Yesu—Sodifo A “N’adifi Fi Tete Nteredee”

WO HO pere wo, bere a wohwɛ wo busuani bi a wuhuu no akyɛ kwan. Awiei koraa no, ɔba ma wode anigye kohyia no kwan. Woyɛ aso tie no bere a ɔka nea enti a ne papa somaa no baa wo nkyɛn no. W’ani bɛba wo ho so no, na bere a ɛsɛ sɛ ɔsan kɔ nea ofi bae no aso. Wode awerɛhow gya no kwan. Afei wo ho fi ase san wo bere a wunya nkra sɛ wakodu asomdwoe mu no.

Akyiri yi, bere a wohwehwɛ wo nkrataa dedaw mu no, wuhu nkrataa bi a ɛka nneɛma a wo busuani no tumi yɛe bere tenten ansa na ɔretu kwan aba wo nkyɛn no ho asɛm tiawa. Nea nkrataa no ka kyerɛ wo no ma wuhu ne nipaban yiye, na ɛma wunya ne nsrahwɛ no ne adwuma a mprempren ɔyɛ no ho anisɔ kɛse.

“Fi Tete Nteredee”

Tete nkyerɛwee a na afeha a edi kan mu Yudafo no wɔ no bi ne Onyankopɔn diyifo Mika nkyerɛwee, a ɔkyerɛw no mfe ahanson a na atwam no. Ɛkyerɛɛ baabi a wɔbɛwo Mesia no. “Wo, Bet-Lehem a ɛwɔ Efrata, wo a wusua sɛ wobɛfra Yuda mpem mu, wo mu ara na obi bɛba ama me, na wabɛyɛ Israel so difo no; na n’adifi fi tete nteredee, fi daa a enni ase nna mu.” (Mika 5:2) Sɛnea nsɛm yi daa no adi no, ampa ara wɔwoo Yesu wɔ Yudea akuraa a wɔfrɛ no Bet-Lehem wɔ afe a nnɛ wɔfrɛ no 2 A.Y.B. mu. Nanso ɔkwan bɛn so na na n’adifi “fi tete nteredee”?

Yesu traa ase ansa na ɔrebɛyɛ onipa. Wɔ ɔsomafo Paulo krataa a ɔde kɔmaa Kristofo a wɔwɔ Kolose no mu no, ɔkaa Yesu ho asɛm sɛ “Onyankopɔn a wonhu no no suban ne abɔde nyinaa abakan.”—Kolosefo 1:15; yɛn na yɛasi ɔfã bi so dua no.

Sɛ yɛde asɛm a efi honhom mu a Ɔhene Salomo kyerɛwee wɔ Mmebusɛm nhoma no mu bedi dwuma a, Yehowa, nyansa Fibea no, bɔɔ ne Ba a odi kan no sɛ ‘n’adwuma a edi kan.’ Bere a Yesu wiee n’asase so nantew na ɔsan kɔɔ soro no, ɔkyerɛe sɛ ɔne “Onyankopɔn abɔde mfiase” ampa. Sɛ́ onipa a wɔka ne ho asɛm sɛnkyerɛnne kwan so sɛ nyansa no, Yesu kae sɛ: “[Yehowa siesiee] ɔsoro no, na mewɔ hɔ.”—Mmebusɛm 8:22, 23, 27; Adiyisɛm 3:14.

Efi mfiase no, Onyankopɔn Ba no nyaa dwumadi soronko bi sɛ́ “odwumayɛni panyin” wɔ N’agya nkyɛn. Hwɛ anigye ara a eyi de brɛɛ Yehowa! Mmebusɛm 8:30 (NW) ka sɛ, “na meyɛ nea [Yehowa] pɛ n’asɛm paa daa daa,” na ɛde ka ho sɛ, “na m’ani gye n’anim bere nyinaa.”

Akyiri yi, Yehowa too nsa frɛɛ N’abakan no ma obenyaa adesamma bɔ mu kyɛfa. Ɔkae sɛ: “Ma yɛnyɛ onipa wɔ yɛn suban so, te sɛ yɛn sɛso.” (Genesis 1:26, NW) Ne saa nti, obenyaa adɔde foforo. Yesu a na ɔmmɛyɛɛ nipa no kyerɛkyerɛɛ mu sɛ: “Na m’ani ka nnipa mma mu.” (Mmebusɛm 8:31) Wɔ ɔsomafo Yohane Asɛmpa no mfiase no, ogye toom sɛ Yesu nyaa kyɛfa wɔ adebɔ mu ansa na ɔrebɛyɛ nipa: “Ɛnam no so na wɔyɛɛ ade nyinaa, na wɔankwati no anyɛ biribiara a wɔyɛe.”—Yohane 1:3.

Yehowa Kasamafo

Yohane nsɛm no twe adwene si hokwan foforo a Onyankopɔn Ba no nyae so, sɛ́ ɔkasamafo. Efi mfiase na odii dwuma sɛ Asɛm no. Enti bere a Yehowa ne Adam kasae na akyiri yi, ɔne Adam ne Hawa nyinaa kasae no, ɛkame ayɛ sɛ ɔnam Asɛm no so na ɛkasae. Na hena na ɔfata sɛ ɔde Onyankopɔn akwankyerɛ a eye ma adesamma yiyedi ma sen obi a n’ani ka wɔn mu?—Yohane 1:1, 2.

Hwɛ sɛnea na ɛbɛyɛ Asɛm no yaw bere a ohui sɛ Hawa ne afei Adam ayɛ asoɔden atia wɔn Bɔfo no! Na hwɛ sɛnea na n’ani begye ho paa sɛ obesiesie ɔhaw a wɔn asoɔden no de baa wɔn asefo so no! (Genesis 2:15-17; 3:6, 8; Romafo 5:12) Bere a Yehowa ne Satan a ɔhyɛɛ Hawa nkuran ma ɔtew atua no rekasa no, ɔkae sɛ: “Mede ɔtan mɛto wo ne ɔbea no ntam, ɛne w’asefo ne [n’aseni, NW] ntam.” (Genesis 3:15) Esiane sɛ na Asɛm no ani tua nea esii wɔ Eden nti, ohui sɛ sɛ́ ɔbea no ‘aseni’ titiriw no, wɔbɛtan n’ani denneennen. Ná onim sɛ Satan yɛ owudifo.—Yohane 8:44.

Bere a akyiri yi Satan twaa ɔnokwafo Hiob mudi mu kura ho mpoa no, ɛbɛyɛ sɛ atoro sobo a wɔbɔɔ N’agya no hyɛɛ Asɛm no abufuw. (Hiob 1:6-10; 2:1-4) Nokwarem no, bere a Asɛm no di dwuma sɛ ɔbɔfo panyin no, wɔfrɛ no Mikael, a ne din no kyerɛ “Hena na Ɔte sɛ Nyankopɔn?” na ɛda sɛnea ogyina Yehowa akyi ko tia obiara a osi ne bo sɛ ɔbɛtew Onyankopɔn tumidi ho atua no adi.—Daniel 12:1; Adiyisɛm 12:7-10.

Wɔ Israelfo abakɔsɛm mu no, Asɛm no huu mmɔden a Satan bɔe sɛ ɔbɛdan nnipa afi ɔsom kronn ho no. Wɔ Akwantu a Israel de fii Misraim no akyi no, Onyankopɔn nam Mose so ka kyerɛɛ wɔn sɛ: “Hwɛ, meresoma ɔbɔfo adi w’anim akɔhwɛ wo ɔkwan mu, na ɔde wo akodu nea masiesie hɔ no. Hwɛ wo ho yiye wɔ n’anim, na tie ne ne; nnwen nhyɛ no, na ɔremfa mo mmarato mfiri mo, efisɛ me din wɔ no mu.” (Exodus 23:20, 21) Ná hena ne saa ɔbɔfo yi? Ɛda adi sɛ ɛyɛ Yesu a na ɔmmɛyɛɛ desani no.

Nokwaredi Mu a Ofi Brɛ Ne Ho Ase

Mose wui wɔ 1473 A.Y.B. mu, na wosiee n’amu wɔ “obon mu Moab asase so, Bet-Peor ntentenso.” (Deuteronomium 34:5, 6) Ɛda adi sɛ na Satan pɛ sɛ ɔde amu no di dwuma de ma abosonsom nya nkɔso. Mikael ko tiaa eyi, nanso ofi ahobrɛase mu de asɛm no hyɛɛ N’agya, Yehowa, nsa. ‘Wansi ne bo sɛ ɔbɛka asɛmmɔne abu Satan atɛn,’ enti Mikael ka kyerɛɛ Satan sɛ: “[Yehowa, NW] nka w’anim!”—Yuda 9.

Ɛno akyi na Israel fii ase ko dii Bɔhyɛ Asase a ɛne Kanaan no so. Bere a wɔbɛn Yeriko kurow no, Yosua nyaa awerɛhyem sɛ Asɛm no da so redi ɔman no anim. Ɛhɔ na ohyiaa ɔbarima bi sɛ watwe nkrante gyina hɔ. Yosua kɔɔ onipa a na ɔnyɛ ɔmannifo no hɔ kobisaa no sɛ: “Yɛn afã na wowɔ anaa yɛn atamfo afã?” Fa w’adwene bu sɛnea Yosua ho bedwiriw no bere a onipa a na ɔnyɛ ɔmannifo no daa ne ho adi sɛ: “Dabi, na afei na maba sɛ [Yehowa, NW] dɔm so safohene” no. Edi sɛ Yosua de n’anim butuu fam wɔ Yehowa nanmusini a ɔkorɔn a akyinnye biara nni ho sɛ ɔne Yesu a na ɔmmɛyɛɛ desani no anim, nea akyiri yi ɔbɛyɛɛ “obirɛmpɔn a wɔasra no” no.—Yosua 5:13-15; Daniel 9:25.

Ɔsan ne Satan dii asi bio wɔ Onyankopɔn diyifo Daniel bere so. Saa bere no, Mikael kɔboaa ne yɔnko ɔbɔfo bi bere a Persia ahemman no bapɔmma adaemone no ‘siankaa no’ nnawɔtwe abiɛsa no. Ɔbɔfo no kyerɛkyerɛɛ mu sɛ: “Hwɛ, mmapɔmma atitiriw no mu biako, Mikael, bae bɛboaa me, na metraa hɔ Persia ahene no nkyɛn.”—Daniel 10:13, 21.

Ansa na Ɔrebɛyɛ Ɔdesani ne Ne Desani Anuonyam

Wɔ 778 A.Y.B. mu, afe a Yuda Hene Usia wui no, Onyankopɔn diyifo Yesaia nyaa Yehowa ahengua kokuroo no ho anisoadehu. Yehowa bisae sɛ: “Hena na mensoma no, na hena na ɔbɛkɔ ama yɛn?” (Yɛn na yɛasi ɔfã bi so dua no.) Yesaia tuu ne ho mae, nanso Yehowa bɔɔ no kɔkɔ sɛ ne mfɛfo Israelfo no rentie ne mpaemuka no. Ɔsomafo Yohane de afeha a edi kan mu Yudafo a wɔannye anni no totoo Yesaia bere sofo no ho, na ɔkae sɛ: “Yesaia kaa eyinom, efisɛ ohuu n’anuonyam.” Hena anuonyam? Yehowa ne Yesu a na ɔmmɛyɛɛ desani a na ɔka ne ho wɔ ɔsoro aban no mu no.—Yesaia 6:1, 8-10; Yohane 12:37-41.

Bɛyɛ mfehaha bi akyi na Yesu nsa kaa ne dwumadi a na ɛsen biara de besi saa bere no. Yehowa de ne Dɔba no nkwa tumi fi soro bɛhyɛɛ Maria awotwaa mu. Asram akron akyi no, ɔwoo babarima, Yesu. (Luka 2:1-7, 21) Sɛnea ɔsomafo Paulo kae no: “Bere no wiee odu no, Onyankopɔn somaa ne ba [ma] ɔbea woo no.” (Galatifo 4:4) Ɔsomafo Yohane nso gye toom sɛ: “Asɛm no bɛyɛɛ ɔhonam, na ɔbɛtraa yɛn mu, na yehuu n’anuonyam sɛ agya no ba a ɔwoo no koro anuonyam, na ɔdom ne nokware ayɛ no ma.”—Yohane 1:14.

Mesia no Pue

Anyɛ yiye koraa no, bere a abofra Yesu dii mfe 12 no, na wabehu sɛ ɛsɛ sɛ ɔyɛ ne soro Agya no adwuma denneennen. (Luka 2:48, 49) Mfe 18 bi akyi no, Yesu baa Yohane Suboni hɔ wɔ Yordan Asubɔnten no mu ma ɔbɔɔ no asu. Bere a na Yesu rebɔ mpae no, ɔsoro buei, na honhom kronkron sian baa no so. Susuw nsɛm ara a ɛbaa n’adwene mu bere a ɔkaakaee mfe pepeankama a ɔde traa N’agya nkyɛn sɛ odwumayɛni panyin, ɔkasamafo, Onyankopɔn dɔm so asafohene, ne ɔbɔfo panyin, Mikael no ho. Ɛno akyi na ɔtee ahomekasɛm bere a N’agya ka kyerɛɛ Yohane Suboni sɛ: “Oyi ne me dɔba a ɔsɔ m’ani” no.—Mateo 3:16, 17; Luka 3:21, 22.

Akyinnye biara nni ho sɛ Yohane Suboni adwenem anyɛ no naa wɔ tra a Yesu traa ase ansa na ɔrebɛyɛ desani no ho. Bere a Yesu kɔɔ ne nkyɛn no, Yohane kae sɛ: “Hwɛ, Onyankopɔn guammaa a oyi wiase bɔne kɔ no ni.” Na ɔde kaa ho sɛ: “Oyi ne nea mekae wɔ ne ho sɛ: Ɔbarima bi di m’akyi reba a wadi me kan, na ɔwɔ hɔ ansa na mereba.” (Yohane 1:15, 29, 30; yɛn na yɛasi ɔfã bi so dua no) Ná ɔsomafo Yohane nso nim sɛ Yesu atra ase pɛn. Ɔkyerɛwee sɛ: “Nea ofi soro ba no sen nnipa nyinaa,” ne sɛ: “Nea ofi soro ba no sen nnipa nyinaa, na nea wahu na wate no, ɛno ho adanse na odi.”—Yohane 3:31, 32, yɛn na yɛasi ɔfã bi so dua no.

Bɛyɛ 61 Y.B. no, ɔsomafo Paulo hyɛɛ Hebrifo Kristofo nkuran sɛ ɛsɛ sɛ wohu Mesia no ba a ɔbaa asase so ne n’adwuma sɛ Ɔsɔfopanyin no so mfaso kosi ase. Bere a Paulo retwe adwene asi Yesu adwuma sɛ Ɔkasamafo so no, ɔkyerɛwee sɛ: “Onyankopɔn a . . . nna a edi akyiri yi mu ɔkasa kyerɛɛ yɛn, ɔba . . . a ɔnam no so nso yɛɛ mmeresanten no mu.” Sɛ́ eyi fa dwuma a Yesu dii sɛ “odwumayɛni panyin” bere a adebɔ rekɔ so no ho anaa ɛfa n’afã wɔ Onyankopɔn nhyehyɛe a ɔnam so siesie ɔne nnipa ntam nkakrankakra no ho no, Paulo nso di Yesu ho adanse wɔ ha sɛ ɔtraa ase ansa na ɔrebɛyɛ desani.—Hebrifo 1:1-6; 2:9.

Nokwaredi Fi “Tete Nteredee”

Paulo kyerɛw afotu yi kɔmaa afeha a edi kan mu Kristofo a na wɔwɔ Filipi no sɛ: “Momma adwene a ɛwɔ Kristo Yesu mu no ara ntra mo mu bi. Ɔno na ɔwɔ Onyankopɔn tebeam de, nanso wammu no mfasode sɛ ɔne Nyankopɔn sɛ, na mmom oyii ne mu guu hɔ faa akoa tebea too ne ho so dan nnipa sɛso, na sɛ ɔyɛɛ n’ade fae no, wohuu no sɛ onipa, ɔbrɛɛ ne ho ase yɛɛ osetie de kosii wu mu, asɛndua ho wu mu po.” (Filipifo 2:5-8) Yehowa fi ɔdɔ mu yɛɛ Yesu nokwaredi no ho biribi bere a onyan no fii awufo mu na ɔsan gyee no baa ne soro trabea hɔ no. Hwɛ nokwaredi ho nhwɛso a wɔyɛ no bere tenten a enni ano ara a Yesu ayɛ ama yɛn!—1 Petro 2:21.

Hwɛ aseda ara a yɛde ma sɛ Bible no ma yehu Yesu asetra ansa na ɔrebɛyɛ desani no ho biribi! Akyinnye biara nni ho sɛ ɛhyɛ yɛn bo a yɛasi sɛ yebesuasua nokwaredi a wɔde som ho nhwɛso a ɔyɛe no mu den, titiriw seesei a ɔredi ade sɛ Onyankopɔn Mesia Ahenni no Hene no. Momma yɛnkamfo “Asomdwoe-hene,” Kristo Yesu, yɛn Sodifo ne yɛn Kannifo a “n’adifi fi tete nteredee” no!—Yesaia 9:6; Mika 5:2.

[Kratafa 24 adaka]

Adanse A Ɛkyerɛ Sɛ Ɔtraa Ase Ansa Na Ɔrebɛyɛ Ɔdesani

Nsɛm a Yesu ankasa kae a ɛwɔ ase ha no di adanse kɛse sɛ ɔtraa ase ansa na ɔrebɛyɛ desani:

◻ “Obi mforoo soro, gye nea ofi soro sianee no, onipa ba.”—Yohane 3:13.

◻ “Ɛnyɛ Mose na ɔmaa mo abodoo a efi soro no, na mmom m’agya na ɔma mo nokware abodoo a efi soro no. Na Onyankopɔn abodoo ne nea osian fi soro ba na ɔma wiase nkwa no. . . . Misian mifi soro mebae, ɛnyɛ sɛ merebɛyɛ nea m’ankasa mepɛ, na mmom nea ɔsomaa me no apɛde.”—Yohane 6:32, 33, 38.

◻ “Eyi ne abodoo a esian fi soro ba, sɛ onipa nni bi, na wanwu. Mene abodoo a nkwa wɔ mu a misian mifii soro mebae no; sɛ obi di abodoo yi bi a, ɔbɛtra ase daa.”—Yohane 6:50, 51.

◻ “Na afei, sɛ muhu onipa ba no sɛ ɔrekɔ ɔsoro, nea ɔwɔ kan no nso ɛ?”—Yohane 6:62.

◻ “M’adanse no yɛ nokware, efisɛ minim nea mifi ne nea merekɔ . . . Mo de, mufi fam, me de, mifi soro. Mufi wi yi ase; me de, mimfi wi yi ase.”—Yohane 8:14, 23.

◻ “Sɛ mo agya ne Nyankopɔn a, anka mobɛdɔ me; na me de, mifii Nyankopɔn mu na mebae. Nanso ɛnyɛ me na mehyɛɛ me ho mebae, na ɔno na ɔsomaa me.”—Yohane 8:42.

◻ “Nokware, nokware, mise mo sɛ, Abraham nnya mmae no, na mewɔ hɔ.”—Yohane 8:58.

◻ “Agya, fa anuonyam a mewɔ wo nkyɛn ansa na wɔbɔɔ wiase no hyɛ me wo ankasa nkyɛn! Agya, wɔn a wode wɔn ama me no, mepɛ sɛ nea mewɔ no, wɔn nso mmɛka me ho, na wonhu m’anuonyam a womaa me no, efisɛ wodɔ me ansa na wɔhyɛɛ wiase ase.”—Yohane 17:5, 24.

[Kratafa 23 mfonini]

Yosua hyia Yehowa dɔm no so safohene