16. (a) Dɛn na ehia na obi ayɛ nea ɔyɛ n’ade hɔ ne hɔ? (b) Ɔkwan bɛn so na ɔpanyin betumi akura ahosodi mu?

¹⁶ Ɔyɛ n’ade hɔ ne hɔ; odi ne ho so. (1 Timoteo 3:2; Tito 1:8) Ɛsɛ sɛ ɔpanyin yɛ obi a ɔyɛ n’ade hɔ ne hɔ, ɔnyɛ nea suban bɔne ahorow reyɛ aka ne hɔ. Sɛ ohyia sɔhwɛ ahorow a, Onyankopɔn bɛboa no ma wakɔ so akari pɛ, sɛ ɔbɔ mpae sɛnea odwontofo no bɔe no a: “Me koma mu ahohia so, yi me fi m’ahokyere mu.” (Dwom 25:17) Ɛsɛ sɛ ɔhwɛfo bɔ mpae na onya Onyankopɔn honhom, a ahosodi ka ho nso. (Luka 11:13; Galatifo 5:22, 23) Ɔpanyin bi nsusuwii, kasa, ne nneyɛe a ɔbɛto ano hye no bɛma wakwati nneɛma a wɔyɛ ma ɛtra so bere a ɔde honhom mu akwankyerɛ ma asafo no.

19. Sɛ ɔpanyin bi pɛ ahɔhoyɛ a, dɛn na ɔyɛ?

¹⁹ Ɔpɛ ahɔhoyɛ. (1 Timoteo 3:2; Tito 1:8) Obi a ɔyɛ ɔpanyin no ‘bɔ ahɔhoyɛ ho mmɔden.’ (Romafo 12:13; Hebrifo 13:2) Nea Hela asɛmfua ma “ahɔhoyɛ” no kyerɛ ankasa ne sɛ obi “ani gye ahɔho ho.” Enti, ɔpanyin a ɔpɛ ahɔhoyɛ no gye afoforofo a wɔba Kristofo nhyiam ase no fɛw so, na anigye koro a ɔkyerɛ wɔ ahiafo ho no ara na ɔkyerɛ wɔ wɔn a wodi yiye wɔ honam fam no ho. Ɔyɛ wɔn a Kristosom nkɔso nti, wotu kwan no hɔho na ogya wɔn kwan “sɛnea ɛsɛ, Onyankopɔn anim.” (3 Yohane 5-8) Nokwarem no, obi a ɔyɛ ɔpanyin no yɛ mfɛfo gyidifo hɔho sɛnea wɔn ahiade te ne sɛnea ne nsɛm tebea bɛma no kwan.​—Yakobo 2:14-17.

23. (a) Wobɛkyerɛkyerɛ “ɔpɛ papa” mu dɛn? (b) Dɛn na teɛ a obi teɛ no kyerɛ?

²³ Ɔpɛ papa; ɔteɛ. (Tito 1:8) Sɛ ɔbarima bi bɛfata sɛ ɔpanyin a, ɛsɛ sɛ ɔpɛ papa na ɔyɛ obi a ɔteɛ. Obi a ɔpɛ papa no pɛ nea ɛteɛ wɔ Yehowa ani so, ɔyɛ nneɛma pa a ɛboa afoforo, na ɔkyerɛ afoforo papayɛ ho anisɔ. (Luka 6:13; fa toto Asomafo no Nnwuma 9:36, 39; 1 Timoteo 5:9, 10 ho.) Obi teɛ a ɔteɛ no kyerɛ sɛ ɔyɛ n’ade ma ɛne Onyankopɔn mmara ne ne gyinapɛn ahorow hyia. Nea ɛka nneɛma afoforo ho no, ɔbarima a ɔte sɛɛ no nhwɛ nnipa anim na ɔma nneɛma a ɛteɛ, nea ɛho tew na ɛfata tra n’adwene mu. (Luka 1:6; Filipifo 4:8, 9; Yakobo 2:1-9) Esiane sɛ nsonsonoe a ɛda papayɛ ne trenee ntam ne sɛ papayɛ kɔ akyiri sen nea atɛntrenee hwehwɛ nti, obi a ɔpɛ papa no yɛ pii ma afoforo sen sɛnea wɔhwehwɛ afi ne hɔ.​—Mateo 20:4, 13-15; Romafo 5:7.

24. Dɛn na nokwaredi hwehwɛ sɛ obi yɛ?

²⁴ Odi nokware (Tito 1:8) Ɔbarima a ɔfata sɛ ɔyɛ ɔpanyin no kɔ so kura ahofama a emu yɛ den mu ma Onyankopɔn, na ɔkɔ so bata ɔsoro mmara ho, a sɛnea wɔbɛsɔ ne mudi mu kura ahwɛ biara mfa ho. Ɔyɛ nea Yehowa hwehwɛ fi ne nkyɛn, na nea ɛka eyi ho ne sɛ ɔbɛsom sɛ Ahenni ɔsɛnkafo ɔnokwafo.​—Mateo 24:14; Luka 1:74, 75; Asomafo no Nnwuma 5:29; 1 Tesalonikafo 2:10.