Jnop kaʼiytik te ya kakʼbeytik jun majtanil te machʼa kʼux ta koʼtantik. ¿Mabal jichuk te ya jmel koʼtantik kʼalal ya kiltik te jaʼnax ya skʼej sok ya xchʼay ta yoʼtan te majtanile? Pero, ya yakʼ stseʼelil koʼtantik kʼalal ya kiltik te ya stuuntes sok ya yal wokol ta swenta te majtanile. ¿Bin ya yakʼ jnoptik te ejemplo ini? Te Jehová la yakʼ ta jtojoltik te sNichʼan. ¡Bayal ya x-akʼbot stseʼelil yoʼtan kʼalal ya kakʼbeytik yil te ya kalbeytik wokol ta swenta te stojol kolel sok te skʼuxul yoʼtan te la yakʼ ta ilel ta jtojoltik! (Juan 3:16; Rom. 5:7, 8). Kʼalal ya xkʼax bael te jaʼbiletik yaniwan xjajch ta pejkʼajel te bitʼil mukʼ skʼoplal ya kiltik te stojol kolel. Kʼax tseʼel koʼtantik te bitʼil kichʼojtik te majtanil-abi, pero jichniwan ya xkʼot te ya jkʼejtik sok te ya xchʼay ta koʼtantike. Yuʼun ma jichuk ya xkʼot ta pasel sok te ma xchʼay ta koʼtantik te bitʼil ya kaltik wokol ta stojole, ya skʼan te ya jnopilan ta koʼtantik spisil-ora te bintik spasoj ta jtojoltik te Jehová sok te Jesús. w25.01 26 párr. 1, 2

Te hermano «ya skʼan te manchuk ochelto ta jchʼuunjel» yuʼun ya yichʼ yaʼtel ta anciano. Manchukme mato bayal jaʼbil yichʼoj jaʼ, ya skʼan tiempo yuʼun ya yakʼ ta ilel te yijubenix te schʼuunel yoʼtan. Te bitʼil mato yichʼoj yaʼtel jich bitʼil anciano ya skʼan te ya yakʼ ta ilel te jichuk stalel bitʼil te Jesús, te pekʼeluk yoʼtan sok te ya skʼan ya x-abatin ta stojol te Jehová te bin-utʼil ya skʼan sok te bin-ora ya skʼan stukele (Mat. 20:23; Filip. 2:5-8). Jaʼnix jich ya skʼan ya yakʼ ta ilel «te tojuk yoʼtan» ta stojol te Jehová sok te mantaliletik yuʼune, sok te ya schʼuun te tojobtesel te ya yakʼ te Jehová ta swenta te organización yuʼune. Te Biblia jamal ya yal te jtul superintendente ya skʼan te yakuk snaʼ ta lek nojpteswanej. ¿Yabal skʼan ya yal-abi te ya skʼan te ya snaʼ yakʼel ta lek discurso? Maʼuk, ma jaʼuk ya skʼan ya yal-abi. Bayal ancianoetik te wokol ya yaʼiyik yakʼel jun discurso, pero kʼax leknax te bitʼil ya xnojpteswanik sok leknax ya spasik te bitʼil ya yulaʼtayik te hermanoetik. w24.11 23, 24 párr. 14, 15

Teme ya ata jun texto ta Biblia te ma xkʼot ta awoʼtane, pasaxan investigar. Sok ta patil, ta sjunal kʼajkʼal nopilana ta awoʼtan te bin la atae sok ilawil bin ya yakʼbat anop ta swenta te Jehová, te sNichʼan sok te skʼuxul yoʼtanik ta atojole (Sal. 119:97). Mame xchebaj awoʼtan teme ma spisiluk-ora ay bin yachʼil ya anop o te ay bin ya amulan te kʼalal ya anop te Biblia. Snopel te Biblia jaʼ jich kʼoem te bin-utʼil sleel oro. Bayal ants winiketik ya yakʼ bayal stiempoik ta sleel oro, ya sleik sok slamalil yoʼtanik sok ma skom sbaik ta sleel. Manchukme chʼin-nax te oro te ya staike, kʼax mukʼ skʼoplal ta yoʼtanik. Te kʼulejalil te ya jtatik ta Biblia jaʼ kʼaxtoxan mukʼ skʼoplal-a te bitʼil te oroe (Prov. 8:10). Jaʼ yuʼun, lamalukme awoʼtan sok mame xa akom aba ta snopel te Biblia (Sal. 1:2). w25.01 25 párr. 14, 15