Onyankopɔn Nkyɛ Ne Bɔhyɛ Ho

“YEHOWA, menteɛm nhwehwɛ mmoa nkosi da bɛn, na woatie?” Eyi yɛ nsɛm a Hebrini diyifo Habakuk a ɔtraa ase afeha a ɛto so ason mu A.Y.B. mu no kae. Nanso, saa ara na yɛn nso yebisa, anaa ɛnte saa? Ɛyɛ nnipa su sɛ yɛbɛpɛ sɛ yɛn nsa ka nneɛma a yɛn ani gye ho paa no amonom hɔ ara anaa ntɛm ara. Na eyi te saa titiriw wɔ yɛn mfe a yɛpɛ mprempren anigye no mu.—Habakuk 1:2, NW.

Wɔ afeha a edi kan mu no, na ebinom wɔ hɔ a ɛda adi sɛ wɔte nka sɛ ɛsɛ sɛ anka Onyankopɔn di n’atirimpɔw ho dwuma ntɛm ara. Ná wɔn ho pere wɔn araa ma na wosusuw mpo sɛ Onyankopɔn yɛ nyaa anaa ɔkyɛ. Ne saa nti, na ɛsɛ sɛ ɔsomafo Petro kae wɔn sɛ sɛnea Onyankopɔn bu bere no yɛ soronko koraa wɔ yɛn de ho. Petro kyerɛwee sɛ: “Adɔfo, mommma ade biako yi nnhintaw mo, sɛ da koro yɛ [Yehowa, NW] sɛ mfirihyia apem, na mfirihyia apem yɛ no sɛ da koro.”—2 Petro 3:8.

Sɛ yɛhwɛ berebu wɔ saa kwan yi so a, na obi a wadi mfe 80 no adi bɛyɛ nnɔnhwerew abien pɛ, na na adesamma abakɔsɛm nyinaa adi bɛyɛ nnansia pɛ. Sɛ yɛhwɛ nneɛma saa kwan yi so a, ɛbɛyɛ mmerɛw ama yɛn sɛ yɛbɛte sɛnea Onyankopɔn ne yɛn di nsɛm no ase.

Nanso, Onyankopɔn nyɛ obi a obu n’ani gu bere so. Nea ɛne no bɔ abira no, ɔyɛ obi a odi bere so ankasa. (Asomafo no Nnwuma 1:7) Enti, Petro toaa so sɛ: “[Yehowa, NW] nkyɛ ne bɔhyɛ ho, sɛnea ebinom bu sɛ ɛkyɛ, na mmom ɔma ne bo dwo kyɛ ma mo, ɔmpɛ sɛ nnipa bi bɛyera, na mmom ɔpɛ sɛ wɔn nyinaa ba adwensakra mu.” (2 Petro 3:9) Esiane sɛ Onyankopɔn nte sɛ nnipa nti, ɔmpere ne ho nyɛ nneɛma te sɛ nea ne nna resa. Sɛ́ “mmeresanten hene” no, ɔwɔ anwonwakwan a ɔfa so hwɛ nneɛma, na obetumi ahu bere ko a n’adeyɛ so bɛba mfaso koraa ama wɔn a ɛfa wɔn ho no nyinaa.—1 Timoteo 1:17.

Bere a Petro kyerɛkyerɛɛ nea enti a ɛte sɛ nea Onyankopɔn kyɛ mu wiei no, ɔde saa kɔkɔbɔ yi mae sɛ: “[Yehowa, NW] da no bɛba sɛ owifo ba.” Ɛno kyerɛ sɛ atemmu da no bɛba bere a nkurɔfo nhwɛ kwan. Afei, wɔ nkyekyem a edi hɔ mu no, Petro kyerɛ anidaso a ɛyɛ anigye a wɔn a wɔda “abrabɔ kronkron ne onyamesom pa” adi no benya, a ɛne sɛ wobenya wɔn ti adidi mu akɔ “ɔsoro foforo ne asase foforo” a Onyankopɔn ahyɛ ho bɔ mu no.—2 Petro 3:10-13.

Ɛsɛ sɛ eyi ma yɛkyerɛ anisɔ kɛse koraa sɛ Onyankopɔn atemmu nnya mmae. Ne boasetɔ no ama yɛatumi abehu n’atirimpɔw, na yɛasiesie yɛn asetra na ama yɛn nsa atumi aka nhyira a wahyɛ ho bɔ no. So ɛnsɛ sɛ yebu “yɛn Awurade abodwokyɛre no sɛ nkwagye,” sɛnea Petro kyerɛ no? (2 Petro 3:15) Nanso, biribi foforo wɔ hɔ a enti Onyankopɔn atɔ ne bo ase.

Mfomso a Ɛsɛ sɛ Ewie Du

Sɛ yesua sɛnea Onyankopɔn ne adesamma dii nsɛm tete mmere mu no a, yehu sɛ na ɔkora n’atemmu so kosi sɛ anidaso biara nni hɔ sɛ nnipa no bɛyɛ nsakrae. Sɛ nhwɛso no, ɛdefa Onyankopɔn atemmu a ɔde baa Kanaanfo so ho no, ɔdaa wɔn bɔne no adi kyerɛɛ Abraham bere tenteenten. Nanso na n’atemmu bere no nnya nnui. Dɛn ntia? Bible ka sɛ: ‘Efisɛ na Amorifo [Kanaanfo] amumɔyɛ nnya nwiee du,’ anaasɛ sɛnea Knox nkyerɛase de ba no: “[Ná] Amorifo amumɔyɛ nnuu ne mpɔmpɔn so.”—Genesis 15:16.a

Nanso, bɛyɛ mfe 400 akyi no, Onyankopɔn de n’atemmu bae, na Abraham asefo, Israelfo, no faa asase no dii so. Kanaanfo kakraa bi, te sɛ Rahab ne Gibeonfo, na wogyee wɔn esiane wɔn abrabɔ ne wɔn nneyɛe nti, nanso na dodow no ara amumɔyɛ adu akyiri koraa, sɛnea nnɛyi fam a wotutu hwehwɛ tetefo nneɛma ada no adi no. Ná wɔde wɔn ho hyɛ ɔbarima ne ɔbea nna ho som, asɔrefie tuutuusi, ne mmofra afɔrebɔ mu. Halley’s Bible Handbook ka sɛ: “Wɔn a wotutuu Kanaan amanfõ so no ka sɛ Onyankopɔn ansɛe wɔn ntɛm sɛnea ɔyɛe no.” Awiei koraa no, Kanaanfo ‘bɔne wiee du’; wɔn amumɔyɛ ‘duu ne mpɔmpɔn so.’ Ná obiara ntumi mmɔ Onyankopɔn sobo mma ɛmfata sɛ wanyɛ no yiye sɛ ɔpraa asase no so na ɔkoraa wɔn a wɔdaa abrabɔ pa adi no so.

Yehu adeyɛ a ɛte saa ara wɔ Noa bere so. Ɛmfa ho nokwasɛm a ɛyɛ sɛ na nnipa a wɔwɔ hɔ ansa na Nsuyiri no reba no yɛ abɔnefo no, Onyankopɔn fi mmɔborɔhunu mu yɛe sɛ wɔn bere no nkɔ so ntra hɔ mfe 120 nka ho. Wɔ saa bere no fã bi mu no, Noa somee sɛ “treneekafo.” (2 Petro 2:5) Bere kɔɔ so no, ɛda adi sɛ wɔn amumɔyɛ no yɛɛ kɛse. “Onyankopɔn huu asase, na hwɛ, asɛe, efisɛ ɔhonam nyinaa asɛe wɔn kwan wɔ asase so.” (Genesis 6:3, 12) Ná wɔn ‘bɔne awie du’; na bere a atwam no de wɔn nsusuwii bɔne no adu ne mpɔmpɔn so. Ná Onyankopɔn di bem koraa sɛ ɔyɛɛ ho biribi. Nnipa baawɔtwe pɛ na na wɔteɛ wɔ Onyankopɔn ani so, na ogyee wɔn.

Yehu ade koro no ara wɔ sɛnea Onyankopɔn ne Israel dii nsɛm no mu. Ɛmfa ho sɛ wɔankyerɛ nokwaredi na wobuu ahohwibra no, Onyankopɔn sii wɔn ho abotare mfe ɔhaha pii. Kyerɛwtohɔ no ka sɛ: ‘Yehowa somaa n’abɔfo baa wɔn nkyɛn, otuaa ahema somaa wɔn, efisɛ ne yam hyehyee no maa ne man. Nanso wobuu ne nsɛm no animtiaa, na wɔserew n’adiyifo no de kosii sɛ Yehowa abufuhyew sɔre hyɛɛ ne man no a wonnya ano aduru bio.’ (2 Beresosɛm 36:15, 16) Ná nkurɔfo no adu baabi a wontumi nyɛ nsakrae biara bio. Na Yeremia ne afoforo kakraa bi pɛ na wobetumi agye wɔn. Na wontumi nka sɛ Onyankopɔn tirim yɛ den bere a awiei koraa, ɔde atemmu baa wɔn a aka so no.

Bere Adu sɛ Onyankopɔn Bu Atɛn

Yebetumi ahu afi saa nhwɛso ahorow yi mu sɛ Onyankopɔn rekora atemmu a etia mprempren nneɛma nhyehyɛe yi so akosi sɛ bere no bewie du koraa. Eyi da adi wɔ ahyɛde a wɔde maa Onyankopɔn sɛnkyerɛnne kwan so brafo no mu: “Tow wo kantankrankyi nnamnam no twitwa asase so bobe akasiaw, efisɛ n’aba no abere. Na ɔbɔfo no de ne kantankrakyi no tow asase so, na otwitwaa asase so bobe aba, na ɔde koguu Onyankopɔn abufuw nsa-kyi-amoa kɛse no mu.” Hyɛ no nsow sɛ na adesamma amumɔyɛ ‘awie du,’ kyerɛ sɛ, adu baabi a wontumi nyɛ ho hwee. Sɛ Onyankopɔn de atemmu ba a, akyinnye biara nni ho sɛ, n’atemmu no bɛyɛ nea ɛfata.—Adiyisɛm 14:18, 19.

Sɛ yesusuw nea ɛwɔ atifi hɔ no ho a, ɛda adi pefee sɛ atemmu a Onyankopɔn de reba wiase so no abɛn, efisɛ su a ɛmaa Onyankopɔn de atemmu bae tete mmere mu no ara bi na wiase no kura. Yehu wɔ baabiara sɛ basabasayɛ ahyɛ asase so ma, sɛnea na ɛte ansa na Noa bere so Nsuyiri no reba no. Nkurɔfo nneyɛe rebɛyɛ sɛ nea wɔka ho asɛm wɔ Genesis 6:5 no ara pɛ: “[Onipa] komam adwene nyinaa yɛ bɔne nko daa nyinaa.” Bɔne a emu yɛ duru a ɛmaa Onyankopɔn buu Kanaanfo no atɛn no mpo abu so nnɛ.

Titiriw efi Wiase Ko I no reba no, adesamma ahu nsakrae kɛse. Wɔahu sɛ wɔaka nnipa ɔpepem pii mogya agu wɔ asase so. Akodi, mmusua asetɔre, amumɔyɛsɛm, nsɛmmɔnedi, ne basabasayɛ anya nkɔanim wɔ wiase nyinaa. Ɔkɔm, yare, ne ɔbrasɛe abu so wɔ wiase nyinaa. Adanse no nyinaa kyerɛ sɛ yɛte saa awo ntoatoaso kɔntɔnkye a Yesu kaa wɔn ho asɛm sɛ: “Awo ntoatoaso yi rentwam, gye sɛ eyinom nyinaa aba mu ansa” no mu mprempren. (Mateo 24:34) Wiase yi ‘bɔne rewie du’ seesei. “Asase so bobe akasiaw” no abere ama otwa.

Bere a Ɛsɛ sɛ Woyɛ Ho Biribi

Wɔka kyerɛɛ ɔsomafo Yohane sɛ sɛ atemmu bere no du a, adebere abien na ɛbɛkɔ so. Biako ne sɛ, “nea ɔnteɛ no nnteɛ ara, na nea ɔyɛ fi no nyɛ fi ara.” Nanso foforo no ne sɛ, “nea ɔteɛ no nteɛ ara, na nea ɔyɛ kronkron no nyɛ kronkron ara.” (Adiyisɛm 22:10, 11) Bible nkyerɛkyerɛ adwuma a Yehowa Adansefo reyɛ wɔ wiase nyinaa na ama saa asɛm a edi akyiri yi aba. Saa adwuma no atirimpɔw ne sɛ wɔbɛkyerɛkyerɛ nkurɔfo nea Onyankopɔn hwehwɛ fi wɔn hɔ na ama wɔabu wɔn sɛ wɔfata sɛ wonya daa nkwa. Saa dwumadi yi nam asafo ahorow bɛyɛ 87,000 so adu nsase 233 so seesei.

Onyankopɔn nyɛ nyaa. Ofi boasetɔ mu ama ankorankoro anya bere a ehia ma ‘wɔde ahyɛ nipasu foforo’ na ama wɔafata ama ne bɔhyɛ ahorow no. (Efesofo 4:24) Ɛnnɛ, Onyankopɔn da so ara retwɛn, ɛmfa ho sɛ wiase nsɛm tebea gu so resɛe bere nyinaa no. Yehowa Adansefo a wɔwɔ wiase nyinaa reyɛ nea wobetumi nyinaa de aka nimdeɛ a ɛde kɔ daa nkwa mu no ho asɛm akyerɛ wɔn afipamfo. (Yohane 17:3, 17) Anigyesɛm ne sɛ, afe biara, nnipa bɛboro 300,000 na wotie asɛm no ma wɔbɔ wɔn asu.

Bere a yɛretwɛn daa nkwa no, ɛnyɛ nnɛ ne bere a ɛsɛ sɛ yɛtwentwɛn yɛn nan ase, na mmom, ɛnnɛ ne bere a ɛsɛ sɛ yɛyɛ ho biribi. Efisɛ ɛrenkyɛ koraa, yebehu Yesu bɔhyɛ no mmamu sɛ: “Obiara a ɔte ase na ogye me di no renwu da.”—Yohane 11:26.

[Ase hɔ asɛm]

[Kratafa 6 mfonini]

Wɔka kyerɛɛ Onyankopɔn brafo no sɛ onyi ne kantankrakyi bere a asase so bobe abere no

[Kratafa 7 mfonini]

Yehowa Adansefo a wɔwɔ wiase nyinaa reboa nkurɔfo ma wɔafata ama Onyankopɔn nhyira a ɛbɛtra hɔ daa