Onyankopɔn Din Pue Wɔ Kristofo Greek Kyerɛwnsɛm No Mu

Bible ho abenfo gye tom sɛ Tetragrammaton (יהוה) a wɔde gyina hɔ ma Onyankopɔn din no, epue bɛyɛ 7,000 wɔ Bible nkyerɛwee a wodii kan kyerɛwee no fã a ɛne Hebri Kyerɛwnsɛm no mu. Nanso nnipa pii adwene yɛ wɔn sɛ Kristofo Greek Kyerɛwnsɛm no de, edin no ampue wom. Enti ɛnnɛ, wofa Bible pii a, worenhu edin Yehowa no wɔ ɔfã a nkurɔfo taa frɛ no Apam Foforo no mu. Sɛ Hebri Kyerɛwnsɛm no mu nsɛm bi ba Greek Kyerɛwnsɛm no mu, na sɛ Tetragrammaton no pue wɔ hɔ mpo a, wɔn a wɔkyerɛ Bible ase no mu dodow no ara de “Awurade” na ɛhyɛ Onyankopɔn din ankasa no ananmu.

Nanso wɔn a wɔkyerɛɛ Kyerɛw Kronkron—Wiase Foforo Nkyerɛase no ase no anyɛ no saa. Saa Bible no de, edin Yehowa no pue wɔ Kristofo Greek Kyerɛwnsɛm no mu 237. Nea ɛmaa wɔn a wɔkyerɛɛ ase no de edin no baa mu ne nneɛma titiriw abien yi: (1) Greek nsaano nkyerɛwee a ɛwɔ hɔ nnɛ no, ebiara nni hɔ a ɛyɛ tete de a wodii kan kyerɛwee no. Greek nsaano nkyerɛwee a ɛwɔ hɔ nnɛ no, fã kɛse no ara, anyɛ yiye koraa no, ɛyɛ bere a Bible akyerɛwfo dii kan kyerɛw Greek Kyerɛwnsɛm no akyi mfe 200 na wɔyɛɛ ho adwuma. (2) Saa bere no, wɔn a wɔhwɛɛ so kyerɛw bi no sesaa Tetragrammaton no de Greek asɛmfua Kyʹri·os a ɛkyerɛ “Awurade” sii anan. Ebi nso wɔ hɔ a, nea na wɔayiyi Tetragrammaton no afi mu dedaw na wɔhwɛɛ so kyerɛw bi.

Wiase Foforo Bible Nkyerɛase Kuw no, wohui sɛ biribiara kyerɛ sɛ Tetragrammaton no puee tete Greek nsaano nkyerɛwee no mu. Ɛno nti na wɔde Onyankopɔn din no baa Greek Kyerɛwnsɛm no mu no. Wɔn nnyinaso ni:

• Hebri Kyerɛwnsɛm a na nkurɔfo de yɛ adwuma wɔ Yesu ne n’asomafo no bere so no, na Tetragrammaton no wom bebree. Bere bi a atwam no, nnipa mmaako mmaako bi gyee saa asɛm yi ho kyim. Nanso seesei, nhwehwɛmufo akohu Hebri Kyerɛwnsɛm no bi a wɔyɛe wɔ asomafo no bere so wɔ baabi a ɛbɛn Qumran. Ɛno ama akyinnyegye no nyinaa to atwa.

• Yesu ne n’asomafo no bere so no, na Tetragrammaton no san wɔ Hebri Kyerɛwnsɛm a wɔakyerɛ ase kɔ Greek kasa mu no mu. Tete no, wɔkyerɛɛ Hebri Kyerɛwnsɛm no ase kɔɔ Greek kasa mu, na na wɔfrɛ no Septuagint. Akyiri yi, nkurɔfo hwɛɛ so kyerɛw bi. Saa nsaano nkyerɛwee no, efi tete nyinaa, na abenfo adwene yɛ wɔn sɛ Tetragrammaton no nnim. Nanso bɛyɛ afe 1950 mu no, nhomanimfo huu Septuagint nsaano nkyerɛwee asinasin bi. Akyɛ paa; Yesu bere so nyinaa na ɛwɔ hɔ. Wohui sɛ wɔde Hebri akyerɛw Onyankopɔn din wom. Ɛno kyerɛ sɛ Yesu bere so no, Bible mu nsɛm a na ɛwɔ Greek kasa mu no, na Onyankopɔn din wom. Bɛyɛ mfe 300 akyi no, wɔyɛɛ Greek Septuagint nsaano nkyerɛwee bi a agye din. Baako ne Codex Vaticanus, ɛnna baako nso ne Codex Sinaiticus. Saa nsaano nkyerɛwee no, na Onyankopɔn din nni Genesis kosi Malaki (nanso tete de no de, na ɛwom). Enti ɛnyɛ nwonwa sɛ nsaano nkyerɛwee a wɔyɛɛ no saa bere no nyinaa, wohwɛ ɔfã a wɔfrɛ no Apam Foforo anaa Greek Kyerɛwnsɛm no mu a, worenhu Onyankopɔn din.

  Yesu kaa no pefee sɛ: “M’Agya din mu na mebae.” Ɔsan sii so dua sɛ nnwuma a ɔyɛ nyinaa, ɔyɛ wɔ n’Agya “din mu”

• Kristofo Greek Kyerɛwnsɛm no ankasa mpo ma yehu sɛ na Yesu taa ka Onyankopɔn din ho asɛm, na ɔdaa edin no adi kyerɛɛ nkurɔfo. (Yohane 17:6, 11, 12, 26) Yesu kaa no pefee sɛ: “M’Agya din mu na mebae.” Ɔsan sii so dua sɛ nnwuma a ɔyɛ nyinaa, ɔyɛ no n’Agya “din mu.”—Yohane 5:43; 10:25.

• Onyankopɔn honhom na ɔde kaa nnipa ma wɔkyerɛw Kristofo Greek Kyerɛwnsɛm no kaa Hebri Kyerɛwnsɛm no ho. Enti ɛbɛyɛ nwonwa sɛ Yehowa din betumi ayera afi Greek Kyerɛwnsɛm no mu prɛko pɛ. Asomafo no bere so no, osuani Yakobo ka kyerɛɛ Yerusalem mpanyimfo no sɛ: “Simeon aka no pefee ama yɛahu sɛnea Onyankopɔn dan n’ani kɔɔ amanaman no so bere a edi kan na oyii nnipa bi fii wɔn mu de ne din too wɔn so no.” (Asomafo Nnwuma 15:14) Saa bere no, sɛ na obiara nnim Onyankopɔn din anaa obiara mmɔ din no a, anka hena na obehu nea Yakobo repɛ akyerɛ?

• Onyankopɔn din a wɔatwa no tiaa pue wɔ Kristofo Greek Kyerɛwnsɛm no mu. “Haleluya” a ɛwɔ Adiyisɛm 19:1, 3, 4, 6 no, Onyankopɔn din no hyɛ mu. Efi Hebri asɛmfua bi mu, na ɛkyerɛ: “Munyi Yah ayɛ.” “Yah” nso yɛ edin Yehowa a wɔatwa no tiaa. Edin bebree wɔ Kristofo Greek Kyerɛwnsɛm no mu a wonya fii Onyankopɔn din no mu. Yesu mpo, nhoma ahorow bi ka sɛ ne din no kyerɛ “Yehowa Ne Nkwagye.”

• Nhoma ahorow a tete Yudafo kyerɛwee no ma yehu sɛ, saa bere no, na Yudafo a wɔyɛ Kristofo no kyerɛw Onyankopɔn din wɔ wɔn nhoma ahorow mu. Yudafo wɔ mmara nhoma bi a wɔfrɛ no Tosefta. Wɔkyerɛw wiei bɛyɛ afe 300 Y.B., na ɛkaa sɛnea na Homeda biara, atamfo hyew Kristofo nhoma no ho asɛm sɛ: “Wɔhyew Asɛmpakafo no nhoma ne minimfo no nhoma. [Minimfo no, wɔkyerɛ mu sɛ wɔyɛ Yudafo Kristofo.] Wɔde guu gya mu ma ɛne Onyankopɔn Din a ɛwom no nyinaa hyew dwerɛbee.” Nhoma koro no ara faa Galileani Yosé a ɔyɛ Rabi anom asɛm kae. Ɔtenaa ase wɔ Yesu awo akyi bɛyɛ mfe 100, na nhoma no se ɔkae sɛ da a ɛnyɛ Homeda no, “na wotwitwa baabi a Onyankopɔn Din pue wɔ [Kristofo nhoma no] mu de sie, na afei wɔhyew nhoma no fã a aka no.”

• Bible ho abenfo binom gye tom sɛ, sɛ Hebri Kyerɛwnsɛm no mu nsɛm bi pue wɔ Kristofo Greek Kyerɛwnsɛm no mu, na sɛ Onyankopɔn din wɔ hɔ a, yebetumi agye adi sɛ edin no bɛba hɔ nso. Nsɛm asekyerɛ nhoma bi mu asɛm a n’asɛmti ne “Tetragrammaton in the New Testament” [Tetragrammaton a Ɛwɔ Apam Foforo No Mu] kae sɛ: “Nneɛma bi wɔ hɔ a yebetumi agyina so aka sɛ bere a wɔrekyerɛw Apam Foforo no, sɛ Apam Dedaw no mu nsɛm bi pue wom a, saa nsɛm no nyinaa anaa ne fã bi de, wubehu Tetragrammaton a ɛyɛ Onyankopɔn din Yahwe no wom.” (The Anchor Bible Dictionary) Ɔbenfo George Howard ka sɛ: “Greek Bible [Septuagint] a ɛno ne Kyerɛwnsɛm a na tete asɔre no [anaa Kristofo] kenkan no, esiane sɛ na wɔda so ara kyerɛw [Tetragrammaton] no wom nti, ntease wom sɛ yebegye adi sɛ, sɛ Apam Foforo no akyerɛwfo refa Apam Dedaw no mu asɛm aka a, na wonyi [Tetragrammaton] no mfi mu.”

• Bible asekyerɛfo bi a wobu wɔn paa de Onyankopɔn din baa wɔn nkyerɛase mu wɔ Kristofo Greek Kyerɛwnsɛm no mu. Wɔn mu bi de edin no baa wɔn nkyerɛase mu koraa ansa na Wiase Foforo Nkyerɛase no reba. Bible asekyerɛfo no bi Bible ne wɔn ankasa din na edidi so yi: A Literal Translation of the New Testament . . . From the Text of the Vatican Manuscript, Herman Heinfetter (1863); The Emphatic Diaglott, Benjamin Wilson (1864); The Epistles of Paul in Modern English, George Barker Stevens (1898); St. Paul’s Epistle to the Romans, W. G. Ruterford (1900); The New Testament Letters, J.W.C. Wand, London Sɔfopɔn (1946). Nea ɛka ho bi ne Bible a Pablo Besson kyerɛɛ ase kɔɔ Spanish kasa mu wɔ afe 1919 mu no. Wokan ne Bible no a, wubehu “Jehová” wɔ Luka 2:15 ne Yuda 14. Afei nso, ase hɔ nsɛm a ɛwɔ saa Bible no mu no, bɛboro 100 twe adwene si mmeae bi a ebia anka ɛsɛ sɛ Onyankopɔn din no ba so. Bɛboro mfe 200 ansa na Bible ahorow a yɛaka ho asɛm yi nyinaa reba no, na nkurɔfo akyerɛ Kristofo Greek Kyerɛwnsɛm no ase kɔ Hebri kasa mu, na na Tetragrammaton no pue wɔ mmeae pii. German kasa nkutoo mu no, anyɛ yiye koraa no, Bible ahorow bɛyɛ 11 na edin “Jehovah” (anaa Hebri asɛm “Yahweh” a wɔde aba German kasa mu) no pue wɔ Kristofo Greek Kyerɛwnsɛm no mu. German Bible asekyerɛfo baanan bi nso, wɔkyerɛw “Awurade” a, na wɔde Onyankopɔn din no ahyɛ nkahyemde mu aka ho. Bible a wɔakyerɛ ase kɔ German kasa mu no, bɛboro 70 na wɔde Onyankopɔn din no hyɛɛ ase hɔ nsɛm mu anaa nkyerɛkyerɛmu afã hɔ.

  

• Onyankopɔn din no pue wɔ Kristofo Greek Kyerɛwnsɛm no mu wɔ Bible a wɔakyerɛ ase kɔ kasa bɛboro ɔha mu. Onyankopɔn din nyɛ na wɔ Bible a wɔakyerɛ ase kɔ kasa ahorow pii mu te sɛ nea wɔka wɔ Afrika, Amerika, Asia, Europe, ne Pacific aman mu no. (Hwɛ kratafa 1742 ne 1743.) Nkyerɛkyerɛmu a yɛadi kan de ama no, ɛno ara bi na ɛmaa Bible asekyerɛfo de Onyankopɔn din baa Bible a ɛwɔ kasa ahorow yi mu. Kasa no bi wɔ hɔ a, nnansa yi ara na wɔrekyerɛ Kristofo Greek Kyerɛwnsɛm no ase akɔ mu. Saa Bible no bi ne Rotuman Bible (1999) a “Jihova” pue wom 51 wɔ nkyekyɛm mmaako mmaako 48 mu no. Baako nso ne Batak (Toba) Bible (1989) a wɔkyerɛɛ ase wɔ Indonesia no; “Jahowa” pue wom 110.

  

Enti ntease wom paa sɛ obi rekyerɛ Kristofo Greek Kyerɛwnsɛm no ase a, ɔde Onyankopɔn din Yehowa no bɛba mu. Ɛno nti na wɔn a wɔyɛɛ Wiase Foforo Nkyerɛase no nso yɛɛ saa no. Wɔwɔ obu kɛse ma Onyankopɔn din no, na wosuro sɛ wobeyi biribi afi Onyankopɔn Asɛm mu.—Adiyisɛm 22:18, 19.