Dɛn Nti Na Ɛsɛ Sɛ Wudi Trenee Akyi?

BASABASAYƐ wiase a edii Nsuyiri no anim no mu no, ɔbarima bi daa ne ho adi sɛ ɔyɛ soronko. Ná saa ɔbarima no ne Noa. Ɔne n’abusua ne Onyankopɔn nantewee bere a adesamma nkae no buu wɔn ani guu Ne so no. Nea efi mu bae ne sɛ, na “Noa yɛ onipa trenee” wɔ saa bere bɔne no mu, na ɔyɛɛ “treneekafo” wɔ wiasefo asoɔdenfo no mu.​—Genesis 6:9; 2 Petro 2:5.

Bɛyɛ Yɛn Bere yi So afe 56 mu hɔ no, na ɔsomafo Paulo da afiase wɔ Kaesarea. Bere a woyii Paulo fii n’afiase de no begyinaa Amrado Felike anim no, ɔde hokwan no dii dwuma de kaa asɛm kyerɛɛ Roma ɔpanyin kɛse no. Nsɛntitiriw bɛn na na ɛwɔ ne nsɛm no mu? “Ná ɔreka trenee ne anidahɔ ne atemmu a ɛreba no ho asɛm.” (Asomafo no Nnwuma 24:25) Yiw, na Paulo nso yɛ treneekafo.

Ná sɛnea trenee ho asɛm hia Onyankopɔn nkoa anokwafo baanu yi no yɛ ade a ɛfata ampa. Yehowa yɛ “Onyankopɔn a ɔteɛ na ogye nkwa.” (Yesaia 45:21) Enti, abebusɛm a efi honhom mu no ka kyerɛ yɛn sɛ: “Ɔbɔnefo kwan yɛ [Yehowa] akyide, na trenee kyidifo na ɔdɔ no.” (Mmebusɛm 15:9) Ɛsɛ sɛ Onyankopɔn nkoa nyinaa di trenee akyi.

Nea ɛyɛ awerɛhow no, nnipa pii nsusuw saa su yi ho ahe biara. Wɔka sɛ: ‘Menyɛ me yɔnko bɔne, enti migye di sɛ Onyankopɔn ani sɔ me.’ Anaa ebia wɔbɛkyerɛ sɛ: “Trenee akwan pii na ɛwɔ hɔ. Mpɛn dodow a midi me som mu nokware no, biribiara bɛyɛ yiye.’ Wususuw sɛ Onyankopɔn ani sɔ obi ho a obegow saa?

Ebia afoforo nso bɛka ɔsɛmpɔw a ɛyɛ soronko ho asɛm. Ebia na wonim Paulo asɛm a ese: “Efi gyidi mu na wɔabu yɛn bem [trenee].” (Romafo 5:1) Eyi nti, ebia wubesusuw sɛ: ‘Ɔkwan bɛn so na wɔbɛhwɛ kwan sɛ Kristofo a wɔabu wɔn trenee dedaw no bɛkɔ so adi trenee akyi?’ Wubebua asemmisa a ɛte sɛɛ no dɛn?

Trenee Nyankopɔn

Sɛnea nsɛm asekyerɛ nhoma kyerɛ no, trenee ne abrabɔ mu ɔteɛ, atɛntrenee, ɔsoro anaa abrabɔ mu mmara a obi ma n’asetra ne no hyia. Esiane sɛ Yehowa yɛ trenee Nyankopɔn nti, ɛsɛ sɛ obiara a ɔpɛ sɛ ɔsɔ n’ani no ma su a ɛho hia yi ho asɛm hia no. Odwontofo no kae sɛ: “[Yehowa] yɛ ɔtreneeni, na ɔpɛ asɛntrenee, wɔn a wɔteɛ behu n’anim.” (Dwom 11:7; Deuteronomium 32:4) Ɔsomafo Petro kae sɛ: “[Yehowa] ani wɔ wɔn a wɔteɛ so, na n’aso abue ama wɔn adesrɛ.”​—1 Petro 3:12.

Enti, yerentumi mmu saa asɛm yi adewa, sɛnea Yudafo pii yɛe no. Akyinnye biara nni ho sɛ na wɔn mu pii yɛ nnipa a wodi wɔn ho ni a na wɔnyɛ wɔn yɔnkonom bɔne. Ná wɔyɛ anokwafo nso​—mmɔdenbɔfo mpo​—wɔ wɔn som mu. Nanso afeha a edi kan no mu no, na wɔn mu dodow no ara nteɛ wɔ Onyankopɔn ani so. Paulo kae sɛ: “Midi wɔn adanse sɛ wɔwɔ Onyankopɔn ho mmɔdenbɔ de, nanso wonni no nimdeɛ mu. Na wonnim Nyankopɔn trenee no, na wɔhwehwɛ sɛ wɔde wɔn ankasa trenee si hɔ nti, wɔmmrɛɛ wɔn ho ase nhyɛɛ Onyankopɔn trenee ase ɛ.”​—Romafo 10:2, 3.

Ɛhe na Yudafo no dii mfomso? Paulo se wɔanni trenee akyi sɛnea nokware nimdeɛ te. Wɔn kɔkɔbɔ nhwɛso no ka kyerɛ yɛn sɛ ɛnnɔɔso sɛ yɛbɛyɛ nnipa pa na yɛakwati afoforo a yɛbɛyɛ wɔn bɔne ara kwa. Ɛda no adi nso sɛ trenee akwan a ɛsonosonoe pii biara nni hɔ. Ɛda adi pefee sɛ na biribi atoto wɔ ɔkwan a Yudafo pii pawee sɛ wɔbɛfa so wɔ asomafo no bere so no mu. Sɛ yetie Onyankopɔn nkutoo a, yebetumi adi trenee akyi ma ayɛ yiye. Mmebusɛm nhoma no se: “Me ba, sɛ wutie me nsɛm, na wode me mmara nsɛm sie wo nkyɛn [a], ɛno na wubehu trenee ne atemmu ne ade a ɛteɛ ne ɔkwan pa nyinaa mu.” Mmebusɛm 2:1, 9.

Trenee Kwan

Efi Mose so besi Yesu so no, na wɔde trenee bata Onyankopɔn ahyɛde sɛnea wɔakyerɛ wɔ Mose Mmara no mu no ho osetie ho. Esiane sɛ Israelfo a na wɔnyɛ pɛ no antumi antwe wɔn ho amfi ahyɛde ahorow yi so bu ho nti, na ɛsɛ sɛ wɔbɔ afɔre ne bɔne ho afɔre ahorow a Mmara no akyerɛ sɛnea ɛbɛyɛ a wɔbɛkata wɔn bɔne so. Mose ka kyerɛɛ Israelfo no sɛ: “Sɛ yɛhwɛ di mmara nsɛm yi nyinaa so [Yehowa] yɛn Nyankopɔn anim, sɛnea ɔhyɛɛ yɛn no a, ɛbɛyɛ yɛn atreneefo.”​—Deuteronomium 6:25.

Mfehaha pii mu no, obiara nni hɔ a otumi maa Mmara no baa mu pɛpɛɛpɛ. Ne nyinaa akyi no, pii de nokwaredi bɔɔ mmɔden sɛ wobedi trenee akyi denam Mmara no so, na Bible no ka eyinom bi ho asɛm sɛ wɔyɛ trenee. Sɛ nhwɛso no, wɔka Yohane Osuboni no awofo ho asɛm sɛ ‘na wɔn baanu nyinaa teɛ Onyankopɔn anim di [Yehowa] ahyɛde ne treneede nyinaa so a ɛho nni asɛm.’​—Luka 1:6.

Nanso, Yesu kyerɛɛ ɔkwan foforo a wɔnam so bedi trenee akyi. Odii Mose Mmara no so pɛpɛɛpɛ​—onipa biako pɛ a watumi ayɛ saa pɛn. Yesu wui wɔ asɛndua so, na Yehowa gyee bo a ne desani nkwa no som sɛ agyede ma adesamma no toom. Efi saa bere no, na afɔre ahorow a wɔbɔe wɔ Mmara apam no ase no ho nhia bio. Yesu afɔrebɔ a ɛyɛ pɛ no kataa adesamma komapafo nyinaa bɔne so.​—Hebrifo 10:4, 12.

Wɔabu Nokware Kristofo Trenee

Enti, fi bere a Yesu wui na ɔsɔree no, wɔde trenee abata Onyankopɔn Ba ɔtreneeni yi mu gyidi a wɔbɛkyerɛ ho. (Yohane 3:16) Bere a tete Yudafo a na wɔwɔ hɔ wɔ Paulo bere so no annya trenee esiane sɛ wɔpow Yesu ho nokware nimdeɛ nti no, yɛkenkan wɔ nokware Kristofo ho sɛ: “Wɔde ne dom nam ogye a ɛwɔ Kristo Yesu mu no so bu wɔn bem [trenee] kwa.”​—Romafo 3:24.

Sɛnea nsɛm afoforo a ɛka ho no kyerɛ no, saa nsɛm yi fa Kristofo a wɔasra wɔn a esiane wɔn gyidi wɔ Yesu afɔrebɔ no mu nti wobu wɔn trenee a adwene no ne sɛ wɔbɛyɛ Kristo mfɛfo adedifo wɔ ɔsoro Ahenni no mu no ho tee. Nanso, ɛnnɛ, sɛnea ɔsomafo Yohane hu siei no, Kristofo nnipakuw kɛse a wɔwɔ asase so anidaso aba. Eyinom nso kyerɛ gyidi wɔ agyede no mu. ‘Wɔhohoro wɔn ntade ma ɛhoa oguammaa no mogya mu’ na enti wobu wɔn trenee sɛ Onyankopɔn nnamfo a adwene no ne sɛ wobenya nkwa wɔ ahohiahia kɛse no mu.​—Adiyisɛm 7:9, 14; fa toto Yakobo 2:21-26 ho.

Kɔ so di Trenee Akyi

Nanso, hyɛ no nsow sɛ, sɛ yenya Yesu mu gyidi a, na trenee akyidi no mmaa awiei ɛ. Ná Timoteo ayɛ Kristoni a wahyira ne ho so a wɔasra no mfe pii bere a Paulo kyerɛw nsɛm a edi so yi kɔmaa no no: “Di trenee, onyamesom pa, gyidi, ɔdɔ, boasetɔ, odwo akyi. Ko gyidi ko pa no.” (1 Timoteo 6:11, 12; 2 Timoteo 2:22) Sɛ na Onyankopɔn abu Timoteo trenee dedaw a, dɛn nti na na ɛsɛ sɛ ‘odi trenee akyi’?

Efisɛ wɔde asɛmfua “trenee” no di dwuma wɔ Bible mu nso wɔ ntease a emu trɛw mu de ka obi a odi nokware na ne bra ye na ɔyɛ nea obetumi biara de di Onyankopɔn ahyɛde ahorow so no ho asɛm. Saa ntease yi mu na na Yohane Osuboni no awofo no yɛ trenee no. (Luka 1:6) Ná Yesu asase so agya Yosef, ne Yosef a ofi Arimatea no yɛ atreneefo wɔ saa kwan yi so. (Mateo 1:19; Luka 23:50) Nokwasɛm a ɛyɛ sɛ wobu Kristofo trenee no nnyi wɔn asɛyɛde a ɛne sɛ wobedi trenee akyi wɔ saa ntease yi mu no mfi wɔn so. Nokwarem no, Kristoni biara a ogyae sɛ obedi nokware na wabɔ ɔbra pa anaasɛ onni Onyankopɔn mmara nsɛm so no bɛhwere ne trenee gyinabea wɔ Yehowa anim.

Trenee Akyidi​—Asɛnnennen

Trenee akyidi yɛ asɛnnennen. Dɛn ntia? Efisɛ yɛn nyinaa nyɛ pɛ na yɛwɔ nea ɛnteɛ ho nkate a emu yɛ den. (Genesis 8:21; Romafo 7:21-23) Bio nso, yɛte wiase a ɛhyɛ nsusuwii ne nneyɛe ahorow a ɛnteɛ ho nkuran na ɛhyɛ Satan Ɔbonsam, “ɔbɔne no” nniso ase no mu. (1 Yohane 5:19; 2 Korintofo 4:4) Ɛnyɛ nwonwa sɛ bere a Paulo rekyerɛw nhoma akɔma Timoteo no, ɔde trenee akyidi bataa ‘gyidi ko pa no a ɔbɛko’ ho no!​—1 Timoteo 6:11, 12.

So yebetumi adi nkonim wɔ “ko pa” yi mu? Yiw, nanso gye sɛ yenya Yehowa gyinapɛn ahorow ho ɔdɔ a efi komam na yɛtan bɔne. Bible no ka wɔ Yesu ho sɛ: “Wodɔ trenee, na wukyi amumɔyɛ.” (Hebrifo 1:9) Ɛsɛ sɛ yenya su koro no ara; ɔpɛ a emu yɛ den sɛ yebenya ɔdɔ ama nea ɛsɔ Onyankopɔn ani ne ɔtan ama nea ɛnsɔ n’ani biara.

Bere koro no ara mu no, ɛsɛ sɛ yɛkae sɛ trenee akyidi nyɛ akansi. Sɛ yebu yɛn ho sɛ yɛyɛ sen afoforo binom, anaasɛ yɛde yɛn ankasa trenee hoahoa yɛn ho a, ɛnde na yɛte sɛ Yudafo Farisifo no. (Mateo 6:1-4) Wɔn a wodi trenee akyi nkonimdi mu no bu wɔn ho sɛ wɔba fam nokwarem, ‘wobu wɔn yɔnkonom kyɛn wɔn ankasa ho.’​—Filipifo 2:3.

Paulo sii hia a Bible adesua ho hia wɔ trenee akyidi mu no so dua bere a ɔkyerɛw sɛ: “Kyerɛw nyinaa fi Nyankopɔn home mu, na eye ma ɔkyerɛkyerɛ, ntɛnyi, nteɛso ne trenee mu yɛn” no. (2 Timoteo 3:16) Sɛ yesua Bible no na yɛkɔ Kristofo nhyiam horow, faako a wɔbɔ Bible ho nkɔmmɔ no a, wɔbɛyɛn yɛn trenee mu. Bible no betumi atete yɛn sɛnea ɛbɛyɛ a ‘yɛbɛhyɛ onipa foforo a wɔbɔɔ no Nyankopɔn so, nokware trenee ne ahotew mu.’​—Efesofo 4:24.

Sɛ trenee bɛyɛ yɛn su a, yɛbɛtan amumɔyɛ ampa. Wɔrensɔ yɛn nhwɛ mma yɛnkɔhwehwɛ wiase yi fekubɔ bɔne. (1 Korintofo 15:33) Wɔrenhyɛ yɛn ma yɛnnɔ wiase yi nneɛma anaasɛ yennya wiase yi honam fam ade dodowpɛ gyinapɛn ahorow no bi. (Mmebusɛm 16:8; 1 Timoteo 6:9, 10; 1 Yohane 2:15-17) Ɛda adi sɛ ɔbrasɛe ne anigyede a basabasayɛ wom a ɛwɔ hɔ pii nnɛ no rentwetwe yɛn adwene.​—Efesofo 5:3, 4.

Trenee mu Nhyira Horow

Yiw, trenee akyidi wɔ Yehowa kwan so no yɛ asɛnnennen, nanso apereperedi no fata. Dɛn ntia? Efisɛ ɛma yenya yɛne Yehowa ankasa ntam abusuabɔ. Hokwan a ɛyɛ nwonwa bɛn ara ni! Bible ka kyerɛ yɛn sɛ: “[Yehowa] hyira treneefo trabea.” “[Yehowa] ne abɔnefo ntam ware, na treneefo mpaebɔ de, otie.” (Mmebusɛm 3:33; 15:29) Nea ɛka ho no, yɛba benya Yehowa atirimpɔw ahorow mu ntease pa. “Treneefo kwan te sɛ owia hann, ɛkɔ so hyerɛn kodu awia ketee.”​—Mmebusɛm 4:18.

Bible no hyɛ bɔ sɛ wɔbɛbɔ wɔn a wɔhwehwɛ trenee no ho ban bere a nneɛma nhyehyɛe a ɛnteɛ yi ba n’awiei no. “Monhwehwɛ [Yehowa], asase sofo a mobrɛ mo ho ase na moyɛ n’atemmude nyinaa! Monhwehwɛ trenee, monhwehwɛ ahobrɛase; ebia wɔbɛkora mo so, [Yehowa] abufuw da no.” (Sefania 2:3) Ɛno akyi no, Bible no de akwanhwɛ a ɛyɛ nwonwa ampa ma wɔn a wɔwɔ asase so anidaso no: “Treneefo benya asase no adi, na wɔatra so daapem.”​—Dwom 37:29.

Ntease horow a ɛyɛ nwonwa a enti ɛsɛ sɛ wodi trenee akyi bɛn ara ni! Sɛnea Onyankopɔn ankasa ka no: “Nea odi trenee ne adɔe akyi no, obenya nkwa, trenee ne anuonyam.”​—Mmebusɛm 21:21.