Vatican Codex Ahintasɛm No

CODEX Vaticanus 1209 pue wɔ Vatican Nhomakorabea nhoma a edi kan a nhoma ahorow din wowom a wɔyɛe afe 1475 no mu. Obiara nnim nea ɛyɛe a ɛbaa hɔ. Ɛyɛ Helafo nhoma mmobɔwee akɛse abiɛsa a atra hɔ abesi nnɛ no mu biako, na ɛsom bo te sɛ ne bere so de a ɛne afeha a ɛto so anan no mu Sinaiticus ne afeha a ɛto so anum mfiase mu hɔ Alexandrinus no ara pɛ.

Ɛwom sɛ na nhomanimfo nim sɛnea saa Vatican nhoma mmobɔwee yi ho hia yiye wɔ afeha 16 mfiase mu hɔ pɛɛ no de, nanso wɔn mu kakraa bi na wɔmaa wɔn kwan ma wɔhwehwɛɛ mu. Vatican nhomakorabea no hyehyɛɛ nhoma mmobɔwee no mu nsɛm a wɔkenkan no nnidiso nnidiso wɔ 1669 mu de, nanso eyi yerae na wɔanhu kosii 1819 mu.

France Ɔhempɔn Napoleon ko faa Rome wɔ 1809 mu na ɔde nhoma mmɔbowee a ɛsom bo no kɔɔ Paris, faako a nhomanimfo a wagye din Leonhard Hug hwehwɛɛ mu, nanso bere a wotuu Napoleon ade so no, wɔsan de nhoma mmɔbowee no baa Vatican wɔ 1815 mu. Ɛdan ahintasɛm bio wɔ mfe 75 a edi hɔ no mu a na Vatican de asie.

Wɔmaa Konstantin von Tischendorf, wiase no mu nhoma mmobɔwee ho abenfo no mu biako kwan ma ɔde nnɔnhwerew asia pɛ hwehwɛɛ nhoma mmobɔwee no mu wɔ 1843 mu bere a na wɔama watwɛn asram pii akyi no. Mfe abien akyi no, wɔmaa Engiresini nhomanimfo, Ɔbenfo S. P. Tregelles kwan ma ɔhwɛɛ nhoma mebowee no nanso wɔamma wɔanhwehwɛ mu. Ɔkae sɛ: “Ɛwom sɛ mihuu NM (Nhoma Mmobɔwee) no mpɛn pii de, nanso wɔamma kwan na mede adi dwuma; na wɔamma mammue mu a wɔrenhwehwɛ me kotoku mu nnye me pen, adubiri, ne nhoma mfi me nsam; na prelati [asɔfo] baanu ne me bɔɔ nkɔmmɔ wɔ Latin mu bere nyinaa wɔ bere koro no ara mu, na sɛ mehwɛ asɛm bi kyɛ a, wohwim nhoma no fi me nsam.

Dɛn nti na na Roman Katolek Asɔre no mpɛ koraa sɛ wɔde ne nhoma mmobɔwee a ɛsom bo yiye no bɛkyerɛ wiase no?

Dɛn Nti na Wɔde Siei?

Wɔ Roma Katolek Asɔre no fam no, Kyerɛw Kronkron no nkyerɛase a ɛne Latin Vulgate no da so ara yɛ ne “tumi titiriw.” Sɛnea Pius XII krataa a ɔde kɔmaa asɔfo mpanyin a wɔato din sɛ Divino Affiante Spiritu a wotintimii wɔ afe 1943 mu kyerɛ no, wobu saa afeha a ɛto so anan no mu Latin nkyerɛase a Jerome yɛe no nso sɛ “gyidi ne abrabɔ ho mfomso biara rentumi mma mu.” Na Hebri ne Hela mu kyerɛw nsɛm a wɔkyerɛɛ Vulgate ase fii mu no nso ɛ? Krataa no ka sɛ eyinom som bo na ‘ɛfoa’ tumi a Vulgate no wɔ no ‘nsɛmmoa.’ Enti wommuu Hela kasa mu nhoma mmobɔwee biara, Vatican Codex no mpo sɛ ɛwɔ tumi te sɛ Latin Vulgate no da. Saa gyinabea a Roman Katolek Asɔre no apaw yi de ɔhaw ahorow aba.

Sɛ nhwɛso no, bere a afeha 16 nhomanimfo Erasmus yɛɛ ne Hela kasa mu “Apam Foforo” nkyerɛase no, ɔsrɛɛ wɔn a wɔhwɛ Vatican Codex no sɛ wonyi nsɛm a ɛnyɛ nokware no mfi 1 Yohane ti 5, nkyekyem 7 ne 8. Nea Erasmus kae no teɛ nanso nnansa yi ara wɔ 1897 mu no, Paapa Leo XIII kae sɛ Vulgate mu Latin kyerɛwsɛm a wɔafra mu no yɛ nokware. Ɛyɛ bere a wotintim nnɛyi Roman Katolek nkyerɛase ahorow no nkutoo na wɔagye saa kyerɛwsɛm mu mfomso yi atom.

Bere a wɔde Codex Sinaiticus no kyerɛɛ wiase no wɔ afeha 19 awiei mu hɔ no, Roman Katolekfo mpanyimfo no hui pefee sɛ wɔn Codex Vaticanus no aba asiane a ɛne sɛ wɔremmu no ahe biara bio no mu. Awiei koraa no ebeduu afeha no awiei no, na ne mfonini ahorow a eye wo hɔ.

Nhoma mmobɔwee no nkrataa 759. Genesis mu nsɛm pii, nnwom no mu bi ne Kristofo Hela Kyerɛwnsɛm no afã horow a etwa to no nnim. Wɔakyerɛw wɔ mmoa nhoma tratraa a ɛyɛ papa a wosusuw sɛ ɛyɛ adowa nhoma so wɔ ɔkwan a ɛyɛ mmerɛw na ɛyɛ fɛ so. Ne din a wɔahyɛ da de ama no ne Codex B na wobetumi ahu nnɛ wɔ Vatican Nhomakorabea. Ɛnyɛ nea wɔde sie bio na afei wɔate ne bo a ɛsom no ase na wɔkyerɛ ho anisɔ wɔ wiase nyinaa.

[Mfonini wɔ kratafa 31]

Vatican de Codex Vaticanus a ɛho hia no siei mfehaha pii

[Mfonini Fibea]

Facsimile from Codices E Vaticanis Selecti