Ɛsɛ sɛ Aware Yɛ Abusuabɔ a Ɛtra Hɔ Daa

SƐ WOHWƐ nea ɛkɔ so wɔ sini aho-row pii mu a, aware yɛ botae a edi mu. Mpɛn pii no, ɔbarima ne ɔbea no ka bom awiei koraa, wɔware, na wɔtra ase “daa wɔ anigye mu wɔ ɛno akyi.” Wɔ sini ahorow mu no, saa na asɛm no kowie bere nyinaa.

Nokwasɛm ne sɛ, ayeforohyia nyɛ asetra foforo awiei, na mmom, ne mfiase koraa. Yɛhwɛ kwan sɛ, sɛnea Ɔsɛnkafo 7:8 ka no, “asɛm awiei ye sen ne mfiase.”

Abusuabɔ a Ɛtra Hɔ Daa

Ade a wɔhwɛ kɔ akyiri ho hia. Sɛ aware no bɛtra hɔ daa na ayɛ nea abotɔyam wom a, ɛsɛ sɛ enya fapem pa. Anyɛ saa a, adwennwen a mubehyia wɔ ayeforohyia no akyi no mu betumi ayɛ den sen nea muhyiae ansa na morebehyia ayeforo no. Kristoni ntumi mfa ne ho nhyɛ aware mu a osusuw sɛ: ‘Sɛ anyɛ yiye a, metumi agyae.’ Ɛsɛ sɛ yebu aware sɛ abusuabɔ a ɛtra hɔ daa.

Yesu daa no adi pefee sɛ ɛsɛ sɛ aware yɛ abusuabɔ a ɛtra hɔ daa bere a obuaa asɛmmisa bi a wɔde too n’anim fa awaregyae ho no. Ɔkae sɛ: “Monkanee sɛ efi mfiase no, [Onyankopɔn a] ɔbɔɔ onipa no, ɔbarima ne ɔbea na ɔyɛɛ wɔn, na ɔkae sɛ: Eyi nti na onipa begyaw agya ne ɛna, na ɔde ne ho akɔbata ne yere ho, na wɔn baanu no akɔyɛ ɔhonam koro? Enti wɔnna so nyɛ baanu bio, na mmom wɔyɛ ɔhonam koro. Enti nea Onyankopɔn de abom no, mma onipa nntetew mu!”—Mateo 19:4-6.

Ayeforohyia no Akyi

Wɔka ma ɛfata sɛ wɔ Kristoni asetra mu no, sɛ ahosohyira a ɔbɛyɛ ama Onyankopɔn no da nkyɛn a, aware ne ade a edi hɔ a ɛho hia. Ahosohyira ma obi ne Ɔbɔadeɛ no nya abusuabɔ daa, na asubɔ na wɔde yɛ ho sɛnkyerɛnne wɔ baguam. Aware yɛ ho a wɔde fam onipa foforo ho—daa—ho baguam mpaemuka. Ɛbɛyɛ nea ntease nnim sɛ obi behyira ne ho so ama Onyankopɔn anaa waware na bere koro no ara wama nneɛma bi asisi no kwan. Enti, ɛyɛ papa sɛ wɔn a wɔresusuw aware ho no bɛhwehwɛ wɔn daakye hokafo no gyidi ahorow, botae, nneyɛe, ne ne suban mu yiye.

Sɛ moresiesie mo ho ama ayeforohyia no a, ayamye, nsusuwho, ne biakoyɛ ho hia. Su a ɛte saa no ho hia kɛse mpo akyiri yi na ama aware no agyina. Wɔn a wɔahyia ayeforo foforo no dɔ wɔn ho, nanso wɔ aware no akyi no, ɛsɛ sɛ wɔkae sɛ ‘ɔdɔ nhwehwɛ ne nko de’ bere nyinaa. Sɛ wɔde ɔdɔ di dwuma daa a, ‘ɛrensa da.’ (1 Korintofo 13:5, 8) Sɛ wɔda ɔdɔ a edi mu adi a, ɛbɛyɛ mmerɛw sɛ wɔbɛda su ahorow te sɛ abodwokyɛre, ayamye, papayɛ, odwo, ne ahohyɛso—Onyankopɔn honhom aba—no adi. Saa su ahorow yi ho hia na ama aware bi agyina.—Galatifo 5:22, 23.

Nea ɛyɛ den wɔ ha ne saa su no a mobɛkɔ so ada no adi wɔ ayeforohyia no akyi no. Nanso, nea ɛbɛma moatumi de su pa a ɛte saa adi dwuma ne sɛ: Dɔ onipa a wowaree no no, na nya ɔpɛ sɛ wode nneɛma bɛbɔ afɔre.

Yesu kae sɛ mmara a ɛsõ sen biara ne sɛ yɛbɛdɔ Yehowa, na ɔkae sɛ nea etia abien ne sɛ ‘wobɛdɔ wo yɔnko sɛ wo ho.’ (Mateo 22:39) Ɔwarefo yɔnko a ɔsen biara ne n’aware mu hokafo, efisɛ biribiara nni asase so a ebetumi aka nnipa baanu abom sen aware.

Nanso, honam fam biakoyɛ kɛkɛ ntumi mma wɔnyɛ biako wɔ nkate fam. Nnipa baanu a wɔka bom no nkyerɛ sɛ wɔn adwene behyia bere nyinaa. Sɛ nna fam nkabom no bɛma wɔanya abotɔyam kɛse a, ɛsɛ sɛ biribi a ɛto so abien di hɔ—koma ne nsusuwii a wɔka bom. Wɔ nsɛm pii mu no, afɔre a wɔbɛbɔ ama onipa foforo no ne bo a ɛsɛ sɛ wotua na ama aware bi agyina. Hena na ɛsɛ sɛ ɔbɔ saa afɔre no? Okunu? Ɔyere?

Ɔdɔ ne Nidi a Mobɛda no Adi

Onyankopɔn Asɛm hyɛ sɛ: “Munni kan nnidi mo ho ni.” (Romafo 12:10; yɛn na yɛasi ɔfã bi so dua no.) Sɛ wubetumi a, bɔ afɔre no ansa na wo hokafo no abisa wo. Anyɛ yiye koraa no, sɛ obi bisa biribi bere nyinaa ansa na wode ama no a, bo a ɛsom no kɔ fam. Mmom no, ɛsɛ sɛ aware mu ahokafo no mu biara de yɛ ne su sɛ obedi kan adi ɔfoforo no ni.

Sɛ nhwɛso no, wɔhyɛ okununom sɛ ‘wonni ɔyere ni sɛ ade a ne ho nyɛ den, na wɔn mpaebɔ kwan ansiw.’ (1 Petro 3:7) Sɛ okunu anni ne yere ni a, ɛbɛka mpae a ɔbɔ Nyankopɔn mpo ɔkwan bɔne so. Nanso, dɛn na obi yere a obedi no ni no kyerɛ? Nea ɛkyerɛ ne sɛ obesusuw ne ho bere nyinaa, atie n’adwenkyerɛ, wama wadi kan apaw biribi wɔ nsɛm mu mpɛn dodow no ara. Na ɔyere nso betumi adi ne kunu ni saa ara, denam mmɔden a ɔbɛbɔ ne no ayɛ biako sɛ ɔboafo no so.—Genesis 21:12; Mmebusɛm 31:10-​31.

Onyankopɔn Asɛm ka sɛ: “Saa ara nso na ɛsɛ okununom sɛ wɔdɔ wɔn ankasa wɔn yerenom sɛ wɔn ankasa nipadua. Nea ɔdɔ n’ankasa ne yere no dɔ ne ho. Na obiara ntan n’ankasa honam, na mmom ɔyɛn no, na ɔhwɛ so yiye, sɛnea Kristo nso yɛ asafo no.” Ɔdɔ bɛn na Kristo nya maa n’akyidifo? Onyaa ɔpɛ sɛ obewu ama wɔn. Bible ka nso sɛ: “Mo mmiako mmiako nso, momma obiara nnɔ n’ankasa ne yere saa ara sɛ ne ho.” (Efesofo 5:28-33) Na Onyankopɔn Asɛm ka kyerɛ ɔyerenom sɛ ‘wɔnnɔ wɔn kununom, na wɔmmrɛ wɔn ho ase mma wɔn ankasa wɔn kununom, na wɔanka Onyankopɔn asɛm no ho asɛmmɔne.’—Tito 2:4, 5.

Hwɛ Kwan sɛ Mfomso Bɛba

Esiane sɛ nnipa nyinaa tɔ sin nti, wobedi mfomso ara. (Romafo 3:​23; 5:​12; 1 Yohane 1:​8-​10) Nanso sɛ anka yɛbɛma mfomso ayɛ kɛse no, tie Bible afotu yi: “Na ne titiriw no, momfa ɔdɔ a emu yɛ den nnodɔ mo ho, efisɛ ɔdɔ kata bɔne pii so.” (1 Petro 4:8) Wotumi di mfomso nketenkete ho dwuma yiye bere a woyi fi adwene mu na wobu ani gu so no. Saa ara na yebetumi ayɛ wɔ mfomso akɛse nso ho. Kolosefo 3:​12-​14 ka sɛ: “Monhyɛ ayamhyehye, ayamye, ahobrɛase adwene, odwo, abodwokyɛre. Na sɛ obi ne obi nya asɛm bi a, munhuhu mma mo ho na momfa nkyekyɛ mo ho; sɛnea Awurade de akyɛ mo no, sɛnea mo nso monyɛ ne no. Na eyinom nyinaa so na monhyɛ ɔdɔ a ɛne pɛyɛ hama no ngu.”

Mpɛn dodow ahe na ɛsɛ sɛ yɛde yɛn aware mu hokafo mfomso ne mmerɛwyɛ nketenkete firi no? Petro bisaa Yesu sɛ: “Awurade, mpɛn ahe na me nua fom me a, memfa mimfiri no? Ɛnkosi mpɛn ason anaa? Yesu ka kyerɛɛ no sɛ: Minse wo sɛ enkosi mpɛn ason, na mmom aduosɔn ahorow ason!” (Mateo 18:21, 22) Esiane sɛ na ɛnyɛ awarefo ho asɛm na Yesu reka nti, hwɛ sɛnea ɛho hia sɛ awarefo de befiri wɔn ho wɔn ho!

Ɛwom sɛ ntua aba aware nhyehyɛe so nnansa yi de, nanso awiei koraa no, ebedi nkonim efisɛ Onyankopɔn na ɔde sii hɔ, na biribiara a ɔhyehyɛe no ‘ye papa.’ (Genesis 1:​31) Ɛrenyɛ biribi a atwam. Na ebetumi agyina, titiriw wɔ wɔn a wobu Onyankopɔn mmara na wodi so no fam. Nanso asɛnnennen no ne sɛ: So nnipa baanu no bedi bɔ a wɔhyɛe ayeforohyia da a ɛne sɛ wɔbɛdɔ wɔn ho na wɔadi wɔn ho ni no so? Ɛno betumi ayɛ asɛnnennen ankasa, na ɛsɛ sɛ wudi apere na woadi mu nkonim. Nanso nea ebefi mu aba no bɛyɛ nea ɛfata ankasa!

[Adaka wɔ kratafa 10]

AWAREGYAE NE NTETEWMU

Onyankopɔn, a ɔne aware Hyehyɛfo no, hyehyɛɛ aware sɛ nkabom a ɛbɛtra hɔ daa. Na so Kyerɛwnsɛm bi wɔ hɔ a obi betumi agyina so agyae ne hokafo—na ama wasan atumi aware foforo? Yesu dii asɛm yi ho dwuma denam eyi a ɔkae no so: “Enti mise mo sɛ, sɛ ɛnyɛ aguamammɔ nti na obi gyaa ne yere na ɔware ɔfoforo a, na wasɛe aware.” (Mateo 19:9; yɛn na yɛasi ɔfã bi so dua no.) Aware a obi hokafo sɛe no nkutoo ne ade a ɛbɛma ɔhokafo a ne ho nni asɛm no kwan ma waware foforo.

Sɛ ɛno da nkyɛn a, bere a Bible mu nsɛm a ɛwɔ 1 Korintofo 7:10-16 hyɛ awarefo nkuran sɛ wɔnkɔ so ntra no, ɛsan ma ntetewmu ho kwan. Sɛ ebinom bɔ mmɔden yiye sɛ wɔbɛma wɔn aware agyina nanso anyɛ yiye a, wɔte nka sɛ wonni biribiara a wobetumi ayɛ sɛ wɔbɛtetew mu. Kyerɛwnsɛm bɛn na wobetumi agyina so atu anammɔn a ɛte saa ma afata?

Obi boapa sɛ ɔnhwɛ n’abusua. Sɛ ɔbarima ware a, ɛbɛyɛ n’asɛyɛde sɛ ɔbɛhwɛ ne yere ne ne mma. Ɔbarima a ɔboapa de honam fam ahiade kame n’abusua no ‘apa gyidi no, na ɔyɛ onipa bɔne sen nea onnye nni.’ (1 Timoteo 5:8) Enti wɔ ha yi no, ntetewmu betumi aba.

Ade foforo nso ne ɔhwe. Enti sɛ ɔbarima hwe ne yere a, ɔbea no betumi atetew mu. (Galatifo 5:​19-​21; Tito 1:7) “Ɔbɔnefo ne nea ɔpɛ amim de, [Onyankopɔn] kra tan no.”—Dwom 11:5.

Ade foforo a obi betumi agyina so agyae aware ne bere a wɔde ogyidini bi honhom mu yiyedi​—obi abusuabɔ a ɔne Onyankopɔn wɔ—to asiane mu koraa no. Sɛ ɔhokafo bi sɔretia, a ebia honam fam akwanside ka ho, ma ɛyɛ den ma ɔhokafo foforo no sɛ ɔbɛkɔ so asom nokware mu na ɛde ne honhom fam yiyedi to asiane mu a, agyidifo no bi hu sɛ ɛho hia sɛ wɔtetew mu.a—Mateo 22:37; Asomafo no Nnwuma 5:​27-​32.

Nanso, sɛ wɔtetew aware mu wɔ saa kwan yi so a, ɛremma obi nne ne ho sɛ ɔbɛsan aware. Sɛnea Bible kyerɛ no, ade biako pɛ a wotumi gyina so gyae aware san ware foforo ne awaresɛe anaa “aguamammɔ.”—Mateo 5:32.

[Ase hɔ asɛm]

[Mfonini wɔ kratafa 27]

Ɛsɛ sɛ yebu aware sɛ nhyehyɛe a ɛtra hɔ daa

[Mfonini wɔ kratafa 28]

Yesu kae sɛ yɛmfa mfiri ‘mpɛn aduɔson ahorow ason’