Yehowa Wɔ Ntease!

“Nyansa a efi soro no . . . [wɔ ntease, NW].”—YAKOBO 3:17.

 1. Ɔkwan bɛn so na ebinom ada Onyankopɔn adi sɛ obi a onni afoforo ho ntease, na wote nka dɛn wɔ Onyankopɔn ho adwene a ɛtete saa ho?

ONYANKOPƆN bɛn na wosom no? So wugye di sɛ ɔyɛ Onyankopɔn a ɔyɛ katee a ɔmfa bɔne nkyɛ, na ɔnsakra n’adwene wɔ biribiara ho? Ebia saa na na Protestantni ɔsesɛwfo John Calvin bu Onyankopɔn. Calvin kyerɛe sɛ Onyankopɔn wɔ “daa nhyehyɛe bi a ɛnsakra” ma ankorankoro biara, na wahyehyɛ obiara hyɛbea ato hɔ, sɛ́ ɔde anigye bɛtra ase daa anaa wɔbɛyɛ no ayayade daa wɔ hellgya mu. Susuw ho hwɛ: Sɛ eyi yɛ nokware a, anka ɛmfa ho mmɔden biara a wobɛbɔ no, biribiara nni hɔ a wubetumi ayɛ de asakra nea Onyankopɔn ahyɛ ato hɔ katee dedaw sɛ ɛbɛba wo so daakye no. So w’ani begye Onyankopɔn a ɔnte afoforo ase saa ho?—Fa toto Yakobo 4:8 ho.

2, 3. (a) Ɔkwan bɛn so na yebetumi akyerɛkyerɛ sɛnea nnipa ahyehyɛde ahorow nnya afoforo ho ntease no mu? (b) Ɔkwan bɛn so na Yehowa soro teaseɛnam ho anisoadehu a Hesekiel nyae no da no adi sɛ Ɔyɛ fakaa?

² Hwɛ abotɔyam ara a yɛwɔ sɛ yɛasua ahu sɛ Bible no Nyankopɔn wɔ ntease! Ɛnyɛ Onyankopɔn, na mmom nnipa na wɔtaa yɛ katee a wonnyae nsɛm mu mma ɛnka, esiane wɔn ankasa sintɔ nti. Nnipa ahyehyɛde ahorow sodi betumi ayɛ den te sɛ keteke a wɔde fa nneɛma. Sɛ keteke kɛse a wɔde fa nneɛma rekɔpem biribi a, biribiara nni hɔ a ebetumi ama adan n’ani akyerɛ baabi foforo, na saa ara nso na ɛyɛ den sɛ ebegyina. Keteke ahorow bi mu yɛ duru araa ma sɛ wogyina no a etumi kɔ bɛboro kilomita biako ansa na agyina! Saa ara na sɛ wodum po so hyɛn kɛse bi engine a ebetumi atwa bɛyɛ kilomita 8 aka ho ansa na agyina. Sɛ wɔde to baabi a ɛma ɛkɔ n’akyi no mpo a ebetumi akɔ n’anim wɔ nsu no mu kilomita 3 aka ho! Na afei susuw afiri a ɛkorɔn koraa sen abien yi nyinaa, nea egyina hɔ ma Onyankopɔn ahyehyɛde no ho.

³ Bɛboro mfe 2,600 ni no, Yehowa maa Hesekiel nyaa anisoadehu bi a na ɛyɛ Ne soro ahyehyɛde a ahonhom abɔde na wɔwom no ho mfonini. Ná ɛyɛ teaseɛnam a ɛso ma ɛyɛ hu, Yehowa ankasa “afiri” a ɔkyerɛ no kwan bere nyinaa. Nea ɛyɛ anigye sen biara ne ɔkwan a ɛfa so kɔ no. Ná ne ntwahonan akɛse no biara ani hwɛ mmeae anan, na aniwa atwa ho ahyia ma enti etumi hu baabiara na etumi dan n’ani kyerɛ baabi foforo prɛko pɛ, a ɛho nhia sɛ egyina anaa ɛdan ne ho. Ná saa afiri kɛse yi nweawea te sɛ po so hyɛn kɛse anaa keteke bi a wɔde fa nneɛma. Ná etumi kɔ mmirika te sɛ anyinam, na etumi mpo dan n’ani kyerɛ benkum anaa nifa prɛko pɛ! (Hesekiel 1:1, 14-28) Yehowa nte sɛ Onyankopɔn a Calvin kaa ne ho asɛm no, na saa ara na Ne teaseɛnam no nso nte sɛ mfiri a ɛtɔ sin a nnipa ayeyɛ no. Odi mũ wɔ fakaayɛ mu. Ɛsɛ sɛ Yehowa su yi ho anisɔ boa yɛn ma yɛkɔ so yɛ fakaa na yɛkwati asiane a ɛbɛma yɛayɛ katee no.

Yehowa—Nea Ɔyɛ Fakaa Sen Biara wɔ Amansan yi Mu

 4. (a) Ɔkwan bɛn so na Yehowa din ankasa da no adi sɛ ɔyɛ Onyankopɔn a ɔyɛ fakaa? (b) Dɛn ne abodin ahorow bi a wɔde frɛ Yehowa Nyankopɔn, na dɛn nti na ɛfata?

⁴ Yehowa din ankasa da no adi sɛ ɔyɛ fakaa. Nea “Yehowa” kyerɛ ankasa ne sɛ “Ɔma Ɛbam.” Ɛda adi sɛ eyi kyerɛ sɛ Yehowa ankasa ne Obi a ɔma ne bɔhyɛ ahorow nyinaa bam. Bere a Mose bisaa Onyankopɔn ne din no, Yehowa kaa n’asekyerɛ ho asɛm sɛɛ: “Mɛyɛ me ho sɛnea mɛyɛ.” (Exodus 3:14, New World Translation.) Rotherham nkyerɛase no ka no fann sɛ: “Mɛyɛ Me ho sɛnea mepɛ biara.” Yehowa yɛ ne ho anaa ɔpaw sɛ ɔbɛyɛ nea ehia sɛ ɔyɛ biara na ɔde ama n’atirimpɔw ne ne bɔhyɛ ahorow anya mmamu. Enti, ɔwɔ abodin akɛse pii te sɛ Ɔbɔadeɛ, Agya, Amansan Hene, Oguanhwɛfo, Asafo Yehowa, Mpaebɔ tiefo, Ɔtemmufo, Ɔkyerɛkyerɛfo Kunini, Odimafo. Wayɛ eyinom nyinaa ne afoforo pii na ama wadi n’atirimpɔw ahorow a ɔdɔ wom no ho dwuma.—Yesaia 8:13; 30:20; 40:28; 41:14; Dwom 23:1; 65:2; 73:28; 89:26; Atemmufo 11:27; hwɛ NW, “Appendix 1J.”

 5. Dɛn nti na ɛnsɛ sɛ yɛka sɛ fakaa a Yehowa yɛ no kyerɛ sɛ ɔsakra ne su anaa ne gyinapɛn ahorow?

⁵ Nanso, so eyi kyerɛ sɛ Onyankopɔn su anaa ne gyinapɛn ahorow sakra? Dabi; sɛnea Yakobo 1:17 ka no, “nsakrae ne adannan sunsuma nni ne mu.” So eyi yɛ abirabɔ? Ɛnte saa koraa. Sɛ́ nhwɛso no, ɔwofo a ɔwɔ ɔdɔ bɛn na onni asɛyɛde a egu ahorow ho dwuma mfa mmoa ne mma? Da koro pɛ, ɔwofo betumi ayɛ ɔfotufo, oduannoafo, ofisiesiefo, tikyani, obi a ɔde nteɛso ma, adamfo, ofiriyɛfo, ɔyarehwɛfo—yebetumi abobɔ nneɛma pii din. Ɔwofo no nsakra ne nipasu bere a ɔredi saa asɛyɛde ahorow yi ho dwuma; nea ɔyɛ ara ne sɛ ɔdan kɔ tebea a ɛho hia sɛ odi ho dwuma no so. Saa na Yehowa te, na mmom ne de no korɔn sen saa koraa. Asɛyɛde ahorow a obetumi afa ato ne ho so adi ho dwuma no nni ano. Sɛnea ne nyansa mu dɔ no yɛ ahodwiriw ampa!—Romafo 11:33.

Ntease a Obi Wɔ Kyerɛ Ɔsoro Nyansa

 6. Hela asɛmfua a Yakobo de kaa ɔsoro nyansa ho asɛm no kyerɛ dɛn ankasa, na dɛn na ɛda no adi?

⁶ Osuani Yakobo de asɛmfua bi a ɛyɛ anika dii dwuma de kaa Onyankopɔn a ɔyɛ fakaa kɛse yi nyansa ho asɛm. Ɔkyerɛwee sɛ: “Nyansa a efi soro no . . . [wɔ ntease].” (Yakobo 3:17) Hela asɛmfua (e·pi·ei·kesʹ) a wɔde dii dwuma wɔ ha no asekyerɛ yɛ den. Nsɛm asekyerɛfo kyerɛ ase “odwo,” “mmɔborohunu,” “boasetɔ,” ne “tema.” New World Translation no kyerɛ ase sɛ “ɛwɔ ntease,” na n’ase hɔ asɛm bi kyerɛ sɛ nea ɛkyerɛ ankasa ne sɛ “egyae nsɛm mu ma ɛka.”a Ntease foforo nso a asɛmfua no kura ne sɛ wɔnhyɛ nkurɔfo sɛ wonni ahyɛde ahorow a wɔakyerɛw ato hɔ so frenkyemm bere a wobu wɔn ani gu nnyinasosɛm a ɛwɔ akyi so, katee a obi nyɛ anaa hyɛ a ɔnhyɛ afoforo so wɔ ɔkwan a ɛnsɛ so. Nhomanimfo William Barclay ka wɔ New Testament Words mu sɛ: “Ade titiriw a ɛwɔ epieikeia [ntease] ho ne sɛ ɛyɛ Onyankopɔn su. Sɛ Onyankopɔn hyɛe sɛ ɔpɛ biribiara frenkyemm, anaa Onyankopɔn gyinaa mmara mu gyinapɛn ahorow nkutoo so katee ne yɛn dii nsɛm pɛpɛɛpɛ a, anka yɛwɔ he? Onyankopɔn na ɔyɛ nhwɛso a ɛkyɛn so sɛ obi a ɔyɛ epieikēs na ɔne afoforo di wɔ epieikeia kwan so.”

 7. Ɔkwan bɛn so na Yehowa daa ntease adi wɔ Eden turo mu?

⁷ Susuw bere a adesamma tew atua tiaa Yehowa amansan tumidi no ho. Hwɛ sɛnea anka ɛbɛyɛ mmerɛw sɛ Onyankopɔn bɛsɛe atuatewfo baasa a wɔyɛ bonniayɛ—Adam, Hawa, ne Satan! Hwɛ ɛyawdi ara a anka ɔnam saayɛ so betumi akwati! Na hena na obetumi agye akyinnye sɛ na onni hokwan sɛ ɔde atɛntrenee a emu yɛ den saa di dwuma? Nanso, Yehowa mfaa atɛntrenee ho gyinapɛn katee bi nkyekyeree n’ahyehyɛde a ɛte sɛ teaseɛnam no da. Enti saa teaseɛnam no ansɛe nnipa abusua no ne adesamma daakye anigye ho anidaso nyinaa, a wontumi nyɛ ho hwee. Mmom no, Yehowa danee ani kyerɛɛ baabi foforo wɔ anyinam ahoɔhare so. Atuatew no akyi pɛɛ no, Yehowa Nyankopɔn yɛɛ atirimpɔw bi a na ɛbɛbam daakye ho nsiesie a ɛde mmɔborohunu ne anidaso bɛbrɛ Adam asefo nyinaa.—Genesis 3:15.

 8. (a) Ɔkwan bɛn so na adwene a ɛnteɛ a Kristoman wɔ wɔ ntease ho no ne nokware ntease a Yehowa wɔ no bɔ abira? (b) Dɛn nti na yebetumi aka sɛ afoforo ho ntease a Yehowa wɔ no nkyerɛ sɛ ɔbɛgow ɔsoro nnyinasosɛm mu?

⁸ Nanso, afoforo ho ntease a Yehowa wɔ no nkyerɛ sɛ ɔbɛgow ɔsoro nnyinasosɛm ahorow mu. Ebia ɛnnɛyi Kristoman asɔre ahorow no besusuw sɛ wɔwɔ ntease bere a wobu wɔn ani gu ɔbrasɛe so sɛnea ɛbɛyɛ a wobenya wɔn nguan a wɔnam asetra kwan a ɛnteɛ so no anim dom no. (Fa toto 2 Timoteo 4:3 ho.) Yehowa mmu n’ankasa ne mmara ahorow so, na ɔngow ne nnyinasosɛm ahorow nso mu. Mmom no, onya ɔpɛ sɛ obegyae nsɛm mu ma aka na wayɛ fakaa, na ɔyɛ nsakrae ma ɛne tebea no hyia, na ama watumi afi mmɔborohunu mu de saa nnyinasosɛm ahorow no adi dwuma wɔ trenee kwan so. Bere nyinaa ɔhwɛ hu sɛ trenee ne tumidi a ɔde di dwuma no mmunkam ne dɔ ne ne nhumu a nyansa wom no so. Momma yɛnhwɛ akwan abiɛsa a Yehowa fa so da ntease a ɔwɔ adi.

‘Ɔwɔ Ɔpɛ sɛ Ɔde Befiri’

9, 10. (a) Abusuabɔ bɛn na ɛda ‘ɔpɛ a obi wɔ sɛ ɔde befiri’ ne ntease a ɔwɔ ntam? (b) Ɔkwan bɛn so na Dawid nyaa mfaso fii ɔpɛ a Yehowa wɔ sɛ ɔde befiri no mu, na dɛn ntia?

⁹ Dawid kyerɛwee sɛ: “Na wo, [Yehowa], wuye, na wode firi, na w’adɔe dɔɔso ma wɔn a wɔfrɛ wo nyinaa.” (Dwom 86:5) Bere a wɔrekyerɛ Hebri Kyerɛwnsɛm no ase akɔ Hela kasa mu wɔ Septuagint nkyerɛase no mu no, wɔkyerɛɛ asɛmfua a wonyaa asɛm “wode firi” fii mu no ase sɛ e·pi·ei·kesʹ, anaa “wowɔ ntease.” Nokwarem no, ebia ɔkwan titiriw a obi betumi afa so akyerɛ sɛ ɔwɔ ntease ne sɛ obenya ɔpɛ sɛ ɔde befiri na wada mmɔborohunu adi.

¹⁰ Ná Dawid ankasa nim yiye sɛ Yehowa wɔ ntease kɛse wɔ eyi mu. Bere a Dawid ne Bat-Seba sɛee aware na ɔyɛɛ nhyehyɛe ma wokum ne kunu no, na ɔne Bat-Seba fata owu sɛ asotwe. (Deuteronomium 22:22; 2 Samuel 11:2-27) Sɛ nnipa atemmufo a wɔyɛ katee na wodii asɛm no a, anka ebia wɔn baanu nyinaa hweree wɔn nkwa. Nanso nea Yehowa de dii dwuma ne ntease (e·pi·ei·kesʹ), a sɛnea Vine’s Expository Dictionary of Biblical Words ka ho asɛm no, “ɛda timɔbɔ a obi de hwehwɛ ‘asɛm bi mu nokwasɛm ahorow mu wɔ mmɔborohunu ne ntease mu’ adi.” Ɛda adi sɛ nokwasɛm ahorow a ɛmaa Yehowa sii gyinae a mmɔborohunu wom no bi ne nu a abɔnefo no fi komam nuu wɔn ho, ne mmɔborohunu a na Dawid ankasa ada no adi akyerɛ afoforo no. (1 Samuel 24:4-6; 25:32-35; 26:7-11; Mateo 5:7; Yakobo 2:13) Nanso, sɛnea ɛne Yehowa ho asɛm a n’ankasa kae wɔ Exodus 34:4-7 hyia no, na ntease wom sɛ Yehowa teɛ Dawid so. Ɔsomaa odiyifo Natan ma ɔkɔkaa asɛm a emu yɛ den kyerɛɛ Dawid, de kyerɛɛ Dawid sɛ wabu Yehowa asɛm animtiaa. Dawid nuu ne ho, ma enti wanwu wɔ ne bɔne no ho.—2 Samuel 12:1-14.

11. Ɔkwan bɛn so na Yehowa daa no adi sɛ ɔwɔ ɔpɛ sɛ ɔde bɔne befiri wɔ Manase asɛm no mu?

¹¹ Ɔhene Manase a ofi Yuda nhwɛso no yɛ soronko koraa wɔ eyi ho, efisɛ na Manase a ɔnte sɛ Dawid no akɔ so ayɛ bɔne bere tenteenten. Manase hyɛɛ nyamesom mu akyiwade ho nkuran wɔ ɔman no mu, a na nnipa a wɔde wɔn bɔ afɔre ka ho. Ebetumi aba nso sɛ ɔno na ɔmaa wɔde “ɔwan paee” odiyifo nokwafo Yesaia mu. (Hebrifo 11:37) Yehowa maa wɔfaa Manase dommum kɔɔ Babilon de twee n’aso. Nanso, Manase nuu ne ho wɔ afiase na ɔsrɛɛ bɔne fafiri. Esiane sɛ ofi komam nuu ne ho nti, Yehowa ‘nyaa ɔpɛ sɛ ɔde befiri’ no—wɔ tebea a ɛkɔ akyiri kɛse yi mpo mu.—2 Beresosɛm 33:9-13.

Ɔyɛ Nsakrae Bere a Tebea Afoforo Sɔre

12, 13. (a) Wɔ Niniwe asɛm no mu no, nsakrae bɛn na ɛbaa tebea no mu a ɛmaa Yehowa sakraa ne kwan? (b) Ɔkwan bɛn so na Yona daa no adi sɛ onni ntease sɛ Yehowa?

¹² Ntease a Yehowa wɔ no da adi bio wɔ ɔpɛ a ɔwɔ sɛ ɔbɛsakra ɔkwan a wabɔ ne tirim sɛ ɔbɛfa so ayɛ ade bere a tebea afoforo sɔre no mu. Sɛ́ nhwɛso no, bere a odiyifo Yona tuu aperenten wɔ tete Niniwe mmɔnten so no, na ne nkrasɛm a efi honhom mu a ɔde nam no yɛ tiawa: Wɔbɛsɛe kurow kɛse no wɔ nna 40 mu. Nanso, tebea no sakrae—kɛse! Niniwefo no nuu wɔn ho.—Yona, ti 3.

¹³ Yenya afotu fi sɛnea Yehowa ne Yona yɛɛ wɔn ade wɔ tebea a ɛsakrae no ho mu. Ɔkwan bi so no, Yehowa danee ne soro teaseɛnam no ani kyerɛɛ baabi foforo. Saa bere no, ɔyɛɛ nsakrae, na ɔyɛɛ ne ho obi a ɔde bɔne firi mmom sen sɛ ɔbɛyɛ “dɔmmarima.” (Exodus 15:3) Nanso, Yona de, na ɔyɛ katee ankasa. Sɛ́ anka ɔne Yehowa teaseɛnam no bɛbɔ anan no, ɔyɛɛ n’ade te sɛ keteke a wɔde fa nneɛma anaa po so hyɛn kɛse a yɛadi kan aka ho asɛm no. Ɔsɛe ho asɛm na na waka, enti ɔsɛe ara na na ɛsɛ sɛ ɛba! Ebia osusuwii sɛ sɛ wɔsakra nea ɛrebesi no a, ɛbɛma n’anim agu ase wɔ Niniwefo no anim. Nanso, Yehowa fii boasetɔ mu maa ne diyifo a onni koma no tema ne mmɔborohunu ho asuade bi a na ne werɛ remfi da.—Yona, ti 4.

14. Dɛn nti na Yehowa yɛɛ nsakrae wɔ ɔkwan a na ɔpɛ sɛ ne diyifo Hesekiel fa so no mu?

¹⁴ Yehowa asakra ne kwan wɔ mmere afoforo mu nso—wɔ nsɛm nketenkete mpo mu. Sɛ́ nhwɛso no, bere bi a Yehowa hyɛɛ odiyifo Hesekiel sɛ ɔnyɛ nkɔmhyɛ mu ɔyɛkyerɛ bi no, nneɛma a ɔka kyerɛɛ Hesekiel sɛ ɔnyɛ no bi ne sɛ ɔmfa nnipa tiafi nsɔ gya nnoa n’aduan. Ná eyi yɛ den dodo ma odiyifo no, na ɔteɛm sɛ, “Ao, [Yehowa] Nyankopɔn,” na ɔsrɛɛ no sɛ ɔmmma no nnyɛ biribi a okyi. Yehowa ampow ne diyifo no nsusuwii anka sɛ ntease nnim; mmom no, Ɔmaa Hesekiel kwan sɛ ɔmfa nantwi bin, a wɔtaa de sɔ gya wɔ aman pii mu de besi nnɛ no nni dwuma.—Hesekiel 4:12-15.

15. (a) Nhwɛso ahorow bɛn na ɛkyerɛ sɛ Yehowa akɔ so anya ɔpɛ sɛ obetie nnipa mma na wadi aboa wɔn? (b) Asuade bɛn na yebetumi anya afi eyi mu?

¹⁵ So ɛnyɛ akomatɔyam sɛ yebesusuw ahobrɛase a yɛn Nyankopɔn Yehowa wɔ no ho? (Dwom 18:35) Ɔkorɔn sen yɛn koraa; nanso ɔde boasetɔ tie nnipa a wɔnyɛ pɛ, na ɛtɔ da bi a ɔsakra ne kwan ma ɛne wɔn de hyia. Ɔmaa kwan maa Abraham paa no kyɛw bere tenten wɔ Sodom ne Gomora sɛe ho. (Genesis 18:23-33) Na Ɔmaa Mose kaa n’adwene bere a Ɔkae sɛ ɔbɛsɛe Israelfo atuatewfo no na wayɛ Mose asefo mmom ɔman kɛse no. (Exodus 32:7-14; Deuteronomium 9:14, 19; fa toto Amos 7:1-6 ho.) Ɔnam saayɛ so yɛɛ nhwɛso a ɛyɛ pɛ maa nnipa a wɔsom no a ɛsɛ sɛ wonya ɔpɛ sɛ wobetie afoforo saa ara bere a ntease wom na ɛbɛyɛ yiye saa no.—Fa toto Yakobo 1:19 ho.

Ntease a Ɔda no Adi wɔ Ɔkwan a Ɔfa so Di Tumi Mu

16. Ɔkwan bɛn so na Yehowa da nsow wɔ nnipa pii ho wɔ ɔkwan a ɔnam so di ne tumi no mu?

¹⁶ So woahyɛ no nsow sɛ nnipa nya tumi kɛse a, ɛkame ayɛ sɛ wɔn mu pii bɛyɛ nnipa a wɔnte afoforo ase pii? Nea ɛne eyi bɔ abira no, Yehowa tumidi korɔn sen biara wɔ amansan yi mu, nanso ɔno na ɔyɛ nhwɛso a ɛsen biara wɔ ntease a onya ma afoforo mu. Ɔde ntease a edi mu na edi tumi. Yehowa a ɔnte sɛ nnipa pii no nsuro sɛ ne tumi befi ne nsa, ma enti ɔnte nka sɛ ɛsɛ sɛ ɔnam ninkuntwe so bɔ ho ban—te sɛ nea tumi kakra a ɔde bɛma afoforo betumi ama ne de no ho aba asɛm ɔkwan bi so. Nokwarem no, bere a na ɔteasefo biako pɛ na ɔka ne ho wɔ amansan yi mu no, Yehowa de tumi kɛse hyɛɛ ne nsa. Ɔyɛɛ Logos no ‘ne dwumayɛfo panyin,’ na efi saa bere no rekɔ no ɔnam ne Dɔba yi so na ɔbɔɔ biribiara. (Mmebusɛm 8:22, 29-31; Yohane 1:1-3, 14; Kolosefo 1:15-17) Akyiri yi Ɔde “ɔsoro ne asase so tumi nyinaa” maa no.—Mateo 28:18; Yohane 5:22.

17, 18. (a) Dɛn nti na Yehowa somaa abɔfo kɔɔ Sodom ne Gomora? (b) Dɛn nti na Yehowa maa abɔfo no kyerɛɛ wɔn adwene wɔ ɔkwan a obetumi afa so adaadaa Ahab no ho?

¹⁷ Saa ara na Yehowa de nnwuma a anka n’ankasa betumi ayɛ no yiye mpo hyɛ n’abɔde pii nsa. Sɛ́ nhwɛso no, bere a ɔka kyerɛɛ Abraham sɛ, “Meresian [akɔ Sodom ne Gomora] makɔhwɛ sɛ wɔayɛ sɛnea nteɛm a edu me nkyɛn no te anaa” no, na ɛnkyerɛ sɛ n’ankasa rekɔ hɔ. Mmom no, Yehowa pawee sɛ ɔde tumi bɛhyɛ afoforo nsa, na ɔpaw abɔfo sɛ wɔnkɔhwehwɛ nsɛm a ɛte saa mu mma no. Ɔmaa wɔn tumi a wɔde bedi kan wɔ asɛm no mu nokware a wɔhwehwɛ no mu, ne nea wɔde bɛsan abɛbɔ no asɛm no ho amanneɛ.—Genesis 18:1-3, 20-22.

¹⁸ Bere foforo bi a Yehowa sii gyinae sɛ ɔbɛsɛe Ɔhene Ahab a na ɔyɛ ɔbɔnefo no, Ɔtoo nsa frɛɛ abɔfo no baa ɔsoro nhyiam bi ase sɛ wɔmmɛkyerɛ wɔn adwene wɔ ɔkwan a wobetumi afa so ‘adaadaa’ ɔhene a wawae no ma ɔde ne ho akɔhyɛ akodi a ɛbɛma wɔakum no mu ho. Akyinnye biara nni ho sɛ na Yehowa, Nea nyansa nyinaa fi no no, nhia mmoa ansa na watumi akyerɛ ɔkwan a eye sen biara! Nanso, odii n’abɔfo no ni, maa wɔn kwan ma wɔkyerɛɛ wɔn adwene wɔ ɔkwan a wobetumi afa so, ne tumi a wɔde bedi dwuma wɔ onii a ɔne no anya no ho.—1 Ahene 22:19-22.

19. (a) Dɛn nti na Yehowa nhyehyɛ mmara pii? (b) Ɔkwan bɛn so na Yehowa da no adi sɛ ɔwɔ ntease wɔ nneɛma a ɔhwehwɛ fi yɛn hɔ no ho?

¹⁹ Yehowa mfa ne tumi no nni afoforo so ɔkwan a ɛnsɛ so. Eyi mu nso ɔda ntease a enni kabea adi. Ɔhwɛ yiye na ne mmara a ɔhyehyɛ no annɔɔso dodo, na ɔbara n’asomfo sɛ ‘wɔnnyɛ ade nntra nea wɔakyerɛw so’ denam mmara a ɛyɛ adesoa a wɔn ankasa bɛhyehyɛ aka ho so. (1 Korintofo 4:6; Asomafo no Nnwuma 15:28; fa toto Mateo 23:4 ho.) Ɔnhwehwɛ da sɛ n’abɔde bedi n’asɛm so wɔ bere a wɔnte ase, na mmom mpɛn pii no ɔde nkyerɛkyerɛmu a ɛfata ma de kyerɛ wɔn kwan, ogyae gyinaesi no ma wɔn, na ɔma wohu mfaso ne ɔhaw a efi osetieyɛ ne asoɔdenyɛ mu ba. (Deuteronomium 30:19, 20) Sɛ́ anka ɔbɛhyɛ nkurɔfo denam afobu nka a ɔbɛma wɔate, aniwu a ɔbɛhyɛ wɔn, anaa osuro a ɔbɛma wɔanya so no, ɔbɔ mmɔden du wɔn komam; ɔpɛ sɛ nkurɔfo fi nokware dɔ mu som no, na ɛnyɛ ɔhyɛ so. (2 Korintofo 9:7) Ɔsom a wofi ɔkra nyinaa mu de ma saa yi nyinaa ma ne koma ani gye, enti ɔnyɛ obi a ‘biribiara nsɔ n’ani’ koraa.—1 Petro 2:18; Mmebusɛm 27:11; fa toto Mika 6:8 ho.

20. Ntease a Yehowa wɔ no ka wo dɛn?

²⁰ So ɛnyɛ nwonwa sɛ Yehowa Nyankopɔn a ɔwɔ tumi sen obiara wɔ amansan yi mu no nni ne tumi no wɔ ɔkwan a ntease nnim so, na ɔmfa nsisi afoforo da? Nanso, wɔ abakɔsɛm mu no, nnipa a sɛ wɔde wɔn toto ne ho a, wɔba fam koraa no adi afoforo so atirimɔden so. (Ɔsɛnkafo 8:9) Ɛda adi pefee sɛ afoforo a wonya wɔn ho ntease yɛ su a ɛsom bo, nea ɛka yɛn ma yɛdɔ Yehowa kɛse. Ɛno betumi aboa yɛn nso ma yɛn ankasa abɔ mmɔden anya saa su yi bi. Yɛbɛyɛ dɛn atumi ayɛ saa? Asɛm a edi hɔ no bɛka eyi ho asɛm.

[Ase hɔ asɛm]

Wubebua Dɛn?

◻ Ɔkwan bɛn so na Yehowa din ne anisoadehu a ɛfa ne soro teaseɛnam ho no si so dua sɛ ɔyɛ fakaa?

◻ Dɛn ne afoforo ho ntease a wonya, na dɛn nti na ɛkyerɛ ɔsoro nyansa?

◻ Akwan bɛn so na Yehowa ada no adi sɛ ‘ɔwɔ ɔpɛ sɛ ɔde befiri’?

◻ Dɛn nti na ɛtɔ da bi a Yehowa paw sɛ ɔbɛsakra ɔkwan a wabɔ ne tirim sɛ ɔbɛfa so ayɛ biribi?

◻ Ɔkwan bɛn so na sɛnea Yehowa di tumi no kyerɛ sɛ ɔwɔ ntease?

[Kratafa 10 mfonini]

Dɛn nti na Yehowa de Ɔhene Manase a na ɔyɛ ɔbɔnefo no bɔne firii no?