Mmu W’ani Ngu Wo Hokafo So!

AWAREFO bi refi Ahenni Asa so. Okunu ne ɔyere no anim sereserew no da anigye a wonya sɛ “ɔhonam koro” a wɔaka abom resom wɔn Nyankopɔn Yehowa no adi. (Mateo 19:6) Nanso, ɛnyɛ nea wɔanya saa biakoyɛ no anaasɛ gyidi koro bere nyinaa. Bere bi na ɔyere no, Atsuko nkutoo na ɔkɔ nhyiam horow no. Afei ɔsan kɔ fie kɔto ne kunu a ne bo afuw a ɔteɛteɛm gu no so. Da bi, ne kunu Kazutaka bu fuwii araa ma ɔsoo adidipon no mu, na ɔhwee anwummeduan no nyinaa guu fam.

Sɛnea Yɛsu ka siei no, nokware Kristosom de mpaapaemu aba afi bi mu. (Mateo 10:34, 35) Nanso, te sɛ Kazutaka ne Atsuko no, ebinom renya ɔsom mu biakoyɛ ne anigye mprempren wɔ wɔn fie. Nokwarem no, biakoyɛ a ɛte saa no amma ara kwa. Dɛn na gyidifo no yɛe de dii ɔsɔretia no so, na wɔmaa biakoyɛ ankasa baa abusua no mu? Ansa na yɛbɛhwehwɛ ɛno mu no, ma yɛnhwɛ nea enti a ahokafo binom sɔre tia no.

Dɛn Nti na Wɔsɔre Tiae?

Atsuko ka sɛ: “Sɛ mitwa m’ani hwɛ m’akyi a, mihu sɛ na mekɔ nhyiam horow no a na menkyerɛkyerɛ nneɛma mu nkyerɛ me kunu.” Esiane sɛ na ogyaw Kazutaka nkutoo a ɔnka hwee nkyerɛ no nti, na ne bo fuw.

Ɔsɔretia a emu yɛ den betumi aba esiane ninkuntwe nso nti. Okunu aberantewaa bi a wɔfrɛ no Shigeo nyaa adwene a ɛnteɛ a enni nnyinaso biara wɔ ne yere ayɔnkofo afoforofo ho. “Bere a me yere siesie ne ho na ɔkɔ nhyiam horow no, misusuwii sɛ wanya ɔbarima foforo.” Ne yere Masako gye tom sɛ: “Yɛn baanu no annya kwan ankasa yiye da. Mannka ɔpɛ a na ɛwɔ me komam sɛ ɔno nso besua Kristofo nokware no ho asɛm da.”

Toshiko, ɔbea warefo bi tee nka te sɛ Shigeo. “Bere a me kunu fii ase ne Yehowa Adansefo suaa ade no, mesɔre tiae efisɛ na ɔma bere a ɔde di dwuma ne asafo no bɔ no kɔ anim nkakrankakra. Na menom nsa na me werɛ afi sɛnea mete nka bere a onni hɔ no.”

Toshiko nsɛm no da ntease foforo adi​—ankonamyɛ. Saa na na ebinom a na anka wɔyɛ asɔretiafo no tee nka bere a na wɔn ahokafo kɔ wɔn nhyiam horow no daa no. Okunu bi kae sɛ: “Sɛ ɛka me nkutoo wɔ fie a, na mete nka sɛ wɔagyaw me.” ɔfoforo se: “Metee nka te sɛ nea me yere ne me mma no regyaw me hɔ.” Esiane sɛ ɛyɛ den ma mmarima pii sɛ wɔbɛka sɛ, “Ɛbɛka me nkutoo, mesrɛ wo tra fie” nti, ebinom sɔre tia wɔn hokafo no ɔsom mu nneyɛe.

Ɛtɔ mmere bi a, nhyɛso a efi nnamfo ne abusuafo hɔ betumi de ɔsɔretia a efi ɔhokafo a na anka ɔwɔ ntease no nkyɛn aba. Wɔka sɛ wɔ Apuei fam no, wɔtaa “gye ɔyere to abusua mu mmom sen sɛ wɔbɛka ɔne okunu abom.” Ɛyɛ mmerɛw sɛ abusuasfo nhyɛso de ntotoe bɛba. Takashi yere a ɔyɛ Kristoni no powee sɛ ɔde ne ho bɛhyɛ ɔsom mu wɔ abusua no Budda afɔremuka anim. Takashi kyerɛkyerɛ mu sɛ: “Nea ɛsɛee asɛm no koraa no, na yɛte bɛn m’awofo. Me na hyɛɛ me, enti mihunahunaa me yere na meyɛɛ no basabasa.”

Te a wɔte wɔn ho ase, a nkɔmmɔ a wɔmmɔ yiye, ninkuntwe, ankonamyɛ, anaasɛ abusuafo nhyɛso ma ɛyɛ kɛse no betumi adan basabasayɛ. Obi a na ɔtaa hwe ne yere gye tom sɛ: “Na mempɛ sɛ ɔsom bi begye m’abusua afi me nsam.” Ɔfoforo se: “Na mempɛ koraa sɛ mɛba ofie na memmɛto obiara.” Ebia wosusuwii sɛ, ‘Sɛ nsɛm antumi ansiw ɔsom mu nkate a ano yɛ den yi ano a, ebia akuturuku kakraa bi betumi.”

Nea ɛyɛ anigye no, awarefo a yɛaka wɔn ho asɛm wɔ atifi hɔ no ka boom wɔ ɔsom mu akyiri yi. Mprempren wɔn osuahu ahorow a na emu yɛ yaw no yɛ ade a atwam. Nanso esiane sɛ wɔafa mu nti, wɔwɔ gyinabea bi mu a wobetumi de nyansahyɛ ahorow a etumi yɛ adwuma a ebetumi aboa ama wɔasiw tebea horow a ebetumi ahaw adwene ano na ebia ɛde ɔsom mu biakoyɛ aba mmusua a wɔn mu apaapae ara wɔ saa kwan yi so no ama.

Bata Nokware no Ho

Sɛ woteɛ wo nsa atwe obi a nsu refa no afi nsu mu a, ɛsɛ sɛ w’ankasa wode wo nan si yiye. Sɛ woanyɛ saa a, ebia wo nso wobɛtɔ nsu no mu. Saa ara nso na nea ebetumi ama woaboa wo hokafo ne sɛ w’ankasa wobɛso nokware a egye nkwa no mu dennen. “Obi a na anka ɔsɔre tia se: “Bere a me ɔsɔretia no duu nea enye koraa no, na me yere da so ara de mmofra no kɔ nhyiam horow. Sɛ ogow mu a, ebia anka merennye nni sɛ ne gyidi no yɛ nokware.”

Kazutaka a ɔdan adidipon butuwii no da nea ɛsakraa ne su no adi bere a ɔka n’asɛm no wie no: “Awiei koraa no, mepowee sɛ mɛma Atsuko sika ma ɔde atua kar ka. Ɛno mpo, ɔkɔɔ nhyiam horow no nyinaa, na ɔde mmofra no kaa ne ho kɔe. Ɔtɔn ne ho nneɛma nkakrankakra sɛnea ɛbɛyɛ na watumi ayɛ saa. Metee nka sɛ mereyɛ nkwaseade, na mantumi ansɔre antia no bio. Mmom no, mifii ase kenkan nsɛmma nhoma a ɔde to baabi a mehu no.”

Wo ne Wo Hokafo no Mmɔ Nkɔmmɔ

Kazutaka yere Atsuko se: “Ná anka ɛsɛ sɛ meto nsa frɛ me kunu sɛ ɔmmɛka me ho na mema ohu sɛ mepɛ sɛ yebom sua Bible no. Na odwen me ne abusua no ho. Na anka nkɔmmɔbɔ pa betumi ayɛ pii de ayi n’adwennwen no afi hɔ.” Yiw, nkɔmmɔbɔ pa de ntease ba. Bible no tu fo sɛ: “Wɔkwati agyinakɔ a, tirimpɔw yɛ ɔkwa.” (Mmebusɛm 15:22) Saa asɛm yi mu no, ɛsɛ sɛ ‘agyina’ a wo ne wo hokafo ‘bɛkɔ’ wɔ wo som dwumadi ahorow ho no yɛ nea woasusuw ho yiye na wɔde anifere di ho dwuma. Bible se: “Onyansafo koma kyerɛ n’ano nimdeɛ, na ɛma adenim dɔ n’anom.” (Mmebusɛm 16:23) Ɛho hia saa ara nso sɛ wode anifere paw bere pa a ɛsɛ sɛ wokasa.​—Ɔsɛnkafo 3:7.

Ɛte sɛ nea sɛnea wokasa no ho hia te sɛ asɛm a woka no ara. Ɔsomafo Paulo tu fo sɛ: “Momma mo kasa ho mmra nyam daa a nkyene wɔ mu, na moahu sɛnea ɛsɛ sɛ mubua obiara.” (Kolosefo 4:6) Sɛ woma wo kasa ho ba nyam, ɔkwan a ɛyɛ dɛ so a, wo hokafo no rente nka kɛse sɛ onsisi n’aso wɔ nea wowɔ ka no ho.

Ɛyɛ den ma okununom pii sɛ wɔn yerenom bɛkyerɛkyerɛ wɔn. Enti ɛsɛ sɛ ɔyerenom yɛ wɔn a wonim akwan horow a wɔbɛfa so ayɛ ade. Kikuyo de Ɔwɛn Aban Asafo no nhoma ahorow dii dwuma ɔkwan pa so. Ose: “Sɛ Nyan! a makra no ba ara pɛ a, mehwehwɛ mu pɛ nsɛm a me kunu ani begye ho. Afei mebɔ mpae sɛ menya hokwan na me ne no akenkan ɛnonom.” Otumi gyaw nsɛmma nhoma no to aguaree na ɔhwɛ nkratafa no mu daa hwɛ sɛ wakenkan asɛm bi a. Sɛ ɛte sɛ nea ɔnkɔ so nkenkan a, na wasakra nsɛmma nhoma no. Mprempren Kikuyo kunu no yɛ ɔpanyin ne ɔkwampaefo.

Tumi a Abrabɔ Pa Wɔ

Na sɛ wo hokafo no mpɛ sɛ ɔne wo bɛka ɔsom ho asɛm nso ɛ? Kristofo afoforo a wo hokafo no behyia wɔn no betumi adum ɔsɔretia a ano yɛ den no ano na aka no ma wasua Bible no. Bere bi, Masao a mprempren ɔyɛ ɔpanyin no baraa Yehowa Adansefo sɛ mma wonsi ne fi. Ɔkae sɛ: “Awiei koraa no, mepenee so sɛ me ne Adansefo no besua Bible no bere a me yere srɛɛ me sɛ memmoa mma wonsi Ahenni Asa no. Ɛkaa me sɛ mihui sɛ wɔaka abom de anigye reyɛ adwuma​—a wontua wɔn ka.”

Sɛ wo hokafo pow sɛ ɔne obiara besusuw ɔsom ho a, dɛn na wubetumi ayɛ? Ɔsomafo Petro tu fo sɛ: “Sɛ ebinom antie asɛm no nso a, wɔafa [wɔn ahokafo] abrabɔ . . . so anya wɔn.” Sɛ nhwɛso no, Kristoni ɔyere abrabɔ bɛn na ebetumi anya ne kunu? Petro se “abrabɔ a ɛho tew wɔ osuro [obu a emu dɔ] mu” a eyi “komam nipa a wahintaw no, honhom a edwo na ɛyɛ komm ade a ɛmporɔw mu” no adi.​—1 Petro 3:1-4.

Kristoni ɔyere bi de saa nnyinasosɛm yi dii dwuma bere a ne kunu a na ɔsɔre tia no de ne ho hyɛɛ aniwude bi mu no. Ɛwom sɛ eguu n’anim ase na ɛbɔɔ no fam sika fam de, nanso wante anwiinwiisɛm biara amfi ne yere anaa mmofra no nkyɛn. Ne kunu no gye toom sɛ: “Na minim sɛ wɔn abrabɔ a ɛyɛ soronko yi fi wɔn Bible sua no.” Mfe pii a ɔde asɔre atia akyi no, ofii ase kenkan Bible no. Okununom afoforo a akyiri yi wɔabɛyɛ Adansefo no kyerɛ sɛ: “Na meyɛ okunu a me yere di me so, nanso mpofirim ara ɔde obu maa me sɛ ofi no ti.” “Sɛ wɔn a me ne wɔn yɛ adwuma no ba yɛn fi a, me yere gye wɔn fɛw so. Na saa na mepɛ.”

Mmofra nso abrabɔ pa betumi abubu asɔretiafo koma. Bere a wobisaa agya bi a na anka ɔsɔre tia ne yere no nea ɛma ɔsakraa ne su no, ɔkae sɛ: “Sɛ me babarima a wadi mfe abien no hu sɛ me bo reyɛ afuw a, ɔteɛm dennen na otĩ mu ka sɛ: ‘Ɔdɔ wɔ abodwokyɛre na ne yam ye. . . .’” (1 Korintofo 13:4-7) Abarimaa yi a wɔatete no yiye no kanyan n’agya ma ɔhwehwɛɛ Bible no mu. Agyanom pii sii gyinae sɛ wɔbɛhwehwɛ Bible no mu efisɛ wɔn mma srɛɛ wɔn sɛ wonsua.

Nea edi akyiri no, anim sereserew ne agodi kasa betumi ayɛ anwonwade wɔ wo hokafo su ho. Okunu bi ka kyerɛɛ ne yere sɛ ɔmfa biribiara a ɔpɛ na omfi fie hɔ, na ɔnnsan mma hɔ bio da. Ne yere no buae sɛ: “Mempɛ me ba no, anaa sika, anaa honam fam nneɛma biara.” Ɔde furoshiki (ntama bi a wɔde kyekyere nneɛma wɔ Japan) kɛse bi sɛw fam na ɔkae sɛ: “Biribiara nni hɔ a ɛsom bo ma me sɛ wo. Bɛda furoshiki no so! Mepɛ sɛ mede wo kɔ.” Okunu no gyaee sɔre a ɔsɔre tia no no, ofii ase suaa Bible no na mprempren ɔsom sɛ ɔpanyin.

Sɛ wobata nokware no ho, wukura nkɔmmɔbɔ pa mu, woma onya fekubɔ pa, na wubu ɔbra pa a, wubetumi ama wo hokafo abɛyɛ gyidini. Obi a na anka ɔsɔre tia no se: “Sɛ ɛnte sɛ nea wo hokafo no reba abɛyɛ ogyidini mpo a, ebia ɔbɛsakra ne koma.” Enti mpa abaw. Tie nkuranhyɛ a ɔsomafo Paulo de ma wɔn a wɔn ahokafo nnye nni yi: “Ɔyere, so wunim sɛ wo na wubegye wo kunu nkwa? Anaasɛ okunu, wunim sɛ ebia wo na wubegye wo yere nkwa?”​—1 Korintofo 7:16, New World Translation.