Éxodo

28 »Ta spisil te israeletik ikʼa tal te abankil Aarón sok te snichʼnab swenta ya xtuun kuʼun ta sacerdote te Aarón. Jaʼnix jich ya xtuun kuʼun ta sacerdote te Nadab sok te Abihú, te Eleazar sok te Itamar te jaʼik snichʼnab te Aarón. 2 Yame apasbey chʼul kʼuʼuletik te abankil Aarón swenta yutsil sok stʼujbilal. 3 Yame xkʼopojat sok spisil te machʼatik ya snaʼik ta lek aʼtel, jaʼik te machʼatik kakʼojbey spʼijil yoʼtanik, sok yame awaltiklanbey te yakuk spasik kʼuʼuletik swenta ya yichʼ chʼultesel te Aarón yuʼun jich ya xkʼot ta sacerdote kuʼun.

4 »Jaʼikme ini te kʼuʼuletik* te ya skʼan ya spasike: jun majkil tanil,* jlijkʼ efod,* jlijkʼ najtil kʼuʼul te maʼyuk skʼab, jlijkʼ jalbil najtil kʼuʼul te ya yichʼtiklan cuadroetik, jlijkʼ bejchʼil jolal te mukʼ skʼoplal sok jlijkʼ chujkilal. Yame spasik chʼul kʼuʼuletik ta stojol te Aarón sok te snichʼnab yuʼun jich ya xkʼot ta sacerdote kuʼun. 5 Te j-aʼteletik te pʼijubenik ta lek yame stuuntesik oro, hilo te azul sbonil, kuxul morado hilo te pasbil ta stsotsel tuminchij, tsajal hilo sok lekil lino.

6 »Yame spasik te efod* ta oro, hilo te azul sbonil, kuxul morado hilo te pasbil ta stsotsel tuminchij, tsajal hilo sok ta lekil lino te tsʼotbil. Yame skʼan te tsʼisbile. 7 Jaʼnix jich yame skʼan ya yichʼ cheb chʼin pakʼetik ta snejkʼelul te ya snupʼ te schaʼjejchelul te efod.* 8 Te jalbil chujkil chʼujtul te jun-nax ya xjil sok te efod* sok te jaʼ ya yakʼ te maba ya xlokʼ ta yawil yame skʼan ya yichʼ pasel-euk ta oro, hilo te azul sbonil, kuxul morado hilo te pasbil ta stsotsel tuminchij, tsajal hilo sok ta lekil lino te tsʼotbile.

9 »Tsaka chaʼpʼij ónice-ton sok tsʼibaya tey-a te sbiil te snichʼnab Israel. 10 Wakeb biililetik ya skʼan ya atsʼibay ta jujunpʼij tonetik jaʼ chikan te bitʼil ayinike.* 11 Te machʼa jaʼ yaʼtel tsʼibajel ta tonetik, akʼa stsʼibay te sbiil te snichʼnab Israel ta chaʼpʼij tonetik-abi jich te bin-utʼil ya yakʼ smarcail jun sello. Ta patil yame awakʼtiklan ta yawil te pasbilik ta oro. 12 Yame awakʼ te cheb tonetik ta sba te chʼin pakʼetik te ay ta snejkʼelul te efod* swenta snaʼojibal ya xkʼot ta stojol te snichʼnab Israel. Te Aarón yame yichʼ bael ta snejkʼel te sbiil te snichʼnab Israel ta stojol te Jehová ta swenta snaʼojibal. 13 Yame skʼan ya apasbey te yawil tonetik ta oro 14 sok chaʼlijkʼ tsʼotbil cadena te pasbil ta batsʼil oro te jich yilel te bin-utʼil chʼajan. Yame awakʼ stsak sba te cadenaetik-abi ta yawil te tonetike.

15 »Yame awakʼ te jtul jtsʼisomajel ya spas te majkil tanil* swenta schajpanel kʼop. Yame skʼan ya yichʼ pasel jich bitʼil te efod* te pasbil ta oro, hilo te azul sbonil, kuxul morado hilo te pasbil ta stsotsel tuminchij, tsajal hilo sok ta lekil lino te tsʼotbile. 16 Ya skʼan te cuadrado ya xjil te kʼalal ya yichʼ pakel, jtan kʼabal* snajtil sok jtan kʼabal sjamalul. 17 Yame awakʼtiklanbey chanchol tonetik ta yawil. Ta sbacholol yame yichʼ rubí-ton, topacio-ton sok esmeralda-ton. 18 Ta schaʼcholol yame yichʼ turquesa-ton, zafiro-ton sok jaspe-ton. 19 Ta yoxcholol yame yichʼ léshem-ton,* ágata-ton sok amatista-ton. 20 Ta schancholol yame yichʼ crisólito-ton, ónice-ton sok jade-ton. Yame yichʼik pasel ta oro te yawil spisil te tonetik-abi. 21 Ta tonetik yame yichʼ tsʼibayel te sbiil te 12 ta tul snichʼnab Israel. Te jujun biilil jaʼ skʼoplal te 12 ta chajp tsʼumbalil. Ta jujunpʼij ton yame yichʼ tsʼibayel jujun biilil jich te bin-utʼil smarcail sello.

22 »Jaʼnix jich ya apas tsʼotbil cadenaetik ta swenta te majkil tanil* te jich yilel te bin-utʼil chʼajan te pasbil ta batsʼil oro. 23 Yame apas cheb chʼokowiletik ta oro ta swenta te majkil tanil* sok yame awakʼ ta jujunxujk.* 24 Tey-abi, te chaʼlijkʼ cadenaetik te pasbilik ta oro yame akʼases ta cheb chʼokowiletik ta jujunxujk yuʼun te majkil tanil.* 25 Te sniʼ te chaʼlijkʼ cadenaetik yame skʼan ya akʼases ta jujun yawil te tonetik, ta patil yame skʼan ya awakʼ ta sba te chʼin pakʼetik te ay ta snejkʼel te yelaw efod.* 26 Jaʼnix jich yame apas cheb chʼokowiletik ta oro sok yame awakʼ ta jujunxujk stiʼil ta spat te majkil tanil* te staoj sba sok te efod.* 27 Jaʼnix jich yame apas yan cheb chʼokowiletik ta oro ta yelaw te efod* ta yeʼtal koel te cheb chʼin pakʼetik, te ay ta snejkʼelul te nopol* te banti ya yichʼ chukel te efod, ta sba te jalbil chujkil chʼujtul. 28 Swenta maba ya stij sba ta yawil te majkil tanil* yame yichʼ chukel ta chʼajan te azul sbonil ta chʼokowiletik yuʼun te majkil tanil sok ta chʼokowiletik yuʼun te efod* jich maba ya stij sba ta yawil te majkil tanil te ay ta yeʼtal te efod te ay ta sba te jalbil chujkil chʼujtul.

29 »Kʼalal te Aarón ya x-och ta Chʼul Awilal, yame skʼan ya yichʼ bael ta yoʼtan te majkil tanil* swenta schajpanel kʼop te banti tsʼibaybil sbiil te snichʼnab Israel ta swenta snaʼojibal Jehová spisil-ora. 30 Ta yutil te majkil tanil* swenta schajpanel kʼop yame awakʼ te Urim sok te Tumim.* Yame skʼan ya yakʼ ta sba yoʼtan te Aarón te kʼalal ya x-och stejkʼan sba ta stojol te Jehová. Te Aarón yame skʼan te spisil-ora ya yichʼ bael ta yoʼtan te bintik ya xtuun yuʼun ta yichʼel ta kʼop te israeletik kʼalal ya stejkʼan sba ta stojol te Jehová.

31 »Yame apas te najtil kʼuʼul te maʼyuk skʼab yuʼun te efod* ta hilo te azul sbonil. 32 Yame yichʼ jutel ta yolil te banti ya x-och te sjole sok yame yichʼ jalbeyel te stiʼil yuʼun te machʼa ya snaʼ jalab. Jichme sjamalul te bitʼil te majkil oʼtanil swenta maba ya schʼiʼ.* 33 Yame apas granadaetik* ta hilo te azul sbonil, kuxul morado hilo te pasbil ta stsotsel tuminchij sok ta tsajal hilo te ya awakʼtiklan ta sjoyobal te stiʼil. Ta yolil te granadaetik yame awakʼ jun chʼin campana te pasbil ta oro. 34 Ta sjoyobal stiʼil te najtil kʼuʼul te maʼyuk skʼab yame awakʼ jun chʼin campana te pasbil ta oro, jun granada,* jun chʼin campana te pasbil ta oro, jun granada te jich ta jich ya yichʼ akʼel bael. 35 Yame skʼan ya slap te Aarón te kʼalal ya x-abatin ta sacerdote. Yame skʼan ya xchiknaj skʼop te chʼin campanaetik te kʼalal ya x-och bael sok te kʼalal ya xlokʼ tal ta chʼul awilal ta stojol te Jehová yuʼun jich maba ya xlaj-a.

36 »Jaʼnix jich yame skʼan ya apas jun jayal pechel takʼin ta batsʼil oro te xlemetnax sok ayme bin ya atsʼibay tey-a jich te bin-utʼil ya yichʼ pasel jun sello te jich ya yale: ‹Talem ta stojol te Jehová te bin chʼultesbile›. 37 Yame skʼan ya achuk sok jun chʼajan te azul sbonil ta bejchʼil jolal te mukʼ skʼoplal sok yame skʼan ya awakʼ ta yelaw te bejchʼil jolal. 38 Te Aarón yame skʼan ya yichʼ bael ta stiʼba te jich ya skuchbey smul chikan machʼa ya sta smul ta swenta te bintik chʼultesbil, jaʼ te bin ya schʼultesik te israeletik te kʼalal ya yakʼik chʼul majtaniletik. Te jayal pechel takʼin spisilme-ora ya skʼan te ay ta stiʼba swenta lek ya x-ilotik yuʼun te Jehová.

39 »Jaʼnix jich yame apas jlijkʼ najtil kʼuʼul te jalbil ta lekil lino te ya yichʼtiklan cuadroetik, jlijkʼ bejchʼil jolal te mukʼ skʼoplal sok jlijkʼ chujkilal te jalbile.

40 »Jaʼnix jich yame apasbey snajtil kʼuʼ, schujkil sok sbejchʼil sjol te snichʼnab Aarón ta swenta yutsil sok stʼujbilal. 41 Yame awakʼbey slap te abankil Aarón sok te snichʼnabe. Yame amaltiklanbey aceite ta sjolik, yame awakʼtiklanbey yaʼtelik ta sacerdoteetik sok yame achʼulteslan. Jichme ya xkʼotik ta sacerdoteetik kuʼun. 42 Jaʼnix jich yame apastiklanbey skomil wexik ta lino swenta ya smuk sbakʼetalik-a. Yame skʼan ya xmukotik ta schʼujtik jaʼto kʼalal ta yaʼik. 43 Te Aarón sok te snichʼnab yame skʼan ya slapik te kʼalal ya x-ochik ta nailpakʼ ta swenta tsoblej o te kʼalal ya xnoptsajik* te banti ay te skajtajib chikʼbil majtanil ta swenta abatinel ta chʼul awilal. Jichme maba ya sta smulik sok maba ya xlajik. Jaʼ ini jaʼ jun mantalil te ma xlaj skʼoplal te ya skʼan ya skʼotes ta pasel te Aarón sok te stsʼumbale.