Dɛn Na Woyɛ a Ɛde Anigye Bɛba W’abusua Mu?—Ɔfã 1

Da a ɔbarima ne ɔbea bi bɛware no, ɛyɛ a wɔn ani gye paa. Wonyae a, anka saa anigye no bɛtena hɔ daa. Asɛmpa ne sɛ, saa anigye no betumi atena hɔ daa. Kristofo a wɔaware akyɛ a wɔde Bible mu afotusɛm yɛ adwuma wɔ wɔn aware mu no bedi adanse sɛ wei betumi ayɛ yiye.

1. Afotu bɛn na Bible de ma okununom?

Yehowa de ahyɛ okununom nsa sɛ wonni abusua no anim, anaa wɔnyɛ abusua no ti. (Kenkan Efesofo 5:23.) Yehowa hwɛ kwan sɛ wobesisi gyinae ahorow a ɛbɛboa abusua no. Bible tu okununom fo sɛ: “Monkɔ so nnɔ mo yerenom.” (Efesofo 5:25) Saa asɛm no kyerɛ sɛ, ɔbarima a ɔdɔ ne yere no, sɛ wɔwɔ fie oo, wɔwɔ abɔnten oo, odi ne yere ni. Ɔbɔ ne ho ban sɛnea ɛbɛyɛ a bɔne biara rento no. Afei, ɔyɛ nea obetumi biara sɛ ɔbɛhwɛ no, ɔbɛma ne nsa aka nea ohia, na wama n’ani agye. (1 Timoteo 5:8) Nea ehia paa ne sɛ, ɔboa ne yere sɛnea ɛbɛyɛ a ɔne Yehowa adamfofa mu bɛyɛ den. (Mateo 4:4) Nneɛma a ɔyɛ no bi ne sɛ, ɔne ne yere bom bɔ mpae, na wɔkenkan Bible. Sɛ ɔbarima bi dɔ ne yere na sɛ ɔhwɛ no a, ɛma ɔno ankasa ne Yehowa ntam kɔ so yɛ kama.—Kenkan 1 Petro 3:7.

2. Afotu bɛn na Bible de ma ɔyerenom?

Onyankopɔn Asɛm ka sɛ, “ɔyere de, onnya obu kɛse mma ne kunu.” (Efesofo 5:33) Dɛn na ɔyere yɛ a ɛbɛkyerɛ sɛ obu ne kunu? Obetumi de n’ani ato fam ahwɛ suban pa a ne kunu wɔ, na wakamfo no wɔ ho. Afei, sɛnea ɔbarima no rebɔ mmɔden sɛ ɔbɛhwɛ ɔne mmofra no, obetumi akyerɛ ho anisɔ. Ɛno da nkyɛn a, gyinae biara a ne kunu besi no, ɛsɛ sɛ ɔtaa n’akyi. Bio nso, sɛ ɔne ne kunu rekasa a, ɛsɛ sɛ odi no ni, na ɛnsɛ sɛ ɔka ne ho nsɛmmɔne kyerɛ afoforo. Sɛ ɔbea bi kunu nsom Yehowa mpo a, ɛsɛ sɛ ɔyɛ saa nneɛma yi de kyerɛ sɛ obu no.

3. Dɛn na awarefo yɛ a ɛbɛma wɔn aware asɔ?

Bible no ka sɛ, sɛ ɔbarima ne ɔbea ware a, ‘wɔn baanu no abɛyɛ ɔhonam koro.’ (Mateo 19:5) Wei kyerɛ sɛ, ɛnsɛ sɛ wɔma kwan ma biribiara tetew wɔn ntam. Sɛ wei bɛyɛ yiye a, ɛsɛ sɛ wonya bere ma wɔn ho, na wɔbɔ nkɔmmɔ. Afei, ɛsɛ sɛ obiara tumi ka ne koma mu asɛm ne sɛnea ɔte nka kyerɛ ne yɔnko. Sɛ wuyi Yehowa a, ɛsɛ sɛ awarefo no mu biara ma ne yɔnko ho hia no sen obi foforo anaa biribi foforo biara. Ɛsɛ sɛ wɔn mu biara hwɛ yiye paa na wamfa ne ho anhyehyɛ obi a ɔnyɛ ne kunu anaa ne yere.

SUA PII KA HO

4. Okununom—monnɔ mo yerenom na momma mo ani nku wɔn ho

VIDEO: Okununom, Monnɔ Mo Yerenom Sɛ Mo Ho (9:53)

• Nneɛma bɛn na okunu betumi ayɛ de akyerɛ sɛ ɔdɔ ne yere na odwen ne ho?

Monkenkan Kolosefo 3:12. Muwie a munsusuw asɛmmisa yi ho:

• Sɛn na okununom betumi de kyerɛwsɛm yi ayɛ adwuma wɔ wɔn aware mu?

5. Ɔyerenom—monnɔ mo kununom na monkyerɛ sɛ mubu wɔn

Bible tu ɔyerenom fo sɛ wommu wɔn kununom. Sɛ wɔsom Yehowa oo, sɛ wɔnsom no oo, ɛsɛ sɛ wobu wɔn. Monkenkan 1 Petro 3:1, 2. Muwie a munsusuw nsɛmmisa yi ho:

• Sɛ wo kunu nsom Yehowa a, yenim sɛ wo koma so ade ne sɛ daakye, ɔbɛba abɛsom no. Nanso wohwɛ a, nneɛma mmienu yi mu nea ɛwɔ he na woyɛ a ɛbɛboa no ama wabɛsom Yehowa—sɛ́ wode Bible no beguan ne ho da biara, anaa sɛ́ wobɛda suban pa adi na woakyerɛ sɛ wubu no? Adɛn ntia?

Sɛ okunu ne ɔyere yɛ baako a, ɛboa ma wosisi gyinae pa. Nanso, ɛtɔ da a, ɔbea no ne ne kunu adwene renhyia wɔ biribi ho. Ɛba saa a, obetumi atɔ ne bo ase akyerɛ n’adwene wɔ obu mu. Nanso ɛsɛ sɛ ɔkae sɛ, Yehowa de ahyɛ ne kunu nsa sɛ onsisi gyinae a ɛbɛboa abusua no. Enti sɛ ne kunu si gyinae bi a, ɛsɛ sɛ ɔyɛ nea obetumi biara taa n’akyi. Sɛ ɔyɛ saa a, ɛbɛma obiara ani agye wɔ abusua no mu. Monkenkan 1 Petro 3:3-5. Muwie a munsusuw asɛmmisa yi ho:

• Sɛ ɔbea bi de nidi ma ne kunu a, ɛma Yehowa te nka sɛn?

6. Ɔhaw biara a wubehyia wɔ w’aware mu no, wubetumi adi so

VIDEO: Sɛnea Wobɛhyɛ W’aware Mu Den (5:44)

• Nneɛma bɛn na wuhuu wɔ video no mu a ɛkyerɛ sɛ na awarefo no ntam retetew?

• Dɛn na wɔyɛe sɛnea ɛbɛyɛ a wɔn aware no bɛsɔ bio?

Monkenkan 1 Korintofo 10:24 ne Kolosefo 3:13. Mokan kyerɛwsɛm biara wie a, munsusuw asɛmmisa yi ho:

• Sɛ wode kyerɛwsɛm yi yɛ adwuma a, sɛn na ɛbɛboa ama w’aware asɔ?

Bible ka sɛ, obiara mfa nidi mma ne yɔnko. Wei kyerɛ sɛ, ɛsɛ sɛ yɛne afoforo di no yiye, na yɛda obu adi kyerɛ wɔn. Monkenkan Romafo 12:10. Muwie a munsusuw nsɛmmisa yi ho:

• Ɛsɛ sɛ okunu anaa ɔyere twɛn sɛ ne hokafo bedi no ni ansa na ɔno nso adi no ni anaa? Adɛn nti na woreka saa?

NEA YƐASUA

Sɛ okunu ne ɔyere dodɔ wɔn ho, obiara di ne yɔnko ni, na wɔde Bible afotusɛm bɔ wɔn bra a, wɔn ani begye.

Ntimu

• Dɛn na okunu betumi ayɛ na ama n’aware asɔ?

• Dɛn na ɔyere betumi ayɛ na ama n’aware asɔ?

• Sɛ woaware a, Bible mu afotusɛm bɛn na ebetumi aboa ama w’aware asɔ?

YƐ NHWEHWƐMU

Kenkan saa nhomawa yi, na wubehu afotusɛm a ebetumi aboa ama w’abusua ani agye.

W’abusua Betumi Anya Anigye (nhomawa)

Hwɛ nnwom ho video yi, na wubehu sɛ, sɛ awarefo de Onyankopɔn afotu yɛ adwuma a, ohyira wɔn.

Woyɛ Me Dɔ (4:26)

Kenkan saa asɛm yi, na wubehu nea ɔyere yɛ a ɛkyerɛ sɛ ogye tom sɛ ne kunu na ɔyɛ abusua no ti.

“Mmea, Dɛn Nti Na Ɛsɛ Sɛ Mobrɛ Mo Ho Ase Hyɛ Tiyɛ Ase?” (Ɔwɛn-Aban, May 15, 2010)

Ɛyɛɛ dɛn na awarefo bi a wɔn aware gui tumi siesiee wɔn aware mu nsɛmnsɛm?

Onyankopɔn Boaa Yɛn Ma Yɛn Aware San Sɔe (5:14)