Wɔapa Aguaman Kɛse No Ho Ntama

MPREMPEN wiase nhyehyɛe a Satan di so tumi no wɔ nneɛma atitiriw abiɛsa a “wi yi ase nyame” de di dwuma wɔ anifere kwan so. Eyi ne amammui tumi, tumi ne nkɛntɛnso a nnwuma akɛse wɔ ne nyamesom. Wɔ mfe mpempem pii mu wɔ abakɔsɛm mu no, ɛkame ayɛ sɛ nneɛma abiɛsa yi ayɛ nniso biara nnamfo. Tumi horow a ano yɛ den yi mu nea ɛwɔ he na ‘nguaman nã’ no yɛ ho sɛnkyerɛnne?​—2 Korintofo 4:3, 4; Adiyisɛm 12:9; 17:5.

Sɛnea Yohane anisoadehu a yɛresusuw ho no kyerɛ no, yɛahu dedaw sɛ sodifo ahorow no, ‘asase so ahene’ fi wɔn pɛ mu akɔda n’aguamammɔ mpa no so. (Adiyisɛm 18:3) (Yɛde eyi ho abakɔsɛm mu adanse bɛma wɔ nkratafa a edidi so no mu.) Enti, Babilon Kɛse no rentumi nyɛ amammui nniso no ho mfonini wɔ wiase nhyehyɛe no mu.

Na nnwuma akɛse a edi dwuma titiriw wɔ onipa nsɛm mu nnɛ no nso ɛ? Ɛda adi sɛ ɛyɛ nkɛntɛnso a ano yɛ den wɔ aman pii mu, na nokwarem no, ɛkyerɛ wɔn a wɔbɛyɛ adefo ne wɔn a wɔbɛyɛ ahiafo. So eyi betumi ayɛ Babilon Kɛse no? Ɔbɔfo no de nnyinasode titiriw bi ma Yohane a ebua asemmisa yi. Ɔkaa asɛm bi a ɛyɛ nwonwa​—Babilon anim agu ase! Ɔhwere wɔn a wɔne no bɔ aguaman ne n’adɔfo a wohu mpofirim sɛ ɔyɛ akyide no. Wɔ ‘asase so ahene’ akyi no, henanom bio na wɔka ne daa nsrahwɛfo no ho? Ɔbɔfo no ka sɛ: ‘Efisɛ amanaman nyinaa anom n’aguamammɔ abufuw nsa no bi, na asase so ahene ne no abɔ aguaman, na asase so aguadifo nam n’ahode a n’ani nwu wɔ ho no ahoɔden so anya wɔn ho.’ Yiw, wiase no aguadifo nam aguadi ne fekuw a wɔne no bɔ so anya mfaso na ama ‘n’ahode a n’ani nwu wɔ ho’ no adɔɔso. Enti ɔrentumi nyɛ nnwuma akɛse ho sɛnkyerɛnne wɔ wiase nyinaa.​—Adiyisɛm 18:3.

Enti yɛnam amammui nniso ne tumi ne nkɛntɛnso a nnwuma akɛse wɔ a yeyi fi mu no so hu sɛ ɛnyɛ wɔn. Ɛnde dɛn na aka ama yɛn? Ɛyɛ tumi a afobu a edi so yi fata no no, ‘wode wo ahonhonsɛmdi adaadaa amanaman nyinaa.’ Ɛyɛ ade a na anka ɛwɔ tumi kɛse nanso mprempren ne tumi so rehuan a anya amanaman no nsusuwii ne wɔn nneyɛe so tumi fi tete Babilon bere so tɔnn no. Ɔno ne nea na ‘odi asase so ahene so hene no’​—atoro som!​—Adiyisɛm 17:18; 18:23.

Yiw, ebia ɛyɛ nyamesomfo komapafo binom ahodwiriw de, nanso Babilon Kɛse no, nguaman nã no yɛ Satan wiase nyinaa atoro som ahemman no ho mfonini. Ɔyɛ wiase nyamesom ahorow a wɔnam akwan horow so ne amammui ne sikasɛm nhyehyɛe sodifo ahorow no ayɛ biako wɔ abakɔsɛm mu nyinaa no ho sɛnkyerɛnne.

Babilon Yɛ Ɔko Farebae

Nea ɛne nkɔmhyɛ mu anisoadehu no hyia no, Babilon Kɛse no ne aguaman kɛse a wama aman, nkurɔfo ne mmusua ahorow de wɔn ho ahyɛ mogyahwiegu kɛse akodi, mmeamudua akodi ne mmusua ntam ɔko ahorow mu na ɔde nsɛm a wɔkankye, nsu kronkron, mpaebɔ ahorow ne ɔman ho dɔ kasa horow a ano yɛ hyew hyira wɔn.* ​—Adiyisɛm 18:24.

N’asɔfo ne titiriw no, n’asraafo asɔfo ayɛ sodifo ahorow nnwinade a wofii wɔn pɛ mu yɛɛ ade wɔ ɔmanfo a wodii wɔn anim sɛ afɔrebɔde a ɛma wodu botae bi ho ma wokunkum wɔn wɔ wiase nyinaa ɔko abien ne ɔko akɛse afoforo mu. Katolekfo akunkum Katolekfo na Protestanfo de osetieyɛ akunkum Protestantfo ma nnipa bɛyɛ ɔpepem 50 kosi 60 na wowuwui wɔ wiase nyinaa ko abien pɛ no mu.

Wɔ afeha 20 a anibue wom yi mu no, nyamesom agyapade kɔ so de nitan ne owu ba​—ɛnyɛ Kristoman mu a Katolekfo ne Protestantfo ko tia wɔn ho no nko, na mmom wɔ wɔn a wɔnyɛ Kristofo no nso mu a Nkramosom ko tia Yudasom, Hindusom ko tia Nkramosom, Budasom ko tia Hindusom, Siksom ko tia Hindusom, ne nea ɛkeka ho.

Afei nso, nyamesom ahwehwɛ sɛ ebenya ‘asase so ahene’ no so nkɛntɛnso kɛse na ɛbɔ mmɔden sɛ ɛbɛkyerɛ wɔn nea wɔn daakye bɛyɛ ne wɔn adedifo bere nyinaa. Ma yensusuw nhwɛso kakraa bi ho.

[Ase hɔ asɛm]

Mmeamudua Akodi “kronkron” (1096-1270) no, Europa Mfe Aduasa Ɔko (1618-1648) no, ne Hindufo ne Nkramofo 200,000 a wokunkum wɔn bere a wɔkyɛɛ India mu (1948) no yɛ mogya ho fɔ a nyamesom di no ho nhwɛso kakraa bi.

[Mfonini wɔ kratafa 4]

Emu nea ɛwɔ he​—amammui nnwuma akɛse anaa nyamesom​—na “Babilon Kɛse” gyina hɔ ma no?