Apocalipsis

19 Ta patil la kaʼiy te ay machʼa tulan kʼopoj ta chʼulchan te jich yaʼiyel te bin-utʼil skʼop bayal ta tul ants winiketik. Jich yakik ta yalel: «¡Albeyaik yutsil skʼoplal te Jehová!* Te kolel, te yutsilal sok te yuʼel jaʼnax ay ta swenta te Dios kuʼuntike, 2 melel stojil sok smelelil te bin-utʼil ya x-ichʼawan ta kʼope, melel la yakʼbeyix castigo te j-antsinel* ants —jaʼ te machʼa la sbolobtesbey skʼoplal te balumilal ta swenta te mulwej* yuʼune— sok la yakʼbeyix stoj te la smalbey schʼichʼel te j-abatetik yuʼune». 3 Ta oranax jich la yalikxan yan buelta: «¡Albeyaik yutsil skʼoplal te Jehová!* Ta sbajtelkʼinal xtomet schʼailel ya xmo te j-antsinel* antse».

4 Te 24 ta tul mamaletik sok te chantul querubinetik* la skejan sbaik sok la yichʼik ta mukʼ te Dios te nakal ta mukʼul naktajibal, jich la yalik: «¡Jichuk! ¡Albeyaik yutsil skʼoplal te Jehová!».*

5 Jaʼnix jich, ay machʼa kʼopoj tal ta mukʼul naktajibal te jich la yal: «¡Albeyaik yutsil skʼoplal te Dios kuʼuntik, ta apisilik jaʼex te j-abatex yuʼun, jaʼex te axiʼojik* sok spisil mukʼ bikʼit».

6 Sok ay bin la kaʼiy stojol te jich yaʼiyel te bin-utʼil skʼop bayal ta tul ants winiketik, jich yaʼiyel te bin-utʼil ya xkʼopoj bayal snojel jaʼ sok jich yaʼiyel te bin-utʼil ya xkʼopoj chawuk. Jich yakik ta yalel: «¡Albeyaik yutsil skʼoplal te Jehová!* ¡Melel te Jehová* te Dios kuʼuntik, te Machʼa spisil ya xjuʼ yuʼune, jajchix ta wentainwanej! 7 Bayalukme stseʼelil koʼtantik sok sbujtsʼ koʼtantik, sok akʼa kalbeytik yutsil skʼoplal, melel kʼotix yorail te nujpunel yuʼun te Jkolel* Tuminchij sok chapalix te machʼa yinam ya xkʼote. 8 La yichʼix akʼbeyel slap lekil lino-pakʼ te xlemetnax sok te maʼyuk yabakul,* melel te lekil lino-pakʼ jaʼ señail te tojil aʼtelil la spasik te machʼatik chʼultesbilike».

9 Sok jich la yalbon te chʼul-abat: «Tsʼibaya ini: ‹Tseʼelnaxme yoʼtanik te machʼatik ikʼbilik ta weʼel uchʼel ta nujpunel yuʼun te Jkolel* Tuminchij›». Sok jich la yalbonxan: «Jaʼ ini jaʼ te bintik smelelil ya yal te Diose». 10 Ta swenta-abi la jkejan jba ta yok yuʼun ya kichʼ ta mukʼ. Pero, jich la yalbon: «¡Tsajtayame* aba! ¡Ma xa apas jich ini! Jaʼnax j-abaton jich te bin-utʼil jaʼat sok te awermanotak, te awichʼoj awaʼtelik ta yalbeyel skʼoplal te Jesús. ¡Jaʼ xa awichʼ ta mukʼ te Diose! Melel te albilkʼopetik jaʼ ta swenta te yalbeyel skʼoplal te Jesuse».

11 La kil te jamal te chʼulchan; tey-abi chiknaj jkojt sakal caballo. Te machʼa kajal tey-a ya sbiilin te Machʼa jun yoʼtan sok te Machʼa smelelil, sok stojil te bin-utʼil ya x-ichʼawan ta kʼop sok te bin-utʼil ya yakʼ guerra. 12 Te site yak ta tilel jich te bin-utʼil kʼajkʼ, sok ay bayal coronaetik ta sjol. Sok tsʼibaybil jun biilil te maʼyuk machʼa yan ya snaʼ, jaʼnax ya snaʼ stukel. 13 Slapoj najtil kʼuʼul te malbil* ta chʼichʼ sok jich sbiilinoj: Skʼop Dios. 14 Jaʼnix jich tʼunbil tal yuʼun te soldadoetik ta chʼulchan te kajajtik ta sakal caballoetik sok slapojik sakal lekil lino-pakʼ te maʼyuk yabakule.* 15 Ta ye yak ta lokʼel tal jun najtil espada te juxbil ta lek ye yuʼun ya yakʼbey guerra te nacionetik. Sok yame spastiklan ta mantal sok te sbaston takʼin. Jaʼnix jich yame stsʼoʼ* ta tekʼel te tsʼusubetik ta yawil spʼeojibal tsʼusub yuʼun te tulan yilinba te Dios, te Machʼa spisil ya xjuʼ yuʼune. 16 Ta snajtil kʼuʼ te slapoj, tey ta banti te yaʼe, ay jun biilil te tsʼibaybil tey-a te jich ya yal: Ajwalil yuʼun te ajwaliletik sok Ajwalil yuʼun te machʼatik ya xwentainwanik.

17 Jaʼnix jich la kil jtul chʼul-abat te tekʼel ta kʼajkʼal. Tulan awun ta yalbeyel spisil te jaʼmal mutetik te ya xwilik ta yolil chʼulchan: «¡Laʼik liʼi! Tsoba abaik tal ta swenta te smukʼul weʼel uchʼel te Diose. 18 Weʼbeyaik sbakʼetal te ajwaliletik, te comandanteetik yuʼun te soldadoetik, te winiketik te bayal yipik, te sbakʼetal caballoetik sok te machʼatik kajajtik tey-a, soknix spisil te sbakʼetal te ants winiketik, chikan teme mosoetik o libre ayik, sok mukʼ bikʼitetik».

19 Sok la kil te chambalam te xiʼbantik sba, te ajwaliletik te ayik ta balumilal sok te soldadoetik yuʼunike, spisil la stsob sbaik yuʼun ya yakʼbeyik guerra te machʼa kajal ta sakal caballo sok te soldadoetik yuʼune. 20 La yichʼ tsakel te chambalam te xiʼbantik sba sok te lotil j-alwanej jaʼ te machʼa la spas te señailetik ta stojol te chambalam te xiʼbantik sba, yuʼun jich la sloʼlay te machʼatik la yichʼik te marca yuʼun te chambalam te xiʼbantik sba sok te machʼatik la yichʼik ta mukʼ te slokʼombae. Ta schebalik kuxulikto-a te kʼalal la yichʼik chʼojel ochel ta pamal kʼajkʼ te yak ta tilel sok azufre. 21 Pero, te yantik la yichʼik milel sok te najtil espada te yak ta lokʼel tal ta ye te machʼa kajal ta caballo. Sok noj schʼujtik spisil te jaʼmal mutetik ta swenta te sbakʼetal te machʼatik la yichʼik milele.