Yaʼtel te Jpuk-kʼopetik

7 Te mukʼul sacerdote jich la sjojkʼoybey te Esteban: «¿Melelbal te bin la yalik ta atojole?». 2 Jich la yal te Esteban: «Kermanotak sok tatiletik, aʼiya awaʼiyik stojol. Te Dios te ay yutsilal chiknaj ta stojol te antiguo jtatik Abrahán kʼalal ay ta skʼinal Mesopotamia, te kʼalal mato nainem ta skʼinal Harán, 3 jich albot yuʼun te Diose: ‹Ijkitaya jilel te alumale sok te jayeb machʼatik ay bin awutoj aba soke, baan ta kʼinal te ya kakʼbat awile›. 4 Jich lokʼ bael ta skʼinal caldeoetik sok bajt ta nainel ta skʼinal Harán. Te kʼalal lajix-a te state, Dios la yikʼ tal ta kʼinal te banti yakex ta nainel ta ora ini. 5 Manchukme jich-abi, maba akʼbot skʼinal ni jaʼuk te banti ya xjuʼ ya yakʼ te yoke. Pero, jamal albot yuʼun Dios te ya x-akʼbot skʼinalin sok patil ya skʼinalin te stsʼumbale manchukme mato ayuk snichʼan-a. 6 Jaʼnix jich albot yuʼun Dios te jyanlum ya xkʼot te stsʼumbal ta yan kʼinal te ma jaʼuk yuʼunik, ya xmosoinotik yuʼun te ants winiketik tey-ae sok ya yichʼik utsʼinel 400 jaʼbil. 7 Jich albot yuʼun te Diose: ‹Joʼonme ya kakʼbey castigo te nación te ya smosoin te atsʼumbale›. Jich la yalxan: ‹Ta patil yame xlokʼik bael tey-a, yame xtal spasik chʼul aʼtelil ta jtojol liʼ ta lugar ini›.

8 »Jaʼnix jich la yakʼbey te chapbilkʼop yuʼun circuncisión,* jich yuʼun te Abrahán te kʼalal ayin* te snichʼan te jaʼ te Isaac la yakʼbey circuncisión ta swaxakebal kʼajkʼal yayinel. Te snichʼan te Isaac jaʼ te Jacob, te snichʼnab te Jacob jaʼ te 12 ta tul tatiletik. 9 Te tatiletik-abi tal sbikʼtal yoʼtanik ta stojol te José sok la schonik bael ta Egipto. Pero jokinbil yuʼun Dios te José, 10 la skoltay ta spisil swokol sok la yakʼbey spʼijil yoʼtan ta stojol te faraón te ajwalil yuʼun Egipto sok te lekuk ya x-ilot yuʼune. Jich yuʼun, te faraón la yakʼbey yaʼtel ta ajwalil ta Egipto sok te ya xwentainbot spisil te bin ay ta snae. 11 Pero tal tulan wiʼnal ta spamal skʼinal Egipto sok ta Canaán, jich kʼot ta pasel, la yakʼ tulan wokolil. Jich yuʼun, te antiguo jmeʼ jtatike jkʼaxel maʼyuk sweʼelik. 12 Pero, te Jacob la yaʼiy stojol te ay weʼelil* ta Egipto, jich yuʼun la stikun bael tey-a ta sbabial buelta te antiguo jmeʼ jtatike. 13 Te kʼalal kʼotik ta schebal bueltae, te José la yakʼ sba ta naʼel ta stojol te sbankiltak, jich te faraón la snaʼ stojol te ay sfamilia te José. 14 Jich yuʼun, te José la stikun ta alel te yakuk yikʼik tal te stat te jaʼ te Jacob sok spisil te machʼatik ay yuʼune: 75 ta tul ta spisilik. 15 Jich ko bael ta Egipto te Jacob sok tey laj-a, soknix tey lajik-euk-a te antiguo jmeʼ jtatike. 16 La yichʼbeyik bael te sbakʼetalik ta skʼinal Siquem sok tey la yichʼik mukel ta smukenal te Abrahán te la smanbey ta plata-takʼin te snichʼnab Hamor te ay ta Siquem.

17 »Te kʼalal nopol* ya sta yorail te ya xkʼot ta pasel te bin jamal albot yuʼun Dios te Abrahán, mukʼub te lume sok pʼolik ta skʼinal Egipto. 18 Jaʼto kʼalal och yan ajwalil ta Egipto te ma la snaʼbey sba te José. 19 Te ajwalil ini sok spʼijil la sloʼlay te jlumaltike, la sujik te meʼil tatiletik yuʼun ya yijkitayik te yal snichʼnabik swenta ya xlajik. 20 Ta yorail-abi ayin* te Moisés te kʼax tʼujbil* alale. Oxeb u la yichʼ chʼitesel ta sna te state. 21 Pero, te kʼalal la yichʼ ijkitayel, te yantsil nichʼan te faraón la yikʼ sok la schʼites jich bitʼil skerem-al. 22 Jich yuʼun, te Moisés la yichʼ nojptesel ta spʼijilik te egipcioetik. Ta melel, ay yip te skʼop sok te bintik ya spase.

23 »Jich yuʼun, te kʼalal tsʼakaj 40 yaʼbilale, tal ta yoʼtan te ya xbajt yil te bin-utʼil ay te yermanotak, jaʼ te snichʼnab Israel. 24 Te kʼalal la yil te ay jtul te yak ta utsʼinele, bajt skoltay sok la smil te egipcio te yak ta utsʼinwaneje, jich la yakʼbey spakol. 25 Te Moisés la skuy te ya xkʼot ta yoʼtanik te yermanotak te jaʼ ya xtuuntesot yuʼun Dios swenta ya x-akʼotik ta libre, pero ma jichuk kʼot ta yoʼtanik. 26 Ta yan kʼajkʼal la yil chaʼtul winiketik te yak smajbel sbaike, kʼan skomtiklan sok jich la yaltiklanbey: ‹Winiketik, awermano abaik, ¿bin yuʼun te ya amaj abaike?›. 27 Te machʼa yak ta yutsʼinel te yermanoe la skotpʼin* te Moisés sok jich la yalbey: ‹¿Machʼa la yakʼat ta ajwalil sok ta juez ta jtojoltik? 28 ¿Yuʼunbal ya akʼan ya amilon jich bitʼil la amil te egipcio te wojeye?›. 29 Te kʼalal la yaʼiy stojol te Moisés, lokʼ bael ta anel sok kuxin jich bin-utʼil jyanlum ta skʼinal Madián, te banti ayin chaʼtul snichʼnab.

30 Kʼalal kʼax 40 jaʼbil ta patil, chiknaj jtul chʼul-abat ta stojol ta jochol takin kʼinal ta wits Sinaí, ta jpejt* chʼix te yak ta tilele. 31 Te Moisés chamnax yoʼtan* yuʼun te bin la yile. Te kʼalal noptsajxan* bael ta yilel ta lek, la yaʼiy te jich la yal te Jehová:* 32 ‹Joʼon te Dioson yuʼun te antiguo ameʼ atate, joʼon Dioson yuʼun te Abrahán, joʼon Dioson yuʼun te Isaac sok joʼon Dioson yuʼun te Jacob›. Te Moisés jajch ta nijkel yuʼun sok maba la skʼan la yilix-a. 33 Jich albot yuʼun te Jehová:* ‹Lokʼesa te atep o axanab, melel chʼultesbil te lum te banti tekʼelate. 34 Kilojix te bitʼil ya yichʼ utsʼinel te lum kuʼun te ay ta Egipto, kaʼiyojix stojol te yajkanike, jich yuʼun koonix tal ta skoltayel. Ta ora ini laʼme, yame jtikunat bael ta Egipto›. 35 Jaʼ te Moisés te la spʼajik te kʼalal jich la yalbeyike: ‹¿Machʼa la yakʼat ta ajwalil sok ta juez?›. Pero, jaʼnix te la yichʼ tikunel yuʼun Dios ta swenta te chʼul-abat te chiknaj ta stojol ta jpejt* chʼix yuʼun ya xkʼot bitʼil ajwalil sok jkoltaywanej. 36 Te winik ini la slokʼes tal te israeletik kʼalal la spas mukʼul aʼteliletik sok milagroetik* ta Egipto, ta mar Rojo sok te 40 jaʼbil ta jochol takin kʼinal.

37 »Jaʼ te Moisés te jich la yalbey te snichʼnab Israel: ‹Te Dios awuʼunik yame yakʼbeyex jtul j-alwanej te ya xlokʼ tal ta yolil te awermanotak jich bin-utʼil te joʼone›. 38 Jaʼ te Moisés te la sjokin te antiguo jmeʼ jtatik ta jochol takin kʼinal sok te kʼoponot yuʼun te chʼul-abat ta wits Sinaí. Jaʼnix te machʼa la yichʼ akʼbeyel te chʼul kʼopetik swenta kuxlejalil yuʼun ya yakʼbotik. 39 Te antiguo jmeʼ jtatike ma la skʼan la schʼuunbeyik skʼop, la spʼajik sok la skʼan yoʼtanik te ya sujtik bael ta Egipto 40 te kʼalal jich la yalbeyik te Aarón: ‹Pasbotik diosetik kuʼuntik te ya xnailaj bael ta jtojoltike. Melel ma jnaʼtik te bin la spas te Moisés te machʼa la slokʼesotik tal ta skʼinal Egipto›. 41 Jich yuʼun, ta yorail-abi la spasbeyik slokʼombail jkojt jkolel* toro, la yakʼbeyik chikʼbil majtanil sok la spasbeyik skʼin te lokʼombae. 42 Jich ijkitayotik yuʼun te Diose sok la yakʼ te jaʼ ya yichʼik ta mukʼ spisil te bintik ay ta chʼulchane, jich te bitʼil tsʼibaybil jilel ta sjun te J-alwanejetike: ‹Snichʼnab Israel, ¿mabal jichuk te ma jaʼuk la awakʼbonik majtaniletik sok chikʼbil majtanil te 40 jaʼbil ayinex ta jochol takin kʼinale? 43 Jaʼex te la akʼechik te nailpakʼ yuʼun Moloc sok te ekʼ yuʼun te dios Refán, jaʼ te lokʼombaetik la apasik yuʼun la awichʼik ta mukʼ. Jich yuʼun, namaltoxan* ya kakʼex bael-a te banti ay te Babilonia›, te xchie.

44 »Te kʼalal ayik ta jochol takin kʼinal te antiguo jmeʼ jtatike, yichʼojik-a te nailpakʼ yuʼun te Testigo Kʼop te la spas te Moisés jich te bin-utʼil albot ta mantal yuʼun Dios te jichuk ya spas te bitʼil la yile. 45 Jaʼ la yichʼik jilel te antiguo jmeʼ jtatike, la yichʼik ochel tal sok Josué te kʼalal la yuʼuntaybeyik skʼinalik te nacionetik te la sten lokʼel te Dios ta stojol te antiguo jmeʼ jtatike. Tey jil-a, jaʼto ta skʼajkʼalel David. 46 Lek ilot yuʼun Dios te David sok la skʼanbey te yakuk spasbey sna te Dios yuʼun te Jacob. 47 Pero, te machʼa la spasbey te snae jaʼ te Salomone. 48 Pero, te Machʼa toyol aye maba ya xnain ta naetik te pasbil ta skʼab ants winiketik. Jich bitʼil ya yal te j-alwaneje: 49 ‹Te chʼulchan jaʼ jmukʼul naktajib, te balumilal jaʼ skajtajib kok. ¿Bin yilel te na te ya apasbonike? —xchi te Jehová—.* ¿Banti ay te lugar te banti ya xjuʼ ya jkux koʼtane? 50 ¿Mabal jaʼuk yaʼtel jkʼab spisil te bintik aye?›.

51 »Winiketik te ma xa akʼanik tojobtesel, tulan awoʼtanik sok ma xa awaʼiyik kʼop, te jaʼexe spisil-ora ya akontrainik te chʼul espiritue.* Jich ya apasik-euk te bin la spasik te antiguo ameʼ atatik. 52 ¿Aybal jtuluk j-alwanej te ma la yichʼ utsʼinel yuʼun te antiguo ameʼ atatike? Ta melel, jaʼiknix la smilik te machʼatik nail la yalbeyik skʼoplal te ya xtal te machʼa toj yoʼtane, jaʼ te machʼa la awakʼik ta kʼabal sok te la amilike. 53 Jaʼex awichʼojik te Ley te la yakʼbeyex te chʼul-abatetike, pero maba achʼuunojik spasel».

54 Te kʼalal jich la yaʼiyik stojole, bayal ilinik yuʼun sok jajch skʼuxuxan yeik ta yilel te Esteban. 55 Yan te Esteban, nojel ta yoʼtan te chʼul espíritu,* la yil moel te chʼulchan sok la yilbey yutsilal te Dios sok la yil te Jesús te tekʼel ta swaʼel kʼab te Diose, 56 jich la yal: «¡Ilawilik! Ya kil te jamal te chʼulchan sok te tekʼel ta swaʼel kʼab Dios te sNichʼan te Winike».* 57 Tey-abi tulan awunik, la smak schikinik sok la sjumtayik ta stsakel. 58 La slokʼesik bael ta stiʼil te mukʼul lume, tey-abi jajch schʼojik ta ton. Te testigoetik la skʼojtsan jilel te snajtil kʼuʼik ta banti tekʼel jtul jchʼiel kerem te Saulo sbiile. 59 Te kʼalal yakik ta schʼojel ta ton te Estebane, jich la yal ta skʼanel wokol: «Kajwal Jesús, ya kakʼbat ta akʼab te jkuxlejale». 60 La skejan sba sok jich tulan la yal: «Jehová,* mame xa awichʼ ta wenta te mulil ini». Te kʼalal jich laj yoʼtan ta yalele, way sbakʼetal.