Abusuabɔ A Ɛsom Bo Mu Kura

“Mommɛn Onyankopɔn, na ɔbɛbɛn mo.​—Yak. 4:8.

1, 2. (a) Yehowa yɛ ɔmafo yamyefo wɔ ɔkwan bɛn so? (b) Asiane bɛn mu na nea ogye kyim no wɔ, na ɔkwan bɛn na ɔbɛfa so akwati eyi? (d) So gyidi betumi anyin anaa, na so ɛyɛ biribi a ɛkyɛn nea ɛkɔ so wɔ adwene mu nkutoo anaa?

YEHOWA yɛ ɔmafo yamyefo. Yɛatumi asua afi Luka nsɛm no mu dedaw sɛ Yehowa ma wɔn a wɔkɔ so kura mpaebɔ mu na wɔkɔ so wɛn no adesrɛ ho mmuae. Na wɔde honhom kaa Bible akyerɛwfo afoforo ma wɔde afotu a wotumi di ho dwuma a ɛfa nsɛm ahorow abien a edi nsɛ a ɛne mpaebɔ ne gyidi ho mae.

² Sɛ nhwɛso no, Yakobo kaee yɛn wɔ ne krataa no mfiase pɛɛ sɛ ‘yɛnkɔ so mmisa Nyankopɔn’ na ɔmma yɛn nimdeɛ a yebetumi de ahyia na yɛagyina sɔhwɛ horow ano. Ɔde afotu ne kɔkɔbɔ mmae sɛ: “Gyidi mu na ommisa, na onnnye biribiara ho kyim.” Nea ɔkɔ so gye kyim no ntumi nsi gyinae [Hela, “ɔkra nta”] ne ne nsa renka biribiara mfi Yehowa hɔ. Mmom, yɛpɛ sɛ yɛn gyidi no yɛ nea ekura su a Yakobo bɔɔ din no bi: “Mo gyidi a wɔasɔ ahwɛ yi de boasetɔ ba nti.” (Yak. 1:3-8)a Ɛwom sɛ, wɔ mfiase no wo gyidi renyɛ kɛse te sɛ Abraham de de, nanso ebetumi anyin na ɛsɛ sɛ ɛyɛ nokware bere nyinaa, ɛnsɛ sɛ ɛyɛ fa ne fa. Momma wɔnka mfa yɛn ho sɛnea Paulo kyerɛwee no: “Mo gyidi nyin boro so na mo nyinaa mmiako mmiako dɔ a mode dodɔ mo ho mo ho no mu adɔ.” Nokware gyidi nyɛ biribi a ɛkɔ so wɔ adwene mu nkutoo, na mmom sɛnea Paulo kyerɛwee no: ‘Ɛsɛ sɛ wode wo koma gye di.’ Ɛsɛ sɛ yenya nkanyan pa a nea ebefi mu aba no adwuma pa.​—Rom. 4:20; 10:9, 10; 2 Tes. 1:3.

 3. Nokwasɛm ahorow bɛn na wɔtwetwe yɛn adwene kɔ so wɔ Yakobo 4:7, 8 wɔ ntotoho mu?

³ Bere a Yakobo resi eyi so dua no, ɔkyerɛwee akyiri yi sɛ: “Monhohoro mo nsa, mo nnebɔneyɛfo, na montew mo komam.” Bere a ɔkɔɔ so kyerɛkyerɛɛ eyi mu no Yakobo de nsɛm bi totoo ho de bɔɔ nsɛm abira, sɛnea Yesu yɛe no, sɛnea ɛbɛyɛ na wama nokware a ehia a ɛsɛ sɛ osi so dua no aka wɔn adwene mu: “Enti momfa mo ho nhyɛ Onyankopɔn ase. Munsiw Ɔbonsam kwan na obeguan afi mo nkyɛn. Mommɛn Onyankopɔn, na ɔbɛbɛn mo.”​—Yak. 4:7, 8.

 4. (a) Sɛ́ yɛbɛtwe yɛn ho abɛn obi ho no hwehwɛ adeyɛ bɛn, na dɛn na ɛkanyan eyi yɛ? (b) So nsa ara kwa na Onyankopɔn to frɛ yɛn, na nhyehyɛe bɛn na wadi kan ayɛ dedaw na ayɛ mfaso ama yɛn nyinaa?

⁴ Nkuranhyɛ bɛn na eyi yɛ ma yɛn sɛɛ, sɛ yebesi gyinae wɔ ɔkwan a ɛteɛ so, na awiei no, ɔsrɛ bɛn no ofii komam srɛɛ yɛn sɛɛ! Obi betumi asi gyinae na wakɔ so akura biribi yɛ mu ɛsiane adwuma a onim sɛ ɛda ne so nti, nanso sɛ́ wobɛtwe wo ho abɛn obi ho no hwehwɛ biribi a emu dɔ kyɛn saa. Ɛsɛ sɛ ɛba fi koma no mu, a ɛka obi ma ɔde ne ho hyɛ biribi yɛ mu a wasiesie ne ho sɛ ɔbɛbɔ afɔre horow mpo sɛnea ɛbɛyɛ na ɔde akura saa abusuabɔ ankasa a ɔpɛ na onya mu anigye no mu. Hyɛ no nsow sɛ Yakobo anka sɛ sɛ yetwiw bɛn Onyankopɔn a, yebehu no sɛ ɔte hɔ retwɛn ayɛ yɛn atuu. Mmom, sɛ yɛbɔ mmɔden yɛ ade ankasa twiw bɛn Onyankopɔn a, ɔno nso bɛyɛ ne fam de saa ara. Ɔkwan bɛn na ɔfa so yɛ eyi? Wiɛ, wayɛ nhyɛɛ hyɛe pa ama yɛn dedaw a n’Asɛm ne n’akyɛde a ɛyɛ ne Ba no nso ka ho sɛ yɛn Gyefo, enti ebetumi ayɛ yiye sɛ adesamma abɔnefo a wɔnyɛ pɛ no betumi atwiw abɛn no. Saa nhyehyɛe ahorow yi wɔ hɔ ma obiara a ɔpɛ sɛ ɔfa so de di dwuma wɔ adwene a ɛteɛ a ɛyɛ nokware mu.

 5. Ɔkwan bɛn so na wotaa de Onyankopɔn nkoa a wɔahyira wɔn ho so ama no no di dwuma de boa wɔn a wɔpɛ sɛ ‘wotwiw bɛn Onyankopɔn’ no?

⁵ Nanso so Yehowa yɛ biribi pɔtee bi wɔ eyi mu? Dɛn ankasa na ɛyɛ ade biako a etumi kã nea ɔhwehwɛ nokware no koma na ɛtwe no? Nea ɛkyɛn nokware no ho nimdeɛ no, so anigye ankasa a nea wɔde no di dwuma sɛ Onyankopɔn somfo no yi no adi kyerɛ no nyɛ nea ɛka ho? (1 Kor. 3:5) Sɛ nea ɔhwehwɛ nokware no ba Yehowa Adansefo nhyiam nea edi kan a, ɔrente nea wɔka no ase pii, nanso adamfofa ne nokwaredi su a afoforo nyinaa yi no adi kyerɛ no nya ne so nkɛntɛnso pa, na nea ɛka eyi ho ne twe a wɔtwe adwene ba onii ko no so ne akwaaba a wɔma no. Wɔ eyi mu no ɔte nka sɛ, nea ohu, wɔ mmɔden a n’ankasa bɔ sɛ ɔbɛhwehwɛ nokware no ne nokware Mafo no akyi no, afei de Onyankopɔn ankasa retwe no abɛn ne ho. Bere a ɔkɔ so nya nkɔso no, onya Onyankopɔn akwankyerɛ ne nhyira mu osuahu ahorow, efisɛ Onyankopɔn de ma a “ahohora biara nnim.”​—Yak. 1:5.

 6. Ɔkwan bɛn nkutoo so na wɔfa ma eyi yɛ yɛ yiye, na dɛn na ɛsɛ sɛ wɔma ɛtra adwene mu?

⁶ Bere a wɔde nkakrankakra kyerɛ nea ɔhwehwɛ nokware no kwan no trenee mu no, otumi behu hokwan kɛse a wanya sɛ Yehowa de no bedi dwuma sɛ n’ananmusifo no mu biako na waboa afoforo nso. Nea etumi ma eyi yɛ yiye ne honhom a wohwie gu yɛn koma mu sɛnea ɛbɛyɛ na yɛayi honhom no aba no adi na yɛayi ɔdɔ a Onyankopɔn yi no adi kyerɛ no nso adi akyerɛ.​—Gal. 5:22, 23; 1 Yoh. 4:11.

MA W’ANI NNA WO HO SO, YƐ OBI A WUTUMI SI GYINAE

 7. Adwene a ɛwɔ Yakobo krataa no mu no kyere dɛn?

⁷ Na Yakobo rekyerɛw krataa akɔma Kristofo a woahyira wɔn ho so a wɔnam adwensakra kwan so no. Wɔatwe wɔn ho afi wɔn kan bɔne asetra no ho, na afei wɔahyira wɔn ho so koraa ama Yehowa a biribiara nka, sɛ́, efi saa bere no wɔbɛyɛ n’apɛde. Sɛnea adwene a ɛwɔ Yakobo krataa no akyi no ɛkyerɛ no, na nnipa pii ntra ase sɛnea wɔn ahosohyira no te. Wobuu wɔn ani guu hia a ehia sɛ wɔma saa abusuabɔ a ɛda wɔne Yehowa ntam no mu yɛ den na ɛyɛ nea eye no so.

 8. (a) Dɛn nti na wɔrentumi mmu abusuabɔ anaa ayɔnkobɔ sɛ ɛyɛ ade a ɛho nhia pii biara a wobɛtumi abu ani agu so? (b) Yakobo pɛ sɛ ɔboa wɔn a wɔsan akyi kɔ no wɔ dɛn mu?

⁸ Abusuabɔ anaa ayɔnkobɔ ntaa nyɛ nea etim faako a ɛnkɔ n’anim. Wontumi mmu ani ngu so sɛ saa ara na ɛte. Nea ɛyɛ ne sɛ enya nkɔso, ɛwom sɛ ɛyɛ brɛoo de, te sɛ dua, nanso ne ntini kɔ fam akyirikyiri, anaasɛ ɛsɛe na efi ase wu. N’aba ne ne nhaban nyinaa hu amane wɔ eyi nti. (Dw. 1:1-3) Ɛno ne asɛm a ɛtoo honam fam Israel man no. Na Yakobo ani abere sɛ ɔbɛkanyan saa honhom mu Israelfo a wɔresan wɔn akyi no ansa na ayɛ nea aka akyiri dodo. Enti ɔde tebea no sisii wɔn anim pefee, na ɔde nokware nyansa no totoo atoro nyansa no ho ma wohuu nyansa ahorow a ɛwɔ hɔ ne afei nso nea ɛfa adamfofa ho, sɛnea ɔkyerɛkyerɛɛ mu wɔ Yakobo 3:13-18 ne Yakobo 4:1-6 no. Ɛno na afei ɔfrɛɛ wɔn sɛnea yɛadi kan akenkan wɔ Yakobo 4:7, 8 no. Saa ara pɛpɛɛpɛ ne ɔkwan a Yehowa faa so too nsa frɛɛ honam fam Israel sɛnea yɛkenkan wɔn Yesaia 55:6, 7 ne Malaki 3:6, 7 no.

 9. (a) Ɔkwan a Ɔbonsam fa so toa nkurɔfo no mu biako ne nea ɛwɔ he, na ɔde eyi di dwuma wɔ nnɛ bere mu wɔ ɔkwan bɛn so? (b) Ɔkwan bɛn na Petro de afotu a ɛhyɛ nkuran mae wɔ eyi mu?

⁹ So tebea a ɛte saa ara wɔ hɔ nnɛ de kosi baabi? “Mmere a emu yɛ den” a wɔkaa ho asɛm siei no aba nnɛ na nsɛm mu reyɛ den bere nyinaa na asiane ahorow rebu ba nnipa nyinaa so wɔ baabiara, titiriw wɔ nokware Kristofo a wɔnam ‘ɔkwan hihiaa ne ɔkwan ketewaa a ɛde kɔ nkwa mu’ no so no. (Mat. 7:14; 2 Tim. 3:1-5) Akwan titiriw abien na Ɔbonsam fa so toa nkurɔfo. Ɛtɔ bere bi a, sɛnea Petro kyerɛwee no, na ɔnam sɛ “gyata a ɔbobom hwehwɛ nea obenya no amene,” wɔ bere a wahyɛ yɛn ho hu ama yɛaman afi saa ɔkwan no so no. (1 Pet. 5:8) Ɔma tebea a eyi nnipa ho hu ba, ebia wɔ ɔman mu no mu anaasɛ wɔ nnipa nkorɛnkorɛ so, a atirimpɔw a okura ne sɛ ɔbɛhyɛ yɛn na yɛagyaa nsɛm mu de asiesie, anaasɛ sɛ ɛbɛyɛ yiye a yɛagyaa yɛn Kristofo ahonim ne Bible mu nnyinasosɛm a yekura mu no mu koraa agu hɔ. Asiane betumi aba yɛn da biara da asetra, ne yɛn nkwa ankasa so wɔ nsɛm a ɛfa adwumayɛ anaasɛ ɔman mu nsɛm a yɛmfa yɛn ho nhyɛ mu no nti. Sɛnea yɛadi kan abɔ din no, ɛha na ehia sɛ yɛkɔ so bɔ mpae hwehwɛ nyansa na yɛatumi de ahu na yɛanya ahoɔden a yebetumi de saa Bible mu nnyinasosɛm no adi dwuma. Ɛno nti na Petro kɔɔ so hyɛɛ nkuran sɛ: “Ɔno [Ɔbonsam] na momfa gyidi nnyina hɔ pintinn nsiw no kwan, . . . sɛ munya hu amane kakra ansa a, obesiesie mo pɛ, ɔbɛma mo ase atim, ɔbɛhyɛ mo den, ɔbɛma moanya nnyinaso.”​—1 Pet. 5:9, 10.

10, 11. (a) Ɔkwan foforo bɛn na Satan de di dwuma, na eyi ho nhwɛso a ɛwɔ hɔ nnɛ ne nea ɛwɔ he, na asiane bɛn na ɛde obi kɔ mu? (b) Enti ɔkwan bɛn na ɛsɛ sɛ yɛfa so ma yɛn ani da yɛn ho so na yɛasi gyinae?

¹⁰ Ɔkwan foforo a Ɔbonsam fa so toa nnipa ne sɛ ɔbɛyɛ saa wɔ anifere so. Satan nso kɔ so “‘dan ne ho yɛ sɛ hann bɔfo.” Afei nso odi dwuma te sɛ ɔwɔ, ɛnyɛ sɛ obeyi nkurɔfo ho hu, na mmom sɛ ɔbɛdaadaa wɔn asɛe wɔn adwene “sɛnea ɔwɔ no de n’anitew bɛdaadaa Hawa no.” (2 Kor. 11:3, 14) Nea edi ɔkwan a ɔfa so yɛ ade no ho adanse ne sɛ, ade biako bi wɔ hɔ a Satan nim sɛ ɔmpɛ sɛ wuhu, na ɛno ne sɛ ne bere yɛ tiaa. Esiane nea efii ɔko a ɛbae wɔ ɔsoro no mu bae a ɛde Mesia ahenni no awo bae wɔ 1914 Y.B. mu nti, nea ɛbaa drako kɛse no so ne sɛ, ‘wɔtow no kyenee asase so na wafa abufuw kɛse, efisɛ onim sɛ ne bere a ɔwɔ yɛ tiaa.’ (Adi. 12:1-12) Sɛ obetumi adaadaa, titiriw no, “nkae a wodi Onyankopɔn ahyɛde so na wokura Yesu Kristo adanse no” mu no Sɛ “awiei bere” no koraa mpo nyɛ nea abɛn na ɛwɔ akyirikyiri koraa a, ɛnde na wadi ɔko no fã mu nkonim dedaw. (Adi. 12:17) Bebree beyi wɔn adwene afi hia a bere no ho hia no so na wɔrenwɛn bio. Yebetumi de yɛn ho ahyɛ da biara da asetra mu adwuma mu koraa. Enti eyi mu na ɛsɛ sɛ yesua hu ɔkwan a yɛbɛfa so ahwɛ ade wɔ Yehowa kwan so na yɛahu ɔkwan a ɔfa so bu bere, na yɛama Petro nsɛm yi atra yɛn adwene mu: “Nanso ade nyinaa awiei abɛn. Enti momma mo adwene mu ntew, na mo ani nna hɔ mma mpaebɔ.”​—1 Pet. 4:7; 2 Pet. 3:8, 9.

¹¹ Bible akyerɛwfo baanu a wɔyɛ Yakobo ne Petro nyinaa kaa pii a ɛboa yɛn na ɛhyɛ yɛn nkuran na ɛma yɛn ani da yɛn ho so na yɛatumi asi gyinae wɔ ɔkwan a ɛteɛ so, na yɛanya koma pa, na yɛde yɛn ho ahyɛ mpaebɔ ne gyidi mu.

MOMMƆ MPAE MMA WƆN A BIRIBI HO AHIA WƆN NO

12. (a) Ɔkwan bɛn so na awiei no Yakobo kyerɛkyerɛɛ asɛm a ɛfa mpaebɔ ho no mu? (b) Ɔkwan bɛn na wɔfa so boa ahwɛfo ne wɔn a biribi ho hia wɔn no nyinaa?

¹² Yakobo krataa no awiei pɛ na ɔkaa mpae a wɔbɔ wɔ gyidi mu no ho asɛm bio wɔ ɔkwan foforo so. Wɔ tebea biara a obi behu ne ho wɔ mu mu no, sɛ́ ‘ɔrehu amane’ anaasɛ ‘obi bo atɔ ne yam’ no, wɔ ne nyinaa mu no, ɛsɛ sɛ yɛba Onyankopɔn anim wɔ mpaebɔ mu anaasɛ wɔ ayeyi mu. Ɛno na afei ɔkaa mpae a wɔbɛbɔ ama wɔn a ahia wɔn no ho asɛm. Nea wɔka kyerɛɛ obi a ɔyare a ɛda adi sɛ ɔrehu amane wɔ honhom mu na akã no wɔ adwene ne nkate mu no ni: “Ɔmfrɛ asafo no mu mpanyimfo, na wɔmmɛbɔ no so mpae.” Eyi ankasa kyerɛ gyidi wɔ onii ko no fam, na ɛkyerɛ sɛ onim faako a ɛsɛ sɛ ɔkɔ ma mmoa. Obi mfrɛ oduruyɛfo gye sɛ ɔwɔ oduruyɛfo no mu gyidi bi. Afei hwɛ mfaso pa a ɛba fi ɔkwan a wɔfa so yɛ ade a ɛte sɛɛ mu ba no: “Na gyidi mpaebɔ begye ɔyarefo no nkwa, na Awurade [Yehowa] bɛma no so, na sɛ wayɛ bɔne bi a wɔde befiri no.” (Yak. 5:13-15) Ɛda adi pefee sɛ eyi de akwankyerɛ pa ma wɔn a biribi ahia wɔn no ne mpanyinfo no nyinaa a ɛsɛ sɛ wosiesie wɔn ho bere nyinaa sɛ wobefi wɔn pɛ mu de saa nneɛma a ehia no ama no.

13. Ɔkwan bɛn so na Yakobo de Elia dii dwuma sɛ nhwɛso kɛse wɔ eyi mu?

¹³ Yakobo trɛw saa asɛm yi mu bio na bere a ɔrekasa a ahwɛfo ne anuanom mpanyimfo a wɔanyinyin wɔ honhom nni no ho asɛm wɔ n’adwene mu no, ɔkae sɛ “onipa trenee adesrɛ a emu yɛ den tumi yɛ bebree.” Bere a ɔde asɛm bi regyina eyi akyi no, ɔfaa Elia mpaebɔ no de yɛɛ nhwɛso sɛ wɔmaa ho mmuae, nea edi kan no, sɛ, “osu nntɔ,” na eyi baa saa mfirihyia abiɛsa ne asram asia, na ɔbɔɔ mpae bio na ɔsoro tɔɔ osu. Elia nyɛ onipa a ɔkyɛn ɔdesani. Ɔyɛ “onipa te sɛ yɛn ara.”​—Yak. 5:16-18.

14. Ɔkwan bɛn na Yakobo faa so de nkuranhyɛ foforo mae sɛ nsɛm a etwa to?

¹⁴ Awiei no, bere a ɔde nkuranhyɛ rema bio sɛ wɔmma wɔn ani nna wɔn ho so na sɛ ehia a wɔaboa wɔn a wɔredaadaa wɔn na ‘wɔafom afi nokware no ho’ no, ɔkae sɛ obiara a “ɔdan ɔdebɔneyɛfo fi ne mfomso kwan so no, obegye ɔkra afi owu mu, na wakata bɔne pii so.” (Yak. 5:19, 20) Awiei nsɛm a awerɛkyekye pii wom bɛn ni! Hwɛ sɛnea ɛte sɛ ɔkwan a Yehowa ankasa faa so kyerɛkyerɛɛ sɛnea ɔte no mu no​—“Onyankopɔn mmɔborohunufo ne ɔdomfoɔ, nea n’abodwo kyɛ na n’adɔeyɛ ne ne nokware dɔɔso pii . . . na ɔde amumɔyɛ ne mmarato firi.”​—Ex. 34:6, 7.

15. Akwan horow abien bɛn na Yuda bɔɔ din sɛ wobetumi afa so aboa wɔn a biribi ho ahia wɔn no nso?

¹⁵ Nea ɛyɛ anigye nso ne sɛ Yuda de ne krataa no baa awiei wɔ ɔkwan a ɛte saa ara so na ɔkaa asɛm sɛ “momfa mo ho nsi mo gyidi kronkron no so mmɔ mpae honhom kronkron mu.” Ɔno nso sii sɛnea ehia sɛ wɔboa wɔn a biribi hia wɔn no wɔ ayamye mu ne afei nso wɔ ɔkwan a wɔde ntɛmpɛ bɛyɛ so dua: “Na akyinnyegyefo nso, munhu wɔn mmɔbɔ, ebinom nso munhwim wɔm mfi gya mu nnye wɔn nkwa, na ebinom nso momfa osuro nhu wɔn mmɔbɔ, na montan atade a ɔhonam nkekae akeka mu nso.” (Yuda 20-23) Ɛha nso na wɔretu wɔn a wɔanyinyin wɔ honhom mu no fo bio. Sɛ munim ebinom a wɔn adwenem yɛ wɔn naa anaa wɔyɛ akyinnyegyefo anaasɛ wɔn a wɔawatiriw akɔhwe adebɔneyɛ mu a, monnyɛ ntɛm mmmu wɔn animtiaa, na mmom munhwim wɔn mfi ogya no mu, sɛ ebetumi ayɛ yiye a, na monhwɛ nso na ogya no anhyehye mo ankasa anaasɛ nkekae bi ankeka mo ho wɔ ɔkwan bi so.

‘MONHWƐ YIYE . . . MUNSUSUW HO YIYE’

16, 17. (a) Dɛn so na Paulo gyina de nsɛm totoo ho wɔ Hebrifo nhoma no mu, na ɔde nsɛm no baa awiei dɛn?

¹⁶ Wɔde ɔsomafo Paulo dii dwuma sɛ nea ɔkyerɛw Kristofo Hela Kyerɛwnsɛm no mu nkrataa no mu nea ɛdɔɔso. Ne krataa a ɔkyerɛw kɔmaa Hebri Kristofo no de mmoa ne akwankyerɛ ankasa mae a ebetumi ama wɔanya nokware gyidi a emu yɛ den, a ɛde abusuabɔ a ɛbɛn ho pɛɛ bɛba wɔne Yehowa ne Kristo Yesu ntam.

¹⁷ Enti na ɛyɛ nea ntease wom sɛ krataa a Paulo kyerɛwee a yɛadi kan aka ho asɛm no mu no ɔde Yudafo a wɔka bom yɛ honam fam Israel too Yudafo a wɔbɛyɛɛ Kristofo asafo no mufo a wodi kan a wɔyɛ honhom mu Israel a akyiri no wɔde Amanaman mufo bɛkaa wɔn ho no ho. Paulo gyinaa saa ntotoho yi so kyerɛɛ sɛnea Hebri Kristofo no nyaa hokwan ahorow pii mu anigye kyɛn honam fam Israel, na eyi nso de asɛyɛde akɛse bae. Nokware Kristofo a wɔwɔ hɔ nnɛ nyinaa, a asetra mu tebea a wɔwɔ mu mfa ho betumi de saa nneɛma yi ato wɔn ankasa ho na wɔanya mfaso afi mu.

18. Kɔkɔbɔ a ɛfa wɔn a wɔpow nea ɔkasa no ho bɛn na wɔde ama wɔ saa krataa yi mu, na wɔde eyi gyinaa dɛn so wɔ Israel abakɔsɛm mu?

¹⁸ Na Paulo adi kan de nkyerɛkyerɛmu ama sɛ, sɛ asɛm a wɔfaa abɔfo so kae bere a na wɔde Mmara no rema Israel no yɛ nea wɔde obu kɛse dii ho dwuma a, “yɛn nso sɛ yɛammu nkwagye kɛse a ɛte sɛɛ yi a, yebeguan afi mu dɛn“?” (Heb. 2:1-3; Gal. 3:19) Ɔde kɔkɔbɔ a ɛte saa ara mae wɔ ne krataa no awiei. Bere a waka nea esii wɔ Sinai Bepɔw no so no ho asɛm akyi no, Paulo kyerɛwee sɛ: “Na sɛ wɔn a wɔpoo nea ɔkasae asase so no anguan a, yɛn mmom na sɛ yɛdan fi nea ofi soro kasa no ho a, yɛrenguan.”​—Heb. 12:25.

19. Enti, nsɛm a ɛboa kɛse bɛn na wɔaka ho asɛm wɔ Hebrifo 3:12-15; 12:25-29?

¹⁹ Ɛha na ɛsɛ sɛ yɛn gyidi da nokware a ɛyɛ no adi sɛnea ɛbɛyɛ na ayɛ nea wɔasɔ ahwɛ ampa sɛnea wɔhwehwɛ no. Eyi fa koma no ho. Bere a Paulo afa asɛm a Onyankopɔn ka faa Israel ho no so aka asɛm sɛ “wɔfom so daa wɔ wɔn komam” no, ɔde kɔkɔbɔ a emu yɛ den yi mae na ayɛ mfaso ama yɛn: “Monhwɛ yiye, anuanom, na koma bɔne a ennye nni amma mo mu biara mu, na wanwae amfi Nyankopɔn teasefo [no] ho.” Yɛrentumi nnyina faako. Sɛ ‘yɛammɛn Nyankopɔn’ wɔ gyidi a ɛkɔ so nyin bere biara mu, bere a yehu no na yɛn ani sɔ no bere nyinaa no a, ɛnde na ɛsɛ sɛ yɛhwɛ yiye na “‘bɔne nnaadaa ampirim mo mu biara koma,” na yɛamfi ase antwe yɛn ho ankɔ a yennim nea ɛbɛto yɛn. Ɛsɛ sɛ yɛboa yɛn ho yɛn ho wɔ eyi mu, na yɛkɔ so “tutu yɛn ho yɛn ho fo da biara da.” Sɛ “yeso mu pintinn kosi ase” a, ɛno ansa na yebetumi adi nkonim. Ɛsɛ ɛsɛ yɛkɔ so kura saa ahotoso a etim hɔ pintinn yi mu, saa gyidi a enhinhim yi mu, na yɛn nsa atumi aka “ahenni a ɛnwosow” no ne emu nhyira horow no.​—Heb. 3:10-14; 12:28.

20. Wɔ gyidi so dua a esi no akyi no, ɔkwan bɛn so na Paulo hyɛ yɛn nkuran wɔ mpaebɔ ho wɔ ne krataa no mu?

²⁰ Afei nso Paulo hyɛɛ yɛn nkuran faa mpaebɔ ho sɛ, yɛn “nhwɛ gyidi mu dikanfo ne ne wiefo Yesu . . . munsusuw nea ɔtɔɔ no bo ase tiee ntuatuaano a nnebɔneyɛfo de tuaa n’ano bebree no ho yiye, na moammrɛ, na mo kra antɔ piti.” Esiane nea ɔfaa mu yi nyinaa nti, obetumi ahu ama yɛn, wɔ yɛn mmerɛwyɛ ahorow no mu, ɛwom sɛ n’ankasa de onni bɔne de, na yebetumi afa no so abɛn “ɔdom ahengua no” na yɛn nsa aka mmoa wɔ ɛbere a ɛsɛ mu.​—Heb. 4:15, 16; 12:2, 3.

21. Ɛhefa ne ɔkwan bɛn so na Paulo fa de mpaebɔ tõa “akode” a Onyankopɔn de ma no mu na ɛde nsɛm no ba awiei dɛn?

²¹ Awiei no, Paulo kyerɛw kɔmaa Efesofo no sɛ wɔmma ɛntra wɔn adwene mu sɛ ‘mpaebɔ ne ade a wɔbɛsrɛ wɔ honhom mu’ no yɛ nea wɔde atoa “Onyankopɔn akode no nyinaa” a wɔbɛhyɛ no mu. Na saa ara nso na ɛsɛ sɛ yɛbɔ mpae ma yɛn ankasa ho ne afoforo nso sɛnea Paulo yɛe no sɛnea ɛbɛyɛ na yɛanya hokwan de ‘aka asɛm ayi asɛmpa no ahintasɛm adi akyerɛ wɔ akokoduru nyinaa mu.’​—Efe. 6:10-20.

[Ase hɔ nsɛm]