Babilon Kɛsɛ No Ne Sɛe

“Wɔakyerɛw din bi ne moma so sɛ: Ahintasɛm. Babilon kɛse no, asase so nguaman ne akyide nã.” “Ne haw bɛba da koro pɛ, owu ne awerɛhow ne ɔkɔm, na wɔde gya bɛhyew no, efisɛ [Yehowa] Nyankopɔn a obu no atɛn no yɛ ɔhoɔdenfo.”​—Adiyisɛm 17:5; 18:8.

YƐWƆ hokwan sɛ yedwen saa nsɛm no a ɔsomafo Yohane kyerɛwee wɔ Yɛn Bere yi so afeha a edi kan mu no ho. Hena ne saa ‘nguaman nã’ yi? Ɔkwan bɛn so na wafom Onyankopɔn a enti obu no atɛn dennen saa? Akyinnye biara nni ho sɛ Onyankopɔn atemmu a ɔde ba ahintasɛm mu aguaman Babilon Kɛse no so no yɛ ɔsɛe. Na ɛda adi sɛ eyi ma yenya ntease a yɛde behu onii a ɔne saa aguaman yi ne sɛnea n’awiei bɛka yɛn no.​—Adiyisɛm 18:21.

Hena anaasɛ dɛn na Babilon Kɛse no yɛ ho mfonini? Bible se wiase sodifo ne no abɔ aguaman ne sɛ aguadifo ne no adi gua. (Adiyisɛm 18:3) Enti, ɔrentumi nnyina hɔ mma amammui anaasɛ nnwuma akɛse. Nanso eyi ma ɛka ade biako a ɛwɔ tumi kɛse wɔ wiase a wobetumi de abodin ‘nguaman nã’ no afrɛ no. Ɛnyɛ biribiara sɛ Satan wiase atoro som ahemman no!a

Saa nsemmisa yi da so wɔ hɔ afei: Dɛn nti, ɔkwan bɛn so, ne bere bɛn na wɔbɛsɛe Babilon Kɛse no? Anaa sɛ yɛbɛka no pen a: Dɛn nti, ɔkwan bɛn so, ne bere bɛn na atoro som befi asase yi so?

Kristoman Kyerɛwtohɔ a Ɛnyɛ Kristofo De

Sɛ yesusuw atoro som kyerɛwtohɔ ho a, ebia yɛbɛkae tete nkɔmhyɛsɛm no: “Mframa na wogu, na ahum nso na wobetwa.” (Hosea 8:7) Eyi ne nnyinasosɛm a Kristoni ɔsomafo Paulo kae no hyia: “Monnnaadaa mo ho, Onyankopɔn wonsi no atwetwe; efisɛ nea onipa gu no, ɛno ara na obetwa.” (Galatifo 6:7) Enti dɛn na atoro som agu wɔ wiase nyinaa? Na dɛn na ebetwa?

Yesu Kristo kyerɛkyerɛe sɛ ɛnyɛ sɛ n’akyidifo nnɔ wɔn yɔnkonom nko na mmom wɔn atamfo nso. (Mateo 5:43, 44) Paulo refa asɛm afi Hebri Kyerɛwnsɛm no mu aka no, ɔkyerɛɛ sɛnea ɛsɛ sɛ Kristofo ne wɔn atamfo di no pefee. Ɔkae sɛ: “Sɛ ɔkɔm de wo tamfo a, ma no aduan! Sɛ osukɔm de no a, ma no biribi nnom! Na saa yɛ na wode bɛboaboa nnyansrama ano agu n’atifi. Mma bɔne nnni wo so nim, na mmom fa papa di bɔne so nim!”​—Romafo 12:20, 21.

Nanso, Kristoman nyamesom ahorow no abakɔsɛm yɛ ɔtan ne mogyahwiegu de. Wɔahyira tete ne nnɛyi mmeamudua akodi a ɔfow, mmonnaato, ne owu ka ho so na wɔapene so. Sɛ nhwɛso no, Katolek Asɔre no mu atitiriw hyiraa Fasist Italia to a wɔtow hyɛɛ Abisinia so (1935) ne Franco “mmeamudua akodi” wɔ Spania Amanko no mu (1936-39) no so.

Wɔnam nkurɔfo a wɔhyew wɔn dua ho so na asiesie nyamekyerɛ mu nsonsonoe ahorow. Wɔsɛn Bible asekyerɛfo William Tyndale wɔ dua so na wɔhyew ne funu wɔ 1536 mu bere a otintim ‘n’Apam Foforo’ nkyerɛase no wɔ Engiresi mu no akyi. Ansa na ɛno bɛba, wɔ Paapa Martin V ahyɛde so no, nyamesom mpanyimfo a aweredi honhom aka wɔn kotuu Bible asekyerɛfo Wycliffe nnompe wɔ ne wu akyi mfe 44 sɛnea ɛbɛyɛ a wɔbɛhyew de agyigye wɔn ani. Wɔ Katolek Atirimɔden Asenni no mu no, wogyee Yudafo ne “abususɛnkafo” ɔpepem pii nneɛma fii wɔn nsam, wɔyɛɛ wɔn ayayade, na wɔhyew wɔn dua ho​—a ne nyinaa wɔkyerɛ sɛ wɔyɛe wɔ Kristo din mu! Wɔhyew Spaniani nyamekyerɛfo Michael Servetus a Roman Katolekfo ne Protestantfo nyinaa taa no no dua ho wɔ Protestantni John Calvin ahyɛde so. Wɔ afeha yi mu wiase nyinaa ako abien no mu no, “Kristofo” asɔfo ahyira asraafo, na asraafo asɔfo ɔmampɛfo ahyɛ wɔn ma wɔakunkum afoforo.

Eyi ne nokware Kristosom bɔ abira dɛn ara! Ɔsomafo Paulo kyerɛwee sɛ: “Sɛ moyɛ nnipa a Onyankopɔn apaw mo, ahotefo ne adɔfo, yi, monhyɛ ayamhyehye, ayamye, ahobrɛase adwene, odwo, abodwokyɛre. Na sɛ obi ne obi nya asɛm a, munhuhu mma mo ho na momfa nkyekyɛ mo ho; sɛnea [Yehowa] de akyɛ mo no, sɛnea mo nso monyɛ ne no. Na eyinom nyinaa so na monhyɛ ɔdɔ a ɛne pɛyɛ hama no ngu.”​—Kolosefo 3:12-14.

Paulo kyerɛw kɔmaa Kristofo a na wɔwɔ Roma no sɛ: “Mommfa bɔne nntua obiara bɔne so ka! Monna nnwen nneɛma a ɛyɛ fɛ nnipa nyinaa anim! Sɛ ebetumi a, mo fam de, mo ne nnipa nyinaa ntra asomdwoe mu. Adɔfo, munnnidi mo ho were, na mmom munnyaw mma [Onyankopɔn] abufuw! Na wɔakyerɛw sɛ: Me na aweredi wɔ me, me ara metua ka, [Yehowa] na ɔka saa.” (Romafo 12:17-19) Enti, wɔ Kristofo nnyinasosɛm mu no, Kristoman adi nkogu. Wagu ɔtan ne nyaatwom na ebetwa ɔsɛe.

Ɔsom Ahorow a Wɔnnyɛ Kristofo​—Wɔn Kyerɛwtohɔ

Nanso nea ɛka bom yɛ Babilon Kɛse no dɔɔso kyɛn Kristoman nyamesom ahorow no. Wiase yi mu nyamesom atitiriw no nyinaa ho wɔ mogya ho fɔ a aguaman a ɔwɔ dimmɔne yi di no mu bi. Sɛ nhwɛso no, ɛsɛ sɛ wɔde asodi no bi to Shintosom a ɛwɔ Japan no so wɔ kateeyɛ ne atirimɔden nsusuwii a Japan asraafo nyae wɔ Wiase Ko II mu no ho. Abakɔsɛm kyerɛwfo Paul Johnson kyerɛ sɛ “nea ɛbɛyɛ na wɔahyɛ wɔn ho den wɔ wiase a emu yɛ den na akansi wom” a Europafo nneyɛe gyinapɛn ahorow na abu so mu no, wohui sɛ ɛho hia sɛ wonya “ɔman ɔsom ne abrabɔ a edi tumi a wɔfrɛ no Sinto ne bushido [“ɔkofo kwan”]. . . . Wɔde daa ɔhempɔn-som sii hɔ, titiriw wɔ asraafo mu, na efi 1920 mfe no mu rekɔ no, wɔkyerɛkyerɛɛ ɔman abrabɔ mmara, kokumin dotoku, wɔ sukuu ahorow mu.” Dɛn na efii mu bae? Ebeduu 1941 mu bere a Japan too ɔtopae guu Pearl Harbor so ma ɛnam so de ne ho hyɛɛ Wiase Ko II mu no, “wɔsakraa . . . Sinto fii tete som bi a ɛretwam na nnipa kakraa bi na wɔsom no mu ma ɛbɛyɛɛ nnɛyi katabaako ɔman a wɔpene so, ma enti ɛdenam adeyɛ bi a ɛne ne ho nhyia a wokyi so no, wɔde nyamesom a anka ɛsɛ sɛ esiw mfe no mu ahude ahorow no ano no dii dwuma de tew ho.”

Ɛdefa India mu a wɔkyekyɛɛ wɔ 1947 mu a na nyamesom mu nsonsonoe ahorow ka ho no ho no, abakɔsɛm kyerɛwfo Johnson se: “Nnipa bɛyɛ ɔpepem 5 kosi 6 guan faa mmaa nyinaa de gyee wɔn ho nkwa. . . . Ná wɔn a wowuwui saa bere no ho akontaabu fi ɔpepem 1 kosi 2. Nnɛyi akontaabu ahorow wɔ 200,000 kosi 600,000 mu hɔ baabi.” Ɛde besi nnɛ no, nnipa a nyamesom ma wokunkum wɔn ne nkurɔfo a wɔbrɛ wɔn ase kɔ so wɔ Hindufo mu. Mpɛn pii no Harijanfo, anaa apanyifo a bere bi a atwam mu na wobu wɔn sɛ wɔn ho ntew no na wohu kuw awudi a asasewuranom adefo yɛ ho nhyehyɛe no mu amane.

Wodi ahonhonsɛm wɔ Hindusom mu. (Adiyisɛm 18:23) Indiani ɔkyerɛwfo Sudhir Kakar ka “Hinduni biara anigye ne obu a ɔwɔ ma asumansɛm ne asumanfo no” ho asɛm na ɔde ka ho sɛ: “Wobu nsoromma mu ahwɛfo, abosonkɔmhyɛfo, wɔn a wohu fam ne sadhufo [ahotuafo “akronkronfo”], fakirfo [asrɛsrɛfo ntafoayifo] nso ne ahonhonsɛmdifo afoforo kɛse efisɛ wosusuw sɛ wɔne obi a ɔte ase ankasa no a ɔkorɔn sen biara no di nkitaho a ɛbɛn so.”​—India Today, April 30, 1988.

Nea ɛka ho no, ntawntawdi wɔ Hindufo ne Sikfo ne Hindufo ne Nkramofo ntam daa. Nyamesom ahorow no mu biara de ne kyɛfa wɔ ɔtan, basabasayɛ, ne awudi mu no ka ntawntawdi yi ho. Eyi yɛ Babilon Kɛse no aba a asow no foforo ara kwa.

Bio nso, nnɛyi akodi, nnipakum, ne nhyɛso abakɔsɛm no nni hwee a ɛde kamfo Yudasom. Ɛyɛ den sɛ basabasayɛ a ɛtɔ da a Yudasom mu Hasid fekusɛm no da no adi wɔ Yudafo fekusɛm afoforo ne ɔsom ahorow a wɔnnyɛ Yudafo ho no bɛyɛ nea ɛfata nkamfo wɔ Onyankopɔn ani so.

Sɛ yɛhwehwɛ atoro som abakɔsɛm mu wɔ wiase nyinaa a, ɛyɛ mmerɛw sɛ yebehu nea enti a Ɔtemmufo Pumpuni no wɔ nea ogyina so bɛsɛe Babilon Kɛse no. “Na ɛno mu na wohuu adiyifo ne ahotefo ne wɔn a wɔakum wɔn asase so no nyinaa mogya.” (Adiyisɛm 18:24) Pene a atoro som apene mpɔtam bi ne wiase nyinaa akodi so no ama odi fɔ wɔ Onyankopɔn anim wɔ “wɔn a wɔakum wɔn asase so no nyinaa mogya” ho.

Sɛnea Bible asotõ kyerɛ no, wɔabu Babilon Kɛse atɛn sɛ ɔfata ɔsɛe esiane n’abakɔsɛm mu kyerɛwtohɔ a ɛfa honhom mu aguaman a ɔne wiase sodifo abɔ, ne mogya ho afodi wɔ akodi mu, ne n’ahonhonsɛmdi ho no nti. Enti, Yehowa Nyankopɔn abu atɛn sɛ wobeyi Satan wiase atoro som ahemman no afi hɔ.​—Adiyisɛm 18:3, 23, 24.

Sɛnea Atoro Som Bɛyera

Wɔ nsɛm a ɛyɛ mfonini kwan so kɛse mu no, Adiyisɛm nhoma no kyerɛkyerɛ Babilon Kɛse no sɛe mu. Yɛkenkan wɔ Adiyisɛm 17:16 sɛ: “Mmɛn du a wuhui no, ne aboa no, wɔn na wɔbɛtan aguaman no, na wɔayɛ no pasaa, na wada adagyaw, na wɔadi ne nam, na wɔde ogya ahyew no.” “Mmɛn du no” yɛ wiase amammui tumi horow nyinaa a wɔboa Amanaman Nkabom, “aboa kɔkɔɔ” a n’ankasa yɛ Ɔbonsam amammui nhyehyɛe a mogya akeka ho no ho mfonini.​—Adiyisɛm 16:2; 17:3.b

Sɛnea Bible nkɔmhyɛ kyerɛ no, amammui tumi horow a wɔne Amanaman Nkabom no aka abom no bɛsɔre atia wiase atoro som ahemman no na wɔasɛe no. Ɛbɛka atoro som nyinaa. Amammui nhyehyɛe binom akyerɛ sɛnea wonni atoro som ho a ɛde hyehyɛ amammuisɛm ne asetra mu nsɛm mu no ho koma no dedaw. Komunism aman binom apaw onyame biara a wonnye no nni gyinabea na ɛte sɛ nea wɔagu nyamesom koraa, sɛnea ɛte wɔ Albania no, anaasɛ wɔbrɛ no ase te sɛ abaawa a onni ano, sɛnea ɛte wɔ Rusia ne China no. Mmeae afoforo no, amammui sodifo da abufuw a emu yɛ den adi wɔ Katolek asɔfo binom ahofadi nyamekyerɛ wɔ aman a ahia wɔn mu no ho. Afoforo nso ka nyamesom ahorow a wɔde wɔn ho hyehyɛ mmusuasɛm mu no hyɛ. Wɔ aman a wɔkyerɛ sɛ wogow nneɛma mu mpo mu no, amammuifo binom bo fuw wɔ asɔfo ho a wɔde hyehyɛ amansɛm ne asetra mu nsɛm mu no ho.

Yennya nhuu nsɛm afoforo pɔtee a ɛbɛkanyan amammuifo ma wɔasɔre atia atoro som no. Nanso ade biako da adi​—sɛe a saa amammuifo yi bɛsɛe Babilon Kɛse no rennyɛ wɔn nkutoo apɛde na mmom Onyankopɔn de nso bi. Adiyisɛm 17:17 kyerɛ sɛ: “Onyankopɔn na ɔde ahyɛ wɔn komam sɛ wɔmma ne tirim asɛm mmra mu, na wɔnyɛ adwenkoro, na wɔmfa wɔn ahenni mma aboa no nkosi sɛ Onyankopɔn nsɛm no bɛba mu.”​—Fa toto Yeremia 51:12, 13 ho.

Nni mfomso. Babilon Kɛse no sɛe no rennyɛ nyamesom ahantan ne ne ho a ɛde hyehyɛ nsɛm mu no ho ɔtan a amammuifo da no adi ara kwa. Amammui sodifo no bɛyɛ Onyankopɔn adwinnade a wonnim a ɔde sɛe wiase nyinaa atoro som. Yiw, “ne nnebɔne atoatoa abedu soro, na Onyankopɔn akae n’amumɔyɛ.”​—Adiyisɛm 18:5.

Yehowa ahyɛ sɛ ɛsɛ sɛ wɔbrɛ atoro som ɔhantanfo no ase. Nkɔmhyɛ no kyerɛ sɛ: “Dodow a ɔhyɛɛ ne ho anuonyam na odii taamu no, momma n’ayayade ne n’awerɛhow nnɔɔso sa; efisɛ ɔkae ne komam sɛ: Mete hɔ sɛ ɔhemmaa, na menyɛ okunafo, na merenni awerɛhow da. Eyi nti na ne haw bɛba da koro pɛ, owu ne awerɛhow ne ɔkɔm, na wɔde gya bɛhyew no, efisɛ [Yehowa] Nyankopɔn a obu no atɛn no yɛ ɔhoɔdenfo.”​—Adiyisɛm 18:7, 8.

Bere Bɛn na Wɔbɛsɛe No?

Mprempren, saa “da koro” anaa bere tiaa mu ɔsɛe a ɛba ntɛm no abɛn. Nokwarem no, Babilon Kɛse no sɛe no de “yɛn Nyankopɔn aweredi da no” bɛba. (Yesaia 61:2) Ɛno akyi no, Onyankopɔn Harmagedon trenee ko no bɛba yɛn so. Wiase nsɛm a esisi fi 1914 no ho adanse nyinaa kyerɛ sɛ Satan nneɛma nhyehyɛe no bere resa. Enti, Onyankopɔn Ahenni no tumidi abɛn.​—Luka 21:32-36; Adiyisɛm 16:14-16.

Nokware asomfo bɛyɛ wɔn ade dɛn wɔ Babilon Kɛse no sɛe no ho? Adiyisɛm se: “Ɔsoro ne mo, ahotefo ne asomafo ne adiyifo, momma mo bo ntɔ mo yam wɔ ne ho, efisɛ Onyankopɔn abu no atɛn ama mo.” (Adiyisɛm 18:20) Bere a wodi Yehowa atirimpɔw ho dwuma na wɔtew ne din ho no, wobedi ahurusi amansan nyinaa mu. Nkɔmhyɛ no kyerɛ sɛ: “Eyinom akyi no metee biribi a ɛte sɛ nkurɔfo pii nne kɛse ɔsoro sɛ: Haleluia! nkwagye ne anuonyam ne nidi ne tumi yɛ yɛn Nyankopɔn de; efisɛ n’atemmu yɛ nokware na ɛteɛ, sɛ obuu aguaman kɛse a ɔde n’aguamammɔ asɛe asase no atɛn, na odii ne nkoa mogya ho were wɔ ne nsam.”​—Adiyisɛm 19:1, 2.

Babilon Kɛse no sɛe a Satan nhyehyɛe no mu nneɛma a aka a Onyankopɔn besɛe no no di akyi no bɛkyerɛ nhyira ama Onyankopɔn asomfo. Yesu asɛm yi benya ne mmamu awie koraa: “Sɛ motra m’asɛm mu a, moyɛ m’asuafo ampa; na mubehu nokware, na nokware no ayɛ mo adehye.”​—Yohane 8:31, 32; Adiyisɛm 19:11-21.

Nokware asomfo ade wɔn ho afi atoro som nkyerɛkyerɛ a aka abususɛm atia Onyankopɔn mfe no mu nyinaa no ho dedaw. Saa bere no wɔbɛde wɔn ho atra trenee wiase foforo bi mu a wonnsuro owu, efisɛ “Onyankopɔn ankasa ne wɔn bɛtra. Na ɔbɛpopa wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam.” (Adiyisɛm 21:3, 4) Nea ɛbɛka kan nneɛma a atwam no ho ne Babilon Kɛse, Satan wiase atoro som ahemman no.

[Ase hɔ asɛm]

[Asɛm a wɔafa aka wɔ kratafa 5]

“Ɛdenam adeyɛ bi a ɛne ne ho nhyia a wokyi so no, wɔde nyamesom a anka ɛsɛ sɛ esiw mfe no mu ahude ahorow no ano no dii dwuma de tew ho”

[Mfonini wɔ kratafa 4]

Wɔtaa Wycliffe ne Tyndale sɛ wɔkyerɛɛ Bible no ase nti

[Mfonini Fibea]

From an old engraving in the Bibliothèque Nationale