Nea Ɛyɛe a Yɛn Nsa Kaa Bible

Ɛwom, Hebri ne Aram Kyerɛwnsɛma ne Kristofo Greek Kyerɛwnsɛm no, emu biara nni hɔ a tete de a wodii kan kyerɛwee no da so ara wɔ hɔ nnɛ, nanso asɛm a ɛwɔ Yesaia 40:8 no yɛ nokware turodoo. Ɛnde yɛyɛ dɛn hu sɛ, kyerɛwnsɛm a wodii kan kyerɛwee no, emu nsɛm no ara na ɛwɔ Bible mu nnɛ?

Yɛfa Hebri Kyerɛwnsɛm no a, ade baako a ɛma yehu sɛ ɛnsesae ne biribi a Onyankopɔn kae sɛ wɔnyɛ wɔ tete mmere mu. Ɔkae sɛ ebinom nhwɛ nea ɛwɔ hɔ no so nkyerɛw bi nto hɔ.b Yɛhwɛ Israel ahemfo sɛɛ a, Yehowa ka kyerɛɛ wɔn sɛ wɔn mu biara nhwɛ Mmara no so nkyerɛw ne de. (Deuteronomium 17:18) Afei nso, Onyankopɔn de hyɛɛ Lewifo no nsa sɛ wɔnhwɛ sɛ wɔbɛkora Mmara no so, na wɔmfa emu nsɛm nkyerɛkyerɛ ɔmanfo no. (Deuteronomium 31:26; Nehemia 8:7) Bere a Yudafo no fii Babilon nkoasom mu bae no, ebinom bɛyɛɛ akyerɛwfo a wɔfrɛ wɔn Soferimfo. (Esra 7:6, ase hɔ nsɛm) Nkakrankakra, saa akyerɛwfo no hwɛɛ nkyerɛwee a na ɛwɔ hɔ dedaw no so kyerɛw nhoma 39 a ɛwɔ Hebri Kyerɛwnsɛm mu no pii.

Efi hɔ rekɔ no, akyerɛwfo a wɔbae no tɔɔ wɔn bo ase paa hwɛɛ Hebri Kyerɛwnsɛm no so kyerɛw bi. Efi afe 500 Y.B. kosi afe 1500 Y.B. mu hɔ baabi no, Yudafo akyerɛwfo bi a wɔfrɛ wɔn Masoretefo nso toaa so kyerɛw bi. Nsaano nkyerɛwee a Masoretefo yɛe no, nea akyɛ paa a biribiara nyerae wom no, wɔfrɛ no Leningrad Codex. Wɔyɛe wɔ afe 1008 Y.B. kosi afe 1009 Y.B. mu hɔ baabi. Nanso bɛyɛ afe 1950 Y.B. mu no, nhwehwɛmufo kohuu Bible nsaano nkyerɛwee ne nsaano nkyerɛwee asinasin bi sɛ ɛka Ɛpo a Awu Ho Nhoma Mmobɔwee no ho. Nea wohui no, na ne dodow bɛyɛ 220. Saa Bible nsaano nkyerɛwee no, wɔyɛe bɛboro mfe apem ansa na Leningrad Codex no reba. Sɛ wode Ɛpo a Awu Ho Nhoma Mmobɔwee no toto Leningrad Codex no ho a, wubehu biribi titiriw bi: Ɛwom sɛ nsɛmfua a wɔde dii dwuma wɔ abien no nyinaa mu no bi nyɛ pɛ de, nanso ntease a ɛwom no yɛ pɛ.

Nhoma 27 a ɛwɔ Kristofo Greek Kyerɛwnsɛm mu no nso ɛ? Wɔn a wɔkyerɛw saa nhoma no, na wɔn mu bi yɛ Yesu Kristo asomafo, ɛnna wɔn mu kakra nso yɛ asuafo afoforo a na wɔwɔ hɔ saa bere no. Sɛnea Yudafo akyerɛwfo no yɛe no, tete Kristofo no nso hwɛɛ kyerɛwnsɛm no so kyerɛw bi. (Kolosefo 4:16) Ɛwom, Roma Amrado Diocletian ne nnipa afoforo yɛɛ wɔn adwene sɛ wɔbɛsɛe Kristofo nhoma a ɛwɔ hɔ saa bere no nyinaa, nanso tete nsaano nkyerɛwee mpempem pii da so ara wɔ hɔ nnɛ.

Nkurɔfo kyerɛɛ Greek Kyerɛwnsɛm no ase kɔɔ kasa ahorow mu. Bible nkyerɛase a akyɛ paa no bi ne nea wɔkyerɛɛ ase kɔɔ kasa bi te sɛ Armenian, Coptic, Ethiopic, Georgian, Latin, ne Syriac mu.

Akyerɛwfo a wɔhwɛɛ tete Bible nsaano nkyerɛwee no so kyerɛw bi no, wode obiara de toto ne yɔnko de ho a, wubehu nsonsonoe nkakrankakra wom. Enti yɛbɛyɛ dɛn ahu nsɛm paa a na ɛwɔ tete de a wodii kan kyerɛwee no mu?

Yɛnhwɛ mfatoho yi. Fa no sɛ ɔkyerɛkyerɛfo bi aka akyerɛ sukuufo 100 sɛ wɔnhwɛ nhoma bi so nkyerɛw emu nsɛm no pɛpɛɛpɛ. Sɛ nhoma a sukuufo 100 no hwɛɛ so no yera mpo, na wohwɛ nea obiara kyerɛwee de toto ne yɔnko de ho a, wubehu nsɛm a na ɛwɔ nhoma no ankasa mu. Ɛwom sɛ ebia sukuufo no bi bɛkyerɛw nsɛm bi atĩ de, nanso ɛrentumi mma sɛ faako a ɔbaako betĩ no, obiara nso betĩ wɔ hɔ. Tete Bible nsaano nkyerɛwee mpempem pii a akyerɛwfo ahorow ayɛ no nso, sɛ abenfo de obiara de toto ne yɔnko de ho a, wotumi hu baabi a akyerɛwfo no bi dii mfomso, na ɛboa wɔn ma wohu nsɛm ankasa a na ɛwɔ tete de a wodii kan kyerɛwee no mu.

Yɛbɛyɛ dɛn anya awerɛhyem paa sɛ, Bible mu nsɛm a yɛwɔ nnɛ no, ɛno ara na na ɛwɔ tete de a wodii kan kyerɛwee no mu? Ɔbenfo William H. Green kaa Hebri Kyerɛwnsɛm no ho asɛm sɛ: “Yebetumi aka no pen sɛ tete nhoma biara nni hɔ a wɔakora emu nsɛm so pɛpɛɛpɛ saa.” Kristofo Greek Kyerɛwnsɛm a wɔtaa frɛ no Apam Foforo no nso, Bible ho ɔbenfo F. F. Bruce kaa ho asɛm sɛ: “Tete akyerɛwfo nhoma a agye din no pii wɔ hɔ a, adanse a ɛwɔ hɔ nti, nkurɔfo gye tom sɛ emu nsɛm nsesae, nanso Apam Foforo a ɛwɔ hɔ seesei no mpo de, yɛwɔ adanse a ɛkyɛn saa koraa a ɛkyerɛ sɛ emu nsɛm nsesae.” Ɔde kaa ho sɛ: “Sɛ Apam Foforo no yɛ wiase nhoma bi a, anka obiara begye atom sɛ emu nsɛm no nsesae.”

Hebri Nkyerɛwee: Hebri Kyerɛwnsɛm—Wiase Foforo Nkyerɛase a wɔyɛe wɔ Borɔfo kasa mu (1953-1960) no, Biblia Hebraica a Rudolf Kittel yɛɛ ho adwuma no na wɔhwɛɛ so kyerɛɛ ase. Efi saa bere no, ebinom de Ɛpo a Awu Ho Nhoma Mmobɔwee ne tete nsaano nkyerɛwee ahorow bi ayɛ nhwehwɛmu. Saa nhwehwɛmu yi nti, Hebri nkyerɛwee a nkurɔfo hwɛ so kyerɛ ase kɔ kasa foforo mu no, wɔayɛ nsakrae ahorow wom. Hebri nkyerɛwee a wɔayɛ mu nsakrae no, wɔfrɛ no Biblia Hebraica Stuttgartensia ne Biblia Hebraica Quinta. Saa nkyerɛwee yi, wɔfaa emu nsɛm fii Leningrad Codex no mu, na wɔde ase hɔ nsɛm bi a ɛkyerɛ sɛnea nkyerɛwee afoforo kyerɛɛ nsɛm no bi ase kaa ho. Saa nkyerɛwee no bi ne Samariafo Pentateuch, Ɛpo a Awu Ho Nhoma Mmobɔwee, Greek Septuagint, Aram Targum Nkyerɛase, Latin Vulgate, ne Syriac Peshitta. Bere a yɛreyɛ Wiase Foforo Nkyerɛase foforo yi, yɛhwɛɛ Biblia Hebraica Stuttgartensia ne Biblia Hebraica Quinta mu faa nneɛma bi fii mu.

Greek Nkyerɛwee: Afe 1853 kosi afe 1881 mu hɔ no, ɔbenfo B. F. Westcott ne ɔbenfo F.J.A. Hort yɛɛ Greek nkyerɛwee bi a nkurɔfo bɛhwɛ so akyerɛ ase akɔ kasa foforo mu. Ná wɔpɛ sɛ ɛbɛn tete de a wodii kan kyerɛwee no paa. Nea ɛboaa wɔn ne sɛ, wɔfaa Bible nsaano nkyerɛwee ahorow a na ɛwɔ hɔ saa bere no, ɛnna wɔde ebiara totoo foforo ho. Bɛyɛ afe 1950 no, Wiase Foforo Bible Nkyerɛase Kuw no hwɛɛ nkyerɛwee a abenfo no yɛe no so kyerɛɛ ase. Afei nso, wɔhwɛɛ nsaano nkyerɛwee foforo a ɛwɔ mmɛw nkrataa so a nkurɔfo kyerɛ sɛ bɛyɛ afe 125 Y.B. kosi afe 300 Y.B. mu hɔ na wɔyɛe no. Efi saa bere no, wɔahu mmɛw nkrataa no pii aka ho. Nnansa yi nso, abenfo bi ayɛ nhwehwɛmu ahorow, na ama wɔayɛ Greek nkyerɛwee no bi a nkurɔfo hwɛ so kyerɛ ase kɔ kasa foforo mu. Ebi ne nea Nestle ne Aland yɛe, ne nea United Bible Societies nso yɛe no. Nneɛma bi a abenfo no de baa mu no, yɛde aba yɛn de a yɛayɛ no foforo yi mu.

Saa nkyerɛwee yi ama abɛda adi sɛ, nsɛm bi wɔ Kristofo Greek Kyerɛwnsɛm (nea wɔfrɛ no Apam Foforo) no mu a enni tete de a Onyankopɔn de ne honhom kaa nnipa ma wɔkyerɛwee no mu. Mmom wɔn a wɔhwɛɛ tete de no so kyerɛw bi akyiri yi no na wɔde hyehyɛɛ mu. Wubehu eyi ho nhwɛso wɔ Akuapem Twi Bible a The Bible Society of Ghana Yɛe no mu. Nanso eduu bɛyɛ afe 1550 a wɔmaa Bible nkyekyɛm ahorow nɔma no, na nkurɔfo de saa kyerɛwnsɛm no ahyehyem dedaw, enti bere a wɔn a wɔkyerɛ Bible ase no pii yiyii saa nsɛm no fii wɔn Bible mu no, ɛmaa kwan bɛdedaa hɔ. Saa kyerɛwnsɛm no ne Mateo 17:21; 18:11; 23:14; Marko 7:16; 9:44, 46; 11:26; 15:28; Luka 17:36; 23:17; Yohane 5:4; Asomafo Nnwuma 8:37; 15:34; 24:7; 28:29; ne Romafo 16:24. Bible a yɛayɛ no foforo yi mu no, yɛde ase hɔ nsɛm ahyehyɛ baabi a yɛayiyi saa kyerɛwnsɛm no afi no.

Sɛ yɛhwɛ Marko 16 awiei asɛm a ɛware (nkyekyɛm 9-20), Marko 16 awiei asɛm a ɛyɛ tiawa, ne asɛm a ɛwɔ Yohane 7:53–8:11 no a, yetumi hu sɛ emu biara nni hɔ a na ɛwɔ tete de a wodii kan kyerɛwee no mu. Enti yɛamfa saa nsɛm no amma Bible foforo yi mu.

Afei nso nsɛm bi wɔ hɔ a yɛasesa mu kakra, efisɛ abenfo dodow no ara abegye atom sɛ ɛno paa na ɛbɛn tete de a wodii kan kyerɛwee no. Ɛho nhwɛso ne sɛ, wohwɛ nsaano nkyerɛwee ahorow bi mu a, Mateo 7:13 kenkan sɛ: “Momfa ɔpon teateaa no mu, efisɛ ɔpon a ɛso ne ɔkwan a ɛtrɛw no kɔ ɔsɛe mu.” Wiase Foforo Nkyerɛase dedaw a yɛyɛe no mu no, na asɛm “ɔpon” no nni saa kyerɛwsɛm no mu. Nanso nsaano nkyerɛwee ahorow ama ada adi sɛ, na asɛm “ɔpon” no wɔ tete de a wodii kan kyerɛwee no mu. Enti yɛde ahyɛ Bible foforo yi mu. Yɛayɛ nsakrae afoforo bi a ɛte saa nso. Nanso saa nsakrae no yɛ nketenkete; emu biara nni hɔ a ɛsesa ntease a ɛwɔ Onyankopɔn Asɛm mu no.