Te lek yachʼil kʼop ya yal te Marcos

3 Te Jesús och yan buelta ta jun sinagoga, ay jtul winik tey-a te chamen schial te jchʼix skʼabe. 2 Te fariseoetik jaʼnax yakik ta smaliyel yilik teme ya slekubtes te winik ta skʼajkʼalel sábado, yuʼun jich ya slebeyik smul-a te Jesuse. 3 Tey-abi, te Jesús jich la yalbey te winik te chamen schial te jchʼix skʼabe: «Tejkʼana aba liʼ ta olil». 4 Te Jesús jich la yalbey te fariseoetike: «¿Bin ya xjuʼ ta pasel ta skʼajkʼalel sábado? ¿Jaʼbal te bin lek, o jaʼbal te bin ma lekuke? ¿Jaʼbal te skoltaybeyel skuxlejal jtul ants winik, o jaʼbal te ya kakʼtik te ya xlaje?». Jich maʼyuk bin la yalikix-a. 5 Ilinem te Jesús kʼalal la yil te machʼatik ay ta sjoyobale, sok kʼaxto la smel yoʼtan te kʼalal la yil te tulan te yoʼtanike. Tey-abi, jich la yalbey te winike: «Xachʼa te akʼabe». Te kʼalal la xachʼ te skʼabe, lekub. 6 Jich yuʼun, te fariseoetik lokʼik bael tey-a sok oranax bajt stsob sbaik sok te winiketik yuʼun te Herodes yuʼun ya schapik te bin-utʼil ya smilik te Jesuse.

7 Pero, te Jesús bajt ta stiʼil mar sok te jnopojeletik yuʼune sok tʼunot bael yuʼun kʼax bayal ta tul ants winiketik te talemik ta Galilea sok ta Judea. 8 Jaʼnix jich tʼunot yuʼun kʼax bayal ta tul ants winiketik te talemik ta Jerusalén, ta Idumea, ta jejch Jordán sok ta lumetik te ay ta sjoyobal te Tiro sok Sidón, melel la yaʼiyik stojol spisil te bin yak ta spasel te Jesuse. 9 Jich yuʼun, te Jesús la skʼanbey te jnopojeletik yuʼun te yakuk schajpanbeyik jun barco yuʼun jich maba ya xtenot yuʼun-a te ants winiketike. 10 Melel bayal machʼatik slekubtesojix-a, spisil te machʼatik tsakbilik ta tulan chamel stenten-nax sbaik yuʼun ya skʼan ya spikik te Jesuse. 11 Jaʼnix jich, te pukujetik la skejan sbaik ta stojol te Jesús te kʼalal la yilike, jich yakik ta aw: «¡Jaʼat sNichʼanat te Diose!». 12 Pero, bayal buelta la yaltiklanbey ta mantal te manchuk ay machʼa ya yalbeyik te machʼanix-a te Jesuse.

13 Patil mo bael ta wits te Jesús sok la stikun ta ikʼel te machʼatik ya skʼan stukele, jich la stsob sbaik sok. 14 Jich yuʼun la stsob 12 ta tul te la yakʼbey sbiilin jpuk-kʼopetik. Jaʼik te machʼatik ya xjokinotik ta beel yuʼun, sok te ya stikunlan bael ta scholel te skʼop Diose, 15 sok la yakʼbey tulan yaʼtelik ta slokʼesel pukujetik.

16 Te 12 ta tul winiketik la stsob te Jesuse tey ochem-a te Simón (te jaʼnix jich la yakʼbey sbiilin Pedro), 17 te Santiago sok te Juan te jaʼ snichʼnab Zebedeo (te jaʼnix jich la yakʼbey sbiilin Boanerges te ya skʼan ya yal «snichʼnab chawuk»), 18 te Andrés, Felipe, Bartolomé, Mateo, Tomás, Santiago snichʼan Alfeo, Tadeo, Simón te Cananita* 19 sok te Judas Iscariote (te machʼa la yakʼ ta kʼabal te Jesuse).

20 Ta patil, te Jesús och bael ta yutil na, jaʼnix jich la stsob sbaikxan tal bayal ta tul ants winiketik te ma juʼ weʼikix yuʼune. 21 Te kʼalal la yaʼiy stojol te sfamilia te bin yak ta kʼoel ta pasele, bajt sleik yuʼun ya yikʼik bael, melel jich la yalik: «Sojkemix sjol». 22 Pero, te fariseoetik te talemik ta Jerusalén jich la yalik-euk: «Uʼuninbil yuʼun te Belcebú.* Ya slokʼes pukujetik ta swenta yuʼel te jolal yuʼun te pukujetike». 23 Pero la skʼanbey te yakuk xnoptsajik* tal ta stojole sok jich la yaltiklanbey ta lokʼombakʼop: «¿Bin-utʼil ya sten lokʼel Satanás te Satanase? 24 Teme ya skontrain sbaik te ants winiketik te wentainbilik yuʼun jtul ajwalile, yananix xjin-a te mantaltesel yuʼune. 25 Jaʼnix jich, teme talel kʼaxel ya skontrain sba te jun familiae, yananix xjinik-a. 26 Jaʼnix jich-euk, teme stukel ya skontrain sba te Satanás sok teme ya xat sbae, ma xjuʼ ya xjalaj te wentainel yuʼune sok ya xlaj skʼoplal. 27 Jaʼnix jich, teme ay machʼa ya skʼan ya x-och ta sna jtul winik te bayal yipe sok te ya skʼan ya yelkʼanbey te bintik ay yuʼune, nail ya skʼan ya schuk te winik-abi. Jaʼnaxme jich ya xjuʼ ya yelkʼanbey te bintik ay yuʼune. 28 Jamal ya kalbeyex te ya sta perdón te machʼa ya spas biluk mulil sok te ya sbolkʼoptay te bintik chʼultesbile. 29 Pero, te machʼa ya sbolkʼoptay te chʼul espiritue,* maʼyuk bin-ora ya sta perdón stukel. Sbajtelkʼinal ay smul». 30 Jich la yal te Jesús ta skaj te jich la yalike: «Uʼuninbil yuʼun pukuj».

31 Tey-abi kʼot te snan* sok te yijtsʼinab te Jesuse, pero tejkʼajik jilel ta fuera, ay machʼa la stikunik bael yuʼun ya yikʼ tal te Jesuse. 32 Bayal ants winiketik nakajtik ta sjoyobal te Jesuse. Jich albotik yuʼun: «Ilawil, te anan* sok te awijtsʼinabe tekʼajtik ta fuera, yak slebelatik». 33 Pero, jich la yal te Jesús: «¿Machʼa-a te jnane* sok machʼatik-a te kijtsʼinabe?». 34 La yiltiklan te machʼatik nakajtik ta sjoyobale sok jich la yal: «¡Jaʼik jnan* ini sok jaʼik kijtsʼinab ini! 35 Spisil te machʼa ya spasbey skʼanojel yoʼtan te Diose, jaʼ jbankil, jwix, kijtsʼinab sok jaʼ jnan».*