“Na mihuu ɔsoro foforo ne asase foforo, na kan soro ne kan asase no atwam, na ɛpo nni hɔ bio. Na mihuu kurow kronkron no, Yerusalem foforo, sɛ efi soro Onyankopɔn nkyɛn resian, na wɔasiesie no sɛ ayeforo a wɔahyehyɛ no ama ne kunu. Na metee nne kɛse bi fi ahengua no mu a ese: Hwɛ, Onyankopɔn ntamadan wɔ nnipa mu, na ɔbɛtra mu wɔ wɔn mu, na wɔayɛ ne man, na Onyankopɔn ankasa ne wɔn bɛtra. Na ɔbɛpopa wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam. Na nea ɔte ahengua no so no se: Hwɛ meyɛ ade nyinaa foforo. Na ose: Kyerɛw, efisɛ nsɛm yi wom na ɛyɛ nokware.”​—Adiyisɛm 21:1-5.

Ɛnyɛ nnipa a wowu na mmom Onyankopɔn ankasa na ɔde nhyira horow yi ho awerɛhyem ma. Ɔno na ose: “Hwɛ, meyɛ ade nyinaa foforo.” Yiw, Yehowa Nyankopɔn ka kyerɛɛ ɔsomafo Yohane sɛ: “Kyerɛw, efisɛ nsɛm yi wom na ɛyɛ nokware.”