Ma W’ani Mmra Wo Nkyerɛkyerɛ So

“Ma w’ani mmra wo ho ne kyerɛ no so na tra mu, efisɛ woyɛ saa a, wubegye wo ho ne w’atiefo nkwa.” —1 TIMOTEO 4:16.

 1, 2. Dɛn nti na wohia akyerɛkyerɛfo a wɔyɛ nsi denneennen nnɛ?

“MONKƆ nkɔyɛ amanaman nyinaa m’asuafo. . . . monkyerɛkyerɛ wɔn sɛ wonni nea mahyɛ mo nyinaa so.” (Mateo 28:19, 20) Esiane Yesu Kristo ahyɛde yi nti, ɛsɛ sɛ Kristofo nyinaa bɔ mmɔden sɛ wɔbɛyɛ akyerɛkyerɛfo. Wohia akyerɛkyerɛfo a wɔyɛ nsi ma wɔaboa komapafo ma wɔabenya Onyankopɔn ho nimdeɛ ansa na aka akyiri dodo. (Yohane 17:3; Romafo 13:11) Ɔsomafo Paulo hyɛɛ nkuran sɛ: “Pae mu ka asɛm no, gyina mu ɛbere a eye ne nea enye mu.” Eyi hwehwɛ sɛ yɛbɛkyerɛkyerɛ wɔ asafo no mu ne akyi nyinaa. Nokwarem no, asɛmpaka adwuma no hwehwɛ pii sen Onyankopɔn asɛm a yɛbɛka akyerɛ kɛkɛ. Sɛ anigyefo bɛba abɛyɛ asuafo a, nkyerɛkyerɛ a etu mpɔn ho hia.

² Yɛte “mmere a emu yɛ den” mu. (2 Timoteo 3:1) Wɔde wiase nyansapɛ ne atoro nkyerɛkyerɛ asɛe nkurɔfo adwene. Nnipa pii “adwene aduru sum,” na wɔn “ani nwu ade bio.” (Efesofo 4:18, 19) Ebinom di yaw kɛse wɔ nkate fam. Yiw, nkurɔfo ‘abrɛ, na wɔsam hɔ sɛ nguan a wonni hwɛfo’ ampa. (Mateo 9:36) Nanso, yɛnam yɛn nkyerɛkyerɛ so betumi aboa komapafo ma wɔayɛ nsakrae a ɛho hia.

Akyerɛkyerɛfo Wɔ Asafo no Mu

 3. (a) Dɛn na ɛka Yesu ahyɛde a ɛne sɛ yɛnkyerɛkyerɛ no ho? (b) Henanom na ɛyɛ wɔn asɛyɛde titiriw sɛ wɔbɛkyerɛkyerɛ wɔ asafo no mu?

³ Ɛdenam ofie Bible adesua nhyehyɛe so no, nnipa ɔpepem pii renya nkyerɛkyerɛ sɛ ankorankoro. Nanso, wɔ wɔn a wɔyɛ foforo asubɔ akyi no, wobehia mmoa na ama ‘wɔagye ntini atim fapem no mu.’ (Efesofo 3:17) Bere a yedi Yesu ahyɛde a wɔayɛ ho kyerɛwtohɔ wɔ Mateo 28:19, 20 no so, na yɛkyerɛ wɔn a wɔyɛ foforo kwan ba Yehowa ahyehyɛde no mu no, wonya mfaso a ɛne sɛ wɔbɛkyerɛkyerɛ wɔn wɔ asafo no ankasa mu. Sɛnea Efesofo 4:11-13 kyerɛ no, wɔapaw mmarima sɛ wɔnsom sɛ “ahwɛfo ne akyerɛkyerɛfo, na wɔasesɛw ahotefo no yiye ama ɔsom adwuma no, na Kristo nipadua no si akɔ so.” Ɛtɔ mmere bi a, nea ɛka wɔn nkyerɛkyerɛ ho ne hia a ehia sɛ ‘woyi ntɛn, ka anim, tu fo, abodwokyɛre nyinaa mu.’ (2 Timoteo 4:2) Ná akyerɛkyerɛfo dwumadi ho hia araa ma bere a Paulo rekyerɛw Korintofo no, ɔbɔɔ akyerɛkyerɛfo din wɔ asomafo ne adiyifo akyi pɛɛ.—1 Korintofo 12:28.

 4. Ɔkwan bɛn so na tumi a yetumi kyerɛkyerɛ no boa yɛn ma yetie Paulo afotu a wɔayɛ ho kyerɛwtohɔ wɔ Hebrifo 10:24, 25 no?

⁴ Ampa, ɛnyɛ Kristofo nyinaa na wɔsom sɛ mpanyimfo anaa ahwɛfo. Nanso, wɔhyɛ yɛn nyinaa nkuran sɛ yɛntwetwe yɛn ho “nkɔ ɔdɔ ne nnwuma pa mu.” (Hebrifo 10:24, 25) Nea ɛka saa a yɛbɛyɛ wɔ nhyiam ase ho ne mmuae a efi komam a wɔasiesie no yiye a ebetumi ahyɛ afoforo den na ahyɛ wɔn nkuran. Ahenni adawurubɔfo a wɔn ho akokwaw nso betumi ‘atwetwe afoforo akɔ nnwuma pa mu’ denam wɔn nimdeɛ ne wɔn suahu a wɔne wɔn a wɔyɛ foforo bɛkyɛ bere a wɔne wɔn nam asɛnka mu no so. Wɔ mmere a ɛte saa mu ne bere a yɛredi bɔnnɔ so adanse no, yebetumi de nkyerɛkyerɛ a mfaso wɔ so ama. Sɛ nhwɛso no, wɔhyɛ mmea a wɔn ho akokwaw nkuran sɛ “wɔnkyerɛkyerɛ nsɛm pa.”—Tito 2:3.

Wɔkyerɛkyerɛ Wɔn Ma Wogye Di

 5, 6. (a) Ɔkwan bɛn so na nokware Kristosom ne atoro som nhyia? (b) Ɔkwan bɛn so na mpanyimfo boa wɔn a wɔyɛ foforo ma wosisi gyinae a nyansa wom?

⁵ Enti nokware Kristosom ne atoro som a wɔn mu pii hwehwɛ sɛ wobedi wɔn nkurɔfo nsusuwii so no bɔ abira koraa. Bere a na Yesu wɔ asase so no, ɛkame ayɛ sɛ nyamesom akannifo no hwehwɛe sɛ wɔnam nnipa atetesɛm a ɛyɛ nhyɛ so bedi nnipa asetra afã nyinaa so. (Luka 11:46) Kristoman mu asɔfo no ayɛ saa mpɛn pii.

⁶ Nanso, nokware som yɛ ‘ɔsom kronn’ a yɛnam yɛn ‘adwene tumi’ so de ma. (Romafo 12:1) Yehowa asomfo yɛ nkurɔfo a ‘wɔkyerɛkyerɛɛ wɔn ansa na wɔregye adi.’ (2 Timoteo 3:14) Ɛtɔ mmere bi a, ɛho behia sɛ wɔn a wodi anim no de akwankyerɛ bi ma na ama asafo no dwumadi akɔ tẽẽ. Sɛ́ anka mpanyimfo besisi gyinae ahorow ama mfɛfo Kristofo no, wɔkyerɛkyerɛ wɔn mmom ma ‘wohu papa ne bɔne mu yiyi.’ (Hebrifo 5:14) Mpanyimfo yɛ eyi titiriw denam ‘gyidi ne nkyerɛkyerɛ pa’ a wɔde ma asafo no so.—1 Timoteo 4:6.

Ma W’ani Mmra Wo Nkyerɛkyerɛ So

 7, 8. (a) Ɔkwan bɛn so na nnipa a wɔn nimdeɛ sua tumi som sɛ akyerɛkyerɛfo? (b) Dɛn na ɛkyerɛ sɛ ankorankoro mmɔdenbɔ ho hia na obi abɛyɛ ɔkyerɛkyerɛfo a otu mpɔn?

⁷ Nanso, momma yɛnnan nkɔ ahyɛde a ɛne sɛ yɛnkyerɛkyerɛ no so. So egye ahokokwaw, nhomasua, anaa nimdeɛ soronko bi? Ɛnte saa. Ankorankoro a wɔba fam a wɔn nimdeɛ nkɔ akyiri na wɔreyɛ ɔkyerɛkyerɛ adwuma yi fã kɛse no ara wɔ wiase nyinaa. (1 Korintofo 1:26-29) Paulo kyerɛkyerɛ mu sɛ: “Yɛwɔ saa ademude yi [ɔsom adwuma no] anwenne [nipadua a ɛnyɛ pɛ] mu, na tumi a ɛboro so no ayɛ Onyankopɔn dea, na amfi yɛn mu.” (2 Korintofo 4:7) Nkɔanim kɛse a aba wɔ wiase nyinaa Ahenni asɛmpaka adwuma no mu no di Yehowa honhom no tumi ho adanse!

⁸ Nanso, egye mmɔdenbɔ kɛse na obi abɛyɛ “odwumayɛni a enhia sɛ ɔfɛre, na okura nokwasɛm no mu pɛpɛɛpɛ.” (2 Timoteo 2:15) Paulo hyɛɛ Timoteo nkuran sɛ: “Ma w’ani mmra wo ho ne kyerɛ no so na tra mu, efisɛ woyɛ saa a, wubegye wo ho ne w’atiefo nkwa.” (1 Timoteo 4:16) Ɔkwan bɛn so koraa na obi ani ba ne nkyerɛkyerɛ so, sɛ́ ɛyɛ asafo no mu anaa akyi? So saa a yɛbɛyɛ no hwehwɛ ankasa sɛ yenya ahokokwaw anaa nkyerɛkyerɛ kwan soronko bi?

 9. Dɛn na ɛho hia sen ɔdom akyɛde ahorow?

⁹ Akyinnye biara nni ho sɛ, Yesu daa nkyerɛkyerɛ akwan soronko a ɛkanyan adwene adi wɔ ne Bepɔw so Asɛnka a agye din no mu. Bere a ɔkasa wiei no, “ne kyerɛkyerɛ no maa nkurɔfo akuwakuw no ho dwiriw wɔn.” (Mateo 7:28) Nokwarem no, yɛn mu biara rentumi nkyerɛkyerɛ sɛnea Yesu kyerɛkyerɛe no. Nanso, ɛho nhia sɛ yɛyɛ akasafo a yɛn ano atew ansa na yɛayɛ akyerɛkyerɛfo a wotu mpɔn. Wiɛ, sɛnea Hiob 12:7 kyerɛ no, “mmoa” ne “ɔsoro nnomaa” mpo betumi akyerɛkyerɛ a wɔnkasa! Sɛ ɔdom akyɛde biara anaa ahokokwaw da nkyɛn a, nea ɛho hia titiriw nso ne ‘nnipa ko’ a yɛyɛ—suban a yekura ne honhom fam su a yɛwɔ a asuafo betumi asuasua.—2 Petro 3:11; Luka 6:40.

Onyankopɔn Asɛm Ho Asuafo

10. Ɔkwan bɛn so na Yesu yɛɛ nhwɛso pa sɛ Onyankopɔn Asɛm no suani?

¹⁰ Ɛsɛ sɛ Kyerɛwnsɛm mu nokware ho kyerɛkyerɛfo a otu mpɔn yɛ Onyankopɔn Asɛm no suani. (Romafo 2:21) Yesu Kristo yɛɛ eyi ho nhwɛso a ɛda nsow. Wɔ Yesu asase so som adwuma mu no, ɔtwee adwene sii nsusuwii a na ɛne nsɛm a ɛwɔ Hebri Kyerɛwnsɛm mu nhoma ahorow bɛyɛ fã mu di nsɛ so anaa ɔkaa ho asɛm.a Onyankopɔn Asɛm a na onim no daa adi bere a odii mfe 12 a wohuu no sɛ “ɔte akyerɛkyerɛfo ntam retie wɔn na obisabisa wɔn nsɛm” no. (Luka 2:46) Bere a Yesu nyinii no, ɔde yɛɛ ne su sɛ ɔbɛkɔ hyiadan mu, baabi a na wɔkenkan Onyankopɔn Asɛm no.—Luka 4:16.

11. Adesua ho su pa bɛn na ɛsɛ sɛ ɔkyerɛkyerɛfo nya?

¹¹ So woyɛ obi a ɔde anigye kenkan Onyankopɔn Asɛm? Emu a wobɛpɛɛpɛɛ no ne ɔkwan a wobɛfa so ‘ahu Yehowa suro, na woanya Onyankopɔn ho nimdeɛ.’ (Mmebusɛm 2:4, 5) Enti nya adesua su pa. Bɔ mmɔden kenkan Onyankopɔn Asɛm no fã bi da biara da. (Dwom 1:2) Fa yɛ wo su sɛ wobɛkenkan Ɔwɛn-Aban ne Nyan! a ɛba biara bere a wo nsa ka ara pɛ no. Yɛ aso tie bere a wowɔ asafo nhyiam ahorow ase no. Sua sɛ wode ahwɛyiye bɛyɛ nhwehwɛmu. Sɛ wusua sɛ ‘wobɛhwehwɛ nneɛma nyinaa mu pɛpɛɛpɛ’ a, worenka nsɛm ngugu mu, na wonka nsɛm a enhyia bere a wokyerɛkyerɛ no.—Luka 1:3.

Ɔdɔ ne Obu a Yebenya Ama Wɔn a Yɛkyerɛkyerɛ Wɔn No

12. Ná su bɛn na Yesu kura wɔ n’asuafo ho?

¹² Su foforo a ɛho hia ne nneyɛe a ɛfata a yɛbɛda no adi akyerɛ wɔn a yɛkyerɛkyerɛ wɔn no. Farisifo no buu wɔn a wotiee Yesu no animtiaa. Wɔkae sɛ: “Nkurɔfokuw yi a wonnim mmara no, wɔadome wɔn!” (Yohane 7:49) Nanso na Yesu wɔ ɔdɔ ne obu a emu yɛ den ma n’asuafo no. Ɔkae sɛ: “Memfrɛ mo nkoa bio, efisɛ akoa nnim nea ne wura yɛ; na mafrɛ mo nnamfo, efisɛ nneɛma a mate m’agya nkyɛn no nyinaa maka makyerɛ mo.” (Yohane 15:15) Ná eyi kyerɛ sɛnea ɛsɛ sɛ Yesu asuafo yɛ wɔn nkyerɛkyerɛ adwuma no.

13. Paulo tee nka dɛn wɔ wɔn a ɔkyerɛkyerɛɛ wɔn no ho?

¹³ Sɛ nhwɛso no, Paulo ammunamuna anaa wanyɛ ade amemenemfe mu ankyerɛ wɔn a ɔkyerɛkyerɛɛ wɔn no. Ɔka kyerɛɛ Korintofo no sɛ: “Sɛ mowɔ ahwɛfo pedu Kristo mu mpo a, munni agyanom bebree; na me na Kristo Yesu mu menam asɛmpa no so mewoo mo.” (1 Korintofo 4:15) Ɛtɔ mmere bi a, na Paulo sũ mpo bere a ɔretu wɔn a ɔkyerɛkyerɛɛ wɔn fo no! (Asomafo no Nnwuma 20:31) Ɔdaa boasetɔ ne ayamye soronko nso adi. Enti na obetumi aka akyerɛ Tesalonikafo no sɛ: “Yɛyɛɛ yɛn ho brɛbrɛ wɔ mo mu, sɛnea ɔbagyigyefo bi yɛn n’ankasa mma.”—1 Tesalonikafo 2:7.

14. Dɛn nti na yɛn Bible asuafo ho anigye ankasa a yɛbɛkyerɛ no ho hia? Kyerɛkyerɛ mu.

¹⁴ So wusuasua Yesu ne Paulo? Ɔdɔ a efi komam a yebenya ama yɛn Bible asuafo no betumi asiesie nneɛma pii sen ɔdom akyɛde bi a ebia yɛwɔ. So yɛn Bible asuafo hu sɛ yɛwɔ wɔn ho anigye a edi mũ ankasa? So yegye bere de hu wɔn? Bere a na ɛyɛ den ma Kristoni bea bi sɛ ɔbɛboa osuani bi ma watu mpɔn wɔ honhom fam no, ofi ayamye mu bisae sɛ: “So biribi haw wo?” Ɔbea no fii ase kaa ne komam nsɛm, na ɔkaa ne haw ne ne dadwen ahorow ho nsɛm pii. Saa nkɔmmɔbɔ a ɔdɔ wom no bɛyɛɛ nsakrae bere titiriw maa ɔbea no. Wɔ tebea a ɛtete saa mu no, Kyerɛwnsɛm mu nsɛm ne awerɛkyekye nsɛm ne nkuranhyɛ yɛ nea ɛfata. (Romafo 15:4) Nanso, kɔkɔbɔ asɛm bi ni: Ebetumi aba sɛ Bible suani bi renya nkɔanim ntɛmntɛm nanso na ɔda so ara wɔ su horow bi a enye a ɛsɛ sɛ odi so. Enti ɛbɛyɛ nea nyansa nnim sɛ wo ne onipa no benya abusuabɔ a ɛkɔ akyiri. Ɛsɛ sɛ wukura Kristofo anohyeto a ɛfata mu.—1 Korintofo 15:33.

15. Yɛbɛyɛ dɛn atumi ada obu adi akyerɛ yɛn Bible asuafo?

¹⁵ Nea ɛka obu a yebenya ama yɛn Bible asuafo ho ne sɛ yɛremmɔ mmɔden nni wɔn ankasa asetra so. (1 Tesalonikafo 4:11) Sɛ nhwɛso no, ebia na yɛne ɔbea bi a ɔne ɔbarima bi a ɔnyɛɛ ne ho ade te resua ade. Ebia wɔwɔ mma mpo. Bere a ɔbea no abenya Onyankopɔn ho nokware nimdeɛ no, ɔbɛpɛ sɛ osiesie nsɛm ma ɛne Yehowa apɛde hyia. (Hebrifo 13:4) So ɛsɛ sɛ ɔware ɔbarima no anaasɛ ɔtwe ne ho fi ne ho? Ebia yɛte nka kɛse sɛ ɔbarima a onni honhom fam nneɛma ho anigye kɛse anaa onni bi a ɔbɛware no no besiw ne nkɔso kwan daakye. Ɔkwan foforo so no, ebia ne mma no yiyedi ho nsɛm bɛhaw yɛn na yɛanya adwene sɛ ɛbɛyɛ papa sɛ ɔware ɔbarima no. Sɛnea ɛte biara no, ɛyɛ nea ɛnkyerɛ obu ne ɔdɔ sɛ yɛde yɛn ho bɛhyehyɛ osuani no asetram nsɛm mu na yɛabɔ mmɔden sɛ yɛbɛkyerɛ nea ɔnyɛ wɔ nsɛm a ɛtete saa ho. Sɛnea ɛte biara no, ɔno na ɛsɛ sɛ ogyina nea ebefi gyinaesi no mu aba no ano. Ɛnde, so ɛrenyɛ papa sɛ wobɛtete osuani a ɔte saa no ma ɔde ne “nkatede” asi nea ɛsɛ sɛ ɔyɛ ho gyinae?—Hebrifo 5:14.

16. Ɔkwan bɛn so na mpanyimfo betumi ayi ɔdɔ ne obu adi akyerɛ Onyankopɔn nguankuw?

¹⁶ Ɛho hia titiriw sɛ asafo mu mpanyimfo ne nguankuw no di nsɛm wɔ ɔdɔ ne obu mu. Bere a Paulo rekyerɛw Filemon no, ɔkae sɛ: “Anka meyɛ nnam pii Kristo mu sɛ mede mɛhyɛ wo ade a ɛsɛ ho, na ɔdɔ nti mesrɛ wo mmom.” (Filemon 8, 9) Ɛtɔ mmere bi a, tebea ahorow a ɛhaw adwene betumi asɔre wɔ asafo no mu. Ebia ebehia sɛ wɔde wɔn nan si fam mpo. Paulo hyɛɛ Tito nkuran sɛ ‘onyi abɔnefo ntɛn katee, na wɔn ho ayɛ wɔn den gyidi mu.’ (Tito 1:13) Sɛ saa mpo a, ɛsɛ sɛ ahwɛfo hwɛ yiye na wɔanka nsɛm a ayamye nnim ankyerɛ asafo no da. Paulo kyerɛwee sɛ: “Ɛnsɛ Awurade akoa bi sɛ ɔko, na mmom ɛsɛ sɛ odwo ma nnipa nyinaa, ohu kyerɛkyerɛ, ɔbrɛ ne bo ase bɔne ho.”—2 Timoteo 2:24; Dwom 141:3.

17. Mfomso bɛn na Mose dii, na dɛn na mpanyimfo betumi asua afi mu?

¹⁷ Ɛsɛ sɛ ahwɛfo kae wɔn ho daa sɛ wɔne “Onyankopɔn nguankuw” na ɛredi nsɛm. (1 Petro 5:2; yɛn na yɛasi ɔfã bi so dua no.) Ɛwom sɛ na Mose dwo de, nanso odii mfomso kakra wɔ eyi mu. Israelfo no ‘how ne honhom werɛ, na ɔde n’ano woroo nsɛm.’ (Dwom 106:33) Onyankopɔn ani annye sɛnea Mose ne Ne nguan dii nsɛm no ho koraa, ɛmfa ho sɛ na wɔadi mfomso mpo no. (Numeri 20:2-12) Sɛ mpanyimfo hyia nsɛnnennen a ɛte saa ara nnɛ a, ɛsɛ sɛ wɔbɔ mmɔden sɛ wɔde nhumu ne ayamye bɛkyerɛkyerɛ. Sɛ yesusuw yɛn nuanom ho, na yebu wɔn sɛ nnipa a wohia mmoa, na ɛnyɛ sɛ adebɔneyɛfo a yentumi mma wɔnsesa a, wɔyɛ ho ade ɔkwampa so. Ɛsɛ sɛ mpanyimfo nya adwempa a Paulo nyae bere a ɔkaa eyi no: “Yɛn ani da mo so Awurade mu, sɛ moyɛ na mobɛyɛ nea yɛhyɛ mo.”—2 Tesalonikafo 3:4.

Wɔn Ahiade Ho Dwuma a Yebedi

18, 19. (a) Ɔkwan bɛn so na ɛsɛ sɛ yedi Bible asuafo a wɔn nimdeɛ sua ahiade ho dwuma? (b) Ɔkwan bɛn so na yebetumi aboa asuafo a wɔwɔ nsɛm pɔtee bi ho nsɛnnennen no?

¹⁸ Ɔkyerɛkyerɛfo a ne ho akokwaw wɔ ɔpɛ sɛ ɔbɛdannan ne nsɛm mu ma ɛne nea ne Bible asuafo bɔ mu mmɔden ne nea wɔtɔ mu sin ahyia. (Fa toto Yohane 16:12 ho.) Wɔ Yesu bɛ a ɛfa talente ho mu no, owura no de hokwan mae “sɛnea wɔn mu biara ahoɔden te.” (Mateo 25:15) Yebetumi afa ɔkwan a ɛte saa so bere a yɛreyɛ Bible adesua no. Sɛnea ɛte no, ɛyɛ anigye sɛ yɛne obi besua Bible ho nhoma bi awie bere tiaa bi mu. Nanso, ɛsɛ sɛ yegye tom sɛ, ɛnyɛ obiara na ɔbɔ akenkan ho mmɔden anaa otumi te nneɛma foforo ase ntɛm. Enti, yehia nhumu na ama yɛahu bere a ɛsɛ sɛ yefi asɛm biako so kɔ foforo so bere a ɛyɛ den ma nnipa a yɛreboa wɔn no sɛ wɔbɛte nneɛma ase ntɛm no. Nea ɛho hia sen nhoma bi a yebesua awie bere pɔtee bi mu ne boa a yɛbɛboa wɔn a yɛrekyerɛkyerɛ wɔn no ma wɔate nea wɔresua no ase.—Mateo 13:51.

¹⁹ Saa ara na yebetumi aka wɔ Bible asuafo a ɛyɛ wɔn den sɛ wɔbɛte nsɛm pɔtee bi, te sɛ Baasakoro anaa ɔsom mu nnapɔnna ase no no ho. Bere a mpɛn pii no, ɛho nhia sɛ yɛde nhwehwɛmu bi a egyina Bible so bɛka yɛn adesua ho no, yebetumi ayɛ saa bere ne bere mu bere a ɛda adi pefee sɛ eyi ho hia no. Ɛsɛ sɛ yɛde atɛmpa di dwuma na yɛammrɛ osuani bi nkɔso ase ɔkwan a ɛho nhia so.

Da Anigye Adi!

20. Ɔkwan bɛn so na Paulo yɛɛ anigye ne gyidi a wɔda no adi wɔ ɔkyerɛkyerɛ mu ho nhwɛso?

²⁰ Paulo ka sɛ: “Monyɛ honhom mu hyew.” (Romafo 12:11) Yiw, sɛ́ yɛreyɛ ofie Bible adesua anaasɛ yɛrenya asafo nhyiam dwumadi bi mu kyɛfa no, ɛsɛ sɛ yɛde nsi yɛ saa wɔ anigye so. Paulo ka kyerɛɛ Tesalonikafo sɛ: “Yɛn asɛmpa no amma mo nkyɛn asɛm mu nko, na mmom ɛbae ahoɔden ne honhom kronkron ne ɛso duasi bebree mu nso.” (1 Tesalonikafo 1:5) Enti Paulo ne n’ahokafo ne afoforo ankyɛ ‘asɛmpa no nko na mmom wɔn ankasa kra nso.’—1 Tesalonikafo 2:8.

21. Yɛbɛyɛ dɛn atumi akura yɛn nkyerɛkyerɛ adwuma ho anigye mu?

²¹ Nokware anigye fi gyidi a emu yɛ den a yɛwɔ sɛ ɛsɛ sɛ yɛn Bible asuafo te nea yɛwɔ ka no. Mommma yemmmu nkyerɛkyerɛ adwuma biara sɛ adeyɛ bi kɛkɛ. Akyinnye biara nni ho sɛ, na ɔkyerɛwfo Esra ani wɔ ne nkyerɛkyerɛ so wɔ saa kwan yi so. ‘Osiesiee ne koma sɛ ɔbɛhwehwɛ Yehowa mmara na wadi so, na wakyerɛkyerɛ wɔ Israel.’ (Esra 7:10) Ɛsɛ sɛ yɛyɛ saa ara denam sie a yebesiesie yɛn ho yiye na yɛasusuw hia a asɛm no ho hia ho no so. Momma yɛmmɔ Yehowa mpae na ɔmma yennya gyidi a emu yɛ den. (Luka 17:5) Anigye a yɛda no adi no betumi aboa Bible asuafo ma wɔanya nokware no ho anigye a emu yɛ den. Nokwarem no, nea ɛka yɛn ani a ɛbɛba yɛn nkyerɛkyerɛ so ho ne nkyerɛkyerɛ akwan pɔtee bi a yɛde bedi dwuma. Yɛn asɛm a edi hɔ no besusuw eyinom bi ho.

[Ase hɔ asɛm]

So Wokae?

◻ Dɛn nti na Kristofo akyerɛkyerɛfo a wɔn ho akokwaw ho hia nnɛ?

◻ Adesua ho su pa bɛn na yebetumi anya?

◻ Dɛn nti na ɔdɔ ne obu a yebenya ama wɔn a yɛkyerɛkyerɛ wɔn no ho hia yiye?

◻ Yɛbɛyɛ dɛn atumi adi yɛn Bible asuafo ahiade ho dwuma?

◻ Dɛn nti na anigye ne gyidi ho hia bere a yɛrekyerɛkyerɛ afoforo no?

[Kratafa 10 mfonini]

Akyerɛkyerɛfo pa yɛ Onyankopɔn Asɛm no asuafo nso

[Kratafa 13 mfonini]

Kyerɛ Bible asuafo ho anigye ankasa