Пятница, июнь 12
«Бурган дээш кылыр ажыл-херээңер дээрге-ле Ооң айбылап чорутканы Кижиге бүзүрээри ол-дур» (Ин. 6:29).
Мөңге чуртталганы алыр дизе, Иисуска бүзүрээри чугула (Ин. 3:16—18; 17:3). Иисус еврейлерге Бурганның күзелин тода ажыткан. Ынчалза-даа, олар тогбаан, харын-даа: «Силерге бүзүрей бээривис хире кандыг кайгамчык демдекти биске көргүзер силер?» — деп айтырган (Ин. 6:30). Моисейниң үезинде Бурган хуулгазын арга-биле өгбелеринге хүннүң хлеви болур маннаны берип турганын база чугаалааннар (Неем. 9:15; Ыд. ыр. 77:24, 25; Ин. 6:31). Моон алырга, оларның бодалы чүгле чиир хлеб алыры болган. Иисус маннага бодаарга, мөңге амыдыралды бээр «алыс шын хлебти» безин чугаалаарга, ооң чүү дээнин ол чон сонуургаваан (Ин. 6:32). Мага-бот хереглелдерин хандырар дээш, Иисустуң дамчыдыксаан чугула алыс шын билиин олар эрттирипкеннер. w24.12 ар. 5, абз. 10, 11
Суббота, июнь 13
«Бүгү бар чүүлдү Бурган туткан» (Евр. 3:4).
Школага ажы-төлүңер бойдуста хөй угулзалар шыңгыы хоойлуларга чагырткан деп билип алыр. Чижээ, харжыгаш бүрүзү фракталдар деп адаар геометриктиг хевирлерден бүткен. Ынчалза-даа фракталдыг тургузуг чүгле харжыгашта эвес, а өске чаяалгаларда база бар. Ол хоойлуларның болгаш угулзаларның автору кымыл? Ол дег ханы айтырыгларны бодангаш, уругларыңар шупту чүвени Бурган чаяаган деп түңнелге кээр боор. А өзе берген ажы-төлден: «Бурган бисти чаяаган болза, аас-кежиктиг чурттаарынга өөредип каар эвеспе?» — деп айтырып болур. Соонда ол чүүлге Бурган бисти Библия таварыштыр өөредип турар деп тайылбырлап бээр болза эки. w24.12 ар. 16, абз. 8
Улуг-хүн, июнь 14
«Дүрзү-бурганга чүдүүр улустуң безин билбези хай-калчаа самыыраар чорук силерде бар дээр-дир: бирээңер соңгу иези-биле холбажы берген дээр-дир» (1 Кор. 5:1).
Павел элчин ыдыктыг сүлдеге бүргеткеш, буруузун миннивес кижини араңарга тургуспаңар деп чагаа бижээн (1 Кор. 5:13). Акы-угбалар канчаар алдынар ужурлуг турган? Павел ындыг кижи-биле «харылзашпаңар» деп бижээн. Олар ооң-биле безин кады чемненмес ужурлуг турган (1 Кор. 5:11). Бир кижи-биле кады чемненип олургаш, чугаалажыр болгай бис. Ынчап кээрге, акы-угбалар ол кижи-биле кады үе эрттирбес ужурлуг турган. Ынчаар чыыш айыылдыг салдарга алыспас турган (1 Кор. 5:5—7). Оон аңгыда, олар ооң-биле чоок харылзашпас болза, ол кижи Иеговага кайы хире аарышкыны чедиргенин билип кааш, арын-нүүрү аарып, буруузун миннип чедип кээринге олар дузалаар турганнар. w24.08 ар. 15, абз. 4, 5