Génesis

23 Te jayeb jaʼbil kuxin te Sara, jaʼ 127 jaʼbil. 2 Te Sara laj ta Quiryat-Arbá —jaʼ te Hebrón—, te ay ta skʼinal Canaán. Te Abrahán okʼ sok la smel yoʼtan yuʼun te laj te Sara. 3 Te Abrahán la yijkitay jilel te sbakʼetal te yinam sok jich bajt yalbey te snichʼnab te Het: 4 «Te joʼone yakon ta nainel jich bitʼil jyanlum sok jbeom ta awolilik. Akʼbonik akʼinalik yuʼun ya jtuuntes ta mukenal. Jich ya xjuʼ ya jmuk tey-a te kiname». 5 Te snichʼnab te Het jich la yalbeyik te Abrahán: 6 «Chʼama awaʼiy jkʼoptik, kajwal. Te jaʼate, jaʼ jtul jwolwanej te tsabil yuʼun Dios* ta koliltik. Ya xjuʼ ya amuk te awinam ta lekil mukenal te ay kuʼuntik. Maʼyuk machʼa ta koliltik te ma xyakʼbat te mukenal yuʼun, swenta ya amuk tey-a te awiname».

7 Jaʼ yuʼun, te Abrahán la stejkʼan sba jajchel sok la snijan sba ta stojol te snichʼnab te Het 8 sok jich la yaltiklanbey: «Teme lek ya awilik te liʼ ya jmuk te kinam, aʼiya awaʼiyik stojol te bin ya kalbeyexe: kʼoponaik te Efrón te snichʼan Zóhar ta jtojol 9 te yakuk schonbon te chʼen yuʼun Macpelá, te jaʼ yuʼun sok te ay ta stiʼil bael te skʼinale. Akʼbonik jtoj ta asitik te jayeb plata stojole. Jich ya x-ayin jun lugar kuʼun te ya xjuʼ jtuuntes bitʼil mukenal».

10 Te Efrón nakal ta yolil te snichʼnab te Het. Tey-abi, ta sit te snichʼnab te Het sok spisil te machʼatik ya x-ochik ta yochibal te mukʼul lum yuʼune, te Efrón te hitita-winik jich la yalbey te Abrahán: 11 «¡Maʼuk, kajwal! Chʼama awaʼiy te bin ya kalbate. Ma jaʼuknax ya kakʼbat te chʼen, jaʼnix jich ya kakʼbat te kʼinal te banti aye. Ya kakʼbat ta sit te winiketik yuʼun te lume. Muka tey-a te awiname». 12 Tey-abi, te Abrahán la snijan sba ta stojol te ants winiketik te tey slumalik-ae 13 sok jich la yalbey te Efrón ta komonsitil: «Chʼama awaʼiy te bin ya kalbate. Teme lek ya awile, tsʼakalme ya jtojbat stojol te akʼinale. Tsaka te jayeb plata-takʼin ya kakʼbat yuʼun tey ya jmuk-a te kiname».

14 Te Efrón jich la yalbey te Abrahán: 15 «Kajwal, chʼama awaʼiy te bin ya kalbate. Te kʼinal ini 400 siclo* yuʼun plata stojol, pero maʼyuk bayal skʼoplal-abi. Baan muka tey-a te awiname». 16 Jich te Abrahán lek la yil te jayeb kʼanbot yuʼun te Efrón, la slik te 400 siclo* yuʼun plata ta sit te snichʼnab te Het: te yalal jaʼ jich te bitʼil ya stuuntesik-a te jchonbajeletike. 17 Jaʼ jich la yichʼ akʼel ta naʼel te bitʼil te skʼinal te Efrón te ay ta Macpelá te nopol* yiloj sba sok te Mamré —te kʼinal, te chʼen sok spisil te teʼetik te tey ayik-a—, jaʼ kʼax 18 ta stojol te Abrahán, te la sman ta sit te snichʼnab te Het sok ta sit spisil te machʼatik ya x-ochik ta yochibal te mukʼul lum. 19 Ta patil, te Abrahán la smuk te Sara, te jaʼ yinam, ta chʼen ta skʼinal Macpelá, te nopol* yiloj sba sok te Mamré —jaʼ te Hebrón—, te ay ta skʼinal Canaán. 20 Jich te kʼinal sok te chʼen te tey ay-ae ma jaʼukix yuʼunik-a te snichʼnab te Het, jaʼ kʼax ta stojol te Abrahán yuʼun ya stuuntes ta mukenal.