“Hwɛ! Meyɛ Nneɛma Nyinaa Foforo”

 1-4. (a) Yɛn nhoma no akyi mfonini no mu nea ɛwɔ he na w’ani begye sɛ wubenya mu kyɛfa? (b) Anidaso a ɛyɛ anigye bɛn na ɛda w’anim wɔ ha? (d) Bible kyerɛw nsɛm a ɛboa saa anidaso yi bi ne nea ɛwɔ he?

HWƐ nkurɔfo a wɔn ani agye a wɔwɔ nhomawa yi akyi no. So wobɛpɛ sɛ woyɛ wɔn mu biako? Wuse, ‘Yiw mepɛ.’ Efisɛ asomdwoe ne biakoyɛ a adesamma nyinaa pɛ no ni. Nnipa a wofi mmusua horow mu—abibifo, aborɔfo, wɔn a wɔn honam ani te sɛ akokɔsrade—redi afra sɛ abusua biako. Anigyesɛm bɛn ara ni! Biakoyɛ bɛn ara ni! Ɛda adi sɛ nkurɔfo yi nhaw wɔn adwene wɔ nuklea ɔtopae mu nsõ ho hu anaa nsɛmmɔnedi ho hu ho. Wim akohyɛn a wɔn ho yɛ hare nsɛe wim a atɛm dinn a ɛwɔ sare fɛfɛɛfɛ yi atifi no. Asraafo nni hɔ, ntwitwiridii nni hɔ, atuo nni hɔ. Enhia polisifo aporibaa mpo na wɔde ama biribiara akɔ so pɛpɛɛpɛ. Ɔko ne nsɛmmɔnedi nni hɔ bio koraa. Na adan a wɔbɛtra mu ho nyɛ nã wɔ hɔ, efisɛ obiara wɔ ofi fɛfɛɛfɛ a ɛyɛ n’ankasa de.

² Wo de, hwɛ saa mmofra no! Sɛ wohwɛ wɔn agoru no a, ɛyɛ anigye yiye. Mmoa a wobetumi ne wɔn adi agoru bɛn ara ni! Nnadeban biara ho nhia wɔ turom ha, efisɛ asomdwoe wɔ mmoa no nyinaa ne onipa ne wɔne wɔn ho wɔn ho ntam. Gyata ne oguammaa po abɛyɛ nnamfo. Hwɛ saa nnomaa a wɔn ho fɛfɛɛfɛ a wotu di akɔneaba no, na tie wɔn su dɛdɛɛdɛ a ɛkã ɔserew a mmofra serew ho ma ɛyɛ wim nyinaa ma no. Nnomaa nkyerɛnkyɛ biara nni hɔ? Dabi, efisɛ nea ɛwɔ ha nyinaa yɛ ahofadi ne anigye a anohyeto biara nnim. Wo de, tie saa nhwiren no hũa, tie sɛnea asuten no sen yɔɔ, tie sɛnea owia no hyew yɛ dɛ fa. Aa, fa nnuaba a ɛwɔ kɛntɛn no mu no bi ka w’ano hwɛ, ɛyɛ nea ɛsen biara a asase betumi asow, nea eye kyɛn so koraa, ɛte sɛ biribiara a wubehu na woadi wɔ turo fɛfɛ yi mu.

³ Nanso obi ka sɛ, ‘Twɛn, na nkwakora ne mmerewa no wɔ he? So ɛnsɛ sɛ wɔn nso wonya anigye a saa nnipa yi wɔ no mu kyɛfa?’ Nokwarem no, wɔwɔ hɔ bi, nanso afei de wɔredan mmerante ne mmabaa bio. Turom ha de, obi nnyin nnwu. Mmofra no nyin yɛ mpanyimfo, na afei wonnyin nkɔ soro bio. Sɛ mfe 20 na obi adi oo, sɛ wadi mfe 200 oo, nnipa ɔpepem pii a wɔwɔ turom ha yi mu biara ani gye wɔ mmerantebere mu ahoɔden asetra mu, akwahosan a ewie pɛyɛ mu. Wuse nnipa ɔpepem anaa? Yiw, nnipa ɔpepem, efisɛ wɔretrɛw turo yi mu akodu asase ano. Ɛbɛyɛ nea nkwa, asomdwoe, ne nneɛma a ɛyɛ fɛ wom akodu yɛn asase yi ano, efi Fuji kosi Andes so, efi Hong Kong kosi Mediteranea ano. Efisɛ wɔresakra asase nyinaa ayɛ no paradise. Ɛbɛyɛ Paradise a wɔasan de aba asase so nyinaa.

⁴ So wuse, ‘Eyi de minnye nni’? Nea edi kan no, susuw nokwasɛm ahorow a edi ho adanse no ho hwɛ. Ebetumi ayɛ yiye sɛ wo ne w’abusua benya nkwa wɔ mprempren nneɛma nhyehyɛe a ɔhaw wom a ɛretwam akɔ no mu na moakɔ Paradise a wuhu wɔ yɛn nhomawa yi akyi no mu.a

Nhoma a Ɛkyerɛkyerɛ Paradise Mu

 5. (a) Nhoma bɛn na ɛkyerɛkyerɛ nneɛma yi mu? (b) Akwan horow bɛn so na eyi yɛ nhoma a ɛda nsow?

⁵ Wɔakyerɛkyerɛ nneɛma fɛfɛ yi nyinaa, ne ba a ɛbɛba ampa no, mu wɔ nhoma bi mu, nhoma a ɛyɛ nwonwa sen nhoma biara a wɔakyerɛw pɛn. Wɔfrɛ no Bible. Ɛyɛ nhoma a akyɛ yiye, na wɔkyerɛw ne fã bi bɛyɛ mfirihyia 3,500 a atwam ni. Bere koro no ara mu no, ɛne nhoma a ɛyɛ ne bere mu de sen biara wɔ afotu pa a eye ma nnɛ bere yi mu asetra a wɔde ma mu. Ne nkɔmhyɛ ahorow no kanyan daakye ho anidaso pa. Ɛne nhoma a wɔatɔ sen biara wɔ abakɔsɛm nyinaa mu, na wɔakyekyɛ Bible mũ no nyinaa anaa ne fã atitiriw bi bɛboro 2,000,000,000 wɔ kasa horow bɛyɛ 2,200 mu.

 6. Dɛn na ɛma Bible da nsow wɔ nkyerɛwee ahorow a wobu no kronkron no ho?

⁶ Wɔnkyekyɛɛ nhoma kronkron foforo biara wɔ amansan yi mu saa, na wɔ ne kyɛ a akyɛ mu no, afoforo pii mmɛn no koraa. Nkramofo Koran no mpo nnii mfe 1,400 ɛ. Buddha ne Confucius traa ase bɛyɛ mfe 2,500 ni, na saa bere no mu na wɔn nkyerɛwee no fii ase. Wɔkyerɛw Shintofo Kyerɛwnsɛm no sɛnea ɛte nnɛ no wɔ nea ɛmmoro mfe 1,200 ni mu. Mormon Nhoma no adi mfe 160 pɛ. Saa nhoma kronkron yi mu biara nni hɔ a ebetumi asuare ɔdesani abakɔsɛm pɛpɛɛpɛ asan akyi wɔ mfe 6,000 mu sɛnea Bible yɛ no. Enti sɛnea ɛbɛyɛ na yɛahu ɔsom a edi kan no, ɛsɛ sɛ yɛkɔ Bible mu. Ɛno nkutoo ne nhoma a ekura nkrasɛm a ɛyɛ amansan nyinaa de ma adesamma nyinaa.

 7. Dɛn na nnipa a wodwen ade ho yiye aka wɔ Bible no ho?

⁷ Nyansa a ɛwɔ Bible mu asɛm no mu ne dɛ a ɛyɛ no yɛ nea nnipa a wɔdwene ade ho yiye a wofi aman nyinaa mu ne mmeae horow pii akamfo. Nyansahufo a ogyee din kɛse, Sir Isaac Newton, a ɔno na ohuu tumi a ɛtwe ade ba fam ho mmara no kae sɛ: “Wonnii nyansahu biara ho adanse a ɛsen Bible no.” Patrick Henry, Amerikafo ɔman anidanfo panyin a asɛm a ɔkae sɛ, “Ma me ahofadi, anaa ma me owu” no ama wagye din no nso kae sɛ: “Bible no som bo te sɛ nhoma foforo biara a wɔatintim pɛn.” Hinduni onimdefo kɛse Mohandas K. Gandhi mpo ka kyerɛɛ Britania ɔman no nanmusini a na ɔwɔ India no bere bi sɛ: “Sɛ wo man no ne me de yi bɛbom agye nkyerɛkyerɛ a Kristo daa no adi wɔ Bepɔw so Asɛnka no mu no atom a, anka ɛnyɛ yɛn aman no ɔhaw ahorow nkutoo ho dwuma na yebetumi adi na mmom wiase nyinaa de nso.” Ná Gandhi reka Mateo atiri 5 kosi 7 a ɛwɔ Bible mu no ho asɛm. Kenkan atiri yi na hwɛ sɛ asɛm a tumi wom a ekura no remma wo ho nnwiriw wo anaa.

Bible No—Apuei Famfo Nhoma

 8, 9. (a) Dɛn nti na ɛyɛ mfomso sɛ wɔbɛfrɛ Bible no sɛ Atɔe Famfo nhoma? (b) Ɔkwan bɛn so na wɔfa kyerɛw Bible no, na wɔ bere tenten bɛn mu? (d) Dɛn nti na wobetumi afrɛ Bible no nhomakorabea? (e) Nnipa baahe na wɔma wɔkyerɛw Bible no? (ɛ) Adanse bɛn na nnipa yi binom de mae wɔ Bible no Fibea ho?

⁸ Nea ɛne adwene a nkurɔfo pii kura bɔ abira no, Bible no nyɛ biribi a Atɔe Famfo anibuei na ɛde bae, na saa ara na ɛnyɛ nea ɛhyɛ no anuonyam nso. Ɛkame ayɛ sɛ Apuei Famfo aman mu na wɔkyerɛw Bible mũ no nyinaa. Nnipa a wɔkyerɛwee no nyinaa yɛ Apuei Famfo. Mfirihyia apem ansa na Buddha reba no, Onyankopɔn honhom kaa Mose a na ofi Mfinimfini Apuei no wɔ 1513 A.Y.B. mu ma ɔkyerɛw Bible mu nhoma a edi kan a wɔfrɛ no Genesis no. Efi mfiase yi so no, Bible di asɛmti biako a ehyia akyi kosi ne nhoma a etwa to a ɛne Adiyisɛm no so. Buddha akyi bɛyɛ mfe 600, wɔ 98 Y.B. mu na wowiee Bible no kyerɛw. So na wunim sɛ nhoma ahorow 66 na ɛwɔ Bible mu? Yiw, Bible no ankasa yɛ nhomakorabea!

⁹ Enti, wɔ mfe bɛboro 1,600 a efii ase fii Mose bere so reba no, nnipa ahorow bɛyɛ 40 na wɔkyerɛw Bible mu kyerɛwtohɔ a ɛne ne ho hyia no. Wodi adanse sɛ tumi bi a ɛkorɔn koraa sen onipa desani na ɔma wɔkyerɛw wɔn nkyerɛwee no. Kristoni ɔsomafo Paulo kyerɛwee sɛ: “Kyerɛw nyinaa fi Nyankopɔn home mu, na eye ma ɔkyerɛkyerɛ, ntɛnyi, nteɛso ne trenee mu yɛn.”b (2 Timoteo 3:16) Na ɔsomafo Petro kyerɛkyerɛɛ mu sɛ: “Kyerɛw mu adiyisɛm biara nnam onipa nkyerɛase so; efisɛ adiyisɛm bi amfa nnipa pɛ so amma pɛn, na Onyankopɔn nnipa kronkron no, sɛnea honhom kronkron de wɔn rekɔ no na wɔkasae.”—2 Petro 1:20, 21; 2 Samuel 23:2; Luka 1:70.

10. (a) Ɛyɛɛ dɛn na Bible no beduu yɛn bere yi so? (b) Dɛn nti na yebetumi agye adi sɛ yɛda so ara wɔ mfitiase Bible mu asɛm a efi honhom mu no?

¹⁰ Nea ɛyɛ nwonwa nso ne sɛnea ɛyɛe a Bible no beduu nnɛ da yi mu no. Mfe mpempem pii ansa na tintim mfiri reba bɛyɛ mfirihyia 500 bi ni no, na nsa na wɔhwɛ Bible no so de kyerɛw foforo. Tete nhoma foforo biara nni hɔ a wɔhwɛɛ so kyerɛwee mpɛn pii a wɔde ahwɛyiye kɛse dii dwuma wom te sɛ ɛno. Mfomso nketenkete kakraa bi na akyerɛwfo no yɛe, na ntotoho a wɔayɛ wɔ eyi mu ama wɔanya mfitiase de a wɔde Onyankopɔn honhom kyerɛwee no. Bible nsaano nkyerɛwee ho ɔdenimfo, Sir Frederic Kenyon, se: “Afei de ade a edi akyiri a na wogyina so gye akyinnye sɛ ebia yɛn nsa anka Kyerɛwnsɛm no sɛnea na ɛte bere a wɔkyerɛwee no afi hɔ.” Ɛnnɛ, Bible mũ no nyinaa anaa ne fã bi a wɔde nsa kyerɛwee no bɛyɛ 16,000 da so ara wɔ hɔ, a ebinom yɛ nea na ɛwɔ hɔ afeha a ɛto so abien ansa na Kristo reba no. Bio nso, ɛkame ayɛ sɛ wɔakyerɛ ase afi Hebri, Aram ne Hela kasa a emu na wodii kan kyerɛw Bible no mu akɔ asase so kasa horow no nyinaa mu sɛnea ɛte pɛpɛɛpɛ.

11. Nnɛyi nneɛma a wɔakohu bɛn na ɛne Bible kyerɛwtohɔ no hyia?

¹¹ Ebinom bɔ mmɔden sɛ wobebu Bible no animtiaa denam ka a wɔka sɛ ɛnyɛ sɛnea asɛm no te na ɛwɔ mu no so. Nanso, wɔ nnansa yi mfe no mu no, tete nneɛma ho nhwehwɛmufo atutu Bible mu nsase so tete nkurow no amamfõ so ma wɔakohu nkyerɛwee ne adanse ahorow a ɛda no adi wɔ ɔkwan a akyinnye biara nni ho so sɛ nnipa ne mmeae horow a wɔbobɔ din wɔ Bible mu kyerɛwtohɔ a akyɛ sen biara mu no traa hɔ ampa. Wɔatutu nneɛma pii a edi adanse sɛ nsuyiri bi a ɛkataa asase so nyinaa bae ampa, nea Bible se ɛbae bɛboro mfe 4,000 ni, wɔ Noa bere so no. Wɔ eyi ho no, Prince Mikasa a ɔyɛ tete nneɛma ho nhwehwɛmufo a wagye din kɛse no kae sɛ: “So Nsuyiri bi bae ampa? . . . Wɔadi nokwasɛm a ɛyɛ sɛ nsuyiri no bae ampa no ho adanse a akyinnye biara nni ho.”c

Bible no Nyankopɔn

12. (a) Dɛn na fɛwdifo binom ka wɔ Onyankopɔn ho? (b) Dɛn nti na Bible no ka Onyankopɔn ho asɛm sɛ Agya? (d) Bible no kyerɛ sɛ Onyankopɔn din ne dɛn?

¹² Sɛnea nnipa binom di Bible no ho fɛw no, saa ara na afoforo nso di wɔ a Ade Nyinaa so Tumfoɔ Nyankopɔn bi wɔ hɔ no ho fɛw. (2 Petro 3:3-7) Wɔka sɛ, ‘Ɛbɛyɛ dɛn na matumi agye Onyankopɔn adi bere a minhu no no? So adanse bi wɔ hɔ sɛ Ɔbɔadeɛ bi a aniwa nhu no a ɔkorɔn sen onipa wɔ hɔ ampa? So ɛnyɛ nea Onyankopɔn te ade nyinaa mu?’ Afoforo se, ‘Onyankopɔn anaa Buddha biara nni hɔ.’ Nanso, Bible no kyerɛ sɛ, sɛnea yɛn nyinaa nam asase so agya bi so nyaa nkwa no, saa na yɛn awofo a wodi kan no nyaa nkwa fii ɔsoro Agya, anaa Ɔbɔadeɛ bi a ne din ne Yehowa hɔ.—Dwom 83:18; 100:3; Yesaia 12:2; 26:4.

13. Akwan horow abien bɛn na Yehowa afa so ayi ne ho adi akyerɛ adesamma?

¹³ Yehowa nam akwan horow abien so ada ne ho adi akyerɛ adesamma. Emu titiriw ne Bible no a ɛma wohu ne nokware no ne ne daa atirimpɔw ahorow no. (Yohane 17:17; 1 Petro 1:24, 25) Biako nso ne n’abɔde. Ɛdenam nneɛma a ɛyɛ nwonwa a atwa wɔn ho ahyia a wohu so no, nnipa pii aba abehu sɛ Ɔbɔadeɛ bi a ɔyɛ Onyankopɔn wɔ hɔ a ne nipasu kɛse no da adi wɔ ne nnwuma mu.—Adiyisɛm 15:3, 4.

14. Dɛn na Bible no ka kyerɛ yɛn wɔ Yehowa ho?

¹⁴ Yehowa Nyankopɔn ne Bible no Yɛfo. Ɔne Honhom Kɛse a ɔwɔ hɔ daa no. (Yohane 4:24; Dwom 90:1, 2) Ne din “Yehowa” no twe adwene ba n’atirimpɔw a ɛwɔ n’abɔde ho no so. Ɛyɛ n’atirimpɔw sɛ ɔbɛsan saa din kɛse no ho denam abɔnefo a ɔbɛsɛe wɔn na wagye wɔn a wɔdɔ no na ama wɔatumi atra paradise asase so no so. (Exodus 6:2-8; Yesaia 35:1, 2) Esiane sɛ ɔyɛ Ade Nyinaa so Tumfoɔ Nyankopɔn nti, ɔwɔ tumi a ɔde bɛyɛ eyi. Sɛ́ Ɔbɔadeɛ a ɔbɔɔ amansan nyinaa no, ɔkorɔn sen ɔman anyame ne ahoni ahorow no.—Yesaia 42:5, 8; Dwom 115:1, 4-8.

15. Adebɔ ho ade a adenimfo asua no ama wɔaka nsɛm bɛn?

¹⁵ Nnansa yi mfehaha no mu no, nyansahufo de bere pii asua adebɔ nnwuma ho ade. Dɛn na wɔahu? Wɔn a wodii kan kohuu anyinam ahoɔden ho nimdeɛ bae no mu biako, Lord Kelvin, a ɔyɛ Britaniani ɔbenfo kɛse a wagye din no kae sɛ: “Migye di sɛ, dodow a yesua nyansahu ho ade fefeefe no, dodow no ara na eyi yɛn fi biribiara a wɔde bɛto gye a wonnye nni sɛ Onyankopɔn wɔ hɔ ho no ho.” Nyansahufo Albert Einstein a wɔwoo no wɔ Europa a ogyee din sɛ obi a onnye nni sɛ Onyankopɔn wɔ hɔ no paee mu kae sɛ: “Ɛdɔɔso ma me sɛ . . . mɛdwen amansan sibea a ɛyɛ nwonwa a yentumi nhu mu yiye no ho na mabɔ mmɔden wɔ ahobrɛase mu sɛ menya adwene a ɛda adi wɔ adebɔsu mu no ho ntease ketewaa bi po.” Amerikani nyansahufo Arthur Holly Compton a onyaa Nobel akyɛde no kae sɛ: “Amansan a wɔahyehyɛ no pɛpɛɛpɛ a wohu no di nokware a asɛnkɛse a ɛsen nea wɔaka pɛn biara—a ɛne ‘Mfiase no, Onyankopɔn’—no yɛ ho adanse.” Ná Bible mu asɛm a edi kan no na ɔrefa aka no.

16. Ɔkwan bɛn so na amansan yi kamfo Onyankopɔn adebɔ nyansa ne tumi no?

¹⁶ Ebia aman akɛse no sodifo bɛhoahoa wɔn ho wɔ wɔn nyansa ne nea wɔatumi ayɛ wɔ nyansahu kwan so wɔ nea wɔatumi de akɔ ahunmu no ho. Nanso sɛ wode wɔn ahunmu ahyɛn no toto ɔsram a etwa asase ho hyia, ne okyinnsoromma ahorow a etwa owia ho hyia no ho a, na wɔnsɛ hwee koraa! Sɛ wode nneɛma a nnipa a wowuwu yi ayeyɛ toto ɔsoro nsoromma-kuw ɔpepepem pii a Yehowa abɔ a emu biara wɔ awia a ɛte sɛ yɛn de yi ɔpepepem pii a waboaboa wɔn ano de wɔn asisi ahunmu bere a enni ano no ho a, na wosusua yiye koraa! (Dwom 19:1, 2; Hiob 26:7, 14) Ɛnyɛ nwonwa sɛ Yehowa bu nnipa sɛ mmɛbɛw, ne aman akɛse ‘sɛ wɔnsɛ hwee.’—Yesaia 40:13-18, 22.

17. Dɛn nti na nyansa wom sɛ wubegye Ɔbɔadeɛ no adi?

¹⁷ So wote ɔdan bi mu? Ebia na ɛnyɛ w’ankasa na wusii ɔdan no, anaasɛ wunnim nea osii nso. Nanso nokwasɛm a ɛyɛ sɛ wunnim nea osii no nsiw wo kwan wɔ gye a wubegye nokware a ɛyɛ sɛ onyansafo bi na osii no atom. Adwene a wubenya sɛ ofi no ankasa na esii ne ho no bɛyɛ nea nyansa nnim koraa! Esiane sɛ egye nyansa kɛse a enni ano ma wɔde ahyehyɛ amansan kɛse yi ne biribiara a ɛwom nti, so ɛnyɛ nea nyansa wom sɛ wɔbɛka sɛ Ɔbɔadeɛ Nyansafo bi wɔ hɔ? Ampa, ɔkwasea nko na ɔbɛka ne komam sɛ, “[Yehowa] bi nni hɔ.”—Dwom 14:1; Hebrifo 3:4.

18. Dɛn na ɛkyerɛ sɛ Onyankopɔn yɛ honhom nipa, na ɔfata ayeyi?

¹⁸ Anwonwade a ɛyɛ fɛ a atwa yɛn ho ahyia—nhwiren, nnomaa, mmoadoma, abɔde a ɔyɛ nwonwa a wɔfrɛ no onipa, anwonwade a ɛfa nkwa ne awo ho, no—ne nyinaa di Nyansa Kɛse a aniwa nhu no a ɔde wɔn bae no ho adanse. (Romafo 1:20) Baabi a nyansa wɔ no, na adwene wɔ hɔ. Baabi a adwene wɔ no na onipa bi wɔ hɔ. Nyansa a ɛkyɛn ne nyinaa no yɛ Nea Ɔkyɛn obiara, a ɔyɛ nea ɛte ase nyinaa Bɔfo, nkwa Nsuti ankasa, no dea. (Dwom 36:9) Ampa ara, Ɔbɔadeɛ no fata ayeyi ne nkamfo nyinaa.—Dwom 104:24; Adiyisɛm 4:11.

19. (a) Dɛn nti na ɔman biara rentumi nka nnɛ sɛ Onyankopɔn ama wɔadi nkonim wɔ ɔko bi mu? (b) Dɛn nti na Onyankopɔn nsa nni amanaman no akodi ahorow no mu?

¹⁹ Ebinom wɔ hɔ a nneɛma a ɛyɛ awerɛhow a wohui wɔ Wiase Ko II mu no wosoo Onyankopɔn mu gyidi a wɔwɔ no. Saa bere no, ɔman biara frɛɛ ne “Nyame,” sɛ́ ɛyɛ Katolekfo anaa Protestantfo anaasɛ Apuei Fam ɔsom ahorow no mufo. So wobetumi aka sɛ “Onyankopɔn” maa aman ahorow yi bi dii nkonim na ɔmaa kwan maa afoforo nso dii nkogu? Bible no kyerɛ sɛ na ɛnyɛ nea aman yi mu biara refrɛ nokware Nyankopɔn no. Ɛnyɛ Yehowa Nyankopɔn, ɔsoro ne asase Bɔfo no na wama basabasayɛ ne akokoakoko a ɛwɔ amanaman no mu no aba. (1 Korintofo 14:33) N’adwene korɔn koraa sen asase yi so amammui ne akodi aman no de. (Yesaia 55:8, 9) Saa ara nso na Yehowa nokware som nni afã biara wɔ amanaman no akodi no mu. Yehowa korɔn koraa sen ɔmampɛ anyame ahorow no. Ɔyɛ soronko wɔ yɛ a ɔyɛ mmarima ne mmea a wɔdɔ asomdwoe no Nyankopɔn no mu. Sɛnea Bible ka no: “Onyankopɔn nhwɛ onipa anim, na mmom ɔman biara mu, nea osuro no na ɔyɛ ade trenee no, ɔpɛ no agye no.” (Asomafo no Nnwuma 10:34, 35) Afei de nnipa a wɔdɔ trenee a wofi amanaman nyinaa mu resua Bible no na wɔregye nokware “Nyankopɔn a ɔma asomdwoe,” adesamma nyinaa Bɔfo, no som atom.—Romafo 16:20, New World Translation of the Holy Scriptures; Asomafo no Nnwuma 17:24-27.

20. Dɛn na ɛkyerɛ sɛ Kristoman mufo nyɛ Kristofo ankasa na wɔsɔre tia Onyankopɔn?

²⁰ Ebinom twe adwene si mpaapaemu a ɛwɔ Kristoman a ɛka sɛ edi Bible akyi mu no so. Wɔka nso sɛ, ‘Mɛyɛ dɛn atumi agye Bible Nyankopɔn no adi bere a aman a wɔwɔ Bible no bi no ka wɔn a wɔn ani abere reboaboa nuklea akode ahorow ano no ho no?’ Nokwasɛm no ne sɛ, bere a Bible no yɛ nokware bere nyinaa no, amanaman a wɔwɔ Kristoman mu no ne Bible mu Kristosom no ntam atew yiye te sɛ nea Kusuu fam Asasetifi ne Kesee fam Asasetifi ntam ware no. Wɔyɛ nyaatwomfo wɔ ka a wɔka sɛ wɔyɛ Kristofo no mu. Wɔwɔ Bible, nanso wontie ne nkyerɛkyerɛ no. Amerika ɔmampanyin a ɔhyɛe sɛ wɔnkɔtow atom bomb a edi kan nto Hiroshima so no kae bere bi sɛ, “Oo, sɛ anka yebenya Yesaia anaa Ɔhotefo Paulo bi ɛ!”—ma wakyerɛ nnipa kwan wɔ wiase amanehunu yi mu. Sɛ ogyee Bible mu Yesaia no dii a, anka ɔremma wɔnkɔtow atom bomb, efisɛ nea Yesaia kae ne sɛ, ‘wɔde nkrante bɛbobɔ nsɔw na wɔde mpeaw ayeyɛ nnare.’ Afei nso Bible mu Paulo no na ɔkae sɛ: “Yɛnkɔ ɔsa ɔhonam fam; efisɛ yɛn sa a yɛkɔ no akode nyɛ ɔhonam mu de.” (Yesaia 2:4; 2 Korintofo 10:3, 4) Nanso sɛ́ anka Kristoman mu aman no bedi Bible mu afotu a nyansa wom no akyi mmom no, wɔde wɔn ho hyɛ akodeyɛ mu akansi a ebetumi atɔre wɔn ase mu. Ka a wɔka sɛ wɔyɛ Kristofo a wotie nea Bible no ka biara no yɛ atoro. Ɛsɛ sɛ Onyankopɔn atemmu ba wɔn so esiane Onyankopɔn apɛde a wɔanyɛ nti.—Mateo 7:18-23; Sefania 1:17, 18.

Yehowa Abɔde ne Anwonwade Ahorow

21. Dɛn nti na ntease wom sɛ wobegye Onyankopɔn anwonwade ahorow no adi?

²¹ Yehowa bɔ ade, na ɔyɛ anwonwade. So woadwen nsu a ɛdanee mogya, Ɛpo Kɔkɔɔ a emu paee, Yesu a ɔbaabun woo no, ne anwonwade ahorow a ɛwɔ Bible mu no ho pɛn? Esiane sɛ onipa nyansa nnɔɔso nti, ebia ɔrentumi nte sɛnea ɛyɛe a anwonwade yi binom bae no ase da, sɛnea nso ontumi nwie sɛnea owia pue na ɛkɔtɔ da biara no asete no. Bɔ a wɔbɔɔ onipa no mpo yɛ anwonwade. Nnipa a wɔwɔ hɔ nnɛ anhu saa anwonwade no, nanso wonim sɛ esii, efisɛ wɔte ase nnɛ de di ho adanse. Ampa, nkwa ne amansan no nyinaa yɛ anwonwade koro a ɛtra hɔ daa. Enti, bere a Onyankopɔn Asɛm, Bible, ka sɛ ɔyeyɛɛ anwonwade pɔtee bi wɔ mmere pɔtee bi mu no, so yebegye ho kyim, ɛwom mpo sɛ anwonwade koro no ara ho nhia nnɛ?

22. Ka Onyankopɔn abɔde a odi kan no ho asɛm.

²² Yehowa abɔde nyinaa yɛ anwonwade! Nanso n’abɔde a odi kan pɛɛ no na ɛyɛ nwonwa sen ne nyinaa. Eyi yɛ honhom mu Ɔba bi a ɔbɔɔ no, ‘n’abakan.’ (Kolosefo 1:15) Wɔtoo ɔsoro Ɔba yi din sɛ “Asɛm no.” Wɔbɔɔ no akyi mfe pii a wontumi nkan no, ɔbaa asase yi so, ma wɔbɛfrɛɛ no “onipa Kristo Yesu.” (1 Timoteo 2:5) Afei wɔkae wɔ ne ho sɛ: “Na Asɛm no bɛyɛɛ ɔhonam, na ɔbɛtraa yɛn mu, na yehuu n’anuonyam sɛ agya no ba a ɔwoo no koro anuonyam, na ɔdom ne nokware ayɛ no ma.”—Yohane 1:14.

23. (a) Ɔkwan bɛn so na wobetumi akyerɛkyerɛ abusuabɔ a ɛda Onyankopɔn ne ne Ba no ntam no mu? (b) Dɛn na Yehowa nam ne Ba no so bɔe?

²³ Wobetumi de abusuabɔ a ɛda Yehowa ne ne Ba no ntam no atoto adwumawura bi ne ne ba a wɔyɛ adwuma ho a ne ba no boa no ma wɔyɛ adwini ahorow a agya no adi ho adwuma ho. Yehowa nam n’abakan ne ne yɔnko dwumayeni no so abɔ honhom abɔde, Onyankopɔn mma, afoforo pii. Akyiri yi eyinom dii ahurusi bere a wohuu Yehowa Ba, ne Dwumfo a Waben yi sɛ ɔreyɛ ɔhonam fam ɔsoro ne asase a yɛte so yi no. So w’adwenem yɛ wo naa sɛ wɔbɔɔ nneɛma yi? Mfirihyia mpempem pii akyi no, Yehowa bisaa ɔbarima nokwafo bi sɛ: “Ɛhe na wowɔ, bere a mehyɛɛ asase ase no? Sɛ wowɔ nhumu a, ka ɛ! Bere a adekyee nsoromma boom too ahurusi dwom, na Onyankopɔn mma bɔɔ ose no?”—Hiob 38:4, 7; Yohane 1:3.

24. (a) Yehowa asase so abɔde bɛn na ɛyɛ nwonwa, na akwan bɛn so? (b) Dɛn nti na nyansa nnim sɛ wɔbɛka sɛ onipa dii adannan fii mmoa mu na ɛbae?

²⁴ Ɛyɛe no, Yehowa bɔɔ honam fam nneɛma a nkwa wom wɔ asase yi so, afifide, nnua, nhwiren, mpataa, nnomaa ne mmoadoma. (Genesis 1:11-13, 20-25) Afei Onyankopɔn ka kyerɛɛ ne Dwumfo a Waben no sɛ: “Ma yɛnyɛ onipa wɔ yɛn suban so, sɛ yɛn sɛso . . . Na Onyankopɔn fii ase bɔɔ onipa wɔ ne suban so, Onyankopɔn suban so na ɔbɔɔ no; ɔbarima ne ɔbea na ɔbɔɔ wɔn.” (Genesis 1:26, 27, NW) Esiane Onyankopɔn suban ne ne sɛso so a wɔbɔɔ onipa, na wɔmaa no Onyankopɔn su akɛse a ɛne ɔdɔ, nyansa, atɛntrenee ne tumi no nti, na onipa a odi kan no kyɛn mmoa no koraa. Onipa wɔ kuw bi a ɛsono wɔ mmoa no de ho mu, efisɛ otumi dwen, ɔyɛ daakye ho nhyehyɛe, na ɔwɔ tumi a ɔde bɛsom Onyankopɔn. Mmoa nni nyansa a wɔde bedwen, na mmom wɔnam nkate so na ɛtra ase. Hwɛ nyansa ara a ennim sɛ wɔbɛka sɛ Ɔbɔadeɛ bi nni hɔ, ne sɛ abɔde a ɔne onipa a ɔwɔ adwene a wɔde nneɛma pii akyɛ no saa no fi mmoa a wɔba fam a wonni adwene no mu na edii adannan bae!—Dwom 92:6, 7; 139:14.

25, 26. (a) Anidaso kɛse bɛn na wɔde sii onipa anim? (b) Dɛn nti na asase so ma a wɔbɛyɛ akyere so biara remma?

²⁵ Onyankopɔn de onipa too “turo bi mu wɔ Eden, apuei fam.” Ná ɛyɛ turo a anigye wom, te sɛ turo a ɛwɔ yɛn nhomawa yi akyi no, ɛwom sɛ na adesamma baanu a wɔne Adam ne ne yere nko na wɔte mu de. Mfitiase Paradise yi nni hɔ bio, efisɛ Noa bere so Nsuyiri no sɛee no. Nanso yenim faako a na ɛda wɔ Mfinimfini Apuei, efisɛ asubɔnten a wɔbobɔɔ din wɔ Bible mu sɛ ɛsen fa mu no da so ara wɔ hɔ de besi nnɛ. (Genesis 2:7-14) Onipa nyaa hokwan kɛse a ɛbɛma ɔde turo yi ayɛ nea obefi atrɛw mu akɔ na wadɔw asase mu no nyinaa ayɛ no paradise a ɛkata asase so nyinaa.—Yesaia 45:12, 18.

²⁶ Sɛnea Onyankopɔn ne ne Ba no nyinaa yɛ adwumayɛfo no, saa ara nso na Onyankopɔn maa onipa adwuma sɛ ɔnyɛ wɔ asase so ha. (Yohane 5:17) Ɔka kyerɛɛ ɔbarima ne ɔbea a wodi kan, Adam ne Hawa, sɛ: “Monwo, na monnɔ, na monyɛ asase so ma, na monhyɛ so, na munni ɛpo mu mpataa ne wim nnomaa ne mmoa a wɔkeka wɔn ho wɔ asase so nyinaa so.” (Genesis 1:28) So na eyi kyerɛ sɛ onipa no bɛdɔ na wahyɛ asase so ma, na afei, wakɔ so ara adɔ akosi sɛ asase no bɛyɛ ma abu so? Dabi. Sɛ obi ka kyerɛ wo sɛ hwie tii gu kuruwa bi mu ma ɛnyɛ ma a, worenhwie ngu mu ara kosi sɛ ɛbɛyɛ ma abu so na ahwie agu ɔpon so. Wohyɛ kuruwa no ma na afei wugyae. Saa ara na Yehowa ahyɛde a ɔde maa onipa sɛ, “monyɛ asase so ma” no kyerɛ n’atirimpɔw a ɔwɔ sɛ ɔbɛma nnipa ayɛ asase so ma sɛnea ɛbɛyɛ ahomeka, na afei adesamma awo to atwa wɔ asase so. Eyi remfa asɛm a ɛyɛ den biara mma adesamma a wɔyɛ pɛ abusua no mu. Adesamma a wɔnyɛ pɛ wiase a ɛwɔ hɔ no mu nko na nnipa a wɔbɛdɔɔso dodo no yɛ asɛm a ɛyɛ den.

Nneɛma Bɔne—Dɛn Nti na Onyankopɔn Ma Ho Kwan?

27. Afei nsɛmmisa bɛn na ɛho hia sɛ wobua?

²⁷ Sɛ Onyankopɔn atirimpɔw ne sɛ ɔbɛyɛ asase paradise a, ɛyɛɛ dɛn na nnɛ nsɛmmɔnedi, amanehunu, ne awerɛhow ahyɛ asase so ma saa? Sɛ Onyankopɔn ne Ade Nyinaa so Tumfoɔ a, dɛn nti na wama tebea horow yi ho kwan bere tenten saa? So anidaso wɔ hɔ sɛ yɛn haw ahorow yi nyinaa bɛba awiei? Dɛn na Bible no ka?

28. Ɛyɛɛ dɛn na atuatew bɛhyɛn Paradise turo no mu?

²⁸ Bible no kyerɛ sɛ adesamma haw ahorow no fii ase bere a Onyankopɔn mma a wɔyɛ honhom no mu biako tew atua tiaa Yehowa tumidi, anaa ne nniso no. (Romafo 1:20; Dwom 103:22) Akyinnye biara nni ho sɛ na ɔbɔfo yi ka wɔn a wɔbɔɔ ose bere a wɔbɔɔ onipa no ho. Nanso afei anibere ne ahantan gyee ntini wɔ ne komam, na ɔmaa akɔnnɔ a onyae sɔ ɔbɛma Adam ne Hawa asom ɔno mmom na ɛnyɛ wɔn Bɔfo, Yehowa, no daadaa no. Bere a ɔbɔfo yi rekasa afa ɔwɔ so, te sɛ nea nnipa binom tumi kasa fa abaduaba so, no, ɔdaadaa Hawa ma ɔyɛɛ asoɔden tiaa Ade Nyinaa so Tumfoɔ Nyankopɔn no. Afei ne kunu, Adam, dii n’akyi wɔ asoɔdenyɛ mu.—Genesis 2:15-17; 3:1-6; Yakobo 1:14, 15.

29. (a) Asɛm bɛn na ɛsɔree a ɛsɛ sɛ wobua? (b) Ɔkwan bɛn so na Onyankopɔn adi mpoatwa no ho dwuma? (d) Ɔkwan bɛn so na wubetumi ama wɔanya asɛm a wɔde bebua Satan ahohorabɔ no?

²⁹ Wɔbɛfrɛɛ saa ɔbɔfo tuatewfo no “ɔwɔ dedaw.” (Adiyisɛm 12:9; 2 Korintofo 11:3) Afei nso wɔfrɛ no Satan, a ɛkyerɛ “Ɔsɔretiafo,” ne Ɔbonsam, a ɛkyerɛ “Otwirifo.” Ɔmaa teɛ a Yehowa tumidi wɔ asase so teɛ ne trenee a ɛyɛ no ho baa asɛm, na otwaa Onyankopɔn mpoa sɛ afei de, ɔno, Satan, betumi adan adesamma nyinaa afi nokware som ho. Onyankopɔn ama Satan kwan bɛyɛ mfirihyia 6,000 ni sɛ ɔmfa nkyerɛ nokware a n’asɛm no yɛ sɛnea ɛbɛyɛ a wobebua asɛm a ɛfa Yehowa tumidi ho no daa daa. Onipa nniso a Onyankopɔn nsa nnim adi nkogu kɛse. Nanso mmarima ne mmea gyidifo, a Yesu yɛ wɔn mu nhwɛsofo titiriw, akura wɔn mudi mu ama Onyankopɔn wɔ sɔhwɛ ahorow a emu yɛ den mu de atew Yehowa ho na wɔakyerɛ sɛ Ɔbonsam yɛ ɔtorofo. (Luka 4:1-13; Hiob 1:7-12; 2:1-6; 27:5) Wo nso wubetumi akura wo mudi mu. (Mmebusɛm 27:11) Nanso ɛnyɛ Satan nko ne ɔtamfo a ɔhaw yɛn. Ɔtamfo foforo bɛn na ɔwɔ hɔ?

Ɔtamfo No—Owu

30. Dɛn na Kyerɛwnsɛm no ka wɔ asotwe a esiane asoɔden nti ɛbaa onipa so no ho?

³⁰ Ná Onyankopɔn akyerɛ asoɔden ho asotwe—owu. Yehowa rebu ɔbea a odi kan no atɛn no, ose: “Ɔdɔ na mɛma wo yaw ne wo nyinsɛn mu brɛ adɔɔso. Ɛyaw mu na wobɛwo mma, ma w’ani begyina wo kunu, na ɔno na obedi wo so.” Adam de ɔka kyerɛɛ no sɛ: “W’anim fifiri mu na wubedidi de akosi sɛ wobɛsan akɔ dɔte mu, efisɛ emu ma woyii wo fii, na woyɛ dɔte, na dɔte mu na wobɛsan akɔ.” (Genesis 3:16-19) Wɔpamoo nnipa baanu no fii anigye Paradise no mu kɔɔ asase a wɔnnɔwee no so. Wowuwui akyiri yi.—Genesis 5:5.

31. Dɛn ne bɔne, na dɛn na afi mu aba adesamma so?

³¹ Bere a Adam ne Hawa hwee ase fii pɛyɛ ho no ansa na wɔrefi ase awo mma. Nnipa a wɔwɔ hɔ nnɛ nyinaa yɛ wɔn asefo a wɔnnyɛ pɛ, na enti wɔn nyinaa wuwu. Bible ɔkyerɛwfo biako kyerɛkyerɛ mu sɛɛ se: “Ɛnam onipa biako so na bɔne baa wiase, na owu nam bɔne so bae . . . saa na ɛyɛe na owu trɛw kaa nnipa nyinaa, efisɛ wɔn nyinaa ayɛ bɔne.” Dɛn ne saa “bɔne” yi? Ɛyɛ pɛyɛ anaa mudi botae ho a wonnu. Yehowa Nyankopɔn mpene biribiara a ɛnyɛ pɛ so anaasɛ sɛ ɔbɛma atra ase. Esiane sɛ nnipa nyinaa anya bɔne ne sintɔ afi onipa a odi kan Adam hɔ nti, owu ‘adi hene’ wɔ wɔn so. (Romafo 5:12, 14) Onipa a wahwe ase no wu te sɛ nea mmoa wu no ara pɛ.—Ɔsɛnkafo 3:19-21.

32. Ɔkwan bɛn so na Bible ka owu a yenya fii awo mu no ho asɛm?

³² Dɛn ne “owu” yi? Owu yɛ nkwa abirabɔ. Ná Onyankopɔn de nkwa a enni awiei ho anidaso asi onipa anim, sɛ ɔyɛ osetie ma no a. Nanso ɔyɛɛ asoɔden, na ɛho asotwe ne owu, nim a onnim hwee bio, nni a onni hɔ bio. Onyankopɔn anka hwee amfa onipa nkwa a obeyi akɔ ahonhom trabea ma wakɔtra hɔ anaasɛ ɔde no bɛkɔ akɔto “hell” gya bi mu bere a wayɛ asoɔden ma wawu no ho. Ná wabɔ onipa kɔkɔ sɛ: “Owu na wubewu.” Ɛyɛ owudifo, Ɔbonsam, na odii atoro kae sɛ: “Ɛnyɛ owu na mubewu.” (Genesis 2:17; 3:4; Yohane 8:44) Nea nnipa nyinaa anya afi Adam hɔ ne wu a wobewu ayɛ sɛ dɔte.—Ɔsɛnkafo 9:5, 10; Dwom 115:17; 146:4.

33. (a) Daakye a ɛyɛ anigye bɛn na ɛretwɛn adesamma ne asase yi? (b) Nneɛma atitiriw abiɛsa bɛn na Yehowa nam ne Ba no so yɛ?

³³ Ɛnde so na daakye bi nni hɔ mma onipa a owu no? Daakye a ɛyɛ nwonwa bi wɔ hɔ! Bible no kyerɛ sɛ Onyankopɔn atirimpɔw a ɛfa paradise asase ma adesamma nyinaa ho a wɔn a wɔawuwu mprempren ka ho no renni huammɔ. Yehowa se: “Ɔsoro yɛ m’agua, na asase yɛ me nan ntiaso.” “Mɛhyɛ me nan tiabea anuonyam.” (Yesaia 66:1; 60:13) Yehowa fi ne dɔ kɛse no mu somaa ne Ba, Asɛm no, baa asase yi so, na adesamma wiase no afa no so anya nkwa. (Yohane 3:16; 1 Yohane 4:9) Nneɛma atitiriw abiɛsa bi wɔ hɔ a Yehowa nam ne Ba no so yɛ a afei ɛsɛ sɛ yesusuw ho a ɛne, (1) ogye fi owu tumi ase a ɔde ma; (2) awufo a ɔbɛsan de wɔn aba nkwa mu ankasa; (3) nniso a ɛyɛ pɛ a ɔde besi hɔ de adi adesamma nyinaa so.

Ogye Fi Owu Mu

34, 35. (a) Ɔkwan bɛn so nkutoo na wɔnam betumi agye onipa afi owu mu? (b) Dɛn ne agyede?

³⁴ Efi teteete no Onyankopɔn adiyifo akyerɛ ahotoso a wɔwɔ wɔ anidaso a ɛne sɛ Onyankopɔn ‘begye wɔn’ afi owu mu na ɛnyɛ onipa kra a enwu mu mmom no. (Hosea 13:14) Na wɔbɛyɛ dɛn agye onipa afi owu hama mu? Yehowa atemmu a ɛyɛ pɛ no hwehwɛ sɛ ‘ɔkra si ɔkra ananmu, aniwa si aniwa ananmu, ɛsẽ si ɛsẽ ananmu.’ (Deuteronomium 19:21) Enti, esiane sɛ Adam de owu a wonya fi awo mu baa adesamma nyinaa so denam ne pɛ mu a ofi yɛɛ asoɔden tiaa Onyankopɔn na ɛmaa ɔdesani nkwa a ɛyɛ pɛ bɔɔ no so nti, ɛsɛ sɛ onipa foforo a ɔyɛ pɛ si Adam ananmu de ne nkwa a ɛyɛ pɛ no tua ka, na wasan atɔ nea Adam ma ɛyerae no.

³⁵ Nnyinasosɛm a ɛteɛ a ɛne tua a wotua ‘nea ɛsɛ’ no yɛ nea wɔagye atom kɛse wɔ abakɔsɛm nyinaa mu. Asɛm a wɔtaa de di dwuma ne “agyede a wotua.” Dɛn ne agyede? Ɛyɛ “bo a wotua de gye obi anaa biribi fi obi a wafa saa onipa anaa ade no nnommum hɔ. Enti wɔka sɛ wɔagye ɔko mu nneduafo anaa nkoa bere a wɔama wɔade wɔn ho denam biribi a ɛsom bo a wɔde sesa so no. . . . Ade biara a wɔde si ananmu anaasɛ wɔde sesa de gye onipa no agyede.”d Efi bere a Adam yɛɛ bɔne no, adesamma nyinaa ayɛ te sɛ ɔko mu nneduafo anaa nkoa a sintɔ ne owu akyekyere wɔn. Sɛ wobegye wɔn a, ɛnde na agyede ho hia. Sɛnea ɛbɛyɛ a ɛremfa akyinnyegye bi mma mprempren anaa akyiri yi a ɛfa fata a agyede bo no fata ho no, ɛbɛyɛ nea ɛho hia sɛ wɔde onipa a ɔyɛ pɛ biako a ɔte sɛ Adam pɛpɛɛpɛ nkwa bɔ afɔre.

36. Ɔkwan bɛn so na Yehowa de ɔdesani nkwa a ɛyɛ pɛ mae sɛ agyede?

³⁶ Nanso, ɛhe na wobenya ɔdesani nkwa a ɛyɛ pɛ saa? Sɛ́ Adam a ɔnyɛ pɛ no asefo no, wɔawo nnipa nyinaa a wɔnyɛ pɛ. “Onua rentumi nnye onipa da, ɔremma Onyankopɔn ne mpatade.” (Dwom 49:7) Wɔ nea ehia a ɔde bɛma no mu no, Yehowa a ɔdɔ kɛse a ɔwɔ ma adesamma no akã no no de n’abakan a ɔsom bo ma no no mae ma wabɛbɔ afɔre a ɛho hia no. Oyii ne Ba a ɔyɛ honhom, Asɛm no, nkwa a ɛyɛ pɛ bɛhyɛɛ Yudani ɔbaabun, Maria, awotwaa mu. Ababaa no nyinsɛnee na ɔwoo ɔbabanin a wɔtoo no din “Yesu.” (Mateo 1:18-25) Ntease wom sɛ nkwa Bɔfo no betumi ayɛ anwonwade kɛse a ɛte sɛɛ.

37. Ɔkwan bɛn so na Yesu kyerɛɛ ɔdɔ a ɔwɔ ma adesamma wɔpɛ nkwa nyinaa?

³⁷ Yesu nyin yɛɛ ɔbarima, ɔde ne ho maa Yehowa, na wɔbɔɔ no asu. Afei Onyankopɔn de hyɛɛ ne nsa sɛ ɔnyɛ N’apɛde. (Mateo 3:13, 16, 17) Esiane sɛ na Yesu asase so nkwa no fi soro na ɔyɛ pɛ nti, na obetumi de saa ɔdesani nkwa a ɛyɛ pɛ no abɔ afɔre de agye adesamma afi owu mu. (Romafo 6:23; 5:18, 19) Sɛnea ɔkae no: “Mebae, na wɔanya nkwa, na wɔanya no mmoroso.” “Obi nni dɔ kɛse a ɛsen eyi, sɛ obi de ne kra bɛto hɔ ama ne nnamfo.” (Yohane 10:10; 15:13) Bere a Satan ma wokum Yesu wɔ asɛndua so no, Yesu de ne ho ma maa owu yayaw yi a na onim sɛ adesamma a wɔwɔ gyidi no nam ogye nsiesiei yi so benya nkwa.—Mateo 20:28; 1 Timoteo 2:5, 6.

Nkwa Mu a Wɔbɛsan Aba

38. Ɔkwan bɛn so na wɔsan de Onyankopɔn Ba no baa nkwa mu, na dɛn na edi eyi ho adanse?

³⁸ Ɛwom sɛ n’atamfo kum no de, nanso ɔdesani nkwa a ɛyɛ pɛ hokwan no ammɔ Onyankopɔn Ba no da, efisɛ okuraa ne mudi mu maa Onyankopɔn. Nanso, esiane sɛ na Yesu awu da ɔdamoa mu nti, ɔbɛyɛ dɛn atumi adi ade a ne bo yɛ den, ɔdesani nkwa ho kwan, yi ho dwuma wɔ adesamma ho? Ɛha na Yehowa yɛɛ anwonwade foforo nso a ɛso bi mmae da. Bere a Yesu kɔdaa ɔdamoa mu nnansa akyi no, Yehowa nyan no fii awufo mu sɛ honhom abɔde a onwu da. (Romafo 6:9; 1 Petro 3:18) Sɛnea ɛbɛma wɔagye owusɔre adi no, Yesu faa ɔhonam nipadua too ne ho so yii ne ho adi mmere horow mu kyerɛɛ n’asuafo 500 ne akyiri. Ná hwee nni hɔ a enti ɛsɛ sɛ eyinom mu biara, ne ɔsomafo Paulo a akyiri no Yesu a wɔahyɛ no anuonyam no ho adi a oyi kyerɛɛ no maa n’ani furae no, gye ne wusɔre anwonwade no ho kyim.—1 Korintofo 15:3-8; Asomafo no Nnwuma 9:1-9.

39. (a) Ɔkwan bɛn so na Yesu de n’afɔrebɔ no bo a ɛsom no di dwuma, na hefo ho na ɔde di dwuma kan? (b) Anwonwade akɛse foforo bɛn na Yesu kaa ho asɛm?

³⁹ Nnafua 40 akyi no, Yesu a wɔanyan no no foro kɔɔ Onyankopɔn ankasa anim wɔ soro, na ɛhɔ na ɔde ne desani nkwa a ɛyɛ pɛ afɔre no bo kɔmae sɛ nea wɔde begye adesamma. “Na ɔno de, onya bɔɔ bɔne ho afɔre biako no, ɔkɔtraa Onyankopɔn nifa ma ɛkɔ so ara. Na nea aka ne sɛ ɔtwɛn kodu sɛ wɔde n’atamfo bɛyɛ ne nan ase ntiaso.” (Hebrifo 10:12, 13) Wɔn a wodi kan a wɔnam agyede yi so gye wɔn ne “kuw ketewa” a wɔyɛ Kristofo anokwafo a “wɔyɛ Kristo dea.” (Luka 12:32; 1 Korintofo 15:22, 23) Eyinom yɛ wɔn a “wɔatɔ wɔn afi asase so,” na enti wɔ owusɔre mu no, wɔbɛyɛ Kristo ahokafo a wɔyɛ ahonhom wɔ soro. (Adiyisɛm 14:1-5) Na adesamma nnipakuw kɛse a wɔawuwu a mprempren wɔdeda wɔn adamoa mu no nso ɛ? Bere a Yesu wɔ asase yi so no, ɔkae sɛ n’Agya ama no tumi sɛ ommu atɛn na ɔmma nkwa. Ɔde kaa ho sɛ: “Mommma eyi nnyɛ mo nwonwa, efisɛ dɔn no reba a wɔn a wɔwɔ ada mu nyinaa bɛte ne nne, na wɔafi adi; . . . [owusɔre] mu.” (Yohane 5:26-29) Ɔbɛsan de eyinom aba nkwa mu wɔ Paradise asase no so.

40, 41. (a) Kyerɛkyerɛ nea “owusɔre” kyerɛ ankasa no mu. (b) Dɛn nti na yebetumi anya Onyankopɔn owusɔre ho bɔhyɛ no mu gyidi?

⁴⁰ Hyɛ Yesu asɛm no nsow: “Mommma eyi nnyɛ mo nwonwa.” Ɛno mpo, ɛbɛyɛ dɛn na wɔatumi agye obi a wawu dedaadaw afi owu mu, na wɔasan de no aba nkwa mu bio? So ɛnyɛ nea ne nipadua no asan kɔ dɔte mu? Ebia na nneɛma a ɛka bom yɛ saa nipadua no mu bi mpo asen kɔ nneɛma afoforo a ɛwɔ nkwa, te sɛ afifide ne mmoa mu, na wɔadi. Nanso, owusɔre nkyerɛ sɛ wɔbɛsan akã nneɛma horow koro no ara abom. Ɛkyerɛ bɔ a Onyankopɔn san bɔ onipa koro no ara a ɔwɔ nipaban koro no ara. Ɔde nipadua foforo fi fam nneɛma no mu ba, na saa nipadua no mu na ɔde su horow a ɛma onipa no da nsow, adwene koro no ara, asetra ko a na onipa no wom ara kosii bere a owui no, hyɛ.

⁴¹ Ebia wo fi bi a na w’ani gye ho kɛse ahyew pɛn. Nanso wubetumi asi ofi koro no ara a ɛrenyɛ wo den, efisɛ ɛho nneɛma a w’ani gye ho kɛse no nyinaa ho mfonini wɔ w’adwene mu. Ampa, ɛnde Onyankopɔn a ɔbɔɔ adwene no betumi asan abɔ nnipa a esiane sɛ ɔdɔ wɔn nti ɔkae wɔn no. (Yesaia 64:8) Eyi nti na Bible no de asɛm, “nkae ada” di dwuma no. Sɛ bere no du sɛ Onyankopɔn de awufo bɛsan aba nkwa mu bio a, ɔbɛyɛ saa anwonwade no, te sɛ nea ɔyɛɛ anwonwade wɔ onipa a odi kan no bɔ mu no, a nea ɛte wɔ eyi mu ara ne sɛ ɔbɛyɛ eyi mpɛn pii.—Genesis 2:7; Asomafo no Nnwuma 24:15.

42. Dɛn nti na daa nkwa wɔ asase so yɛ nea ebetumi ayɛ yiye a ɛbɛba ampa?

⁴² Onyankopɔn bɛsan de adesamma aba nkwa mu, a nea wɔhwɛ kwan ne sɛ wɔrenwuwu mfi asase so bio. Nanso ɛbɛyɛ dɛn na wɔatumi anya daa nkwa wɔ asase so? Ebetumi ayɛ yiye na ɛbɛyɛ yiye nso, efisɛ ɛyɛ Onyankopɔn apɛde ne n’atirimpɔw. (Yohane 6:37-40; Mateo 6:10) Ade koro pɛ nti a onipa wu nnɛ ne sɛ onyaa owu fii Adam hɔ. Nanso sɛ yesusuw nneɛma ahorow pii a enni ano a ɛyɛ nwonwa a anka onipa benya adi no ho a, nkwa nna tiaa a ennu mfe ɔha no yɛ tiaa koraa dodo! Bere a Onyankopɔn de asase yi rema nnipa mma no, na n’atirimpɔw ne sɛ onipa bɛkɔ so atra ase na wanya N’adebɔ no mu anigye, a ɛnyɛ mfe ɔha, anaa mfe apem mpo, na mmom daa!—Dwom 115:16; 133:3.

43. (a) Dɛn nti na nniso a ɛyɛ pɛ ho hia? (b) Yehowa abɔ ne tirim dɛn wɔ eyi ho?

⁴³ Esiane sɛ yɛn awofo a wodi kan no pow Onyankopɔn mmara nti, adesamma nniso ayɛ nea ɛhyɛ Satan tumi ase. Ɛfata sɛ Bible no frɛ Satan “wi yi ase nyame.” (2 Korintofo 4:4) Akodi ahorow, atirimɔdenne, ɔporɔw, ne tim a onipa nniso ntumi ntim no di adanse sɛ ɛyɛ ɔno. Amanaman Apam ne Amanaman Nkabom no antumi amfa asomdwoe amfi basabasayɛ yi mu amma. Adesamma teɛm hwehwɛ asomdwoe nniso. So ɛnyɛ nea ntease wom sɛ Ɔbɔadeɛ a wabɔ ne tirim sɛ ɔbɛsan de Paradise aba asase yi so no de nniso a ɛyɛ pɛ nso bɛma ama saa Paradise no? Ɛno ara ne nea Yehowa abɔ ne tirim sɛ ɔbɛyɛ. Ɔhene a obesi n’ananmu wɔ nniso yi mu ne ‘n’Asomdwoe-hene,’ Kristo Yesu, na “n’ahenni mu bɛtrɛw, na asomdwoe a enni awiei aba.”—Yesaia 9:6, 7.

44. (a) Nniso yi bɛyɛ nea ɛwɔ he? (b) Henanom na wɔbom yɛ nniso yi?

⁴⁴ Bible no kyerɛ sɛ nniso a ɛyɛ pɛ no bɛyɛ nea ɛwɔ soro. Ɛhɔ na Ɔhene Yesu Kristo befi adi asase nyinaa so yiye wɔ trenee mu. Bio nso obenya mfɛfo adedifo wɔ saa ɔsoro nniso a aniwa ntumi nhu no mu. Wɔpaw eyinom fi nnipa anokwafo, Yesu akyidifo no mu, a wɔn na wɔkaa ne ho wɔ sɔhwɛ ahorow mu a ɔka eyi kyerɛ wɔn no: “Sɛnea m’agya ne me ayɛ apam ahenni ho no, saa ara na me nso me ne mo yɛ.” (Luka 22:28, 29) Ɛyɛ nnipa kakraa bi na woyi wɔn fi adesamma mu kɔ soro ma wɔne Kristo Yesu kodi ahene. Saa ara na wɔ amanaman no fam nnɛ no, nnipa kakraa bi na wɔpaw wɔn ma wokodi tumi wɔ ɔman mmarahyɛ bagua kɛse mu no. Bible no kyerɛ sɛ mfɛfo adedifo 144,000 pɛ na wɔbɛka Yesu Kristo ho. Enti wɔn a wɔbom yɛ Onyankopɔn Ahenni, anaa ɔsoro nniso no ne Kristo Yesu ne nnipa 144,000 a wɔatɔ wɔn afi asase so kɔ ɔsoro no. (Adiyisɛm 14:1-4; 5:9, 10) Na asase so nso ɛ? Dwom 45:16 kyerɛ sɛ Ɔhene no besisi “asase nyinaa so ahene.” Wɔbɛpaw nnipa “ahene,” anaa nniso no ahwɛfo, no afi soro esiane wɔn ho a wɔde ma trenee nnyinasosɛm nti.—Fa toto Yesaia 32:1 ho.

45, 46. (a) Ná dɛn ne Yesu asɛm a ɔkae wɔ asase so no ti titiriw? (b) Dɛn nti na wɔamfa nniso a ɛyɛ pɛ no ansi hɔ ntɛm ara? (d) Ɔkwan bɛn so na na 1914 Y.B. yɛ afe a ɛda nsow wɔ nkɔmhyɛ ne wiase nsɛm a esisii mu?

⁴⁵ Bere bɛn ne ɔkwan bɛn so na wɔde nniso a ɛyɛ pɛ no sii hɔ? Bere a na Yesu wɔ asase so no na Ahenni yi ne n’asɛm a ɔka no ti titiriw. (Mateo 4:17; Luka 8:1) Nanso wamfa Ahenni no ansi hɔ saa bere no anaasɛ bere a wonyanee no no. (Asomafo no Nnwuma 1:6-8) Bere a ɔforo kɔɔ soro no mpo na ɛsɛ sɛ ɔtwɛn bere a Yehowa ahyɛ no. (Dwom 110:1, 2; Hebrifo 1:13) Bible nkɔmhyɛ kyerɛ sɛ saa bere a wɔahyɛ no dui wɔ 1914 Y.B. mu. Nanso, obi bebisa sɛ, ‘Sɛ́ anka nniso a ɛyɛ pɛ bɛba no, so ɛnyɛ wiase amanehunu ase mmom na afe 1914 fii?’ Asɛm no ara nen! Nkitahodi bi da Onyankopɔn Ahenni a ɛbɛba no ne amanehunusɛm a abeba wɔ nnansa yi mfe mu no ntam, sɛnea yebehu mprempren no.

⁴⁶ Aka mfirihyia bɛyɛ 35 na 1914 aba no, na Ɔwɛn-Aban (mprempren ɛne nyamesom nsɛmma nhoma a wɔkyekyɛ pii sen biara wɔ asase so) no retwe adwene aba 1914 so sɛ afe a wɔahyɛ no agyirae wɔ Bible nkɔmhyɛ mu. Nkɔmhyɛ ahorow yi fii ase nyaa mmamu a ɛyɛ nwonwa fi 1914. Emu biako ne Yesu ankasa nkɔm a ɔhyɛe mfe 1,900 a atwam ni a ɛfa “sɛnkyerɛnne” a ɛbɛda adi wɔ nneɛma nhyehyɛe no awiei a ebedi adanse sɛ waba n’ahenni tumi mu wɔ honhom mu no. Ɔrema n’asuafo no asɛmmisa a ɛfa “sɛnkyerɛnne” yi ho ho mmuae no, ɔkae sɛ: “Ɔman bɛsɔre ɔman so, ne ahenni ahenni so; na ɔkɔm ne asasewosow bɛba mmeaemmeae. Na eyinom nyinaa ne awoko yaw mfiase.” (Mateo 24:3, 7, 8) Wɔ mmamu a ɛyɛ nwonwa mu no, wiase nyinaa ko ahorow no biako fii ase wɔ 1914 mu na nneɛma a ɛsɛee no sen ɔko ahorow 900 a wɔkoe wɔ mfirihyia 2,500 a edii ɛno anim nyinaa mu no mmɔho ason! Ahohia akɔ so fi saa bere no abesi nnɛ. So woahu ɔsɛe a ɔko de ba, aduankɔm, anaa asasewosow akɛse a akã asase fi 1914 no bi pɛn? Sɛ saa a, ɛnde woyɛ obi a ɔde n’ani ahu nneɛma nhyehyɛe yi “awiei bere” ho “sɛnkyerɛnne” no.—Daniel 12:4.

47. Ɔkwan bɛn so na nsɛm a ɛma “sɛnkyerɛnne” no nya mmamu no mu ayɛ den wɔ nnansa yi mfe no mu?

⁴⁷ “Awoko yaw” no mu yɛɛ den kɛse wɔ Wiase Ko II a ɛsɛee ade sen Wiase Ko I mpɛn anan no mu na akɔ so ara abɛhyɛn nuklea bere yi mu, na ama Yesu nkɔmhyɛ no anya mmamu bio: “Na ahude ne nsɛnkyerɛnne akɛse befi soro aba.” (Luka 21:11) Nsɛmmɔnedi ne abɔnefosɛm, mmofra asoɔden ne a ɔbrasɛe a adɔɔso, ne afei amumɔyɛ ne ahohwibra anya nkɔanim—wɔkaa nsɛm a ɛyɛ hu a ebesisi yi nso ho asɛm too hɔ sɛ abɛhyɛ nhyehyɛe bɔne yi “nna a edi akyiri” no agyirae.—2 Timoteo 3:1-5; Mateo 24:12.

48. Hena na amanehunu a ɛwɔ asase so no fi no, na dɛn nti na emu ayɛ den fi 1914?

⁴⁸ Nanso sɛ afe 1914 na wɔde ɔsoro nniso no sii hɔ a dɛn nti na ahohia yi nyinaa wɔ asase so? Efi Satan Ɔbonsam. Bere a Kristo nsa kaa Ahenni tumi no, ade a edi kan a ɔyɛe ne sɛ otuu Satan so sa wɔ ɔsoro a aniwa nhu hɔ no. Nea ekowiei ne sɛ wotuu Satan, “nea ɔdaadaa amanaman nyinaa no” ne n’abɔfo guu asase so. Esiane sɛ onim sɛ ne sɛe abɛn nti, ɔde amanehunu pii aba asase so. “Asase ne ɛpo nnue, efisɛ ɔbonsam asian aba mo nkyɛn, na wafa abufuw kɛse, efisɛ onim sɛ ne bere a ɔwɔ yɛ tiaa.”—Adiyisɛm 12:7-9, 12.

49. (a) Dɛn na ɛbɛba wɔn a ‘wɔsɛe asase’ no so? (b) Ɔkwan bɛn so na Yehowa de ‘n’atemmu’ bɛba amanaman no so?

⁴⁹ So amanehunu ahorow yi to betwa? Yiw—bere a ɔsoro nniso no ankasa, Ade Nyinaa so Tumfoɔ Nyankopɔn, Ahenni no di dwuma ma ‘ɛsɛe wɔn a wɔsɛe asase no.’ (Adiyisɛm 11:18; Daniel 2:44) Onyankopɔn remma kwan mma amammui tumi ahorow, atoro Kristofo, anaa obi foforo biara mfa wɔn nuklea akode ahorow no nsɛe ne nsa ano adwuma a ɛne asase no. Mmom, ɔka sɛ: “Na ɛyɛ m’atemmude sɛ meboa amanaman ano na mihyia ahenni aman, na mahwie m’abohuru, m’abufuhyew nyinaa, agu wɔn so.” (Sefania 3:8) Yehowa nam ne Kristo no so de tumi akɛseakɛse a odi so wɔ adebɔ mu no bedi dwuma de ɔsɛe a ɛtra so aba Satan ne wɔn a wodi n’akyi wɔ asase so nyinaa no so. Eyi bɛba asase so nyinaa, na ne kɛse bɛyɛ sɛ Noa bere so Nsuyiri no.—Yeremia 25:31-34; 2 Petro 3:5-7, 10.

50. (a) Dɛn ne “Harmagedon”? (b) Henanom nkutoo na wobetwa Harmagedon?

⁵⁰ Wɔ Bible mu no, wɔfrɛ amanaman a wɔyɛ nneɛma bɔne no sɛe yi sɛ Onyankopɔn Harmagedon ko. (Adiyisɛm 16:14-16) Nnipa a wodwo, wɔn a wɔhwehwɛ Yehowa ne trenee no nkutoo na wobenya nkwa wɔ Harmagedon mu akɔ Onyankopɔn asomdwoe nhyehyɛe foforo no mu. (Sefania 2:3; Yesaia 26:20, 21) Ɛdefa eyi ho no, Bible no se: “Na ahobrɛasefo benya asase no adi, na wɔagye wɔn ani asomdwoe bebree mu.” (Dwom 37:11) Saa bere no na wobefi Paradise a wɔbɛsan de aba asase so no ho adwuma kɛse no yɛ ase!

Ɔkyerɛkyerɛ ma Paradise Kɔ

51. Dɛn nti na ɛho hia sɛ wobɛyɛ ho biribi mprempren ara?

⁵¹ So wobɛpɛ sɛ wotra Paradise? Sɛ wubua sɛ ‘Yiw’ a, ɛnde w’ani begye sɛ wubehu sɛ bere a Yesu kaa nnɛ nhyehyɛe a ɔhaw wom yi ne ne sɛe a ɛrebɛn ho “sɛnkyerɛnne” ho asɛm no, ɔde kaa ho sɛ, “Awo ntoatoaso yi rentwam, gye sɛ eyinom nyinaa aba mu ansa.” (Mateo 24:34) Nanso, ɛyɛ asɛm a ɛyɛ awerɛhow sɛ ɛnnɛ nnipa pii nam ɔkwan tɛtrɛɛ a ɛkɔ ɔsɛe mu no so. (Mateo 7:13, 14) Bere kakraa bi na aka ama wɔn a wɔde bɛyɛ nsakrae. Hwɛ aseda ara a wubetumi de ama sɛ Yehowa de kɔkɔbɔ ama wɔ ne bere mu! Esiane sɛ Yehowa pɛ sɛ wunya nkwa nti, ɔbɛboa wo ma woayɛ nea ɛteɛ.—2 Petro 3:9; Hesekiel 18:23.

52. Dɛn na wuhia na ama woasi gyinae a nyansa wom wɔ nyamesom ho?

⁵² Nea wuhia ntɛm ara mprempren ne nokware nimdeɛ. (1 Timoteo 2:4; Yohane 17:3) Ɛhe na wubetumi anya eyi? So wubetumi anya wɔ asɔre biara mu? Nnipa binom ka sɛ ɔsom ahorow no nyinaa kɔ botae koro ho, te sɛ nea akwan a ɛda bepɔw ase nyinaa kɔ bepɔw no so no. Hwɛ mfomso ara a wɔadi! Sɛnea ɛbɛyɛ a nnipa a wɔforo bepɔw behu nea ɛyɛ ɔkwan ankasa no, wɔde asase mfonini di dwuma na wɔfa nkurɔfo ma wɔkyerɛ wɔn kwan. Saa ara na nokware som biako pɛ na ɛwɔ hɔ a ɛkɔ daa nkwa mu, na akwankyerɛ ho hia na ama woahu.—Asomafo no Nnwuma 8:26-31.

53. (a) Sɛ wubenya daa nkwa a, dɛn na ɛsɛ sɛ wokɔ so yɛ? (b) Sɔhwɛ ahorow a efi Satan hɔ bɛn na ebia ɛho behia sɛ wudi so?

⁵³ Yehowa Adansefo atintim nhomawa yi na aboa wo. Aboa wo dedaw ma woate Bible mu nokware atitiriw no bi ase, ɛnte saa? Akyinnye biara nni ho sɛ wo ankasa woagye atom sɛ emu asɛm biara gyina Onyankopɔn Asɛm a efi honhom mu no so. Afei, sɛ wubenya nkɔso adu wo botae no ho a, ɛsɛ sɛ wokɔ so ara sua ade. Sɛnea wiase adesua ho hia ma wɔde asiesie obi ma wafata ama da biara da asetra no, saa ara nso na Bible mu adesua a ɛfata ho hia ma wɔde asiesie obi ma wafata asafo a ebenya nkwa akɔtra Paradise asase so no. (2 Timoteo 3:16, 17) Ebia Satan bɛbɔ mmɔden sɛ obeyi w’adwene afi so denam wɔn a wɔbɛn wo a ɔbɛma wɔasɔre atia wo anaasɛ sɔ a ɔbɛsɔ wo ahwɛ ma wode wo ho ahyɛ pɛsɛmenkominya kwan so adedodowpɛ anaa ɔbrasɛe mu no so. Ɛmma Satan kwan. Wo nkwagye ne wo ne w’abusua nyinaa daakye gyina Bible no a wobɛkɔ so asua so.—Mateo 10:36; 1 Yohane 2:15-17.

54. Ɔkyerɛkyerɛ ho nsiesiei foforo bɛn na Yehowa ayɛ wɔ wo mpɔtam hɔ?

⁵⁴ Wɔ wo mprempren Bible adesua no a wobɛtoa so akyi no, ɔkwan foforo wɔ hɔ a wubetumi afa so asua. Nnipa a wɔwɔ wo mpɔtam hɔ a wɔn ani gye Bible adesua ho kɔ nhyiam a wɔyɛ wɔ wɔn Ahenni Asa so no daa. Wɔn a wɔkɔ bi nyinaa kɔ sɛ wɔrekogye afotu afi Bible no mu na wofi nokwaredi mu rebɔ mmɔden sɛ wɔbɛyɛ nnipa pa. Wɔde anigye ma afoforofo akwaaba, sɛ: “Mommra mma yɛnkɔ [Yehowa] bepɔw so [beae a wɔsom no], . . . na ɔnkyerɛ yɛn n’akwan, na yɛnnantew n’atempɔn so.” (Yesaia 2:3) Wɔakyerɛkyerɛ ntease pa nti a ɛsɛ sɛ yɛkɔ Bible nhyiam ahorow no mu wɔ Hebrifo 10:24, 25, na ɛkenkan sɛ: “Momma yɛnhwehwɛ yɛn ho ntwetwe yɛn ho yɛn ho nkɔ ɔdɔ ne nnwuma pa mu. Na mommma yennnyae yɛn ho yɛn ho nhyiam, sɛnea ebinom anya nyɛe, na mmom momma yentutu yɛn ho yɛn ho fo, dodow a muhu sɛ ɛda no rebɛn no.”

55. (a) Akwan horow bɛn so na ɛsono Yehowa ahyehyɛde no wɔ afoforo ho? (b) Ɔkwan bɛn so na Yehowa Adansefo yɛ biako sen nnipa afoforo biara?

⁵⁵ Bere a wode wo ho bɔ Yehowa ahyehyɛde no, wubehu sɛ tebea a ɛwɔ hɔ no yɛ soronko koraa wɔ sɛnea ɛte wɔ asɔre ahorow mu no ho. Wɔnsrɛsrɛ sika wɔ hɔ, nsekudi anaa akasakasa biara nni hɔ, na wɔnyɛ nyiyim esiane obi abusua a ofi mu anaa ne sika nti. Su a ɛda nsow titiriw wɔ Yehowa Adansefo mu ne ɔdɔ. Nea edi kan no, wɔdɔ Yehowa, na nea etia abien no, wɔdɔ nnipa afoforo. Eyi yɛ nokware Kristofo agyiraehyɛde. (Mateo 22:37-39; Yohane 13:35) Kɔ wɔn nhyiam ahorow no bi na w’ankasa woahu nokware a eyi yɛ. Akyinnye biara nni ho sɛ w’ani begye wɔn biakoyɛ no ho. Yɛwɔ Yehowa Adansefo a wɔn dodow boro ɔpepem asia wɔ nsase a ɛboro 230 so wɔ wiase nyinaa. Nanso Adansefo a wɔwɔ wiase nyinaa no di nhyehyɛe koro akyi wɔ wɔn nhyiam ahorow no ase. Na esiane nsɛmma nhoma a wotintim no bere koro mu wɔ kasa horow pii mu nti, Yehowa Adansefo no mu pii a wɔwɔ wiase nyinaa tumi sua Kyerɛwnsɛm mu asɛm koro no ara ho ade wɔ nnɔnhwerew kakra bi ntam wɔ wɔn dapɛn dapɛn nhyiam horow no ase. Yehowa ahyehyɛde no biakoyɛ no yɛ nnɛyi anwonwade wɔ wiase a emu apaapae yi mu.

56. (a) Mfaso ahorow bɛn na wubetumi anya afi Yehowa ahyehyɛde no a wo ne no bɛbɔ no mu? (b) Sɛ ɔhaw ahorow sɔre a, ɛsɛ sɛ woyɛ w’ade dɛn wɔ ho? (d) Dɛn nti na ɛho hia sɛ wubehyira wo nkwa so ama Yehowa?

⁵⁶ Bere a wo ne Yehowa nkurɔfo bɔ daa no, ɛho behia sɛ wohyɛ “onipa foforo” no na wosow Onyankopɔn honhom aba no—“ɔdɔ, anigye, asomdwoe, abodwokyɛre, ayamye, papayɛ, gyidi, odwo, anidahɔ.” (Kolosefo 3:10, 12-14; Galatifo 5:22, 23) Eyi bɛma woanya akomatɔyam kɛse. Ebia efi bere kɔ bere mu no wubehyia ɔhaw ahorow esiane sɛ wote wiase a aporɔw mu ne afei esiane w’ankasa sintɔ ahorow a ɛsɛ sɛ wudi so nti. Nanso Yehowa bɛboa wo. N’Asɛm no de awerɛhyem ma wɔn a wofi nokwaredi mu rebɔ mmɔden sɛ wɔbɛsɔ n’ani no: “Monnna nnnwen biribiara nnhaw mo ho, ma mmom ade nyinaa mu momfa mpaebɔ ne ɔsrɛ, ɛne aseda mma mo adesrɛ nnu Nyankopɔn asom; na Onyankopɔn asomdwoe a ɛtra adwene nyinaa so no bɛhwɛ mo koma ne mo adwene so Kristo Yesu mu.” (Filipifo 4:6, 7) Yehowa dɔ no bɛtwetwe wo, na wobɛpɛ sɛ wosom no. Yehowa Adansefo ani begye sɛ wɔbɛkyerɛ wo sɛnea wubetumi ahyira wo nkwa so ama ɔdɔ Nyankopɔn yi na woabɛyɛ n’adansefo a wɔanya saa hokwan no mu biako. (Dwom 104:33; Luka 9:23) Yiw, ɛyɛ hokwan. Susuw ho hwɛ! Sɛ́ Yehowa somfo no, wo nsa betumi aka botae a ɛne daa nkwa wɔ paradise wɔ asase so ha ara.—Sefania 2:3; Yesaia 25:6, 8.

57. (a) Wɔ nhyehyɛe foforo no mu no, abusuabɔ a emu yɛ den bɛn na ɛbɛba abɛda Onyankopɔn ne adesamma ntam? (b) Nhyira horow a wubenya saa bere no bi ne nea ɛwɔ he?

⁵⁷ Afei kɔ so sua ade na ma ɔdɔ ne anisɔ a wowɔ ma Yehowa Nyankopɔn, ne Ba no, ne ɔsoro trenee nniso no mu nyɛ den. Bible nkɔmhyɛ reka Onyankopɔn nniso no ne nhyira horow a ɛde bɛbrɛ adesamma no ho asɛm no, ese: “Hwɛ, Onyankopɔn ntamadan wɔ nnipa mu, na ɔbɛtra mu wɔ wɔn mu, na wɔayɛ ne man, na Onyankopɔn ankasa ne wɔn bɛtra.” “Onyankopɔn ankasa” a wɔama no so kɛse asen onipa pɛsɛmenkominya nniso a ɛsɛe ade a ɛwɔ hɔ nnɛ no bɛbɛn wɔn a wɔdɔ no na wɔsom no nyinaa te sɛ Agya yamyefo wɔ saa nhyehyɛe foforo no mu. Ampa, ɔsom koro pɛ na ɛbɛka, Yehowa Nyankopɔn nokware som, na n’asomfo ne no benya abusuabɔ a emu yɛ den ma wɔayɛ Agya no mma. Agya a ɔwɔ ɔdɔ bɛn ara na ɔbɛkyerɛ sɛ ɔyɛ sɛɛ yi! “Na ɔbɛpopa wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam.”—Adiyisɛm 21:3, 4.

58. Dɛn nti na wubetumi anya awerɛhyem sɛ Yehowa ‘bɛyɛ nneɛma nyinaa foforo’?

⁵⁸ Saa kwan no so na wɔnam bewie anwonwade kɛse a wɔbɛyɛ de paradise asase bi asi hɔ wɔ ɔsoro nniso a ɛyɛ pɛ ase no yɛ. Ɛbɛba ampa te sɛ nokwasɛm a ɛyɛ sɛ owia bepue na akɔtɔ ɔkyena no. Na Yehowa Nyankopɔn, ɔsoro ne asase Bɔfo no, bɔhyɛ ahorow “wom na ɛyɛ nokware.” Ɔno na ofi ne soro ahengua so ka sɛ: “Hwɛ! meyɛ nneɛma nyinaa foforo.”—Adiyisɛm 21:5, NW.

Wɔ nhomawa yi mu nsɛm mu ntĩmu mu no, ɔkwan bɛn so na wubebua nsɛmmisa a edidi so yi?

Akwan horow bɛn so na Bible no da nsow?

Dɛn na woasua afa Onyankopɔn ho?

Hena ne Kristo Yesu?

Hena ne Satan Ɔbonsam?

Dɛn nti na Onyankopɔn ama nsɛmmɔnedi ho kwan?

Dɛn nti na onipa wu?

Awufo tebea te dɛn?

Dɛn ne agyede no?

Ɛhefa ne ɔkwan bɛn so na owusɔre no ba?

Dɛn ne Ahenni no, na dɛn na ɛbɛyɛ?

“Wiase awiei” ho “sɛnkyerɛnne” no ne dɛn?

Ɔkwan bɛn so na wubetumi asiesie wo ho ama daa nkwa wɔ Paradise?

[Ase hɔ nsɛm]

[Kratafa 13 mfonini ahorow]

Sɛ́ abɔde no, onipa korɔn koraa sen mmoa

[Kratafa 18 mfonini]

Ná Yesu ne Adam a ɔyɛ pɛ no yɛ pɛ