔfo, Yehowa Nyankopɔn, ne ne daa nkwa ho bɔhyɛ no so. Bere a ɛyɛ nokware sɛ sika ntumi ntɔ anigye no, ɛyɛ nokware koraa nso sɛ sika ntumi ntɔ nkwagye. Onyankopɔn mu gyidi a yebenya nkutoo na ebetumi ama yɛanya anidaso a ɛte saa.

Enti sɛ́ yɛyɛ adefo anaa ahiafo no, momma yenni asetra kwan a ɛbɛma yɛayɛ ‘adefo Onyankopɔn fam’ no akyi. (Luka 12:21) Biribiara nni hɔ a ɛsom bo sen sɛ yebenya gyinabea pa wɔ Ɔbɔadeɛ no anim. Mmɔden biara a yɛbɛbɔ akura mu no bɛboa ma ‘yɛde nhyɛase pa ato hɔ ama yɛn ho asie daakye, na yɛaso nokware nkwa no mu.’—1 Timoteo 6:19.

[Mfonini wɔ kratafa 7]

Paulo huu ade a ɛbɛma wanya abotɔyam

[Mfonini ahorow wɔ kratafa 8]

Yebetumi anya anigye ne abotɔyam wɔ nea yɛwɔ ho