So Woreyɛ Nea Wubetumi Nyinaa?

“MƐYƐ nea metumi nyinaa.” Hwɛ sɛnea mpɛn pii no wɔde “nanso” ne anoyi ahorow a enti obi ntumi nyere ne ho toa nsɛm yi so! Na yɛn ahosohyira ma Yehowa no nso ɛ? So yɛredi yɛn bɔhyɛ a ɛne sɛ yɛbɛyɛ nea yebetumi nyinaa ama no no so?

Sɛ́ obi behyira ne ho so no kyerɛ sɛ ‘ɔde ne ho nyinaa bɛma onyame bi som anaa nnwuma kronkron.’ Yesu yɛɛ pii de kyerɛɛ nea ahosohyira ma Yehowa kyerɛ denam eyi a ɔkae so: “Sɛ obi pɛ sɛ odi m’akyi a, ma ɔmpa ne ho akyi, na ɔmma n’asɛndua so, na onni m’akyi.” (Mateo 16:24) Obi a wapa ne ho akyi na wahyira ne ho so ama Onyankopɔn no, ɔfa ɔsoro apɛdeyɛ sɛ ade a ehia sen biara wɔ n’asetra mu a ɛsɛ sɛ odi akyi.

Sɛ́ nnipa a yɛahyira yɛn ho so no, ɛsɛ sɛ yehwɛhwɛ yɛn ho mu hwɛ sɛ ebia yɛreyɛ nea ɛne yɛn ahosohyira no hyia a. Bere a Petro rehyɛ Kristofo a wɔasra wɔn nkuran no, ɔkyerɛɛ nea enti a ɛsɛ sɛ yehwehwɛ yɛn ho mu no sɛ: ‘Monyɛ nea mubetumi nyinaa nhyɛ mo frɛ ne mo paw no den; na sɛ moyɛ eyinom a, morenhintiw da.’ (2 Petro 1:10) Yiw, sɛ yɛyɛ nea yebetumi nyinaa a, awiei koraa no yɛrenni nkogu wɔ honhom mu.

Nea Yebetumi Ayɛ Nyinaa Betumi Anya Nkɔso

Sɛ wɔtrɛw mu a, wɔhwɛ kwan sɛ Onyankopɔn asomfo a wɔahyira wɔn ho so nyinaa bɛyɛ nea wobetumi nyinaa de asɔ Yehowa ani. Nanso nea yebetumi ayɛ nyinaa wɔ Onyankopɔn apɛdeyɛ mu no betumi anya nkɔso. Wɔ abarimaa a wadi mfe abiɛsa fam no, ebia nea obetumi ayɛ aboa ne maame nyinaa ne sɛ ɔbɛyɛ adwuma ketewaa bi, nanso ogu so renyin no, obetumi ayɛ nea ɛsen saa. Saa ara na yɛn honhom mu onyin nso te​—ebia nea na yetumi yɛ nyinaa bere bi a atwam no renyɛ saa bio. Biribi ka yɛn ma yɛyɛ pii ma Yehowa.

Anisɔ kɛse a yɛanya ama Yehowa no ka yɛn ma yɛyɛ pii. Sɛ yɛn ankasa yesua n’Asɛm Bible no a, anisɔ a yɛwɔ wɔ nea wayɛ ama yɛn ho no mu yɛ den. Sɛ́ nhwɛso no, sɛ yɛyɛ nhwehwɛmu na yesusuw sɛnea Yehowa somaa ne Ba sɛ ɔmfa ne kra mmegye adesamma mfi bɔne mu no ho yiye a, ɛka yɛn ma yɛsom Nea ofii agyede nhyehyɛe no ase no. (Yohane 3:16, 17; 1 Yohane 4:9-11) Dodow a ‘yɛka hwɛ hu sɛ Yehowa yɛ’ no, dodow no ara na yɛn koma ka yɛn ma yɛsom no.​—Dwom 34:8.

Bere nyinaa somfo bi a wɔfrɛ no Jetter huu eyi. Nea ɛbɛyɛ a obetumi ahwehwɛ nea ɔresua no mu yiye nti, oyii ɔdan ketewaa bi sii hɔ de yɛɛ saa. Ɔyɛɛ saa na sɛ ɔreyɛ nhwehwɛmu a, n’adwene nyinaa atumi akɔ so. Ɔwɔ Watchtower Publications lndex ahorow ne The Watchtower ne Awake! “bound volume” horow a ne nsa betumi aka wɔ ne nhoma pon so. Ɔka sɛ: “Sɛ minya nsɛm a ɛyɛ anigye a, ntɛm ara meka kyerɛ afoforo.”

Nanso, sɛnea aduan a ɛyɛ dɛ a yebedi no nnakoro nnakoro nyi hia a ehia sɛ yedidi daa mfi hɔ no, saa ara na Bible mu nhwehwɛmu a ɛkɔ akyiri a yɛbɛyɛ pɛnkoro no nyi hia a ehia sɛ yedi honhom fam aduan daa no mfi hɔ. Ruth kyerɛ anisɔ wɔ ahiade yi ho, efisɛ, ɔkae sɛ ná n’abusua bom kenkan Bible no anɔpa ne anwummere biara bere a wɔadidi awie. Mprempren a wadi mfe 81 a ɔde bɛboro mfe 60 ayɛ bere nyinaa som adwuma no, sɛ onyan anɔpa nnɔn 6 da biara a, ɔkenkan Bible. Sɛ Ruth nsa ka Ɔwɛn-Aban ne Nyan! nsɛmma nhoma no ara pɛ a, ogye bere kenkan. Ɔkenkan emu asɛm biara anyɛ yiye koraa no mpɛn abiɛsa anaa anan ansa na wasua wɔ asafo no mu. Ɔka sɛ, “Onyankopɔn Asɛm a wubesua ne nea ehia a ɛbɛma woayɛ den wɔ gyidi no mu.” Aboa no nso ma wakɔ so ayɛ asɛmpatrɛw adwuma no mfe pii.

Nea Yebetumi Nyinaa a Yɛbɛyɛ de Aboa Afoforo

Sɛ yesua Onyankopɔn Asɛm kɔ akyiri daa a, mmɔden a yɛbɔ sɛ yɛbɛsom Onyankopɔn no yɛ kɛse, na biribi a ɛhyɛ yɛn mu ka yɛn ma yɛyɛ pii. (Fa toto Yeremia 20:9 ho.) Mmɔdenbɔ a ɛte sɛɛ kaa Hirohisa ma owiee ne som adwuma koraa. (2 Timoteo 4:5) Ɔtraa ofie a ɔwofo biako pɛ na ɔtetee mmofra nkumaa baanan ka ne ho mu. Bere a na Hirohisa nnii mfe aduonu no, na ɔsɔre ahemadakye nnɔnabiɛsa kɔtɔn atesɛm nkrataa de boa n’abusua. Ɔpɛe sɛ ɔyɛ pii boa afoforo ma wɔte Yehowa ho asɛm, enti obisaa akwampae adwuma no, sɛnea wɔfrɛ Yehowa Adansefo bere nyinaa som adwuma no, mu kwan. Ɛwom sɛ na ɔyɛ abofra de, nanso n’ani gyei sɛ ɔbɛboa afoforo ma wɔabɛka ne ho na wɔayɛ nea wobetumi nyinaa ayi Yehowa ayɛ.

Nea yebetumi nyinaa a yɛbɛyɛ aboa afoforo kyerɛ sɛ yebetu mpɔn wɔ yɛn som adwuma no mu. Yesu hyɛɛ n’asuafo no nkuran bere bi sɛ: “Sɛ munim eyinom na moyɛ a, nhyira ne mo.” (Yohane 13:17) Naomi yɛ nhwɛso pa de nyansahyɛ ahorow a Yehowa ahyehyɛde de ma na yɛatumi anya nkɔso wɔ yɛn som adwuma mu no di dwuma. Ná ɛyɛ no den sɛ ɔne wɔn a onnim wɔn bɛkasa wɔ afie afie, na mpɛn pii no, sɛ ogyina ɔpon ano a na onhu nea ɔnka. N’asafo mu mpanyimfo hyɛɛ no nkuran sɛ ɔmfa nyansahyɛ ahorow a ɛwɔ Reasoning From the Scriptures nhoma no fã a ɛse “Introductions for Use in the Field Ministry” no nyɛ adwuma.a Osuaa nnianim nsɛm a ɛwɔ “Family/Children” ase no guu ne tirim, na ɔde yɛɛ adwuma hwɛɛ mpɛn pii. Nea efi mu bae ne sɛ otumi ne ɔbeawarefo bi a ɔhwɛ fie a ɔwɔ ne mfe 30 mu bɔɔ nkɔmmɔ. Ɔbea yi baa Ahenni Asa so mpo ansa na Naomi resan akɔ ne nkyɛn. Wɔhyehyɛɛ Bible adesua. Ɔbea yi ne ne kunu nyinaa yɛ Kristofo a wɔabɔ asu mprempren, na wɔne wɔn mma renya abusua asetra a anigye wom mu anigye.

Nea Yebetumi Nyinaa a Yɛbɛyɛ De Akyerɛ Afoforo ho Anigye

Yebetumi nso asuasua ɔsomafo Paulo a ɔkaa eyi no: “Eyi nyinaa, asɛmpa no nti na meyɛ, na manya emu kyɛfa.”​—1 Korintofo 9:22, 23.

Hatsumi da su yi adi. Bere a Hatsumi reyɛ afie afie asɛnka adwuma no, ɔbea bi kasaa obu kwan so kyerɛ no wɔ afiri bi a wɔde kasa so sɛ onni adagyew a ɔne no de bɛkasa. Esiane sɛ ofiewura no kasaa bɔkɔɔ nti, Hatsumi kɔɔ so sraa no. Ofiewura no kasaa afiri no so nkutoo, a wampue amma Hatsumi nkyɛn da. Eyi kɔɔ so mfe abien ne fã.

Da bi Hatsumi sakraa bere a ɔde kɔ hɔ no yɛɛ no anwummere. Wanto obiara. Nanso bere a ɔrefi hɔ no, obi a onim no bisae wɔ n’akyi sɛ: “Hena ne no?” Ná ɔbea no fi abɔnten bae nkyɛe koraa. Bere a ɔtee Hatsumi din no, ɔyɛɛ ntɛm buae sɛ, “O, ɛyɛ wo a wobɛsra me no. Meda wo ase sɛ wudwen me ho bere nyinaa.” Esiane sɛ na ɔbea no agyae Bible adesua a ɔne Yehowa Adansefo yɛ wɔ baabi foforo nti, ɛyɛɛ no aniwu dodo sɛ ɔbɛma Hatsumi aba ne fie. Wɔhyehyɛɛ Bible adesua bio, na ofiewura no renya nkɔso yiye. So wɔn a yɛto wɔn wɔ afie afie asɛnka adwuma mu no ho hia yɛn saa?

Yɛ Nea Wubetumi Nyinaa

Yehowa ani gye mmɔden a yɛbɔ sɛ yɛbɛyɛ nea yebetumi nyinaa de asom no no ho. Ɔte sɛ agya bi a ne ba de akyɛde brɛ no. Bere a bere kɔ so no, ebia akyɛde no bɛsesa esiane abofra no mfe ne ne sika nti. Sɛnea agya no ani gye sɛ obegye akyɛde biara a ne ba no fi komam de ma no no, saa ara na Yehowa gyina yɛn honhom mu onyin so kyerɛ anigye wɔ ɔsom a efi koma nyinaa mu a yɛde ma no no ho.

Ɛda adi sɛ ntease biara nnim sɛ yɛde nea yetumi yɛ nyinaa bɛtoto afoforo de ho. Sɛnea Paulo ka no, yebenya biribi ahoahoa yɛn ho na “enye obi ho.” (Galatifo 6:4) Momma yɛnkɔ so mfa ɔsomafo Petro afotu yi nyɛ adwuma: ‘Monyɛ nea mubetumi nyinaa, na wɔahu mo sɛ nnipa a wonni nkekae ne dɛm asomdwoe mu.’​—2 Petro 3:14.

[Ase hɔ asɛm]

[Mfonini wɔ kratafa 29]

So woreyɛ nea wubetumi nyinaa de asɛnka adwuma no ho nyansahyɛ ahorow adi dwuma?