So Ogya na Ɛbɛsɛe Asase?

NUKLEA ɔsɛe bɛhyew no, owia a ano yɛ den bɛhyew no pasaa, anaa nyame bi a ne bo afuw de ogya bɛto mu—ebia ɛbɛfa ɔkwan foforo so, nanso nnipa pii gye di sɛ ogya a ano yɛ den na ɛbɛsɛe adesamma fie, okyinnsoromma a ɛne asase no, pasaa.

Ebinom twe adwene si Bible kyerɛw nsɛm a ɛkyerɛ sɛ ogya befi soro aba sɛ ade a wɔde twe adesamma aso wɔ bɔne a wɔayɛ atia asase no ho so. Afoforo ti Paul Davies a ɔyɛ ɔbenfo wɔ Adelaide Sukuupɔn a ɛwɔ Australia nsusuwii a ɔkyerɛw faa sɛnea asase bɛsɛe wɔ ogya mu ɔkwan biara so no ho no mu. Ɔka wɔ ne nhoma The Last Three Minutes mu sɛ: “Bere a owia kɔ so yɛ hyew no, ebebunkam . . . Asase so ahyew no. Yɛn asase no bɛhyew dwerɛbee.” Dɛn ankasa na ɛbɛba asase so daakye? Ɛsɛ sɛ yɛte Bible kyerɛw nsɛm a ɛte sɛ nea ɛhyɛ ɔsɛe a ogya de bɛba ho nkɔm no ase dɛn?

Ɛfa Onyankopɔn Ho?

Wɔka kyerɛ yɛn wɔ Yeremia 10:10-12 sɛ: “Awurade [Yehowa, NW] ne nokware Nyankopɔn. . . . Ɔno na ɔde ne tumi yɛɛ asase, de ne nyansa maa wiase tim hɔ na ɔde ne nhumu trɛw ɔsoro mu.” Onyankopɔn na ɔbɔɔ asase na ɔde tim ne nnyinaso so. Enti ɔde nyansa, ɔdɔ, ne ntease siesiee asase yiye sɛ ɛntra hɔ daa sɛ adesamma fie a ɛyɛ fɛ.

Ɛdefa bɔ a Onyankopɔn bɔɔ adesamma ho no, Bible bɔ amanneɛ sɛ: “Ɔbarima ne ɔbea na ɔbɔɔ wɔn. Na Onyankopɔn hyiraa wɔn, na Onyankopɔn ka kyerɛɛ wɔn sɛ: Monwo, na monnɔ, na monyɛ asase so ma, na monhyɛ so.” (Genesis 1:27, 28) Bere a owiee n’adebɔ adwuma no, na obetumi ada no adi pefee sɛ “eye.” (Genesis 1:31) Ná ɔpɛ sɛ ɛtra hɔ saa ara. Sɛnea sɛ awofo bi rebɛwo a wosiesie ɔdan bi mu ma abofra a wɔrebɛwo no no, saa ara na Onyankopɔn siesiee turo fɛfɛ bi na ɔde onipa, Adam, koduaa mu sɛ ɔnnɔw na ɔnwɛn hɔ.—Genesis 2:15.

Adam gyaw pɛyɛ ne n’asɛyɛde a ɛne sɛ ɔbɛhwɛ asase so no. Nanso, Ɔbɔadeɛ no gyaw N’atirimpɔw? Yesaia 45:18 kyerɛ sɛ ɛnte saa: “Sɛ Awurade [Yehowa, NW] a ɔbɔɔ ɔsoro na ɔnwenee asase na ɔyɛe no se ni,—ɔne Nyankopɔn, ɔno na ɔde sii hɔ; wammɔ no hunu, na ɔnwenee sɛ wɔntra so.” (Hwɛ Yesaia 55:10, 11 nso.) Ɛwom sɛ onipa buu n’ani guu n’asɛyɛde a wɔde hyɛɛ ne nsa no so de, nanso Onyankopɔn kɔɔ so dii n’asɛyɛde a ɛfa asase ne ɛso nkwa ho no ho dwuma. Mmara a wɔde maa tete Israelfo no yɛɛ ‘ahomegye home ho nhyehyɛe ma asase no’ mfe ason biara. Ná mmara horow a ɛda mmoborohunu adi a ɛbɔɔ mmoa ho ban ka ho. (Leviticus 25:4; Exodus 23:4, 5; Deuteronomium 22:1, 2, 6, 7, 10; 25:4; Luka 14:5) Eyinom yɛ Bible mu nhwɛso kakraa bi pɛ a ɛkyerɛ pefee sɛ Onyankopɔn dwen adesamma ne biribiara a Ɔde hyɛɛ onipa nsa no ho yiye.

“Kan Asase No”

Enti ɔkwan bɛn so na yɛkyerɛkyerɛ Bible kyerɛw nsɛm a ɛte sɛ nea ɛbɔ abira no mu? Ebi ne 2 Petro 3:7, a ɛka sɛ: “Ɔsoro ne asase a ɛwɔ hɔ yi, wɔde n’asɛm no ara akora so, na wɔde asie ama ogya, ama atemmu ne nnipa amumɔyɛfo sɛe da no.” Foforo nso ne Adiyisɛm 21:1 a ɛka sɛ: “Mihuu ɔsoro foforo ne asase foforo, na kan soro ne kan asase no atwam.”

Sɛ yɛfa Petro nsɛm no sɛnea ɛte no ara, na sɛ ogya na ɛbɛhyew okyinnsoromma a ɛne Asase no a—ɛnde na ogya na ɛbɛhyew ɔsoro ankasa—nsoromma ne ɔsoro abɔde a aka no nso. Nanso, saa adwene yi ne awerɛhyem a ɛwɔ kyerɛw nsɛm te sɛ Mateo 6:10: “W’ahenni mmra, nea wopɛ nyɛ asase so, sɛnea ɛyɛ ɔsoro,” ne Dwom 37:29: “Treneefo benya asase no adi, na watra so daapem,” no nhyia. Bio nso, tumi bɛn na ogya betumi anya wɔ owia ne nsoromma a ɛyɛ hyew dedaw a ɛtotow nuklea gya bere ne bere mu no so?

Ɔkwan foforo so no, Bible no taa de asɛm “asase” di dwuma wɔ sɛnkyerɛnne kwan so. Sɛ nhwɛso no, Genesis 11:1 ka sɛ: “Na asase nyinaa sofo yɛ ɔnokoro kasa ɔkasa koro.” Ɛha no, asɛmfua “asase” gyina hɔ ma nnipa nyinaa, anaasɛ adesamma abusua no nyinaa. (Hwɛ 1 Ahene 2:1, 2; 1 Beresosɛm 16:31 nso.) Nsɛm a ɛwɔ 2 Petro 3:5, 6 no de “asase” di dwuma wɔ sɛnkyerɛnne kwan so saa ara. Ɛka Noa nna a wɔde Nsuyiri bɛsɛee nnipa amumɔyɛfo, nanso wɔkoraa Noa ne ne fiefo ne asase no nso so no ho asɛm. (Genesis 9:11) Saa ara na wɔ 2 Petro 3:7 no, ɛka sɛ “nnipa amumɔyɛfo” na wɔbɛsɛe wɔn. Saa nsusuwii yi ne Bible no afã foforo hyia. Nnipa amumɔyɛfo a wɔbɛsɛe wɔn no nso ne “kan asase” a wɔaka ho asɛm wɔ Adiyisɛm 21:1 a yɛadi kan afa hɔ asɛm aka no.

Nokwarem no, sɛnea agya a n’ani kũ nneɛma ho bɛfa ɔkwan biara so abɔ ne fie ho ban no, Yehowa Nyankopɔn nso dwen n’abɔde ho yiye. Bere bi a atwam no, otuu nnipa abɔnefo a wɔn bra asɛe fii asase pa a ɛwɔ Yordan Bon no mu no so, na ɔhyɛɛ nnipa foforo a na wɔrebɛhwɛ so a na wɔne no ayɛ apam no bɔ sɛ sɛ wodi n’ahyɛde so a, ‘asase no remfe wɔn sɛ wɔagu ho fĩ, sɛnea ɛfee amanaman a wodii wɔn anim no.’—Leviticus 18:24-28.

“Asase Foforo”

Ɛnnɛ, nnipa abusua a wɔn bra asɛe wɔ nna afam, wɔyɛ basabasa, na wɔn amammuisɛm aporɔw, agu asase no ho fĩ. Onyankopɔn nkutoo na obetumi atew ho. Saa ara na ɛbɛyɛ. Wɔ Adiyisɛm 11:18 no, ɔhyɛ bɔ sɛ ‘ɔbɛsɛe wɔn a wɔsɛe asase no.’ Nnipa a wosuro Onyankopɔn na wofi komam dɔ wɔn mfɛfo no na wɔbɛtra asase a wɔasiesie no foforo no so. (Hebrifo 2:5; fa toto Luka 10:25-28 ho.) Nsakrae a ɛbɛba Onyankopɔn soro Ahenni no mu no bɛyɛ kɛse araa ma enti Bible no ka “asase foforo” ho asɛm—adesamma abusua foforo.

Sɛ yɛkenkan kyerɛw nsɛm te sɛ Dwom 37:29 na yɛte asɛm a Kristo kae wɔ Mateo 6:10 no ase a, ɛma yegye di sɛ abɔde mu tumi biara a yentumi nhu, anaasɛ onipa ne ne tumi a ɔde sɛe nneɛma no mu biara mfa ɔsɛe mma yɛn okyinnsoromma yi so. Wɔremmɔ Onyankopɔn atirimpɔw ngu. (Dwom 119:90; Yesaia 40:15, 26) Adesamma anokwafo bɛtra asase so wɔ tebea a ɛyɛ fɛ ne anigye a enni awiei mu. Ɛno ne nea ɛbɛba asase so daakye ankasa, efisɛ eyi ne adesamma Bɔfo a ɔwɔ ɔdɔ no atirimpɔw bere nyinaa.—Genesis 2:7-9, 15; Adiyisɛm 21:1-5.