Apocalipsis

1 Jaʼ te bin la yakʼ ta naʼel te Jesucristo, te akʼbot snaʼ yuʼun te Dios, yuʼun jich ya yakʼbey yil te j-abatetik yuʼun te bintik nopol* ya xkʼotix ta pasele. Jich yuʼun, te Jesucristo la stikun te chʼul-abat yuʼune, ta swenta te chʼul-abat ini, la yakʼbey snaʼ ta señailetik te Juan te j-abat yuʼune, 2 jaʼ te machʼa la yakʼ ta naʼel te bin yaloj te Diose soknix te bin yaloj te Jesucristo, jich, jaʼ spisil te bintik la yile. 3 Tseʼelnaxme yoʼtan te machʼa tulan ya skʼopon te bintik ya yal te albilkʼop ini sok tseʼelnaxme yoʼtanik te machʼatik ya yaʼiyik stojol sok te machʼatik ya schʼuunik spasel te bintik tsʼibaybil tey-ae, melel nopolix* yorail te tiempo te albil skʼoplale.

4 Joʼon Juanon, ya jtikunbey ta stojol te jukeb congregacionetik te ayik ta skʼinal Asia:

Ayukme ta atojolik te slekil yoʼtan Dios te ma snujpʼuk ya kichʼtik sok te lamalkʼinal te talem ta stojol «te machʼa ay ta ora ini, te machʼa ay ta namey sok te ya xtale», soknix ta stojol te jukeb espirituetik te tekʼajtik ta stojol te smukʼul naktajib te Diose 5 soknix ta stojol te Jesucristo, te Testigo te jun yoʼtan, te Machʼa nail la yichʼ chaʼkuxajtesel ta yolil te machʼatik lajemik sok te jaʼ mukʼul Ajwalil yuʼun te ajwaliletik ta balumilal.

Jaʼ te machʼa kʼuxotik ta yoʼtan sok te la yakʼotik ta libre yuʼun te jmultik ta swenta te schʼichʼele 6 —sok la yakʼ te ya x-ochotik ta wentainwanej sok ta sacerdoteil ta stojol te Dios yuʼun sok te jaʼnix sTate—, ak’a yichʼ albeyel yutsil skʼoplal sok te ay yuʼel sbajtelkʼinal. Jichuk.

7 ¡Ilawilik! Yame xtal ta tokal, spisil te ants winiketik yame yilik soknix te machʼatik la slowike; ta swenta te Jesucristo spisil te ants winiketik ta balumilal yame smajulan yoʼtanik yuʼun te skʼuxul te wokolil. Lek ay, jichuk.

8 «Joʼon te Alfa sok te Omega* —xchi te Jehová* Dios—, te machʼa ay ta ora ini, te machʼa ay ta namey sok te machʼa ya xtale, jaʼ te Machʼa spisil ya xjuʼ yuʼune».

9 Joʼon Juanon, te kermano jbatik sok te joy jbatik ta utsʼinel, ta wentainwanej sok te kujchem kuʼuntik ta swenta te jun ayotik sok te Jesús, la kichʼ ikʼel bael ta jsejp kʼinal te ay ta yolil mar te Patmos sbiil ta skaj te la kalbey skʼoplal te Dios soknix te la kalbey skʼoplal te Jesuse. 10 Ta swenta te noj ta koʼtan te chʼul espíritu* kʼoon ta skʼajkʼalel te Kajwaltike, sok ay machʼa la kaʼiy te tulan kʼopoj ta jpat, te jich skʼop te bin-utʼil te trompeta, 11 te jich la yal: «Tsʼibaya ta balbil jun te bin ya awil sok tikuna bael ta stojol te jukeb congregacionetik: jaʼ te Éfeso, Esmirna, Pérgamo, Tiatira, Sardis, Filadelfia sok te Laodicea».

12 La jsut jba yuʼun ya kil te machʼa yak skʼoponbelone, te kʼalal la jsut jbae, la kil jukeb skajtajib kʼajkʼ te pastiklanbil ta oroe. 13 Ta yolil te skajtajib kʼajkʼetik la kil te ay machʼa tey ay-a, te jich yilel te bin-utʼil sNichʼan te Winik* te slapoj najtil kʼuʼul te ya xkʼot kʼalalto ta yok sok ay schujkil schʼujt te pasbil ta oro te chukul kʼalalto ta yoʼtan. 14 Jaʼnix jich, te sjol sok te stsotsel sjol jich sakal te bin-utʼil sakal te stsotsel tuminchij, jich te bin-utʼil meʼsik o toyiw, te site jaʼ jichik yilel te bin-utʼil kʼajkʼ te yak ta tilele. 15 Te yoke jichik yilel te bin-utʼil cobre te lekubtesbilix ta kʼajkʼ te kʼalal xlemetnax ta yutil te horno, te skʼop jaʼ jich yaʼiyel te bin-utʼil ya xkʼopoj bayal snojel jaʼ.* 16 Ta swaʼel kʼab yichʼoj jukeb ekʼetik; ta ye yak ta lokʼel tal jun najtil espada te schaʼjejchel ay ye sok te juxbil ta leke, te sit yelaw xlemetnax xojobil jich te bin-utʼil kʼajkʼal te bayal yip ya xtile. 17 Te kʼalal la kile, yalon bael ta yok jich yilel te lajone.

La skajan te swaʼel kʼab ta jtojol sok jich la yalbon: «Mame xiwat. Joʼon te Sjajchibalon sok te Slajibalon, 18 sok joʼon te kuxulone. Lajon-a, pero kuxulonix ta sbajtelkʼinal, sok kichʼojbey sllaveul te lajel sok te Mukenale.* 19 Jich yuʼun tsʼibaya te bintik la awil, te bintik yak ta kʼoel ta pasel ta ora ini sok te bintik ya xkʼot ta pasel ta patile. 20 Jaʼ ini jaʼ te bin mato yakʼoj ta naʼel-a te Dios ta swenta te jukeb ekʼetik te la awil te kichʼoj ta jwaʼel kʼabe sok te jukeb skajtajib kʼajkʼ te pastiklanbil ta oro: te jukeb ekʼetik jaʼ skʼoplal te chʼul-abatetik yuʼun te jukeb congregacionetik, te jukeb skajtajib kʼajkʼ jaʼ señail te jukeb congregacionetike.