NSƐM BI MU NKYERƐKYERƐMU

Onyankopɔn din ne Yehowa, na ɛkyerɛ “Nea Ɔma Ɛyɛ Hɔ.” Yehowa ne ade nyinaa so Tumfoɔ Nyankopɔn, ɔno na ɔbɔɔ biribiara. Sɛ ɔka sɛ ɔbɛyɛ biribi a, ɔwɔ tumi a ɔde bɛyɛ.

Hebri kasa mu no, wɔde nkyerɛwde nnan na ɛkyerɛw Onyankopɔn din. Twi kasa mu no, wɔde YHWH na egyina hɔ ma edin no. Onyankopɔn din pue bɛyɛ 7,000 wɔ Hebri kasa a wɔde kyerɛw Bible no mu. Wokɔ wiase baabiara a, ɛsono sɛnea obiara bɔ edin Yehowa no wɔ ne kasa mu.

▸ Ti 1, nky. 15

Bible no fi Onyankopɔn hɔ, nanso ɔmaa nnipa na ɛkyerɛwee. Akɔyɛ sɛ adwumawura bi aka akyerɛ ne kyerɛwfo sɛ ɔnkyerɛw krataa bi mma no. Onyankopɔn de honhom kronkron na ɛboaa Bible akyerɛwfo ma wɔkyerɛw ne nsɛm. Onyankopɔn honhom no boaa wɔn wɔ akwan pii so; ɛtɔ da a, ɛma wonya anisoadehu, ɛtɔ da nso a, wɔso dae na wɔakyerɛw ato hɔ.

▸ Ti 2, nky. 5

Ɛyɛ Bible mu nsɛm a ɛma yehu nokwasɛm anaa aba a ɛwɔ asɛm bi mu. Nhwɛso bi ni: Sɛ Bible ka sɛ, “Mommma wɔnnnaadaa mo. Fekubɔne sɛe ɔbra pa” a, ɛyɛ nnyinasosɛm a ɛkyerɛ sɛ yɛne nipa pa bɔ a, yɛbɛyɛ nneɛma pa. Yɛne nipa bɔne nso bɔ a, yɛbɛyɛ nneɛma bɔne. (1 Korintofo 15:33) Bio nso, sɛ Bible ka sɛ, “Nea onipa gu no, ɛno ara na obetwa” a, ɛyɛ nnyinasosɛm a ɛkyerɛ sɛ, biribiara a yɛbɛyɛ no, papa oo, bɔne oo, yebenya so akatua.—Galatifo 6:7.

▸ Ti 2, nky. 12

Ɛyɛ asɛm a efi Onyankopɔn hɔ. Ebi ma yehu Onyankopɔn apɛde, ebi fa abrabɔ ho, ebi nso yɛ ahyɛde anaa atemmusɛm. Ebetumi nso ayɛ biribi a ebesi daakye. Nkɔmhyɛ pii wɔ Bible mu a abam dedaw.

▸ Ti 2, nky. 13

Bible nkɔmhyɛ pii a ɛfa Mesia no ho no baa mu wɔ Yesu so. Hwɛ adaka a wɔato din “Mesia No Ho Nkɔmhyɛ Ahorow.”

▸ Ti 2, nky. 17, ase hɔ asɛm.

Yehowa bɔɔ asase sɛ ɛnyɛ Paradise na nnipa a wɔdɔ no ntena so. N’atirimpɔw no nsesae. Ɛrenkyɛ koraa, Onyankopɔn beyi nnebɔneyɛfo afi hɔ, na wama ne nkurɔfo daa nkwa.

▸ Ti 3, nky. 1

Satan yɛ ɔbɔfo bɔne; ɔno na odii kan tew Onyankopɔn so atua. Ne din Satan no kyerɛ “Ɔsɔretiafo,” efisɛ ɔko tia Yehowa. Wɔsan frɛ no Ɔbonsam; ɛno nso kyerɛ “Otwirifo” anaa ɔnototofo. Onyaa din yi efisɛ ɔka atosɛm fa Onyankopɔn ho, na ɔdaadaa nkurɔfo.

▸ Ti 3, nky. 4

Yehowa bɔɔ abɔfo no bere tenten koraa ansa na ɔrebɔ asase. Ɔbɔɔ abɔfo sɛ wɔntena soro. Abɔfo no boro ɔpempem ɔha. (Daniel 7:10) Wɔwɔ din na ɛsono sɛnea wɔn mu biara te. Abɔfo anokwafo brɛ wɔn ho ase enti wɔmpɛ sɛ nnipa som wɔn. Wɔwɔ dibea ahorow, na obiara wɔ adwuma a ɔyɛ. Nnwuma a wɔyɛ no bi ne sɛ wɔsom wɔ Yehowa ahengua anim, Yehowa de ne nsɛm soma wɔn kɔma ne nkoa, wɔbɔ n’asomfo a wɔwɔ asase so no ho ban na wɔma wɔn akwankyerɛ, wɔde Yehowa atemmu ba abɔnefo so, na wɔboa asɛnka adwuma no. (Dwom 34:7; Adiyisɛm 14:6; 22:8, 9) Daakye, wɔbɛka Yesu ho ako Harmagedon ko no.—Adiyisɛm 16:14, 16; 19:14, 15.

▸ Ti 3, nky. 5; Ti 10, nky. 1

Biribiara a yɛyɛ a yɛte nka sɛ Yehowa ani nnye ho anaa ɛne n’apɛde nhyia no yɛ bɔne. Bɔne na ɛsɛe yɛne Onyankopɔn ntam, enti wama yɛn mmara ne nnyinasosɛm a ɛbɛboa yɛn na yɛanhyɛ da anyɛ bɔne. Mfiase no nneɛma a Yehowa bɔe no, na bɔne biara nni ho, nanso bere a Adam ne Hawa boapa yɛɛ Yehowa so asoɔden no, wɔbɛyɛɛ abɔnefo na wɔtɔɔ sin. Wonyin bɔɔ akwakoraa ne aberewa na wowuwui. Esiane sɛ Adam de bɔne woo yɛn nti, yɛn nso nyinyin na yewuwu.

▸ Ti 3, nky. 7; Ti 5, nky. 3

Ɛyɛ Onyankopɔn ko a ɔde bɛsɛe Satan wiase ne abɔnefo nyinaa.

▸ Ti 3, nky. 13; Ti 8, nky. 18

Onyankopɔn Ahenni yɛ aban a Yehowa ahyehyɛ wɔ soro. Yesu Kristo na ɔredi so Hene. Ɛrenkyɛ koraa, Yehowa nam Ahenni no so beyi bɔne nyinaa afi hɔ. Onyankopɔn Ahenni bɛba abedi asase nyinaa so.

▸ Ti 3, nky. 14

Onyankopɔn dii kan bɔɔ Yesu ansa na ɔrebɔ biribiara. Yehowa somaa Yesu baa asase so ma obewu maa nnipa nyinaa. Wokum Yesu na akyiri yi, Yehowa nyanee no. Seesei Yesu redi tumi wɔ soro sɛ Onyankopɔn Ahenni no so Hene.

▸ Ti 4, nky. 2

Bible hyɛɛ bere a Mesia no bɛba ho nkɔm. Ná ɔbɛba wɔ bere tenten bi awiei. Bible frɛ saa bere no adapɛn 69. Efii ase afe 455 A.Y.B. na ɛbaa awiei wɔ afe 29 Y.B.

Ɛyɛɛ dɛn na yehuu sɛ ɛbaa awiei wɔ afe 29 Y.B. mu? Adapɛn 69 no fii ase afe 455 A.Y.B. Saa bere no na Nehemia duu Yerusalem na ofii ase sɛ ɔresan akyekye kurow no. (Daniel 9:25; Nehemia 2:1, 5-8) Sɛ yɛka nnawɔtwe anaa “dapɛn” a, nea ɛba yɛn adwenem ara ne nnafua 7. Nanso adapɛn a ɛwɔ nkɔmhyɛ yi mu no nyɛ nnafua nson, na mmom, ɛyɛ nnafua nson a emu biara gyina hɔ ma afe. Wei ne sɛnea wobu nna wɔ nkɔmhyɛ mu no hyia; ‘da koro biara yɛ afe.’ (Numeri 14:34; Hesekiel 4:6) Wei kyerɛ sɛ dapɛn biara yɛ mfe nson. Sɛ yɛka adapɛn 69 no bɔ ho nson (69 x 7) a, yebenya mfe 483. Efi afe 455 A.Y.B., besi afe 29 Y.B. no yɛ mfe 483. Enti afe 29 Y.B. mu pɛpɛɛpɛ na wɔbɔɔ Yesu asu ma ɔbɛyɛɛ Mesia no!—Luka 3:1, 2, 21, 22.

Nkɔmhyɛ koro no ara san kaa dapɛn foforo bi ho asɛm; ɛno nso yɛ mfe nson. Saa bere no, bɛyɛ afe 33 Y.B. mu no, wobekum Mesia no. Efi afe 36 Y.B. mu no, ɛnyɛ Yudafo nko na wɔbɛka Onyankopɔn Ahenni ho asɛmpa akyerɛ wɔn, na mmom wɔbɛka akyerɛ aman nyinaa.—Daniel 9:24-27.

▸ Ti 4, nky. 7

Bible ma yehu sɛ Yehowa Nyankopɔn ne Ɔbɔadeɛ, na odii kan bɔɔ Yesu ansan na ɔrebɔ nneɛma a aka nyinaa. (Kolosefo 1:15, 16) Yesu nyɛ ade nyinaa so Tumfoɔ Nyankopɔn. Wanka da sɛ ɔne Onyankopɔn yɛ pɛ. Mmom nea ɔkae ne sɛ: “Agya no yɛ kɛse sen me.” (Yohane 14:28; 1 Korintofo 15:28) Nanso ɔsom ahorow bi kyerɛkyerɛ sɛ Onyankopɔn yɛ Baasakoro; kyerɛ sɛ Agya no, Ɔba no, ne honhom kronkron ka bom yɛ Nyame baako. Asɛmfua “Baasakoro” nni Bible mu. Ɛyɛ atoro nkyerɛkyerɛ.

Honhom kronkron no yɛ Onyankopɔn tumi a ɔde yɛ ade; ɛyɛ tumi a aniwa nhu a ɔde yɛ n’apɛde. Saa tumi no nyɛ nipa. Yɛhwɛ tete Kristofo sɛɛ a, Bible ka sɛ, “honhom kronkron hyɛɛ wɔn nyinaa mãmã,” na afei Yehowa kae sɛ: “Mehwie me honhom no bi agu ɔhonam ahorow nyinaa so.”—Asomafo Nnwuma 2:1-4, 17.

▸ Ti 4, nky. 12; Ti 15, nky. 17

Nokware Kristofo mfa krɔɔs nsom Onyankopɔn. Adɛn ntia?

1.  Atoro som mufo de krɔɔs asom Onyankopɔn fi teteete. Tete no, na wɔn a wɔsom abɔde de krɔɔs di dwuma wɔ wɔn som mu. Saa ara nso na na wɔde di dwuma wɔ abosonsom amane bi te sɛ bragorɔ mu. Yesu wu akyi bɛboro mfe 300 mpo no, na Kristofo mfa krɔɔs nsom Onyankopɔn. Ɛno akyi koraa na Roma Amrado Constantine de krɔɔs reba Kristosom mu. Ɔyɛɛ saa sɛnea ɛbɛyɛ a nnipa dodow no ara begye Kristosom atom. Krɔɔs deɛ, ɛne Yesu Kristo nni hwee yɛ. Katolekfo nhoma bi ka sɛ: “Ná nnipa bi a wɔnyɛ Kristofo koraa mpo de krɔɔs di dwuma ansa na Kristosom reba.”—New Catholic Encyclopedia.

2.  Yesu anwu wɔ krɔɔs so. Hela asɛmfua a wɔkyerɛɛ ase “krɔss” no, nea ɛkyerɛ ara ne “mpuran anaa dua a esi hɔ.” Bible nkyerɛase bi ka sɛ: “Hela kasa a wɔde kyerɛw [Apam Foforo] no mu no, biribiara nni mu a ɛkyerɛ sɛ wɔde nnua mmienu na ɛbeaa mu.” (The Companion Bible) Yesu wuu wɔ dua baako a esi hɔ so.

3.  Yehowa mpɛ sɛ yɛde ahoni som no.—Exodus 20:4, 5; 1 Korintofo 10:14.

▸ Ti 5, nky. 12

Yesu ka kyerɛɛ n’akyidifo sɛ wɔnkae ne wu no. Afe biara, edu Nisan 14 a, wɔkae ne wu no wɔ da a Israelfo di Twam afahyɛ no. Paanoo ne bobesa no gyina hɔ ma Yesu nipadua ne ne mogya. Ɛyɛ a, wɔde fa obiara anim wɔ Nkaedi no ase. Wɔn a wɔne Yesu bedi ade wɔ soro no na wodi paanoo no na wɔnom bobesa no bi. Nnipa a wɔwɔ anidaso sɛ wɔbɛtena asase so daa no kɔ Nkaedi no bi nanso wonni paanoo no na wɔnnom bobesa no bi.

▸ Ti 5, nky. 21

Wɔkyerɛ asɛmfua “ɔkra” ase wɔ Wiase Foforo Nkyerɛase no mu sɛ (1) onipa, (2) aboa, anaa (3) onipa anaa aboa nkwa. Ebi na edidi so yi:

• Onipa. “Noa nna no mu . . . wɔkoraa nnipa kakra, akra baawɔtwe so, faa nsu no mu.” (1 Petro 3:20) “Akra” a wɔkaa ho asɛm wɔ ha no gyina hɔ ma nnipa—Noa ne ne yere, wɔn mmabarima baasa, ne wɔn yerenom.

• Aboa. “Onyankopɔn kae sɛ: ‘Akra a ɛte ase nhyɛ nsu mu mã na ntuboa nso ntu mfa asase so wɔ wim.’ Na Onyankopɔn kae sɛ: ‘Akra a ɛte ase mmra asase so, afieboa ne mmoa a wɔwea ne wuram mmoa, sɛnea wɔn nyinaa su te.’ Na ɛyɛɛ saa.”—Genesis 1:20, 24.

• Onipa ne aboa nkwa. Yehowa ka kyerɛɛ Mose sɛ: “Wɔn a na wɔrehwehwɛ wo kra no nyinaa awuwu.” (Exodus 4:19) Bere a Yesu wɔ asase so no, ɔkae sɛ: “Mene oguanhwɛfo pa no; oguanhwɛfo pa de ne kra to hɔ ma nguan no.”—Yohane 10:11.

  Afei nso, sɛ obi fi ne “kra nyinaa” mu yɛ adeɛ a, nea ɛkyerɛ ne sɛ wayi ne yam ayɛ nea n’ahoɔden betumi nyinaa. (Mateo 22:37; Deuteronomium 6:5) Obi kɔn dɔ biribi a, obetumi aka sɛ me “kra” kɔn dɔ wei anaasɛ wei. Obi wu nso a, yetumi ka sɛ ɔyɛ ɔkra a wawu.—Numeri 6:6; Mmebusɛm 23:2; Yesaia 56:11; Hagai 2:13.

▸ Ti 6, nky. 5; Ti 15, nky. 17

Wohwɛ Wiase Foforo Nkyerɛase Bible mu a, wubehu sɛ sɛnea wɔakyerɛ Hebri ne Hela asɛmfua “honhom” ase no nyɛ ade koro. Nanso ne nyinaa kyerɛ biribi a nnipa ntumi mfa wɔn aniwa nhu. Ebetumi akyerɛ mframa. Ebetumi nso akyerɛ nnipa anaa aboa home. Nsɛmfua yi nso betumi akyerɛ honhom abɔde anaa tumi a Onyankopɔn de yɛ ade a wɔfrɛ no honhom kronkron. Bible nka sɛ onipa wu a, honhom bi te ne mu a ɛkɔ so tena ase.—Exodus 35:21; Dwom 104:29; Mateo 12:43; Luka 11:13.

▸ Ti 6, nky. 5; Ti 15, nky. 17

Gehenna yɛ bɔn bi a na ɛbɛn Yerusalem. Ɛhɔ na na wɔto nwura ne nneɛma funu gu ma ɛhyew dwerɛbee. Biribiara nni hɔ a ɛkyerɛ sɛ Yesu bere so no, na wɔyɛ nnipa ne mmoa ayayade anaa wɔhyew wɔn animono wɔ saa bɔn no mu. Enti Gehenna nyɛ baabi a wɔyɛ nnipa a wɔawu ayayade anaa wɔhyew wɔn daa. Bere a Yesu kaa wɔn a wɔde wɔn bɛto Gehenna ho asɛm no, na nea ɔreka ne sɛ wɔbɛsɛe saafo no korakora.—Mateo 5:22; 10:28.

▸ Ti 7, nky. 20

Ɛno ne mpae a Yesu kyerɛɛ n’asuafo no. Wɔsan nso frɛ no Yɛn Agya a Ɔwɔ Soro mpaebɔ. Yesu kae sɛ yɛmmɔ mpae sɛ:

• “Wo din ho ntew”

  Wɔaka atosɛm pii de agu Yehowa din ho fi, enti yɛbɔ mpae sɛ ɔmma ne din ho ntew, sɛnea ɛbɛyɛ a, ɔsoro oo, asase so oo, obiara bɛkyerɛ obu ama Onyankopɔn din, na wɔadi no ni.

• “W’ahenni mmra”

  Yɛbɔ mpae sɛ Onyankopɔn Ahenni mmra mmɛsɛe Satan wiase bɔne yi, emmedi asase so, na asase yi nyɛ Paradise.

• “W’apɛde nyɛ hɔ wɔ asase so”

  Yɛbɔ mpae sɛ nea enti a Onyankopɔn bɔɔ asase no nyɛ hɔ na nnipa a wotie Onyankopɔn ade wɔn ho afi bɔne ho. Wɔbɛtena ase daa wɔ Paradise, sɛnea Onyankopɔn pɛ sɛ ɛyɛ no.

▸ Ti 8, nky. 2

Yehowa tuaa agyede no, na ɔnam so agye nnipa afi bɔne ne owu mu. Ná yehia agyede no na ama yɛn nsa atumi aka nkwa a ɛyɛ pɛ a onipa a odi kan, Adam, ma efii yɛn nsa no. Ɛbɛsan nso asiesie yɛne Yehowa ntam. Yɛn bɔne nti, Onyankopɔn somaa Yesu baa asase so ma obewu maa yɛn nyinaa. Yesu wu no nti, seesei nnipa nyinaa betumi anya hokwan atena ase daa a bɔne biara nni wɔn ho.

▸ Ti 8, nky. 21; Ti 9, nky. 13

Nkɔmhyɛ a ɛwɔ Daniel ti 4 ma yehu sɛ Onyankopɔn de n’Ahenni besi hɔ wɔ afe 1914.

Nkɔmhyɛ no: Yehowa maa Ɔhene Nebukadnesar soo dae bi. Ná ɛyɛ nkɔmhyɛ a ɛfa dua kɛse bi a wotwa kyenee ho. Dae no mu no, wɔde kɔbere kyekyeree dua no dunsin na amfifi kosi sɛ “mmere ason” betwa ne ti so. Ɛno akyi no, dua no bɛsan afifi bio.—Daniel 4:1, 10-16.

Sɛnea nkɔmhyɛ no fa yɛn ho: Dua no gyina hɔ ma Onyankopɔn tumidi. Tete no na Yehowa nam ahemfo a wɔwɔ Yerusalem so di Israel man no so. (1 Beresosɛm 29:23) Nanso ahemfo no anni nokware, enti wɔn tumidi no baa awiei. Wɔsɛee Yerusalem afe 607 A.Y.B. Saa bere no na “mmere nson” no fii ase. (2 Ahene 25:1, 8-10; Hesekiel 21:25-27) Bere a Yesu kae sɛ “amanaman no betiatia Yerusalem so, kosi sɛ amanaman mmere a wɔahyɛ no bewie du” no, na ɔreka “mmere nson” no ho asɛm. (Luka 21:24) Enti bere a Yesu wɔ asase so no, na “mmere nson” no mmaa awiei. Yehowa hyɛɛ bɔ sɛ, “mmere nson” no ba awiei a, obesi ne Hene. Ɔhene foforo yi ne Yesu, na ne tumidi no de nhyira a enni awiei bɛbrɛ Onyankopɔn nkurɔfo wɔ asase so baabiara.—Luka 1:30-33.

“Mmere nson” no tenten: “Mmere nson” no dii mfe 2,520. Efii ase afe 607 A.Y.B., na ɛbaa awiei afe 1914. Saa bere no na Yehowa de Yesu, Mesia no, sii Onyankopɔn Ahenni no so Hene wɔ soro.

Ɛyɛɛ dɛn na yenyaa mfe 2,520 no? Bible ka sɛ mmere mmiɛnsa ne fã yɛ nnafua 1,260. (Adiyisɛm 12:6, 14) Enti “mmere nson” no yɛ nnafua 1,260 no mmɔho, anaa nnafua 2,520. Esiane sɛ nkɔmhyɛ mu no, ‘da koro biara yɛ afe’ nti, nnafua 2,520 no bɛyɛ mfe 2,520.—Numeri 14:34; Hesekiel 4:6.

▸ Ti 8, nky. 23

Asɛmfua “ɔbɔfo panyin” no kyerɛ “abɔfo nyinaa so panyin.” Ɔbɔfo panyin baako pɛ na Bible ka ne ho asɛm, na wɔfrɛ no Mikael.—Daniel 12:1; Yuda 9.

Onyankopɔn abɔfo anokwafo no nyinaa, Mikael na ɔda wɔn ano. Adiyisɛm 12:7 ka sɛ: ‘Mikael ne n’abɔfo ne ɔtweaseɛ no ne n’abɔfo koe.’ Adiyisɛm nhoma no ka sɛ Yesu na ɔda Onyankopɔn asafodɔm no ano. Enti Yesu din foforo ne Mikael.—Adiyisɛm 19:14-16.

▸ Ti 9, nky. 4

Yɛka nna a edi akyiri a, ɛkyerɛ mmere a nneɛma akɛse besisi wɔ asase so ansa na Onyankopɔn Ahenni abɛsɛe Satan wiase no. Ɛtɔ da a, Bible nkɔmhyɛ ka nna a edi akyiri no ho asɛm sɛ “bere a ɛwɔ hɔ yi awiei” anaa “onipa Ba no mmae.” (Mateo 24:3, 27, 37) Bere a Onyankopɔn Ahenni fii ase dii tumi wɔ soro afe 1914 no, saa bere no na “nna a edi akyiri” no hyɛɛ ase. Ɛbɛba awiei wɔ Harmagedon, bere a wɔasɛe Satan wiase no.—2 Timoteo 3:1; 2 Petro 3:3.

▸ Ti 9, nky. 5

Sɛ Onyankopɔn nyan obi a wawu ba nkwa mu a, ɛno na wɔfrɛ no owusɔre. Bible ka owusɔre nkron ho asɛm. Nnipa bi te sɛ Elia, Elisa, Yesu, Petro, ne Paulo nyinaa nyanee awufo. Onyankopɔn na ɔmaa wɔn tumi ma wɔde yɛɛ anwonwade yi nyinaa. Yehowa ahyɛ bɔ sɛ obenyan “wɔn a wɔteɛ ne wɔn a wɔnteɛ” aba nkwa mu wɔ asase so. (Asomafo Nnwuma 24:15) Bible ka nso sɛ ebinom benya owusɔre akɔ soro. Wei yɛ bere a Onyankopɔn benyan wɔn a wapaw wɔn anaa wasra wɔn no ma wɔakɔka Yesu ho wɔ soro.—Yohane 5:28, 29; 11:25; Filipifo 3:11; Adiyisɛm 20:5, 6.

▸ Ti 9, nky. 13

Ahonhonsɛmdi yɛ ɔkwan a obi fa so ne ahonhom anaa abɔfo bɔne di nkitaho. Ɛtɔ da a, wɔyɛ saa tee anaa wɔfa nipa te sɛ ɔkɔmfo, ɔdebisafo, anaa osumanni so. Wei nyinaa yɛ bɔne. Nea ɛma ebinom di ahonhonsɛm ne sɛ wogye atoro nkyerɛkyerɛ di. Ebi ne sɛ onipa wu a, honhom bi wɔ ne mu a ɛkɔ so tena ase na ɛwɔ tumi paa. Adaemone no bɔ mmɔden sɛ wɔbɛma nnipa ayɛ Onyankopɔn so asoɔden. Nsoromma mu hwɛ, abosonkɔm, nkonyaayi, abayisɛm, gyidihunu, asumansɛm ne tumi a emfi Onyankopɔn a wɔde yɛ anwonwade nyinaa yɛ ahonhonsɛmdi. Nneɛma bi te sɛ nhoma, nkrataa, mfoni, nsoromma mu hwɛ ne nnwom ahorow ama ahonhonsɛmdi ayɛ sɛ biribi a wɔde gyigye ani kɛkɛ, na asɛm biara nni ho. Obi wu a, amanneɛ a wɔyɛ no mu pii yɛ ahonhonsɛmdi. Ebi ne afɔre a wɔbɔ ma owufo, ayiyɛ ahorow, nna a wodi, kunayɛ ne apɛsi. Ebinom nso wɔ hɔ a wɔnom nnubɔne na ama wɔatumi ne adaemone adi nkitaho.—Galatifo 5:20; Adiyisɛm 21:8.

▸ Ti 10, nky. 10; Ti 16, nky. 4

Yehowa ne ade nyinaa so Tumfoɔ Nyankopɔn, na ɔno na ɔbɔɔ biribiara a ɛwɔ wiase. (Adiyisɛm 15:3) Ɛno nti, ɔno ne nneɛma nyinaa Wura, na ɔno na odi ade nyinaa so tumi. Ɔwɔ biribiara a wabɔ so tumi. (Dwom 24:1; Yesaia 40:21-23; Adiyisɛm 4:11) Yehowa ahyehyɛ mmara ama nneɛma a wabɔ nyinaa. Yehowa wɔ hokwan sɛ ɔpaw ebinom de tumi hyɛ wɔn nsa. Sɛ yɛdɔ Yehowa na yetie no a, ɛkyerɛ sɛ yɛtaa ne tumidi akyi.—1 Beresosɛm 29:11.

▸ Ti 11, nky. 10

Sɛ obi tu nyinsɛn gu a, na ɔboapa na wakum abofra a ɔhyɛ yafunu mu no. Ɛnyɛ akwanhyia bi na ato no, anaasɛ pɔn na wapɔn abofra no. Sɛ ɔbea bi fa yafunu a, onipa foforo koraa na abɛtɔ ne yam; ɛnyɛ ne nipadua no fã bi. Ɛsono abofra no koraa ɛnna ɛsono ne maame.

▸ Ti 13, nky. 5

Wei yɛ ɔkwan baako a nnuruyɛfo fa so sa yare. Wɔde obi mogya anaa mogya mu nneɛma atitiriw nnan no bi ma ɔyarefo no. Mogya mu nneɛma atitiriw nnan no ne mogya mu nsu, mogya mu nkwammoaa kɔkɔɔ, mogya mu nkwammoaa fitaa, ne mogya mu nkwammoaa ntrantraa.

▸ Ti 13, nky. 13

Sɛ Bible ka “nteɛso” a, ɛnkyerɛ asotwe nko ara. Nteɛso betumi ayɛ akwankyerɛ, ntetee, ne atenetene. Sɛ Yehowa teɛ obi so a, ɔnyɛ no atirimɔden so anaa ɔmma ɛmmoro so nso. (Mmebusɛm 4:1, 2) Yehowa ayɛ nteɛso ho nhwɛso pa ama awofo. Sɛ ɔteɛ obi so a, ɛboa onipa no ma n’ani begye nteɛso ho. (Mmebusɛm 12:1) Yehowa dɔ ne nkurɔfo, na ɔtete wɔn. Ɔma wɔn akwankyerɛ de tenetene wɔn adwene, na ɛboa wɔn ma wosusuw nneɛma ho yiye na wɔbɔ wɔn bra ma ɛne n’apɛde hyia. Nea awofo betumi ayɛ de ateɛ wɔn mma so no bi ne sɛ, wɔbɛboa wɔn ma wɔahu nea enti a ɛsɛ sɛ wɔyɛ osetie. Nea ɛka ho bi ne sɛ wɔbɛkyerɛkyerɛ wɔn ama wɔadɔ Yehowa, na wɔn ani agye n’Asɛm Bible ho. Afei nso, ɛsɛ sɛ wɔboa wɔn ma wɔte Bible nnyinasosɛm ase.

▸ Ti 14, nky. 13

Wɔyɛ ahonhommɔne a wɔwɔ tumi, na yɛrentumi mfa yɛn ani nhu wɔn. Adaemone yɛ abɔfo bɔne. Wɔbɛyɛɛ abɔfo bɔne bere a wɔyɛɛ Onyankopɔn so asoɔden na wɔbɛyɛɛ n’atamfo no. (Genesis 6:2; Yuda 6) Wɔkɔkaa Satan ho ma wɔsɔre tiaa Yehowa.—Deuteronomium 32:17; Luka 8:30; Asomafo Nnwuma 16:16; Yakobo 2:19.

▸ Ti 16, nky. 4