Bible no Adwene

So na Ɔsomafo Paulo Mpɛ Mmea Asɛm?

WƆDE ɔsomafo “Paulo nkyerɛkyerɛ no adi dwuma sɛ ade titiriw a wogyina so yɛ nyiyim tia mmea wɔ Kristofo . . . asɔre no mu.” Saa na Ɔtemmufo Cecilie Rushton a ɔwɔ Auckland, New Zealand, kae wɔ krataa a ɔkyerɛw kɔmaa aman a kan na Britania di so no Ayɔnkoyɛ Kuw Mmarahyɛ Bagua wɔ Cyprus wɔ 1993 mfiase. Ɔka sɛ, “Ne Nkrataa a ɔkyerɛw kɔmaa Timoteo no da ne nsusuwii adi: ‘Ɔbea de, memma no kwan sɛ ɔnkyerɛkyerɛ anaasɛ onni ɔbarima so, na mmom ɔnyɛ komm.’”—1 Timoteo 2:12.

Bere a Paulo kyerɛw mmea dwumadi anaa wɔn dibea ho asɛm no, so na ɛyɛ n’ankasa adwene na ɔreda no adi, anaa wɔde honhom na ɛkaa no ma ɔkyerɛwee? Sɛ wususuw Paulo nhoma anaa nkrataa no nyinaa ho a, so ɛda no adi sɛ ɔyɛ nyiyim tia mmea ankasa? Paulo nsɛm a ɔkyerɛw kɔmaa Timoteo a wɔafa aka asɛm wɔ atifi hɔ no fa dɛn ho ankasa?

Paulo ho Adanse Ahorow

Paulo na wɔkyerɛ sɛ ɔkyerɛw Kristofo Hela Kyerɛwnsɛm mu nhoma 27 no mu 14. Adanse a ɛkyerɛ sɛ na honhom kronkron wɔ no so ne kasa horow pii a otumi kae a ná ɛyɛ nwonwa no. Nea ɛka ho bio no, odii adanse sɛ onyaa anisoadehu pii a ɛyɛ nwonwa. (1 Korintofo 14:18; 2 Korintofo 12:1-5) Ne ho a ɔde bɔɔ afɔre, ɔkra nyinaa mu a ofi yɛɛ ade, ne ɔdɔ ho nhwɛso a ɔyɛe no maa ɔne ne bere so Kristofo nyaa abusuabɔ a emu yɛ den a onuadɔ wom. (Asomafo no Nnwuma 20:37, 38) Ne nsɛm a ɔkyerɛwee, a nea ɔka faa mmea ho ka ho no yɛ ‘Kyerɛw nyinaa a efi Onyankopɔn home mu, na eye ma nkyerɛkyerɛ’ no fã.—2 Timoteo 3:16.

Mmea ho Nsɛm a Ɛwɔ Paulo Nkrataa Mu

Gye a na Paulo gye mmea tom ne obu a na ɔwɔ ma wɔn no da adi kɛse wɔ ne nhoma ahorow nyinaa mu. Ɔkaa dwuma horow a wodi wɔ asafo no ne abusua mu ho nsɛm mpɛn pii. Wɔ ne krataa biako mu no, ɔde Kristofo nguanhwɛfo su pa totoo nea ɔbaatan da no adi ho.—1 Tesalonikafo 2:7.

Ɔsomafo no Kristofo nuabeanom a ɔbobɔɔ wɔn din wɔ ne nkrataa mu no pii yɛ nkurɔfo a n’ankasa fi ɔdɔ mu kamfoo wɔn. Wɔn a wɔka ne nkyia a ɔde kɔmaa Roma asafo no mufo ho ne mmea bi a “wɔbɔ Awurade mu mmɔden” a ɔbobɔɔ wɔn din kyiakyiaa wɔn no. (Romafo 16:12) Ɛdefa Euodia ne Sintike ho no, ɔhyɛɛ Filipi anuanom no nkuran sɛ ‘wɔnso wɔn mu abia, efisɛ wɔn na wɔkaa ne ho peree asɛmpa no.’ (Filipifo 4:3) Wɔ Paulo krataa a ɔkyerɛw kɔmaa Timoteo mu no, ɔkaa saa aberante no nanabea Lois ne ne nã Eunike gyidi ho nhwɛso pa no ho asɛm.—2 Timoteo 1:5.

Ɛno akyi no, so biribi wɔ hɔ a ɛkyerɛ sɛnea Paulo Kristofo nuabeanom tee nka wɔ ne ho? Nea ɛyɛ anigye ne sɛ, odii Akwila ne Priska, awarefo a ɔne wɔn nyaa ayɔnkofa a emu yɛ den ho adanse sɛ ɛnyɛ Akwila nko na mmom ne yere Priska nso ka ho na “wɔde wɔn ankasa kɔn momae de sii [ne] kra ananmu.”—Romafo 16:3, 4.

So na Ɔyɛ Nyiyim Tia Mmea?

“Mpoopoo w’ani nkyerɛ ɔpanyin, na mmom tu no fo sɛ agya, mmerante sɛ anuanom, mmea mpanyin sɛ ɛnanom, mmabaa sɛ nuabeanom, wɔ ahotew nyinaa mu.” (1 Timoteo 5:1, 2) So Paulo nsɛm yi a ɔkyerɛw kɔmaa Timoteo no nna obu a ɛfata a ɔwɔ ma mmea adi? Paulo dii mmarima ne mmea a wɔwɔ Kristofo asafo no mu nyinaa ni pɛpɛɛpɛ. Ɔkyerɛwee sɛ: ‘Yudani anaa Helani nni hɔ, akoa anaa ɔdehye nni hɔ, ɔbarima anaa ɔbea nni hɔ bio; efisɛ mo nyinaa yɛ biako, Kristo Yesu mu.’—Galatifo 3:28.

Ɛdefa afã a Onyankopɔn de ama wɔ aware mu ho no, Paulo kyerɛwee sɛ: “Ɔyerenom, mommrɛ mo ho ase mma mo ankasa mo kununom, sɛ moyɛ ma Awurade, efisɛ okunu yɛ ɔyere ti, sɛ Kristo nso yɛ asafo no ti no, na ɔne nipadua no agyenkwa.” (Efesofo 5:22, 23; fa toto 1 Korintofo 11:3 ho.) Yiw, nsonsonoe wɔ afã a okunu ne ɔyere wɔ no mu, nanso eyi nkyerɛ sɛ ahokafo no biako ba fam. Afanu no mu biara boa ɔfoforo, na afã no mu biara ho dwuma a wodi no yiye no yɛ den, na ɛma abusua no di yiye. Afei nso, na ɛnsɛ sɛ okununom ma wɔn tiyɛ a wodi no yɛ nhyɛso anaa nea ɔdɔ nnim. Paulo toaa so sɛ: “Ɛsɛ okununom sɛ wɔdɔ wɔn ankasa wɔn yerenom sɛ wɔn ankasa nipadua,” a wɔwɔ ɔpɛ sɛ wɔde nneɛma akɛse bɛbɔ afɔre ama wɔn. (Efesofo 5:28, 29) Ná ɛsɛ sɛ mmofra tie agya ne ɛnã nyinaa asɛm.—Efesofo 6:1, 2.

Ade foforo a ɛsɛ sɛ yɛhyɛ no nsow nso ne nsɛm a Paulo ka faa aware mu nkitahodi ho no. Ná Paulo nyɛ nyiyim bere a ɔkyerɛw eyi no: “Okunu mma ɔyere nea ɛsɛ, na ɔyere nso mma okunu saa ara. Ɔyere nni n’ankasa ne nipadua so tumi, na mmom okunu; saa ara nso na okunu nni n’ankasa ne nipadua so tumi, na mmom ɔyere.”—1 Korintofo 7:3, 4.

“Ɔbea de . . . Ɔnyɛ Komm”

Ɛdefa Paulo nsɛm a ɛwɔ 1 Timoteo 2:12 a yɛafa mu asɛm aka wɔ nkyekyem a edi kan no mu ho no, so ka a ɔkae sɛ mmea nyɛ “komm” no kyerɛ sɛ na ɔyɛ nyiyim tia mmea? Dabi! “Komm” a na ɛsɛ sɛ wɔyɛ no fa asafo no mu nkyerɛkyerɛ ne honhom fam tumidi ho, na na eyi gyina ɔbarima ne ɔbea ntam abusuabɔ a Onyankopɔn de ama a yɛadi kan aka ho asɛm no so.a

Eyi nkyerɛ sɛ mmea ntumi nyɛ ɔsoro nokware no ho akyerɛkyerɛfo. Paulo hyɛɛ mmerewa nkuran sɛ “wɔnkyerɛkyerɛ” mmabaa “nsɛm pa.” Bere a ɛnanom Kristofo redi Eunike ne Lois a wɔkyerɛkyerɛɛ Timoteo no nhwɛso akyi no, ɛsɛ sɛ wɔtete wɔn mma wɔ Onyankopɔn akwan so. (Tito 2:3-5; 2 Timoteo 1:5) Ɛnnɛ, wɔ Yehowa Adansefo asafo ahorow mu no, Kristofo mmea ɔpehaha pii nya honhom mu abotɔyam bere a wodi Euodia ne Sintike nhwɛso no akyi na wɔka asɛmpa no wɔ baguam na wɔyɛ mmarima ne mmea asuafo no.—Dwom 68:11; Mateo 28:19; Filipifo 4:2, 3.

Enti, dɛn na wususuw? Sɛ wohwɛ Paulo nhoma ahorow no nyinaa a, so edi adanse sɛ na ɔyɛ nyiyim tia mmea?

[Ase hɔ asɛm]