Levítico

4 Te Jehová jich la yalbeyxan te Moisés: 2 «Albeya yaʼiy te israeletik ini: ‹Teme ay machʼa ma yolojuk la sta smul sok ay bin la spas te yaloj te Jehová te ma xjuʼ ta pasel, yame skʼan ya spas ini:

3 »›Teme ya sta smul te sacerdote te tsabil te jich ya yakʼbey sta smul-euk te lume, yame skʼan ya yakʼ ta stojol te Jehová jkojt jkolel* toro te maʼyuk schamel jich bitʼil majtanil ta swenta mulil ta skaj te smul la stae. 4 Yame yikʼ bael te toro ta stojol te Jehová ta yochibal te nailpakʼ ta swenta tsoblej, yame skʼan ya skajan te skʼab ta sjol te toro sok yame smil ta stojol te Jehová. 5 Tey-abi, te sacerdote te tsabile yame yichʼ bael jtebuk te schʼichʼel te toro ta yutil te nailpakʼ ta swenta tsoblej. 6 Te sacerdote ya smul ta chʼichʼ te sniʼ skʼab sok yame stsijtsin jukeb buelta jtebuk te chʼichʼ ta stojol te Jehová ta yelaw te cortina yuʼun te chʼul awilal. 7 Jaʼnix jich, te sacerdote yame sjaxbey jtebuk te chʼichʼ ta xulubiletik yuʼun te skajtajib schikʼojibal pom te ay ta stojol te Jehová ta nailpakʼ ta swenta tsoblej. Ta patil yame smal te schʼichʼel te toro te jilxan ta banti yok skajtajib chikʼbil majtanil te ay ta yochibal te nailpakʼ ta swenta tsoblej.

8 »›Ta patil yame slokʼesbey spisil te sjujpʼel* te toro te ya yakʼ ta majtanil ta swenta mulil: te sjujpʼel te potsol-a te sbikil sok spisil te sjujpʼel te lapʼal ta sbikil, 9 jaʼnix jich te cheb sriñon sok te sjujpʼel* te potsol-a sok te nopol* ay ta slomo. Jaʼnix jich yame slokʼesbey te sjujpʼel te potsol-a te sejkub. 10 Jichnix ya yichʼ pasel te bitʼil te toro te ya yichʼ akʼel ta milbil majtanil ta swenta lamalkʼinal. Te sacerdote yame yakʼ te xtomet schʼailel spisil ta sba te skajtajib chikʼbil majtanil.

11 »›Pero, te snujkulel te toro sok spisil te sbakʼetal, sjol, yok, sbikil sok te stsaʼ 12 —jaʼ spisil te bin jil yuʼun te toro—, yame skʼan ya yakʼ ta lokʼesel spisil ta fuera yuʼun te campamento ta lugar te ma boloben skʼoplal te banti ya yichʼ chʼojel te stanul kʼajkʼ sok yame schikʼ spisil ta sba siʼ te yak ta tilele. Yame skʼan chikʼel te banti ya yichʼ chʼojel te stanul kʼajkʼe.

13 »›Teme spisil te lum Israel la sta smul ta skaj te ma yolojuk la sta smulik, te ma snaʼojik-a* te la spasik te bin yaloj te Jehová te ma xjuʼ ta pasele, 14 pero ya yichʼ naʼel te staoj smulik, yame skʼan ya yakʼik* jkojt jkolel* toro jich bitʼil majtanil ta swenta mulil sok ya skʼan ya yichʼik bael ta yelaw te nailpakʼ ta swenta tsoblej. 15 Te jwolwanejetik yuʼun te lum yame skajan skʼabik ta sjol te toro ta stojol te Jehová sok ya yichʼ milel te toro ta stojol te Jehová.

16 »›Tey-abi, te sacerdote te tsabile yame yichʼ bael jtebuk schʼichʼel te toro ta yutil te nailpakʼ ta swenta tsoblej. 17 Te sacerdote yame skʼan ya smul ta chʼichʼ te sniʼ skʼab sok yame stsijtsin jukeb buelta jtebuk te chʼichʼ ta stojol te Jehová ta yelaw te cortina. 18 Ta patil yame sjaxbey jtebuk te chʼichʼ ta xulubiletik yuʼun te kajtajibal te ay ta stojol te Jehová ta nailpakʼ ta swenta tsoblej. Yame smal te schʼichʼel te toro te jilxan ta banti yok te skajtajib chikʼbil majtanil te ay ta yochibal te nailpakʼ ta swenta tsoblej. 19 Yame slokʼesbey spisil te sjujpʼel* te toro sok yame yakʼ te xtomet schʼailel ta sba te kajtajibale. 20 Jich ya spasbey te toro jich te bitʼil la spasbey te yan toro yuʼun te majtanil ta swenta mulil. Jaʼme jich ya spasik. Te sacerdote yame yakʼ te ya staik perdón yuʼun smulik te lume, jich ya yichʼik pasbeyel perdón. 21 Yame skʼan ya yakʼ ta lokʼesel te toro ta fuera yuʼun te campamento sok yame yichʼ chikʼel jich te bitʼil la yichʼ chikʼel te sbabial toro. Jaʼme majtanil ta swenta mulil te ya yichʼ akʼel ta stojolike.*

22 »›Teme jtul jolal yuʼun te lum ma yolojuk la sta smul ta skaj te ay bin la spas te yaloj te Jehová te Dios yuʼun te ma xjuʼ ta pasel te jich la sta smul yuʼune 23 o te la snaʼ stojol te la sta smul ta skʼaxuntayel jun mantalil, yame yichʼ bael jich bitʼil majtanil jkojt jkolel* tat tentsun te maʼyuk schamele. 24 Yame skʼan ya skajan skʼab ta sjol te jkolel* tat tentsun sok yame smil te banti ya yichʼ milel te chikʼbil majtanil ta stojol te Jehová. Jaʼme majtanil ta swenta mulil. 25 Te sacerdote yame sjaxbey jtebuk sok te sniʼ skʼab te chʼichʼ yuʼun te majtanil ta swenta mulil ta xulubiletik yuʼun te skajtajib chikʼbil majtanil. Sok yame smal te chʼichʼ te jilxan ta banti yok te skajtajib chikʼbil majtanil. 26 Sok yame yakʼ te xtomet schʼailel spisil te sjujpʼel* te majtanil ta sba te kajtajibal jich te bitʼil la spas sok te sjujpʼel te milbil majtanil ta swenta lamalkʼinal. Te sacerdote yame yakʼ te ya sta perdón yuʼun te smul, jichme ya yichʼ pasbeyel perdón.

27 »›Teme ay machʼa ta lum ma yolojuk la sta smul ta skaj te ay bin la spas te yaloj te Jehová te ma xjuʼ ta pasel te jich la sta smul yuʼune 28 o te la snaʼ stojol te la sta smul, yame yichʼ bael jkojt jkolel* smeʼ tentsun te maʼyuk schamel jich bitʼil majtanil ta swenta te smule. 29 Yame skʼan ya skajan skʼab ta sjol te majtanil ta swenta mulil sok yame smil te banti ya yichʼ milel te chikʼbil majtanil. 30 Te sacerdote yame sjaxbey jtebuk sok te sniʼ skʼab te chʼichʼ yuʼun te majtanil ta xulubiletik yuʼun te skajtajib chikʼbil majtanil sok yame smal te chʼichʼ te jilxan ta banti yok te kajtajibale. 31 Sok yame slokʼesbey spisil te sjujpʼel* te majtanil-abi jich te bitʼil ya yichʼ lokʼesbeyel sjujpʼel te milbil majtanil ta swenta lamalkʼinal. Te sacerdote yame yakʼ te xtomet schʼailel ta sba te skajtajib chikʼbil majtanil jich bitʼil jun majtanil te kʼax sumetnax yikʼ* ta stojol te Jehová. Te sacerdote yame yakʼ te ya sta perdón yuʼun te smul, jichme ya yichʼ pasbeyel perdón.

32 »›Pero, teme jaʼ ya yakʼ jkolel* tuminchij ta swenta mulil, yame skʼan te jaʼuk smeʼ te maʼyuk schamele. 33 Yame skajan te skʼab ta sjol te majtanil ta swenta mulil, jichme ya smil te bitʼil majtanil ta swenta mulil te banti ya yichʼ milel te chikʼbil majtanil. 34 Te sacerdote yame sjaxbey jtebuk sok te sniʼ skʼab te chʼichʼ yuʼun te majtanil ta swenta mulil ta xulubiletik yuʼun te skajtajib chikʼbil majtanil sok yame smal te chʼichʼ te jilxan ta banti yok te kajtajibale. 35 Ya slokʼesbey spisil te sjujpʼel* jich te bitʼil ya yichʼ lokʼesbeyel sjujpʼel te jkolel* tat tuminchij yuʼun te milbil majtanil ta swenta lamalkʼinal. Te sacerdote yame yakʼ te xtomet schʼailel ta kajtajibal ta sba te majtaniletik te ya yichʼ chikʼel ta stojol te Jehová. Te sacerdote yame yakʼ te ya sta perdón yuʼun te smul, jichme ya yichʼ pasbeyel perdón.