Ahosiesie a Eye

W’AHOSIESIE ka wo ho nsɛm pii. Bere a Yehowa hwɛ nea ɛwɔ komam no, nnipa taa gyina “nea etua aniwa” so na ɛkyerɛ sɛnea wote. (1 Sam. 16:7) Sɛ wo ho tew na w’ahosiesie fata a, ɛda adi sɛ afoforo bɛka sɛ wudi wo ho ni, na ɛbɛma wɔatie wo yiye. Wo ho a wubesiesie no yiye no nso bedi ahyehyɛde a wowom no ne Onyankopɔn a wosom no no ho adanse pa.

Akwankyerɛ a Ɛsɛ sɛ Wode Di Dwuma. Bible no nhyehyɛ ahosiesie ho mmara pii. Nanso ɛde nnyinasosɛm a ɛfata a ebetumi aboa yɛn ma yɛasisi gyinae pa ma. Ade titiriw a enti yɛyɛ eyinom nyinaa ne sɛ yɛyɛ ‘ade nyinaa de hyɛ Onyankopɔn anuonyam.’ (1 Kor. 10:31) Ɛdefa nipadua mu ahosiesie ho no, nnyinasosɛm ahorow bɛn na ɛsɛ sɛ yɛde di dwuma?

Nea edi kan no, Bible hyɛ yɛn nkuran sɛ yɛmma yɛn nipadua ne yɛn ntade ani ntew. Wɔ Yehowa Mmara a ɔde maa tete Israelfo no mu no, ɔde ahwehwɛde a ɛfa ahotew ho mae. Sɛ nhwɛso no, sɛ asɔfo no reyɛ wɔn adwuma a, na ɛsɛ sɛ woguare na wɔhoro wɔn ntade wɔ mmere a wɔahyɛ mu. (Lev. 16:4, 24, 26, 28) Kristofo nhyɛ Mose Mmara no ase, nanso nnyinasosɛm a wɔada no adi wom no da so ara fata. (Yoh. 13:10; Adi. 19:8) Titiriw sɛ yɛrekɔ baabi a yehyiam som anaa asɛnka a, ɛsɛ sɛ yɛn nipadua ne yɛn anum nkã yɛ papa na yɛn ntade ho tew sɛnea ɛbɛyɛ a ɛrenhaw afoforo. Ɛsɛ sɛ wɔn a wɔma ɔkasa anaa wɔn a wɔyɛ ɔyɛkyerɛ ahorow kyerɛ asafo no yɛ nhwɛso pa wɔ eyi mu. Yɛn ani a yɛbɛma akũ yɛn ahosiesie ho no kyerɛ obu a yɛwɔ ma Yehowa ne n’ahyehyɛde no.

Nea ɛto so abien no, Bible tu yɛn fo sɛ yɛmfa ani a ewu ade ne adwenemtew nkeka yɛn ho. Ɔsomafo Paulo tuu Kristofo mmea fo sɛ, ‘wɔmfa ani a ewu ade ne adwenemtew nkeka wɔn ho, ɛnyɛ mmɛsawɔw anaa sika anaa nhene pa anaa ntade a ɛwɔ bo mu, na mmom nnwuma pa a ɛsɛ mmea a woyi onyamesom kyerɛ mu.’ (1 Tim. 2:9, 10) Ani a ewu ade ne adwenemtew nso ho hia wɔ mmarima ntadehyɛ ne wɔn ahosiesie mu.

Obi a n’ani da hɔ no hwɛ yiye sɛ ompira afoforo na ɔntwetwe adwene mma ne ho so sɛnea ɛmfata. Nea efi adwenemtew mu ba ne anifere, anaa atɛmpa. Obi a ɔwɔ obu ma Onyankopɔn gyinapɛn ahorow kari pɛ na ɛma ɔda saa su horow yi adi. Su ahorow yi a yɛbɛda no adi no nkyerɛ sɛ ɛnsɛ sɛ yesiesie yɛn ho ma ɛyɛ fɛ, na mmom ɛboa yɛn ma yefi nyansam siesie yɛn ho na ɛma yɛkwati sɛ yɛbɛhyɛ ntade kyenkyenenn ma atwetwe nkurɔfo adwene aba yɛn so. (1 Yoh. 2:16) Ɛmfa ho sɛ yɛwɔ beae a yɛsom, asɛnka mu, anaasɛ yɛreyɛ nnwuma foforo biara no, ɛsɛ sɛ yɛde nnyinasosɛm ahorow yi di dwuma. Ɛsɛ sɛ ntade a yɛhyɛ wɔ fie daa no mpo da anidahɔ ne adwenemtew adi. Yebetumi anya hokwan ahorow de adi adanse wɔ bɔnnɔ so bere a yɛwɔ sukuu mu anaa yɛn adwumam no. Bere a ebia yensiesie yɛn ho sɛnea yɛyɛ de kɔ asafo nhyiam ahorow, amantam ne amansin nhyiam ase no, ɛsɛ sɛ yɛde anidahɔ hyɛ ntade a ani tew.

Ɛwom, yɛn nyinaa ahosiesie nyɛ pɛ. Wɔnhwɛ kwan sɛ yɛbɛyɛ saa. Obiara wɔ nea ɔpɛ, na eyi fata. Nanso ɛsɛ sɛ bere nyinaa yɛde Bible akwankyerɛ di dwuma.

Ɔsomafo Petro kyerɛe sɛ ade a ehia mpo sen tiyɛ ne ntadehyɛ ne “komam nnipa a ahintaw no.” (1 Pet. 3:3, 4) Sɛ ɔdɔ, anigye, asomdwoe, papayɛ, ne gyidi a ɛwɔ nnyinaso pa hyɛ yɛn koma ma a, eyinom na ɛbɛyɛ yɛn honhom fam ntade a ɛhyɛ Onyankopɔn anuonyam ankasa.

Nea ɛto so abiɛsa no, Bible hyɛ yɛn nkuran sɛ yɛnhwɛ sɛ yɛn ahosiesie fata anaa. Wɔaka “ntade a ɛsɛ” ho asɛm wɔ 1 Timoteo 2:9. Bere a na ɔsomafo Paulo reka mmea ntadehyɛ ho asɛm no, saa nnyinasosɛm koro no ara nso fa mmarima ho. Biribi a wɔapam no yiye no ho tew na ɛyɛ fɛ. Sɛ́ yɛwɔ bi anaasɛ ahia yɛn no, yebetumi adi yɛn ho ni.

Nneɛma a edi kan a afoforo hu wɔ yɛn nipadua mu ahosiesie ho biako ne yɛn ti nhwi. Ehia sɛ yedi no ni anaa yesiesie no yiye. Ɔman bi amanne ne wɔn awosu na ɛkyerɛ sɛnea wosiesie wɔn ti nhwi. Wɔ 1 Korintofo 11:14, 15 no, yehu ɔsomafo Paulo afotusɛm a ɛfa sɛnea wosiesie ti nhwi ho a ɛda adi pefee sɛ ɛfa eyinom ho. Nanso, sɛ sɛnea obi siesie ne ti nhwi no ma ɛkɔyɛ te sɛ nea ɔpɛ sɛ ɔsɛ obi a ɛsono ne bɔbeasu a, eyi ne Bible nnyinasosɛm nhyia.—Deut. 22:5.

Mmarima fam no, wɔn bogyesɛ ne wɔn ti nhwi a wobeyi no fɛfɛɛfɛ no nso ka wɔn nipadua mu ahosiesie a ɛho tew no ho. Wɔ mmeae a wobu mfemfem sɛ ade a nidi wom no, ɛsɛ sɛ obiara a ɔwɔ bi no twitwa so fɛfɛɛfɛ.

Nea ɛto so anan no, ɛnsɛ sɛ yɛn ahosiesie da no adi sɛ yɛdɔ wiase anaa n’akwan. Ɔsomafo Yohane bɔɔ kɔkɔ sɛ: “Monnnɔ wiase anaa nneɛma a ɛwɔ wiase.” (1 Yoh. 2:15-17) Akɔnnɔ bɔne ahyɛ wiase yi mu ma. Nea ɛka eyinom ho no, Yohane kaa honam akɔnnɔ ne obi asetrade a ɔde bɛhoahoa ne ho ho asɛm. Kyerɛwnsɛm no san twe adwene si atuatew honhom, anaa tumidi so asoɔden so. (Mmeb. 17:11; Efe. 2:2) Saa akɔnnɔ ne su ahorow yi taa da adi wɔ akwan a nnipa fa so siesie wɔn ho na wɔhyɛ wɔn ntade mu. Ne saa nti, wɔn ahosiesie betumi ayɛ nea ɛmfata, ɛtwetwe adwene, ɛyɛ hyerɛnn, ayɛ fĩ, ayɛ basaa anaa ɛma wɔn ho gu hɔ. Sɛ́ Yehowa nkoa no, yɛpo ahosiesie a ɛte saa a ɛne Kristofo su nhyia no.

Sɛ́ anka wubesuasua wiase no, hwɛ sɛnea ɛbɛyɛ papa sɛ wubedi mmarima ne mmea a wɔn ho akokwaw honhom fam a wɔwɔ Kristofo asafo no mu no nhwɛso akyi na woasuasua wɔn ntadehyɛ ne wɔn ahosiesie no! Mmerante a wɔpɛ sɛ daakye wɔyɛ baguam akasafo no nso betumi ahwɛ sɛnea baguam akasafo a wɔfata no siesie wɔn ho no. Yɛn nyinaa betumi asuasua ankorankoro bi a wɔde nokwaredi ayɛ asɛnka adwuma no mfe pii no nhwɛso.—1 Tim. 4:12; 1 Pet. 5:2, 3.

Nea ɛto so anum no, sɛ yɛresusuw nea ɛfata ho a, ɛsɛ sɛ yɛma ɛtra yɛn adwenem sɛ ‘Kristo nso ansɔ ne ho ani.’ (Rom. 15:3) Nea na ehia Yesu titiriw ne sɛ ɔbɛyɛ Nyankopɔn apɛde. Afei nso Yesu maa afoforo a ɔbɛboa wɔn hiaa no sen n’ankasa ahotɔ. Ɛdefa sɛnea wɔpam ntade bi anaa ahosiesie bi ho no, sɛ biribi bɛyɛ akwanside ada yɛne nnipa a wɔwɔ baabi a yɛresom no ntam a, dɛn na ɛsɛ sɛ yɛyɛ? Ahobrɛase a Kristo daa no adi a yebesuasua no betumi aboa yɛn ma yɛasi gyinae nyansam. Ɔsomafo Paulo de nnyinasosɛm yi sii hɔ sɛ: “Yɛnto hintidua biara biribiara mu.” (2 Kor. 6:3) Esiane ɛno nti yebetumi akwati tiyɛ anaa ntade bi a ɛbɛpam nkurɔfo a yɛpɛ sɛ yedi wɔn adanse no afi yɛn ho no.

Sɛnea Wogyina Hɔ. Sɛnea wubegyina hɔ yiye nso ka nipadua mu ahosiesie ho. Ɛwom, ɛsono sɛnea yɛn mu biara tumi ne ho fa, na yɛmmɔ mmɔden nso sɛ yɛn nyinaa bɛyɛ yɛn ade pɛ. Nanso, ɛfata sɛ yɛhyɛ no nsow sɛ sɛnea Bible kyerɛ no, sɛ yegyina hɔ yiye a ɛma yɛn anim ba nyam na yenya ahotoso. (Lev. 26:13; Luka 21:28) Nanso, ebia esiane mfe pii a onua anaa onuawa bi de akontɔn ne mu ayɛ adwuma anaasɛ esiane onyin anaa nipaduam mmerɛwyɛ nti, ɔrentumi nnyina ntenten ma enti ebehia sɛ otweri biribi. Nanso wɔn a ɛnte saa wɔ wɔn fam no, wɔkamfo kyerɛ sɛ wobegyina hɔ yiye bere a wɔrekasa akyerɛ afoforo sɛnea ɛbɛyɛ na wɔremmu wɔn sɛ nnipa a biribiara mfa wɔn ho anaa wɔn ade yɛ mmɔbɔ. Saa ara nso na, bere a ɛnyɛ mfomso sɛ bere ne bere mu no ɔkasafo no de ne nsa begu ɔpon a wogyina akyi kasa no so no, sɛ wantweri pon no a, ɛma atiefo no nya ne ho adwempa.

Nnwinnade a Ɛho Tew. Ɛnyɛ yɛn nipadua nkutoo na ɛsɛ sɛ yɛma ɛho tew na yɛhyɛ ntade a ɛsɛ nko, ɛsɛ sɛ yɛma nnwinnade a yɛde di dwuma wɔ asɛnka mu no nso ho tew.

Susuw wo Bible no ho. Ɛnyɛ yɛn nyinaa na yebetumi atɔ Bible foforo bere a yɛn de ayɛ dedaw no. Nanso, ɛmfa ho bere tenten a yɛde akura yɛn Bible no, ɛsɛ sɛ ɛda adi sɛ yedi no ni.

Nokwarem no, yɛwɔ akwan horow pii a yebetumi ahyehyɛ nneɛma wɔ yɛn asɛnka bag mu, nanso ɛsɛ sɛ yɛyɛ ma ɛho tew. So woahu pɛn sɛ nkrataa fifi ɔdawurubɔfo bi Bible mu totɔ bere a ɔrebɛkenkan kyerɛwsɛm bi akyerɛ ofiewura anaa ebia bere a onua bi rema ɔkasa akyerɛ asafo no? So antwetwe w’adwene amfi asɛm a ɔreka no so? Sɛ nkrataa a yɛde hyehyɛ yɛn Bible mu no twetwe nkurɔfo adwene a, ɛnde sɛ wuyi fi Bible no mu de hyɛ baabi foforo a, ɛbɛma woatumi ahyehyɛ wo nneɛma yiye. Kae nso sɛ, wɔ mmeae bi no, wobu Bible anaa nyamesom nhoma a wɔde toto fam no sɛ adeyɛ a ɛnkyerɛ obu koraa.

Ɛsɛ sɛ yɛma nipaduam ahotew ho hia yɛn titiriw. Ɛkã sɛnea afoforo bu yɛn no nso. Nanso, nea ɛsen ne nyinaa no, yɛma yɛn ani kũ ho kɛse efisɛ yɛpɛ sɛ ‘yɛde hyehyɛ yɛn agyenkwa Onyankopɔn kyerɛ, ade nyinaa mu.’—Tito 2:10.