Eunike Ne Lois—Akyerɛkyerɛfo a Wɔyɛɛ Nhwɛso Pa

Sɛ Yehowa asomfo no, yenim sɛ ɔsom ho nkyerɛkyerɛ a etu mpɔn a yɛde bɛma yɛn mma no yɛ asɛyɛde a anibere wom. Wɔ bere pa mpo mu no, adwuma yi betumi ayɛ nea akwanside ne nsɛnnennen ahorow pii wom. Eyi te saa titiriw bere a Kristoni a ɔyɛ ɔwofo rehyia nsɛnnennen a ɛte saa wɔ ofie a wɔn nyinaa nni ɔsom biako mu no mu. Tebea a ɛte saa no nyɛ foforo. Kyerɛwnsɛm no ka ɔwofo bi a na ɔwɔ saa tebea no mu wɔ afeha a edi kan Y.B. mu no ho asɛm kyerɛ yɛn.

Na ɔbea bi a wɔfrɛ no Eunike abusua te Listra a ɛwɔ Likaonia mantam mu wɔ Asia Kumaa kesee fam. Na Listra yɛ kurow wɔ ɔmansin ketewaa bi a ennyee din kɛse mu. Na ɛyɛ kurow a ɛhyɛ Romafo ase a wɔfrɛ no Julia Felix Gemina Lustra, a Augusto Kaesare kyekyee sɛ ɔde ko atia mpɔtam hɔ adwowtwafo dwumadi. Na Eunike yɛ Yudani Kristoni a ɔne ne kunu Helani a ɛsono ne som, ne babarima Timoteo, ne ne maame Lois te ofie biako mu.—Asomafo no Nnwuma 16:1-3.

Ɛwom sɛ na Yudafo bi wɔ Ikoniom a efi Listra kɔ hɔ bɛyɛ kilomita 30 de, nanso ɛda adi sɛ na Yudafo kakraa bi na wɔwɔ Listra efisɛ Bible no nka sɛ na hyiadan wɔ hɔ. (Asomafo no Nnwuma 14:19) Enti na ebetumi ayɛ den ama Eunike sɛ ɔbɛsom. Nokwasɛm a ɛkyerɛ sɛ wɔantwa Timoteo twetia wɔ n’awo akyi no ama nhomanimfo bi aka sɛ na Eunike kunu sɔre tia saa adwene no.

Nanso, na Eunike nyɛ ankonam wɔ ne som mu. Ɛda adi sɛ Timoteo nyaa ne nkyerɛkyerɛ a efi “nkyerɛwee kronkron” no mu no fii ne maame ne ne maame maame, Lois, nkyɛn.a Ɔsomafo Paulo tuu Timoteo fo sɛ: ‘Kɔ so wɔ nea woasua na wɔma wugye dii no mu, wunim onii ko a wusuae ne nkyɛn no, na wufi wo mmofraase nim nkyerɛwee kronkron no a ebetumi ama woahu nyansa afa Kristo Yesu mu gyidi so akɔ nkwagye mu.’—2 Timoteo 3:14, 15.

Nkyerɛkyerɛ a ‘Efi Mmofraase’

Bere a Paulo kae sɛ wɔde “nkyerɛwee kronkron” no kyerɛkyerɛɛ Timoteo fii ‘ne mmofraase’ no, na eyi kyerɛ sɛ onya fii ne nkokoaa bere mu. Na eyi ma ɛne Hela asɛmfua (breʹphos) a ɔde dii dwuma a ɛtaa kyerɛ akokoaa no hyia. (Fa toto Luka 2:12, 16 ho.) Enti Eunike faa n’asɛyɛde a Onyankopɔn de maa no no aniberesɛm, na ofii ase ntɛm ara de ntetee a ebetumi ama Timoteo anyin abɛyɛ Onyankopɔn somfo a ɔwɔ ahofama no maa no.—Deuteronomium 6:6-9; Mmebusɛm 1:8.

Wɔmaa Timoteo ‘gyee’ Kyerɛwnsɛm mu nokware ‘ahorow dii.’ Sɛnea Hela nsɛm asekyerɛ nhoma bi kyerɛ no, asɛmfua a Paulo de dii dwuma wɔ ha no kyerɛ sɛ, “sɛ wɔma obi gye biribi di koraa; wɔma onya mu awerɛhyem.” Akyinnye biara nni ho sɛ na ebegye bere ne mmɔdenbɔ pii na wɔatumi de gyidi pintinn a ɛte saa adua Timoteo koma mu, na wɔaboa no ma wasusuw Onyankopɔn Asɛm ho anya mu gyidi. Ɛnde, ɛda adi sɛ Eunike ne Lois bɔɔ mmɔden kɛse de Kyerɛwnsɛm no kyerɛkyerɛɛ Timoteo. Na hwɛ akatua ara a mmea a wosuro Onyankopɔn yi nyae! Paulo tumi kyerɛw faa Timoteo ho sɛ: “Mekae wo gyidi a nkontompo nnim a kan ɛwɔ wo nena Lois ne wo na Eunike mu, na migye midi sɛ ɛwɔ wo nso mu no.”—2 Timoteo 1:5.

Hwɛ ade titiriw a Eunike ne Lois yɛe wɔ Timoteo asetram! Nhoma kyerɛwfo David Read ka eyi ho asɛm sɛ: “Sɛ na ɔsomafo no gye di sɛ biribiara ho nhia sɛ sakra a Timoteo ankasa sakraa no a, anka ɔbɛma wakae eyi ntɛm ara. Nanso nea edi kan a na ɛsɛ sɛ ɔka fa Timoteo gyidi ho ne sɛ na ‘ɛwɔ Lois ne Eunike mu.’” Asɛm a Paulo ka faa Lois, Eunike, ne Timoteo gyidi ho no kyerɛ sɛ mpɛn pii no Kyerɛwnsɛm a mmofra awofo ne wɔn nananom mpo de kyerɛkyerɛ wɔn wɔ fie no ho hia na wɔahu sɛnea abofra bi honhom fam tebea bɛyɛ daakye. So ɛnsɛ sɛ ɛno ma abusua mufo susuw nea wɔreyɛ de adi asɛyɛde a wɔwɔ wɔ Onyankopɔn ne wɔn mma ho no dwuma?

Gyama na Paulo resusuw tebea ko a na Lois ne Eunike ama aba fie hɔ nso no ho. Ɛbɛyɛ sɛ ɔsomafo no kɔsraa wɔn bere a edi kan a ɔkɔɔ Listra wɔ 47/48 Y.B. mu no. Ɛda adi sɛ saa bere no na mmea baanu yi bɛyɛɛ Kristofo. (Asomafo no Nnwuma 14:8-20) Ebia abusuabɔ a ɛyɛ hyew na anigye wom a Paulo nyae wɔ fie hɔ no na ɛkyerɛɛ nsɛmfua a ɔmfa nni dwuma bere a ɔfrɛɛ Lois sɛ Timoteo “nena” no. Sɛnea ɔbenfo Ceslas Spicq kyerɛ no, Hela asɛmfua a ɔde dii dwuma (mamʹme, a ɛnyɛ teʹthe a wɔde da obu adi no) yɛ “asɛm a abofra ka de kyerɛ sɛ ɔpɛ” ne nenabea asɛm, a wɔ asɛm yi mu no ɛkyerɛ sɛ “onim no na ɔpɛ n’asɛm.”

Timoteo Akwantu

Sɛnea na Eunike aware te ankasa wɔ bere a Paulo san kɔɔ Listra (bɛyɛ 50 Y.B.) no nna adi yiye. Nhomanimfo pii ka sɛ na ɔyɛ okunafo. Sɛnea ɛte biara no, Timoteo maame ne ne nena akwankyerɛ ama wanyin abɛyɛ aberante pa a ebia saa bere no na wadi bɛyɛ mfe 20. “Na anuanom a wɔwɔ Listra ne Ikonion no bɔ no din pa.” (Asomafo no Nnwuma 16:2) Ɛda adi pefee sɛ na wɔama Timoteo anya ɔpɛ a efi koma mu sɛ ɔbɛka Ahenni no ho asɛmpa, efisɛ ogyee nsa a Paulo to frɛɛ no sɛ ɔmmɛka ɔne Silas ho wɔ asɛmpatrɛw akwantu no mu no so.

Susuw sɛnea Eunike ne Lois tee nka bere a na Timoteo rebefi hɔ akɔ no ho! Na wonim sɛ bere a edi kan a Paulo baa kurom hɔ no, wosiw no abo gyaw no too hɔ sɛ onwu. (Asomafo no Nnwuma 14:19) Enti ɛbɛyɛ sɛ anyɛ mmerɛw amma wɔn sɛ wɔbɛma aberantewaa Timoteo akɔ. Ebia wosusuw bere tenten a obedi ne sɛ ebia ɔbɛsan aba dwoodwoo anaa no ho. Saa adwennwenne no nyinaa akyi no, ne maame ne ne nenabea hyɛɛ no nkuran sɛ onnye hokwan titiriw a ebetumi aboa no ma wasom Yehowa yiye no ntom.

Asuade a Mfaso Wɔ So

Yebetumi asua pii afi Eunike ne Lois ho a yebesusuw yiye no mu. Gyidi na ɛkanyan wɔn ma wɔde honhom fam ntetee pa maa Timoteo. Ɛda adi sɛ onyamesom pa nhwɛso a edi mu na ɛfata a nananom yɛ ma wɔn mmanananom ne afoforo no betumi de mfaso abrɛ Kristofo asafo no nyinaa ankasa. (Tito 2:3-5) Eunike nhwɛso no kae ɛnanom a wɔn kununom nyɛ gyidifo no nso asɛyɛde ne akatua a ɛwɔ honhom fam nkyerɛkyerɛ a wɔde bɛma wɔn mma no so. Ɛtɔ da bi a, eyi a wɔbɛyɛ no begye akokoduru kɛse, ne titiriw no sɛ agya no ani nnye ne yere som mu gyidi ho kɛse a. Ɛhwehwɛ sɛ ɔyere a ɔyɛ Kristoni yɛ anifere nso, efisɛ ɛsɛ sɛ onya obu ma ne kunu tiyɛ.

Lois ne Eunike nyaa wɔn gyidi, mmɔdenbɔ, ne ahofama no so akatua bere a wohui sɛ Timoteo anya honhom fam nkɔso ma wabɛyɛ ɔsɛmpatrɛwfo ne ɔhwɛfo a ɔfata no. (Filipifo 2:19-22) Saa ara nso na nnɛ Kyerɛwnsɛm mu nokware a yɛde kyerɛkyerɛ yɛn mma no gye bere, boasetɔ, ne mmɔdenbɔ, nanso biribi pa a efi mu ba no ma mmɔdenbɔ no yɛ nea mfaso wɔ so ankasa. Kristofo mmofra pii a wɔde ‘nkyerɛwee kronkron akyerɛkyerɛ wɔn fi mmofraase’ wɔ ofie a wɔn nyinaa nni ɔsom biako mu a wɔyɛ nhwɛso pa no ma wɔn awofo a wosuro Onyankopɔn no ani gye kɛse. Na hwɛ sɛnea mmebusɛm yi yɛ nokware: ‘Nea ɔwo onyansafo no bedi ahurusi’!—Mmebusɛm 23:23-25.

Ɔsomafo Yohane kaa ne honhom fam mma ho asɛm sɛ: “Minni anigye a ɛsen eyi, sɛ mete sɛ me mma nam nokware mu.” (3 Yohane 4) Nokwarem no, nnipa pii a wɔayɛ wɔn ade te sɛ Eunike ne Lois, akyerɛkyerɛfo baanu a wɔyɛɛ nhwɛso pa no, nso gye asɛm yi tom.

[Ase hɔ asɛm]