Josué

9 Te kʼalal la yaʼiyik stojol te bin kʼot ta pasel spisil te ajwaliletik te ayik ta stojol smalib kʼajkʼal yuʼun Jordán, jaʼik te machʼatik ayik ta witstikil, ta Sefelá, ta spisil stiʼiltiʼil te Mukʼul mar* sok ta yelaw te Líbano —te hititaetik, amorreoetik, cananeoetik, perizitaetik, heveoetik sok te jebuseoetik—, 2 jun-nax la schap skʼopik ta yakʼbeyel guerra te Josué sok te israeletik.

3 Jaʼnix jich, te yajwalul te Gabaón la yaʼiyik stojol te bin la spas te Josué ta stojol te Jericó sok te Hai. 4 La stuuntes te spʼijilik, jich yuʼun la yakʼbeyik skuch te sburroik kʼaʼ costaletik te banti la yakʼik bael te sweʼelik sok la yichʼik bael pokoʼ nujkuletik yuʼun vino te chʼiʼemikix* sok te pakʼantaybilikixe. 5 La slapik bael stepik o xanabik te pokoʼbenixe sok te pakʼantaybilikixe, jaʼnix jich pokoʼbenix te skʼuʼ spakʼike. Kʼax teʼubenix sok wuyemix te pan yichʼojik baele. 6 Jich bajtik ta stojol te Josué ta Guilgal te banti ay te scampamento, jich la yalbeyik te Josué sok te winiketik yuʼun Israel: «Kʼax namal* te banti talemonkotike. Akʼa jchap jkʼoptik». 7 Pero, te winiketik yuʼun Israel jich la yalbeyik te heveoetik: «¿Bin yuʼun ya xbajt jchap jkʼoptik sok jaʼex? ¿Jaxan teme ma namal* te banti ayex ta nainele?». 8 Jich la yalbeyik te Josué: «J-abatonkotik* awuʼun».

Te Josué jich la sjojkʼoylanbey: «¿Machʼaex-a sok banti talemex?». 9 Jich la yalbeyik te Josué: «Te j-abatetik awuʼun ini kʼax namal* talemonkotik ta swenta sbiil te Jehová te Dios awuʼune, melel kaʼiyojtik te pujkem skʼoplal sok spisil te bintik la spas ta Egipto 10 soknix spisil te bintik la spasbey te chaʼtul ajwaliletik yuʼun te amorreoetik te ayik ta jejch* mukʼul jaʼ Jordán, te jaʼik te ajwalil Sehón yuʼun Hesbón sok te ajwalil Og yuʼun Basán te ay ta Astarot. 11 Jich yuʼun, jich la yalbonkotik tal te mamaletik sok spisil te yajwalul te lum kuʼuntik ‹Baanik ichʼa bael aweʼelik te ya xtuun awuʼunik ta be. Jichme ya xkʼot awalbeyik «Ya kakʼ jbakotik ta abatinel ta atojolik; akʼa jchap jkʼoptik»›. 12 Te kʼalal lokʼonkotik tal ta jnatik yuʼun ya xtalotik liʼi, kʼixinto-a te pan ini. Pero ilawilik, teʼubenix sok wuyemix. 13 Te kʼalal la jpultik te vino ta nujkuletik ini yachʼilikto-a, pero ta ora ini chʼiʼemikix.* Jaʼnix jich, te jkʼuʼ jpakʼtik sok te jteptik o jxanabtik lajemikix ta skaj te kʼax namal* te banti talonkotike».

14 Te kʼalal jich la yaʼiyik stojol te winiketik yuʼun Israel, la yilbeyik te bintik yichʼojik tale, pero maba la sjojkʼoybeyik te Jehová. 15 Jich te Josué la schap skʼop sok te winiketik swenta ya x-ayin lamalkʼinal yuʼunik sok la yaltiklanbey ta jamal te kuxul ya xjilike, jich la yalik ta jamal-euk te jolaletik yuʼun te lume.

16 Te kʼalal ayix oxeb kʼajkʼal-a te la schap skʼopike, la yaʼiyik stojol te maba namal* te banti ayik ta nainele. 17 Jich yuʼun, te israeletik bajtik ta mukʼul lum yuʼunik sok ta yoxebal kʼajkʼal kʼotik tey-a; te mukʼul lum yuʼunik jaʼ te Gabaón, Kefirá, Beerot sok Quiryat-Jearim. 18 Pero, te israeletik maba la yakʼbeyik guerra, melel te jolaletik yuʼun te lume yalojbeyikix ta jamal-a te Jehová te Dios yuʼun Israel. Jich spisil te lume jajchik ta wulajanel ta kʼop ta stojol te jolaletike. 19 Ta swenta-abi, spisil te jolaletik jich la yalbeyik spisil te lume: «La kalbeytik ta jamal ta stojol te Jehová te Dios yuʼun Israel, jich yuʼun maʼyuk bin ya xjuʼ ya jpasbeytik. 20 Te bin ya xbajt jpasbeytik jaʼ ini: ya kakʼtik te kuxul ya xjilik swenta ma x-ilin Dios ta jtojoltik ta swenta te bin jamal la kalkotike». 21 Jich la yalikxan: «Akʼa kuxajukik, pero jaʼme ya stsobeyik tal siʼ sok ya skuchbeyik tal yaʼal spisil te lume». Jaʼme te bin la yalik ta jamal te jolaletik.

22 Jich yuʼun, te Josué la yikʼtiklan tal sok jich la yaltiklanbey: «¿Bin yuʼun te la aloʼlayonkotik te kʼalal jich la awalik ‹Kʼax namal* te banti talemonkotik›, pero maba namal te banti nainemexe? 23 Ta ora ini sok ta patil chopolme* akʼoplalik ya xkʼoex, spisil-ora moso ya xkʼoex. Yame atsobik tal siʼ sok yame akuchik tal jaʼ ta swenta te sna te Dios kuʼune». 24 Jich la sjakʼbeyik te Josué: «Te Jehová te Dios awuʼunik la yalbey ta mantal te Moisés te j-abat yuʼune te ya yakʼbeyex spisil te kʼinal ini sok te ya slajin spisil te yajwalul te kʼinal ta atojolik, jaʼ-abi la kaʼiykotik stojol. Jaʼ yuʼun la jxiʼkotik te ya alajinotike, jaʼ yuʼun jich la jpastik ini. 25 Ta ora ini, ayotikix ta akʼabik. Jich yuʼun pasa ta jtojoltik te bin lek ya awile sok te bin stojil ya awile». 26 Jaʼme te bin la spas te Josué ta stojolike; la skoltay lokʼel ta skʼab te israeletik, jich maba la yichʼik milel. 27 Ta kʼajkʼal-abi, te Josué la yal te jaʼ ya stsobeyik tal siʼ sok ya skuchbeyik tal yaʼal te lume soknix ta swenta te skajtajib chikʼbil majtanil yuʼun te Jehová te banti jaʼnix ya yal stukele, jaʼ te bin yakikto ta spasel jaʼto ta ora ini.