Twɛn Boasetɔ Mu

OGUANHWƐFO a na bere nyinaa ɔteɛm “Ɔpataku reba!” bere a pataku biara nni hɔ no behui bere bi akyi sɛ, bere a ɔteɛɛm hwehwɛɛ mmoa no, obiara ammua no. Saa ara na nnɛ, nnipa pii bu wɔn ani gu bɛn a Yehowa da no abɛn so esiane sɛ wɔate kɔkɔbɔ pii a amma mu nti. Nokwasɛm a ɛyɛ sɛ nnipa pii ntumi nhu kɔkɔbɔ a ɛyɛ papa a enti ɛsɛ sɛ wotie no ama Onyankopɔn tamfo kɛse, Satan, “hann bɔfo” ɔtorofo no, anya hokwan kɛse.—2 Korintofo 11:14.

Sɛ wɔn a wɔasom Yehowa akyɛ no mpo gye wɔn ho di a, ebetumi ayɛ asiane ama wɔn. Dɛn ntia? Susuw ɔsomafo Petro kɔkɔbɔ a ɔde mae wɔ afeha a edi kan no mu no ho hwɛ.

Ma W’adwene mu Nna Hɔ Fann

Ná Petro krataa a efi honhom mu a ɛto so abien no yɛ nkaebɔ ma tete Kristofo no, na saa ara na ɛte wɔ yɛn fam nso. Ɔkyerɛw sɛ: “Adɔfo, eyi ne nhoma a ɛto so abien a merekyerɛw mabrɛ no. Emu na mede nkae mekanyan mo adwene gyenennyenen.” (2 Petro 3:1) Dɛn nti na eyi ho hia Petro saa? Petro si fɛwdifo a wɔwɔ hɔ a wɔn fɛwdi no toto sɛnea nneɛma gye ntɛmpɛ wɔ bere a Onyankopɔn asomfo wom no ase so dua. Mprempren ne bere a ɛsɛ sɛ yɛhwɛ yiye na wɔn a wosi atwetwe no annaadaa yɛn. Enti Petro hyɛ n’akenkanfo no nkuran sɛ ‘wɔnkae nsɛm a adiyifo kronkron no aka ato hɔ no.’ (2 Petro 3:2; Asomafo no Nnwuma 3:22, 23) Dɛn na na adiyifo no aka?

Ná Onyankopɔn asomfo anokwafo atwe adwene asi sɛnea ɔsoro atemmu maa amumɔyɛ to twae no so mpɛn pii. Petro kae n’akenkanfo no Noa nna no mu Nsuyiri a Onyankopɔn nam so de ne ho gyee nsɛm mu bere a na abɔnefosɛm ayɛ asase so ma no. Nsuyiri a na ano yɛ den no de saa bere no so wiase no baa awiei koraa. Nanso Onyankopɔn koraa Noa ne n’abusua ne ade a ɛte ase, “ɔhonam nyinaa” mu bi, so wɔ adaka bi mu. Anansesɛm a wɔto no wiase nyinaa di adanse sɛ Bible mu asɛm yi yɛ nokware.a—Genesis 6:19; 2 Petro 3:5, 6.

Petro ka gye a Onyankopɔn de ne ho gyee nsɛm mu no ho asɛm sɛ biribi a nnipa bi ‘anhu.’ Afei saa bere no so fɛwdifo no daadaa afoforo ma wɔyɛɛ anibiannaso. Nanso ɛnsɛ sɛ yɛma yɛn werɛ fi nea Yehowa ayɛ dedaw no da. Petro ka kyerɛ yɛn sɛ: “Ɔsoro ne asase a ɛwɔ hɔ yi, wɔde n’asɛm no ara akora so, na wɔde asie ama ogya, ama atemmu ne nnipa amumɔyɛfo sɛe da no.” (2 Petro 3:7) Yiw, Onyankopɔn de ne ho begye nsɛm mu bio.

Onyankopɔn Nyɛ Nyaa

Mfe mpempem pii atwam dedaw. Dɛn nti na Onyankopɔn atwɛn bere tenten saa sɛ obedi adesamma nsɛnnennen ho dwuma? Ɛno nso, Petro dan adwene kɔ nokwasɛm foforo so. Ɔka sɛ: “Adɔfo, mommma ade biako yi nnhintaw mo, sɛ da koro yɛ [Yehowa, NW] sɛ mfirihyia apem, na mfirihyia apem yɛ no sɛ da koro.” (2 Petro 3:8) Ɛsono sɛnea Yehowa bu mmere wɔ yɛn de ho. Wɔ Onyankopɔn a ɔte hɔ daa no fam no, efi bere a wɔbɔɔ Adam besi nnɛ nnu nnawɔtwe mpo. Nanso ɛmfa ho adwene biara a yɛwɔ wɔ bere ho no, mfe apem ne da koro biara a etwam no twe yɛn bɛn Yehowa atirimpɔw mmamu ho.

“Wopɛ ntɛm a wonnya ntɛm” yɛ abebusɛm bi a ɛkyerɛ sɛ sɛ wotwɛn biribi kɛkɛ a, ɛma ɛyɛ te sɛ nea ɛmma ntɛm da no. Nanso Petro hyɛ nyansa sɛ ‘yɛntwɛn na yɛmma Yehowa da no ba nyɛ ntɛm.’ (2 Petro 3:12) Ɔkwan bɛn so na yebetumi anya adwene a ɛbɛma yɛasiesie yɛn ho ama gye a Onyankopɔn de ne ho begye nsɛm mu nnansa yi ara no?

Nneyɛe Kyerɛ Pii Sen Nsɛm a Wɔka

Petro twe adwene si nnwuma ne nneyɛe so. Ɔka “abrabɔ kronkron” ne “onyamesom pa” ho asɛm. (2 Petro 3:11) Dɛn na eyinom hwehwɛ?

Nea ɔyɛ Onyankopɔn somfo amapa no yɛ ade a ɛsɔ N’ani. Nokware somfo a ɔte saa no gyidi da adi wɔ ne nneyɛe mu. Eyi ma ɔda nsow wɔ wɔn a wɔka sɛ wɔwɔ Onyankopɔn ne ne bɔhyɛ ahorow mu gyidi ara kwa no ho. Ebia woahyɛ no nsow sɛ Yehowa Adansefo baguam som adwuma no ma wɔda nsow. Wɔba wo fie bɛtwe adwene si Onyankopɔn bɔhyɛ ahorow a ɛwɔ Bible mu no so. Nanso wɔsan di wɔn anidaso ne nea wogye di no ho adanse kyerɛ nkurɔfo wɔ baabiara a wohyia wɔn.

Ɔdansefo a onya pii yɛ wɔ ne gyidi a ɔka ho asɛm kyerɛ afoforo mu no hyɛ ne gyidi mu den na ɔyɛ den. Asɛm a obi taa ka no nya ne so nkɛntɛnso, na bere koro no ara no ɛma no anigye ne abotɔyam. Sɛ yɛbɔ Onyankopɔn Ahenni ho asɛmpa no dawuru a, ɛma yɛsɔ Yehowa ani nso. Yenim sɛ sɛnea Petro yɔnko somafo Paulo kae no, ɔnyɛ ‘nea ɔnteɛ a ɔbɛma ne werɛ afi yɛn adwuma ne ɔdɔ mu a yefi bɔ ne din ho mmɔden no.’—Hebrifo 6:10; Romafo 10:9, 10.

Dɛn na afi Ahenni asɛmpa yi a wɔbɔ ho dawuru denneennen wɔ mprempren nneɛma nhyehyɛe bɔne yi nna a edi akyiri yi mu aba? Nnipa komapafo ɔpehaha pii resua sɛ wɔne Yehowa benya abusuabɔ a emu yɛ den, na wɔanya n’adɔe na wɔanya nokware anigye afi daa nkwa wɔ asase so paradise ho akwanhwɛ no mu.

Nea Ɛbɛba Ho Nimdeɛ a Wodi Kan Nya

Ɛwom sɛ yenim wɔ Bible mu sɛ Yehowa Nyankopɔn de ne ho begye nsɛm mu wɔ ne bere a ɛsɛ mu, nanso ehia sɛ yetie kɔkɔbɔ foforo a Petro de ma no. “Sɛ munim dedaw nti, monhwɛ mo ho so yiye, na wɔamfa amumɔyɛfo nnaadaasɛm no amfa mo ankɔ bi, na moamfi mo ankasa tim a moatim no mu anhwe ase.”—2 Petro 3:17.

Akyinnye biara nni ho sɛ na Yehowa nim dedaw sɛ ebinom a wonni gyidi a emu yɛ den no abam betumi abu wɔ kyɛ a ɛte sɛ nea ne ho a ɔde begye nsɛm mu akyɛ no ho. Ná onim nso sɛ nnipa abɔnefo nkɛntɛnso betumi asɛe n’asomfo anokwafo no adwene, anaa anyɛ yiye koraa no, atoto gyidi a wɔwɔ sɛ Onyankopɔn din ho a wɔbɛtew no abɛn no ase. Hwɛ awerɛhosɛm ara a ɛbɛyɛ sɛ obi a n’ase atim bɛhwe ase wɔ nna a edi akyiri yi mu!

Saa bere yi nyɛ bere a ɛsɛ sɛ yegye kyim anaa yɛma yɛn adwenem yɛ yɛn naa wɔ nea Yehowa bɛyɛ ho. (Hebrifo 12:1) Mmom no, eyi ne bere a ɛsɛ sɛ yenya anisɔ kɛse wɔ nea afi Yehowa boasetɔ mu aba no ho—nkwagye ho anidaso a nnipa ɔpepem pii a wofi amanaman so a wɔabɛyɛ nnipakuw kɛse anya, na wɔhwɛ kwan sɛ wobetwa ahohiahia kɛse a ɛreba no. (Adiyisɛm 7:9, 14) Petro tu fo sɛ: “Munnyin yɛn Awurade ne agyenkwa Yesu Kristo dom ne nimdeɛ mu. Ɔno na anuonyam nka no afei ne daa.”—2 Petro 3:18.

‘Momfa Mo Ho Nsie Onyankopɔn Dɔ Mu’

Ahenni asɛnka adwuma a yɛbɛyere yɛn ho ayɛ na yɛakɔ Kristofo nhyiam ahorow daa akɔsom na yɛasua Onyankopɔn Asɛm daa no bɔ yɛn ho ban. Ne saa nti, yɛrennya bere mfa nnwennwen tebea a ɛrekɔ so sɛe wɔ nnɛ nhyehyɛe bɔne yi mu no ho nhaw yɛn ho. Ɛnsɛ sɛ ehu ne dadwen ahorow bunkam nokware Kristofo asetra so. (1 Korintofo 15:58) Dodow a yenya pii yɛ wɔ Yehowa som mu no, dodow no ara na bere sen ntɛmntɛm.

Yesu nuabarima Yuda a ɔtraa ase wɔ Petro bere so no tu yɛn fo sɛ: “Mo, adɔfo, momfa mo ho nsi mo gyidi kronkron no so mmɔ mpae Honhom Kronkron mu mfa mo ho nsie Onyankopɔn dɔ mu, na montwɛn yɛn Awurade Yesu Kristo mmɔborohunu nkɔ daa nkwa mu.” (Yuda 20, 21) Hyɛ hia a adwempa a yebenya denam mpae a yɛbɛbɔ daa no so ho hia no nsow. (1 Tesalonikafo 5:17) Afei Yuda de ka ho sɛ: “Na akyinnyegyefo nso, munhu wɔn mmɔbɔ, ebinom nso munhwim wɔn mfi gya mu nnye wɔn nkwa, na ebinom nso momfa osuro nhu wɔn mmɔbɔ, na montan atade a ɔhonam nkekae akeka mu nso.” (Yuda 22, 23) Hwɛ hia a ehia sɛ yɛhyɛ yɛn ho yɛn ho den wɔ mmere a emu yɛ den yi mu! Na hwɛ hia a ɛho hia sɛ yɛrennan “nkwagye da” a wɔatwe mu yi, hokwan a yɛde bɛbɔ “ahohwi” a abu so nnɛ wɔ wiase a ne bra asɛe yi mu.—Yuda 4; 2 Korintofo 6:1, 2.

Sɛ wutie afotu a Petro, Paulo, ne Yuda fi ɔdɔ mu de mae yi, na wunya pii yɛ wɔ Onyankopɔn som adwuma mu a, wubetumi de boasetɔ atwɛn bere a Yehowa de ne ho begye nsɛm mu no. Nanso so wobɛyɛ saa?

Ntwentwɛn wo nan ase sɛ wobɛkɔ akohu Adansefo a wɔwɔ wo mpɔtam hɔ no ma wɔaboa wo ahyɛ gyidi a wowɔ wɔ Ɔbɔadeɛ no bɔhyɛ a ɛfa daa nkwa ho no mu den. Sua nea ehia a ɛbɛma woafata sɛ wubenya kyɛfa wɔ wiase nyinaa adansedi adwuma a wɔrensan nyɛ no bio a ɛbɛba awiei wɔ ahohiahia kɛse a ɛreba no mu no. (Marko 13:10) Ɛno bɛma woanya asetra wɔ wiase foforo a trenee te mu a Yehowa hyɛ ho bɔ no mu anidaso. (2 Petro 3:13) Tie ne nkaebɔ no! Twɛn boasetɔ mu! Nya pii yɛ!

[Ase hɔ asɛm]

[Kratafa 7 mfonini]

Sua Onyankopɔn bɔhyɛ ahorow a ɛfa Paradise ho no ho ade nnɛ

[Mfonini Fibea wɔ kratafa 5]

Ɔpataku: Animals/Jim Harter/Dover Publications, Inc.; oguanhwɛfo kumaa: Children: A Pictorial Archive from Nineteenth-Century Sources/Grafton/Dover Publications, Inc.