Onyankopɔn Mfirihyia Apem Ahenni Abɛn

 1. Dɛn nti na obiara nni hɔ a obetumi afata sɛ odi adesamma so hene sen Yesu Kristo?

SƐNEA WƆPAW AHENE AHOKAFO NO ƆHENE bɛn na oye sen Yesu Kristo, Onyankopɔn Ba no, a adesamma nyinaa betumi anya ma wadi wɔn so? Ɔdesani hene bɛn na ɔdɔ ne manfo araa ma obegyaw n’anuonyam nyinaa na ofi bemdi mu de ne nkwa ato hɔ ama wɔn? Na sɛ ofi ne pɛ mu de ne nkwa to hɔ ma ne manfo mpo a, mfaso a ɛwɔ hɔ daa bɛn na eyi bɛyɛ ama wɔn? Nanso wɔ Yesu Kristo Onyankopɔn Ba no fam de, ogyaw ne soro anuonyam maa n’Agya na ɔbɛyɛɛ onipa a ɔyɛ pɛ ankasa, nanso ná “aka no kakra na wasɛ onyamesom,” ‘ɔba fam kakra sen abɔfo.’ (Dw. 8:6 Dw. 8:5, Twi Bible Foforo]; Heb. 2:9) Afei, ɛdenam Onyankopɔn pɛ so no, ɔbrɛɛ ne ho ase kɔɔ akyiri bio ma nnipa kum no atirimɔden so mpo bere a Onyankopɔn sraa no ma wabɛyɛ Mesia Ɔhene no akyi. Ɛnyɛ sɛ na eyi yɛ ɔdɔ a ɛne biara nsɛ a ɔwɔ ma adesamma a ɔdaa no adi nko, na mmom ne wu no de ɔdesani afɔrebɔ a ɛyɛ pɛ a ɛsɔ Onyankopɔn ani na ɛde mfaso a ɛto ntwa da ma adesamma nyinaa mae. Hena na oye sen oyi a obetumi akamfo ne ho akyerɛ adesamma sɛ ɔfata sɛ ɔyɛ wɔn hene?

 2. (a) Ɛdefa pɛ a wɔpɛ sɛ Yesu Kristo yɛ ɔhene ho no, ɔkwan bɛn so na nnipa a wɔwɔ hɔ nnɛ te sɛ wɔn a na wɔwɔ hɔ afeha a edi kan no mu no? (b) Ɛdefa nea adesamma benya no sɛ ɔhene ho no, dɛn na ɛho hia ankasa?

² Mfeha dunkron a atwam ni no nnipa a wogyee onipa amammui nniso toom no ani annye ne ho sɛ wɔn hene; ɛno nti na wɔteɛɛm ka kyerɛɛ Roma amrado no sɛ onkum no te sɛ nea ɔyɛ atoro Kristo, atoro Mesia. Ɛnnɛ adesamma mu fã kɛse no ara, mpo wɔ Kristoman mu, mpɛ no sɛ Ɔhene ankasa na mmom wakamfo nnipa nniso pii na wobu Kristofo a wosuasua Yesu, wɔn Kwankyerɛfo no animtiaa, wɔsɔre tia wɔn na wɔtaa wɔn. Nanso sɛ adesamma mu fã kɛse no ara mpɛ Yesu Kristo sɛ wɔn soro Hene ankasa a, eyi yɛ asɛm bɛn? So ɛno yɛ gyinaesi a etwa to ma adesamma, ateasefo ne awufo? Nea ehia ne Ade Nyinaa So Tumfoɔ Nyankopɔn no gyinaesi. N’ani sɔɔ ne Ba Yesu bere a Osuboni Yohane bɔɔ no asu wɔ Yordan Asubɔnten no mu no. N’ani sɔɔ ne Ba Yesu bere a Ɔba nokwafo yi sakraa ne ho anuonyam mu adansefo baasa anim wɔ bepɔw tenteenten bi so wɔ Palestina kesee fam no. (Mat. 3:17; 17:5) Onyankopɔn ani sɔɔ ne Ba a bɔne nni ne ho no bere a, ɔrewu wɔ asɛndua so wɔ Kalvary no, ɔde nne kɛse teɛɛm sɛ: “Agya, wo nsam na mede me honhom mehyɛ!” no.​—Luka 23:46.

 3. (a) Anisɔ a ɛboro so bɛn na Onyankopɔn kyerɛe wɔ ne Ba Yesu Kristo a owui sɛ mogya dansefo no ho? (b) Asetra bɛn mu na Onyankopɔn nyan no kɔe?

³ Ɔrekyerɛ anisɔ kɛse ama ne Ba a wɔakum no sɛ mogya dansefo no, Onyankopɔn a ɔyɛ nnwuma a nnipa a wɔyɛ mmerɛw a wonni tumi frɛ no nneɛma a entumi nyɛ yiye no nyan Yesu Kristo fii awufo mu ne nnansa so. Onyan no ma ɔkɔɔ asetra bɛn mu? Sɛ onipa ara kwa a ɔwɔ honam ne mogya, a ‘ɔba fam kakra sen abɔfo’? Dabi! na mmom okoduu baabi a ɛkorɔn yiye sen abɔfo, wɔ ɔsoro asetra mu gyinabea bi a ɛkorɔn sen nea ogyawee bere a ɔde ne ho mae sɛ wonyi ne nkwa nkɔhyɛ Yudani ɔbaabun Maria awotwaa mu no. (Fil. 2:5-11) Ɔsomafo Petro a na ɔyɛ wɔn a wodii kan huu no sɛ wasakra ne honam ne wusɔre akyi no mu biako no kae sɛ: “Ɛno na afei ne nsɛso gye yɛn nso nkwa Yesu Kristo wusɔre so. Ɔno na, ɔkɔɔ soro no, ɔwɔ Onyankopɔn nifa, na abɔfo ne wɔn a wɔwɔ ahoɔden ne tumi mu no abrɛ wɔn ho ase ama no.”​—1 Pet. 3:21, 22; Heb. 1:1-4; Luka 24:34; 1 Kor. 15:5.

4, 5. Ɔkwan bɛn so na Yesu Kristo “Dawid ba” no bɛyɛɛ Dawid “Wura,” na hena na odii kan daa eyi adi?

⁴ Enti Onyankopɔn Ba a wadi nkonim a na wabɛyɛ “Dawid ba” denam ɔbaabun awo so wɔ Dawid abusua mu no bɛyɛɛ nea ɔkorɔn sen Ɔhene Dawid. Ɔsomafo Petro daa eyi adi wɔ ne kasa a efi honhom mu a ɔka kyerɛɛ Yudafo mpempem wɔ Adapɛn Afahyɛ da no, da a ɛto so aduonum fi Yesu Kristo wusɔre no so. Petro, a na honhom kronkron ahyɛ no ma no, ka kyerɛɛ wɔn sɛ:

⁵ “Yesu yi ara na Onyankopɔn anyan no, ɛho adansefo na yɛn nyinaa yɛ. Afei wɔmaa no so kɔɔ Onyankopɔn nifa na onyaa Agya nkyɛn honhom kronkron bɔhyɛ no nti na wahwie nea muhu na mote yi agu. Na Dawid ankɔ soro; na ɔno ara kae sɛ: “Yehowa see me wura sɛ: Tra me nifa kosi sɛ mede w’atamfo mɛyɛ wo nan ase ntiaso. Enti ma Israel fi nyinaa nte sɛ: Onyankopɔn de Yesu no ara a mosɛn no no ayɛ Awurade ne Kristo.”​—Aso. 2:32-36, NW.

 6. (a) Wɔ ne wusɔre akyi no, dɛn na ebehia sɛ Dawid gye tom wɔ Yesu ho? (b) Sɛ onipa no, anato ho kyerɛwtohɔ bɛn na Yesu wɔ?

⁶ Wɔ ne wusɔre a obenya afi awufo mu a ɛreba wɔ Mesia ahenni ase no mu no, ebehia sɛ Dawid gye Yesu Kristo a wɔahyɛ no anuonyam no tom sɛ ne “Wura.” Afei na Dawid bɛfrɛ no “me Wura.” (Dw. 110:1) Ebehia sɛ ogye Awurade Yesu Kristo, a wɔama no so afi asase so kɔ ɔsoro no tom, sɛ nea ne ho hia titiriw wɔ n’asefo mu, “Dawid ntini ne n’aseni,” “Yuda abusuakuw mu gyata no, Dawid ntini no.” (Adi. 22:16; 5:5) Eyi nti na Dawid asefo anatõ a ɛnam abusua hama abien so ba awiei wɔ Yudani ɔbaabun Maria babarima Yesu so no. Nokwasɛm ni, ɛnyɛ sɛ Yesu Kristo anatõ san akyiri kodu Ɔhene Dawid so nko, agyapanyin Abraham so nko, na mmom ɛkɔ araa kodu Adam a odi kan, nea da a wɔbɔɔ no no wɔfrɛɛ no “Onyankopɔn ba” no so. (Mat. 1:1-18; Luka 3:23-28) Yesu Kristo nkutoo ne obi a, efi onipa a odi kan ‘Onyankopɔn desani ba’ a odi kan no so tɔnn, wɔkoraa n’anatõ so a emu antew anaasɛ ɔkwan ammɛda ntam.

 7. (a) Bere tenten ahe na adehye abusua a ɛwɔ Dawid fi no dii hene wɔ Israel? (b) Bere tenten ahe na Yesu Kristo bedi hene a ɔrennya asase so ɔsɔretiafo biara, na ɔkwan bɛn so na ɛbɛyɛ saa?

⁷ Ɔhene Dawid dii hene wɔ Israel mfirihyia aduanan pɛ. (1 Ah. 2:10, 11; 1 Be. 29:26, 27) Ne nyinaa mu no, ɛdenam abusua hama a mmarima aduonu a wobedi Ɔhene Dawid ade wom so no, n’adehyebusua no dii hene wɔ Israel mfe 470, anaasɛ 1077 kosi 607 A.Y.B. Adehye abusua foforo a ahene wom wɔ abusua baako bɛn mu na ebetumi ne ɛno asɛ wɔ ɔman foforo bi mu? Nanso, Yesu Kristo, sɛ Dawid Wura a ɔwɔ soro no, obedi hene wɔ adesamma nyinaa so mfirihyia apem a asase so ɔhene biara nsɔre ntia no. Eyi bɛyɛ saa a wɔn a wobedi n’ade wɔ ne soro ahengua no so biara nni hɔ, efisɛ ɔyɛ obi a onwu da. Ɔwɔ “nkwa a ɛnsɛe ahoɔden”; na enti, “sɛ́ ɔte hɔ daa nti,” obetumi adi hene a “wɔn a wobedi n’ade biara nka ho.” (Heb. 7:16, 24) Sɛnea ɔbɔfo Gabriel ka kyerɛɛ Maria wɔ Nasaret no, n’ahenni no to rentwa da.” (Luka 1:33) Ne saa nti, ɔyɛ Ɔhene Dawid Daa Ɔdedifo.

Ahokafo, Ɛnyɛ Adedifo

8, 9. (a) So 144,000 no bɛyɛ Yesu Kristo adedifo, na ɔde Awurade Anwummeduan no sii hɔ akyi no, ɔkaa wɔn hokwan ahorow wɔ Ahenni no mu ho asɛm dɛn? (b) Ɔkwan bɛn so na Daniel kaa ade koro no ara a wɔbɛbom ayɛ no ho asɛm siei?

⁸ Yesu Kristo mfɛfo adedifo 144,000 no nyɛ n’adedifo wɔ Ahenni no mu. Wɔyɛ ahene ahokafo ara kwa, a wofi soro apaw No sɛ onni wɔn so Ti. Enti ɔkwan a Adiyisɛm 20:4 fa so ka asɛm no ne sɛ: “Na wonyaa nkwa bio, na wɔne Kristo dii ahene [ɛnyɛ Kristo no akyi] mfirihyia apem.” Ɛte sɛ nea Yesu Kristo ka kyerɛɛ n’asuafo anokwafo no Twam anadwo no, bere a na ɔde afahyɛ foforo a wɔbɛfrɛɛ no Awurade Anwummeduan no asi hɔ no: “Mone wɔn a wɔakɔ so aka me ho me sɔhwɛ mu. Na me nso, sɛnea m’agya ayi ahenni ama me no, saara na meyi mama mo, na moadidi na moanom me pon so m’ahenni mu, na moatra nhengua so abu Israel mmusuakuw dumien no ntɛn.” (Luka 22:28-30) Mfehaha ansa na Kristo reba no, odiyifo Daniel kaa ade a wɔbɛbom ayɛ koro no ara ho asɛm.

⁹ “Na ɔsorosoroni no ahotefo bɛfa ahenni no, na wɔanya ahenni no daa daa mmeresanten. Nea ne nna akyɛ no bae, na wɔde atemmu maa ɔsorosoroni no ahotefo, na ɛbere a ahotefo beso ahenni mu no dui. Na wɔde ɔsoro nyinaa ase ahemman so ahenni ne tumi ne kɛseyɛ bɛma Ɔsorosoroni kronkronfo man; n’ahenni yɛ daa ahenni, na tumi nyinaa bɛsom no atie no.”​—Dan. 7:18, 22, 27.

10, 11. (a) Sɛ ebia 144,000 no wɔ adedifo ne sɛ wɔyɛ “mmakan ma Onyankopɔn ne Oguammaa no” ho no, dɛn na ɛsɛ sɛ wɔka? (b) Sɛ ahene no, adwene bɛn a wɔwɔ nti na ɛnsɛ sɛ wosuro 144,000 no?

¹⁰ Eyi kyerɛ sɛ Ɔsorosoroni Nyankopɔn no ahotefo 144,000 no ne Kristo bɛyɛ ahene mfirihyia apem a wonni adedifo. Wɔka eyinom ho asɛm sɛ: “Eyinom ne wɔn a wɔamfa mmea angu wɔn ho fi, na wɔyɛ mmabun, wɔn na wodi oguammaa no akyi baabiara a ɔkɔ. Eyinom na wɔatɔ wɔn afi nnipa mu ayɛ wɔn mmakan ama Onyankopɔn ne oguammaa no.” (Adi. 14:4) Esiane sɛ wɔatɔ wɔn afi adesamma mu nti, kan no na anka wɔyɛ mmarima ne mmea ara kwa te sɛ adesamma a aka no nyinaa, nanso ɛnsɛ sɛ saa nokwasɛm yi ma asase sotefo a 144,000 yi bedi wɔn so no suro. Wɔabɛyɛ “ahotefo,” sɛnea ɛsɛ sɛ “mmakan ma Onyankopɔn ne oguammaa no” mu biara yɛ “kronkron” ɔkwan biara so no. So biribi wɔ hɔ a ɛsɛ sɛ wosuro wɔ Yesu Kristo nniso no ho? Dabi! Na saa nso na biribiara nni hɔ a ɛsɛ sɛ yesuro wɔ 144,000 a “wɔatɔ wɔn afi nnipa mu” no nniso ho. Wɔatie ɔsomafo Paulo afotu no: “Momma adwene a ɛwɔ Kristo Yesu mu no ara ntra mo mu bi.” (Fil. 2:5) Afei, ɔsomafo Petro afotu a ɛwɔ 1 Pet. 4:1 no nso.

¹¹ “Na afei, sɛ Kristo ahu amane ama yɛn ɔhonam mu yi, mo nso momfa adwenkoro no ara mmia mo ho, efisɛ nea wahu honam mu amane no agyae bɔneyɔ.”

12. (a) Ɛdefa Kristo ahemfo ahokafo no ho no, dɛn na Onyankopɔn hyɛ too hɔ? (b) Bere bɛn ne ɔkwan bɛn so na Yehowa Nyankopɔn dii kan susuw nniso yi mufo ho?

¹² Ɛda adi sɛ 144,000 no hia sɛ wonya wɔn Kwankyerɛfo ne Ɔkyerɛkyerɛfo Yesu Kristo adwene, abrabɔ ne honhom mu suban no bi wɔ wɔn mu. Eyi yɛ nneɛma ahorow a Yehowa Nyankopɔn hwehwɛ fi wɔn hɔ a wahyɛ ato hɔ no mu biako. Ɛwom sɛ wanhyɛ nnipa mmiako mmiako a wofi adesamma mu a wɔyɛ wɔn a ɛsɛ sɛ wonya Yesu Kristo suban wɔ wɔn mu no anto hɔ de, nanso Onyankopɔn hyɛɛ dodow a ɛsɛ sɛ wɔyɛ no too hɔ​—144,000. Ɔhyɛɛ sɛnea na ɔne wɔn bedi ne ɔsoro anuonyam gyinabea a ɔde bɛma wɔn no too hɔ. Esiane sɛ, efi bere a onipa tew atua wɔ Eden Turo no mu no Yehowa Nyankopɔn ani akũ ahenni a ebedi nneɛma nhyehyɛe foforo ma adesamma so no ho nti, ɔno na odii kan susuw nniso no mufo ho. Ɔdaa adwene yi adi wɔ ɔsoro gyinaesi a oyii no adi kyerɛɛ Satan Ɔbonsam, “ɔwɔ dedaw no” mu, sɛ: “Mede ɔtan bɛto wo ne ɔbea no ntam, ɛne w’asefo ne n’asefo ntam; ɔno na ɔbɛbɔ wo ti, na wo nso woabɔ ne nantin.”​—Gen. 3:15.

13, 14. (a) Ɛdefa Onyankopɔn baa no “aseni” no ho no, Yesu Kristo yɛ dɛn? (b) Dɛn na ɔsomafo Paulo kyerɛw no nkuranhyɛ so kɔmaa Kristofo a na wɔrebɔ mmɔden ama wɔn frɛ no adi mu no?

¹³ Nokwarem no, Yesu Kristo ne otitiriw ma Onyankopɔn baa no “aseni” no. Nanso asuafo anokwafo a wɔbɛka Kristo ho wɔ Ɔwɔ no ti a wɔbɛbɔ mu no nso ka ho. (Rom. 16:20) Enti, ɔrekasa akyerɛ asafo a wɔn a wɔafrɛ wɔn wom a wɔrebɔ mmɔden ama frɛ a wɔafrɛ wɔn no adi mũ na wontwa mu no, ɔsomafo Paulo kyerɛwee nkuranhyɛ so, wɔ Romafo 8:28-32 sɛ:

¹⁴ “Na yenim sɛ, wɔn a wɔdɔ Onyankopɔn no, ade nyinaa di boa wɔn ma ewie wɔn yiye, wɔn a wɔnam ne tirimbɔ no so afrɛ wɔn no. Na wɔn a ohuu wɔn siei no, wayi wɔn asi hɔ nso, sɛ wɔnsɛ ne Ba suban, na wayɛ anuonyam pii mu abakan; na wɔn a oyii wɔn too hɔ no, wafrɛ wɔn nso; na wɔn a ɔfrɛɛ wɔn no, wabu wɔn bem nso; na wɔn a obuu wɔn bom no, wahyɛ wɔn anuonyam nso. Na afei yebese eyinom ho dɛn? Sɛ Onyankopɔn wɔ yɛn afã a, hena na ɔne yɛn bedi asi? Nea wankame n’ankasa ne ba, na mmom yɛn nyinaa nti oyii no mae no, ɛbɛyɛ dɛn na ɔremfa ade nyinaa nso nka no ho mmɛdom yɛn?”

15. (a) Sɛnea nea Onyankopɔn ahyɛ ato hɔ kyerɛ no, ɔkwan bɛn so na nniso wɔ Ne hyehyɛe foforo no mu ne, ne ho behyia? (b) Ɛdenam nea Onyankopɔn bɛyɛ so no, ɔkwan bɛn so na wɔn a wɔwɔ nniso yi mu bɛyɛ “trenee”?

¹⁵ Hyɛ no nsow sɛ, wɔn a wɔfrɛ wɔn no, sɛ wɔn mu biara te dɛn ara a, wɔyɛ wɔn a ‘ohuu wɔn siei, na wayi wɔn ato hɔ nso sɛ wɔnsɛ ne Ba no suban, na wayɛ anuanom pii mu abakan.’ Eyi hwehwɛ na esi so dua sɛ wɔn nyinaa bɛyɛ Kristo sɛso sɛ Onyankopɔn mma. Enti Onyankopɔn hyɛ too hɔ sɛ ɛsɛ sɛ Ne nneɛma nhyehyɛe foforo no nniso no yɛ nniso a biakoyɛ wom, ɛnyɛ nea emu apaapae, ɛnyɛ nea ɛne ne ho nhyia. Ɛsɛ sɛ obiara a ɔwɔ saa nniso no mu yɛ “trenee.” Ɛno nti na ehia sɛ Onyankopɔn yɛ nsiesie titiriw, trenee nsiesie, sɛnea ɛbɛyɛ na wabu wɔn a wɔfrɛ wɔn yi “trenee,” na Ɔyɛ eyi denam Oguammaa Yesu Kristo mogya so. Sɛ ɔrenyan wɔn afi awufo mu a, Ɔbɛma wɔayɛ trenee te sɛ honhom abɔde a wɔyɛ pɛ ma ɛne wɔn trenee nipasu ahyia. (Rom. 5:1, 9; 8:1) Saafo yi a Onyankopɔn bu wɔn trenee mprempren esiane wɔn gyidi wɔ Yesu Kristo mogya mu nti no, Onyankopɔn de nidi ne anuonyam ma wɔn, a nhyira horow hokwan wɔ Ne som mu mprempren wɔ asase so ka ho. Ɔde daakye anuonyam wɔ Ahenni no mu si wɔn anim.

16. Ɔkwan bɛn na Yesu faa so kyerɛɛ n’asuafo no sɛ ebia wiase yi mu amammuifo ne wɔn a ɛsɛ sɛ wosuasua wɔn?

¹⁶ Adesamma nyinaa betumi anya awerɛhyem sɛ wɔn a wonya Onyankopɔn dom na onyan wɔn ba Ahenni anuonyam mu no renni ahene te sɛ nea nnɛyi wiase nniso horow mu amammuifo yɛ no. Yesu amfa wiase yi amammuifo no ansi hɔ sɛ nhwɛso amma n’asuafo sɛ wonsuasua wɔn. Amammui mu apereperedi biara remmɛda n’ahokafo 144,000 no ntam wɔ ɔsoro ahenni no mu. Ɛrenyɛ sɛ nea yɛkenkan wɔ Luka 22:24-27, (Twi Bible Foforo) no mu no: “Akasakasa bi nso baa wɔn mu sɛ wɔn mu hena na wobebu no kɛse. Na osee wɔn sɛ: Wiase amanaman ahene di wɔn so ahensɛm na wɔn a wodi wɔn so tumi no, wɔfrɛ wɔn adɛɛfo. Na mo de, monnyɛ sa; na mmom, nea ɔyɛ mo mu kɛse no, ɔnyɛ sɛ akumaa; na nea ɔyɛ titiriw no nyɛ sɛ nea ɔsom. Na hena na ɔso, nea ɔte aduan ho anaasɛ nea ɔsom? Ɛnyɛ nea ɔte aduan ho? Na me de, mewɔ mo mu sɛ nea ɔsom.”

17. Bere a wɔsomaa no wiase yi mu no, dɛn nti na na Yesu yɛ Onyankopɔn Bɔfo a ɔfata ma adesamma?

¹⁷ Bɛyɛ mfe mpem abien a atwam ni no, wɔsomaa Onyankopɔn Ba no baa wiase, nanso ɛnyɛ sɛ ɔbɛyɛɛ amansɛmdifo a na ɔhwehwɛ nkurɔfo ma wɔato aba ama no anaa sɛ ɔbɛko atia amammui mu asɔretiafo, wɔ Israel man no mu mpo. Ɔbɛyɛɛ nea asase so ɔmammuifo biara ntumi nyɛ, a ɛne sɛ, ɔbɛka nkurɔfo, aman ne mmusuakuw nyinaa ne Onyankopɔn a na anka wɔne no nka no abom. Ɔbae sɛnea ɛbɛyɛ na wama adesamma ne Nkwamafo kɛse, Yehowa Nyankopɔn asan abenya abusuabɔ a asomdwoe ne biakoyɛ wom. Nea na eyi kyerɛ ma Onyankopɔn Ba no ne sɛ ɔde ne ho bɛbɔ afɔre. Wɔka ne ho asɛm ma ɛfata sɛ Ɔhemmɔfo fa ofi Onyankopɔn nkyɛn, a wɔsomaa no nnipa bi a wɔyɛ atamfo nkyɛn na wabɛsrɛ wɔn ma wɔne Onyankopɔn aka abom na wɔnam saa yɛ so aguan sɛe a ɔbɛsɛe wɔn.

18. Wɔn a wɔbɛyɛɛ Kristo asuafo no yɛɛ wɔn ade dɛn wɔ Onyankopɔn Hemmɔfo no ho? Nneɛma bɛn na efi mu bae?

¹⁸ Kristofo asuafo no ne wɔn a wogyee Ɔhemmɔfo a ofi Onyankopɔn nkyɛn yi ne ahemmɔfo adwuma a ɔbɛyɛe wɔ wɔn ho no toom. Ɔsomafo Paulo kyerɛw kɔmaa saa asuafo a na wɔwɔ Roma no kae sɛ: “Onyankopɔn yi ne dɔ a ɔdɔ yɛn kyerɛ, efisɛ, yɛda so yɛ nnebɔneyɛfo no, Kristo wu kyɛɛ yɛn. Enti afei mmom a wɔabu yɛn bem ne mogya mu yi, wɔnam no so begye yɛn nkwa afi abufuw no mu. Na sɛ, yɛyɛ atamfo no, wɔnam ne Ba wu so apata yɛne Onyankopɔn ntam a, eyi mmom a wɔapata ama yɛn yi, wobegye yɛn nkwa, ne nkwa no mu. Na ɛnyɛ eyi nko, na yɛnam Awurade Yesu Kristo a yɛanya no mu mpata yi so hoahoa yɛn ho nso Onyankopɔn mu.”​—Rom. 5:8-11.

‘Abɔfo A Wogyina Kristo Ananmu’

19. (a) Efi bere a Kristo kɔɔ soro no, ɔkwan bɛn so na abɔfodwuma no akɔ so wɔ adesamma mu? (b) Wiase amammui atumfoɔ no bu abɔfo a wofi Kristo mu no dɛn, na dɛn nti na ɛte saa?

¹⁹ Efi ne sorokɔ wɔ afe 33 Y.B. fefɛwbere mu no so reba no, Yesu nni asase so bio na wakɔ so ayɛ ahemmɔfo adwuma no. Enti ɛsɛ sɛ n’asuafo a wapata ama wɔn no yɛ ahemmɔfo adwuma no sɛ n’ananmusifo. Amammui sodifo ahorow ne wiase yi mu nniso horow no nnye asuafo yi ntom sɛ ahemmɔfo a wofi Nniso a Ɛkorɔn Sen Biara wɔ amansan yi mu no nkyɛn. Na Kristofo ahemmɔfo yi ne amammui ahemmɔfo a wɔwɔ amanaman no mu no nnka mmom nnyɛ nhyehyɛe sɛ wɔbɛsakra ɔman mũ nyinaa denam apam biako a ɛnam amansɛmdi mu ahemmɔfo no so no so. Amammui sodifo ne nniso horow no hwɛ asuafo a wɔasoma wɔn no ɔhonam fam, sɛnea wonim wɔn dedaw no, na wɔnsoma ɔman ananmusifo nkɔ wɔn nkyɛn sɛnea wɔne Roma Katolek Asɔre a ɛwɔ Vatikan no ayɛ mfehaha pii no. Wobu asuafo a wonni abodin, wonni atade bi a ɛhyɛ wɔn nsow ne nkrataa ahorow a edi wɔn ho adanse yi, sɛ nnipa hunu bi ara kwa. Wommu eyinom sɛ wɔyɛ honhom abɔde foforo, a wɔwɔ biribi foforo de ma.

20. Ɛwom sɛ Roma annye no antom sɛ ɔhemmɔfo de, Paulo kaa n’ankasa ho asɛm dɛn bere a na ɔrekyerɛw krataa akɔma Efesofo no?

²⁰ Esiane sɛ Roma Ahemman no annye ɔsomafo Paulo a na onnyina Yudafo ahenni no ananmu wɔ Yerusalem no antom sɛ Kristoni ɔhemmɔfo nti, so ɛno amma wanyɛ ɔhemmɔfo ankasa ma Ɔsorosoroni Nyankopɔn no Nniso anaa? Nanso, bere a Roma nniso no amfi nidi mu annye no antom mpo no, Paulo kaa n’ankasa ho asɛm saa bere a na ɔda afiase wɔ Roma no, na ɔka kyerɛɛ asafo a ɛwɔ Efeso Asia Kumaa no sɛ: “Monwɛn na montoa so ara nsrɛ mma ahotefo nyinaa ne me nso, sɛ, mibue m’ano a, wɔmma ne asɛm menka, na memfa nnam minyi asɛmpa no ahintasɛm menkyerɛ; ɛno ho bɔfo na meyɛ nkɔnsɔnkɔnsɔn mu, na mayɛ mu nnam sɛnea ɛsɛ sɛ mekasa.”​—Efe. 6:18-20.

21. Wɔ wɔn asɛyɛde ahorow ho dwumadi mu no, henanom nkyɛn na ahemmɔfo Kristofo yi kɔ?

²¹ Ɛnsɛ sɛ Kristoni a wɔasoma no no nya adwene a wiase yi mu amammui nniso horow a ɛtan Yehowa Nyankopɔn no wɔ no. Kristoni anya ne hemmɔfoyɛ no afi Onyankopɔn hɔ denam Kristo so, na ɛsɛ sɛ ohu asɛyɛde ahorow a anuonyam foforo a wɔde ama no no de to no so no. Esiane sɛ ɔnyɛ wiase hemmɔfo nti, ɔmfa ne dibea foforo no nkɔ amammui nniso horow no nkyɛn. Wɔ asɛm a ɛfa Onyankopɔn a wɔne no bɛka abom yi ho de, nniso horow no ntumi nni ho dwuma mma ɔman no nyinaa na wɔnsakra wɔn a wodi wɔn so no ne Onyankopɔn ntam abusuabɔ no. Ɛyɛ ankorankoro asɛm; ɛsɛ sɛ obiara si gyinae ma n’ankasa ho na odi ho dwuma. Ɛno nti na honhom fam ahemmɔfo no kɔ nkurɔfo nkyɛn tẽe, a wɔmmfa mfa wɔn amammui nniso horow no so no. Ɔreka gyinabea dedaw no a atwam ne ɛbo a wɔn asɛyɛde foforo no som no ho asɛm no, ɔsomafo Paulo ka asɛm no pefee sɛ:

22. Adwuma bɛn na abɔfo Kristofo no yɛ, na hena na wogyina n’ananmu, na dɛn na wotu wɔn a wɔapata ama wɔn no fo sɛ ɛnsɛ sɛ wɔyɛ?

²² “Enti sɛ obi wɔ Kristo mu a, na ɔyɛ abɔde foforo; nneɛma dedaw no atwam, hwɛ, nneɛma nyinaa ayɛ foforo. Na nneɛma yi nyinaa fi Nyankopɔn a ɔnam Kristo so apata aka yɛn abɔ n’ankasa ne ho na ɔde mpata som ama yɛn no; ɛne sɛ, Onyankopɔn wɔ Kristo mu repata aka wiase abɔ ne ho, na wammu wɔn mfomso angu wɔn so, na ɔde mpata asɛm no asi yɛn mu. Enti yɛyɛ abɔfo ma Kristo, te sɛ Onyankopɔn nam yɛn so tu mo fo; yegyina Kristo ananmu srɛ mo sɛ: momma wɔmfa mpata nka mo mmɔ Onyankopɔn ho. Efisɛ nea onnim bɔne no, ɔde no yɛɛ bɔne maa yɛn, na yɛayɛ Onyankopɔn trenee, ɔno mu. Na yɛn a yɛne no bom yɛ adwuma no tu mo fo nso sɛ munnnye Onyankopɔn dom no kwa.”​—2 Kor. 5:1 kosi 6:1, Twi Bible Foforo.

23. Sɛ́ wɔyɛ abɔfo a wogyina Kristo ananmu no de anohyeto a emu yɛ duru bɛn na ɛto Onyankopɔn ananmusifo so?

²³ Sɛ́ wɔyɛ ‘abɔfo a wogyina Kristo ananmu’ no de anohyeto ahorow a anibere wom brɛ Onyankopɔn ananmusifo a wɔyɛ abɔde foforo wɔ Kristo mu no. Anohyeto ahorow bɛn? Nea ɛte sɛ anohyeto ahorow a ɛda amammui aman no abɔfo no so no. Ɛnyɛ ɛnnɛ nko, na mmom wɔ Bible mmere so no, na abɔfo nni hokwan sɛ wɔde wɔn ho hyehyɛ aman a wɔasoma wɔn wɔ mu no amammuisɛm mu. (Luka 19:15, 27) Na wobetumi asrɛ ade afi amannɔne nniso horow no hɔ, anaasɛ wɔakasa atia mpo, nanso ɛsɛ sɛ wɔtwe wɔn ho fi saa aman no amammuisɛm ho koraa. Ɛsɛ sɛ wodi nokware ma wɔn ankasa man mu nniso na wɔde anidahɔ dwen n’ahiade ahorow ho bere a wɔresusuw amannɔne nniso horow ho no. Sɛ wɔanyɛ eyi a, wobetumi ayɛ wɔn a wonnye wɔn anaasɛ wɔn abodin ahorow no ntom, na wobetumi ayi wɔn afi asase so.

24. Ɛhe na ɔman a honhom mu ahemmɔfo yi bu no wɔ, nniso bɛn na wogyina n’ananmu, na wiase dwumadi ahorow bɛn na wɔtwe wɔn ho fi ho na wɔnam saa yɛ so ma wɔn ho tew?

²⁴ 144,000 no a wɔyɛ Kristo mfɛfo adedifo no gye tom sɛ, bere a wɔwɔ asase so no, wɔyɛ ‘abɔfo a wogyina Kristo ananmu.’ Ɛdenam Kyerɛw Kronkron no so no, wohu nea abɔfo a wɔyɛ no kyerɛ ankasa no pefee wɔ wɔne wiase a ɛtan Onyankopɔn no abusuabɔ fam. (Rom. 5:10) Wɔne ɔsomafo Paulo bom ka sɛ: “Yɛn man a yebu no wɔ soro; efi hɔnom nso na yɛtwɛn Agyenkwa a ɔyɛ Awurade Yesu Kristo.” (Fil. 3:20) Wɔ ɔtan wiase yi mu no, ɛsɛ sɛ wɔde nokwaredi gyina hɔ ma ɔsoro ahenni a Awurade Yesu Kristo hyɛɛ wɔn sɛ wɔnka ho asɛm wiase nyinaa no. (Mat. 24:14) Honhom mu ahemmɔfo a wɔyɛ ma wiase bi a ɛtan wɔn no mma wɔn kwan sɛ wɔmfa wɔn ho nhyehyɛ na wonnya kyɛfa denneennen wɔ aman horow no amammuisɛm mu wɔ wiase yi mu. Wɔrentumi mfa wɔn ho nhyɛ amammui abatow mu anaasɛ wonnnye wiase nniso mu dibea sɛnea wiase ɔhemmɔfo ntumi mpaapae ne nokwaredi mu na onnye amammui mu dibea wɔ ɔman foforo mu no. Wɔ saa kwan yi so no wɔma wɔn ho tew fi ɔbrasɛe ne mogyahwiegu ho asodi a ɛda ɔman biara a ɛyɛ saa wɔ asase so no ho.

25. Ɔkwan bɛn so na mfɛfo Ahenni adedifo 144,000 no twe wɔn ho fi som a wɔbɛsom “aboa” no ne ne “honi” no ne n’agyirae a wobenya wɔ wɔn moma ne wɔn nsa so no ho?

²⁵ Ɛdenam eyi so no yebetumi anya nea ɔsomafo Yohane ka wɔ anokwafo 144,000 no a wɔbɛyɛ Kristo Ahenni ahokafo no bo anisɔ pii: “Mihuu wɔn a Yesu adanse ne Nyankopɔn asɛm nti wotwitwaa wɔn ti no akra ne wɔn a wɔankotow aboa no anaasɛ ne honi na wɔannye agyirae no wɔ wɔn moma ne wɔn nsa so no; na wonyaa nkwa bio, na wɔne Kristo dii ahene mfirihyia apem.” (Adi. 20:4) Wɔ Onyankopɔn honhom no tumi ase no, wohu “aboa no” akontaahyɛde 666 no sɛ ɛyɛ Ɔbonsam wiase nyinaa amammui nhyehyɛe a ɔnam so yɛ “wi yi ase sodifo” no. Wohu sɛ, nnɛ no, amammui aboa no honi no yɛ amammui ahyehyɛde foforo, a ɛne Amanaman Nkabom no, nnipa ahyehyɛde ma asomdwoe ne dwoodwoo asetra ma wiase a ɛne Onyankopɔn nka no. Ɛyɛ wɔn ho a wɔbɛma atew afi amammuisɛm ahorow ne sɛnkyerɛnne kwan so “aboa no” apereperedi ho nkutoo so na wɔrennya aboa no agyirae no wɔ wɔn moma ne wɔn nsa so.

26. Ɛwom sɛ wɔtwe wɔn ho fi “aboa” no som ne n’agyirae’ no ho de, dɛn na 144,000 no de ma “tumi a ɛwɔ anuonyam” a ɛwɔ wiase no, nanso wɔyɛ saa de kodu hefa?

²⁶ 144,000 no nyɛ nkoa anaasɛ asomfo mma “aboa no” ne n’amammui “honi” no. Wɔnna wɔn ho adi petee mu denam agyirae a wohu wɔ wɔn moma so te sɛ nkoa ma “aboa no” a ɛyɛ nnipa nniso a ɛhyɛ Satan Ɔbonsam tumi ase no. Wɔmmfa n’amammui “agyirae” no nnnɔ wɔn nsa so te sɛ nea wɔnam nkoayɛ ne ɔsom so de wɔn mmoa ma no na wɔne no nya adamfofa. Wɔyɛ osetie ma ɔsomafo Paulo afotu a ɛwɔ Romafo 13:1-7 no na wofi ahonim pa mu ‘brɛ wɔn ho ase ma tumi a ɛwɔ anuonyam’ a ɛwɔ wiase yi mu no, wotua tow ahorow na wɔde nidi a ɛtete saa ma. Nanso wɔn ho ase a wɔbrɛ yi nyɛ ɔkwan biara so, na mmom wɔ akwan horow bi so, ma biribi titiriw bi nti. Ɛdɛn? Eyi: bere a asase so tumi horow yi mmara horow ne ahyɛde horow ne ɔsorosoroni Nyankopɔn no mmara horow ne ahyɛde horow bɔ abira no, ɛnde ɛsɛ sɛ wofi ahonim pa mu di nhwɛso a Kristofo asomafo no yɛe wɔ Asennibea Kunini a na ɛwɔ Yerusalem no anim no akyi: “Ɛsɛ sɛ yetie Onyankopɔn mmom sen nnipa.” (Aso. 5:2) Eyi a wɔbɛyɛ nkutoo so na wɔnam betumi atew wɔn ho afi “aboa no” “agyirae” no ho na wɔada wɔn ho adi sɛ wɔfata sɛ wɔne Kristo di hene wɔ soro.

27. Sɛnea Adiyisɛm 22:4 kyerɛ no, agyirae bɛn na wohu wɔ 144,000 no moma so?

²⁷ Enti anokwafo 144,000 no remfa pɛsɛmenkominya wiase amammui afĩde no nkɔ Kristo ɔsoro ahenni no mu. Sɛ́ ebia wonya agyirae bi wɔ wɔn moma so no, Adiyisɛm 22:3-5 ka wɔ Onyankopɔn nkoa anokwafo yi ho sɛ: “Ne nkoa bɛsom no, na wobehu n’anim, na ne din wɔ wɔn moma so. . . . Awurade Nyankopɔn bɛhyerɛn wɔn so; na wobedi ahene daa daa.”

Mfaso A Wobenya Sɛ Wɔyɛ Ahene Mfirihyia Apem

28. (a) Wɔ 144,000 no fam no, mfaso bɛn na ɛbɛyɛ ama wɔn sɛ wobedi ahene mfirihyia apem a wonhia adedifo? (b) Sɛ wogyaa Satan ne n’adaemone no a, dɛn na wɔbɛyɛ wɔ ɔsoro nniso no ho, na dɛn na ɛbɛba wɔn a wɔama wɔadaadaa wɔn no so?

²⁸ Hokwan bɛn na ɛbɛyɛ ama wɔn sɛ wɔne Kristo bedi hene mfirihyia apem bere a wɔakyekyere Satan Ɔbonsam ne n’adaemone no atow wɔn agu bun no mu akyi! Eyi bɛma wɔanya bere pii de awie adwuma a Yehowa Nyankopɔn de ahyɛ wɔn nsa sɛ wɔnyɛ no nkonimdi mu wɔ mfirihyia apem a edi kan wɔ Ne nneɛma nhyehyɛe foforo no mu no mu. Wɔn anaasɛ Yesu Kristo rennya adedifo biara a wɔbɛba abedi ahene na wɔabɔ mmɔden sɛ wɔbɛsakra nneɛma a wɔawie no anaasɛ wɔbɛpɛ sɛ wɔyɛ nneɛma wɔ ɔkwan foforo so. Sɛnea Adiyisɛm 20:7-10 kyerɛ no, bere a wɔagyaa wɔn wɔ mfirihyia apem no awiei no mu no, Satan Ɔbonsam ne n’adaemone no bɛbɔ mmɔden sɛ wɔbɛdan nneɛma ani. Wɔbɛbɔ mmɔden sɛ wɔbɛsɛe biribiara a wɔnam mfirihyia apem nniso no so ayɛ ma ahyɛ Onyankopɔn anuonyam na ayɛ nhyira ama nnipa no; nanso wɔrentumi. Nnipa biara a Satan betumi adaadaa wɔn no behu afei sɛ atua a wɔtew tia ɔsoro nniso no renkosi baabiara na ɛyɛ tiaa. Wɔbɛpopa Satan ne n’adaemone ne asase so atuatewfo yi afi ateasefo mu.

29. (a) Ɔkwan bɛn so na, wɔ mfirihyia apem no awiei no, nneɛma bɛkyerɛ sɛ soma a Onyankopɔn somaa ne Ba no anaasɛ ɔma obewui no anyɛ ɔkwa? (b) Dɛn nti na Kristo ne 144,000 no bedi ahurusi sɛ wɔanni ahene mfirihyia apem kwa?

²⁹ Yesu Kristo ne n’Ahenni mfɛfo adedifo 144,000 mfirihyia apem ahenni no renyɛ ɔkwa. Adesamma a wɔbɛma wɔaba ɔdesani pɛyɛ mu wɔ asase so nyinaa paradise mu no bɛyɛ nokwasɛm a edi mu. Yiw, Yesu Kristo, Onyankopɔn Ba no ammewu kwa, na atirimpɔw nti a Onyankopɔn nam ɔdɔ so somaa no baa wiase yi mu no renni huammɔ. Wɔ anokwafo a wogye Onyankopɔn amansan tumidi tom a wɔde nokwaredi di sɔhwɛ a ɛba bere a wogyaa Satan kakra no mu nkonim no fam no, ɛbɛda no adi kɛse sɛ Ade Nyinaa So Tumfoɔ Nyankopɔn, Ɔbɔadeɛ no betumi de mmarima ne mmea a wobekura wɔn mudi mu pintinn ama No no atra asase so. Esiane eyi nti wɔbɛfata sɛ ɔtemmufo Kɛse Yehowa Nyankopɔn bu wɔn trenee, na ɔde hokwan a wɔde bɛsom No asomdwoe ne anigye mu wɔ asase so Paradise mu daa daa bɛma wɔn. (Adi. 20:5) Nea efi ɔsoro atemmu ma adesamma yi mu ba no, Yesu Kristo ne n’ahemfo ahokafo 144,000 no bedi ahurusi na wobehu sɛ wɔn mfirihyia apem ahenni no de mfaso horow bae.

30. Ahene a wobedi akyi no, adwuma bɛn na 144,000 no ne Kristo bɛyɛ mfirihyia apem, na asemmisa bɛn na eyi ma ɛsɔre?

³⁰ Nanso anuonyam anisoade a ɔsomafo Yohane hui no da no adi kyerɛ yɛn sɛ mfɛfo Ahenni adedifo 144,000 yɛ nea ɛsen sɛ wɔne Kristo di ahene mfirihyia apem no. Adiyisɛm 20:6 ka 144,000 a wonya kyɛfa wɔ “owusɔre a edi kan” yi ho asɛm sɛ “wɔbɛyɛ Onyankopɔn ne Kristo asɔfo.” Dɛn nti na ɛsɛ sɛ wɔyɛ “asɔfo” nso mfirihyia apem? Dɛn na eyi de bɛba a ahene ara kwa a wɔbɛyɛ ntumi mfa mma? Yɛrente nsɛm a ɛfa mfirihyia apem a ɛreba no ho ase gye sɛ yɛhwehwɛ mu.

Ɔfã 6: Onyankopɔn Mfirihyia Apem Ahenni Abɛn

22, 23. (a) Nea ɛne Lewi ɔsɔfo panyin no bɔ abira no, ɔkwan bɛn so na wɔyɛɛ Yesu ɔsɔfo panyin? (b) Sɛnea Hebrifo 7:23-28 kyerɛ no, ɔkwan bɛn so na Yesu sɛ ɔsɔfo panyin no, obetumi agye wɔn a wɔnam no so bɛn Onyankopɔn no korakora?

²² Yuda sɔfo panyin Aaron ne n’adedifo no anyɛ asɔfo denam ntam a Yehowa Nyankopɔn kae so. Nanso wɔyɛɛ Yesu Kristo a na omfi asɔfo abusua biara mu wɔ asase so no ɔsɔfo panyin denam Onyankopɔn ntam so. N’asetra so twae bere tiaa bi denam wu a owui sɛ ɔdesani afɔre a ɛyɛ pɛ no so, nanso, wonyan no kɔɔ ɔsoro asetra a ɔporɔw nni mu mu ma wakɔyɛ daa ɔsɔfo panyin te sɛ Melkisedek. Wɔda nsonsonoe a ɛda ɔno ne Aaron Lewifo asɔfodi no ne n’adedifo ntam no adi wɔ Hebrifo 7:23-28, faako a yɛkenkan sɛ:

²³ “Na wɔn [Aaron mma] de, wɔyɛ asɔfo a wɔdɔɔso, sɛ owu amma wɔantra hɔ ntia; na oyi [Melkisedek a Ɔkyɛn So no] de, sɛ́ ɔte hɔ daa nti, odi sɔfo a wɔnsakra. Enti nso obetumi agye wɔn a wɔnam no so ba Onyankopɔn nkyɛn no koraa, sɛ ɔte ase daa sɛ obedi ama wɔn. Na ɔsɔfo panyin a ɔfata yɛn ne sɛɛ ɔsɔfo panyin yi a ne ho tew, onni bɔne, ne ho nni nkekae, wɔayi no afi nnebɔneyɛfo ho, na wɔama no so akyɛn asoro; ɔno na enhia no daa, sɛ asɔfo mpanyin no, sɛ ɔbɔ n’ankasa bɔne ho afɔre kan ansa na wabɔ ɔman no de; na ɔde ne ho bɔɔ afɔre no, ɔyɛɛ eyi prɛko. Na [Mose] mmara no hyɛ nnipa a wɔyɛ mmerɛw asɔfo mpanyin, na mmara no akyi [bɛboro mfirihyia ahanan no, Onyankopɔn] ntanka no asɛm no hyɛ Ɔba no a wawie ayɛ pɛ daa no sɔfo panyin.”

24. Yesu Kristo yɛ ɔsɔfo panyin wɔ “kronkronbea” bɛn, na bere bɛn a odi sɔfo na ɛsɛ sɛ adesamma da ho ase?

²⁴ Enti asentitiriw a wɔreda no adi wɔ ha no ne nea ɛwɔ he? Wɔada eyi adi wɔ nkyekyem ahorow abien a edidi so no mu (Heb. 8:1, 2) , sɛ: “Na asɛm a yɛreka yi mu titiriw ni: yɛwɔ saa ɔsɔfo panyin a wakɔtra tumi kɛse ahengua no nifa, ɔsoro, sɛ kronkronbea no ne nokware ntamadan a Awurade ankasa na ɛnyɛ onipa pamee no mu sɔfo.” So ɛnsɛ sɛ adesamma da Onyankopɔn ase sɛ wobenya Ɔsɔfo Panyin a ɔte saa a ɔbɛn Onyankopɔn na ɔbɛsrɛ ama wɔn wɔ mfirihyia apem dwumadi no mu bere a wɔde Satan Ɔbonsam ne n’adaemone no begu bun mu no? Yiw! Nokwarem no, Onyankopɔn nsiesie a ɛte saa de nea eye ankasa bɛma adesamma.

25. Dɛn nti na Yesu ansom sɛ ɔsɔfo panyin wɔ Yerusalem asɔrefi, na dɛn na na Yerusalem asɔredan no yɛ ne nsɛso?

²⁵ Bere a na ɔwɔ asase so sɛ onipa a ɔyɛ pɛ no, Yesu Kristo ansom sɛ odwumayɛni wɔ asɔrefi a na ɛwɔ Yerusalem no mu. Mose mmara no amma no kwan sɛ ɔnyɛ saa, efisɛ, na ɔnyɛ Lewini anaasɛ na omfi Aaron asɔfo abusua no mu. Nanso ɔsomee wɔ gyinabea bi a ɛkorɔn na ɛyɛ kronkron mu, wɔ asɔrefi bi a ɛkorɔn na ɛyɛ titiriw a wɔnnam nnipa te sɛ Ɔhene Herode Ɔkɛseɛ anaasɛ Amrado Serubabel anaa Ɔhene Salomo so sii wɔ Yerusalem no mu. Na asɔredan ahorow a nnipa sii, te sɛ ahyiae ntamadan kronkron a Mose sii no yɛ nhwɛso bi ara kwa. (Ex. 40:1-33) Kyerɛwtohɔ biara nni hɔ a ɛkyerɛ sɛ Ɔhene Melkisedek sii asɔredan wɔ Salem, na ná ohia ɔdan bi a ɛte saa ma ɔde asom sɛ “Ɔsorosoroni Nyankopɔn no sɔfo.” Enti, wontumi mfa biribiara a ɛte saa a ɛfa Melkisedek ho nni dwuma sɛ nsɛso. Nanso Melkisedek a Ɔkyɛn So, Yesu Kristo, somee sɛ ɔsɔfo Panyin wɔ sɛnkyerɛnne kwan so kronkronbea ne asɔredan a ɛne, “kronkronbea ne nokware ntamadan a Awurade pamee” no mu.

NOKWARE ASƆREDAN NO

26, 27. (a) Wɔkyekyɛe ntamadan kronkron no ne Yerusalem asɔredan no mu ahe? (b) Nneɛma bɛn na na ɛwɔ ntamadan no ne Salomo asɔredan no pia biara mu?

²⁶ Na ntamadan kronkron a Mose sii wɔ Bepɔw Sinai so ne asɔredan ahorow a ɛwɔ Yerusalem no wɔ mpia abien, wɔfrɛ pia a edi kan no Kronkronbea, na wɔfrɛ nea ɛto so abien no Kronkron mu Kronkronbea, nea ɛyɛ Kronkron sen biara.

²⁷ Nneɛma a na ɛwɔ Kronkronbea hɔ no ne sika pon a wɔde abodoo a wɔfrɛ no “kyerɛ abodoo” gu so no, ne sika kaneadua a nsa ason tuatua ho a akanea sisi so ne sika aduhuamhyew muka no. Ɛdenam nkanea a esisi kaneadua no so no hann so no, na ɔsɔfo panyin no tumi hyehyɛ kyerɛ abodoo no na ɔhyew aduhuam wɔ muka no so wɔ ha. Nanso wɔ ntamadan a Mose sii ne asɔredan a Salomo sii no Kronkron mu Kronkronbea hɔ no, na sika Apam Adaka kronkron no ne ne sika mmuaso a sika kerubim abien sisi so a wɔhwɛ wɔn ho anim a wɔatrɛtrɛw wɔn ntaban mu no wɔ hɔ. Na anwonwa kwan so hann a wɔfrɛ no Sekina Kanea a na ɛwɔ kerubim abien no ntam no ma Kronkron mu Kronkronbea hɔ yɛ hann.

28. Ɔkwan bɛn so na Yuda ɔsɔfo panyin no siesiee ne ho maa mpata afɔre horow no mogya a wɔpete wɔ Kronkron mu Kronkronbea hɔ, enti hefo bɔne na ɔpata mae?

²⁸ Ansa na ɔde mpata afɔre mogya no bɛma pɛnkoro afe biara wɔ Mpata Da no, ná ɔsɔfo panyin a ofi Aaron abusua mu no fa aduhuamhyew ade ketewa bi kura ne nsam na ɔtra mmɔhɔɔ a etwa pia a edi kan ne nea ɛto so abien no ntam no kɔ akyi, na ɔhyew aduhuam no wɔ Apam Adaka no anim wɔ Sekina Kanea no hann mu. Ná eyi bue kwan ma no ma ɔde mpata afɔre abien no mogya san ba akyiri yi, na ɔde eyi apete Apam Adaka no Mmɔborohunu Agua no so. Saa kwan yi so no, ɔpata maa n’ankasa ho ne ne Lewifo abusua no, ne afei Israel man no bɔne. Na eyi ne ɔkwan a wɔfa so pata ma, sɛnea na wɔada no adi wɔ Mose Mmara apam no mu no.​—Heb. 9:1-10; Num. 7:89.

29. (a) Bere bɛn na wobuee ntamadan a Mose sii no ano, na bere bɛn na wobuee Salomo asɔredan no nso ano? (b) Bere bɛn na wɔde nokware ntamadan anaasɛ asɔredan no bae?

²⁹ Mose sii ahyiae ntamadan kronkron no wɔ Sinai sare so fefɛw bere, Nisan da a edi kan, afe 1512 A.Y.B. mu. Ɔhene Salomo wiee n’asɔredan no wɔ Yerusalem afe 1027 A.Y.B. mu, na ɛno akyi ohyiraa so ofupɛ bere Tishri da a ɛto so dunnum afe 1026 A.Y.B. mu. (1 Ahe. 8:1, 2, 65, 66) Nanso bere bɛn na sɛnkyerɛnne kwan so ntamadan anaasɛ asɔredan, “nokware ntamadan” no ne ne “kronkronbea” no bae? Ɛyɛ bere a na asɔredan ankasa a Ɔhene Herode Ɔkɛseɛ no sii no da so ara si Yerusalem no. Ná ɛyɛ fefɛw bere mfiase wɔ afe 29 Yɛn Bere mu. Ɔkwan bɛn so na na eyi te saa? Dɛn na ɛbae saa bere no ma nokware asɔredan ho behiae?

30, 31. (a) Bere bɛn, ne ɔkwan bɛn so na sɛnkyerɛnne kwan so Ɔsɔfo Panyin no bae? (b) Sɛnkyerɛnne kwan so da a woyi bɔne fi hɔ bɛn na efii ase saa bere no, na nea Yesu de mae ne nea Aaron de mae no te dɛn?

³⁰ Wɔ afe 29 Y.B. mu no, sɛnkyerɛnne kwan so Ɔsɔfo Panyin no puei, na te sɛ Lewi ɔsɔfo panyin Aaron no, na ɛsɛ sɛ onya ntamadan a obedi dwuma wɔ mu. Sɛnkyerɛnne kwan so Ɔsɔfo Panyin a ɔbɔ afɔre yi ne Awurade Yesu a wɔde Onyankopɔn honhom kronkron sraa no ma wabɛyɛ honhom mu ɔsɔfo panyin no. Honhom kronkron a wɔde sraa no yi bae bere a Osuboni Yohane bɔɔ no asu wɔ Yordan Asubɔnten no mu no akyi. Enti, yɛ a ɔbɛyɛɛ Mesia anaasɛ Nea Wɔasra No bere a odii mfe aduasa no bae mfe abiɛsa ne fã ansa na n’afɔrebɔ wu ma adesamma bɔne no reba. (Dan. 9:24, 25, 27; Luka 3:21-23) Saa bere yi no, sɛnkyerɛnne kwan so Mpata Da kɛse no fii ase, na Yesu nyaa biribi a eye sen nea Ɔsɔfo Panyin Aaron nyae wɔ mpata da no ankasa wɔ afe 1512 A.Y.B. mu hɔ, bere a na wɔde ntamadan anaasɛ trabea kronkron no asi hɔ no. Ná eyi yɛ dɛn? Wɔ Hebrifo 8:3-6 ne 9:11-14 no, wɔka kyerɛ yɛn sɛ:

³¹ “Ɔsɔfo panyin biara, wɔhyɛ no sɛ ɔmfa ayɛyɛde ne afɔre mma, enti ɛsɛ sɛ oyi nso nya biribi a ɔde bɛma. Na sɛ ɔwɔ asase so de a, anka ɔnyɛ ɔsɔfo mpo, efisɛ ɔsɔfo a ɔde ayɛyɛde ma, sɛnea mmara no te no, wɔ hɔ dedaw; wɔn a wɔsom ɔsoro nneɛma nhwɛso ne sunsuma, sɛ asɛm a Mose rebesiesie ntamadan no, ɛbaa ne nkyɛn no, na ose: Hwɛ ade nyinaa sɛnea nsusuwso a wɔkyerɛɛ wo bepɔw no so no te. Na afei ne nsa aka asɔfodwuma a ɛkyɛn so, sɛ wayɛ apam a ɛkyɛn so a wogyina bɔhyɛ a ɛkyɛn so so hyɛɛ ho mmara no ntamgyinafo.”

32. Sɛnea Aaron de no yɛɛ ho mfonini no, dɛn mu na Yesu Kristo hyɛnee, na dɛn na ɔde kɔɔ hɔ a ɛhohoro yɛn ahonim ho fi nnwuma funu ho?

³² “Nanso, Kristo a ɔbae sɛ nnepa a ɛrebɛba no ho sɔfo panyin, nam ntamadan a ɛso na ɛyɛ pɛ kyɛn so a wɔamfa nsa ansi, ɛne sɛ, emfi adebɔ yi mu mu, nanso ɛnyɛ mpapo ne anantwi mma mogya, na n’ankasa ne mogya so na ɔnam kɔɔ kronkron mu [nea na ɛte sɛ ntamadan no mu kronkron mu Kronkronbea no] prɛko konyaa daa ogye. Na sɛ anantwinini ne mpapo mogya ne anantwibere nso a wɔde dwira wɔn a wɔn ho agu fi, tew wɔn ho kɔɔ honam ahofi mu a: mpɛn ahe ara na Kristo a ɔnam daa honhom so de ne ho bɔɔ afɔre a ɛho nni dɛm maa Onyankopɔn no mogya rentew mo ahonim ho mfi nnwuma funu mu nkɔsom Onyankopɔn a ɔte ase?”

33, 34. (a) Ɛdenam asu a ɔbɔe wɔ Yordan Asubɔnten no mu so no, dɛn na Yesu yɛɛ ho sɛnkyerɛnne? (b) Dɛn na na Onyankopɔn asiesie ama onipa Yesu, na dɛn nti na ɔde bɔɔ afɔre, na ɔyɛɛ no mpɛn ahe?

³³ Enti, bere a onipa a ɔyɛ pɛ, Yesu, bɛyɛɛ Onyankopɔn Sɔfo Panyin a wɔasra no wɔ ne nsu mu asubɔ no akyi no, dɛn na na ɛsɛ sɛ ɔde bɔ afɔre ma Onyankopɔn? Na ɛnyɛ aboa a ɔba fam sen ɔdesani no mogya a na entumi mpopa onipa bɔne mfi hɔ da no, na mmom n’ankasa ne nipadua a ɛyɛ pɛ, a ɔnam ɔbaabun Maria awo so nyae no. Ohui sɛ na Ade Nyinaa so Tumfoɔ Nyankopɔn asiesie no ma wafata ama afɔrebɔ adwuma yi. Enti, bere a ɔbaa Osuboni Yohane nkyɛn ma wabɔ no asu wɔ Yordan Asubɔnten no mu no, ɔde ne ho bɛmaa Onyankopɔn sɛ efi hɔ rekɔ no ɔbɛyɛ ɔsoro apɛde no. Ne nsu mu asubɔ no yɛɛ ne ho a na ɔde rema sɛ ɔbɛyɛ Onyankopɔn apɛde akodu afɔrebɔ wu mpo mu ho sɛnkyerɛnne. Ɛdefa eyi ho no, Hebrifo 10:4-10 ka sɛ:

³⁴ “Anantwinini ne mpapo mogya ntumi nyi bɔne. Enti, ɔba wiase no, ɔka sɛ: ‘Afɔre ne ayɛyɛde, woampɛ, ɔhonam na woasiesie de ama me. Ɛno na mekae sɛ: Hwɛ, mereba (wɔakyerɛw me ho asɛm wɔ nhoma mmobɔwee no mu) sɛ merebɛyɛ nea wo, Nyankopɔn, wopɛ.’ Kan no ɔka sɛ: ‘Afɔre ne ayɛyɛde ne ɔhyew afɔre ne bɔne ho afɔrebɔ, woampɛ, nanso ansɔ wo ani,’ ɛne nea wɔnam mmara so de ma; ɛno na ɔka sɛ: ‘Hwɛ, mereba sɛ merebɛyɛ nea wo, Nyankopɔn, wopɛ;’ oyi nea edi kan, na ɔde nea ɛto so abien no asi hɔ. Saa ɔpɛ no so na wɔnam Yesu Kristo honam a ɔde bɛmae no so atew yɛn ho prɛko.”

35. (a) Wɔ Mpata Da no ankasa so no, dɛn na wɔde dii dwuma wɔ afɔremuka no so, na dɛn na wɔde mae wɔ hɔ? (b) Na dɛn ne sɛnkyerɛnne kwan so “afɔremuka” a Yesu de ne ho bɛma wɔ so no?

³⁵ Wɔ tete mpata da no so no, ɔsɔfo panyin Aaron de mmoa a wɔakum wɔn no mogya no bi pẽtee afɔremuka no so na afei nso ɔhyew mmoa a wɔakum wɔn no srade wɔ afɔremuka a na ɛwɔ adiwo hɔ wɔ ahyiae ntamadan kronkron no anim no so. (Lev. 16:16-19, 25) Ɛnde, na dɛn ne sɛnkyerɛnne kwan so “afɔremuka” a Yesu Kristo, sɛ́ honhom mu ɔsɔfo panyin no, bɔɔ ɔdesani afɔre a ɛyɛ pɛ no wɔ so no? Ná ɛnyɛ honam fam afɔremuka te sɛ kɔbere afɔremuka a na ɛwɔ ahyiae ntamadan no adiwo hɔ no. Na ɛnyɛ asɛndua a ɔsɛn so wɔ Kalvary kosi sɛ owui no, efisɛ na saa dua no yɛ ade a wɔadome no, na na wɔmfaa ne mogya a ɛsom bo no ntew ho. (Deut. 21:22, 23; Gal. 3:13) Mmom no, na ɛyɛ honhom mu ade a na Yesu Kristo betumi de ne desani nipadua a ɛte ase a ɛyɛ pɛ no bo a ɛsom no ama wɔ so. Na ɛyɛ Onyankopɔn “pɛ.” “Apɛde” a ɔbɛyɛ yi nti na ɔde ne ho bɛmae. Afei de na ɛyɛ Onyankopɔn pɛ sɛ obegye ɔdesani afɔre mmom asen mmoa a wokum wɔn afɔre. Enti, ɛdenam Onyankopɔn “pɛ” yi so no, Yesu de ne desani nkwa no bo a ɛsom mae.

36. Hefo na wɔama wɔn kwan sɛ wonnidi honhom mu “afɔremuka” no so, na dɛn na ebefi mu aba ama wɔn ankasa?

³⁶ Enti sɛnkyerɛnne kwan so “afɔremuka” no bae, nea Hebrifo 13:10 ka ho asɛm kyerɛ Kristofo a wɔasra wɔn no: “Yɛwɔ afɔremuka a wɔn a wɔsom ntamadan no mu no nni ho kwan sɛ wodi ho biribi.” Enti, hwɛ ɔhonam fam adwene a ɛyɛ ne ade a ennyina Kyerɛwnsɛm so ma Kristoman mu asɔfo bi sɛ wobesi honam fam “afɔremuka” wɔ wɔn asɔredan ahorow anaasɛ beae foforo a wɔsom wɔ hɔ na wɔaka sɛ wɔbɔ Kristo afɔre wɔ so mpɛn pii, sɛnea wɔyɛ bere a wɔbɔ “Mass” no! Wɔn a wɔwɔ hokwan sɛ wodidi nokware honhom mu “afɔremuka” no so no, ‘wɔnam Yesu Kristo honam a ɔde bɛmae no so atew wɔn ho prɛko.’

37. (a) Nea ɛka honhom fam “afɔremuka” no ho no, dɛn na ɛbae, sɛnea tete ntamadan no yɛɛ ho mfonini no? (b) Wɔ Yesu fam no, dɛn na adiwo no yɛɛ ho mfonini?

³⁷ Sɛnea na tete kɔbere afɔremuka no si adiwo no mfinimfini wɔ ahyiae ntamadan kronkron no anim no, saa nso na wohuu sɛnkyerɛnne kwan so “afɔremuka” no wɔ sɛnkyerɛnne kwan so “adiwo” hɔ. Eyi nnyina hɔ mma kurow anaa beae bi, na mmom egyina hɔ ma onipa tebea wɔ asase so. Na Yesu Kristo, Ɔsɔfo Panyin a wɔasra no no, wɔ saa sɛnkyerɛnne kwan so adiwo hɔ efisɛ, ná ɔwɔ onipa tebea mu sɛ abɔde a ɔyɛ pɛ. Enti na tebea ankasa a ɔwɔ mu wɔ asase so no yɛ trenee, nea bɔne nni ho, nea nkekae nni mu. Te sɛ Lewini Kora mmabarima no, onyaa atrae maa n’ankasa ho wɔ afɔremuka no ho na wayɛ Yehowa apɛde wɔ Yehowa Nyankopɔn nokware “trabea” a ɛwɔ adiwo hɔ no. (Dw. 84:1-3) N’ani gyee ho sɛ ɔbɛyɛ Onyankopɔn apɛde.​—Dw. 40:8.

38, 39. (a) Dɛn bio na ɛkaa sɛnkyerɛnne kwan so adiwo no ne afɔremuka no ho bae? (b) Asemmisa bɛn na eyi ma ɛsɔre, na Yesu asɛm bɛn na ɛkyerɛ faako a Onyankopɔn wɔ?

³⁸ Ɛnyɛ sɛnkyerɛnne kwan so afɔremuka ne adiwo no nko na ɛbae ma abɛyɛ atrae ama Ɔsɔfo Panyin Yesu a wɔasra no no, na mmom sɛnkyerɛnne kwan so ntamadan anaasɛ asɔredan no nso bae. Efi hɔ rekɔ no, na ‘nokware ntamadan a Yehowa pamee’ no yɛ nhyehyɛe ma honhom mu Ɔsɔfo Panyin foforo no.

³⁹ Dɛn ne saa “nokware ntamadan” anaasɛ asɔredan no? So ɛyɛ ɔdan titiriw foforo bi a Ɔbɔadeɛ no asi ama n’ankasa ho wɔ ɔsoro a aniwa nhu hɔ no? Dabi, efisɛ Onyankopɔn nhia ade a ɛte saa. Ɔsorosoroni Nyankopɔn no wɔ baabi a ɔte daa wɔ ɔsoro. Ɔnyɛ honhom abɔde bi ara kwa a ɔwɔ baabiara wɔ bere biara mu. Sɛ́ ɔyɛ Onipa a onim nyansa no, ɔwɔ n’atrae, baabi a ɔte a wobetumi abɛn no. Yesu Kristo kyerɛɛ n’asuafo sɛ wɔmmɔ mpae sɛ: “Yɛn Agya a wowɔ soro, wo din ho ntew.” Ɔbɔɔ yɛn kɔkɔ wɔ “nkumaa” a wogye no di no mu biako a yebebu wɔn abomfiaa no ho na ɔkyerɛkyerɛɛ nea enti no mu sɛ: “Na mise mo sɛ ɔsoro no, wɔn abɔfo hwɛ m’agya a ɔwɔ soro no anim daa.” (Mat. 6:9; 18:10) Ɛno kyerɛ sɛ, saa ɔsoro abɔfo no tumi bɛn ɔsoro Agya no.

40. Ɛdefa ne soro atrae ho no, dɛn na na Onyankopɔn betumi ayɛ na wɔatumi de atoto “ntamadan” kronkron no Kronkron mu Kronkronbea no ho?

⁴⁰ Nanso, Ade Nyinaa so Tumfoɔ Nyankopɔn no betumi asakra nhyehyɛe a ɛwɔ baabi pɔtee a ɔte no. Enti bere a ɔwoo ne honhom mu Ɔsɔfo Panyin, Yesu Kristo, bere a wɔbɔɔ no asu ara pɛ no, ná Onyankopɔn betumi ama ne soro atrae no aba tebea foforo mu anaasɛ anya nhyehyɛe ahorow foforo, esiane adesamma a wɔwɔ bɔne mu nti (na ɛnyɛ abɔfo a bɔne nni wɔn ho no nti) . Kronkron a ne soro atrae no yɛ boroo adesamma bɔne so. N’ankasa n’atrae no bɛdaa adi sɛ Onyankopɔn a ɔyɛ trenee nanso ɔyɛ mmɔborohunufo ma enti obegye afɔre a ɛfata na ɛyɛ pɛ a wɔbɔ ma adesamma no atom no atrae a ɛyɛ kronkron. Nanso na ɔsɔfo Panyin a bɔne nni ne ho a ɔyɛ kronkron na ɔwɔ Onyankopɔn anim dom na ɛsɛ sɛ ɔde afɔre yi ne ɛbo a ɛsom no ma. Enti ne soro ahengua no bɛyɛ bɔne ho mpata agua. Saa kwan yi so no, Onyankopɔn maa ne soro atrae no faa Kronkron mu Kronkronbea a na ɛwɔ ntamadan anaasɛ asɔredan no mu no honhom fam su horow no.

41, 42. (a) Dɛn na wɔmaa Aaron kwan sɛ obetumi ahyɛn mu ‘pɛnkorɔ wɔ afe mu,’ na ɔkwan bɛn so? (b) Dɛn ne Kronkron mu Kronkronbea a Yesu Kristo hyɛn mu no, wɔ bere bɛn mu, na mpɛn ahe?

⁴¹ Eyi ne nea Bible no ka. Yɛkae sɛ ɔsɔfo panyin Aaron faa mpata da afɔrebɔde ahorow no mogya no kɔɔ Kronkron mu Kronkronbea a na ɛwɔ asase so ahyiae ntamadan no mu no mu, na ɔkɔɔ mmɔhɔɔ no akyi na wakɔyɛ saa. (Lev. 16:12-17; Heb. 9:7) Sɛnea ɛbɛyɛ na wama ne nsusuwso no abam ankasa no, na ɛsɛ sɛ Ɔsɔfo Panyin, Yesu Kristo, hyɛn Kronkron mu Kronkronbea hɔ. Ɛhe na Bible no kyerɛ sɛ ɛwɔ, na ɛyɛ dɛn?

⁴² Tie: “Ɛnde na etwa sɛ wɔde eyinom tew ɔsoro nneɛma no nhwɛso ho; na ɔsoro nneɛma no ankasa, wɔde afɔre a eye kyɛn eyinom na ɛtew ho. Na Kristo anhyɛn kronkronbea a wɔde nsa yɛe a ɛyɛ nokware [kronkronbea] no ho sɛnkyerɛnne no mu, na mmom ɔhyɛn ɔsoro ankasa, sɛ afei okoyi ne ho adi Onyankopɔn anim ama yɛn; nanso wanhyɛn hɔ sɛ ɔde ne ho bɛbɔ afɔre mpɛn pii, sɛnea ɔsɔfo panyin de obi mogya hyɛn kronkronbea daa afirihyia no; anka ɛsɛ no [Yesu] sɛ ɔtaa hu amane fi wiase asefi, na afei a wiase mmere [ankasa] rewie du yi wayi ne ho adi prɛko sɛ ɔnam ne ho afɔrebɔ so beyi bɔne.”​—Heb. 9:23-26.

43, 44. (a) Ɛnde ɛdefa n’asɔredan ho no, dɛn ne Onyankopɔn atrae kronkron no? (b) Dɛn na etwaa Kronkronbea no ne Kronkron mu Kronkronbea no ntam, na ɔkwan bɛn so na Yesu faa eyi mu wɔ sɛnkyerɛnne kwan so de no mu?

⁴³ Sɛ anka ɔbɛma sɛnkyerɛnne kwan so Mpata Da no aba awiei denam hyɛn a ɔbɛhyɛn “kronkronbea” ankasa mu wɔ ntamadan anaasɛ asɔredan mu so no, Ɔsɔfo Panyin Yesu Kristo hyɛn “ɔsoro ankasa” faako a “Onyankopɔn ankasa wɔ.” Baabi a Onyankopɔn ankasa te wɔ ɔsoro yi yɛ nokware Kronkron mu Kronkronbea, Nea ɛyɛ Kronkron sen biara.

⁴⁴ Wɔ asase so ntamadan no ankasa mu no, wɔde mmɔhɔɔ kataa Kronkron mu Kronkronbea no anim, na enti na Kronkron mu Kronkronbea no wɔ mmɔhɔɔ no mu. Enti saa mmɔhɔɔ no gyinaa hɔ maa ɔdesani honam ‘a ɛsɛ sɛ wofi mu na ama obi atwam afi ɔdesani asetra wɔ asase so no mu akɔ honhom mu asetra mu no. Ɛdenam ne wu ne ne wusɔre so no, Yesu Kristo twaam sɛnea ɛbɛyɛ na wakɔhyɛn ɔsoro Kronkron mu Kronkronbea hɔ. Eyi na wɔkyerɛ wɔ Hebrifo 6:19, 20, faako a, bere a wɔaka 144,000 akyidifo anokwafo no anidaso ho asɛm akyi no, ɛka sɛ: “Ɛno na yɛwɔ sɛ yɛn kra sɛkyɛ a ɛntew na etim hɔ a ɛhyɛn mu de kosi mmɔhɔɔ no mu, nea dikanfo bi hyɛn hɔ maa yɛn no, ɔne Yesu a wayɛ Melkisedek akwan so daa sɔfo panyin.” Anidaso a wɔato no sɛkyɛ a ɛwɔ “mmɔhɔɔ no mu” no yɛ ɔsoro de.

ONYANKOPƆN HONHOM MU ASƆREDAN “KRONKRONBEA NO”

45. (a) Dɛn bio na na ɛwɔ “ntamadan” no mu ka Kronkron mu Kronkronbea no ho? (b) Henanom na na wɔkɔ Kronkronbea hɔ, mpɛn ahe na ɔkwan bɛn so?

⁴⁵ Mommma yemmmu yɛn ani ngu nokwasɛm a ɛyɛ sɛ na ɛnyɛ nea ɛwɔ asase so ntamadan anaasɛ asɔredan no mu nyinaa ne Kronkron mu Kronkronbea no so. Ne Kronkron mu Kronkronbea no akyi no, na ntamadan anaasɛ asɔredan no wɔ ɔdan a wosi mu kan wɔ mmɔhɔɔ a etwa mu no anim. Na wɔfrɛ saa pia yi Kronkronbea. (Heb. 9:1-3) Esiane sɛ Kronkron mu Kronkronbea no yɛɛ “ɔsoro ankasa,” faako a “Onyankopɔn ankasa” wɔ no ho mfonini nti, dɛn na Kronkronbea a ɛwɔ mmɔhɔɔ anaasɛ nkataanim no anim no gyinaa hɔ mae? Bere a na ɔsɔfo panyin no nkutoo na otumi kɔ Kronkron mu Kronkronbea hɔ “daa afirihyia” wɔ mpata da no so no, ná wotumi kɔ Kronkronbea hɔ daa, na ɛnyɛ ɔsɔfo panyin no nko, na mmom asɔfo nkumaa no nyinaa nso. Na asɔfo no fa adiwo hɔ, faako a na afɔremuka no wɔ hɔ tẽe kɔ Kronkronbea hɔ; nanso na ɛsɛ sɛ wɔfa nkataanim a etwa Kronkronbea ne adiwo no ntam no mu.

46, 47. (a) Bere bɛn na Yesu hyɛn nsɛso kwan so Kronkronbea hɔ, na ɔkwan bɛn so? (b) Enti dɛn na Kronkronbea no gyina hɔ ma, na hokwan ahorow bɛn na nsɛso kwan so asɔfo no nya wɔ mu?

⁴⁶ Enti Kronkronbea no gyinaa hɔ maa tebea a ɛyɛ kronkron kyɛn adiwo no. Sɛnea wɔde biribi twaa Kronkronbea no anim na wɔn a wɔwɔ adiwo hɔ no nhu nneɛma a ɛwɔ hɔ nti, Kronkronbea no yɛɛ honhom mu tebea bi a ɛkorɔn sen nea adiwo a ɛyɛɛ ɔdesani tebea a ɛwɔ trenee gyinabea wɔ Onyankopɔn anim ho mfonini no ho mfonini. Yesu Kristo hyɛnee tebea a Kronkronbea no yɛɛ ho mfonini no mu bere a wɔnam Onyankopɔn honhom kronkron so woo no n’asubɔ akyi, na enti ɔbɛyɛɛ Onyankopɔn honhom mu Ba no. (Mat. 3:13-17) Ɛdenam Onyankopɔn honhom a wɔde sraa no nso so no, sɛ́ Onyankopɔn honhom mu Ba no, wɔde asɔfo dwumadi hyɛɛ Yesu nsa; ɔbɛyɛɛ Onyankopɔn Sɔfo Panyin, sɛnea Ɔsɔfo Panyin Aaron yɛɛ ho mfonini no.

⁴⁷ Eyi nti, wobetumi ahu sɛ, Kronkronbea no gyinaa hɔ maa wɔn a wɔde wɔn aba honhom mu asɔfodi yi mu no honhom fam tebea. Wɔ saa tebea no mu no, honhom mu asɔfo a wɔwɔ asase so yi hu honhom fam hann te sɛ nea sika kaneadua no de ma, wodi honhom fam aduan te sɛ nea efi sika pon a kyerɛ abodoo gu so no so, na wɔde mpaebɔ ne ɔsom a wɔde ma Onyankopɔn ho aduhuam ma te sɛ nea wogyina sika aduhuam afɔremuka bi anim no.​—Ex. 40:4, 5, 22-28.

48. Bere tenten bɛn na na Yesu wɔ tebea a Kronkronbea no yɛɛ ho mfonini no mu, na dɛn nti na n’asuafo no annya ne ho ntease a emu da hɔ?

⁴⁸ Sɛ yebu akontaa fi n’asubɔ da so ne honhom kronkron a wɔde sraa no no so de besi ne wu da so (efi 29 Y.B. besi 33 Y.B.) a, na Yesu Kristo wɔ honhom mu asɔfodi awo tebea a Kronkronbea no yɛɛ ho mfonini no mu mfirihyia abiɛsa ne fã. Na nnipa a wɔwɔ honam mu ara kwa no rente ne nnwuma wɔ tebea yi mu no ase na wɔrennya ho anisɔ, mpo n’akyidifo anokwafo no, efisɛ wofi ɔdesani honam fam gyinabea mu hwɛɛ nneɛma. Ná Pentekoste Afahyɛ da no wɔ afe 33 Y.B. mu ne honhom kronkron a wohwie gui, no nnya nnui ɛ. (Yoh. 7:39) Biribi sii wɔn ntease kwan te sɛ “nkataanim a ɛsɛn trabea no kwan ano,” a ɛde nneɛma a na ɛwɔ Kronkronbea hɔ hintawee no.​—Ex. 40:28, 29.

49. Ɔkwan bɛn so na wosiw Yesu a na ɔwɔ sɛnkyerɛnne kwan so Kronkronbea hɔ no kwan wɔ ɔsoro Kronkron mu Kronkronbea hɔ a ɔbɛkɔ no ho?

⁴⁹ Wɔ Kronkronbea no tebea no mu, honhom mu asɔfodi no awo tebea mu no, wosiw Ɔsɔfo Panyin Yesu Kristo a na ɔwɔ asase so no kwan fii Onyankopɔn a na ɔbɛbɛn no tẽe no ho, esiane sɛ na ɔda so ara wɔ ɔhonam mu sɛ ɔdesani abɔde a ɔyɛ pɛ nti. Ná saa sɛnkyerɛnne kwan so “mmɔhɔɔ” a etwa ɔne ɔsoro Kronkron mu Kronkronbea ntam no wɔ hɔ, te sɛ bere a Mose “sii ntwamu mmɔhɔɔ no, na ɔde kataa adanse adaka no ano” no ara pɛ.​—Ex. 40:21.

50. (a) Bere bɛn na Yesu Kristo faa “mmɔhɔɔ” no mu, na ɔkwan bɛn so? (b) Ntam a ɛfa asɔfodi ho bɛn na efii ase dii dwuma wɔ Yesu ho saa bere no, na dɛn ntia?

⁵⁰ Sɛ ɔsɔfo Panyin no, Yesu Kristo twaam wɔ sɛnkyerɛnne kwan so “nokware ntamadan” no mmɔhɔɔ no ho Nisan 16 afe 33 Y.B. mu, denam awufo mu a wɔma ɔsɔre fii so, a ɔnyɛ nea wɔde honhom awo no na onni honam mu bio ara kwa, na mmom sɛ nea afei de wɔawo no koraa sɛ Onyankopɔn honhom mu Ba wɔ honhom mu asetra mu. Ɔsomafo Petro ka no pefee bere a ɔkyerɛw sɛ: “Efisɛ Kristo nso huu bɔne ho amane prɛko, nea ɔteɛ hu maa wɔn a wɔnteɛ, sɛ ɔde yɛn bɛkɔ Onyankopɔn nkyɛn; wokum no honam mu, na wɔma ɔtraa ase honhom mu.” (1 Pet. 3:18) Saa da no so no, Onyankopɔn ntam a ɛfa daa asɔfodi wɔ “Melkisedek akwan so” no dii dwuma wɔ Yesu Kristo ho, afei a ná wɔde ‘nkwa a owu nnim ahoɔden’ akatua ama no no. (Heb. 7:16, 24; Aso. 13:33-37; Rom. 1:1-4) Ɔmaa n’asuafo anokwafo no huu no denam ɔkwan titiriw a ɔfaa so yii ne ho adi kyerɛe wɔ adaduanan a edi hɔ no so akyi no, otu kɔɔ soro na ɔde ɛbo a ne desani afɔre a ɛyɛ pɛ no som no kɔmaa Onyankopɔn ankasa wɔ nokware Kronkron mu Kronkronbea hɔ.​—Aso. 1:1-11; Heb. 9:24.

51. (a) Bere bɛn na sɛnkyerɛnne kwan so Mpata Da no baa awiei, na na atra hɔ bere tenten ahe? (b) Ɔkwan bɛn so na wɔma ɛdaa adi sɛ wɔagye ɛbo a Yesu afɔre no som atom wɔ Kronkron mu Kronkronbea hɔ?

⁵¹ Ɛdenam ma a wɔde saa Kristo afɔre no bo a ɛsom kɔmae wɔ ɔsoro Kronkron mu Kronkronbea no so no, sɛnkyerɛnne kwan so Mpata Da kɛse no baa awiei. Wɔ ɔsɔfo Panyin Aaron a na ofi Lewi abusua mu no fam no, na ɔman no mpata da no yɛ da a ne tenten yɛ nnɔnhwerew aduonu anan pɛ. Nanso, wɔ Ɔsɔfo Panyin Yesu Kristo fam de, sɛnkyerɛnne kwan so Mpata Da bere no bɛyɛɛ mfirihyia abiɛsa ne asram awotwe. Yesu foro kɔɔ soro dadu akyi no, wɔdaa no adi kyerɛɛ n’asuafo anokwafo a na wɔwɔ asase so no sɛ Onyankopɔn agye ɛbo a ne desani afɔre a ɛyɛ pɛ no som a ɔde akɔma wɔ ɔsoro Kronkron mu Kronkronbea hɔ no atom. Ɔkwan bɛn so? Ɛdenam honhom kronkron no a wohwie guu wɔn so wɔ Yerusalem, Kwasida Sivan 6, Adapɛn Afahyɛ da anaasɛ Pentekoste da, wɔ afe 33 Y.B. mu no so. (Aso. 2:1-36) Eyi hyɛ biribi foforo a ɛfa “nokware ntamadan a Awurade ankasa pamee” no agyirae. Yebehu eyi afei.

HONHOM MU ASƆFO NKUMAA

52. (a) Ɔkwan bɛn so na wɔyɛɛ ho mfonini sɛ Melkisedek a Ɔso Kyɛn So no wɔ asɔfo nkumaa? (b) Bere bɛn na wɔde Aaron asɔfodi no sii hɔ, na “abɔnim kronkron” bɛn na wɔde bɔɔ Aaron ti?

⁵² Kyerɛwtohɔ biara nni hɔ sɛ na tete Salem ɔhene Sɔfo Melkisedek wɔ asɔfo nkumaa bi. Nanso, Onyankopɔn Ba a wabɛyɛ “Melkisedek akwan so sɔfo panyin” no wɔ asɔfo nkumaa. (Heb. 5:8-10) Wɔnam Lewini Aaron asɔfo abusua no so yɛɛ eyi ho mfonini. Yehowa Nyankopɔn frɛɛ Aaron ma ɔbɛyɛɛ Israel sɔfo panyin na ne mmabarima bɛyɛɛ asɔfo nkumaa maa no. Wɔ Nisan fefɛw bere da a edi kan wɔ afe 1512 A.Y.B. mu no, odiyifo Mose tiee Onyankopɔn ahyɛde na ɔde Aaron ne ne mmabarima sisii asɔfodi no so. (Ex. 40:1, 2, 12-16; 29:4-9; Lev. 8:1-13) Nea ɛka ɔsɔfo panyin no ntade ho nneɛma ho no, “wɔboroo sika amapa tratraa a ɛyɛ abɔnim kronkron no, na wɔkyerɛw so nkyerɛwee sɛ nsɔanode nkurukyerɛwee sɛ: Kronkron ma Yehowa.”​—Ex. 39:30.

53. (a) Enti ɔresiesie Ɔsɔfo Panyin Aaron abotiri no, Yehowa ahyɛde bɛn na Mose tiei? (b) Hebri adeyɛ asɛmfua bɛn na asɛm “kronkronyɛ ahyehyɛde” no fii mu?

⁵³ Enti, bere a ɔrehyɛ ne nua Aaron atade ma wadi sɔfo panyin no, Mose dii Yehowa ahyɛde so: “Na fa abotiten no bɔ ne ti, na fa kronkronyɛ ahyehyɛde no fam abotiten no anim, na fa ɔsra ngo hwie gu n’atifi fa sra no.” (Ex. 29:6, 7) Esiane sɛ na “abɔnim kronkron yi” ne sika “amapa tratraa” no nti, Hebri Kyerɛwnsɛm no nkyerɛasefo bebree pɛ sɛ wɔde asɛm “abotiri kronkron,” di dwuma. (Hwɛ Ex. 29:6, ase hɔ asɛm; Jerusalem Bible) Nokwarem no, Hebri asɛmfua a wɔde di dwuma daa ma “abotiri” ne “ahemmotiri” no yɛ soronko fi Hebri asɛmfua a wɔde di dwuma wɔ ha sɛ “abɔnim kronkron no” ho. Wɔ Leviticus 21:12 no, wɔde Hebri asɛmfua a edi akyiri yi di dwuma wɔ ɔsra ngo a wɔde gu ɔsɔfo Panyin no ti so ho, efisɛ yɛkan sɛ: “Ommfi kronkronbea hɔ, na onnhura ne Nyankopɔn kronkronbea ho, efisɛ ne Nyankopɔn sra ngo no dwira n’atifi.” Wonya Hebri asɛmfua no fi adeyɛ asɛmfua nazar mu, na wɔkyerɛ ase “ahosohyira” wɔ Hosea 9:10.​—An American Translation; NW.

54, 55. (a) Na wɔfrɛ ɔsɔfo panyin a wɔasra no no dɛn, na sra a wɔsraa no no yɛɛ dɛn ho sɛnkyerɛnne? (b) So Yohane Osuboni no de honhom kronkron sraa Yesu, anaasɛ hena na ɔyɛɛ saa?

⁵⁴ Akyinnye biara nni ho sɛ, na ɔsɔfo panyin Aaron ne n’adedifo no yɛ mmarima a wɔahyira wɔn ho so ama Yehowa Nyankopɔn denam wɔn asɔfodi no so. (Ex. 29:30, 35) Esiane sɛ wɔde ɔsra ngo kronkron sra no nti, na wɔfrɛ ɔsɔfo panyin no “nea wɔasra no” anaasɛ Mesia (Lev. 4:3, 5, 16; 6:22) , saa ara na na ɛte akyiri yi ma Israel ahemfo a wɔsraa wɔn no. (1 Sam. 24:6, 10; 26:9-11; Kwa. 4:20) Enti bere a wɔabobɔ Ɔsɔfo Panyin Aaron mmabarima baanan a wɔyɛ asɔfo nkumaa no din akyerɛ yɛn akyi no, yɛkan sɛ: “Eyinom ne Aaron mma, asɔfo a wɔsraa wɔn ngo a wɔde hyɛɛ wɔn nsa sɛ wonni asɔfo no.” (Num 3:1-3) Bere a Mose, Yehowa Nyankopɔn ne Israel man no ntamgyinafo no sraa ne nuapanyin Aaron ma wabɛyɛ ɔsɔfo panyin no, ná ɛkyerɛ biribi ankasa. Ɛyɛɛ mfonini sɛ ná Onyankopɔn de ne honhom kronkron no bɛsra ne Ba Yesu bere a ofi nsu no mu afi n’asubɔ akyi no.

⁵⁵ Na Osuboni Yohane yɛ Lewini sɔfo bi a wɔfrɛ no Sakaria a ofi Abia asɔfokuw no mu no babarima. Nanso, Yohane bɔɔ Yesu asu ara kwa wɔ Yordan Asubɔnten no mu; wansra Yesu ma wabɛyɛ honhom mu sɔfo panyin. (Luka 1:5-17; 3:21-23; Marko 1:9-11) Onyankopɔn nkutoo na na obetumi de honhom kronkron asra Yesu.

56, 57. (a) Dɛn na Yohane Osuboni no kae sɛ wɔbɛma Yesu tumi ma wayɛ? (b) Ansa na Yesu regyaw n’asuafo hɔ no, dɛn na ɔka kyerɛɛ wɔn wɔ honhom kronkron asu ho?

⁵⁶ Ɛdefa Yesu ho no, na Osuboni Yohane aka sɛ: “Nea ne ho yɛ den sen me di m’akyi reba, mensɛ sɛ mekoto mesan ne mpaboa hama. Me de, mebɔ mo asu nsu mu, na ɔno de, ɔbɛbɔ mo asu honhom kronkron mu.” Na Onyankopɔn aka nea ɔbɛba yi ho asɛm akyerɛ Yohane, efisɛ Yohane kae sɛ: “Na me de, anka minnim no, na nea ɔsomaa me nsu asubɔ no, ɔno ara see me sɛ: Nea wubehu sɛ honhom no besian abɛtra no so no, ɔno ne nea ɔbɔ asu honhom kronkron mu.” (Marko 1:7, 8; Yoh. 1:33) Enti ɛnyɛ sɛ wɔde honhom kronkron sraa Yesu ma wabɛyɛ honhom mu ɔsɔfo panyin nko, na mmom na wɔbɛma no tumi ma ɔde honhom kronkron abɔ afoforo asu. Nanso, bere bɛn na na ɔde honhom kronkron bɛbɔ asu? Ná ɔrenyɛ saa ansa na ne wu sɛ ɔdesani afɔre a ɛyɛ pɛ no aba.

⁵⁷ Wonyan no fii awufo mu akyi no, ɔsakraa ne ho wɔ honam nipadua ahorow mu, na oyii ne ho adi kyerɛɛ n’asuafo a na wɔda so wɔ Yerusalem no. Dɛn na ɔka kyerɛɛ wɔn wɔ honhom kronkron no ho saa bere no? Asomafosɛm 1:4, 5 ka kyerɛ yɛn: “Na ɔne wɔn hyiae no, ɔhyɛɛ wɔn sɛ wommfi Yerusalem nnkɔ, na mmom wɔantwɛn Agya no bɔhyɛ a ose: mote fii m’anom no, sɛ Yohane de, ɔde nsu na ɛbɔɔ asu, na mo de, nna yi mu ɛrenkyɛ na wɔbɛbɔ mo asu honhom kronkron mu.”​—Twi Bible Foforo.

58, 59. (a) Bere bɛn na asubɔ yi bae, na ɔkwan bɛn so na sɛnkyerɛnne kwan so no Yesu Kristo maa nea ɔsɔfo panyin no yɛe saa da no wɔ asɔrefi hɔ no nyaa mmamu? (b) Yoel nkɔmhyɛ bɛn na efii ase baa mu wɔ hɔ, na ɔkwan bɛn so na Petro kaa asɛm no faa Yesu ho?

⁵⁸ Eyi yɛɛ saa ne sorokɔ akyi dadu. Ɛyɛɛ saa wɔ Sivan 6 afe 33 Y.B. mu, Adapɛn Afahyɛ Da no (anaasɛ Pentekoste) , bere a Yudafo sɔfo panyin de abodoo a mmɔkaw wom maa Onyankopɔn sɛ awi afahyɛ aduankan wɔ Yerusalem asɔredan no mu no. (Lev. 23:15-21) Saa da yi ara no, wɔ sɛnkyerɛnne kwan so no, ɔsoro Sɔfo Panyin Yesu Kristo de Kristofo asafo no maa Yehowa Nyankopɔn sɛ Ne mmakan. (Adi. 14:4) Ɔyɛɛ eyi denam dwuma a odii sɛ nea wɔnam no so hwiee honhom kronkron guu n’asuafo a na wɔretwɛn wɔ Yerusalem no so no so. Na ɛyɛ Yoel 2:28, 29 nkɔmhyɛ no mmamu mfiase, na ɔsomafo Petro a na honhom ahyɛ no ma no kyerɛkyerɛɛ mu kyerɛɛ Yudafo mpempem bɛhwɛɛ-ade-fo no sɛ:

⁵⁹ “Yesu yi ara na Onyankopɔn anyan no, ɛho adansefo na yɛn nyinaa yɛ. Afei wɔmaa no so kɔɔ Onyankopɔn nifa na onyaa Agya nkyɛn honhom kronkron bɔhyɛ no nti na wahwie nea muhu na mote yi agu. Na Dawid ankɔ soro; na ɔno ara kae sɛ; Awurade see me wura sɛ Tra me nifa kosi sɛ mede wo atamfo mɛyɛ wo nan ase ntiaso. Enti ma Israel fi nyinaa nhu ampa sɛ: Onyankopɔn de Yesu no ara a mosɛn no no ayɛ Awurade ne Kristo.”​—Aso. 2:14-21, 32-36.

60. Enti, ɔkwan bɛn so na na wɔnam nea Mose yɛe wɔ Nisan 1, 1512 A.Y.B. no so ayɛ honhom kronkron a Yesu hwie gui no ho mfonini?

⁶⁰ Saa kwan yi so no, Yesu Kristo de honhom kronkron no bɔɔ n’asuafo anokwafo no asu. Na wɔayɛ eyi ho mfonini dedadedaw wɔ Nisan 1, 1512 A.Y.B. mu. Na eyi yɛ bere a Mose de Yehowa mmara mae na ɔde ɔsra ngo kronkron sraa Ɔsɔfo Panyin Aaron mmabarima no. Yɛkan wɔ eyi ho sɛ: “Na Yehowa ka kyerɛɛ Mose sɛ: Ɔsram a edi kan so da a edi kan no si ahyiae ntamadan no trabea no. Na fa Aaron ne ne mma no bɛn ahyiae ntamadan no ano, na fa nsu guare wɔn. Na fa kronkronyɛ ntade no hyɛ Aaron, na sra no ngo na yɛ no kronkron, na onni me sɔfo. Na fa ne mma nso bɛn, na hyehyɛ wɔn ntade no, na sra wɔn ngo sɛnea wosraa wɔn agya no, na wonni me sɔfo, na wɔn sra no nyɛ wɔn daa asɔfodi nkodu wɔn awo ntoatoaso so. Na Mose yɛɛ sɛnea Yehowa hyɛɛ no no nyinaa, saa ara na ɔyɛe.”​—Ex. 40:1, 2, 12-16.

61. Dɛn na ɛsɛ sɛ wɔka wɔ sɛ ebia wɔsraa asɔfo nkumaa baanan a wodi kan no adedifo, ne sɛ ebia wɔde ngo kronkron sraa ɔsɔfo panyin no adedifo mmiako mmiako anaa no ho?

⁶¹ Enti wɔsraa Aaron mmabarima baanan no sɛ Israel asɔfo nkumaa a wodi kan. Nanso, ɛno akyi no, wɔamfa ɔsra ngo kronkron ansra wɔn adedifo a wɔbɛyɛ asɔfo nkumaa no mmiako mmiako. Wobuu ntade ara kwa a wɔde hyɛɛ wɔn sɛ asɔfo nkumaa no sɛ ɛdɔɔso. Sra a wɔsraa asɔfo nkumaa baanan a wodi kan no gyinaa hɔ maa wɔn. Nanso, wɔsraa ɔsɔfo panyin Aaron ɔdedifo biara. (Num. 3:1-3; Ex. 29:29, 30; Num. 20:23-29; Deut. 10:6) Nanso, na ɛsɛ sɛ wobu Israel asɔfokuw no nyinaa sɛ kuw a wɔasra wɔn, sɛnea sra a wɔsraa wɔn a wodi kan no kyerɛ no.

62. Esiane sɛ wɔde no dii dwuma sraa n’asuafo a wɔwɔ asase so no nti, dɛn na Yesu Kristo ma wɔbɛyɛɛ wɔ n’akwankyerɛ ase, na ɔkwan bɛn so na Yohane foa eyi so wɔ Adiyisɛm no mu?

⁶² Wɔ sɛnkyerɛnne kwan so mmamu mu no, ɛdenam honhom kronkron a wɔde sra akyidifo anokwafo 144,000 no so no, Yesu Kristo a ɔwɔ soro no di dwuma sɛ Onyankopɔn Ananmusifo na ɔyɛ wɔn honhom mu asɔfo, n’asɔfo nkumaa a ɔyɛ wɔn Sɔfo Panyin. Ɛno nti na ɔsomafo Yohane tumi kyerɛw nea edi so yi wɔ Yesu Kristo ho sɛ: “Yesu Kristo a ɔyɛ dansefo nokwafo ne awufo mu abakan ne asase so ahene so difo . . . Nea ɔdɔ yɛn na ɔde ne mogya aguare yɛn afi bɔne mu, na wayɛ yɛn ahene ne asɔfo ama n’Agya Onyankopɔn no, ɔno na wɔmfa anuonyam ne tumi mma no daa daa! Amen.” Afei nso: “Wɔakum wo, na wode wo mogya atɔ yɛn ama Onyankopɔn, afi mmusua ne kasa ne nkurɔfo ne aman nyinaa mu, na woayɛ yɛn ahene ne asɔfo ama yɛn Nyankopɔn, na yebedi asase so ahene.”​—Adi. 1:5, 6; 5:9, 10.

63. Ɔkwan bɛn so na ɔsomafo Petro nam krataa so dii Yesu akyidifo a wɔasra wɔn no asɔfodi ho adanse?

⁶³ Nokwasɛm no ho ɔdansefo foforo a wɔde honhom kaa no wɔ hɔ​—ɔsomafo Petro. Ɔrekyerɛw mfe kakraa bi ansa na Romafo asɛe Yerusalem (70 Y.B. mu) ma Lewifo asɔfo a wɔwɔ hɔ no nnwuma abɔ wɔn no, Petro ka kyerɛɛ Kristofo a wɔde honhom asra wɔn a wɔwɔ ɔsoro anidaso no sɛ: “Wɔn na wohintiw, efisɛ wontie asɛm no. Na mo de, moyɛ abusua a wɔapaw wɔn, ahene asɔfokuw, ɔman kronkron, ɔman a wafa wɔn ayɛ ne de, sɛ monka nea ɔfrɛɛ mo fii esum mu baa ne hann a ɛyɛ nwonwa mu no mmaninyɛ nkyerɛ.”​—1 Pet. 2:8, 9, Twi Bible Foforo.

23. Nokwasɛm a ɛyɛ sɛ wɔde Kristo asafo no mufo toto “mmabun” ho no ma ɛbɛyɛ wɔn asɛyɛde sɛ wɔyɛ dɛn?

²³ Ɛnyɛ asiwa a wɔasi Kristo ayeforo a ɛyɛ n’asafo no mufo ama ayeforokunu a ɔno nso yɛ ɔbabun no nko nti na wɔde wɔn toto “mmabun” ho. Wɔyɛ “mmabun” ɔkwan foforo so honhom mu. Sɛnea ɔbabun yɛ kronn, ne ho tew, na obiara mfaa nsa nkaa no no, saa ara na ɛsɛ sɛ Kristofo asafo no mufo anokwafo yi yɛ kronn na wɔn ho tew denam wɔn ho a wɔtwe fi wiase no ho, a wɔne wiase yi nyamesom ne amammui nhyehyɛe horow nni hwee yɛ, no so. Wɔmmfa wɔn ho nhyɛ Asɔre ne Ɔman nkabom biara mu. Wokura wɔn honhom mu mmabunyɛ mu denam wɔn ho a wɔmfa nhyehyɛ wiase nsɛm mu no so. (2 Tim. 2:3, 4) Saa na na ɛkyerɛ bere a wɔkae wɔ 144,000 a wohu wɔn sɛ wɔne Onyankopɔn Guammaa no gyina honhom mu Bepɔw Sion so no ho sɛ: “Eyinom ne wɔn a wɔamfa mmaa angu wɔn ho fĩ [te sɛ nyamesom mu aguaman, Babilon Kɛse no ne ne mmabea no]; na wɔyɛ mmabun. Wɔn na wodi oguammaa no akyi baabiara a ɔkɔ.”​—Adi. 14:4; 17:3-5.

Ɔfã 11: Onyankopɔn Mfirihyia Apem Ahenni Abɛn

31, 32. (a) Ɛbɛ no atirimpɔw ne sɛ ɛbɛkyerɛ dɛn wɔ sɛnkyerɛnne kwan so “mmabun” no ho? (b) Su a ɛfa ɔtwɛn ho bɛn na ɛsɛ sɛ wokura mu, sɛnea wɔnam Paulo so daa no adi wɔ Filipifo 3:20, 21 no?

³¹ Na ngo no yɛ ade a ɛma kanea dɛw. Sɛ enni hɔ a ntama a ɛda kanea no mu rentumi nkɔ so nnɛw. Dɛn na kanea a wɔasɔ a wokura kɔɔ ayeforohyia no ase no yɛɛ ho sɛnkyerɛnne? Bere a yɛrema asemmisa yi ho mmuae no, ɛsɛ sɛ yɛkae nea enti a Yesu buu saa bɛ no. Atirimpɔw no ne sɛ ɛbɛkyerɛ sɛ ɛsɛ sɛ wɔn a wɔpɛ sɛ wonya kwan kɔ ɔsoro ayeforohyia no ase no nya agyiraehyɛde bi, su bi na ɛsɛ sɛ wokura eyi mu kosi awiei, ɛmfa ho sɛ bere bɛn na ayeforohyia dwumadi no fi ase, na wɔkɔ so kosi sɛ awiei koraa no wodu. Ayeforokunu no fi a ɔde “n’ayeforo” no kɔ mu no mu. Ade biako ne sɛ, bere a “ɔsoro ahenni” kuw no wɔ asase so wɔ wiase a aduru sum yi mu no, ɛsɛ sɛ wɔkɔ so yɛ “mmabun” wɔ honhom mu. Wɔn anidaso wɔ ɔsoro ayeforokunu no mu, na saa adeyɛ yi mma wongu wɔn ho fi wɔ wiase a ɛho ntew no mu. Ɛsɛ sɛ “wodi oguammaa no akyi baabiara a ɔkɔ.” (Adi. 14:4) Ɛsɛ sɛ wɔyɛ sɛ ɔsomafo Paulo a ɔkae sɛ:

³² “Na yɛn de, yɛn man a yebu no wɔ ɔsoro, efi hɔnom nso na yɛtwɛn agyenkwa a ɔyɛ Awurade Yesu Kristo a ɔbɛsakra yɛn ahobrɛase nipadua ama asɛ n’anuonyam nipadua, sɛnea n’ahoɔden adwuma a ɔde betumi abrɛ nneɛma nyinaa ase nhyɛ n’ase no te no.”​—Fil. 3:20, 21.

33. (a) Bere tenten bɛn na ɛsɛ sɛ wɔkɔ so kura wɔn honhom mu mmabunyɛ no mu, na wɔde akyerɛ sɛ wɔfata ma dɛn? (b) Ɔkwan bɛn so na Yesu kaa wɔn ade a wɔbɛyɛ ma ɛne tebea a wagye atom no ahyia no ho asɛm?

³³ Enti kura a wokura wɔn honhom mu “mmabunyɛ” mu no yɛ ɔpɛ a wɔwɔ ne gyinae a wɔasi sɛ wɔbɛkyerɛ sɛ wɔfata sɛ ɔsoro Ayeforokunu no gye wɔn sɛ “n’ayeforo” no. Ɛsɛ sɛ wɔn da biara da asetra kyerɛ eyi wɔ adesamma wiase a aduru sum yi mu. Wɔ ne Bepɔw so Asɛnka wɔ afe 31 Y.B. mu no mu no, Yesu Kristo, Ayeforokunu no ka kyerɛɛ n’asuafo no sɛ: “Mone wiase kanea. Kurow a ɛda bepɔw so ntumi nhintaw, nanso wɔnsɔ kanea mfa nsi ɔkorow ase na wɔde si kaneadua so, na ɛhyerɛn ma wɔn a wɔwɔ ɔdan no mu nyinaa. Saa ara na momma mo kanea nhyerɛn nnipa anim, na wonhu mo nneyɛe pa, na wɔnhyɛ mo agya a ɔwɔ soro no anuonyam.”​—Mat. 5:14-16.

34. Sɛnea Paulo nsɛm a ɛwɔ Filipifo 2:14-16 kyerɛ no, ɔkwan bɛn so na ná ɛsɛ sɛ Kristofo no hyerɛn?

³⁴ Ɔsomafo Paulo nso ka kyerɛɛ mfɛfo Kristofo sɛ: “Monkwati huhuhuhu ne nkyinnye nyɛ ade nyinaa, na moayɛ nnipa a wonnunu wɔn na wɔyɛ kronn Onyankopɔn mma a wonni dɛm, nnɛ mma abusua a wɔakontɔn na wɔakyea a mohyerɛn wɔn mu sɛ akanea ewiase mu, sɛ mukura nkwa asɛm, na Kristo da no mahoahoa me ho sɛ m’ammirika a mitui anyɛ ohunu, na me brɛ adwuma a meyɛe nso anyɛ ɔkwa.”​—Fil. 2:14-16.

35. Enti afei, dɛn na kanea a wɔasɔ a mmabun no kura no yɛ ho mfonini, na wɔde eyi rehwɛ dɛn kwan?

³⁵ Sɛnea ɛbɛma “ɔsoro ahenni” kuw no ahyerɛn sɛ “wiase kanea” no, ɛsɛ sɛ wɔyɛ “nnwuma pa” a ɛhyɛ ɔsoro Agya no anuonyam; ɛsɛ sɛ wɔyɛ nneɛma nyinaa a huhuhuhu ne nkyinnyegye nni mu, wɔyɛ wɔn a wonnunu wɔn, wɔyɛ kronn sɛnea ɛte Kristofo asetra mu, wɔda wɔn ho adi sɛ wonni dɛm sɛ Onyankopɔn mma. Ɛsɛ sɛ wɔyɛ eyi a wɔhwɛ kwan sɛ Ayeforokunu no bɛba ɔbɛfa wɔn akɔ ne soro Agya no fi. Eyinom a wɔyɛ no na wɔyɛ ho mfonini sɛ “mmabun” a wokura wɔn akanea a wɔasɔ na wɔama so no. Ɛyɛ biribi a ɛbɛma Ayeforokunu no ani agye, wɔ wiase a ɛwɔ anadwo sum mu no mu.

SƐNKYERƐNNE KWAN SO NGO NE NGO NTOAA NO

36. Dɛn na “ngo” sɛ kanea no mu nsu, no yɛ ho mfonini?

³⁶ Afei, dɛn na kanea no mu nsu a ɛne ngo no yɛ ho mfonini? Egyina hɔ ma nea ɛma “ɔsoro ahenni” kuw no kɔ so hyerɛn sɛ akanea wɔ wiase a aduru sum no mu no. Ne saa nti, ɛbɛyɛ “nkwa asɛm” no ho mfonini, a ɛsɛ sɛ “wokura mu den;” na wɔakyerɛw sɛ: “Me nan ase kanea ne wo asɛm, na ɛyɛ me kwan so hann.” (Dw. 119:105) “Wo nsɛm mu bue ma hann, ɛma nkwasea hu nyansa.” (Dw. 119:130) Sɛ ɛho mfonini no, nea ɛka “ngo” no ho ne Onyankopɔn honhom kronkron, adeyɛ tumi kronkron a aniwa ntumi nhu a Onyankopɔn de boa ma obi te Onyankopɔn Asɛm no ase no. (Yoh. 16:13) Afei, saa honhom kronkron no da ne ho adi nso wɔ Kristoni mu wɔ aba a ɔsow mu, wɔ honhom aba te sɛ ɔdɔ, anigye asomdwoe, abodwokyɛre, ayamye, papayɛ, gyidi, odwo ne anidahɔ mu. (Gal. 5:22, 23) Saa honhom mu “ngo” yi wɔ tumi a ɛde hyerɛn.

37. Dɛn na mmabun no wɔ a wɔwɔ ngo wɔ wɔn “nso ntoaa” mu no yɛ ho mfonini, na dɛn nti na ɛte saa?

³⁷ Wɔ ɛbɛ no mu no, ná ɛsɛ sɛ “mmabun” no nya ngo wɔ ngo ntoaa mu, a wobetumi ahwie bi agu akanea a wokura no mu. Wɔrentumi nyɛ wɔn ankasa nipadua “ngo ntoaa” denam nom a wɔbɛnom ngo no, na afei sɛ ehia wɔn a, wɔapuw agu akanea no mu ma akɔ so adɛw no so. Nanso, “ntoaa” a ngo wom no kyerɛ sɛ na wɔwɔ ngo wɔ wɔn nneɛma mu, a ɛnyɛ wɔ wɔn ankasa nipadua mu sɛ ntoaa mmom. Enti “ɔsoro ahenni” kuw no wɔ Onyankopɔn Asɛm ne ne honhom kronkron no a wɔde ama no, yiw, ɔwɔ wɔ n’ade mu. Sɛnea ɛfata no, afei, “ngo ntoaa” a wɔyɛɛ ho mfonini wɔ ɛbɛ no mu no gyina hɔ ma “mmabun” kuw no mufo no ara, sɛ́ wɔn a wɔwɔ sɛnkyerɛnne kwan so “ngo” no. Nokwarem no, wohia saa “ngo” yi bebree bere a wɔkɔ kohyia Ayeforokunu no na wɔka nnipa a wodi n’akyi no ho no.

38. Afei, dɛn ho nsɛnkyerɛnne na mmabun no akanea no yɛ, na ɔkwan bɛn so na ɛhyerɛn?

³⁸ Wɔ ɛbɛ no mu no, mmabaa du no de ngo akanea na edii dwuma na ama anadwo adeyɛ no ase ahyerɛn. Afei, dɛn na saa akanea no yɛ ho mfonini nnɛ wɔ ɛbɛ no mmamu mu? Ade koro no ara a ngo “ntoaa” no yɛ no, efisɛ tete akanea no wɔ nea wɔde kanea ngo gu mu a ɛte sɛ “ngo toaa” no ara. “Ɔsoro ahenni” kuw no mufo no ara ne sɛnkyerɛnne kwan so akanea no. Ɛnyɛ sɛ wɔnom ngo no na afei wopuw gu wɔn ho nyinaa na wɔde gya atom na ama wɔayɛ “gyatɛn a nkwa wom” a wɔato santen wɔ wɔn a wɔredi dwuma no kwan mu te sɛ mogya adansefo a wɔde wɔn ho abɔ afɔre de rehyɛ Ayeforokunu no anuonyam. Dabi, mmom Onyankopɔn Asɛm a ɛma hann ne ne honhom kronkron no ahyɛ wɔn ma, na eyi ma wɔhyerɛn wɔ honhom mu de di ɔsoro Ayeforokunu a wɔahyɛ no anuonyam no ni. Esiane wɔn honhom mu su horow nti, wɔn ankasa yɛ “akanea wɔ wiase no mu.” Esiane asetra a wɔwom wɔ Onyankopɔn Asɛm ne ne honhom no tumi ase nti, wɔhyerɛn de hyɛ No anuonyam.

39. (a) Dɛn nti na “mmabun” no anhu bere tenten a ɛsɛ sɛ wɔde twɛn ayeforokunu no? (b) Dɛn na mmabun a wɔyɛ mmadwemma no hui afei sɛ nyansa wom sɛ wɔyɛ?

³⁹ Esiane sɛ wɔamfa anadwo dɔnhwerew bi ansi hɔ amma ayeforokunu no a ɔde befi fie a wɔde n’ayeforo no maa no wɔ mu no mu na ɛno akyi wadi wɔn a wɔka ne ho no anim akɔ ɔno ankasa fie akɔtra hɔ nti, na mmabaa a wɔwɔ ɛbɛ no mu no nnim bere tenten pɔtee a ebia wɔde bɛtwɛn ayeforokunu no ba. Enti na wonnim bere tenten a ɛsɛ sɛ wɔma wɔn kanea no kɔ so dɛw kosi. Enti ɛbɛyɛ nea nyansa wom ma wɔn sɛ wɔde ngo begu wɔn akanea mu na wɔde bi agu ngo toaa mu nso. Mmabaa “mmadwemma” anaa anyansafo no huu eyi na ‘wɔfaa ngo guu wɔn ntoaa mu’ kaa wɔn akanea a wɔasɔ no ho, Mmabaa “nkwasea” a wonnim nyansa anaasɛ agyimifo no anyɛ saa, na nkwasea a wɔyɛ wɔ eyi fam no bɛdaa adi bere a bere kɔɔ so no.

40. (a) Wɔ bɛ no mmamu mu no, ɔkwan bɛn so na mmabaa “mmadwemma” kuw no fa ngo gu wɔn ngo ntoaa mu? (b) Ɔkwan bɛn so na eyi boa wɔn ma wɔkyerɛ sɛ wodi nokware wɔ asiwa a wasi wɔn ama Ayeforokunu no?

⁴⁰ Wɔ ɛbɛ no mmamu mu no, wɔn a wɔde mmabaa anum a wɔyɛ “mmadwemma” no yɛ wɔn ho mfonini no fa ngo gu ntoaa mu ka ho, sɛ yɛbɛka no saa a, denam Onyankopɔn Asɛm no a wosua, na ɛwɔ wɔn adwene ne wɔn koma mu, denam ankorankoro kokoam adesua so, Kristofo nhyiam horow ase a wɔkɔ a ɛhɔ na wosua na wɔbɔ Onyankopɔn Asɛm ho nkɔmmɔ ne ɛdenam saa Onyankopɔn Asɛm no a wɔde di dwuma denam afoforo a wɔne wɔn kyɛ no so. Wɔbɔ mpae srɛ Onyankopɔn honhom na wɔhwehwɛ sɛ ‘honhom no bɛkɔ so ahyɛ wɔn ma.’ (Efe. 5:18) Wɔ asiane biara a ɛbɛba daakye mu no, saa wɔn honhom mu “ngo” a ɛdɔɔso no bɛboa wɔn na ama wɔn boasetɔ tumi no ano ayɛ den bio na wɔakɔ so ahyerɛn sɛ “wiase kanea” de akyerɛ sɛ wɔakɔ so adi nokware wɔ asiwa a wɔasi wɔn ama ɔsoro Ayeforokunu no mu.

“NA AYEFOROKUNU NO KYƐE NO”

41. (a) Bere bɛn na edi kan a Amanamanmufo bɛyɛɛ “ababaa a efi nkaa no” kuw a wofii adi kohyiaa Ayeforokunu no mufo fã? (b) Esiane nea ɛtoo Yudafo no wɔ afe 70 Y.B, nti, so “mmabun” no hyiaa Ayeforokunu no saa bere no?

⁴¹ Ofupɛ bere mu wɔ afe 36 Y.B. mu no, wobuee kwan maa momonotofo a wɔnyɛ Yudafo, Amanaman mufo no ma wɔabɛyɛ Kristosom a ɛyɛ “nyamesom a ɛho tew na ɛho nni fi” Onyankopɔn anim no mufo. Saa Amanaman mufo a wɔagye adi yi nyaa Onyankopɔn honhom kronkron ne akyɛde ahorow no sɛnea Yudafo a wɔgye dii wɔ Pentekoste da afe 33 Y.B. mu nyae no. (Aso. 10:1 kosi 11:18; 15:7-19) Enti eyinom nso bɛyɛɛ “ababaa a efi nkaa no” kuw no fã a ‘wagye no aware’ ama Kristo. (2 Kor. 11:2) Wonyaa “mmabaa du” bɛ no mmamu mu kyɛfa fi saa bere no rekɔ, na sɛ yɛbɛka no wɔ kasa a wɔde buu bɛ no mu a, “wɔtasee wɔn akanea fii adi sɛ wokohyia ayeforokunu no.” Wɔ afe afe 70 Y.B. mu no, Roma asraafo bɛsɛee Yerusalem kuropɔn no ne n’asɔredan fɛfɛ no, ɛwom sɛ saa ɔsɛe a ɛyɛ hu no daa Onyankopɔn atemmu a etia Yudafo antikristofo a wonnye nni no adi de, nanso “ababaa a efi nkaa no” kuw no anhyia ɔsoro Ayeforokunu a wofii adi kohyiaa no no.​—Luka 21:20-24; Mateo 24:15-22; Marko 13:14-20.

42, 43. (a) Ɛrekɔ afeha a edi kan no awiei no, adiyisɛm bɛn na ebia ɛhyɛɛ “ababaa a efi nkaa no” kuw no nkuran wɔ n’anidaso no mu, nanso saa adiyisɛm no baa awiei dɛn? (b) Wɔ ne nhoma a edi kan a ɔkyerɛwee wɔ ɛno akyi no mu no hena ba a waba dedaw na Yohane dan adwene kɔɔ so?

⁴² Mfe pii betwaam, na ɛde rekɔ afeha a edi kan Y.B. awiei, bɛyɛ afe 96 Y.B. mu no, ɔsomafo Yohane nyaa Adiyisɛm a ɛyɛ nwonwa a na ɛbɛda ɔsoro Ayeforokunu Yesu Kristo ne “n’ayeforo” a wɔyɛɛ wɔn ho mfonini sɛ Yerusalem Foforo no ho asɛm adi. (Adiyisɛm 21:1 kosi 22:17) Eyi bɛyɛ nkuranhyɛ pii ama “ababaa a efi nkaa no” kuw a na wɔda so ara kura wɔn anidaso sɛ wobehyia Ayeforokunu a ɔresan aba no mu. Nanso, ɔsoro Ayeforokunu no de Adiyisɛm no baa awiei a ose: “Nea odi nneɛma yi ho adanse no se: ‘Ampa ara mereba ntɛm.’” Mmuaema mu no, ɔsomafo Yohane a na wabɔ akwakora no gyee so se: “Amen! Yiw! Awurade Yesu bra,” na Yohane de kaa ho baa awiei sɛ: “Yɛn Awurade Yesu dom nka mo nyinaa.” (Adi. 22:20, 21) Ɛno akyi mfirihyia abien, bɛyɛ afe 98 Y.B., na ɔsomafo Yohane kyerɛw ne nkrataa abiɛsa no mu nea edi kan, na ɔkae wɔ mu se:

⁴³ “Mmofra nkumaa, ɛdɔn a edi akyiri ni; na sɛnea moate sɛ antikristo no rebɛba, na mprempren yi antikristo bebree aba: ɛnna yɛde hu sɛ dɔn a edi akyiri ni.” “Yenim sɛ obiara a Onyankopɔn awo no no, ɔnyɛ bɔne; na mmom nea Onyankopɔn awo no no, ɔhwɛ ne ho so, na ɔbɔne no nka no. Yenim sɛ yefi Nyankopɔn, na wiase nyinaa da ɔbɔne no mu.”​—1 Yoh. 2:18; 5:18, 19.

44. (a) Yohane wu wɔ ɛno akyi buee kwan maa hena ba? (b) Saa bere no, ɔkwan bɛn so na ná “mmabaa du” kuw no akanea a wɔasɔ no fa hyerɛn, na ná anidaso bɛn na ɛwɔ hɔ wɔ hyia a wobehyia Ayeforokunu no ho?

⁴⁴ Ɔkyerɛw ne nkrataa abiɛsa no ne Yesu asetra ho asɛm nhoma a wɔfrɛ no Yohane nsɛmpa no akyi bere tiaa bi na ɔsomafo akwakora yi wui, a akyinnye biara nni ho sɛ ɔne “Oguammaa no asomafo dumienu” no mu nea otwa to. Yohane wu no bebue kwan nkakrankakra ama nea ɔreba, a ɛnyɛ Ayeforokunu Kristo no, na mmom antikristo a Yohane abɔ kɔkɔ afa ne ho no. (2 Tes. 2:7, 8) Afei, na “wiase kanea” no ayɛ sɛ nea adum. Kuw a wɔde “mmabaa du” yɛɛ wɔn ho mfonini no sɛnkyerɛnne kwan so “akanea” no dɛw ano brɛɛ ase. Nokwarem no, na “mmabun” ankasa no dodow aka kakraa bi pɛ. Sɛ́ anka wobenya Awurade Yesu sanba no ho anigye mmom no, wɔmaa anigyede afoforo a ɛyɛ wiase no mu nneɛma ho anigye gyee wɔn a kã ara kwa na wɔde wɔn ano ka sɛ wɔyɛ Kristofo no adwene. Bere tenten twaam nanso na ɔmma.

45. Ɔkwan bɛn so na enyaa mmamu, sɛ, “na ayeforokunu no kyɛe no, wɔn nyinaa totɔɔ nko na wɔdedae” titiriw wɔ Konstatino bere so?

⁴⁵ Eyi ne nea mmabaa du bɛ no ka siei wɔ nsɛm yi mu sɛ: “Na ayeforokunu no kyɛe no. wɔn nyinaa totɔɔ nko na wɔdedae.” (Mat. 25:5) Saa ara, na wɔ nyamesom kuw a ɛka sɛ ɛne Kristo asafo no mu no, emufo no brɛe wɔ twɛn a wɔtwɛn Ayeforokunu no ba no mu. Nokwarem no, wɔ nea wɔfrɛ no Konsiantino Ɔkɛseɛ no “adwensakra” ne yɛ a ɔyɛɛ nea wɔkyerɛ sɛ ɛne Kristosom wɔ ne bere so Ɔman Asɔre wɔ Roma Ahemman no mu no nti, ɛbɛdaa adi sɛ wonhia Kristo sanba no. Ná wɔde Kristoman asi hɔ afei, asɔfo mpanyin a wɔwɔ asɔre no mu dodow de wɔn ho bɔɔ Roma Ɔman no na wofii ase dii hene wɔ nyamesom kwan so. Ɛnyɛ sɛ na Yesu Kristo asomafo anokwafo no ada wɔ owu mu nko, na mmom wɔn a na wɔkyerɛ sɛ wɔyɛ Kristofo asɔfo mpanyin yi dae wɔ Kristofo asɛyɛde ne hia a ehia sɛ wɔkɔ so ma Kristofo asafo no yɛ kronn, na ɛde ne ho fi nnipa nyansa ahorow ne atetesɛm ahorow ho ne hia a ehia sɛ wɔyɛ kronkron a nkekae biara nni wɔn ho wiase no mu wɔ ahotew, ne nyamesom a ɛho nni fi Onyankopɔn anim mu no mu.

46. (a) Ɔkwan bɛn so na “mmabaa du” kuw no nna yi ne Yesu asɛm a ɔka siei wɔ bɛ a ɛfa awi ne nwura ho no wɔ nsɛdi? (b) Ná honhom mu nna yi bɛkɔ so akosi bere tenten bɛn, na bere bɛn na ná wɔbɛkyerɛ bɛ no mmamu fa a edi akyiri no?

⁴⁶ Saa nyamesom mu tebea yi ne nea wɔyɛɛ ho mfonini wɔ Yesu awi ne nwura ho bɛ no mu no wɔ nsɛdi, a emu na ɔkae se: “Ɔsoro ahenni te sɛ onipa bi a oguu aba pa n’afuw mu. Na nnipa dae no, ne tamfo bae beguu wura bi awi no mu, na osiim kɔe.” (Mat. 13:24, 25) Ogu akyi bere tenten ansa na otwa bere no ba, na abebu kwan so “onipa” no aba otwa adwuma no mu na waka ma wɔatutu nwura no afi mu na waboaboa “awi” ankasa no ano agu ne san so. Nea ɛyɛ anigye no, ɔrekyerɛkyerɛ ɛbɛ yi nyinaa mu no, Yesu de nsɛm koro no ara a n’asomafo no de dii dwuma bere a wɔrebisa no asɛm a wɔakyerɛw wɔ Mateo 24:3 no dii dwuma. Yesu kae sɛ: “Twabere no ne wiase awiei.” (Mat. 13:39) Bere a wiase nneɛma nhyehyɛe yi awiei kɔ so kyɛ no, nna a wɔka siei wɔ “mmabaa du” bɛ no mu no nso bɛyɛɛ nea ɛware. Na mmabaa du bɛ no mmamu no fã a edi akyiri no bɛyɛ “sɛnkyerɛnne” a ɛkyerɛ sɛ yɛwɔ “wiase awiei” mu no fã.