Momma Yɛnyɛ Nnipa a Wɔwɔ Gyidi

“Yɛfra wɔn a wogye di kɔ ɔkra nkwagye mu mu.”—HEBRIFO 10:39.

 1. Dɛn nti na yebetumi aka sɛ Yehowa asomfo anokwafo nyinaa gyidi som bo?

BERE foforo a wobɛkɔ Ahenni Asa a Yehowa asomfo ahyɛ hɔ ma so no, gye bere kakra fa hwɛ nnipa a wɔatwa wo ho ahyia no. Susuw akwan horow a wɔfa so da gyidi adi no ho hwɛ. Ebia wubehu wɔn a wɔn mfe akɔ anim a wɔde mfe pii asom Nyankopɔn, mmofra a wogyina atipɛnfo nhyɛso ano daa, ne awofo a wɔbɔ mmɔden tete mmofra a wosuro Nyankopɔn. Asafo mu mpanyimfo ne asomfo a wodi asɛyɛde pii ho dwuma wɔ hɔ. Yiw, wubetumi ahu honhom fam anuanom mmarima ne mmea, fi mmofra so kosi mpanyin so a wodi akwanside ahorow so na ama wɔatumi asom Yehowa. Hwɛ sɛnea wɔn mu biara gyidi som bo fa!—1 Petro 1:7.

 2. Dɛn nti na Paulo afotu a ɛwɔ Hebrifo ti 10 ne 11 no ho wɔ mfaso ma yɛn nnɛ?

² Nnipa a wɔtɔ sin mu kakraa bi pɛ na ebia wobetumi aka sɛ wɔte hia a gyidi ho hia no ase sen ɔsomafo Paulo. Nokwarem no, ɔkae sɛ nokware gyidi de obi “kɔ ɔkra nkwagye mu.” (Hebrifo 10:39) Nanso, na Paulo nim sɛ gyidi ho betumi aba asɛm na asɛe wɔ wiase a gyidi nnim yi mu. Na Hebrifo Kristofo a wɔwɔ Yerusalem ne Yudea a wɔrebɔ mmɔden abɔ wɔn gyidi ho ban no ho asɛm hia no. Bere a yɛresusuw Hebrifo ti 10 ne 11 ho no, momma yɛnhwɛ akwan a Paulo faa so hyɛɛ wɔn gyidi den no nsow. Yɛnam saayɛ so behu ɔkwan a yebetumi afa so ne wɔn a wɔbɛn yɛn no anya gyidi a ɛyɛ den.

Nya Afoforo Mu Ahotoso

 3. Ɔkwan bɛn so na Paulo nsɛm a ɛwɔ Hebrifo 10:39 no kyerɛ sɛ na ɔwɔ ne nuanom mmarima ne mmea gyidifo no mu ahotoso?

³ Ade a edi kan a yebetumi ahyɛ no nsow ne adwempa a na Paulo wɔ ma n’atiefo no. Ɔkyerɛwee sɛ: “Na yɛn de yɛmfra wɔn a wɔtwe wɔn ho kɔ ɔsɛe mu mu, na mmom yɛfra wɔn a wogye di kɔ ɔkra nkwagye mu mu.” (Hebrifo 10:39) Paulo nyaa ne mfɛfo Kristofo anokwafo no ho adwempa, ɛnyɛ adwemmɔne. Hyɛ no nsow nso sɛ ɔde asɛm ‘yɛn’ na edii dwuma. Ná Paulo yɛ ɔtreneeni. Nanso wammu n’atiefo no animtiaa, te sɛ nea ebia ɔyɛ ɔtreneeni a ɔkorɔn sen wɔn koraa. (Fa toto Ɔsɛnkafo 7:16 ho.) Mmom no, ɔde ne ho fraa wɔn mu. Ofii komam de ahotoso kae sɛ ɔne ne nuanom Kristofo anokwafo a wɔbɛkenkan ne krataa no nyinaa behyia akwanside ahorow a ɛyɛ hu daakye, nanso wɔde akokoduru begyina mu a wɔrentwe wɔn ho nkɔ ɔsɛe mu, na wɔbɛda wɔn ho adi sɛ wɔyɛ nnipa a wɔwɔ gyidi.

 4. Nneɛma bɛn nti na na Paulo wɔ ne mfɛfo gyidifo mu ahotoso?

⁴ Ɛyɛɛ dɛn na Paulo tumi nyaa ahotoso a ɛte saa? So na onhu Hebrifo Kristofo no mfomso ahorow no? Nea ɛne no bɔ abira no, ɔmaa wɔn afotu pɔtee a ɛbɛboa wɔn ma wɔadi wɔn honhom fam mmerɛwyɛ so. (Hebrifo 3:12; 5:12-14; 6:4-6; 10:26, 27; 12:5) Ne nyinaa akyi no, na Paulo wɔ nneɛma abien bi a enti na ɔwɔ ne nuanom no mu ahotoso. (1) Sɛ obi a na osuasua Yehowa no, Paulo bɔɔ mmɔden sɛ obehu Onyankopɔn nkurɔfo sɛnea Yehowa hu wɔn no. Na ɛnyɛ sɛ ɔnam so behu wɔn mfomso ahorow na mmom sɛ obehu su pa a na wɔwɔ ne paw a wobetumi apaw sɛ wɔbɛyɛ nea ɛteɛ daakye no nso. (Dwom 130:3; Efesofo 5:1) (2) Na Paulo wɔ honhom kronkron no tumi no mu gyidi a ɛyɛ den. Na onim sɛ akwanside anaa nnipa mmerɛwyɛ biara ntumi nsiw Yehowa kwan sɛ ɔde “tumi a ɛboro so” no bɛma Kristoni biara a ɔbɔ mmɔden sɛ ɔde nokwaredi bɛsom No no. (2 Korintofo 4:7; Filipifo 4:13) Enti ahotoso a na Paulo wɔ wɔ ne nuanom mmarima ne mmea mu no nyɛ nea na ɛmfata, a ntease nnim, anaasɛ na ɔrebu n’ani agu nneɛma so. Na ɛwɔ nnyinaso a ɛyɛ den wɔ Kyerɛwnsɛm no mu.

 5. Ɔkwan bɛn so na yebetumi asuasua Paulo ahotoso no, na dɛn na ɛda adi sɛ ebefi mu aba?

⁵ Akyinnye biara nni ho sɛ ahotoso a Paulo daa no adi no nyaa afoforo so nkɛntɛnso. Ɛbɛyɛ sɛ asafo horow a na ɛwɔ Yerusalem ne Yudea no ani gyee kɛse sɛ wonyaa Paulo ma ɔne wɔn bɛkasae hyɛɛ wɔn den saa. Wɔ animtiaabu ne anibiannaso a na Yudafo asɔretiafo de ba wɔn so no mu no, Hebrifo Kristofo no nyaa nkuranhyɛ fii nsɛm a na ɛbɛma wɔafi komam asi wɔn bo sɛ wɔbɛyɛ nnipa a wogye di no mu. So yebetumi ayɛ saa ara ama afoforo nnɛ? Ɛnyɛ den koraa sɛ yebehu mfomso ne nipasu mu sintɔ ahorow nkutoo wɔ afoforo ho. (Mateo 7:1-5) Nanso, yebetumi aboa yɛn ho yɛn ho kɛse bere a yɛhyɛ gyidi soronko a yɛn mu biara wɔ no nsow na yɛkyerɛ ho anisɔ no. Ɛda adi sɛ nkuranhyɛ a ɛte saa no bɛma yɛn gyidi ayɛ den.—Romafo 1:11, 12.

Onyankopɔn Asɛm a Yɛde Bedi Dwuma Yiye

 6. Ɛhe na Paulo faa ne nsɛm a ɔkyerɛwee wɔ Hebrifo 10:38 no fii?

⁶ Paulo nam Kyerɛwnsɛm a ɔde dii dwuma ahokokwaw so nso so hyɛɛ ne mfɛfo gyidifo den. Sɛ nhwɛso no, ɔkyerɛwee sɛ: “Na nea ɔteɛ no fi gyidi mu benya nkwa, na sɛ ɔtwe ne ho a, me kra ani rensɔ no.” (Hebrifo 10:38) Ɛha no, na Paulo refa odiyifo Habakuk asɛm na aka.a Ɛda adi sɛ na Hebrifo Kristofo a na wonim nkɔmhyɛ nhoma no yiye no nim Paulo nsɛm yi. Sɛ yesusuw ne botae—sɛ ɔbɛhyɛ Kristofo a na wɔbɛn Yerusalem wɔ bɛyɛ afe 61 Y.B. mu no den—no ho a, na Habakuk nhwɛso a Paulo pawee no fata. Dɛn ntia?

 7. Bere bɛn na Habakuk kyerɛw ne nkɔmhyɛ no, na na tebea no te dɛn wɔ Yuda saa bere no?

⁷ Ɛda adi sɛ Habakuk kyerɛw ne nhoma no bɛboro mfe aduonu ansa na wɔresɛe Yerusalem wɔ 607 A.Y.B. mu. Wɔ anisoadehu mu no, odiyifo no huu Kaldeafo (anaa, Babilonfo) sɛ, “ɔman a wɔn tirim yɛ den na wɔn ho yɛ hare” a wɔtow hyɛɛ Yuda so sɛee Yerusalem, na wɔnam so menee nkurɔfo ne amanaman. (Habakuk 1:5-11) Nanso, na wɔaka amanehunu a ɛte saa ho asɛm asie dedaw wɔ Yesaia bere so bɛboro mfe ɔha a na atwam no mu. Wɔ Habakuk bere so no, Yehoakim bedii Ɔhempa Yosia ade, na abɔnefosɛm nyaa nkɔanim wɔ Yuda bio. Yehoakim de ɔtaa baa wɔn a na wɔkasa Yehowa din mu no so na okunkum wɔn mpo. (2 Beresosɛm 36:5; Yeremia 22:17; 26:20-24) Enti ɛnyɛ nwonwa koraa sɛ odiyifo Habakuk de awerɛhow teɛɛm sɛ: “[Yehowa, NW], mateɛm makyɛ dɛn ara?”—Habakuk 1:2.

 8. Dɛn nti na na Habakuk nhwɛso no so betumi aba afeha a edi kan no mu Kristofo no ne Kristofo a wɔwɔ hɔ nnɛ no mfaso?

⁸ Ná Habakuk nnim bere tenten a ebegye ansa na wɔasɛe Yerusalem. Saa ara nso na na afeha a edi kan no mu Kristofo no nnim bere a na Yudafo nneɛma nhyehyɛe no bɛba awiei. Na saa ara na yɛn nso yennim “da no ne dɔn ko” a Yehowa atemmu bɛba nhyehyɛe bɔne yi so. (Mateo 24:36) Ɛnde, momma yɛnhyɛ mmuae a ɛbɔ ho abien a Yehowa de maa Habakuk no nsow. Nea edi kan no, ɔmaa odiyifo no awerɛhyem sɛ sɛ bere no so pɛ a, awiei no bɛba. Ɛwom sɛ wɔ nnipa ani so no, na ɛte sɛ nea akyɛ de, nanso Onyankopɔn kae sɛ “ɛrenka akyiri.” (Habakuk 2:3) Nea ɛto so abien no, Yehowa kaee Habakuk sɛ: “Ɔtreneeni de, ne gyidi mu na obenya nkwa.” (Habakuk 2:4) Nokwasɛm a ɛyɛ dɛ bɛn ara ni! Ɛnyɛ bere a awiei no bɛba na ehia kɛse, na mmom sɛ ebia yɛde gyidi bɛkɔ so abɔ yɛn bra no.

 9. Ɔkwan bɛn so na Yehowa asomfo asoɔmmerɛfo gyidi maa wonyaa wɔn ti didii mu (a) wɔ 607 A.Y.B.? (b) wɔ 66 Y.B. akyi? (d) Dɛn nti na ehia sɛ yɛhyɛ yɛn gyidi den?

⁹ Bere a wɔfow Yerusalem wɔ 607 A.Y.B. no, Yeremia ne ne kyerɛwfo Baruk, Ebed-Melek, ne Rekabfo anokwafo no huu nokwasɛm a na ɛwɔ Yehowa bɔ a ɔhyɛɛ Habakuk no mu. Wɔde ‘wɔn ani’ huu Yerusalem ɔsɛe a na ɛyɛ hu no. Dɛn ntia? Yehowa tuaa wɔn nokwaredi no so ka. (Yeremia 35:1-19; 39:15-18; 43:4-7; 45:1-5) Saa ara na ɛbɛyɛ sɛ afeha a edi kan no mu Hebrifo Kristofo no tiee Paulo afotu no, efisɛ bere a Roma asraafo tow hyɛɛ Yerusalem so wɔ 66 Y.B., na wɔsan wɔn akyi a obiara ante ase no, saa Kristofo no ammu wɔn ani angu Yesu kɔkɔbɔ a ɔde maa wɔn sɛ wonguan no so. (Luka 21:20, 21) Wɔn gyidi nti na wonyaa wɔn ti didii mu. Saa ara nso na sɛ awiei no ba na sɛ wohu yɛn sɛ nnipa a wɔwɔ gyidi a, yebenya yɛn ti adidi mu. Hwɛ sɛnea ɛho hia ankasa sɛ yɛhyɛ yɛn gyidi den nnɛ!

Gyidi Ho Nhwɛso Horow a Yɛbɛkyerɛkyerɛ Mu Yiye

10. Paulo kaa Mose gyidi ho asɛm dɛn, na ɔkwan bɛn so na yebetumi asuasua Mose wɔ eyi mu?

¹⁰ Paulo nso nam nhwɛso horow a etu mpɔn so hyɛɛ afoforo gyidi den. Bere a wokenkan Hebrifo ti 11 no, hyɛ sɛnea ɔkyerɛkyerɛ nnipa a wɔn ho nsɛm wɔ Bible mu nhwɛso ahorow mu no nsow. Sɛ nhwɛso no, ɔka sɛ Mose ‘miaa n’ani traa mu sɛnea ohu nea wonhu no ho.’ (Hebrifo 11:27) Ɔkwan foforo so no, na Mose nim sɛ Yehowa wɔ hɔ paa ma enti na ɛte sɛnea ohu Onyankopɔn a wonhu no no. So wobetumi aka saa afa yɛn ho? Ɛnyɛ den sɛ yɛbɛka yɛne Yehowa ntam abusuabɔ ho asɛm, nanso egye mmɔdenbɔ na ama yɛatumi akura gyidi a ɛte saa mu na yɛahyɛ mu den. Ɛyɛ adwuma a ehia sɛ yɛyɛ! So Yehowa wɔ hɔ paa ma yɛn ma enti sɛ yɛresisi gyinae horow, a nea yesusuw sɛ esua koraa ka ho a, yedwen ne ho? Gyidi a ɛte saa bɛboa yɛn ma yɛagyina ɔtaa a emu yɛ den sen biara mpo ano.

11, 12. (a) Tebea horow bɛn mu na ɛbɛyɛ sɛ wɔsɔɔ Henok gyidi hwɛe? (b) Akatua a ɛyɛ anigye bɛn na Henok nyae?

¹¹ Afei susuw Henok nso gyidi no ho hwɛ. Ohyiaa ɔsɔretia a emu yɛ den a yɛrentumi nka sɛnea na ɛte. Henok nso kaa atemmusɛm a emu yɛ den tiaa nnipabɔnefo a na wɔwɔ hɔ saa bere no. (Yuda 14, 15) Ɛda adi sɛ ɔbarima nokwafo yi hyiaa ɔtaa a ano yɛ den araa ma enti, Yehowa ‘faa no fii’ nkwa mu fii atamfo no nsam. Enti Henok antra ase amfa n’ani anhu nkɔmhyɛ a ɔde n’ano kae no mmamu. Nanso, onyaa akyɛde a ɔkwan bi so no, na eye kyɛn so mpo.—Hebrifo 11:5; Genesis 5:22-24.

¹² Paulo kyerɛkyerɛ mu sɛ: “Ansa na wɔfaa [Henok] kɔe no, onyaa adanse sɛ ɔsɔ Onyankopɔn ani.” (Hebrifo 11:5) Dɛn na na eyi kyerɛ? Ansa na Henok rewu no, ebia onyaa anisoadehu bi, a ebia ɛfa asase so Paradise a ɛrenkyɛ ɔbɛsɔre aba mu no ho. Sɛnea ɛte biara no, Yehowa maa Henok hui sɛ n’ani sɔɔ ne nokwaredi no. Henok maa Yehowa ani gyei. (Fa toto Mmebusɛm 27:11 ho.) So Henok asetra a yɛresusuw ho yi nka wo koma? Wobɛpɛ sɛ wode nokwaredi a ɛte saa bɔ wo bra? Ɛnde susuw nhwɛso a ɛtete saa ho; susuw wɔn ho sɛ nnipa a wɔtraa ase ankasa. Si wo bo sɛ, wode gyidi bɛbɔ wo bra da biara da. Kae nso sɛ, nnipa a wɔwɔ gyidi no som a wɔde ma Yehowa no nnyina bere pɔtee bi a wɔahyɛ, te sɛ bere a Onyankopɔn bɔhyɛ ahorow nyinaa bɛbam so. Mmom no, yɛasi yɛn bo sɛ yɛbɛsom Yehowa daa! Saa a yɛbɛyɛ no ne asetra kwan a eye sen biara wɔ nneɛma nhyehyɛe yi ne nea ɛreba no mu.

Ɔkwan a Yɛbɛfa so Ahyɛ Yɛn Gyidi Den

13, 14. (a) Ɔkwan bɛn so na Paulo nsɛm a ɛwɔ Hebrifo 10:24, 25 no betumi aboa yɛn ma yɛn nhyiam horow ase ayɛ anigye? (b) Dɛn ne Kristofo nhyiam horow no atirimpɔw titiriw?

¹³ Paulo kyerɛɛ Hebrifo Kristofo no akwan pii a mfaso wɔ so a wobetumi afa so ahyɛ wɔn gyidi den. Momma yensusuw emu abien pɛ ho nhwɛ. Ɛda adi sɛ yenim n’afotu a ɛwɔ Hebrifo 10:24, 25, a ɛhyɛ yɛn sɛ yenhyiam daa wɔ yɛn Kristofo nhyiam ase no. Nanso, kae sɛ Paulo nsɛm a ɛwɔ hɔ no nkyerɛ sɛ ɛsɛ sɛ yɛkɔ nhyiam a ɛtete saa ase kɔyɛ bɛhwɛadefo kɛkɛ. Mmom no, Paulo ka nhyiam horow no ho asɛm sɛ hokwan a ɛbɛma yɛahu yɛn ho yɛn ho, anaasɛ ɛbɛma yɛakanyan yɛn ho yɛn ho na yɛasom Onyankopɔn yiye, na yɛahyehyɛ yɛn ho nkuran. Ɔma nti na yɛkɔ hɔ, na ɛnyɛ ogye. Ɛno boa ma yɛn nhyiam horow no ase yɛ anigye.—Asomafo no Nnwuma 20:35.

¹⁴ Ɛwom sɛ yɛn botae titiriw a enti yɛkɔ Kristofo nhyiam horow ase ne sɛ yɛbɛkɔ akɔsom Yehowa Nyankopɔn. Yɛnam mpae a yɛbom bɔ, dwonto, aso a yɛyɛ tie asɛm yiye ne ‘yɛn ano fafa a yɛde bɔ afɔre’—mmuae ne ɔkasa dwumadi a yɛnam so yi Yehowa ayɛ—so na ɛyɛ saa. (Hebrifo 13:15) Sɛ yɛma botae horow a ɛtete saa tra yɛn adwenem na yɛde di dwuma wɔ nhyiam biara ase a, akyinnye biara nni ho sɛ ɛbɛhyɛ yɛn gyidi den.

15. Dɛn nti na Paulo hyɛɛ Hebrifo Kristofo no nkuran sɛ wonso wɔn som adwuma no mu pintinn, na dɛn nti na afotu koro no ara fata nnɛ?

¹⁵ Ɔkwan foforo a yebetumi afa so ahyɛ yɛn gyidi den ne asɛnka adwuma no. Paulo kyerɛwee sɛ: “Momma yenso anidaso asɛm a yegyina so ka no mu pintinn, efisɛ ɔnokwafo ne nea ɔhyɛɛ bɔ no.” (Hebrifo 10:23) Wubetumi ahyɛ afoforo nkuran ma wɔaso biribi mu yiye bere a wuhu sɛ ɛreyɛ agye wɔn nsam no. Akyinnye biara nni ho sɛ na Satan rehyɛ saa Hebrifo Kristofo no ma wɔagyae wɔn som adwuma no mu, saa ara nso na ɔrehyɛ Onyankopɔn nkurɔfo nnɛ. Bere a yɛrehyia nhyɛso a ɛtete saa no, dɛn na ɛsɛ sɛ yɛyɛ? Susuw nea Paulo yɛe no ho hwɛ.

16, 17. (a) Ɛyɛɛ dɛn na Paulo nyaa akokoduru a ɔde yɛɛ ɔsom adwuma no? (b) Sɛ yehu sɛ yɛn Kristofo som adwuma no fa bi rehunahuna yɛn a, akwan bɛn na ɛsɛ sɛ yɛfa so di ho dwuma?

¹⁶ Paulo kyerɛw Kristofo a na wɔwɔ Tesalonika no sɛ: “Yehuu amane kan, na wɔbɔɔ yɛn adapaa wɔ Filipi no, yɛyɛɛ nnam yɛn Nyankopɔn mu kaa Onyankopɔn asɛmpa no kyerɛɛ mo, ɔko bebree mu.” (1 Tesalonikafo 2:2) Ɔkwan bɛn so na “wɔbɔɔ” Paulo ne n’ahokafo no “adapaa” wɔ Filipi? Sɛnea nhomanimfo bi kyerɛ no, Hela asɛmfua a Paulo de dii dwuma no kyerɛ atɛnnidi, animguase, anaasɛ atirimmɔdensɛm a wɔde dii wɔn. Filipifo no bɔɔ wɔn mmaa, de wɔn guu afiase, na wɔde wɔn bɔɔ dua mu. (Asomafo no Nnwuma 16:16-24) Ɔkwan bɛn so na asɛm a ɛyɛ yaw saa no kaa Paulo? So wɔn a wɔwɔ kurow a edi so, Tesalonika, a Paulo kɔɔ hɔ no huu no sɛ obi a ehu aka no? Dabi, ‘onyaa akokoduru.’ Odii ehu so, na ɔkɔɔ so de akokoduru kaa asɛm no.

¹⁷ Paulo akokoduru no fi he? N’ankasa ne mu? Dabi, ɔkae sɛ ‘ɔyɛɛ nnam yɛn Nyankopɔn din mu.’ Bible asekyerɛfo nhwehwɛmu nhoma bi ka sɛ ɛbɛyɛ sɛ wɔkyerɛɛ ase sɛ “Onyankopɔn yii ehu fii yɛn mu.” Enti sɛ wote nka sɛ aka wo akokoduru kakra wɔ wo som adwuma no mu, anaasɛ sɛ ne fã pɔtee bi hunahuna wo a, dɛn nti na wonka nkyerɛ Yehowa mma ɔnyɛ saa ara mma wo? Ka kyerɛ no sɛ onyi ehu no mfi wo mu. Ka kyerɛ no ma ɔmmoa wo mma wunnya akokoduru a wode bɛyɛ adwuma no. Afei nso, fa akwankyerɛ foforo a mfaso wɔ so nso di dwuma. Sɛ nhwɛso no, yɛ nhyehyɛe na wo ne obi a ne ho akokwaw wɔ adansedi adwuma a wotɔ mu sin no mu nyɛ adwuma. Ebetumi ayɛ asasesin a nnwuma wom, mmorɔn so adansedi, bɔnnɔ so asɛnka, anaa telefon so adansedi. Ebetumi aba sɛ nea wo ne no bɛyɛ adwuma no bɛpɛ sɛ ofi ase. Sɛ ɛba saa a, hwɛ na sua. Nanso, nya akokoduru fa sɔ hwɛ.

18. Sɛ yenya akokoduru de yɛ yɛn som adwuma no a, nhyira horow bɛn na yebetumi anya?

¹⁸ Sɛ wutumi nya akokoduru a, susuw nea ebetumi afi mu aba no ho hwɛ. Sɛ wokɔ so na sɛ w’abam ammu a, akyinnye biara nni ho sɛ wubenya nokware no ho asɛm a woka no mu suahu pii, osuahu ahorow a anka ɛbɛpa wo ti so. (Hwɛ kratafa 25.) Hu a wubehu sɛ woasɔ Yehowa ani denam biribi a na ɛyɛ wo den a woyɛe so no bɛma w’ani agye. Wubenya ne nhyira ne ne nkyɛn mmoa a wode bedi ehu a ɛhyɛ wo so no so. Wo gyidi mu bɛyɛ den. Nokwasɛm ne sɛ, wuntumi mmoa afoforo mma wɔnhyɛ wɔn gyidi den bere a saa bere no ara no, wonhyɛ w’ankasa wo de den.—Yuda 20, 21.

19. Akatua a ɛsom bo bɛn na ɛretwɛn ‘nnipa a wɔwɔ gyidi’ no?

¹⁹ Ɛmmra sɛ wobɛkɔ so ahyɛ wo ne afoforo a wɔbɛn wo no gyidi den. Wubetumi ayɛ saa denam Onyankopɔn Asɛm a wode bedi dwuma yiye de ahyɛ wo ne afoforo gyidi den, denam gyidi ho nhwɛso a ɛwɔ Bible mu a wobɛkyerɛkyerɛ mu yiye, denam Kristofo nhyiam horow a wubesiesie wo ho na woanya mu kyɛfa, ne baguam asɛnka hokwan a woanya a wubeso mu yiye no so. Bere a woyɛ eyinom no, nya awerɛhyem sɛ woka nnipa a ‘wɔwɔ gyidi’ no ho. Kae nso sɛ, saafo yi wɔ akatua a ɛsom bo. Wɔyɛ “wɔn a wogye di kɔ ɔkra nkwagye mu.”b Ɛmmra sɛ wo gyidi bɛkɔ so ayɛ den, na Yehowa Nyankopɔn nkora wo so daa!

[Ase hɔ nsɛm]

Wubebua Dɛn?

◻ Ɔkwan bɛn so na Paulo daa ahotoso a na ɔwɔ wɔ Hebrifo Kristofo no mu adi, na dɛn na yebetumi asua afi eyi mu?

◻ Dɛn nti na fa a Paulo faa odiyifo Habakuk asɛm kae no fata paa?

◻ Gyidi ho nhwɛso a ɛwɔ Kyerɛwnsɛm no mu bɛn na Paulo kyerɛkyerɛɛ mu?

◻ Akwan a wɔfa so hyɛ gyidi den a mfaso wɔ so bɛn na Paulo hyɛɛ ho nkuran?

[Kratafa 23 mfonini]

Bere a wɔbɔɔ Paulo adapaa wɔ Filipi wiei no, ɔhyɛɛ ne ho den toaa asɛnka adwuma no so

[Kratafa 24 mfonini ahorow]

So wubetumi ahyɛ wo ho den de asɔ adansedi afã foforo ahwɛ?