“Mɛma Woagyae Tuutuu No Si”

1, 2. Hena na sɛ osi tuutuu a ɛyɛ abofono paa?

ƐYƐ awerɛhow paa sɛ yebehu sɛ obi resi tuutuu. Sɛ yehu sɛ obi rebɔ ɔbra a ɛte saa a, ebia yebebisa yɛn ho sɛ: ‘Ɔbra a ɛyɛ aniwu sɛɛ de, ɛbaa no sɛn koraa na ɔde ne ho kɔhyɛɛ mu? Ɔyɛ abofra no, na wɔyɛ no ayayade wɔ fie anaa na wɔtan n’ani nti na ɔtew sii kurom kosii tuutuu no? Ohia buburoo na ɛma ɔtɔn ne ho anaa? Anaa na ne kunu yɛ no ayayade?’ Awerɛhosɛm a ɛte saa taa sisi wɔ wiase bɔne yi mu. Enti ɛnyɛ nwonwa sɛ Yesu Kristo daa ayamye adi kyerɛɛ tuutuufo bi. Osii so dua sɛ wɔn a wobenu wɔn ho na wɔasesa wɔn abrabɔ no betumi ahwɛ kwan sɛ wobenya asetena pa.—Mat. 21:28-32; Luka 7:36-50.

² Nanso, momma yɛnhwɛ tuutuuni foforo bi. Ɔno de, ɔno ara na wayɛ n’adwene sɛ obesi tuutuu. Ɛnyɛ no aniwu, na mmom ɛma ɔte nka sɛ ɔde ne ho! Wei da nkyɛn a, nea ɛma n’ani gye tuutuusi ho ne sɛ onya sika wom, na ɛma otumi nya nea ɔpɛ biara fi nkurɔfo hɔ. Sɛ wote sɛ ɔbea yi wɔ okunu a odi nokware, ɛnna wahyɛ da afi ne kunu no akyi resi tuutuu a, wobɛte nka sɛn? Akyinnye biara nni ho sɛ, ne ho bɛyɛ wo abofono, na nea ɔreyɛ no nso bɛyɛ wo tan. Yehowa Nyankopɔn nim sɛ tuutuuni a ɔte saa ho bɛyɛ yɛn abofono. Ɛno nti, ɔde atoro som toto tuutuusi ho mpɛn pii, sɛnea ɛbɛma yɛahu sɛ n’ani nnye atoro som ho koraa.

 3. Hesekiel nhoma no afã bɛn na yebesusuw ho wɔ saa ti yi mu?

³ Onyankopɔn nkurɔfo a na wɔwɔ Israel ne Yuda anni nokware. Enti ti ahorow mmienu bi wɔ Hesekiel nhoma no mu a ɛde wɔn totoo obi a osi tuutuu ho. (Hes., ti 16 ne ti 23) Nanso ansa na yebesusuw saa nsɛm no ho akɔ akyiri no, momma yenni kan nsusuw tuutuuni foforo bi ho. Bere a saa ɔbea no fii ase sii tuutuu no, na Hesekiel anaa Israel man no mpo nnya mmae, na nnɛ ne nnɛ nyinaa ogu so resi ne tuutuu no. Bible mu nhoma a etwa to a ɛne Adiyisɛm no ma yehu nea saa tuutuuni yi gyina hɔ ma.

4, 5. Dɛn ne “Babilon Kɛse” no, na yɛyɛ dɛn hu saa? (Hwɛ mfoni a ɛwɔ ti yi mfiase no.)

⁴ Anisoadehu a Yesu de maa ɔsomafo Yohane a ɛwɔ Adiyisɛm nhoma no mu no, ohuu “tuutuuni kɛse” bi a wɔsan frɛ no ‘Babilon Kɛse, tuutuufo maame’ no. (Adi. 17:1, 5) Mfe pii ni, nyamesom akannifo ne Bible ho abenfo abɔ mmɔden sɛ wobehu nea saa tuutuuni no gyina hɔ ma, nanso wontumi nhui. Ɛsono sɛnea obiara kyerɛ n’adwene wɔ ho. Ebinom ka sɛ ogyina hɔ ma Babilon. Ebinom nso ka sɛ ogyina hɔ ma Roma, ɛnna afoforo nso ka sɛ ogyina hɔ ma Roma Katolek Asɔre no. Nanso Yehowa Adansefo de, mfe pii ni na wɔahu nea “tuutuuni kɛse” no gyina hɔ ma ankasa. Ogyina hɔ ma wiase atoro som ahemman no. Yɛyɛ dɛn hu saa?

⁵ Bible kasa tia saa tuutuuni yi sɛ ɔne “asaase so ahemfo” anaa aban ahorow abɔ aguaman. Wei ma yehu pefee sɛ tuutuuni no nnyina hɔ mma aban bi. Afei nso, Adiyisɛm nhoma no ma yehu sɛ bere a wɔsɛee Babilon Kɛse no, “asaase so aguadifo,” anaa nnwumakuw a ɛwɔ wiase no dii ne ho awerɛhow. Enti Babilon Kɛse no nnyina hɔ mma aguadi anaa nnwumakuw akɛse. Ɛnde, ogyina hɔ ma dɛn? Kyerɛwnsɛm no ka sɛ bɔne a wayɛ ne sɛ odi ‘ahonhonsɛm,’ ɔsom ahoni, na ɔdaadaa nkurɔfo. Ɛnyɛ saa nneɛma yi ara na nyamesom ahyehyɛde ahorow a aporɔw a ɛwɔ wiase no yɛ? Afei nso hyɛ no nsow sɛ, Kyerɛwnsɛm no ka sɛ tuutuuni yi te wiase yi atumfo so, kyerɛ sɛ, odi wɔn so tumi wɔ ɔkwan bi so. Ade foforo a ɔyɛ ne sɛ, ɔde ɔtaa ba Yehowa Nyankopɔn asomfo anokwafo so. (Adi. 17:2, 3; 18:11, 23, 24) Efi tete besi nnɛ nyinaa, ɛnyɛ saa ara na atoro som ayɛ?

 6. Babilon Kɛse no, adɛn nti na wɔfrɛ no ‘tuutuufo maame’?

⁶ Bible frɛ Babilon Kɛse no “tuutuuni kɛse,” nanso ɛsan frɛ no ‘tuutuufo maame.’ Adɛn ntia? Atoro som wɔ nkorabata bebree. Asɔreasɔre, akuwakuw, ne fekuw ahorow a ɛwom de, yɛnka. Bere a Yehowa yɛɛ nnipa kasa basabasa wɔ tete kurow Babel anaa Babilon no, ɛmaa nnipa bɔ hwetee wiase baabiara. Baabiara a wɔkɔe no, wɔde atoro som ne emu nkyerɛkyerɛ a ɛnyɛ nokware no nso kɔe. Ɛno na ama ɔsom ahorow abu so nnɛ no. Ɛnyɛ nwonwa sɛ “Babilon Kɛse” no nyaa ne din fii tete kurow Babilon a atoro som fii ase wɔ hɔ no! (Gen. 11:1-9) Enti yebetumi aka sɛ, atoro som a ɛwɔ hɔ nyinaa, wɔyɛ ahyehyɛde baako anaa tuutuuni kɛse baako “mma mmea.” Satan taa fa ɔsom a ɛte saa so twetwe nkurɔfo kɔ ahonhonsɛm ne abosonsom mu. Saa ara na ɔfa ɔsom a ɛte saa so ma nkurɔfo nya gyidi a ɛnhyɛ Onyankopɔn anuonyam, na ɛma wɔde wɔn ho hyɛ amanne a egu Onyankopɔn din ho fĩ mu. Edi sɛ Bible bɔ Onyankopɔn nkurɔfo kɔkɔ wɔ saa atoro som ahyehyɛde yi a ɛwɔ wiase baabiara no ho. Bible ka sɛ: “Mumfi ne mu, me man, sɛ mompɛ sɛ munya ne bɔne no mu kyɛfa . . . a”!—Kenkan Adiyisɛm 18:4, 5.

 7. Adɛn nti na yetie kɔkɔbɔ a ese ‘yemfi’ Babilon Kɛse no mu no?

⁷ Woatie saa kɔkɔbɔ no? Kae sɛ, ɛyɛ Yehowa ankasa na ɔbɔɔ nnipa wɔ ɔkwan bi so a ɛma wɔte nka sɛ “wohia Onyankopɔn akwankyerɛ.” (Mat. 5:3) Sɛ yebetumi anya Yehowa akwankyerɛ wɔ yɛn asetenam a, gye sɛ yɛsom no nokware mu. Yehowa asomfo de, nea yɛpɛ ne sɛ yɛbɛyɛ nea yebetumi biara atwe yɛn ho afi atoro som ho. Nanso Satan Ɔbonsam de, ɛsono nea esi n’ani so. Nea n’ani gye ho paa ne sɛ ɔbɛtwetwe Onyankopɔn nkurɔfo ama wɔde wɔn ho ahyɛ saa tuutuusi yi mu. Watumi ayɛ saa mpɛn pii. Ná Israelfo a wɔyɛ Onyankopɔn nkurɔfo no taa de wɔn ho hyɛ tuutuusi anaa abosonsom mu paa; eduu Hesekiel bere so no, wohwɛ Israelfo abakɔsɛm mu a, na adanse pii wɔ hɔ a ɛkyerɛ saa. Ɛfata paa sɛ yɛhwehwɛ saa abakɔsɛm no mu, efisɛ ebetumi aboa yɛn ama yɛahu ɔkwan a Yehowa pɛ sɛ yɛfa so som no, n’atɛntrenee, ne ne mmɔborɔhunu ho nsɛm pii.

“Wobɛyɛɛ Tuutuuni”

8-10. Nokware som ho ahwehwɛde titiriw bɛn na ɛma yehu sɛ Yehowa ani nnye ho sɛ yɛde yɛn ho bɛhyɛ atoro som mu? Fa mfatoho kyerɛkyerɛ mu.

⁸ Hesekiel nhoma no mu no, Yehowa de tuutuuni yɛɛ mfatoho de kyerɛe sɛ, sɛ ne nkurɔfo anni no nokware a, ɛka no paa. Yehowa maa Hesekiel kyerɛw nsɛm mmienu bi a emu da hɔ. Sɛ yɛkenkan saa nsɛm no a, ɛma yehu sɛ, bere a Yehowa nkurɔfo anni no nokware na wɔsɛee wɔn bra no, ɛyɛɛ no yaw, na ɔtee nka sɛ wɔayi no ama. Adɛn nti na ɔde ne nkurɔfo no totoo tuutuufo ho?

⁹ Sɛ yebenya asɛm yi ho mmuae a, ɛsɛ sɛ yɛkae ahwehwɛde titiriw bi a ehia sɛ yedu ho na ama yɛn som asɔ Onyankopɔn ani. Yɛkaa ho asɛm wɔ nhoma yi Ti 5. Mmara a Yehowa de maa Israelfo mu no, ɔkaa sɛ: “Nsom onyame foforo biara nka me ho [anaa, “mfa mmu me animtiaa,” ase hɔ asɛm]. . . . Me Yehowa wo Nyankopɔn, meyɛ Onyankopɔn a mempɛ sɛ wɔsom obiara ka me ho.” (Ex. 20:3, 5) Akyiri yi, Yehowa san kaa asɛm a edi hɔ yi de sii saa nokwasɛm no so dua. Ɔkaa sɛ: “Nkotow onyame foforo biara, efisɛ Yehowa yɛ obi a ɔmpɛ sɛ wɔsom obiara ka ne ho. Ampa, ɔyɛ Onyankopɔn a ɔmpɛ sɛ wɔsom obiara ka ne ho.” (Ex. 34:14) Yehowa maa asɛm no mu daa hɔ fann. Ɔsom a yɛde ma Yehowa no, sɛ obegye atom a, gye sɛ yɛsom ɔno nko ara.

¹⁰ Yɛmfa aware nyɛ mfatoho. Nneɛma bi wɔ hɔ a, okunu ne ɔyere hwɛ kwan sɛ wɔn mmienu nko ara na wɔbɛbom ayɛ, na wɔn mu biara mpɛ sɛ ne hokafo no ne obi foforo bɛyɛ. Enti sɛ awarefo no mu baako ma ne koma kodi obi foforo akyi anaa ɔne obi foforo kɔda na sɛ ne kunu anaa ne yere di yaw na ɔte nka sɛ wayi no ama a, ɛyɛ ne kwan so. (Kenkan Hebrifo 13:4.) Saa ara na ɛte wɔ Yehowa som mu. Yehowa nkurɔfo a wɔahyira wɔn ho so ama no sɛ wɔbɛsom ɔno nko ara no, sɛ wɔkɔsom abosom a, Yehowa fa no sɛ wɔayi no ama, na ɛfata sɛ ɔte nka saa. Nea ɛma yehu sɛ saa paa na Yehowa te nka no, ma yɛnhwɛ asɛm a ɔkaa wɔ Hesekiel ti 16.

11. Asɛm bɛn na Yehowa ka faa Yerusalem ne baabi a Yerusalem ase fi ho?

¹¹ Yehowa anom asɛm a ɛware paa a ɛwɔ Hesekiel nhoma no mu no, wubehu wɔ ti 16. Nkɔmhyɛsɛm a ɛware paa a Yehowa aka wɔ Hebri Kyerɛwnsɛm mu no, saa asɛm no ka ho. Yehowa de n’adwene sii Yerusalem kurow no so, na ɔde kurow no gyinaa hɔ maa Yuda man a anni nokware no. Ɔde Yerusalem totoo ɔbea bi ho. Yehowa kaa baabi a ɔbea yi ase fi, ne sɛnea oyii Yehowa mae no ho asɛm. Asɛm no yɛ awerɛhow, na wudwen ho a, wonte ase. Bere a Yehowa kopuee ɔbea yi so mfiase no, na ɔyɛ akokoaa a wɔatow no akyene a ontumi nyɛ ne ho hwee. Ná wonguaree no, na na onni obi a ɔhwɛ no. Ná n’awofo ne Kaananfo abosonsomfo a wɔte asaase no so no. Nokwasɛm ne sɛ, Yerusalem kurow no, ansa na Dawid reko afa no, na Kaananfo abusuakuw bi a wɔfrɛ wɔn Yebusifo na wɔte hɔ. Saa akokoaa no asɛm yɛɛ Yehowa mmɔbɔ, enti oguaree no, na ɔhwɛɛ no. Bere bi akyi no, saa ɔbea yi bɛyɛe sɛ Yehowa yere. Nokwasɛm ne sɛ, Israelfo a akyiri yi wɔbɛtenaa saa kurow no mu no, na wɔne Yehowa ayɛ apam dedaw. Wɔn ankasa na wofi wɔn pɛ mu ne Yehowa yɛɛ saa apam no wɔ Mose bere so tɔnn. (Ex. 24:7, 8) Bere a Yerusalem bɛyɛɛ ɔman no ahenkurow no, Yehowa hyiraa kurow no ma edii yiye, na ɔhyɛɛ no anuonyam. Sɛnea okunu a ɔwɔ tumi na ɔwɔ sika tumi totɔ agude a ɛyɛ fɛ ma ne yere no, saa pɛpɛɛpɛ na Yehowa yɛ maa Yerusalem kurow no.—Hes. 16:1-14.

12. Nkakrankakra, Yerusalemfo fii ase de wɔn ho hyɛɛ atoro som mu. Ɛyɛɛ dɛn na ɛbaa saa?

¹² Afei hwɛ nea esii wɔ ɛno akyi. Yehowa kaa sɛ: “Wudii w’ahoɔfɛ akyi, na edin a wugyei nti wobɛyɛɛ tuutuuni, na wugyaa wo ho maa wɔn a wɔretwam nyinaa ne wo bɔɔ aguaman; w’ahoɔfɛ bɛyɛɛ wɔn dea.” (Hes. 16:15) Solomon bere so no, Yehowa hyiraa ne nkurɔfo, na ɔma wodii yiye. Enti Yerusalem bɛyɛɛ kurow a n’ahoɔfɛ yɛ krabɛhwɛ. Nokwasɛm ne sɛ, tete no, na ɛno ne kurow a ɛyɛ fɛ paa. (1 Ahe. 10:23, 27) Nanso nkakrankakra, Yerusalemfo fii ase de wɔn ho hyɛɛ atoro som mu. Esiane sɛ na Solomon pɛ sɛ ɔsɔ ne yerenom a na wɔnyɛ Israelfo ani nti, ofii ase som abosom de guu Yerusalem kurow no ho fĩ. (1 Ahe. 11:1-8) Ahemfo a wobedii n’ade no bi mpo de, wɔde atoro som guu ɔman mũ no nyinaa ho fĩ. Sɛnea nkurɔfo no yii Yehowa mae na wosii tuutuu no, ɛmaa Yehowa tee nka sɛn? Yehowa kaa nea wɔyɛe no ho asɛm sɛ: “Ade a anka ɛnsɛ sɛ woyɛ anaa esi koraa.” (Hes. 16:16) Nanso, ne nkurɔfo a wɔn aso yɛ den no de wɔn ho hyɛɛ ahohwibra mu kɔɔ akyiri sen kan no koraa!

13. Atirimɔdensɛm bɛn na Onyankopɔn nkurɔfo a na wɔwɔ Yerusalem no dii?

¹³ Bere a na Yehowa reka bɔne a ne nkurɔfo a wapaw wɔn no yɛe ho asɛm no, wuhu sɛ na asɛm no yɛ no yaw, na na ɛyɛ no ahometew. Ɔkaa sɛ: “Wofaa wo mma mmarima ne wo mma mmea a wowoo wɔn maa me no de wɔn bɔɔ afɔre maa abosom. Adɛn, wommaa w’aguamammɔ yi nkɔɔ akyiri dodo? Wukunkum me mma; wohyew wɔn wɔ ogya mu de wɔn bɔɔ afɔre.” (Hes. 16:20, 21) Aninyanne a ɛte saa a wɔyɛe no ma yehu sɛ Satan tirim yɛ den paa. Nea ɔpɛ ara ne sɛ ɔbɛdaadaa Yehowa nkurɔfo ama wɔadi atirimɔdensɛm a ɛte saa! Nanso Yehowa ani tua ne nyinaa. Atirimɔdensɛm a Satan hyɛ akyi nyinaa, sɛ ani yɛ nyan sɛ dɛn mpo a, Onyankopɔn betumi asiesie, na wama atɛntrenee ayɛ adwuma.—Kenkan Hiob 34:24.

14. Yɛhwɛ mfatoho a Yehowa de mae no a, henanom ne Yerusalem nua mmea mmienu no? Mmea mmiɛnsa no, hena na na ne tirim yɛ den paa?

¹⁴ Atirimɔdensɛm a na Yerusalem redi no, na anka ɛsɛ sɛ ɛma n’ankasa mpo ho dwiriw no, nanso ɔno de, ɛnyɛ hɔ koraa na na ɔrehwɛ. Ɔkɔɔ so ara sii ne tuutuu no. Yehowa kaa sɛ ne ho yɛ aniwu koraa sen tuutuufo a wɔaka, efisɛ ɔno de, ɔno ankasa na na otua nkurɔfo ka ma wɔne no bɔ aguaman! (Hes. 16:34) Onyankopɔn kaa sɛ Yerusalem abrabɔ te sɛ ne “maame” de pɛpɛɛpɛ. Hena ne Yerusalem maame yi? Ɛyɛ abosonsomfo a bere bi na wɔte asaase no so no. (Hes. 16:44, 45) Mfatoho a na Yehowa de reka n’asɛm no, ɔtoaa so. Ɔkaa sɛ Samaria yɛ Yerusalem nuabea panyin, na ɔno na odii kan de ne ho hyɛɛ tuutuusi mu. Onyankopɔn san bɔɔ Yerusalem nuabea foforo din. Ɔno ne Sodom. Wei ma yɛkae tete kurow Sodom a n’ahomaso ne ne bra a na asɛe nti Yehowa sɛee no no. Enti asɛm a na Yehowa reka ne sɛ, atirimɔdensɛm a na Yerusalem redi no, na ɛsen nea ne nuabea Samaria ne nea ne nuabea Sodom mpo yɛe no koraa! (Hes. 16:46-50) Onyankopɔn bɔɔ ne nkurɔfo kɔkɔ mpɛn pii, nanso wɔantie. Wɔkɔɔ so yɛɛ asoɔden.

15. Atemmu a Yehowa de baa Yerusalem so no, na ɔpɛ sɛ ɛka ne nkurɔfo no ma wɔyɛ dɛn? Na anidaso bɛn na Yehowa ma wonyae?

¹⁵ Dɛn na na Yehowa bɛyɛ? Ɔka kyerɛɛ Yerusalem sɛ: “Mereboaboa w’adɔfo a wugyee wɔn ani no nyinaa ano,” na “mede wo bɛhyɛ wɔn nsa.” Enti abosonsomfo a Onyankopɔn nkurɔfo de wɔn ho bɔɔ wɔn no, wɔn ara na na wɔbɛsɛe Yerusalem agye n’ahode nyinaa, na wɔama wahwere n’anuonyam. Yehowa kaa sɛ: “Wobesiw wo abo na wɔde wɔn sekan akum wo.” Adɛn nti na Yehowa de saa atemmu yi baa wɔn so? Ɛnyɛ sɛ na ɔpɛ sɛ ɔtɔre ne nkurɔfo ase. Mmom, Yehowa kaa sɛ nea ɔpɛ sɛ ɔyɛ ni: “Mɛma woagyae tuutuu no si.” Onyankopɔn de kaa ho sɛ: “Mɛyɛ nea ɛsɛ sɛ meyɛ nyinaa ama me bo adwo na m’abufuw afi wo so; mɛyɛ komm, na biribiara renhaw me bio.” Sɛnea yɛkaa ho asɛm wɔ nhoma yi Ti 9 no, nea na Yehowa abɔ ne tirim sɛ ɔbɛyɛ paa ne sɛ, ɔde ne nkurɔfo a wɔakodi obi man so no bɛsan aba wɔn asaase so ama wɔabɛsom no. Adɛn nti na na ɔbɛyɛ saa? Yehowa kaa sɛ: “Me de, mɛkae apam a me ne wo yɛe wɔ wo mmabaaberem no.” (Hes. 16:37-42, 60) Yehowa de, wanyɛ n’ade sɛ ne nkurɔfo no; ná obedi wɔn nokware!—Kenkan Adiyisɛm 15:4.

16, 17. (a) Adɛn nti na yɛnka bio sɛ Ohola ne Oholiba gyina hɔ ma Kristoman? (Hwɛ adaka a wɔato din “Tuutuufo Mmienu a Wɔyɛ Anuanom.”) (b) Dɛn na yebetumi asua afi Hesekiel ti 16 ne ti 23?

¹⁶ Wohwɛ Hesekiel ti 16 a, wubehu sɛ Yehowa kaa nsɛm pii a ɛka koma paa. Ɔnam so ma yehu ɔkwan a ɔpɛ sɛ yɛfa so som no, n’atɛntrenee, ne n’ahummɔbɔ bebree no ho nsɛm pii. Saa ara na yebetumi aka afa asɛm a ɛwɔ Hesekiel ti 23 no ho. Yehowa kaa tuutuu a na ne nkurɔfo resi no ho asɛm penpen. Ɛnnɛ, nokware Kristofo fa saa asɛm no aniberesɛm. Ɛsɛ sɛ yɛhwɛ sɛ yɛrenyɛ biribiara a ɛbɛma Yehowa adi yaw sɛnea Yuda ne Yerusalem yɛe no. Enti ɛsɛ sɛ yɛtwe yɛn ho fi abosonsom biara ho. Ebi ne anibere, ne ahonyade a obi bedi akyi. Yebetumi aka ne nyinaa ho asɛm sɛ ɛyɛ abosonsom. (Mat. 6:24; Kol. 3:5) Yehowa ahu yɛn mmɔbɔ ama nokware som so bio wɔ nna a edi akyiri yi mu, na ɔbɛhwɛ sɛ ɔremma obiara ngu ho fĩ bio! Nea Yehowa ayɛ yi, ɛsɛ sɛ yɛma yɛn ani sɔ bere nyinaa. Yehowa ne honhom fam Israel ayɛ “apam a ɛrentwam da.” Apam a ɔne wɔn ayɛ no, ɛrensɛe da efisɛ wobedi Yehowa nokware na ɛremma da sɛ wobesi tuutuu. (Hes. 16:60) Enti hokwan a yɛanya nnɛ sɛ yɛne Yehowa nkurɔfo a wɔn ho tew rebɔ no, momma yenso mu denneennen.

¹⁷ Ɛnde, asɛm a Yehowa ka tiaa tuutuufo a wɔn ho asɛm wɔ Hesekiel nhoma no mu no, dɛn na ɛma yehu fa “tuutuuni kɛse” a ɔne Babilon Kɛse no ho? Momma yɛnhwɛ.

18, 19. Tuutuufo a wɔn ho asɛm wɔ Hesekiel nhoma no mu no, sɛ yɛde wɔn toto tuutuuni a ne ho asɛm wɔ Adiyisɛm nhoma no mu ho a, sɛn na wodi nsɛ?

¹⁸ Yehowa nsakrasakra. (Yak. 1:17) Efi bere a atoro som yii ne ti de besi nnɛ nyinaa, adwene a Yehowa wɔ wɔ saa tuutuuni kɛse no ho no nsesae. Ɛno nti, atemmu a ɛbaa tuutuufo a wɔn ho asɛm wɔ Hesekiel nhoma no mu so no, ɛne atemmu a ɛreba “tuutuuni kɛse” a ne ho asɛm wɔ Adiyisɛm nhoma no mu so no di nsɛ wɔ akwan pii so, na wei nyɛ yɛn nwonwa koraa.

¹⁹ Sɛ nhwɛso no, hyɛ no nsow sɛ, asotwe a ɛbaa tuutuufo a wɔn ho asɛm wɔ Hesekiel nhoma no mu so no, na emfi Yehowa hɔ tẽẽ. Mmom, aman a Onyankopɔn nkurɔfo a wɔanni nokware no kɔsom wɔn abosom no, wɔn na wɔde asotwe no baa Onyankopɔn nkurɔfo no so. Saa ara na wiase atoro som ahemman no nso, Bible kasa tia no sɛ ɔne “asaase so ahemfo” abɔ aguaman. Ɛnde yemmisa sɛ, ɛhe na wiase atoro som ahemman no asotwe befi aba? Kyerɛwnsɛm no ka sɛ wiase yi mu atumfo “bɛtan tuutuuni no na wɔayɛ no pasaa na wɔama wada adagyaw, na wobedi ne nam na wɔde ogya ahyew no dwerɛbee.” Adɛn nti na aban ahorow a ɛwɔ wiase no bɛyɛ biribi a ɛyɛ nwonwa saa? Efisɛ Onyankopɔn na ɔde ‘bɛhyɛ wɔn komam sɛ wɔmma ne nsusuwii mmra mu.’—Adi. 17:1-3, 15-17.

20. Atemmu a ɛbɛba Babilon Kɛse so no, dɛn na ɛkyerɛ sɛ ɛno na ebeyi Babilon Kɛse no afi hɔ koraa?

²⁰ Enti Yehowa bɛfa aman a ɛwɔ wiase yi mu no so abu atoro som nyinaa atɛn; Kristoman mu asɔreasɔre no nyinaa ka ho. Saa atemmu yi na ebeyi Babilon Kɛse no afi hɔ koraa; wɔremfa ne bɔne nkyɛ no, na ɔrennya hokwan foforo biara a ɔde bɛyɛ nsakrae. Adiyisɛm nhoma no ma yehu sɛ Babilon de, “wɔrenhu no bio da.” (Adi. 18:21) Sɛ wɔsɛe Babilon Kɛse no a, Onyankopɔn abɔfo bedi ahurusi aka sɛ: “Munyi Yah ayɛ! Na wusiw a efi ne mu no foro kɔ soro daa daa.” (Adi. 19:3) Saa atemmu yi rensesa da. Ɛremma da sɛ atoro som bi bɛsan ayi ne ti abegu nokware som ho fĩ bio. Sɛ wɔde atemmu a ano yɛ den ba Babilon so na wɔsɛe no a, ɛbɛyɛ te sɛ nea wusiw kumɔnn reforo afi Babilon akɔ soro afebɔɔ.

21. Sɛ wɔsɛe atoro som a, ɛbɛma yɛahu sɛ dɛn na afi ase, na sɛn na ɛbɛba awiei?

²¹ Sɛ aban ahorow a ɛwɔ wiase yi mu tow hyɛ Babilon Kɛse no so a, nea ɛbɛkyerɛ ne sɛ Onyankopɔn nam wɔn so rebu atoro som atɛn. Nneɛma a Yehowa reyɛ ama n’atirimpɔw abam no, wei bɛyɛ emu kɛse baako. Ɛno na ɛbɛkyerɛ sɛ ahohiahia kɛse no afi ase. Ahohiahia a nnipa bɛkɔ mu saa bere no, ebi mmae da. (Mat. 24:21) Armagedon ko no na Yehowa de bɛsɛe wiase bɔne yi, na ɛno na ɛde ahohiahia kɛse no bɛba awiei. (Adi. 16:14, 16) Sɛnea yebehu wɔ nhoma yi ti ahorow a edi hɔ mu no, nsɛm pii wɔ Hesekiel nhoma no mu a ɛma yehu nneɛma a ebesisi wɔ ahohiahia kɛse no mu. Nanso ansa na yebesusuw saa nsɛm no ho no, yemmisa sɛ, asuade bɛn na yɛanya wɔ Hesekiel ti 16 ne ti 23 a yɛpɛ sɛ yɛde to yɛn tirim na yɛde bɔ yɛn bra?

22, 23. Nea Hesekiel nhoma no ne Adiyisɛm nhoma no ka fa tuutuufo bi ho no, sɛ yesusuw ho a, sɛn na ebetumi aka ɔsom a yɛde ma Yehowa no?

²² Wɔn a wɔresom Yehowa nokwarem no, nea Satan pɛ paa ne sɛ ɔbɛsɛe wɔne Yehowa ntam. Sɛ Satan tumi ma yegyae Yehowa som na yɛbɔ yɛn bra sɛnea tuutuufo a wɔn ho asɛm wɔ Hesekiel nhoma no mu yɛe no a, n’ani begye paa. Enti, ɛsɛ sɛ yɛkae sɛ, Yehowa mpɛ sɛ yɛbɛsom obiara aka ne ho; ɔpɛ sɛ yɛsom ɔno nko ara, na yedi no nokware bere nyinaa! (Num. 25:11) Ɛsɛ sɛ yɛhwɛ sɛ yɛbɛtwe yɛn ho afi atoro som ho korakora; ɛnsɛ sɛ ‘yɛde yɛn nsa ka biribiara a ɛho ntew’ wɔ Onyankopɔn ani so. (Yes. 52:11) Wei nti, akasakasa ne wontwiwontwi a ɛkɔ so wɔ amanyɔsɛm mu wɔ wiase a emu apaapae yi mu no, yɛmfa yɛn ho nhyɛ mu. (Yoh. 15:19) Sɛnea yebu atoro som no, saa ara na yebu ɔmampɛ nso, efisɛ Satan na ɔhyɛ ne nyinaa akyi, enti yɛmfa yɛn ho nhyɛ mu.

²³ Nea ɛsen ne nyinaa no, momma yɛnkae sɛ, hokwan kɛse na yɛanya sɛ yɛresom Yehowa wɔ ne honhom fam asɔrefi a ɛho tew no mu. Yɛn ani sɔ nhyehyɛe pa a Yehowa ayɛ ama yɛn no. Enti, momma yensi yɛn bo sɛ, yɛbɛtwe yɛn ho afi atoro som ho, na sɛnea osi tuutuu no nso, yɛatwe yɛn ho afi ho korakora!