Gyidi​—Ɛyɛ Suban a Ɛhyɛ Yɛn Den

GYIDI wɔ tumi kɛse pa ara. Yehu sɛ Satan pɛ sɛ ɔsɛe yɛne Yehowa ntam, nanso gyidi nti ‘yetumi dum ɔbɔnefo no mmɛmma a ɛredɛw no nyinaa.’ (Efe. 6:16) Sɛ yɛwɔ gyidi a, ebetumi aboa yɛn ama yɛagyina ɔhaw akɛse a ɛte sɛ mmepɔw ano. Yesu ka kyerɛɛ n’asuafo sɛ: “Sɛ mowɔ gyidi a ne kɛse te sɛ sinapi aba mpo a, mobɛka akyerɛ bepɔw yi sɛ, ‘Tu fi ha kɔ do,’ na ebetu.” (Mat. 17:20) Esiane sɛ yenim sɛ gyidi betumi ama yɛne Yehowa abusuabɔ mu ayɛ den pa ara nti, ɛsɛ sɛ yebisa yɛn ho saa nsɛm yi: Dɛn ne gyidi? Nea ɛwɔ yɛn komam ka yɛn gyidi sɛn? Yɛbɛyɛ dɛn ahyɛ yɛn gyidi den? Hena na ɛsɛ sɛ yenya ne mu gyidi?​—Rom. 4:3.

Ɛnyɛ nea gyidi kyerɛ ara ne sɛ yebegye atom sɛ nea Bible ka yɛ nokware, efisɛ ‘adaemone mpo gye di sɛ Onyankopɔn wɔ hɔ na wɔn ho popo.’ (Yak. 2:19) Ɛnde, na dɛn ne gyidi?

Bible kyerɛkyerɛ sɛ gyidi wɔ afã mmienu. Nea edi kan, “gyidi ne awerɛhyem a yɛde twɛn biribi a yɛn ani da so.” (Heb. 11:1a) Sɛ wowɔ gyidi a, wugye tom pa ara sɛ asɛm biara a Yehowa aka yɛ nokware, na ɛbɛbam. Yɛnhwɛ asɛm a Yehowa ka kyerɛɛ Israelfo no. Ɔkaa sɛ: “Sɛ mubetumi asɛe me ne adekyee apam ne me ne adesae apam, na adekyee ne adesae amma wɔ bere ano a, ɛnde me nso metumi abu me ne m’akoa Dawid ntam apam no so.” (Yer. 33:20, 21) Ehu aka wo da sɛ ɛda bi bɛba a owia rempue anaa owia renkɔtɔ ma enti yɛrennya adekyee ne adesae? Sɛ wugye di pa ara sɛ abɔde mmara na ɛma asase kɔ so dannan ne ho na ɛma asase twa owia ho hyia a, ɛnde wohwɛ a, ɛsɛ sɛ w’adwenem yɛ wo nãã sɛ Ɔbɔadeɛ a ɔyɛɛ saa mmara no betumi adi ne bɔhyɛ so anaa? Dabi, ɛnsɛ sɛ w’adwenem yɛ wo nãã!​—Yes. 55:10, 11; Mat. 5:18.

Nea ɛto so mmienu, gyidi ne “nneɛma a yenhu ho adanse a ɛda adi pefee.” Bible kyerɛ sɛ gyidi yɛ nneɛma a aniwa nhu nanso ɛwɔ hɔ ho “adanse a ɛda adi pefee,” anaa adanse a edi mũ. (Heb. 11:1b) Dɛn na ɛkyerɛ saa? Yɛmfa no sɛ abofra bi abisa wo sɛ, ‘Dɛn na ɛma wuhu sɛ mframa wɔ hɔ?’ Ɛwom sɛ wunhuu mframa da de, nanso wubetumi de nneɛma bi a ɛkyerɛ sɛ mframa wɔ hɔ akyerɛkyerɛ abofra no ama wagye adi. Saa nneɛma no, ebi ne home a yɛhome, adwuma a mframa yɛ, ne nea ɛkeka ho. Sɛ abofra no nya gye adanse a wode kyerɛkyerɛɛ no no tom a, ɛma ohu sɛ biribi a ontumi mfa n’aniwa nhu nso wɔ hɔ ankasa. Saa ara na gyidi te; egyina adanse a edi mũ so.​—Rom. 1:20.

Esiane sɛ gyidi gyina adanse so nti, ɛsɛ sɛ obi di kan nya “nokware no ho nimdeɛ” na ama wanya gyidi. (1 Tim. 2:4) Nanso, nimdeɛ a obi benya nko ara nnɔɔso. Ɔsomafo Paulo kyerɛwee sɛ: “Koma na wɔde gye di.” (Rom. 10:10) Ɛsɛ sɛ obi gye nokware no di, na ɔma ɛsom bo ma no nso. Ɔyɛ saa a, ɛnna ɛbɛhyɛ no nkuran ama wanya gyidi, kyerɛ sɛ, ɛbɛma wayɛ nea ɛsɔ Onyankopɔn ani. (Yak. 2:20) Obi a onni nokware no ho anisɔ ankasa no, sɛ onya adanse a edi mũ mpo a, ɔmpɛ sɛ ogye tom na ɔsesa n’adwene wɔ nea ogye di dedaw ho, anaa ɔpɛ sɛ ɔyɛ nea ɔno ankasa pɛ. (2 Pet. 3:3, 4; Yuda 18) Wei nti, bere a na wɔrekyerɛw Bible no, nkurɔfo a wohuu anwonwade a ɛkɔɔ so no, ɛnyɛ wɔn nyinaa na wogye dii. (Num. 14:11; Yoh. 12:37) Nkurɔfo a wɔwɔ koma pa ma enti wɔpɛ nokware no, wɔn nko ara na Onyankopɔn honhom kronkron ma wonya gyidi.​—Gal. 5:22; 2 Tes. 2:10, 11.

Nkurɔfo a na wɔn gyidi yɛ den pa ara no, wɔn mu baako ne Ɔhene Dawid. (Heb. 11:32, 33) Nanso, ɛnyɛ obiara a ofi Dawid abusua mu na onyaa gyidi a ɛyɛ den saa. Wo de, yɛnhwɛ Eliab, Dawid nuabarima panyin pa ara no. Bere a Goliat twaa Israelfo mpoa na Dawid bo fuwii no, Eliab kaa Dawid anim. Saa a Eliab yɛe no kyerɛ sɛ na onni Yehowa mu gyidi. (1 Sam. 17:26-28) Wɔmfa gyidi nwo yɛn; saa ara nso na yennya gyidi mfi yɛn awofo hɔ. Enti, abusuabɔ a Dawid ankasa ne Onyankopɔn nyae na ɛma onyaa gyidi.

Dawid ma yehu nea ɛma onyaa gyidi a ɛyɛ den saa wɔ Dwom 27. (Dw. 27:1) Dawid dwinnwen nea na wafa mu ne nea na Yehowa de ayɛ ɔno Dawid atamfo ho. (Dw. 27:2, 3) Dawid ani sɔɔ nhyehyɛe a na wɔde som Yehowa wɔ ne ntamadan mu no pa ara. (Dw. 27:4) Dawid ne ne mfɛfo gyidifo boom som Onyankopɔn wɔ ntamadan no mu. (Dw. 27:6) Dawid bɔɔ mpae denneennen hwehwɛɛ Yehowa. (Dw. 27:7, 8) Afei nso, na Dawid pɛ sɛ Onyankopɔn kyerɛkyerɛ no n’akwan. (Dw. 27:11) Ná gyidi ho hia Dawid pa ara, enti ɔkaa sɛ: “Sɛ ɛnyɛ gyidi na minyae sɛ mehu Yehowa papayɛ wɔ ateasefo asase so a, anka mewɔ he?”​—Dw. 27:13, nwt-E.

Sɛ wunya suban a wɔaka ho asɛm wɔ Dwom 27 no bi a, gyidi a na Dawid wɔ no, wo nso wubenya bi. Esiane sɛ ɛsɛ sɛ wunya nokware nimdeɛ na ama woanya gyidi nti, sɛ wugye bere pii sua Onyankopɔn Asɛm ne Bible ho nhoma a asafo no yɛ a, ɛbɛyɛ mmerɛw ama wo sɛ wubenya gyidi a ɛyɛ Onyankopɔn honhom aba no fã no. (Dw. 1:2, 3) Sɛ woresua ade a, gye bere dwinnwen nea woresua no ho. Sɛnea dua nya dɔte pa a, enyin frɔmfrɔm no, saa ara na sɛ yedwinnwen nea yesua ho a, ɛma yenya anisɔ kɛse. Wunya anisɔ kɛse ma Yehowa a, w’ani begye pa ara sɛ wobɛsom no wɔ asafo nhyiam ase na woaka anidaso a wowɔ ho asɛm akyerɛ afoforo de akyerɛ sɛ wowɔ gyidi. (Heb. 10:23-25) Afei nso, sɛ yɛkɔ so ‘bɔ mpae daa na yɛampa abaw’ a, yɛda no adi sɛ yɛwɔ gyidi. (Luka 18:1-8) Enti, ‘nnyae mpaebɔ da,’ na nya awerɛhyem sɛ ‘Yehowa dwen wo ho.’ (1 Tes. 5:17; 1 Pet. 5:7) Gyidi na ɛma yɛyɛ nea ɛteɛ, na sɛ yɛyɛ nea ɛteɛ a, ɛhyɛ yɛn gyidi den pa ara.​—Yak. 2:22.

Anadwo a ade rebɛkye ama Yesu awu no, ɔka kyerɛɛ n’asuafo sɛ: “Munnya Onyankopɔn mu gyidi, munnya me nso me mu gyidi.” (Yoh. 14:1) Enti, ehia sɛ yenya Yehowa ne Yesu nyinaa mu gyidi. Wobɛyɛ dɛn atumi anya Yesu mu gyidi? Yɛnhwɛ akwan mmiɛnsa a wubetumi afa so ayɛ saa.

Nea edi kan, fa agyede no sɛ biribi a Onyankopɔn de akyɛ wo. Ɔsomafo Paulo kaa sɛ: ‘Ase a mete yi, mete no Onyankopɔn Ba a ɔdɔɔ me na ɔde ne ho too hɔ maa me no mu gyidi mu.’ (Gal. 2:20) Sɛ wunya Yesu mu gyidi a, ɛma wunya ahotoso pa ara sɛ agyede no betumi aboa wo, ɛma wunya bɔne fafiri, na ɛma wunya anidaso sɛ wubenya daa nkwa. Afei nso, ɛma wuhu pa ara sɛ Onyankopɔn dɔ wo. (Rom. 8:32, 38, 39; Efe. 1:7) Sɛ wugye di pa ara sɛ agyede no betumi aboa wo a, w’ahonim remmu wo fɔ, na ɛremma wunni awerɛhow.​—2 Tes. 2:16, 17.

Nea ɛto so mmienu, Yesu afɔrebɔ no nti, wubetumi abɔ Yehowa mpae na ama woabɛn no. Agyede no nti, yebetumi ‘de ahotoso’ abɔ Yehowa mpae ‘na yɛanya mmɔborɔhunu na yɛahu adom, na aboa yɛn wɔ bere a ɛsɛ mu.’ (Heb. 4:15, 16; 10:19-22) Yɛbɔ mpae a, ɛhyɛ yɛn den pa ara ma yetumi twe yɛn ho fi bɔne ho.​—Luka 22:40.

Nea ɛto so mmiɛnsa, tie Yesu. Ɔsomafo Yohane kyerɛwee sɛ: “Nea ogye Ɔba no di no wɔ daa nkwa; nea ontie Ɔba no renhu nkwa, na Onyankopɔn abufuhyew wɔ no so.” (Yoh. 3:36) Hyɛ no nsow sɛ, Yohane kyerɛe sɛ, sɛ obi nni Yesu mu gyidi a, ɛkyerɛ sɛ ontie no. Enti, sɛ wutie Yesu a, ɛkyerɛ sɛ wugye no di. Sɛ wudi “Kristo mmara no” so, kyerɛ sɛ, wode biribiara a ɔkyerɛkyerɛe ne ahyɛde a ɔde mae nyinaa yɛ adwuma a, ɛkyerɛ sɛ wutie Yesu. (Gal. 6:2) Sɛ wode akwankyerɛ a Yesu nam “akoa nokwafo ne ɔbadwemma” no so de ma yɛn no yɛ adwuma a, ɛno nso kyerɛ sɛ wutie Yesu. (Mat. 24:45) Sɛ wutie Yesu a, ɛbɛhyɛ wo den ama woatumi agyina ɔhaw ahorow a ɛyɛ hu te sɛ ahum ano.​—Luka 6:47, 48.

Bere bi, ɔbarima bi teɛɛm ka kyerɛɛ Yesu sɛ: “Mewɔ gyidi! Faako a mihia gyidi no boa me!” (Mar. 9:24) Ná ɔbarima no wɔ gyidi kakra, nanso esiane sɛ ɔbrɛ ne ho ase nti, ohui sɛ ehia sɛ onya gyidi kɛse. Yɛn mu biara behyia tebea ahorow bi wɔ yɛn asetena mu a ebehia sɛ yenya gyidi kɛse te sɛ ɔbarima yi. Yɛn nyinaa betumi ahyɛ yɛn gyidi den nnɛ. Sɛnea yɛahu no, sɛ yesua Onyankopɔn Asɛm dwinnwen ho a, ɛma yɛn gyidi yɛ den. Ɛba saa a, ɛbɛma yɛanya anisɔ kɛse ama Yehowa. Afei nso, sɛ yɛne yɛn nuanom Kristofo bom som Yehowa, yɛka anidaso a yɛwɔ ho asɛm kyerɛ afoforo, na yɛkɔ so bɔ mpae a, yɛn gyidi bɛyɛ den pa ara. Bio nso, sɛ yɛhyɛ yɛn gyidi den a, yenya akatua a ɛsõ sen biara. Onyankopɔn Asɛm ka kyerɛ yɛn sɛ: ‘Adɔfo, bere a morenyin wɔ mo gyidi kronkron mu no, momfa mo ho nsie Onyankopɔn dɔ mu.’​—Yuda 20, 21.