Fa Onyamesompa Ahofama Yɛn Wo Ho Sɛ Wo Botae

“Fa onyamesompa ahofama yɛn wo ho sɛ wo botae.”​—1 Timoteo 4:7, New World Translation

 1. Dɛn nti na obi a na ɔyɛ mmirikatufo pa antumi anni nkonim?

NÁ ƆNO ne mmirikatufo a ɔbɔ mmɔden sen biara wɔ wɔn kuw no mu. Nkonim ahorow a odii ma onyaa hokwan sɛ obesi ɔman no akane no bi. Enti na ɛyɛ nea wɔhwɛ kwan sɛ obedi nkonim wɔ akansi titiriw yi mu. Nanso, nea ɛyɛɛ ne kyerɛkyerɛfo, ne kuw no mufo, ne n’ankasa nwonwa no, ɛno na ɛbɛyɛɛ mmirikatu a wammɔ mmɔden wom koraa. Dɛn ntia? Ababaa a n’ani awu kɛse yi gye toom sɛ, “Midii anihaw wɔ ɛho ntetee no mu na manyere me ho kɛse wɔ ɛho ɔyɛn a wɔde maa me no mu. Me kyerɛkyerɛfo no bɔɔ mmɔden sɛ ɔbɛma mayere me ho kɛse na ɔbɔɔ me kɔkɔ, nanso mantie.” Yere a wanyere ne ho kɛse wɔ ɛho ntetee anaa ɔyɛn a wɔde maa no mu no na amma wanni nkonim wɔ ne botae no ho no.

 2. Ɔkwan bɛn so na ɛsɛ sɛ Kristofo yɛn wɔn ho, na dɛn nti na obiara bɛpɛ sɛ ohu?

² Sɛ́ Kristoni, ne titiriw no, sɛ woyɛ abofra a, wo nso wo wɔ ɔyɛn titiriw bi. “Fa onyamesompa ahofama yɛn wo ho sɛ wo botae.” (1 Timoteo 4:7, NW) Hela asɛmfua ma “yɛn wo ho” (gy·mna’zo) no kyerɛkyerɛ apɔwmuteɛteɛ nnwuma a emu yɛ den a ɛtaa yɛ nea ɛyɛ yaw a mmirikatufo yɛ wɔ agumadibea no mu. Enti, ɛdefa onyamesompa ahofama ne ɛho akatua ho no, ɔsomafo Paulo de kaa ho sɛ: “Eyi nti na yɛyɛ adwuma brɛ na yɛpere.” (1 Timoteo 4:10) Su a ɛho hia yi nyɛ biribi a ɛno ankasa ba anaasɛ wonya fi awofo a wosuro Onyankopɔn hɔ. Nanso nneɛma bɛn na ɛsɛ sɛ woyɛ? Kristofo a wɔadi mfe ahorow nyinaa bɛpɛ sɛ wohu.

Nkitahodi Pa Wɔ Wo Ne Onyankopɔn Ntam

 3. (a) Dɛn nti na kokoam adesua ho hia saa? (b) Onyankopɔn su ahorow bɛn na ɛtwe wo bɛn no?

³ Esiane sɛ onyamesompa ahofama gye Yehowa su ahorow ho anisɔ a efi komam nti, ɛho hia sɛ wuhu sɛnea ɔte ankasa. Yehowa da eyi adi wɔ Bible no mu. Nanso ɛsɛ sɛ wusua n’Asɛm no ne nhoma ahorow a egyina Bible so no yiye na wonam ɛno so ‘de gyidi ne kyerɛ pa no nsɛm ayɛn wo.’ (1 Timoteo 4:6) Adesua a ɛte sɛɛ bɛboa wo ma woahu “ [Yehowa] animtew.”​—Dwom 27:4.

 4. Osuahu ahorow bɛn na ɛkyerɛ bo a kokoam adesua som na nsemmisa bɛn na ɛsɛ sɛ wususuw ho anibere so?

⁴ Bere nyinaa sɛnkafo (ɔkwampaefo) bi a wadi mfe 22 se: “Bere a wusua Yehowa ho ade kɛse no, ɛma wote nka sɛ woabɛn no kɛse. Sɛ mekenkan nkɔmhyɛ ahorow na mihu sɛnea enya mmamu no a, ɛma me ho dwiriw me. Kokoam adesua ne nea ɛboa me ankasa.” Obi a wadi mfe 16 a wahaw kɛse kyerɛw faa “Mmofra Bisa Sɛ” a epue bere nyinaa wo Nyan! nsɛmma nhoma mu no biako ho sɛ: “Bere a m’anidaso nyinaa asa no na mokyerɛw asɛm yi. M’ani gyei araa ma na mintumi mfa nto hɔ! Ɛma metee nka sɛ mabɛn Yehowa kɛse na mihu sɛ ɔte m’ase na odwen me ho kɛse. Afei mete nka sɛ metumi agyina ano.”a So wode yɛ wo botae sɛ wobɛkan yɛn nsɛmma nhoma no biara a ɛba? Ɛwom sɛ egye mmɔdenbɔ de, nanso so wunya bere de yɛn w’adwene ne wo koma denam kokoam Bible adesua so? Ɛdenam nhwehwɛmu a w’ankasa wobɛyɛ so no, w’ankasa wubetumi akyerɛ sɛ woahu nokware no. Sɛ nimdeɛ a ɛte sɛɛ du koma no mu a, ɛbɛkanyan wo, efisɛ “nsɛm a eye no ne kyerɛ a ɛde kɔ onyamesom pa mu.”​—1 Timoteo 6:3; Romafo 12:2.

 5, 6. Mpaebɔ bɛn na ɛtwe wo bɛn Yehowa kɛse? Yɛ ho nhwɛso.

⁵ Nkitahodi pa wɔ wo ne Onyankopɔn ntam gye mpaebɔ a efi komam a wɔbɔ fa biribi pɔtee ho. Eyi boa wɔ yɛ a wo ne Yehowa bɛyɛ adamfo no mu. Sɛ woyɛ mfomso a, srɛ fafiri te sɛnea Dawid yɛe no: “Nkae me mmofraase bɔne ne me mfomso.” (Dwom 25:7, 11) Na hu sɛ wunu wo ho a, ɔde befiri wo. Sua sɛ worennyae mpaebɔ da, na ka nea ɛwɔ wo komam. Abofra bi a ɛwom sɛ wɔyɛn no wɔ Kristofo fi maa kasa ho ɔhaw siw no kwan wɔ ne ho a ɔde bɛhyɛ nokware som mu no mu. Ababaa a wadi mfe 22 yi kae sɛ: “Afei anadwo bi mepaa Yehowa kyɛw sɛ, ‘boa me ma mensom wo, na ɛnyɛ sɛ mpanyimfo no anaasɛ m’awofo pɛ sɛ meyɛ saa nti.’” Hwɛ sɛnea n’asetra fii ase sakrae! Wɔ po a ɔpo dodow nyinaa akyi no, ɔde ne ho hyɛɛ ɔsom adwuma no mu kɛse. Ɔde anigye ka sɛ, “Afei mede me ho to Yehowa so kɛse efisɛ minim sɛ ɔboa bere nyinaa.”​—Dwom 62:8.

⁶ Kristoni ababaa biako hyɛɛ da bɔɔ mpae wɔ akwampae adwuma a ɔpɛ sɛ ɔyɛ no ho. Bere a onyaa ne mpaebɔ ho mmuae no ɔkae sɛ: “Na minim sɛ Yehowa wɔ hɔ ankasa na odwene yɛn ho! Ansa na eyi reba no na misusuw sɛ me ne no wɔ abusuabɔ, nanso mprempren de ɛte sɛ adamfo ankasa​—nea ɛsen biara.” Ɛnyɛ bere nyinaa na Yehowa bɛma ho mmuae wɔ anwonwa kwan bi so, nanso sɛ woyere wo ho na woyɛ nea ɛne wo mpaebɔ no hyia a, wobɛba abehu n’akwankyerɛ a efi ɔdɔ mu no.​—Dwom 145:18.

Nya Ahonim Pa

 7. Dɛn ne ahonim, na dɛn nti na ɛsɛ sɛ wunya nea eye?

⁷ Bere a Paulo ka kyerɛɛ Timoteo sɛ ɔnkɔ so ‘nya ahonim pa’ no, na ɔsomafo no nim sɛ ebegye mmɔdenbɔ kɛse. (1 Timoteo 1:19) Dɛn ntia? Ahonim yɛ tumi a Onyankopɔn de ama yɛn a yɛde hwehwɛ yɛn ho mu hwɛ na yɛde bu atɛn wɔ nea yɛayɛ anaa yɛabɔ yɛn tirim sɛ yɛbɛyɛ ho. Ebetumi ‘atoto yɛn ano,’ abu yɛn atɛn wɔ ɔkwan bi a yɛnam so ho, anaasɛ ebetumi ‘ayi yɛn ano,‘ na apene nea yɛyɛ no so sɛ ɛteɛ. (Romafo 2:15) Nanso sɛ ekyinkyim a, ebetumi de nsɛm a enye ama. Ebinom a wɔn ahonim ho agu fĩ betumi ayɛ ade te sɛ mmoa bɔne, nanso ‘nne a ɛwɔ wɔn mu’ no ‘ntoto wɔn ano.’ Wobetumi aka sɛ “wonim Onyankopɔn” nanso “wɔde wɔn nnwuma pa no.” Ɔkwan bɛn so na wubetumi abɔ wo ho ban na w’ahonim anyɛ nea ɛho agu fĩ?​—Tito 1:10-16.

 8. Ɔkwan bɛn so na ebinom a na wɔwɔ afeha a edi kan no mu de ahonim pa “too nkyɛn”?

⁸ Na Paulo aka akyerɛ Timoteo sɛ Kristofo bi de wɔn ahonim pa no ‘ato nkyɛn’ denam tie a wotie ‘anansesɛm’ ne ‘nsɛnhuhuw a ɛho ntew’ no so. (1 Timoteo 1:4, 19, 20; 6:20; 2 Timoteo 2:16-18) Esiane sɛ wotiee eyi nti, wɔn gyidi sɛee, na eyi ma woguu asu wɔ honhom mu. Nanso, Paulo kyerɛe sɛ wɔ wɔn a wɔawae nkyerɛkyerɛ akyi no, na nneɛma afoforo ‘ne kyerɛ pa no di asi.’ Wɔ 1 Timoteo 1:9, 10 no, ɔbobɔ nneɛma te sɛ awudi, aguamammɔ ne mmarima a wɔne wɔn ho da din.

9, 10. (a) Dɛn na yebetumi asua afi Kristofo awarefo a wɔannya ahonim pa nhwɛso no mu? (b) Dɛn na yebetumi ayɛ na amma yɛn ahonim ano ankum?

⁹ Ɛnnɛ basabasayɛ ne aguamammɔ ho nsɛm abu so wɔ sini ne TV so dwumadi ahorow mu ne afei nhoma ahorow a wotintim mu. Sɛ yɛde eyinom hyɛ yɛn adwenem a, yɛn ahonim betumi de nkakrankakra ayɛ nea ano akum. Eyi too Kristofo nkumaa baanu bi a wɔbɔɔ aguaman bere a aka kakraa na wɔn ayeforohyia da adu no. Ababaa no gye toom sɛ: “Misusuw sɛ ɛyɛ nea na yɛhwɛ wɔ TV so no ntia. Bere nyinaa wuhu nnipa a wofifew wɔn ho ano na wosuso wɔn ho mu enti ɛmma ɛnyɛ te sɛ biribi a ɛyɛ aniberesɛm. Ɛba bɛyɛ biribi a akokwaw wo. Enti yefii ase yɛɛ bi. Sɛ anka yesusuw aniberesɛm a ɛyɛ ho kɛse a!” Ansa na n’ani reba ne ho so no na wahwere n’ahonim pa no. Aberante no de kaa ho sɛ: “Na me nso mewɔ ɔhaw a ɛfa boasipem ho, na eyi kum w’ahonim ano ma enti ɛnyɛ den sɛ wode wo ho bɛhyɛ mfewano ne nneɛma a ɛte saa ne afei awiei koraa no aguamammɔ mu.” Ɛwom sɛ na ɛte sɛnea wɔreyɛ nhwɛso pa wɔ afoforo ani so de, nanso nea wɔhwɛ de gyee wɔn ani ne kokoam adeyɛ a ɛho ntew de nkakrankakra kum wɔn ahonim te sɛ dade a ayɛ kɔkɔɔ a wɔkɔ so de hyew honam no ma ɛhɔ wu no.​—1 Timoteo 4:2.

¹⁰ So w’ahonim betumi awu saa ara denam nea wohwɛ anaasɛ wokenkan de gye w’ani no so? So worebɔ mmɔden ankasa sɛ wubedi su bɔne biara a ebetumi agu w’ahonim ho fi no so? Esiane w’ahobammɔ nti, wubetumi ayɛ ade a eye denam nhoma a egyina Bible so a edi ɔhaw no ho dwuma titiriw a wobɛkenkan na wɔasan akenkan bio anaasɛ denam ɔhaw no a wo ne ɔpanyin bi besusuw ho no so. Ahonim pa a emu tew yɛ akyɛde a ɛsom bo a efi Onyankopɔn hɔ a ɛbɛboa wo ma woanya onyamesompa ahofama. Mma biribi mma emfi wo nsa!

Paw Ayɔnkofo Pa

11, 12. (a) Kɔkɔbɔ bɛn na wɔde ma wɔ 2 Timoteo 2:20, 21? (b) Ɔkwan bɛn so na wubetumi atie saa kɔkɔbɔ no?

¹¹ Ɔsomafo Paulo kyerɛwee sɛ: “Ofi kɛse [asafo no] mu nni sika ne dwetɛ nneɛma nko, na nnua ne dɔte de nso wɔ mu bi, na wobu bi, na ebi nso yɛ nea wommu. Na sɛ obi tew ne ho fi eyinom ho a, ɔbɛyɛ ade a wobu na wɔatew ho a owura no de yɛ biribi a, ɛyɛ yiye, na wɔasiesie de reyɛ adwuma pa biara.” (2 Timoteo 2:20, 21) Wɔn a yɛpaw wɔn sɛ yɛn nnamfo no nya yɛn nkate ne yɛn nneyɛe so tumi kɛse. Ɛda adi sɛ wɔn a wonnye nni nyɛ nnamfo pa. Nanso Paulo kyerɛ wɔ ha pefee sɛ wɔ asafo no mu mpo no, nnipa binom betumi ayɛ ayɔnkofo a wonye. Ampa, ebia wubehu sɛ ɛyɛ anigye sɛ wo ne saafo no bɛbɔ, nanso wɔn nkɛntɛnso remmoa wo mma ‘wunguan mmeranteberem akɔnnɔ no’ na saa na ɛremma wunnya onyamesompa ahofama. Hwehwɛ ayɔnkofo a woye wɔ asafo no mu. Paulo toa so wɔ nkyekyem 22 sɛ: “Di trenee, gyidi, ɔdɔ ne asomdwoe a ɛka wo ne wɔn a wofi koma a emu tew mu frɛ Awurade bom no akyi.”​—Fa toto Filipifo 4:8, 9 ho.

¹² Susuw Kristoni abeawa bi a wɔ ntetee pa a wɔde maa no nyinaa akyi no na ɔde ne ho to asiane mu bere nyinaa asɛm no ho. Ɔkae sɛ: “Ɛyɛ nnipa a na me ne wɔn bɔ no titiriw nti.” Bere a ohui sɛ n’asetra nkɔ yiye no, ɔyɛɛ nsakrae wɔ ne nnamfo no mu. Ɔka sɛ: “Sɛ wo wɔ nnamfo a wɔdɔ Yehowa a, ɛboa wo ma wunya ahonim a ɛyɛ nnam na wotwe wo ho fi ɔhaw mu. Sɛ wɔkyerɛ wɔn ani a ennye bɔne bi ho a, ɛma wote nka saa ara.” Ɛdenam ne ho a ɔtwe fii ayɔnkofo a wonye ho no so no, wabɛyɛ anwenne “a owura no de yɛ biribi a ɛyɛ yiye, na wɔasiesie de reyɛ adwuma pa biara.” Bere a ɔde mfe du asom sɛ ɔkwampaefo akyi no, ɔde ka ho sɛ: “Afei mihu sɛ Yehowa de me adi dwuma de aboa afoforo.”​—2 Timoteo 2:21; Mmebusɛm 15:31.

13. Ɔkwan bɛn so na wubetumi ahu wɔn a wɔyɛ ayɔnkofo pa, na ɔkwan bɛn so na wobetumi anya wo so nkɛntɛnso?

¹³ Enti, susuw w’ayɔnkofo no ho yiye ankasa. So wodi trenee, gyidi, ɔdɔ a ɛwɔ nnyinaso, ne asomdwoe akyi? So wɔyɛ Kristofo a wɔyɛ nnam? Ɛdenam eyinom a wo ne wɔn bɛbɔ so no, ebia w’ankasa wobɛba abɛyɛ nhwɛso wɔ kasa, nneyɛe, ɔdɔ, gyidi, ne ahotew mu te sɛ nea Timoteo a ɔne Paulo bɔe no yɛe no. Eyi nkyerɛ sɛ ɛsɛ sɛ wumuna kyerɛ wɔn a wɔnyɛ nhwɛso pa no. Wo nhwɛso a ɛyɛ anigye no bɛkanyan eyinom ma wɔasiesie ɔkwan trenee ama wɔn anan.​—1 Timoteo 4:12; Hebrifo 12:12-15.

Fa Nneɛma Ahorow Bɔ Afɔre Ma Onyankopɔn

14, 15. (a) Dɛn na na wɔhwehwɛ wɔ tete mmirikatufo ho bere a woresiesie wɔn ho ama akansi no? (b) Adwuma bɛn na egye afɔrebɔ, na nhwɛso pa ahorow bɛn na yɛwɔ?

¹⁴ Wɔ Timoteo bere so no, sɛ ammirikatufo reyɛn wɔn ho ama akansi a, ‘wɔsɔre wɔn ho ade nyinaa mu’ na wɔkame wɔn ho anigyede ahorow pii. (1 Korintofo 9:25) Wɔhwɛ wɔn aduan a wodi yiye. Sɛnea Horace a ɔyɛ afeha a edi kan A.Y.B. anwensɛm kyerɛwfo kyerɛ no, “wɔtwe wɔn ho fi mmea ne nsa ho” na ama “wɔn nsa aka botae a wɔn ani da so no.” Saa ara na onyamesompa ahofama a wode bɛyɛn wo ho sɛ wo botae no gye afɔrebɔ. Paulo kae wɔ Timoteo ho sɛ: “Minni obi a ɔne m’adwene sɛ, te sɛ ɔno . . . efisɛ [afoforo no] nyinaa hwehwɛ wɔn ankasa de, na ɛnyɛ nea ɛyɛ Kristo Yesu de. Na . . . ɔne me som asɛmpa no fam.”​—Filipifo 2:19-22.

¹⁵ Wɔka kyerɛɛ Timoteo sɛ: “Yɛ ɔsɛmpakafo adwuma, wie wo som no koraa.” (2 Timoteo 4:5) Ɛmfa ho sɛnea ebia na n’ani gye n’ankasa nneɛma ho no, ɔde eyinom bɔɔ afɔre de wiee Onyankopɔn adwuma. So ɛyɛ wo pɛ sɛ wobɛyɛ saa ara? Ɛnnɛ Kristofo mmofra binom a wonni Kyerɛwnsɛm mu asɛyɛde ahorow a ɛyɛ duru di nhomasua a ɛkɔ anim anaasɛ adwuma a wɔde bere nyinaa yɛ a sika wom akyi mmom sen sɛ wɔde Kristofo som adwuma no bɛyɛ wɔn adwuma. Na eyinom mu biako de ahopere retwɛn adwuma a ɛte sɛɛ bi. Nanso, ansa na ɔrefi ase ayɛ adwuma no, ɔpenee adwuma a akwampaefo baanu bi too nsa frɛɛ no sɛ ɔne wɔn mmɛyɛ wɔ ahohuru bere mu no so. N’ani gyee ho. Enti ɔde honam fam adwuma a wɔde bere nyinaa yɛ a sika wom no bɔɔ afɔre na ɔhwehwɛɛ adwuma a wɔde bere fã yɛ a ɛbɛma watumi ayɛ akwampae adwuma. Ɛdenam honhom a ɛte sɛ Timoteo de no so yi no, mprempren ɔsom wɔ Yehowa Adansefo asafo no ti. Ɔpɛ a obi wɔ sɛ ɔde nneɛma ahorow bɛbɔ afɔre no di nokware dɔ ho adanse, na afɔre ahorow a wɔbɔ no ma saa ɔdɔ no mu yɛ den sɛnea ohui no.

16. Nneɛma ahorow a ebia ɛsɛ sɛ mmofra de bɔ afɔre no bi ne nea ɛwɔ he?

¹⁶ Sɛ “ɔsɛnkafo ne ɔsomafo” no, Paulo sii so dua sɛ ahobrɛase a yɛde besiesie yɛn ho no yɛ nea eye. So ɛyɛ wo pɛ sɛ wode ntadehyɛ anaa ahosiesie bi a aba so a ebetumi ahaw afoforo anaa ebesiw w’asɛm a ebetu mpɔn sɛ ɔsɛnkafo kwan no bɛbɔ afɔre? (1 Timoteo 2:7-10) Paulo kɔɔ so kyerɛwee sɛ: “Wɔn a wɔpɛ sɛ wɔde onyamesom pa tra ase nyinaa, wɔbɛtaa wɔn.” (2 Timoteo 3:12) So ɛyɛ wo pɛ sɛ wubegyina hɔ ama nokware no bere a ebia ɛno bɛkyerɛ wo ho fɛw a wobedi, gyinabea a eye wɔ wo mfɛfo sukuufo mu a wode bɛbɔ afɔre no? Eyinom nyinaa a wɔde bɛbɔ afɔre a adwene a ɛteɛ ka ho bɛboa wo ma woanya onyamesompa ahofama, na bere koro no ara mu nso ɛbɛkyerɛkyerɛ wo ma wode wo wo ho ato Yehowa so na woasusuw ne nkate ho asen biribi foforo biara.

Kɔ W’anim Ara

17. Wɔ nkɔso a wonya mu no, ɔkwan bɛn so na Timoteo yɛ nhwɛso ma asomfo nkumaa nnɛ?

¹⁷ Onyamesompa ahofama a wonya yɛ adeyɛ a ɛkɔ so bere nyinaa. Paulo ka kyerɛɛ Timoteo sɛ: “Eyinom ho na bɔ mmɔden, eyinom mu na keka wo, na wo nkɔso ada adi ade nyinaa mu.” (1 Timoteo 4:15) Ebia ebinom a wonnyinii sɛ wobetumi ayɛ asafo mu asomfo anaa mpanyimfo no bɛte nka sɛ wontumi nnya nkɔanim, na wobesusuw sɛ asafo mu asɛyɛde hokwan ahorow nkutoo so na wogyina kyerɛ nkɔso a obi anya. Ampa, ɛnyɛ honhom mu nko na Timoteo fatae, na mmom wɔ mfe mu nso ɔfatae sɛ ɔsom sɛ ɔpanyin. Nanso na ɛsɛ sɛ Timoteo kɔ n’anim ara, na wɔ eyi mu no ɔyɛɛ nhwɛso titiriw maa asomfo nkumaa nyinaa a ɛsɛ sɛ wodi akyi wɔ hokwan biara a ebebue ama wɔn mu.​—1 Timoteo 4:12, 13.

18. Akwan horow bɛn na Kristofo nkumaa betumi afa so anya nkɔanim?

¹⁸ Enti, te sɛ Timoteo no, mo Yehowa asomfo a morenyin betumi ayɛ “gyidifo nhwɛso” denam nokware no a mobɛma anya mo asetra so tumi kɛse ne mo som adwuma a mobɛma anya nkɔso no so. Wubetumi abɔ mmɔden mprempren sɛ wubenya nkɔanim denam su ahorow te sɛ odwo, nneɛma a wɔyɛ no pɛpɛɛpɛ, ahɔhoyɛ su, ne animduru a wubesua no so. Ɛdenam wo ho a wode bɛma mpanyimfo no ne adwuma biara a wɔde bɛma wo a wobɛyɛ no yiye so no, wubetumi akyerɛ ‘fata a wofata bere a wɔsɔ wo hwɛ no.’ (1 Timoteo 3:1, 2, 8-10) Sɛ ɛyɛ nea afoforo nhu wo nkɔso no ntɛm ara mpo a, nya ahotoso sɛ ɛyɛ nea Yehowa hu. Bere a ɛsɛ mu no, afoforo nso behu.​—1 Timoteo 5:25.

19. Wɔ mmɔdenbɔ a ɛho hia nyinaa akyi no, dɛn nti na ɛsɛ sɛ wode onyamesompa ahofama yɛn wo ho sɛ wo botae?

¹⁹ Mma wo werɛ mfi sɛ ɛnam onyamesompa ahofama a wubenya so na wubetumi ne Yehowa anya abusuabɔ pa. Nea efi honhom mu ɔyɛn a obi nni mu ba no yɛ adehwere kɛse sen mmirikatufo a n’ani wui a yɛkaa ne ho asɛm wɔ adesua yi mfiase de no. Onyamesompa ahofama a wubenya yɛ adwuma a ɛyɛ den. Nanso wɔ wiase nyinaa no, mmofra a wɔwɔ anigye pii nne teɛm sɛ: MMƆDEN A WƆBƆ WƆ HO NYINAA FATA! Su yi a wubenya de asetra a akomatɔyam wom ba nnɛ a ɛmma wunnu wo ho, na ebue daa anigye ho anidaso ho kwan. Enti kɔ so ara yɛn wo ho. Kɔ so ara yɛ nea eye sen biara, bere a ɛyɛ den mpo no. Nya ahotoso sɛ “ɔdom nyinaa Nyankopɔn . . . no, ɔno ara . . . obesiesie mo pɛ, ɔbɛma mo ase atim, ɔbɛhyɛ mo den, ɔbɛma moanya nnyinaso. Ɔno na tumi wɔ no daa daa. Amen.”​—1 Petro 5:10, 11.

[Ase hɔ asɛm]

Wubetumi Abua?

◻ Mmɔdenbɔ bɛn na ɛho hia na wo ne Onyankopɔn akɔ so anya nkitahodi pa?

◻ Ahonim pa a wobenya gye dɛn?

◻ Ɔkwan bɛn so na wobetumi de 2 Timoteo 2:20-22 adi dwuma wɔ onyamesompa ahofama a wobenya mu?

◻ Ɔkwan bɛn na Kristofo nkumaa betumi afa so anya nkɔanim?

[Kratafa 25 adaka]

Yɛn Ayamye Nyankopɔn No Su Ahorow Binom

◼ Ɔwɔ nkate. Enti, yɛn nneyɛe betumi ama ne ‘werɛ ahow’ anaasɛ n’ani agye.​—Dwom 78:40; Mmebusɛm 27:11.

◼ Bere a nnipa taa hwɛ sɛnea onipa foforo te ara kwa no, ɔno de “ɔhwɛ komam.”​—1 Samuel 16:7.

◼ Odwen yɛn ho na ɔka kyerɛ yɛn sɛ yɛntow yɛn dadwen nyinaa nto no so, na ɔyɛ “guankɔbea hiada mu.”​—Nahum 1:7; 1 Petro 5:7.

◼ Wɔfrɛ no “anigye Nyankopɔn,” na “n’akoa yiyedi sɔ n’ani.”​—1 Timoteo 1:11, NW; Dwom 35:27.

◼ Ɔrenni asɛmmɔne na saa ara na ɔrenhwɛ nnipa anim.​—Hiob 34:10; Asomafo no Nnwuma 10:34, 35.

◼ Bere a ɔremmu n’ani ngu bɔneyɛ so no, sɛ yenu yɛn ho wɔ mfomso anaa mmerɛwyɛ bi ho a, ‘ɔde firi,’ na “onsusuw yɛn bɔne so ne yɛn nni” na saa ara na “ɔnhwɛ yɛn mfomso nhyɛ yɛn ananmu.”​—Dwom 86:5; 103:8-14.

◼ Wotumi kɔ n’anim, na ɔhyɛ n’abɔde anokwafo nkuran sɛ wɔmfa wɔn nimdeɛ nni dwuma. Ɛmfa ho sɛ ɔwɔ nyansa a enni ano no, otie nyansahyɛ ahorow. Ɔhene Dawid kyerɛwee sɛ, “W’ahobrɛase ma meyɛɛ kɛse”​—Dwom 18:35, NW; 1 Ahene 22:19-22.

[Kratafa 28 mfoni]

Kristofo pii nya anigye kɛse wɔ ɔsom adwuma no mu sen nnwuma a sika wom kɛse