Bible No Adwene

So Ɛsɛ sɛ Woma W’ahonim Kyerɛ Wo Kwan?

BERE a wonam kwan bia adagyew nni so koraa so no, wutwa ɔbea bia wasiesie ne ho fɛfɛ a ne sika fi tɔ a wanhu ho. Bere a wokotow sɛ worefa no, wuhu sɛ ɔde ahoɔhare kɔtra kar fɛfɛ bi mu. Dɛn na wobɛyɛ? So wobɛteɛm afrɛ no anaasɛ wode bɛhyɛ wo kotoku mu ntɛmntɛm?

Mmuae no gyina w’ahonim so. Dɛn na ɛbɛka akyerɛ wo? Nea ehia titiriw no, so wubetumi de wo ho ato nea ɛbɛka akyerɛ wo no so? So wubetumi ama w’ahonim akyerɛ wo kwan a wunsuro?

Dekode a W’ahonim Yɛ

Wɔaka ahonim ho asɛm sɛ ade a ɛkyerɛ papa ne bɔne, nea ɛteɛ ne nea ɛnteɛ, ɔbra pa ne ɔbra bɔne ho awosu mu nkate bi. Bible no kyerɛkyerɛ ahonim dwumadi mu wɔ Romafo 2:14,15 sɛ: “Na amanaman mufo a wonni mmara no de wɔn awosu yɛ mmara no mu nneɛma a, eyinom a wonni mmara no yɛ mmara ma wɔn ho. Wɔde eyi kyerɛ sɛ wɔakyerɛw mmara adwuma no wɔn komam, na wɔn ahonim nso di wɔn adanse, na wɔn nsusuwii toto wɔn ho ano, anaasɛ nso eyiyi wɔn ho ano.” Enti, wɔyɛɛ w’ahonim na ama woatumi asusuw tebea horow ho, woapaw nneɛma pa, woabu wo ho atɛn wɔ nneɛma a woapaw no ho. Na so wubetumi de wo ho ato w’ahonim so?

Mmuae no gyina biribi so. Anyɛ yiye koraa no, adanse a ɛdɔɔso wɔ hɔ a ɛkyerɛ sɛ ahonim bɔne betumi ama obi abu bra bɔne. Nokwasɛm a ɛyɛ sɛ obi ahonim ma kwan ma ɔyɛ nneɛma bi no nkyerɛ sɛ Onyankopɔn pene so. Sɛ nhwɛso no, ansa na Saulo a ofi Tarso reyɛ Kristoni no, odii ɔtaa a wɔde baa Kristofo so no anim. Ɔpenee so ma wokum Kristoni mogya dansefo Stefano na onyaa mu kyɛfa mpo. Wɔ eyi nyinaa mu no, n‘ahonim ammu no fɔ.​—Asomafo no Nnwuma 7:58, 59; Galatifo 1:13, 14; 1 Timoteo 1:12-16.

Wɔ Nasi nniso ase wɔ Germany wɔ Wiase Ko II mu no, SS asraafo kae sɛ na wɔredi ahyɛde so ara kwa bere a wɔyɛɛ nnipa mpempem pii” ayayade na wokunkum wɔn wɔ Hitler adwumayɛban mu no. Wɔn ahonim maa wɔn kwan ma wɔyɛɛ saa. Nanso wiase atemmu​—ne titiriw Onyankopɔn atemmu ​—-ampene wɔn nneyɛe no so. Wobuu wɔn fɔ wɔ ɔkwan a ɛfata so.

Dɛn Nti na Ɛnyɛ Adwuma Yiye?

Dɛn nti na biribi a Onyankopɔn abɔ nyɛ adwuma yiye? Bible no kyerɛkyerɛ mu. Esiane sɛ onipa kɔɔ bɔne mu denam Adam asoɔden so nti, wɔka sɛ bɔne “di hene,” na ɛhyɛ nnipa ma ɔyɛ n‘akɔnnɔde. (Romafo 5:12; 6:12) Onipa ahonim a na anka mfiase no ɛyɛ pɛ no, wui; na mprempren bɔne tumi ne no di asi. (Romafo 7:18-20) Eyi na ɛde ntawntawdi a yenim no yiye yi bae: “Ɛnde mihu mmara yi sɛ, me a mepɛ sɛ meyɛ nea eye no, bɔne wɔ me hɔ. . . . Mihu mmara foforo bi wɔ me honam akwaa mu a ɛne m’adwene mu mmara ko na ɛfa me dommum ma bɔne mmara a ɛwɔ me honam akwaa mu no.”​—Romafo 7:21-23.

Wɔ mmerɛwyɛ yi a yenya fii awo mu no akyi no, nneɛma a atwa yɛn ho ahyia nso nya yɛn ahonim so tumi. Sɛ nhwɛso no, ɛda adi sɛ atipɛnfo nhyɛso sɛee anaa ɛkaa Nasi SS asraafo a yɛadi kan aka wɔn ho asɛm no ahonim. (Fa toto Mmebusɛm 29:25 ho.) Afei nso, nneɛma a ɛmfata, te sɛ TV, sini ne nhoma mu ɔbrasɛe ne basabasayɛ nso nya so tumi bi saa ara. Sɛ yɛkɔ so hwɛ saa nneɛma no a, awiei koraa no ɛbɛyɛ te sɛ nea ɛnyɛ bɔne bio, na yɛn ahonim bɛyɛ mmerɛw. Sɛ yɛbɛka no ɔkwan foforo so a, ‘fekubɔne sɛe ɔbra pa.’​—1 Korintofo 15:33.

Sɛ wɔtete obi ma ohu Onyankopɔn mmara na ɔkyerɛ obu ma a, ɛda adi sɛ n’ahonim bɛyɛ ɔkwankyerɛfo a wotumi de ho to so yiye sen sɛ wɔamfa Onyankopɔn mmara antete no yiye. Nanso, ɛtɔ mmere bi a, obi a ɔte Onyankopɔn akwan ase na ɔkyerɛ ho anisɔ kɛse no mpo behu ara sɛ bɔne ne sintɔ a yenya fii awo mu, ne ebia nkɛntɛnso a nneɛma a atwa yɛn ho ahyia nya wɔ ne so nti, n’ahonim renyɛ ɔkwankyerɛfo a otumi de ho to so yiye.

Dɛn Na Yebetumi Ayɛ?

So wobetumi asesa ahonim ma atumi agye trenee nnyinasosɛm ahorow atom? Yiw. Paulo tuu Kristofo fo sɛ wobetumi ama “Wɔn nkatede akokwaw papa ne bɔne mu yiyi ho.” (Hebrifo 5:11-14) Nea ɛka dwuma a wɔde di ne ntetee a ɛte saa ho ne Bible no a yebesua, na yɛde yɛn adwene asi Yesu Kristo nhwɛso a ɛyɛ pɛ a ɔde gyaw yɛn no so titiriw. (1 Petro 2:21, 22) Ɛno akyi, bere a yɛde yɛn nkatede a akokwaw si gyinae ahorow no, yɛn ahonim bɛma yɛatwe yɛn ho afi nsusuwii ne nneyɛe bɔne ho, na ɛbɛkanyan yɛn ma yɛayɛ nea nidi wom na ɛteɛ.

Saa mpo, ɛnsɛ sɛ yɛyɛ yɛn ho atreneefo anaa yɛka sɛ, sɛ biribi “nhaw m’ahonim” a, ɛnde na ɛteɛ. Yebetumi de ofirikafo a ɔyɛ ahwɛyiye no nneyɛe akyerɛkyerɛ ahonim a ɛwɔ nnipa a wɔnyɛ pɛ mu a wɔde di dwuma ɔkwampa so a asiane nnim mu. Sɛ ofirikafo bi pɛ sɛ ofi nifa kɔ benkum a, odi kan hwɛ ahwehwɛ a ɔhwɛ mu a ohu n’akyi no mu. Sɛ ohu kar a, ohu sɛ asiane wom sɛ obefi nifa akɔ benkum. Nanso, sɛ wanhu hwee mpo a, ofirikafo ɔbadwemma no hu sɛ mmeae bi wɔ hɔ a ɔrentumi nhu hɔ​—ɛnyɛ biribiara na wɔhwɛ ahwehwɛ mu a wotumi hu bere nyinaa. Enti, ɔnhwɛ ahwehwɛ no nkutoo mu. Ɔdan n’ani hwɛ, na ɔhwɛ hu sɛ ɔkwan no mu da hɔ ansa na waman akɔ hɔ. Saa ara na ahonim no nso te. Sɛ ɛbɔ wo kɔkɔ a, tie! Na sɛ anni kan ammɔ wo kɔkɔ mpo a, yɛ te sɛ ofirikafo nyansafo no ​—hwɛ nneɛma afoforo na ama woagye adi sɛ asiane biara nni ho.

Yɛ wo nsusuwii mu nhwehwɛmu sɛ ebia ɛne Onyankopɔn nsusuwii hyia a. Fa n‘Asɛm no hwehwɛ w’ahonim mu. Mmebusɛm 3:5, 6 ka no nyansam sɛ: “Fa wo koma nyinaa bata [Yehowa] ho, na mfa wo ho ntweri wo nhumu. Hu no w’akwan nyinaa mu. na ɔno na ɔbɛteɛ w’akwan.”

Enti nyansa wom sɛ wubetie w’ahonim. Nanso nyansa kɛse wom sɛ yɛde nea yɛyɛ nyinaa bɛtoto Onyankopɔn apɛde a wada no adi wɔ n‘Asɛm mu no ho. Ɛno ansa na yebetumi de awerɛhyem aka sɛ, “Yenim pefee sɛ yɛwɔ ahonim pa.”​—Hebrifo 13:18; 2 Korintofo 1:12.

[Mfonini wɔ kratafa 25]

“Ɔhotefo Paulo adwensakra“

[Asɛm Fibea]

Caravaggio na ɔyɛɛ mfonini no: Scala/Art Resource, N Y