Nsemmisa A Efi Akenkanfo Hɔ

◼ So na ɔsomafo Paulo reda abusua bi ho adwenkyea adi sɛ ogyee Kretafo nyinaa a wɔkasa tiaa wɔn no toom no anaa?

Dabi, Paulo anyae ne ho mu amma adeyɛ a ɛne abusua anaa ɔman foforo bi mufo nyinaa a wɔka wɔn ho nsɛmmɔne no.

Saa asemmisa yi fi Paulo krataa a ɔkyerɛw kɔmaa Tito no mu nsɛm mu. Na Paulo agyaw no Ntam Po no so supɔw kɛse a ɛne Kreta no so sɛ ‘onsiesie nneɛma a aka no pɛpɛɛpɛ, na onsisi kurow biara kurow so mpanyimfo.’ Paulo kyerɛɛ asafo mpanyimfo ahwehwɛde no bi nanso otuu Tito fo sɛ: “Ahuhusɛnkafo ne nnaadaafo asowuifo pii wɔ hɔ, ne titiriw no wɔn a wofi twetiatwa mu a ɛsɛ sɛ wosiw wɔn ano; wɔn na aniwu mfaso nti wɔkyerɛkyerɛ nea ɛnsɛ, de dan afi mu butuw.”​—Tito 1:5, 10, 11.

Paulo toaa so wɔ nkyekyem 12 sɛ: “Wɔn mu bi a ɔyɛ wɔn ankasa diyifo kae sɛ: Kretafo yɛ atorofo daa, mmoa bɔne, akwadwofo adidifo.” Ɔde kaa ho wɔ nkyekyem 13 sɛ: “Adanse yi yɛ nokware. Ɛno nti yi wɔn ntɛm ketee, na wɔn ho ayɛ wɔn den gyidi mu.”

Bible asekyerɛfo pii de Paulo asɛm a ɔkae sɛ “adanse yi yɛ nokware” no di Kretani odiyifo no asɛm a ɔfa kae no akyi pɛɛ. Afoforo nso de nkyekyem 13 no fi nkyekyem foforo ase.a Asɛm no biara mu no, dɛn na na Paulo regye atom ɔkwan bi so no?

Ɛda adi yiye sɛ ɛnyɛ nea na ɔregye abusua bi mufo nyinaa a wɔka wɔn ho nsɛmmɔne a etia Kretafo atom. Yebetumi agye ɛno adi efisɛ na Paulo nim sɛ Kristofo a woye a Onyankopɔn pene wɔn so na ɔde Ne honhom kronkron asra wɔn wɔ Kreta. (Asomafo no Nnwuma 2:5, 11, 33) Na Kristofo a wɔatu wɔn ho ama a wɔdɔɔso wɔ hɔ a wɔbɛka abom ayɛ asafo ahorow “kurow biara kurow” mu. Bere a Kristofo a wɔte saa no nyɛ pɛ no, yebetumi agye adi sɛ na wɔnyɛ atorofo ne akwadwofo adidifo; ɛnde na anka wɔrenkɔ so nnya Onyankopɔn mpeneso. (Filipifo 3:18, 19; Adiyisɛm 21:8) Na sɛnea yehu wɔ amanaman nyinaa mu nnɛ no, ɛda adi sɛ na nnipa komapafo wɔ Kreta a na abrabɔ ho gyinapɛn a ɛba fam a na atwa wɔn ho ahyia no hyɛ wɔn awerɛhow a na wɔasiesie wɔn ho sɛ wobegye Kristofo nkrasɛm no atom.​—Hesekiel 9:4; fa toto Asomafo no Nnwuma 13:48 ho.

Ɔkwan foforo so no, na ebinom a wonni abrabɔ ho gyinapɛn a ɛkorɔn biara wɔ Kreta. Paulo hui sɛ ɛfata sɛ ɔfa saa nsɛm a ɛda adi sɛ Epimenide a na ɔyɛ Kretani anwensɛm kyerɛwfo (odiyifo anaa ɔkasamafo) no na ɔkae wɔ afeha a ɛto so asia A.Y.B. no ka asɛm. Nanso na Paulo regye atom sɛ saa nkyerɛkyerɛmu no fa Kretafo binom pɔtee bi ho.

Na eyinom yɛ ‘ahuhusɛnkafo ne nnaadaafo asowuifo’ a wɔne Kristofo anokwafo no di nkitaho na wɔbɔ mmɔden sɛ ‘wɔbɛdan afi ani abutuw.’ “Atorofo, mmoa bɔne” nkyerɛkyerɛmu no fata nnaadaafo abɔnefo a wɔte saa no ampa, na ɛno ara nso yɛ nokware wɔ nnipa a wɔte saa a wɔwɔ baabiara no ho. (2 Timoteo 3:6, 13) Bio nso, na obiara a ɔwɔ asafo no mu dedaw a wɔadaadaa no ma ɔnam saa akwan no mu biara so no hia sɛ ‘woyi no ntɛn ketee.’ Saa kwan no so na wobetumi aboa wɔn a woyi wɔn ntɛn no ma wɔabɛyɛ nhwɛso wɔ nnwuma pa ne “asɛmpa a eye a wonnya ho asɛm nka” mu.​—Tito 2:6-8.

Ɛsɛ sɛ yehu kɔkɔbɔ bi a ɛyɛ yɛn nyinaa de wɔ eyi mu. Ebia abusua anaa ɔman bi ho adwenkyea atwa yɛn ho ahyia. (Fa toto Yohane 7:47-52 ho.) Ɛda adi sɛ yɛte sɛ afipamfo, mfɛfo sukuufo, anaa mfɛfo adwumayɛfo keka nsɛm a ɛmfata fa nnipa afoforo ho, te sɛ, ‘Oo, saa ɔmantifi hɔfo no nyinaa mpɛ nnipa na wonni nkate’; ‘Wiɛ, wunim sɛnea anaafo hɔfo no yɛ ahantan no’; anaasɛ ‘Asiane wom sɛ wode wo ho bɛto wɔn a wɔwɔ ɔhye no akyi no so.’

Ɛsɛ sɛ yɛbɔ mmɔden kwati nnipa nyinaa ho nsɛm a wɔka a ebetumi aba sɛ ɛnyɛ nokware anaasɛ wɔagugu mu kɛse no. Ebia na ebinom pɛ nnamfofa na wɔpɛ kasa kɛse, afoforo nso yɛ komm komm na wɔyɛ nyaa wɔ ahɔho a wɔne wɔn bɛbɔ no mu. Nanso, ɛsɛ sɛ yɛkae sɛ akyinnye biara nni ho sɛ yɛn nuanom Kristofo binom ne afoforo a wonnya mmɛyɛɛ Kristofo nanso wɔwɔ su pa na trenee ho kɔm de wɔn nso wɔ saa abusua anaa ɔman no mu.

Ɔsomafo Petro sii nokwasɛm a ɛyɛ sɛ “Onyankopɔn nhwɛ onipa anim, na mmom ɔman biara mu, nea osuro no na ɔyɛ ade trenee no, ɔpɛ no agye no” no so dua. (Asomafo no Nnwuma 10:34, 35) Yebetumi agye adi koraa sɛ na Paulo gye ɛno tom, na ɔdaa saa su no ara adi wɔ ne nkrataa ahorow ne ne kasa mu. Saa ara na ɛsɛ sɛ yɛyɛ.

[Ase hɔ asɛm]