Carta ta stojol te Romanoetik

9 Ya kal te bin smelelil ta swenta te Cristo; ma jlotuk, te bin ya yal te koʼtan te tojobtesbil yuʼun te chʼul espiritue,* 2 jaʼ te bayal ya jmel koʼtan sok te spisil-ora ay bin kʼux ya kaʼiy ta koʼtan. 3 Koʼtanuk te joʼon ya kichʼ lokʼesel ta stojol te Cristo sok te joʼukon ya kichʼ castigo swenta jaʼ ya staik koltayel te kermanotak te jun jtsʼumbal sok, 4 jaʼ te israeletike. Jaʼik te machʼatik la yichʼik tsael jich bitʼil yal snichʼnab Dios, jaʼnix te Dios te ya yakʼtiklanbey yil te yutsilal te chapbilkʼop, te Ley sok te bintik jamal yaloj ya spas soknix te tʼujbil majtanil te ya x-abatinik ta stojole. 5 Ta stsʼumbalik lokʼemik tal te antiguo tatiletik, jaʼnix ta stsʼumbalik te tal te Cristoe. Te Dios, te Machʼa toyol ay yuʼun spisil te bintik aye, akʼa yichʼ albeyel yutsil skʼoplal ta sbajtelkʼinal. Jichuk.

6 Pero, ma yuʼunuk jaʼ chʼay te bin la yal te Diose. Melel, ma spisiluk te israeletik talemik ta stsʼumbal Israel. 7 Jaʼnix jich, ma spisiluk yal snichʼnab te Abrahán manchukme jaʼ stsʼumbalik, jaʼ jich te bin-utʼil tsʼibaybile: «Te atsʼumbal te albil skʼoplale yame xchiknaj tal ta stojol te Isaac». 8 Te machʼatik talemik ta stsʼumbal te Abrahán ma jaʼuk smelelil yal snichʼnab Dios. Te machʼatik smelelil yal snichʼnab te Abrahán jaʼ te machʼatik ayinik ta swenta te bin jamal yaloj te Diose. 9 Melel jich jamal la yal te Diose: «Ya xtalon ta yan jaʼbil ta jich ora ini, sok yame x-ayin* jtul skerem-al te Sarae». 10 Jaʼnix jich kʼot ta stojol-euk te Rebeca te kʼalal la yikʼ lo-alaletik* te jtulnax state, jaʼ te antiguo jtatik Isaac. 11 Te kʼalal mato ayinemik-a* sok te kʼalal mato ayuk bin lek o chopol* spasojik-ae, jamal la yakʼ ta ilel te Dios te ma jaʼuk ta swenta yaʼtelik te ya xkʼot ta pasel yuʼun te bin schapoje, jaʼnax ta swenta te ikʼel yuʼune, 12 jich la yichʼ albeyel te Rebeca: «Te bankilal jaʼme ya xmosoinot yuʼun te ijtsʼinale». 13 Yuʼun jich tsʼibaybil: «Kʼux la kaʼiy ta ko’tan te Jacob, pero la jpʼaj stukel te Esaú», te xchie.

14 ¿Bin ya kaltikix yuʼun-a jiche? ¿Yuʼunbal ma stojiluk te bin ya spas te Diose? ¡Ma jichuk stukel-abi! 15 Melel jich la yalbey te Moisés: «Ya jnaʼbey yoʼbolil sba te machʼa ya jkʼan ya jnaʼbey yoʼbolil sba, sok ya kakʼbey yil skʼuxul koʼtan te machʼa ya jkʼan ya kakʼbey yil skʼuxul koʼtane», te xchie. 16 Jaʼ yuʼun, ma jaʼuk ta swenta te bin ya skʼan yoʼtan jtul ants winik ni jaʼuk teme tulan aʼtejeme, jaʼ chikan teme ya xnaʼbot yoʼbolil sba yuʼun te Diose. 17 Melel te sJun Dios jich la yalbey te faraón: «Maba jlajinojbat akuxlejal ta swenta ini: yuʼun ya kakʼbat awil te kuʼele sok swenta ya xpujk skʼoplal te jbiil ta swolol balumilal». 18 Jich yuʼun ya snaʼbey yoʼbolil sba teme jich ya skʼan yoʼtan stukele, pero te machʼa ya skʼan xtonob yoʼtane maba ya xkomot yuʼun te Diose.

19 Pero, jich ya awalbon: «¿Bin yuʼun yato slebey smul te ants winiketike? ¿Yuʼunbal ay machʼa ya xjuʼ ya skontrainbey te skʼanojel yoʼtane?». 20 Pero, jaʼat, te chʼichʼbakʼetatnaxe, ¿machʼa ya akuy aba te ya asutbey te skʼop te Diose? Te bin pasbile, ¿yabal xjuʼ te jich ya yalbey te machʼa pasot yuʼun: «¿Bin yuʼun te jich la apasone?»? 21 ¿Yuʼunbal ma xjuʼ yuʼun te jpakʼojom* te ya spas ta jkʼolnax ajchʼal jun vasija te ya xtuun sok jun vasija te ma xtuune? 22 Jaʼnix jich spasoj-euk te Diose, juʼ te lajuk yakʼ ta ilel te yilinba sok la yakʼ ta naʼel te ay yuʼel, pero kujch yuʼun sok slamalil yoʼtan te bin la spasik te machʼatik jich kʼoemik te bin-utʼil vasijaetik te pasbilik yuʼun ya yichʼik lajinel. 23 Jich la spas te Dios swenta la yakʼ ta ilel te smukʼul yutsilal ta stojol te machʼatik jich kʼoemik te bin-utʼil vasijaetik te la yichʼ naʼbeyel yoʼbolil sbaik, jaʼ nail la schajpan yuʼun la yakʼtiklanbey yutsilal. 24 Joʼotikme-abi te la kichʼtik ikʼel yuʼune, ma jaʼuknax ta yolil te judioetik, jaʼnix jich ta yolil te jyanlumetike. 25 Jichnix te bin-utʼil la yal te Dios ta sjun Oseas: «Yame kalbey te jaʼ lum kuʼun te lum te ma kuʼunuk-ae sok yame kalbey te kʼux ta koʼtan te machʼa maba kʼux ta koʼtan-ae. 26 Ta lugar te banti la yichʼik albeyel: ‹Te jaʼexe maba lumex kuʼun›, teyme ya yichʼik albeyel-a te jaʼ yal snichʼnab te kuxul Dios», te xchie.

27 Jaʼnix jich, te Isaías jich la yal ta stojol te lum Israel: «Manchukme jich yipalik te bin-utʼil sjiʼal mar te snichʼnab Israel, jtebnax te machʼatik ya xkolike. 28 Melel te Jehová* yame yichʼ ta kʼop spisil te ants winiketik ta balumilal, tsʼakalme ya spas sok oranaxme ya spas». 29 Jaʼnix jich, te bin-utʼil la yal jilel-euk te Isaías: «Te manchuk la yijkitaybotik jilel jtsʼumbaltik te Jehová* te jwolwanej yuʼun te soldadoetik,* jich kʼootik te bin-utʼil te Sodoma sok pajal kʼootik sok te Gomorra te jichuke».

30 ¿Bin ya kaltikix yuʼun-a jiche? Manchukme maba yakik ta sleel-a te toj ya x-ilotik yuʼun Dios te jyanlumetik, toj la yichʼik ilel ta swenta te schʼuunel yoʼtanike. 31 Manchukme la spasik tulan te israeletik yuʼun toj ya x-ilotik yuʼun te Dios ta swenta te ya schʼuunik spasel te leye, maba juʼ yuʼunik schʼuunel te leye. 32 ¿Bin yuʼun? Melel la skuyik te toj ya yichʼik ilel yuʼun Dios ta swentanax te yaʼtelike, ma jaʼuk ta swenta te schʼuunel yoʼtanike. La skʼojchin yokik ta «ton yuʼun kʼojchinojibal»; 33 jich te bin-utʼil tsʼibaybil: «¡Ilawilik! Ta Sion ya kakʼ jun ton yuʼun kʼojchinojibal sok jun mukʼul ton te ya xyaleswan, pero te machʼa ya yakʼ schʼuunel yoʼtan ta stojol maba ya xjil ta kʼexlal yuʼun».