Levítico

26 »›Mame xa apasik diosetik te maʼyuk skʼoplalik, lokʼombaetik, balal tonetik te ya yichʼ ichʼel ta mukʼ sok mame xa apasik lokʼomba ta ton ta akʼinalik yuʼun ya akejan abaik ta stojol. Melel joʼon Jehovaon te Dioson awuʼunik. 2 Yame skʼan ya awichʼik ta mukʼ te sábado kuʼun sok yame skʼan ya awichʼik ta mukʼ te chʼul awilal kuʼun. Joʼon Jehovaon.

3 »›Teme ya atʼunik te leyetik kuʼun sok ya achʼuunik spasel te bintik kaloj soknix ya akʼotesik ta pasel, 4 ya jtikunbeyex tal jaʼal ta mero yorail jich ya yakʼ sit te bintik ay ta lumkʼinal sok ya sitin te teʼetike. 5 Te yorail smajel te trigo jaʼtome ya sta sba sok te yorail stsobel te tsʼusube, te yorail stsobel te tsʼusub jaʼtome ya sta sba sok te yorail tsʼunbajel. Yame xweʼex jaʼto te kʼalal ya xnoj achʼujtik, junme awoʼtan ya xnainex ta akʼinalik. 6 Ya kakʼ lamalkʼinal ta akʼinalik, junme awoʼtan ya xwayex sok maʼyuk machʼa ya xiwtesex. Ya kakʼ te maba ya x-ayin jtiʼawal chambalametik ta akʼinalik, ya kakʼ te ma xtal guerra ta atojolik. 7 Ya anutsik bael te akontratakik, jichme ya alajinik ta espada awuʼunik. 8 Joʼtulex ya anutsik bael 100 ta tul, 100 ta tulex ya anutsik bael 10 mil ta tul, yame xlajik ta espada awuʼunik te akontratakik.

9 »›Yame kakʼbeyex awilik te lek kilojex sok ya kakʼ te ya x-ayin* bayal awal anichʼnabik sok te ya apʼol abaik, jich ya jkʼotes ta pasel te chapbilkʼop la jpas ta atojolik. 10 Te kʼalal yakex ta sweʼel te sit awal tsʼunubil yuʼun te jayeb jaʼbil kʼaxe, ya skʼan ya alokʼesik yuʼun tey ya awotsesik te yachʼil sit awal tsʼunubil. 11 Yame kakʼ ta awolilik te nailpakʼ templo kuʼun, jich maba ya jpʼajex. 12 Joʼon ya xbeenon ta awolilik sok Diosonme ya xkʼoon awuʼunik, yan te jaʼexe jaʼ lum kuʼun ya xkʼoex. 13 Joʼon Jehovaon te Dioson awuʼunik te la jlokʼesex tal ta skʼinal Egipto yuʼun maba ya awichʼikix mosoinel, la jwakʼ* te yugo-teʼ* awuʼunik sok la kakʼ te atoyoj ajolik ya xbeenex.

14 »›Pero, teme maba ya achʼam awaʼiyik sok maba ya achʼuunik spasel te mantaliletik-abi, 15 teme ya apʼajik te leyetik kuʼun sok maʼyuk skʼoplal ta awoʼtanik te bintik jchapoj te jich ma xa achʼuunik spasel spisil te bintik kaloj soknix te ya alajinbeyik skʼoplal te chapbilkʼop kuʼun, 16 te joʼone jichme ya jpas ta atojolik: yame jtikunbeyex tal tulan wokoliletik sok sak obal sok kʼajkʼ te ya slajin asitik soknix te ya slajinbey yip te abakʼetalik. Tojolme ya awaʼiyik tsʼunbajel, melel te akontratakik jaʼme ya sweʼik te bin ya xlokʼ. 17 Yame kil jba sok te jaʼexe, jichme ya awichʼik tsalel yuʼun te akontratakike. Te machʼatik ya spʼajex yame stsʼoʼex* ta tekʼel, manchukme maʼyuk machʼa yak snutsbelex ya xlokʼex ta anel.

18 »›Manchukme jich ya jpasbeyex te jichnanix maba ya awaʼiybonik te jkʼope, yame kakʼbeyex jukebxan buelta castigo yuʼun te amulike. 19 Yame jlajinbeyex te tulan toybail awuʼunike. Ya kakʼ te ya xkʼot jich te bin-utʼil hierro te chʼulchan sok te bin-utʼil cobre te balumilal. 20 Tojolnax ya alajin awipik, melel maʼyuk bin ya yakʼ te lumkʼinal sok maba ya yakʼ sit te teʼetik te ay ta kʼinal.

21 »›Pero, teme yananix akontrainonik-a sok te maba ya akʼan ya awaʼiybonik te jkʼope, yame kakʼbeyex jukebxan buelta castigo jaʼ chikan te amulike. 22 Yame jtikunbeyex jtiʼawal chambalametik te ya slajin te awal anichʼnabik, yame slajinbeyex te alakʼil chambalametik* awuʼunik sok ya spejkʼan te jayebex ta tul sok jochol ya xjil te beetik awuʼunike.

23 »›Manchukme jich-abi maba ya akʼan ya awakʼ abaik ta tojobtesel kuʼun sok yananix akontrainonik-a, 24 jaʼnix jich joʼon ya jkontrainex, joʼon-nix yame kakʼbeyex jukeb buelta castigo yuʼun te amulike. 25 Ya kakʼ te ya awichʼik kontrainel ta espada yuʼun ya awichʼik castigo ta skaj te la alajinbeyik skʼoplal te chapbilkʼop kuʼune. Manchukme ya anakʼ abaik ta mukʼul lum awuʼunik, ya jtikun tal chamel ta atojolik sok ya awichʼik akʼel ta skʼab te akontraike. 26 Te kʼalal ya jlajinbeyex te aweʼelike, lajuntul antsetik ya swo te aweʼelik ta jun-nax horno sok pʼisbil ya spukbeyex. Manchukme ya xweʼex, maba ya xnoj achʼujtik yuʼun.

27 »›Manchukme jich-abi maba ya awaʼiybonik te jkʼop sok yananix akontrainonik-a, 28 jaʼnix jich joʼon ya jkontrainex, joʼon-nix yame kakʼbeyex jukebxan buelta castigo yuʼun te amulik 29 te jich ya aweʼbeyik sbakʼetal te achʼix keremetik awuʼunike. 30 Ya jin te toyol chʼul awilaletik awuʼunik, ya jlajin te skajtajib schikʼojibal pom awuʼunik, yame jbusan te abakʼetalik ta sba te lokʼombaetik awuʼunik te ilobtik* sba te ma kuxulik, yame kilayex te jich ya xnamajon* ta atojolik. 31 Ya kakʼ ta lajinel ta espada te mukʼul lumetik awuʼunike. Ya jin te chʼul awilaletik awuʼunik sok maba ya kaʼiybey yikʼ te milbil majtaniletik awuʼunik te sumetnax* yikʼe. 32 Sok ya kakʼ te jochol ya xjil te alumalike sok chamnax yoʼtanik* ya yilik te lumkʼinal te akontratakik te ya xnainik tey-a. 33 Joʼon ya jpukex bael ta nacionetik sok ya kakʼ ya snutsex sok yespadaik te akontratakike; jochol ya xjil te akʼinalik sok ya yichʼ jinel te mukʼul lumetik awuʼunike.

34 »›Yame skux yoʼtan te kʼinal te jayeb kʼajkʼal jochol ya xjil te kʼalal ayexto ta skʼinal te akontratakike. Ta tiempo-abi yame skux yoʼtan te kʼinal te jayeb kʼajkʼal maba la skux yoʼtane. 35 Te jayeb kʼajkʼal jochol jile yame skux yoʼtan, melel maba la skux yoʼtan awuʼunik te jayeb kʼajkʼal nainex tey-ae.

36 »›Te machʼatik kuxul ya xjilik ya kakʼ te ya xnoj xiwel ta yoʼtanik te kʼalal ayik ta skʼinal te skontratakik. Ya xlokʼik bael ta anel ta skajnax te ya yaʼiybeyik skʼop te yabinal teʼ te ya yichʼ tijel yuʼun te ikʼe. Yame x-anik bael jich te bin-utʼil ay machʼa ya yichʼ nutsel ta espada, ya xyalik manchukme maʼyuk machʼa yakik ta nutsel yuʼun. 37 Ya sten sbaik jich te bin-utʼil ay machʼatik yakik ta anel yuʼun espada, manchukme maʼyuk machʼa yakik ta nutsel yuʼun. Ma xjuʼ awuʼunik stsalel te akontratakik. 38 Yame xlajex ta skʼab te nacionetik sok yame awichʼik lajinel yuʼun te akontratakik. 39 Te machʼatik kuxul ya xjilike yame xkʼaʼik ta skʼinal te akontratakike. Jich, yame xkʼaʼik ta skaj te smul te statik. 40 Jich yuʼun yame yalik ta jamal te smulik sok te smulik te statik soknix te bitʼil ma jun yoʼtan la yakʼ sbaik, sok ya yakʼik ta naʼel ta jamal te ma jun yoʼtan la yakʼ sbaik ta jtojol te kʼalal la skontrainonike. 41 Ta yorail-abi, jaʼnix jich ya jkontrainlan sok yame kikʼtiklan bael ta skʼinal te skontratakik.

»›Jichniwan ya spejkʼan te yoʼtanik te maba yichʼoj circuncisión,* jichme ya stoj te smulike. 42 Ya jultes ta koʼtan te chapbilkʼop la jpas sok te Jacob sok te la jpas sok te Isaac, soknix ya jultes ta koʼtan te chapbilkʼop la jpas sok te Abrahán, sok ya jultes ta koʼtan te lumkʼinale. 43 Yame skux yoʼtan te lumkʼinal te jayeb kʼajkʼal stukel ya xjile sok maʼyuk machʼa ya xkuxin tey-a, sok jich ya stoj te smulik ta skaj te la spʼajik te bintik jchapoj sok te la yilayik te bintik kaloj. 44 Manchukme jich ya jpas ta stojolik te kʼalal ayik ta skʼinal te skontratakik, te joʼone maʼyuk bin-ora ya jpʼaj ta jkʼaxel sok maba ya kilay te jkʼaxel ya jlajinlan yuʼun, melel jich ya yichʼ lajinbeyel skʼoplal te chapbilkʼop la jpas ta stojolik, yuʼun joʼon Jehovaon te Dioson yuʼunike. 45 Ta swenta slekilalik ya jultes ta koʼtan te chapbilkʼop la jpas sok te antiguo smeʼ statik te la jlokʼeslan tal ta skʼinal Egipto ta sit te nacionetik swenta Dioson ya xkʼoon yuʼunik. Joʼon Jehovaon›».

46 Jaʼik te mantaliletik ini, te bintik schapoj sok te leyetik te la schap te Jehová sok te israeletik ta wits Sinaí ta swenta te Moisés.