Четверг, май 7
«Силер Мени кайгамчык демдектерни көрүп, билгеш эвес, а тоттур хлеб чиген болгаш, дилеп турарыңар ол-дур» (Ин. 6:26).
Иисустуң чемгерген улузу чүгле тодуп алырын бодаан. Ону кайыын билир бис? Дараазында хүн ол чон Иисусту-даа, ооң өөреникчилерин-даа тыппаан. Ол үеде Тивериа́дадан хемелер кээрге, олар аңаа олурупкаш, Капернау́мче Иисусту дилеп чорупкан (Ин. 6:22—24). Олар Бурганның Чагыргазының дугайында хөйнү билип алыксаан бе? Чок, чүгле аъш-чем күзээн. Чүге ындыг түңнел кылып болур? Капернаумдан Иисусту тып алырга, чүү болганынче кичээнгейни салыңар. Иисус оларга «тоттур хлеб чиген» болгаш, чем дилеп келгенин дорту-биле чугаалаан. Олар «эстип-хайлы бээр аъш-чем» алырын кыскан. Херек кырында олар «мөңге амыдыралды берип шыдаар аъш-чем алыр дээш» кызып-кылаяр турган (Ин. 6:26, 27). Шак ындыг аъш-чемни Адазы бээрин Иисус чугаалаан. w24.12 ар. 5, абз. 8, 9
Пятница, май 8
«Мерген угаанныг кижиниң угааны ооң сөзүн сарыыл киирер база чугаа-сөзүн бүзүренчиг болдурар» (У. ч. 16:23).
Сценадан илеткелге азы бир кижиге хууда сүме бээрде, сөстериңни кезээде Бижилгеге үндезиле, акый. Библияны, ном-дептеривисти кызымак шинчиле (У. ч. 15:28). Шинчилел үезинде шүлүктерниң канчаар тайылбырлаанынче кичээнгей салыр болзуңза, ону шын ажыглап шыдаар сен. Өске улустуң чүрээнге дээштиг кылдыр өөрет. Мергежилдиг башкы болур дизе, чүнү экижидип ап болурун дуржулгалыг удуртукчулардан айтырып, оларның сүмелерин эдер (1 Тим. 5:17). Олар акы-угбаларны сорук киирер харыысалгалыг. Чамдыкта удуртукчулар өске христианнарга сүме бээр, безин оларны сойгалаар апаар. Канчаарга-даа ону эвилең-ээлдек кылыры чугула. Өске улуска чылыг-чымчак, ынакшылды көргүзүп, сүмелерни кезээде Библиядан алыр болзуңза, Өндүр улуг башкывыс Иисустан үлегерни ап турарың болур (Мф. 11:28—30; 2 Тим. 2:24). w24.11 ар. 24, абз. 16
Суббота, май 9
«Бүгү аймактарга — Ооң кылган кайгамчык чүүлдерин чугаалап чедиңер» (Ыд. ыр. 95:3).
Өске улуска Иегованың дугайында чугаалааш, ону алдаржыдып турар бис. Библия бисти: Иегованы «алгап ырла», ооң «адын алгап-йөрээңер», «камгалалын медээлеңер», ооң «алдарын, бүгү аймактарга... чугаалап чедиңер» деп кыйгырган (Ыд. ыр. 95:1—3). Бо шупту дээрде Адавысты алдаржыдар аргалар-дыр (Аж.-ч. 4:29). Бис Иегованы өргүлдеривис-биле база алдаржыдып турар бис. Бурунгу үеден бээр, Бурганның бараалгакчылары ону бар үнелиг чүүлү-биле алдаржыдып чораан (У. ч. 3:9). Чижээ, израильчилер өргээниң тудуун-даа, септелгезин-даа өргүлдери-биле хандырган (4 Хаан. 12:4, 5; 1 Чыл. 29:3—9). Чамдык өөреникчилер Иисусту база элчиннерни «хууда эт-хөреңгизи-биле» деткээн (Лк. 8:1—3). Оон аңгыда, бирги вектиң христианнары чединмес акы-угбаларга дузаны көргүскеннер (Аж.-ч. 11:27—29). Амгы үеде акша-төгериивисти өргүп тургаш, Иегованы алдаржыдып болур бис. w25.01 ар. 4, абз. 8; ар. 5, абз. 11