Bible Nhoma a Ɛto So 42—Luka

Nea Ɔkyerɛwee: Luka

Beae a Ɔkyerɛw No: Kaesarea

Bere a Ɔkyerɛw Wiei: Bɛyɛ 56–58 Y.B.

Bere a Ɛka Ho Asɛm: 3 A.Y.B.–33 Y.B.

ƆBARIMA bi a n’adwenem da hɔ a ne yam ye na ɔkyerɛw Luka Asɛmpa no. Ne suban pa yi ne Onyankopɔn honhom akwankyerɛ nti, ne nhoma no mu nsɛm yɛ nokware, na ɛma anigye nso. Nea ɔde fi ne nhoma no ase ne sɛ, “me nso mabɔ me tirim saa, efisɛ mahwehwɛ nneɛma no nyinaa mu pɛpɛɛpɛ afi mfiase, sɛ mɛkyerɛw no nnidiso nnidiso abrɛ wo.” Ntoboase a ɔde kyerɛw biribiara pɛpɛɛpɛ no ma yehu sɛ asɛm yi yɛ nokware.—Luka 1:3.

² Wɔmmɔ Luka din wɔ nhoma no mu baabiara sɛ ɔno na ɔkyerɛwee, nanso animdefo a wɔtraa ase tete mmere mu no gye tom sɛ ɔno na ɔkyerɛwee. Muratori nhoma (a wɔkyerɛwee bɛyɛ 170 Y.B.) no kyerɛ sɛ Luka na ɔkyerɛw Asɛmpa yi. Nhoma akyerɛwfo a wɔtraa ase mfe 1,800 ni te sɛ Irenaeus ne Clement a ofi Aleksandria nso gye tom saa. Nhoma no mu nsɛm nso di adanse sɛ Luka na ɔkyerɛwee. Paulo ka ne ho asɛm wɔ Kolosefo 4:14 sɛ “Luka, yɛn dɔfo duruyɛfo no,” na sɛnea ne nhoma no te no ma yehu sɛ nhomanimfo te sɛ oduruyɛfo na ɔkyerɛwee. Nsɛm a ɛfata na ɔde kyerɛw ne nhoma no, na nsɛmfua dodow a ɔde dii dwuma no dɔɔso sen Nsɛmpa a aka no nyinaa a wɔaka abom. Enti otumi de ahwɛyiye paa kyerɛw n’asɛm a ɛho hia no. Ɔba desɛefo no ho asɛm a ɔkyerɛwee no, ebinom bu no sɛ ɛyɛ mfatoho tiawa a ɛyɛ dɛ sen mfatoho nyinaa.

³ Luka kyerɛw nsɛmfua bɛboro 300 a nnuruyɛfo na wɔde yɛ adwuma, na ɔkyerɛkyerɛɛ mu sɛnea oduruyɛfo bɛyɛ. Sɛ wɔn a wɔkyerɛw Hela Kyerɛwnsɛm no binom de saa nsɛmfua no bi yɛ adwuma mpo a, wɔnkyerɛkyerɛ mu saa.a Sɛ Luka ka kwata ho asɛm a, ɛnyɛ nsɛmfua a afoforo kyerɛwee no bi na ɔde yɛ adwuma bere nyinaa. Wɔn de, kwata biara yɛ kwata, nanso oduruyɛfo de, kwata gu ahorow ma no, enti Luka kaa ɔbarima bi ho asɛm sɛ “kwata aguare no.” Ɔkae sɛ Lasaro “ho nyinaa atutu akuru.” Luka akyi no, Nsɛmpa akyerɛwfo no biara nni hɔ a ɔkae sɛ Petro asebea yare “atiridii denneennen.” (5:12; 16:20; 4:38) Akyerɛwfo baasa a aka no ma yehu sɛ Petro twaa ɔsɔfo panyin no akoa aso, nanso Luka nkutoo na ɔkae sɛ Yesu saa no yare. (22:51) Ɛyɛ oduruyɛfo na ɔbɛka ɔbea bi ho asɛm sɛ wanya “mmerɛwyɛ honhom mfe dunwɔtwe ni, na ne mu akonton abien a ontumi mma ne mu so koraa.” Na sɛ ɛnyɛ “Luka, yɛn dɔfo duruyɛfo no” a, hena bio na ɔbɛkyerɛkyerɛ mu saa sɛ Samariani no yɛɛ ɔbarima bi aduru “kyekyeree n’akuru . . . hwiee ngo ne nsa guu so”?—13:11; 10:34.

⁴ Bere bɛn na Luka kyerɛw n’Asɛmpa no? Asomafo Nnwuma 1:1 kyerɛ sɛ ansa na Luka rekyerɛw Asomafo Nnwuma no, na wakyerɛw “asɛm a edi kan,” Asɛmpa no, dedaw. Ɛbɛyɛ sɛ ɔkyerɛw Asomafo Nnwuma no wiei 61 Y.B. hɔ baabi bere a na Luka wɔ Paulo nkyɛn wɔ Roma no. Ná Paulo retwɛn ma wɔabua asɛm a ɔde kɔdan Kaesare no. Enti ɛbɛyɛ sɛ Luka kyerɛw n’Asɛmpa no wɔ Kaesarea afe 56-58 Y.B. mu hɔ baabi, bere a ɔne Paulo fi Filipi bae no. Saa bere no, na Paulo awie n’asɛmpatrɛw akwantu a ɛto so abiɛsa no na na wada afiase wɔ Kaesarea mfe abien retwɛn sɛ wɔde no bɛkɔ Roma ma wɔabua n’asɛm no. Ná Luka wɔ Palestina saa bere no, enti na obetumi ‘ahwehwɛ’ Yesu asetra ne ne som adwuma “nyinaa mu pɛpɛɛpɛ afi mfiase.” Ɛno nti ɛbɛyɛ sɛ Luka kyerɛw ne nhoma no ansa na Marko rekyerɛw n’Asɛmpa no.

⁵ Ɛyɛ ampa sɛ Luka amfa n’ani anhu nsɛm a ɔkyerɛwee wɔ n’Asɛmpa no mu no nyinaa, efisɛ na ɔnka asomafo 12 no ho na ɛbɛyɛ sɛ wammɛyɛ osuani mpo kosii sɛ Yesu wui. Nanso na ɔbɛn Paulo paa wɔ asɛmpatrɛw adwuma no mu. (2 Tim. 4:11; Filem. 24) Enti ɛnyɛ nwonwa sɛ nsɛm bi wɔ ne nhoma no mu a ɛkyerɛ sɛ ɔne Paulo bɔe. Sɛ wode Awurade Anwummeduan ho asɛm a ɛwɔ Luka 22:19, 20 no toto nea ɛwɔ 1 Korintofo 11:23-25 no ho a, wubehu sɛ ɛte saa. Ebetumi aba sɛ Luka nyaa nsɛm no bi wɔ Mateo Asɛmpa no mu. Bere a ‘ɔrehwehwɛ nneɛma no nyinaa mu pɛpɛɛpɛ’ no, na obetumi abisabisa nnipa pii a wɔde wɔn ani huu nsɛm a esisii wɔ Yesu asetra mu no. Wɔn mu bi ne asuafo a na wɔda so te ase no ne Yesu maame Maria. Yebetumi anya awerɛhyem sɛ ɔyɛɛ nea obetumi biara de boaboaa nsɛm a edi mu ano.

⁶ Sɛ wohwehwɛ Nsɛmpa anan no mu a, wubehu sɛ akyerɛwfo no nyinaa anka nsɛm koro no ara kɛkɛ. Afei nso ɛnyɛ sɛ wɔn nyinaa kyerɛw asɛm a ɛho hia yi bi na ama yɛagye Bible kyerɛwtohɔ yi atom. Luka titiriw na ne de no yɛ soronko. N’Asɛmpa no mu nsɛm bɛboro fã de, enni nea aka no biara mu. Anyɛ hwee koraa no, ɔkaa anwonwade asia ne mfatoho bɛboro dumien ho asɛm a Nsɛmpa a aka no mmɔ so, na sɛ yɛkyɛ n’Asɛmpa no mu abiɛsa a, emu biako yɛ nsɛm a esisii, na abien a aka no yɛ nkurɔfo nsɛm a ɔfa kae. N’Asɛmpa no ware sen abiɛsa a aka no biara. Yudafo na Mateo kyerɛw ne nhoma no maa wɔn, na Marko kyerɛw ne de no maa amanaman mufo, titiriw Romafo. Luka kyerɛw n’Asɛmpa no kɔmaa “onuonyamfo Teofilo,” na ɔnam ne so de maa Yudafo ne amanaman mufo nyinaa. (Luka 1:3,  4) Nea ɛbɛyɛ a n’asɛm no bɛfa obiara ho nti, ɔkaa abusua a Yesu fi mu ho asɛm de kosii ‘Adam, Onyankopɔn ba’ no so; ankosi Abraham so sɛnea Mateo a ɔkyerɛw ne de no maa Yudafo titiriw yɛe no. Ɔno na ɔkae sɛ Simeon hyɛɛ nkɔm sɛ wɔnam Yesu so “beyi nea ɛkata amanaman no so” no, na “ɔhonam nyinaa behu nea Onyankopɔn nam so gye nkwa no.”—3:38; 2:29-32; 3:6.

⁷ Ɔkwan a Luka faa so kyerɛw ne nhoma no nyinaa kyerɛ sɛ onim amanneɛ bɔ efisɛ ɔhyehyɛɛ ne nsɛm no yiye, na ɛyɛ pɛpɛɛpɛ. Sɛnea Luka kyerɛw ne nsɛm no pɛpɛɛpɛ wɔ nokwaredi so no kyerɛ paa sɛ ɛnyɛ anansesɛm. Bere bi, mmaranimfo bi kyerɛwee sɛ: “Sɛ nkurɔfo reka ɔdɔ ho asɛm, wɔreto anansesɛm anaa wɔredi adansekurum a, wɔhyɛ da ka no sɛnea nsɛm no sisii teteete wɔ akyirikyiri baabi. Na ɛno ne ade a edi kan a mmaranimfo de hu asɛm bi mu nokware, efisɛ sɛ obi reka asɛm bi a, ɛsɛ sɛ ‘ɔkyerɛ baabi a asɛm no sii ne bere a esii.’ Bible de, ɛka asɛm a, ɛkyerɛ baabi a asɛm no sii ne bere pɔtee a esii.”b Nea ɔde foaa n’asɛm no so ne Luka 3:1, 2: “Tiberio Kaesare ahenni afe a ɛto so dunum mu, bere a na Pontio Pilato yɛ Yudea amrado, na Herode di Galilea mantam so na ne nua Filipo di Iturea ne Trakoniti amantam so, na Lisania di Abilene mantam so, wɔ ɔsɔfo panyin Anas ne Kaiafa nna no mu no, Onyankopɔn asɛm baa Sakaria ba Yohane nkyɛn wɔ sare so.” Luka kaa baabi a nsɛm no sisii ne bere pɔtee a esisii. Anyɛ yiye koraa no, ɔbobɔɔ mpanyimfo baason din sɛnea ɛbɛyɛ a yebehu bere a Yohane ne Yesu fii wɔn som adwuma no ase.

⁸ Afei nso Luka ma yɛn nneɛma abien a ɛma yehu bere a wɔwoo Yesu wɔ Luka 2:1, 2 sɛ: “Nna no mu no, Kaesare Augusto hyɛɛ mmara sɛ wɔnkyerɛw asase sofo nyinaa din; (dinkyerɛw a edi kan yi kɔɔ so bere a Kirenio yɛ Siria amrado).” Saa bere no na Yosef ne Maria kɔɔ Betlehem kɔkyerɛw wɔn din, na bere a wɔkɔɔ hɔ no na wɔwoo Yesu.c Yɛne sɛnkyerɛwfo a ɔkaa nea edi so yi yɛ adwene paa: “Ade biako a ɛma yehu sɛ Luka abakɔsɛm no di mu ne sɛ bere nyinaa nea ɔka no yɛ pɛpɛɛpɛ.”d Enti asɛm a Luka kae sɛ “mahwehwɛ nneɛma no nyinaa mu pɛpɛɛpɛ afi mfiase” no, ɛsɛ sɛ yegye tom sɛ ɛyɛ nokware.

⁹ Bio nso Luka kyerɛɛ sɛnea Hebri Kyerɛwnsɛm no mu nkɔmhyɛ ahorow baa mu wɔ Yesu Kristo so. Ɔfaa eyi ho adanse a Yesu dii no kae. (24:27, 44) Afei nso ɔkyerɛw Yesu nkɔmhyɛ a ɛkyerɛ nneɛma a ebesisi daakye no too hɔ, na ɛnnɛ emu pii aba mu pɛpɛɛpɛ. Ɛho nhwɛso ni: Sɛnea Yesu kae no, nkurɔfo de nnua a ano yɛ mfeamfeaa betwaa Yerusalem ho hyiae, na wokunkum nnipa basabasa sɛee kurow no wɔ 70 Y.B. (Luka 19:43, 44; 21:20-24; Mat. 24:2) Abakɔsɛm kyerɛwfo Flavius Josephus ne Roma asraafo no na ɛbae, na odii adanse sɛ wotwitwaa wuram nnua kɔɔ akyiri bɛyɛ akwansin du de gyee ban bɛyɛ akwansin anan ne fã, na ɔkɔm kunkum mmea ne mmofra pii; Yudafo bɛboro 1,000,000 hweree wɔn nkwa, na wɔde 97,000 kɔɔ nkoasom mu. Ebesi nnɛ no, wɔayeyɛ Romafo a wɔadi nkonim a wɔde asade fi Yerusalem asɔrefie hɔ reba ho mfonini wɔ Titus Nkaedum a ɛwɔ Roma no ho.e Enti yebetumi anya awerɛhyem sɛ Luka nkɔmhyɛ a aka no nso bɛba mu pɛpɛɛpɛ.

NEA ENTI A MFASO WƆ SO

³⁰ Luka Asɛmpa no ma yenya Onyankopɔn Asɛm mu awerɛhyem, na ɛhyɛ yɛn gyidi den ma yetumi gyina wiase haw ne abɛbrɛsɛ ano. Hebri Kyerɛwnsɛm no mu nkɔmhyɛ a ɛbaa mu pɛpɛɛpɛ no pii wɔ Luka nhoma no mu. Ɛka sɛ bere bi Yesu faa nsɛm pɔtee bi fii Yesaia nhoma no mu de kyerɛɛ adwuma a ɔbɛyɛe, na gyama ɛno ne asɛm a ɛda adi wɔ Luka nhoma no nyinaa mu. (Luka 4:17-19; Yes. 61:1, 2) Eyi yɛ mmere a Yesu faa Adiyifo no nsɛm kae no biako. Afei nso ɔfaa Mmara no mu nsɛm kae. Ebi ne bere a Ɔbonsam sɔɔ no hwɛe mprɛnsa a ɔbɔɔ no gui no. Ɔfaa Dwom nhoma no mu nsɛm nso kae. Ebi ne bere a obisaa n’atamfo sɛ, “Dɛn nti na wɔka sɛ Kristo no yɛ Dawid ba?” no. Hebri Kyerɛwnsɛm no mu nsɛm foforo pii wɔ Luka nhoma no mu.—Luka 4:4, 8, 12; 20:41-44; Deut. 8:3; 6:13, 16; Dw. 110:1.

³¹ Bere a Yesu traa afurum so kɔɔ Yerusalem sɛnea wɔhyɛɛ ho nkɔm wɔ Sakaria 9:9 no, nnipadɔm no de anigye bɔ gyee no so, na nsɛm a wɔkae no kyerɛe sɛ Dwom 118:26 fa ne ho. (Luka 19:35-38) Luka nhoma no mu baabi no, ɔde nkyekyɛm abien pɛ kaa Hebri Kyerɛwnsɛm no mu nkɔmhyɛ asia a ɛkyerɛ sɛ Yesu bewu animguase wu ma wɔanyan no. (Luka 18:32, 33; Dw. 22:7; Yes. 50:6; 53:5-7; Yona 1:17) Bere a Yesu nyan fii awufo mu no, ɔmaa n’asuafo no tee ase paa sɛ Hebri Kyerɛwnsɛm no nyinaa ho hia. “Afei ɔka kyerɛɛ wɔn sɛ: ‘Eyi ne me nsɛm a meka kyerɛɛ mo bere a na meda so ka mo ho no, sɛ etwa sɛ nea wɔakyerɛw afa me ho wɔ Mose mmara ne Adiyifo no ne Nnwom no mu nyinaa ba mu.’ Afei obuee wɔn adwene mu yiye ma wɔtee Kyerɛwnsɛm no ase.” (Luka 24:44, 45) Luka ne afoforo a wɔkyerɛw Kristofo Hela Kyerɛwnsɛm no akyerɛkyerɛ sɛnea Hebri Kyerɛwnsɛm no aba mu no mu yiye. Enti sɛ yɛn nso yesua a, yebetumi ate nneɛma pii ase na yɛn gyidi ayɛ den te sɛ Yesu Kristo asuafo a wodi kan no.

³² Luka taa de akenkanfo adwene kɔ Onyankopɔn Ahenni so. Nhoma no mfiase pɛɛ na ɔbɔfo bɛhyɛɛ Maria bɔ sɛ abofra a ɔbɛwo no no, ɔno na “obedi Yakob fie so hene afebɔɔ, na n’ahenni remma awiei.” Efi ɛno so kosi nhoma no awiei a Yesu kae sɛ ɔne asomafo no bɛyɛ Ahenni apam no, Luka si Ahenni anidaso no so dua. (1:33; 22:28, 29) Ɔkae sɛ Yesu dii Ahenni asɛmpaka adwuma no anim na ɔsomaa asomafo 12 no, na akyiri yi nso ɔsomaa 70 no sɛ wɔn nso nkɔyɛ adwuma koro no ara bi. (4:43; 9:1, 2; 10:1, 8, 9) Yesu kaa no pen sɛ, sɛ yɛbɛkɔ Ahenni no mu a, ɛsɛ sɛ yɛde yɛn adwene nyinaa si so. Ɛda adi wɔ nsɛm a ɔkae yi mu: “Ma awufo nsie wɔn awufo, na wo de, kɔka Nyankopɔn ahenni no kyerɛ”; “Obiara nni hɔ a ɔde ne nsa akoso funtumdade mu na ɔhwɛ nneɛma a ɛwɔ n’akyi a ɔfata Nyankopɔn ahenni no.”—9:60, 62.

³³ Luka sii so dua sɛ mpaebɔ ho hia. N’Asɛmpa no kaa ho asɛm pii. Ɛkae sɛ bere a Sakaria wɔ asɔrefie hɔ no, na nnipadɔm bi rebɔ mpae. Ɛkaa Yohane Suboni no awo ho asɛm sɛ ɛyɛ obi mpae a ɔbɔ de hwehwɛɛ ɔba ho mmuae. Afei nso ɛkaa odiyifobea Hana a ɔbɔɔ mpae awia ne anadwo no ho asɛm. Ɛkae sɛ bere a wɔrebɔ Yesu asu no, ɔbɔɔ mpae; ɔde anadwo mũ nyinaa bɔɔ mpae ansa na ɔrepaw 12 no, na ahosakra no mu nso na ɔrebɔ mpae. Yesu tu n’asuafo fo sɛ “ehia sɛ wɔbɔ mpae daa a wɔmpa abaw,” na ɔde okunafo a ɔsrɛɛ ɔtemmufo bi ara kosii sɛ obuu atɛntrenee maa no no yɛɛ ɛho mfatoho. Luka nko ara na ɔka kyerɛɛ yɛn sɛ asuafo no kobisaa Yesu sɛ ɔnkyerɛ wɔn mpaebɔ na bere a Yesu rebɔ mpae wɔ Ngo Bepɔw so no, ɔbɔfo bɛhyɛɛ no den; ɔno nko ara na ɔkyerɛw Yesu mpaebɔ a etwa to yi: “Agya, wo nsam na mede me honhom hyɛ.” (1:10, 13; 2:37; 3:21; 6:12; 9:28, 29; 18:1-8; 11:1; 22:39-46; 23:46) Sɛnea na mpaebɔ ho hia bere a Luka kyerɛw n’Asɛmpa no, saa ara na nnɛ nso mpaebɔ hyɛ wɔn a wɔyɛ Onyankopɔn apɛde nyinaa den.

³⁴ Ná Luka hyɛ ade nsow, na otumi kyerɛkyerɛ nsɛm mu yiye, enti ɔmaa ahokeka baa Yesu nkyerɛkyerɛ no mu. Wutumi hu sɛ na Yesu wɔ ɔdɔ, ayamye, mmɔborohunu ne ayamhyehye ma nnipa a wɔyɛ mmerɛw na wɔhyɛ wɔn so tiatia wɔn so no. Ná ɔnte sɛ akyerɛwfo ne Farisifo nyaatwomfo a wonni ahummɔbɔ na wɔn asɛm yɛ den no. (4:18; 18:9) Ná Yesu taa de nkuranhyɛ ne mmoa ma ahiafo, nnommum ne anifuraefo, ne wɔn a wɔabubu. Ɛyɛ nhwɛso pa a ɛsɛ sɛ wɔn a wɔpɛ sɛ ‘wodi n’anammɔn akyi pɛɛ’ no suasua.—1 Pet. 2:21.

³⁵ Yesu, Onyankopɔn Ba a ɔyɛ pɛ a ɔyɛɛ anwonwade no kyerɛe sɛ ɔdɔ n’asuafo ne nnipa a wɔwɔ koma pa nyinaa na odwen wɔn ho. Na ɛsɛ sɛ yɛn nso yɛyere yɛn ho yɛ yɛn som adwuma no wɔ ɔdɔ mu, “yɛn Nyankopɔn mmɔborohunu nti.” (Luka 1:78) Ɛno nti Luka Asɛmpa no so wɔ mfaso paa, na ɛbɛboa yɛn. Ɛsɛ sɛ yɛma yɛn ani sɔ kɛse sɛ Yehowa de honhom kaa Luka, “yɛn dɔfo duruyɛfo no” ma ɔkyerɛw nhoma a ɛyɛ nokware na ɛhyɛ nkuran yi, efisɛ ɛma yehu sɛ Yesu Kristo, “nea Onyankopɔn nam so gye nkwa no,” nam Ahenni no so de nkwagye reba.—Kol. 4:14; Luka 3:6.

[Ase hɔ nsɛm]