Hena Paa na Ɔde Ɔko ne Amanehunu Ba?

November 11, 1918 no, Wiase Ko I no baa awiei. Wɔtotoo nnwumakuw ahorow mu na nnipa de asaw gyinaa mu wɔ mmɔnten so. Nanso anigye no ankyɛ, efisɛ nea esii ɔko no akyi de, atuo no mpo mfa ne ho.

Bere a ɔko no gyina mu wɔ June 1918 mu no, owuyare a wɔfrɛ no Spania influensa no te sii akofo no mu wɔ France. Ankyɛ na yare yi kyerɛɛ ne tumi. Sɛ yɛfa Amerika asraafo sei a, asraafo dodow a yare no de abosome kakraa bi kunkum wɔn wɔ France no, na wɔdɔɔso sen wɔn a atuo kunkum wɔn. Bere a ɔko no baa awiei a asraafo no resan akɔ wɔn kurom nso, yare no dii wɔn akyi kɔe, na ankyɛ na etuu atese wɔ wiase nyinaa.

Ɔko no akyi na aduankɔm nso yii ne ti, na sikasɛm sɛee koraa. Bere a ɔko no baa awiei wɔ afe 1918 mu no, na Europe redi kɔm. Eduu afe 1923 no, na Germanifo sika ntumi ntɔ hwee. Mfe asia akyi no, wiase sikasɛm gyigyae koraa. Afei afe 1939 mu no, wiase ko a ɛto so abien no fii ase, na na ayɛ te sɛ wiase ko a edi kan no ntoaso. Amanenya a na wiase ntee bi da yi, dɛn koraa na ɛkɔfa bae?

Nsɛm pii a asisi nnipa abakɔsɛm mu no, Bible nkɔmhyɛ ma yehu nea ɛkɔfa bae, na yɛrenka nnya Wiase Ko I no. Yesu Kristo hyɛɛ nkɔm sɛ bere bi bɛba a “ɔman bɛsɔre atia ɔman,” na aduankɔm ne ɔyaredɔm bebu so wɔ asase so. (Mateo 24:3, 7; Luka 21:10, 11) Ɔka kyerɛɛ n’asuafo no sɛ saa nneɛma bɔne no bɛyɛ sɛnkyerɛnne a ɛkyerɛ sɛ yɛadu nna a edi akyiri mu. Yɛkenkan Adiyisɛm nhoma no a, yehu nsɛm pii wom a ɛkyerɛ sɛ ɔhaw a ɛrekɔ so wɔ asase so no ne ɔko bi a ɛkɔɔ so wɔ soro wɔ biribi yɛ.​—Hwɛ adaka a wɔato din “Ɔko Baa Asase so ne Ɔsoro.”

Adiyisɛm koro no ara ka apɔnkɔsotefo baanan bi ho asɛm. Apɔnkɔsotefo no mu baasa gyina hɔ ma nneɛma bɔne a na Yesu aka dedaw sɛ ebesisi no​—akokoakoko, aduankɔm, ne ɔyaredɔm. (Hwɛ adaka a wɔato din “Enti Apɔnkɔsotefo Baanan no Reyɛ Adwuma Ampa?”) Ɛda adi pefee sɛ wiase ko a edi kan no akɔfa amanehunu bi abɛto yɛn so, na ano mmrɛɛ ase besi nnɛ. Bible ma yehu sɛ ɔkwan bi so no, Satan na otwaa gya toom. (1 Yohane 5:19) Bere bi bɛba a wobegye ne tumi afi ne nsam anaa?

Adiyisɛm nhoma no ma yɛn awerɛhyem nso sɛ Satan “bere a aka yɛ tiaa.” (Adiyisɛm 12:12) Ɛno nti na n’ani abere na ɔde ɔhaw pii reba wiase saa no. Nanso ne bere asõ ara ne sa.

Wiase Ko I no asesa biribiara wɔ wiase. Akɔfa akokoakoko aba wiase, ɛma nkurɔfo tu aban gu, na ama nnipa nnye wɔn mpanyimfo nni bio. Ɛsan ma yehu pefee sɛ wɔapam Satan afi soro. (Adiyisɛm 12:9) Wiase sodifo a yentumi mfa yɛn aniwa nhu no yi, ɔreyɛ n’ade te sɛ ɔmampanyin tirimɔdenfo bi a onim sɛ n’aban regu. Sɛ bere no sõ a, ɔhaw a Wiase Ko I akɔfa aba no nyinaa begyae.

Nea Bible nkɔmhyɛ aka nti ɛsɛ sɛ wunya awerɛhyem sɛ ɛrenkyɛ, yɛn soro Hene Yesu Kristo ‘bɛsɛe Ɔbonsam nnwuma.’ (1 Yohane 3:8) Ɛnnɛ, nnipa mpempem pii bɔ mpae sɛ Onyankopɔn Ahenni mmra. Wo nso ɛyɛ a wobɔ bi anaa? Ahenni no adaworoma, ɛbere bi bɛba a afei de ɛnyɛ Ɔbonsam apɛde na nnipa anokwafo behu wɔ asase so, na mmom Onyankopɔn apɛde. (Mateo 6:9, 10) Onyankopɔn Ahenni ba a, ɔko biara remma mpo na kampɛsɛ akowie wiase ko! (Dwom 46:9) Sua saa Ahenni no ho ade, na da a asomdwoe bɛhyɛ asase so ma no, wo nso woatena ase ahu bi.​—Yesaia 9:6, 7.